ET May 14 news

ET May 14 news

82
0
SHARE

Chennai a kon ‘special train’ a hung mi 1000 val Jiribam lhungta; Passenger hon ama ama district cheh a Community Quarantine Centre a umdiu

Imphal, May 13(ET): Chennai khopi a kon ‘special train’ a gamsung mi sangkhat val hung ho tunin Jiribam ahung lhung tauvin, ahung kile jouse hi ama ama district a Instituional ahiloule Community Quarantine centre a umdiu ahi.

Sun nidan 12.20 a Jiribam Railway station hung lhung u ahi’in, Chief Secretary, Dr. J. Suresh Babu, ADGP (L/O), L. Kailun, Secretary (WR), Jacintha Lazarus, Deputy Commissioner, Jiribam W. Malemnganba Chenglei, Director (Transport),  Mercina Panmei le official dang dang hon phatah in alamto uvin ahi. Screening abol nauva official hojong apang uvin ahi.

Health Department doctor le Transport department official chule stakeholder hon choltih neilouva pan ala uvin, Health department hon passenger ho screening abol jou uva ama ama bus a asoldoh uvin, chule ahung lhung jouse nikho 14 ‘quarantine’ a aum nadiu akhut uva ‘stamped’ jong abol peh uvin ahi. Amaho hi train a hunglhung batch masapen ahiuvin, Chief Secretary in Ukhrul district jon ding passenger 126 kipoh nading bus 6 asoldoh in ahi.

Jiribam Railway station a Chief Secretary in thuso miho akimupi na’a, Train masapen a hi Chennai a kon mi 1081 val hung lhung ahi, tin aseiyin chule Jiribam District Administration in screening bol nading counter agon ahi, ati. Jing nikho teng le Punjab a kon train khat hung kit ding ahi’in, Jiribam ahung lhun nadinga ni 2 lut ding ahi. Hiche jouteng Bengaluru a kon train khat hung kit ding ahi, ati.

Chennai a kon train khat chule Vadodara a kon train khat ahung nadinga pan kila jing ahi. Train lhaiding hi ahung ding ho umna sorkar in state sorkar toh kinoptona anei dungjuiya ahi’in, chule procedure jui ding tamtah um ahi. Ahung kile nom hon official website a register abol diuvin jong temna aneiyin ahi. Screening abol jou uva District Administration in ahung lhung ho neh le chah apeh a chule Indian Red Cross Society le Railway Protection Force volunteer hon ‘social distance’ kijui avet kol uva chule packet kibol neh le chah hi All Jiribam United Clubs Association in ahop ahi.

Ahung kile holah a Ukhrul district mi 126, Senapati -153, Bishnupur & Chandel – 39, Tamenglong-145, Kangpokpi-25, Thoubal & Kakching- 18, Churachandpur & Pherzawl- 300, Imphal-5, Imphal West & Tengnoupal-67, Imphal East & Kamjong- 39 chule Noney-47 pang ahi.

Punjab, Himachal Pradesh le Haryana a tangden gamsung mihon Chandigarh a kon train amat diu ahi’in, Jiribam jon a tuni nilhah le ahung kipat doh diu tahsan ahi. Hiche jouteng Friday nikho le Bangalore a kon train khat hung kit ding ahi.

PM in ‘Mega Economic Package’ phondohna anei CM Biren in lamto; Covid -19 douna a pan lahkhom dinga kouna nei

Imphal, May 13(ET): Chief Minister N. Biren Singh in Tuesday ni a Prime Minister Narendra Modi in ‘economic package’ dangka 20 lakh crore phondohna anei alamto na thu aseiyin ahi. Hiche hi gamsung pumpi akikha jeh le Covid 19 pandemic in economy asuhset dan semphat nading ahi.

Chief Minister in video message a, Centre sorkar panlahna hi hangsan tah ahi ajeh chu package hi India GDP 10 per cent to kitoh ahi, ati. Union Finance Minister Nirmala Sitharaman in hiche chungchang a Atma Nirbhar Bharat Abhiyan (Self Reliant India Movement) noiya thuphon anei ho Chief Minister in aseiyin, gamsung in sector tamtah a aphatchompi ding akinepna thu aseiyin ahi.

Centre sorkar in dangka 3 lakh crore hi collateral-free automatic loan a MSME, kum li tenure le lha 12 moratorium ho peh dinga aphondoh ahi, tin CM in aseiyin chule Manipur gam hi Northeast a MSME tamna pen ahitoh kilhon a sangtah a kiphat chom pi ding ahi, ati. MSME sector kisemhoi hi gamsung miho dinga chan lentah hiding ahi, ajeh chu ‘investment limit’ hi tu masanga dangka lakh 25 a kon dangka crore 1 a kikal sah ahi, ati.

Centre in power distribution company (discom) jouse dinga ‘one-time liquidity infusion’ dangka crore 90 phondohna anei ahi’in, MSPDCL in bat sahna a olna lentah aneiding ahi. Fisheries Department hi thuphon dungjuiya Department len a upgrade kibol ding ahi’in, gamsung in thulhuhna hi aphatchompi ding ahi, tin CM in aseiyin ahi.

