ET May 16, 2017 News (Local, Thusoh Lahchom, Editorial, Blankfire)

ET May 16, 2017 News (Local, Thusoh Lahchom, Editorial, Blankfire)

729
0
SHARE

Gamsung mun chom chom’a ‘Meeyamgi numit’ kinit

Imphal, May 15: Tuni  (May 15) chun Singjamei Police Station a meeyamgi numit thupi tah in ana chelha in ahi. Kinguon a chun police officer ho le visitor ho jalhang tah in akihoulim’uvin aboinaho’u le alungkimlouna ho’u mailhaisel in ana kiseipeh to’uvin ahi.

Thoubal district Police in jong tuni chun meeyamgi numit anit in ahi. Kinguon a chun Thoubal SP, M Pradip in mipi ho akihoulimpi in aboinaho’u le ahahsatnaho’u mailhaisel in angailhah peh in ahi. Thoubal District Administration in jong  meeyamgi numit anit in ahi. Kinguon a chun Thoubal Deputy Commissioner , Shyamlal Poonia in Conference Hall a mipi akimupi in ahi. Kinguon a chun District Level Officer  hon jong pan ala’uvin ahi.  Kinguon a panla mipi ho chun  DC heng’a agentheina ho’u le kivaihopdan ahoibe cheh theina ding a lunggel aneiho’u aphongdoh’uvin ahi.  Kinguon a chun DC Poonia in welfare scheme jouse Insuon’a alhuntei na ding’a pan kilading ahi tin aseiye. District Administration hin mipi akiliem jing’e tin jong aseiyin ahi.

Jiribam District Administration in jong tuni chun DC Office, Jiribam a meeyamgi numit anit in ahi. Kinguon a chun SDC Head Quarter  H Dhananjoy  le official phabep in pan ala’uve.  Kinguon a chun district pumpi’a pat kikhom mipi hon agentheinaho’u le district kivaipohdan ahoibe theina ding’a lunggel aneiho’u aphongdoh’uvin ahi.Alangkhat kit’a, Jiribam District Police in jong Jiribam Police Guest House a meeyamgi numit anit in ahi.  District SP Hopson Sapam in kinguon a panla mipi ho gentheina ho angailhah peh in ahi. District sung’a chamna aumtheina ding’a mipi in Jiribam Police atosot ding in Hopson in kinguon a kikhom mipi ho temna aneiyin ahi.

Alang kahtna Kangpokpi DC Office Conference Hall’a People’s Day ana kimang in ahi. Kinguon’a panla ding mipi ho geisangtah a amun alhun jeh’u chun nilhahlam nidan 12:30 chun ana kipan bep in ahi.  Phat manthem hi mi khantouho kihetna gun khat ahi tolhon’a Kangpoki mipi ho’n jong tunung tengle phat manlutdan geldoh pum’a pan alah diu deisah ahi.

Tuni kinguon’a chun district sung kivaihopdan ahoibe theina ding in kihoulimna ngainom umtah tah anabol’uvin ahi.  Kinguon a panla ho chun Government of Manipur le  Concerned District Administration chung’a akipana aphongdoh’uvin ahi.

District HQ a pat km 65 vel gamla Tujang Waichong Sub Division a pat hung kalsuong tehsa pensioner hon kinguon a chun Kangpokpi District sung’a Zilla Sainik Board khat honlou apoimo dan aphongdoh’uvin ahi.

Kangpokpi DHQ sung aum khangdong hon district sung’a Community Health Centre Child Develivery case semhoina ding le Manipur State Illness Fund semdoh ahina ding in ngehna anei’uvin ahi. Chuleh Inter-School sports ahina ding bangtah a akiboltheina ding’a District Youth Affairs &Sports Officer (DYASO) khat jong  sorkar in akoina ding in ngehna anei in ahi.

