ET May 15, 2017 News (Local, Thusoh Lahchom, Editorial, Blankfire)

ET May 15, 2017 News (Local, Thusoh Lahchom, Editorial, Blankfire)

679
0
SHARE

CM in gamsung mipite lungkhat le thakhat a pan lakhom dia kholhang sam

Imphal, May 14: Manipur hin kum 50 langpeh lunggel leh tohgon dihlou ho ahinjui peh jeh’a ahiding bang’a gamsung’a khantouna umthei lou ahi tin Chief Minister N. Biren Singh in tuni Chandrakirti Auditorium, Palace Compound, Imphal a 82 lhinna Manipur Sahitya Parishad kingon kimanna a chun aseiye. Tu ahunglhung ding kum 5 sung’a jong phatah a lunggel leh tohgon dih akijui poule gamsunga kikhelna hung um jouding ahi ati. Tuni chun society sung lamchom chom’a kipehna nei leh thil phachom tah tah hin boldoh ho kipaman pehna kin jong akimang’e.

Tuni kingon a chun Minister of Art and Culture, L. Jayentakumar leh Parishad President Prof. Thoidingjam Tombi jong apanglhon in ahi. Mi agom in 26 in kipaman anakisan uvin hicheho lah’a hetthei dom hochu  Yumkham Chandrakala, Lourembam Bedbati, Sagolsem Tijendra, Anita Ningombam (Guwahati), Keisham Priyokumar leh Aribam Kumar Sharma ahiuve. Art and Culture lampang’a lunglutna nei leh akisaipi natoh ho’a thanopna neihon ahinlai seuva thil thah thah jildohna aneijing diu ahi tia aseitoh kilhon in Minister L. Jayentakumar in Chief Minister toh kihoutoh a Parishad lampang’a abukim lou, alhinglel jouse akinthei lam’a suhlhing ding ahi tin aseiye.

BJP government hin anakitepna bang’a na ahintoh jing ahin Bengali leh Meitei script teni jong 8th Scheduled noiya umsah ding chule Manipuri pao jonghi classical language chan a dopsang ding ahi tin Chief Minister in ahoulimna a chun aseiye.

Hiche keu hilouva Parishad a dia annual recurring deposit dangka lakh 5 umsah dia tepna anaum hojong kiphalpeh ahitan, gamsung mipiten Imphal hi meilhei teding bou ahi ti lungthim adalhah teng’u le akoi akoi lungkhat le thakhat a kithokhomna theina leh machalna umthei ding ahitai tinjong aseiye. Tuhi phaicham mi, thinglhang mi tia kithet tona phat ahitapon Manipur a dia Meitei community hi community jouse lah’a upa dinmun a um ahijeh in kiphalna leh kipehdohna chule thoh hatna lungthim jong nei angaitai tin Chief Minister chun aseikit’e. Community dang dang sang’a lenjo kahiuve ti kiletsahna lungthim pu talouva mijouse toh th akhat a lunggel neiphat ahitai tinjong aseikit e. Hiche toh kilhon’a Manipur a cheng mijousen lunggel leh tohgon ho adih chet a ijui teng’u le khantouna chu amacham a hung umding ahi tin Chief Minsiter N. Biren Singh chun aseikiit in ahi.

SDC khat Dk. 22,500 kileusah

Imphal, May 14: Sagolmang, SPIO/SDC, M Suranjoy Singh in mutation case khat a appellant khat nikho 89 sung’a information apehlou jeh in tuni chun Manipur Information Commission in RTI Act 2005 noiya Dk.22,250 aleusah in ahi. M Suranjoy Singh hin DC I/E le Commission a kon’a appellant, P Basant Singh information  apehding’a thupeh ho nahsah’a akoilou naban’a Commision in RTI Act Section 20(1) noiya show-cause  apeh ding’a thupeh aneiho jong nahsahlouva akoi ahi.