Sorkar in gam dang dang a tangden gamsung miho nungpui nadinga pan alah thu a CM in, Chennai khopi a kon ‘special train’ a hung gamsung mi 1140 tuni a Jiribam hunglhung ahitai, tin aseiyin chule ahung kile hon akholjin nau ho lungtheng tah a asei uva, authority hon coronavirus nat venna dinga pan alah theina ding uva aseidoh louvu aumsah lou diuvin temna aneiyin ahi. Gampam a tangden adang hojong kinung pui vah ding ahi, ati.

Sorkar in ajo chan a virus vetkol nadinga pan alah ahi, tin Chief Minister Biren in aseiyin chule gamsung mihon pan kila ho atosot diuvin temna aneibe in ahi.

Education Minister in simlai ho dinga E-video web portal hondohna nei; Mobile application muthei hivah ding ahitai, tia sei

Imphal, May 13(ET): Covid 19 lockdown jeh a school akikha soh jeh a Education Minister Th Radheshyam Singh in Wednesday nikhon simlai ho ngaichat vetkol nadinga e-Video website hondohna aneiyin ahi.

E-video class kipehna website hi www.lairik.net / www.laireek.net a vetthei ahi. Website hi adeh a simlai class 1 le 12 kikah a ding ahi’in, subject jouse a teacher hon video class apeh u ahi. Video a kipe lesson syllabus hi Board of Secondary Education Manipur le Council of Higher Secondary Education Manipur dungjui ahi. Website hi Samagra Shiksha, Manipur in fund abol a Department of Education (S) in asemdoh ahi.

Dr. Th Radheshyam in launch kibol website hi akipan til ahi, tin aseiyin chule asem hoi cheh nadinga ngaidan akilem e, ati. Tu naicha educational institution thalheng hotoh Covid-19 in education sector atoh khah dan thu a meeting ana lamkai thu jong aseiyin ahi. Website ahon doh na kin gon a Minister pa in, Website hi akipan til ahijeh a suhkhel, spelling dihlou, content lhing lel le adang dang umding ahi, tin aseiyin chule ngaidan le ahoilouna kisei hi aphatchomna dinga mipin asei dinga temna aneiyin ahi.

Teachr, curator, non-teaching staff, Education (S), Samagra Shiksha, ZEO, School Director le Additional Director ho, Commissioner Education (S), Videography team chule website designer holeh stakeholder jousen pan alah nau akipapina thu aseiyin ahi. Mobile application Android platform a hi Google Play store a ni 5 sunga muthei hiding chule iOS platform a hi lhakhat sunga app kipe ding ahi, ati. Website a audio-visual e-content hi subject 200 val (class 1-12) sunga umding, compulsory subject masa ding ahi. Website akijo teng le e-video hi nidan 2000 val umding ahi’in, chule subject jouse a class hi pao ni- English le Manipuri a kipe ding ahi. Website hi Manipur gam a hitobang akibolna masapen ahi. Tu dinmun a class 3 a kon 12 kikah sunga video class 85 um ahi’in, update kibol jing ding ahi.

Kin gon a Commissioner, Education (S) T Ranjit Singh, Director, Education (S) Th Kirankumar, Additional Director, Education (S) Hills, Lerte Hmangte Kom, Additional Director, Education (S) Valley, Ch Sachi Devi chule department a mopohna nei official hole website designer Xtreme Waves jong apang in ahi.

Asssam a covid-19 case thah 15 kimube; Case 80 phata

Guwahati, May 13: Assam Health Minister Biswa Sarma in aseina achun tuni chun Guwahati ah case thah 15 akimudoh be in hiche toh lhon chun Assam gamsung ah covid-19 natna veikha mi 80 aphatai ati.

Hiche natna chu mikhat akon kipan ahi in ama chu khopi pamlang a alu kikoikhom na a natong ahi in midang aho chu Guwahati Fancy bazaar a alhun na hotel a miho chu akaison hiding in asei in ahi. Police ho hiche hotel chutoh alu koikhomna (Warehouse) chu akha tauvin ahi.

Tuni chan in Assam gamsung ah mi 2 in thina atoh tauvin mi 40 in damna akimu uvin chule midang 38 ho chu akijen jing nalai ahiuvin ahi.

MLA 4 douna a athah a ‘Disqualification case’ kisem kit

Imphal 13 May 20(UNA): Manipur High Court a MLA 4 ‘disqualify’ kibol nadinga athah a petition akipelut e, tin MLA K Meghachandra in Wednesday nikhon aseiyin ahi.

Congress MLA hon Congress ticket a election kaidoh a ahivanga BJP lamkaina coalition government toson a MLA 4 douna a petition apeh lut ahi, ati. Petition kisem khum MLA 4 hohi Saitu AC MLA Ngamthang Haokip, Lamlai AC MLA Ksh Biren, Wangjing-Tentha AC MLA Paonam Brojen le Kakching AC MLA Yengkhom Surchandra ahi.