Akikhom mipi ho chun PMAY-G (Pradhan Mantri Awaz Yojana-Gramin)  agangtheipen’a chepi ahina ding in ngehna anei’uvin ahi. Hiche keu hilouvin Kangpokpi District sunga licence thal neiho District Magistrate Senapati khut’a kon District Magistrate Kangpokpi khut noiya akikoina ding in jong ngehna anei’uvin ahi. Chuleh Child trafficking suhbei na ding’a Child Welfare Committee semdoh ding, Government School a proxy teacher kikoi suhbei ding,  public premises ho’a dandihlouva chengho nodoh ding chuleh CM in kitepna anei dungjuiya welfare scheme le infrastructure development agangtheipen’a tohdoh ding tiho hi aseikhom’uvin ahi. Deputy Commissioner in JMG (Joint Monitoring Group) heng’a lekha athot’a SoO noiya um thingnoi ho Peace Camp polam’a avale lou na ding’uva thupeh aneisah ding in jong mip in ngehna anei’uvin ahi.

‘Meeyamgi Numit’ mitamtah in seiphatna nei; numei tamtah in CM leh sorkar phatthei boh

Imphal, May 15: N Biren Singh lamkaina Manipur sorkar leh lamkai dang dang hon ‘Meeyamgi Numit’ (People’s Day) masapen agon toh kilhon in Biren lamkaina sorkar phatthei boh’a atam cheh cheh in ahi.

Monday nikho’a Chief Minister heng’a hahsatna ato thu pelut ding’a hung mikhat in, “Thil thah kipatna ahi’in, hitobang hi kahinkho’a kamu khapon, mipi in sorkar tahsanna anei hin natoh pha ho athahat sah cheh ding kakinepna ahi”, tin aseiye. Sorkar leh gamsung mi kikah’a kinaina aumthei nading’a sorkar in hitobang tohgon anei ahi. “Meeyamgi Numit, People’s Day’a pang atam in, keima boltheina lampi’a kithopina kapeh thei hi kipa um kasa’e”, tin CM in aseiyin ahi.

Hitobang toukhomna hi lha seh nisim 10 nikho seh leh umding ahi, tin Chief Minister in thuso miho heng’a aseiyin ahi. Alunggimna sei ding’a che’a numei khat in mitlhi pum’in, “Ka hahsatna jouse kasei ahi’in, CM in pan alah ding kakinepna ahi”, tin aseiye. Numei dang khat in hitobang natoh hi aum jom leh sorkar chung’a tahsanna len cheh cheh ding ahi, ati. Tuni’a toukhomna’a pang numei tamtah in Chief Minister leh sorkar phatthei aboh uvin ahi. Jingkah nidan 10’a kon nilhah nidan 4 chan toukhomna um ahi’in, district headquarter chom chom’a jong ‘People’s Day’ kimang ahi.

 

Aadhar card sem le print bolhon dan dihlouva mipi heng’a sum kilah’u

Imphal, May 15: Department concerned le state government hetpehna umlouvin Aadhar card sem le print bol’a pang phabep in mipi’a kon sum akilah jing’uvin ahi. Ahinlah hiche thu hi authority in amulou ham ahilou le akimumoh sah ham tihi gelthei tah khat chu ahi. Aadhar Card sem’a pang ho hin Aadhar card khat semna ding le print bolna ding in Dk.150 le dk.200 kikah ala’uvin ahi.

Alangkhat’a, GM Hall a pansa mi phabep in Aadhar Card print bolna ding in form Dk.10 in ahong kit’uvin ahi. Amaho hi sorkar in Aadhar Card print bolding’a anganse ham angamselouham tijong hetchen ahipoi.

Hitobang natoh ho hin mipi lungsung’a lungsa’ih na lentah asemdoh in ahi. Ajeh chu Aadhar card print bolho hin koima nganselouva abol’u ham ahilou leh sorkar thah thupeh dungjuiya abol’uham tihi kicheh lou ahi. Hitobang natoh kibol ho hi authority concerned in avetchil ding in lunggel thei mi phabep in ngehna anei’uvin ahi.