Basant hin January nisim 5, 2017 a chu Khundrakpam a um Inmun 0.46 acre mutation chungchang’a angaicha ding thilho thumna ding’a RTI application khat ana selut ahi. DC Imphal East in jong SDC, Sagolmang jah’a mutation case toh kisai thilpoimo jouse Basant Singh ahetsah ding’a January nisim 10 , 2017 niko a chu lekha ana thot ahi.  February geiya Information ima amulou phat’a Basant in FAA/Commissioner of Revenue heng’a first appeal ana pehlut kit’a hitolhon’a chu DC, IE in SDC, Sagolmang  reminder khat jong ana thot kit’a March nisim 25 kah’a information jouse apehdoh ding’a avel’a hetsahna ana neikit ahi. March nisim 25 geiya jong SDC lang’a kon donbutna aumlo phat’a Basant in commission heng’a second appeal ana pehlut kit ahi. Second appeal amujou chun Commission in SPIO/SDC Sagolmang lekha ana thot kit in nikho som (April 21) masang’a information jouse apehding na ding le tumasang’a thupeh ho ajuilou na jeh ahilchet ding in hetsahna ana neiyin ahi.

Hearing chelhah laitah jong chu SDC chu amel alha ana kimudoh khapo’n ahi.  Appellant thalheng’a thusei hon FAA le Commission jah’a thil umdan ho aseijou’uva Commission le FAA in  RTI Act, 2005 Section 20(1) dungjuiya SDC chu sum le pai leusah ding ti’a thulhuhna ahin neilhon ahi.

KNO leh UPF JMG Member hotoh State Govt. palai hon JMG Meeting nei u

 B.Lalboi Gangte

CCpur, May 14(ET): Kuki thingnoi gamvah Suspension Of Operation (SoO) noiya vetkol’a um Kuki National Organisation (KNO) leh United People’s Front (UPF) akon’a Joint Monitoring Group(JMG) Member holeh State palai hon 13 May 2017 jinglam nidan 11:00 chun 1st MR Battalion, Imphal ah toukhomna ananeiyuvin ahi.

Hiche kin’a State palai akon’a Dr. J Suresh Babu, IAS, Additional Chief Secretary & Home and MAHUD, State Police a kon’a P. Doungel, IPS, ADGP, Assam Rifles Officer, BSF Officer jouse jong apang uvin, KNO lang a kon in Convenor  Dino leh Co-Convenor Issack Kuki lamkai nan KNO Arms wing JMG member jouse leh UPF lang a kon in JMG lamkai Aron Kipgen, Jacob Thadou leh Sanga Hmar lamkaina’n Arms wing ho apang uvin ahi.

JMG Meeting hi KNO leh UPF thakhat’a Meeting State palai hon aneipe povin, achom cheh in aneipeh’un, JMG Meeting KNO toh akineina phatsung in State palai hon Tuchung Kangpokpi district sung’a Thingnoi group khat leh khat kithatona chung thudohna jong aneiyuvin ahi. Maban’a hitobang thisan kisona aumkit leh koi Organisation hijong lamkai lupoh ho themmo kichan ding ahi tin State Palai hon aseiyuve tin Co-convenor, Issack Kuki (KNO/KNF) chun aseiyin ahi.

Ministry of Home Affairs Govt. India in KNO Cadre ho umnading  Designated Camp 8 apeh 1st Bn Kuki Army Hermon Camp, 2nd Bn Kuki Army Salem Camp, 3rd Bn Kuki Army Horeb Camp, 4th Bn Kuki Army Senai Camp, 5th Bn Kuki Army Thangting Camp, 6 Bn Kuki Army Gilgal Peace Camp, 7 Bn Kuki Army Gamnom Camp, 8 Bn Kuki Army Semol Camp ho kum 7 lang semphat lou’a chenna Kuki Army Cadres busah naho aset toh kilhon’a Renovation ding chung chang thu akipohdohna ah State Palai hon hiche jouse akinthei lam’a hin kingaito ding ahi atiuvin chuleh lha 15 lang  Kuki Army Designated Camp ho’a um Cadres  1250 hon lhaseh’a Dk,3000/- Stipends kimu lou chungchang thujong pohdohna akineiyin, hiche hojouse jong kinthei lam’a suhfel ahina ding’a tohgon kinei ahi tin Dr. J. Suresh Babu IAS chun aseiyin ahi ati.  KNO palai leh State Palai ho meeting kichaiyin UPF palai hotoh toukhomna ananeikit uvin ahi.

Binalakshmi insung mite chunga gihna ima police in anei poi : IGP

Imphal, May 14: Manchah lhingset a choi police team khat in Binalakshmi Nepram umloupet in a’insungmite heng’a gihna anei’uve ti’a thuso phabep a kitahlang chu thudih ahipoi tin Inspector General of Police Clay Khongsai in aseiye.Clay Khongsai in aseidan in hiche nikho chun SDPO Imphal team khat Binalakshmi chenna Sagolband Nepra Menjor Leikai a ache’uvin , ahinlah police ho chu thingnoi hon Supreme Court advocate Utsav Singh Bains gihna aneiyu toh kisaiya Binalakshmi statement la ding’a che’u ahi.

Police team ho chu abon’uva Insung’a lut ahipo’uvin, IO pa bou insung’a galut’a Binalakshmi insungmite aga kimupi ahi. Binalakshmi umlou jeh chun IO pa jong ahung potdohpaiyin ahi. Bains hi Manipur High Court Complex  a IO toh kimuto ding’a kitemlhon ahi. Ahinlah HC complex sung’a jong aumlouphat’a IO pa le ateam ho chun Bains kinaipi pen Binalakshmi le Naoroibam Ratan @ Kapu statement lahding ana phatsah’u ahi. Hiche nikho chu Binalakshmi le Ratan a in chehlhon’a aum lhonpoi tin Clay Khongsai in aseiye.

Minister Th.Shyamkumar in Forest Department mun chom chom ana vil

Imphal, May 14(DIPR): Forest and Environment Minister Th Shyamkumar in tuni chun Imphal West, Mantripukhri mun’a um Forest Check Post veh lhah na anei na’a chun song leh nel po trucks 10 toll tax pelou va atol jeh un analah peh taovin ahi. Chuleh Miniter injong Imphal West, Kanglatombi leh Sekmai Forest Check  Post jong veh lhah na aganei pai pai in ahi.

Miniter Th Shymakumar in thuso miho kom’a aseina’a chun; Forest Department hin kum khat sung’a revenue dangka crore 100 ki doi ahin tuni’a kholchil na kinei hin hiche doi (target) kinei hi alolhin sah nading nga pan hatah’a kila ahin chuleh Forest Department honjong thingphung kilham ho leh mol leh vandung kisuse ho phate cha’a vetlhah na anei ding’u chuleh hiche ho tobang abol kit tah lou nading nga khamgah najong anei ngai ahi ati.Forest department office natong  honjong hiche sum ho’a kon na state sung’a development jat chom chom bol na’a apan thei nading in Minister in natong ho kitup tah leh lungtheng tah’a na atoh ding uvin temna na anei in ahi. Infromation Technology Park,Mantripukhri kom’a Truck 10 ana kiman hochun check post officer in apeh ding dol’u toll tax ho akipeh sah jouvin lhah doh in aum tai atin ahi.

Handloom leh Handicraft store district jouse’a kihong vah tading: Th. Biswajit

Imphal, May 14(DIPR) : Minister of Textiles, Commerce & Industries Miniter Thongam Biswajit in Uchekon, Laikon Lampat mun’a weaver ho ding nga bank account thah hon nading’a  tohgon kinei’a chun handloom leh handicraft store state sung district jouse’a hung kihong pan ding ahitai ati hetsah na anei in ahi. Hitobang thil ahung kibol na ajeh chu state sung’a tourist hon lunglut na ahin nei thei nading uva kibol ahi dan jong aphongdoh in ahi. Hiche kin hi Department of Textiles, Commerce & Industry leh Directorate of Handloom & Textiles kitho khom lhon na abol ahi. Additional Director (handloom) Shri K.Lamlee Kamei,women Empower ,Thonju A/C Smt  Thongam (o) Juneiwon ,officials of commerce and industries and locals of Uchekon attended the function.