PDS noiya hopding anchang le Kerosene  jouse agent ho akipedohtai ti’a CAF & PD Minister in sei

Imphal, May 15: April le May lhasung a hopdoh ding anchang le achesa lhali sung pending a um kerosene  jouse Public District System in agent ho akipedohtai tin CAF & PD Minister Karam Shyam in tuni Old Secretariat, Office chamber a thuso miho akihoulimpi na’a chun aseiye. Mipi hon PDS item ho amulou’uva ahileh keima heng’a hehna aneitheiyu ahi tin jong aseiye.

Alangkhat’a Petrol pump ho vilna akineitolhon in petrol pump phabep in thao thenglou toh ahal’u akimudoh in , hitobang dandihlou bol petrol pump ho license kikahlha ding ahi tin Karam Shyam in aseiye.

AR hon operation abol NSCN-IM in demna nei

Imphal, May 15: NSCN-IM hon 32 AR hon operation abol sangtah in demna anei uvin ahi.

Thuso dungjuiya, AR hon May nisim 13 jingkah’a Purana Bazaar ‘B’, Dimapur’a Toivi Aye, Steering Committee Member kholna aneiyu ahi’in chule hiche nikho ma ma’a Notun Basti, Dimapur’a Tia, Joint Secretary, NSCN-IM inmun kholna aneiyu ahi. “AR hon angaicha louhel’a hitobang operation abol jing hi thoh lel ahitan, chule chamna atohkhah thei ahi. National worker holeh sepai ho kiloikhomna hi ahoilou pet tah ahi’in, hitia Assam Rifles hon hem-kham apalkeh jing hin thil asuhset cheh ding ahi”, ati.

Assam Rifles hohi ‘Friends of the Hills People” tia kiseiyu ahi’in, chapang chule themmona neilou insung asuhgim uva, thinglhangmi ho melma ahi-u avetsah-u ahi, tin NSCN-IM in thuso aneiyin, chule AR hon apet pet’a dan dihlouva operation abol uva, Naga ho asuhgim hi angah diuvin aseibe uvin ahi. Hiche jeh’a authority hon akiman lamkai hohi themmona neilou ahijeh’a ahin lhadoh diuvin temna anei uvin ahi.

Tuban’a kon NSCN-IM in hitobang thilsoh thipbeh’a avet tahlou din ahi, tin asei uvin, chule khonung’a thilsoh ho 32 AR ho mopohna hiding ahi, tin aseibe uvin ahi.

Relay hunger strike lahdoh hita

Imphal, May 15: Fire Services department ‘a recruitment exam post chom chom’a pang candidate hon ‘relay hunger strike’ abol Monday jingkah in aladoh tauvin ahi.

State sorkar leh kiphinna bol hon kinoptona asem toh kilhon’a kiphinna kiladoh ahi. May nisim 10 kah’a result aphon diuva candidate leh nu-leh-pa ten thumna aneiyu ahi’in, hiche phat sung’a result akiphon loujeh’a Keishampat Leimajam Leikai mun’a ‘relay hunger strike’ apat-u ahi.

‘Board of Education in India’ top 10 sunga Manipur pangjou lou

Imphal, May 15: Northeast india sunga schoolboard gup futuristic school board of india rankings 2017 ah top 10 ahh pangjou in ahi.

School boards gup lah ah, the Board of Secondary Education, Assam (SEBA) chuleh Meghalaya Board of School Education (MBoSE) chu marks 100 lah ah 47 amu toh lhon hon in a 4th na ahh apang hon in ahi.

Chuleh, Mizoram Board of School Education (MBSE) leh Assam Higher Secondary Education Council (AHSEC) chu marks 44 leh 42 amu toh lhon hon in a 6th naleh a 7th na ah apang cheh hon in ahi.

Chubaan ah, Nagaland Board of School Education (NBSE) leh Tripura Board of Secondary Education (TBSE) chu a marks 38 amu hontoh lhon in a 10th na ah apangkhom hon in ahi.

School board lah ah achungnungpen ah umchu marks 67 amu tohlhon in Bihar School Examination Board ahi in abaan ah Council for the Indian School Certificate Examination (SISCE) in marks 64 amu toh lhon in ani na  in aum in ahi chuleh  Jammu and Kashmir State Board of School Education (JKSBOSE) chu  marks 57 amu toh lhon in a 3rd na in apang in ahi.