Minister in asei na’a chun; Manipur state sung’a um handloom leh handicraft kipoh doh ho India gamsung mun chom chom ma um hon ahetda jong ahipon ahi. Loitang Khunou mun na um spinning mill jong kinung semphat vah ding ahitai ati. Northeast sung’a hiche bou hi cotton spinning mill um ahijeh in Minister of textiles in spinning mill semphat nading nga 70%  subsidy apeh ding ahitai ati. Chuleh central government in jong  state sung’a  um weaver hon thil ho asem tam thei nading uleh sum leh pai lam jong amu tam be thei nading uvin solar power looms  4 lakh weaver ho jong apeh ding dan thu jong asei in ahi. Weaver ho phat mantam tah moh seh’a suh mang nalou ding uvin  raw material ho delivery suytem ma hung kibol pan ding ahitah dan jong aseibei. State sung’a hin government natong lou  4.5 lakh household aum in ahi. Project Manager (handloom) Imphal east, P. Meenakumari in aseina’a chun; weaver hon ahithei leh central government lam’a pat na hung schemes chom chom abol thei nading uvin bank account akihon’u angai ding dan asei in ahi. Chuleh weavers hon hiche scheme ho abol teng uleh identity card akichoi ding uvin hetsah najong anei in ahi. Hiche kitoh kisai in District Manager, UBI, Imphal East, Seikai Singsit in UPI (Unified Payment Interface APPS) aphatchom dan hetsah najong anei in che nabang in weaver 300 tobang injong account akihon tah dan jong aphong doh kit in ahi. Hiche kingon nachun Additional Director (handloom) K. Lamlee Kamei, women Empower, Thonju A/C Thongam (o) Juneiwon, official of commerce and industries chuleh Uchekon mipi hon pan ala un ahi.

Saikot, Sub- Division Demand Committee in CM N. Biren Singh kom’a ngeh na nei’u

Saikot, May 14 : Saikot Sub-Division Demand Committee in Manipur Chief Minister N. Biren Singh kom’a Saikot Sub-Division SDO office agang thei pen na natoh akipat thei nading in ngeh na anei un ahi. Chief Minister N. Biren chu April 8,2017 nin Imphal in ana ki kimu to pi in hiche’a chun SDO office mun’a natong ding official ho agangthei pen na posting ding nga ahin sol ding in petition ana kisep in tuchang na hin mipi te in government in order ahin so ding ngah jing in akium me tin Saikot, Sub-Division Demand Committee Information Secreary Lalramtawn Hmar chun  asei in ahi. Committee in asei na’a chun; Saikot SDO Office hin revenue department staff jong akinei hih lai in chuleh staff hojong ahithei leh May 18 kah’a government in ahin sol ding in jong ngeh na anei un ahi. Iti ham khat na government in kisei ho nahsah na anei louva mipi ten kiphin na ahung kibol khat leh mun chom chom ma um mipi honjong ahin tosot ding in SSDC Infromation Secretary in temna ahin nei in ahi.

Pherzawl Development Demand Committee in CM chung’a kipa thuphong

Pherzawl, May 14 : Chief Minister N. Biren Singh in  government ahin poh jou phat chom cha sung’a Churachandpur district tribal ho in phatsot tah Manipur Assembly in Bills 3 jeh’a kiphin na ana um jing lai in May 10,2017 nikho nia MoU signed anakibol doh thei tan ahi. Hiche MoU signed anakibol toh lhon in kiphin na anakinei lai ja eina molliem mi 8 hojong vui thei ding nga aum tah jeh in  Pherzawl Development Demand Committee in CM pa chung ngah thipha ahin bol doh jeh akipa nao ahin phongdoh un ahi.  Pherzawl development demand committe in tu’a pat state sung’a lungmon leh khantou na ahin poh lhung tah ding in kinep na len tah akinei in ahi ati.