Awards ho chu National Technology nikho a, Rethink India in India International Centre, New Delhi mun a ana peh u ahi.

Bhabananda leh Dwijamani in RS by-election ‘a ding nomination pelut

Imphal, May 15: BJP Manipur Pradesh president Kshetrimyum Bhabananda leh Manipur Pradesh Congress Committee vice president Elangbam Dwijamani in May nisim 25 nikho’a umding Rajya Sabha by-election’a ding’a nomination apelut tan ahi.

Achesa February nisim 28 nikho’a Rajya Sabha MP Haji Abdul Salam athi jouva kon Manipur Rajya Sabha seat khat seh hi a-ong’a um ahitai. Scrutiny Tuesday nikho leh umding ahi. Rajya Sabha MP hi state assembly member 60 in lhenna aneiding ahi. Congress MLA 6 in BJP ajop jouva Congress MLA tu’a hi house’a 22 bou um ahitai. BJP lamkaina sorkar hi LJP, Trinamool Congress, NPP chule NPF in atosot ahi’in, agom’a seat 38 anei ahi.

Sunday nikho’a LJP in by-election’a BJP tosot ding’a phondohna anei ahitai. Thoubal District MP Candidature Demand Committee in tu masang’a Outer Manipur assembly constituency ‘a assembly segment 8’a kon member alhen diuva thumna aneiyu ahi. Outer Manipur Parliamentary Constituency hi ST reserved ahijeh’a constituency 8’a voter hon vote alhah theiyu ahivang’a, candidate asot theilou ahi.

Bhavananda hi Sagolband Assembly constituency’a kon ahi’in, chule Dwijamani hi Hiyanglam constituency’a kon ahi. Hiyanglam in vote pe’a candidate son theilouva Manipur assembly constituency 8 lah’a khat ahi’in, chule Sagolband AC hi Inner Manipur Parliamentary constituency noiya um ahi.

NCFTSR Training a dinga kouna um

Imphal, May 15 (DIPR): National Council for Training & Social Research, New Delhi guonna noi’a training courses jat chom chom kibol ding ahin Government Department leh Autonomous bodies a kon na koi tobang  ajao nom aum leh liem ahi.

Hiche training program hi 21st June 2017 kipan ding chuleh course fee ho hi course alah dungjui uva apeh ding’u ahi. Koitabang entrepreneurs leh industrial sector chom chom ma kon’a ajao nom athanom aum leh  News Section, DIPR, Keishampat mun’a pung 11am to 4 pm ma doh chen thei ahi.

TKSU-GHQ Advisor kivohna kiloikhomna in sangtah a demna nei

Imphal, May 15: Achesa May nisim 14, 2017 nikho Yaiphakol, Churachandpur district, Manipur a Thadou-Kuki Students’ Union (TKSU-GHQ) a Advisor Lalminthang Haokip kivohna chungchang in kiloikhomna in asangpen in demna ahin neiyin ahi. Lalminthang Misao hi TKSU President lui jong ahi. Hitobang chonchan hi Ramdinsanga leh ajinu in thalih ding lungput neiya abol lhon ahin akiti. Atahsa thil hiem a kisutna maha aumin aha thohlel e jong akiti. Hitia deilou umtah a kibolna hi khonung’a aumkit louna ding’in Khaiminthang Lhanghal, Secretary, Info& Pub. TKSU (GHQ) in temna aneitoh kilhon in hitobang thilsoh aumkit le kimoh vetthim louding ahi tinjong aseikit e.

CAF & PD Minister in thil dihlou bol pump neiho chung’a action lading

Imphal, May 15: CAF and PD Minister K Shyam in Monday nikhon thao hal’a athenglou sem’a aum’e, ti photchenna akimu leh hitobang bol ho chung’a action kila ding ahi, tin aseiyin ahi.