Pherzawl District HQ  vil ding’a  District Development Committee CM  kouna nei

Pherzawl, May 14: Chief Minister N. Biren in gamsung khantou nading nga kipeh doh na ahin nei toh lhon na Manipur mun chom chom  anavil jing toh lhon in Pherzawl District Development Committee injong district headquarters mun’a vailhun nakin aganthei pen na bol ding ati uvin ahi. Pherzawl mipi ten CM  N. Biren in district headquater vil’a ahung teng leh lampi mangcha’a ahung ding in temna anei in ahi. Ajeh chu lampi hoilou dan leh mipi te in khangtou nading nga aka(cry) jing uhi amit tah in hung mu hen tina in lampi macha’a ahung ding angeh un ahi.December 24,2016 kum sung chun Chief Secretary jao nan 39 department leh adang adang – via Deputy Commissioner of Pherzawl ho district sung’a aganthei pen na koi ahi nading in lekha ana kipe lut in ahi. Hiche thu toh kisai in PDDC member leh Minister (Vety) V. Hangkhanlian in Chief Minister N. Biren Singh chu April 8,2017, Imphal la a inn mun na anakimu topi uvin hiche’a chun district hon angaichat pen thil ho ana pelut uvin ahi.Ahivang in akithum ho khat jong eibol peh hih lai uve atin ahi. Chuleh Pherzawl District HQ chung chang thu’a hi government in mun chom khel nading tohgon anei thei lou ding mini-secretariat leh district lever  office jouse jong district HQ mun’a um sah ding ahidan jong asei in ahi. Hiche point hohi non-negotiable ahin chuleh chon ding lung angel uva ahileh pan nasatah’a kila ding PDDC chung’a ngoh na kinei theilou ding ahi ati.

Kangpokpi District leh district thah adang adang government in SPECIAL PACKAGES apeh hojong akihai pon hitobang chun government in jong Pherzawl distirct hojong hitobang facilities apeh ding uvin jong  ngeh na anei un ahi.

Fire service exam result kiphondoh ding dei sah na’a hunger strike kibol

Imphal, May 14:  Volunteers of All Manipur Fire Service exam anabol holeh Guardian Association hon 144 post department hon analah nao’a tuchan na result aphon doh lou lai jeh uvin result ho phondoh’a aum thei nading in hunger strike apan taovin ahi. Hiche hunger strike chu Keishampat Leimajam Leikai community hall mun’a anabol un ahi. Association,Secretary Moirangthem Jibankumar in aseina’a chun; phat sot tah recruitment result akiphondoh lou jeh hin candidates hon alung’u asu na lheh jeng tan ahi. Tuchung BJP-led government agang thei pen na result ho ahin phondoh sah ding uvin temna anei un ahi.

TKLC in 2vei channa meeting nei; kithulhuhna phabep sem

Imphal, May 14: Janhi (May 13) chun Thadou-Kuki Literature Committee in anivei channa meeting ana neiyin hiche a chun thulhuh phabep ananeiyuvin ahi. Kithulhuhna khatna chu Additional Secretary adia Michael Lamjathang leh Tongminlen Haokip khat joh joh namdet ding kiti chu kilungtoh tah in Michael Lamjathang hi namdet ahi tai. Anina chu Workshop on Thadou-Kuki (MIL): Problems & Issues on Textbooks hi neiding phatsah ahitoh kilhon in avel in seikhomna akinei in June nisim 10, 2017 (Saturday) nikho le Dr. Ngamkhohao Haokip & Dr. Marykim Haokip (Moderators), Dr. Seikho Singsit &  Michael Lamjathang (Coordinator) hina noiya (Prog, Invt, Budgets, etc.) pum’a seikhomna umkit ding’in akiphatsah un ahi. Athumna chu Syllabus & Curriculum Sub-Committee (SCSC) hin semdoh ding member hi 7 (sagi) hiding ahin hichena ding’a Convenor leh Secretary hi Dr. Marykim Haokip leh Dr Ngamkhohao Haokip hilhon ding adang avat mi 5 (nga) hohi Convenor leh Secretary in ana kilhen lhon a TKLC in namdetna leh phatsah na apeh ding ahi. Amaho hin SCSC hin Textbooks leh Examinations toh kisai jouse vetsuina ahin neiji diu, TKLC in namdetna kipe ji ding ahi. Hiche Sub-committee hi TKLC in lhaplhah na akinei kahse a umding ahi. Chule hiche Sub-committee hi lha 3 (thum) sung a ahin suhtup lhon ding ahi. Agupna chu TSA akon TKLC adia Representative khat aumding phatsah ahi. Sagina chu Thadou-Kuki paova ipi lang hijong leh lekhabu sun (author) jouse kipapina kineipi jing ding ahi. Chuleh, Thadou-Kuki paova lekha sun jouse TKLC in publish kibolpeh ding ahi.

Sinusitis le Nose Allergy neiho dinga Free Camp kibol

Imphal, May 14: Shija ENT Hospital, Sanakeithel, Lamphel’a jaanhi chun Sinusitis le Nose Allergy neiho ding in Free ENT OPD Consultation camp ana kibol in ahi. Free OPD Consultation camp a chun sinusitis le Allergy nei mihem 179 vel in pan ala’uvin ahi. Damlouho chu Dr. Dhaneshwor Naorem le Dr.Niteshore Moirangthem in ajen lhon in ahi. Camp a panla ho chu awareness booklet khatcheh ahop peh’uvin ahi.

Edu. Minister in ITI Lilong le Thoubal Dist a School le College phabep velha

Imphal, May 14: Education Minister Th Radheshyam in tuni chun Lilong ITI Complex le Thoubal district sung’a um School le College phabep vilna aneiyin ahi. Thoubal district sung’a um school le college ho avil masang chun Th Radheshyam in Heirok Assembly Constituency sung’a um school ho vilna aneiyin ahi.

Meitei Baptist Church celebrates Mother’s Day

Imphal, May 14: Meitei Baptist Church, Yairipok in tuni chun Mother’s Day kinguon thupi tah in anit in ahi.  Kinguon a chun Phayeng Baptist Church, Pastor, Angom Kiran in nute mopohna le nute’n chate angailutdan chungthu’a houlimna aneiyin ahi.Houbung sung’a um minu jouse kipa vetsahna’n thilpeh ape’uvin ahi.

CM secretariat munna ‘Meeyamgi Numit’ masapen kiman nading kigotna chelha jing

Imphal, May 14: Ahunglhung ding May nisim 15 nikho le Chief Minister’s Secretariat a ‘Meeyamgi Numit’ masapen achelhah ding tolhon in tulaitah hin kiguotna achelha jing in ahi. Hiche nikho le hin Chief Minister N.Biren Singh amatah in jingkahlam nidan 10 a pat nilhahlam nidan 4 gei mipi akimupi ding ahi. Hiche nikho mama le hin Minister ho, Administrative Secretary ho, DC ho, SDO o le HoD hon ama ama office cheh’a mipi akimupi ding’u ahi. State government in Meeyamgi Numit manding tohguon ahin nei hi elected leader, top bureaucrat ho le official ho toh mipi kikah a kiguijopna aumthei ding adeisah jeh’a abol ahi.

Fire Service candidate 2 in an-ngol kiphinna neilhon

Imphal, May 14: Fire Service natong kilahna’a interview gei pachanna nei candidate 2 in tuni chun Keishampat  Leimajam Leikai Community Hall a an-ngol kiphinna apanlhon in ahi. Geldoh thei khat chu All Manipur Fire Services Candidates and Guardians’ Association in tumasangjep’a chu sorkar jah a May nisim 10 masang’a result aphondoh ding’a ngehna ana nei ahi.Tuni an-ngol kiphinna bolteni chu Y.Debendra le M Jibankumar ahilhon’e.

Nengneikim Haokip le Kaikholen Tuboi kithana thu a JAC in aganna thei penna monna neiho matdoh nadinga gihna nei u

Chandel, May 14: Nengneikim Haokip @ Shila le Kaikholen Tuboi kithana chungchang’a muona neiho tuni jaankim’a pat nidan 48 sung’a matdoh ahiilou le kiphinna jat chom chom kibolding ahi tin JAC akon kimu thulhutin aseiye.