Secretariat Complex’a CAF & PD Minister in thuso miho akimupi na’a chun, thao thenglou sem’a petrol pump police hon licence amat peh hohi photchenna akimudoh’a ahileh licence kikah ding ahi, tin aseiye. Alangkhat’a, Minister in April leh May lha’a PDS thil ho agent ho heng’a kihom ahitan, beneficiary hon ama ama agent khut’a kon akilah thei ahitai, tin aseiye. Chule PDS thil mulouva aumleh kaheng’a hehna asem thei ahi, tin aseibe’e.

SC in Triple Talaq chung thu seipan ta

Imphal, May 14: Supreme Court in tuni chun jikop leh nikah-halala chuleh tripel talaq chun chang thu legal validity toh kitoh’a kive lha ding ahi ati. Triple talaq chung chang thu’a hearing kinei na chun judge 5 hochu Chief Justice J S Khehar in alamkai in ahi. Top court in jong phat masa lang in triple talaq thu hi validity bou’a ki decide ding adang ema kisei lou ding ahi ati toh lhon in SC in jong amasapen na  validity  decide kibol ding thulhuhna akinei jou teng leh bou jikop leh nikahhalala thu kisei beb ding ahi ati. Vacation bench hon phat aum thei tah lou ding jeh in Triple talaq chung thu bou tu tadi’a kisei ding chunleh adang teni chu phat chom khat nading’a pending nga kikoi ding ahi ati.

Numei 1 thilong kimu

Imphal, May 15: Shamu Brick Firm, Patsoi Part IV mun’a kum 31’a upa numei kikhailih khat amudoh uvin ahi. Thulhut dungjuiya athi numeinu hi Sanjaram Ongbi Sakhi Devi, w/o Sanjaram Vishma Singh ahi’in, Tamukhong, Maphou Dam kom’a cheng ahi. Thi-long RIMS hospital morgue’a apolut tauvin ahi.

WW II 73 channa kin kimang ding

Imphal, May 15: World War II 73rd commemorative observation May nisim 20 nikho leh Imphal war cemetary leh Maibam Lotpa Ching, Bishnupur district’a kimang ding ahi.

World War II Imphal Campaign Foundation leh Tourism Forum Manipur lamkaina’a kimang ding ahi. Organiser hon asei dungjuiya, kin-gon hi war cemetary mun hi ‘tourism spot’ a dopsang nading chule gal lentah tah hon ichan geiya thilse alhun sah mipi’n ahet nading hilna ding ahi, tin aseiyui. Thulhut dungjuiya kin-gon’a Japan-India Ambassador panna’a gam 18’a kon delegates honjong pan alah diu ahi.

International Nurses Week kimang

Imphal, May 15: Tuni chun RIMS Nursing College guonna noiyin RIMS a International Nurses Week kinguon ana mang’uvin ahi. Kinguon a chun RIMS Director, RK Dinesh, Medical Superintendent, Ch Arunkumar,  RIMS Nursing College, Principal, H Jamuna le mipi phabep in pan ala’uvin ahi. Director RK Dinesh in kinguon a ahoulimna’a chun kihetthem tolou jeh’a damlou ho insungmite le hospital authority ho kah’a boina sohjing ho  hi thilumdan dinmun hetthemloujeh’a soh ji ahi ati. Chuleh mipi in jong healthcare sector hi jana apeh diuvin temna aneiyin ahi.

NIA in Dr.M.Shyamo Inmun raid bol

Imphal, May 15: National Investigation Agency (NIA) team khat in tuni chun JNIMS , Director lui , Dr.M.Shyamo chenna Inn  raid abol’uvin ahi. NIA team ho chu tumasangjep’a raid kibolna khat’a kimandoh mikhat in alamkai yin ahi.  Investigation team ho chun ipi case toh kisaiya Dr.Shyamo In raid abol’u ahi hetchen ahinaipoi.

Lunglailu luongdamsa jing nikho le kivui tading

Imphal, May 15: May nisim 5 ni’a genthei nikho hihen kipa nikho hijongle longlou hel’a adinpi ding’a akilhen mipa in lungsetna beihel’a anatha Lunglailu luongdamsa jing nikho le vuiliem ding in Chingmeirong Kabui vangkho’a cheng mipi hon thulhuhna aneita’uve.  Hiche thulhuhna hi tuni Chingmeirong Kabui vangkho’a  civil society organization ho le vengsung lamkai hon kihoulimna aneina’uva asemdoh ‘u ahi.