Hiche thu hi JAC , Secretary Jangkholam Guite in tuni New Molbem Village, C handel a thuso miho toh akihoulimna’a asei ahi. Jangkholam Guite in aseidan in kiphinna hi bolding’a ana ki’um ahitan ahinlah IFCD& YAS Minsiter LetpaoHaokip in May nisim 6 nikho’a kitepna aneijeh’a State government toh MoU ana kibol’a tunigeiya ana kithip ahi ati. Ahinlah tunigeiya State sorkar  in muona neiho amatdoh lou jeh’a kikphinna hibolding ti’a thulhuhna hung kinei ahi tin Jangkholam Guite in aseiye.

Sangai Express, Manipuri Edition 9th May, 2017 nikho’a Nengneikim le Kaikholen kithana toh kisaiya thuso hung kibol chu mi phabep puimang na ding’a kibolahi tin Jangkholam in aseiye. Ajeh chu The Sangai Express a c hu Kaikholen Tuboi chu khamnathei over-dose jeh’a thi ahi ti’a ana sei ahi. Sangai Exprss in thuso hinsodoh a chu athipa le athinu post mortem jong kibol loulai ahi. Kaikholen Tuboi luchang’a kivohna maha tampi kimdoh chun akithat ahidan kichehtah in aphongdoh’e.

Police in thilsoh to kiaiya Lunkhokam Baite le a inneipiamatjong hi mingolho thilbol ahi. Ajehc hu Lunkhokam le a inneipi hi khamnathei bol ahilhon’in, khamnathei bol khat in kaikholen Tuboi molchung’a aputtou ding chu hitheilou ahi.

Moreh Hospital a twi ninglhing joulou

Moreh, May 14: Moreh Town a um Moreh Hospital a ngaichat channa government in manbai a ahopding ORS aninglhin lou jeh in Moreh a cheng mipin alung kimlouna’u ahinphong un ahi. Hospital sungah jong drip set 5/6 kal aumpon. Hiche toh kilhon chun tulai natgol jeh’a hiche hospital a kijen mi 10 tobang hon ORS anamu jou tapouvin ahi. Hetman louva mi 10 tobang hospital a dammo jeh a hung kijen hohi twineh jeh a hungkipan natna hiding in hiche hospital a um doctor khat in aginmona aseiyin ahi. Mipite titah louvin hiche hospital a um doctor holeh nurse ho jeng’in jong twi ninglhing sel in amupouvin ahi. Hitiho jouse akinthei pen’a vetup ding’in adammo a kijen inkote khat in akisaipi authority ho hengah temna aneiyin ahi.

Thusoh Lahchom

Bhabananda

BJP in tuni chun Rajya Sabha Candidate ding in State Unit BJP President Kshetrimayum Bhabananda phondohna aneiyin ahi.  Hiche thu hi  Secretary Central Election Committee , Jagat Prakash in aphondoh ahi.  Hettheikhat chu Rajya Sabha seat hi Haji Abdul Salam in thina atuo jeh’a tunigeiya a’ong’a umjing nalai ahi. By-election hi May nisim 25 nikho le kibol ding ahi.

HIV/AIDS

Health Minister L. Jayentakumar in tuni (May 14) chun Keishamthong constituency ah HIV/AIDS natna neiho pension hopdohna kin anamang in ahi. Hiche kingon chu Pishum Thong a Minister pa chenna inmun a kibol ahi. Kingon a chun Joint Director of MACS, Abhiram Mongjam jong apang’e. Hitobang kalsonna hi mipi honjong jochanna HIV/AIDS natna neiho akithopina thei diuva kabol ahi tin Minister L. Jayentakumar chun aseiye.