Dy CM in Road Show Car Rally hondohna nei

Imphal, May 15: Ahunglhung ding May nisim 16 apat May nisim 20 geiya chelha ding Shirui Lily Festival toh kisaiyin tuni chun Deputy CM, Y Joykumar in Kangla sung a  Road Show Car Rally hondohna aneiyin ahi.  Road show car rally hi Moirang gei lhai ding ahi.  Deputy CM  Y Joykumar in aseidan in tuni road show car rally hin thinglhang le phaicham kikah’a  kinlungsetna apunbe sah ding ahi ati.

Pangei Kailhang a social service kibol

Imphal, May 15: Parliamentary Secretary , N Indrajeet in tuni chun Pangei kailhang a social service hondohna aneiyin ahi.  Social service chu Swacch Bharat Mission noiya BJP Yuva Morcha in aguon ahi. Tuni’a kibol social service tobang hi aphat tin a hung kiboljing ding ahi tin N Indrajeet in aseiye.

Thusoh Lahchom

Moreh Hospital

Health Minister L. Jayenta Kumar in Moreh Hospital a angaicha thilkeu holeh doctor ho ahinkoi jeh in Tinthang Haokip, President, KSO, Moreh in kipathu aseiyin hitobang natoh hi Moreh mipite leh akimvel a chengho seh hilouvin gamsung leh mipite ngailut jal ahi tin aseiye. Hospital a doctor ho ahunglhun toh kilhon in amahon jong kitah tah leh atohdiu dol phate’a atoh diuvin temna aneiyin ahi.

NLF/KNO

Tuni (May 15) chun Kuki National Liberation Front/Kuki National Organisation (NKLF/KNO) Chief in Command Tonglenlal Haokip in thuso ahinbol dungjui in Letminthang Haokip @ H.L. Kuki, Ongunsat Haokip @ Gugun leh Thangkholal Haokip @ Lalboi hi tunia kipat kiloikhomna a kon’a kihaisah ahitan amaho hin kiloikhomna toh kisamkaina anei tapouve ati. Amaho natoh phat le set chungchang’a kiloikhomna in mo kipo louding ahitai tinjong aseiye.

Hepatitis B &C

Tuni chun LishamLok Thoubal vangkho’a one-day Hepatitis B and C awareness cum screening test ana bol’uvin ahi. Kinguon chun Manipur Network of Positive Peoples le LishamLok Thoubal vangkho haosapu’n kigom’a abol’u ahi. Kinguon a panla mi 70 lah’a chun mi khat Hepatitis C positive ahi. MNP+ in aseidan in tuni kinguon kimang chu mipi khankho ding gelkhohna jal’a kibol ahi ati.

Thi-long kimu

Sugnu Lamhang, Chandel district’a thi-long khat Sugnu vadung twi’a akiletna’a mudoh ahi. Athi Khamkhenkhup @ Khup (49) hi Sugnu block’a akimu hi ama kimuna nukhah pen ahi’in, achesa May nisim 13 nikho’a kon kiholmo ahitai. Police hon thi-long vadung’a konin aladoh uvin, post mortem bol ding’a apo tauve.

Airport’a meichang kiman

Imphal Airport’a lenna huikong E-222’a tou MTS Hoineihat Haokip, Kangpokpi thil pohna sakhao’a konin Monday jingkah nidan 9 don in 9 mm calibre meichang 91 aman doh uvin ahi. Amanu hi Guwahati jon’a che ding agotna’a thil kiman doh ahi’in, Singjamei police station’a apelut tauve.

Ganja po mi 2 kiman

37 AR hon achesa May nisim 11 nikhon Baladhan cha-lei, Harinagar, Cachar kom’a khamna theiya kivei mi 2 ganja kg 90 toh aman uvin ahi. Akiman teni police khut’a pehdoh ahitai.

 

Editorial

JMG Meeting a KNO leh UPF

                                      May 13 (2017) ni’a SoO JMG Meeting a kisei ho chu SoO umpat til’a kisei ho ahinalaiye ti thei ahi. SoO to kimatna Imphal a KNO leh UPF in govt toh toukhomna (kihouna) aneijiu hi lhaseh a boldi ahivang’a khatvei veileh umbepji, hichea kihouna jong hi ‘Political Talk’ thu lang sang’a SoO Ground Rule palkeh jeh ham, govt lang’in jong aboldidol abollou ho seina lang joh in aumdoh-e. Chubana’a KNO leh UPF ho khat le khat kihehtona (complaint) mun khat injong aumdoh thimtai. Abul’a pat Imphal a JMG toukhomna umsehleh SoO Group thingnoi hon Ground Rule to kikal’a sumdon, kitha kimat aboljiu hohi govt lang’in ahaseiji, alang khatna KNO le UPF honjong govt nin SoO Cadre ho Stipend kisan phate apehjilou thu apodoh jiuve. Tuchung JMG Meeting a kisei holah-a chun Designated Camp ho sahphatdi (repair) ti jong ahung hitai. Kum 10 hiloulaiya Camp ho sahphat, semphat ngailoi aumjong hi phatedom, alhoudi dom’a ana kisalou ham, govt akon’a camp phadom (lhoudom) sahnadi sum ahididol ana kipelouham, kipe’a ana kimoh sahsah ham tijong doh thei ahi. Tunaicha chun State govt nin Designated Camp hoa Cadre ijat umji mongnam ti hetna dia ‘Biometric Attendance’ lahdi ti gei aseiye. Ipi hileh SoO a um thingnoi cadre ho nehdi (ration) jong Designated Camp hoa ninglhingsetna akipehloudan leh Cadre hon lhaseh-a amudiudol Monthly Stipend hojong govt nin phate apehlou jeh-a SoO Cadre tamtah ho Camp a umlouva ama ama in’a toh thei thei kitohloi, sum lona thei theiya kiloloi umgam’a kisei jong hi govt in ahet thou mamadi ahi. Hitia SoO Cadre hon thalchoi adalhah uva thingnoi apan masang uva bang’a ol ol’a milham hinkho ahinman kitdiu hi asunglang’a ‘policy’ kiguongsa khat ahidi jong tahsan umtah ahi. Political Talk hi ningkum lang chun ana kipan’in hinlah tugeiya ‘Interlocutor’ (kihouna’a palai) dijong akichieh umloulai ahi. Hiche hi ivetleh ningkum chu Election masang ahijeh-a kihouna hi akipatna khat beh bol angaiye kiti hidi ahin tua Election kichaiya State govt jong Centre deibang govt akitundoh tah jeh hin Political Talk lang hi ahung machal jepdem, ahilouleh chomkhatpi hi thipbeh in ahung umdem ti jong seithei ahipoi.

                       Govt toh Political kihouna neina dia hi KNO leh UPF ho atum’a kihouna aneijing uva ipi seikhom, thumkhom diham tiho aseikhom jing u hileh govt injong kihoulhahna khat neipi’a pha ahi ti ageldi ahi. Hichu hitalouvin SoO Group holah a jong ‘political demand’ kibang neita’a akiseiji vang’a Group khatnin achombeh khat ahinseiji tiho umjing nalai ahi. Hiche ban’a Group khat le khat kikah-a kithatona umjing nalai ahi. Kithatona jeh-a kihouna machal loudi tina ahilou vang’a govt nin ahinpaome pithei ahi. SoO kinoptona hi kum khat a dia bou soi kikaiji ahin tua hi lha kit (June) leh SoO umjomna (extension) dia soi kaina phaat hipan kitdi ahitah jeh-a akichiehsa’a koidi ijat hamkhat umphaat ahitai.

Blankfire

Tulai hi mi koihi koi hia ipipi title akipoh hitam ahet hahsa tai. Dr. akitilela medical dr. ham doctorate joh ham kitita, Captain akitileh army captain bou hitalouva Club captain loi tam, Minister akitilela solkar minister bou hitalouva program a dia minister loi.