Editorial

Manipur: Dei-le-ngai kibah louna gam

JAC-AATB leh Manipur Government in kinoptona soi ahin kai uva, 3 bills thua boina kichai dan a ahung um leh phaicham mi aching-athem (intellectuals) hon Manipur phaicham miho dinga ‘constitutional protection’ poimo asah dan u ahin lhangsap pan kit taove.  Thu kisei ho leh miho umchan hi ivet leh gampam apat hung kipan miho akon phaicham miho leh agam venbitna ding dan (Bill/Act/legislation) ngeh a kiphinna hung  umpai kit leh kilomtah ahin, Manipur malam hi ivet leh navah lam vang mano lou hileh akilom e. Manipur hi jat/nam chom tamtah, dei le ngai kibang lou cheh chenkhomna mun ahin, dei le ngai kibah lou jeh a kitatona (conflict of interest) hi ana um jing in, hung um jing ding hileh akilom e. Nam khat dei chu adang khat dinga thimah umtah, khat dei-ngai chu adang ho dinga pasal ho ipi ham kisipeh banga doumah um nagam Manipur chu ahi tai. Phaicham mihon amaho ding leh a gam ding uva phachoma agel uchu thinglhang miho dinga thohda umtah; chuleh, thinglhang miho dei le ngai chu phaicham mihon pomthei kit lou hel u. Hijeh hin gamsung ah cham le lungmon kiti hi ijat kisei jong leh vailah a jun kitha tobang bep asoh ji e. Tun jong phaicham mihon heng le kom a (NE State dang ho a) aum banga Manipur a jong Inner Line Permit (ILP) ahilou leh akibahpi dan ahin thum pat kit dingu dinmun ahi tao ve. Chutobang ma achu thinglhang miho akona jong heng-le-kom State danga ana um 6th Schedule provision ahilou leh hiche provision toh kibang dan-le-mol ngehna a kiphinna hung umkit thei ahin, hichu phaicham mihon ahin thohmah uva, kitomona leh ki hetthemto louna hung tam cheh cheh ding dinmun ahi. Hiche kahlah ah, Naga hon amahon atoupha nagam jouseu gopkhom dingdan ngaito in akisa boi jing uvin, Kuki homeland demand jong abeitai tithei louvin a um jing e. Manipur government dinga lhohsatna ki belap jing dan in aum jingin, hiche thua BJP lamkai State government in ipiti pan ahinlah a, ipiti na ahintoh ding ham ti hi aphat ahung lhun teng le bou sei/muthei bep dingin aum doh e.

            Manipur a chamna leh lungmonna um nadinga tupet a lampi umsun chu khat-le-khat kijato na nei puma lungtheng sel put a chenkhom ding hi ahi. Akoi koi injong atampen leh abolthei pen ahi u kimoh letsah pi louva, achenkhompi jat/nam dang ho ahi ding banga avetkolu a poimo lheh jeng e. Jat/nam khat ahung khangtou jep, themkhat amit hunghah jep a kihe ho vetda na leh thangthipna nei puma kidinte pi hin cham-le-lungmonna alhut louhel ding ahi. Chuleh, khat vetda jeh ham a midang khat panpi tobanga na kitong ga hi dei umtah ahiding vang tahsan aum hih beh e. Lungtheng sela khat le khat kijatona neitah a I chenkhom thei masang seuvin, itobang thil ngeh (demand) in kiphinna ijat a hat um jong leh achaina chu dei um thil hideh louding ahi. Thuching in, ‘I ki se to leh lei lhang aki lhasam poi’ ati hi akoi jousen hetcheh a pha ahi. Khat thangthipna jeh a thil kibol hi aguilhung um malah, achaina leh ei a dinga thina thei ahi ti jong haimil louding ahi. Hiche kisei hi Manipur leh agama cheng miho venbitna ding dan (legislation) a um ding deimona ahi poi. Ipi hijong leh gamsunga cheng mihon dei-le-ngai chomcheh kinei ahin, hiche hi mijousen ahetthem angai e ti hi avela ki lhangsap nom ahi.

Blankfire

Mihem khat jana leh ngailutna vetsahna kiti hi apolanga mutheitah a thilbol le kipa thilpeh ho mi mumu din kibol hihjongleh ilungsung tah a kon ahipouleh I umchan ithuseia kon vetsah thei hinte. Thilpeh kipeh jeh a jana le ngailutna moh hijeng dehlou ahi.