MLA Ngamthang Haokip douna a ‘disqualification petition’ hi ken kapeh ahi’in, MLA O Henry in MLA Ksh Biren douna a petition apeh a, MLA K Govindas in MLA Paonam Brojen douna a petition apeh a chule MLA DD Thaisi in MLA Y Surchandya douna a petition apeh ahi, tin K Meghachandra in aseiyin ahi.

Petition li hi abon a Senior Advocate, former Advocate General High Court of Manipur N Ibotombi ‘Counsel’ hina a kipelut ahi. MLA thum- Sanasam Bira (Kumbi AC MLA), O Lukhoi (Wangoi AC MLA) chule Ginsuanhau (Singhat AC MLA) douna a petition apehlut be diu ahi.

Amaho hin jong Congress ticket a election ajo uva ahivanga BJP atosot u ahi, tin Meghachandra in aseiyin ahi. Hetthei khat chu achesa May nisim 8 nikho a Speaker Tribunal in Congress ticket a election kaidoh a MLA sagi douna a ‘disqualification case’ asem ahi.

Gamdang mi ILP phat kichai ho nungsol ding ahi: JCILPS

Imphal, May 13(ET): Gamdang a kon gampam mi hunglut ho apet pet a ngah sah a chule gamsunga aumsa ILP kichai (expired) hojong nungsol ding ahi, tin JCILPS in Wednesday nikhon thuso anei uvin ahi.

“Kikha na dan tamtah aum’a, Inner Line permit system aum vanga gamdang mi tamtah gamsunga ahung lut thei jing hi vangset umtah ahi”, tin KY Dhiren, convenor, JCILPS in aseiyin ahi. Manipur gamsung hi ‘Green zone’ ahi’in, neh ding angaicha khoh ho mijouse kipe ahi’in, gampam miho hunglut be jing ahi. Pandemic sunga India gam chom chom a Manipuri hon kibolset na ato tobang uva amaho hin gamsung a kisuhgenthei na ato louvu ahi, ati.

Manipur gam pam a cheng gamsung mihon jat le nam hina a kithet na, umna ding mun to mona le hahsatna tamtah ato jeh uva gamsung hung kile tei ding agot u ahi’in, sorkar in amaho akithopi ahi, tin aseiyin chule Manipur-Myanmar gamgi a state sorkar in fencing atun doh jeh a kipathu aseiyin, lhumlam gamkaiya kon gamsunga hunglut jing gamdang miho thu a jong sorkar in pan alahbe dinga temna aneiyin ahi.

Hetthei khat chu achesa May nisim 1 nikho a Cachar a kon natong (worker) mithum gamsunga hunglut ahi. Police ho a kon ajamdoh got nauva mikhat vadung twiya thi ahi. Ama ama chenna mun a natoh alhahsam jeh a Manipur gam a mi tamtah hung ding ahi’in, hiche jeh a ahunglut diu hi suhtang ngai ahi, ati. Manipur gam a aumsa gamdang mi chule Inner Line Permit kichai sa ho jong agam uva akile vah thei nading u sorkar in agon peh dinga JCILPS in temna aneibe in ahi.

Kangpokpi DHQ a district mi atangden ho kingah sah tei dinga Minister Nemcha in thuhilna nei; ADC Sadar Hills in neh-leh-chah pe ding

Kangpokpi, May 13(UNA): Social Welfare and Cooperation Minister, Nemcha Kipgen in Kangpokpi district mi atangden jouse Brig. M Thomas Ground, Kangpokpi DHQ a abon uva akingah sah diuvin thuhilna aneiyin ahi.

Kangpokpi le Senapati a Covid-19 in-charge jong hi a Minister nu in mopohna nei authority hon Kangpokpi district mi atangden ho akipuinau government gari hihen lang private gari hijong le ahetdoh uva chule Thomas Ground a akingah sah diuva mopohna nei authority jouse henga thuhilna anei ahi. Itobang dinmun hijong le akiseina mun a alhung lou aumlou nadinga avettup diuvin jong aseibe in ahi.

Guwahati khopi a tangden Kangpokpi Assembly constituency miho hi ama sponsor na noiya anungpui u ahi’in, amaho hi jing nikho teng le M Thomas Ground hunglhung diu ahi’in, Minister nu amatah in amaho alamto ding ahi. Alangkhat a, Kangpokpi DHQ a atangden ho a ding Covid-19 Emergency Food Kiosk hondoh na a Autonomous District Council, Sadar Hills in Chairman Haokholal Hangshing vetsuina noiya Lockdown 3.0  sunga pan lentah alah u ahi.

 Haokholal Hangshing, ADC Sadar Hills Chairman lamkaina a meeting abol nauva ADC Sadar Hills in Kangpokpi Women Welfare Organization le Kangpokpi Youth Union tosotna chule Kangpokpi Town Committee thuhilna noiya Brig. M Thomas Ground a tuni a hunglhung Kangpokpi district mi gamdang a tangden ho neh le chah ape uvin ahi.

COVID-19 Emergency Food Kiosk Free food counter hi jingkah lang nidan 9 a kon 11 chan chule nilhah nidan 5 a kon 8 chan kihong ding ahi. Ahivanga, KWWO le KYU hetsahna masa auma ahile atangden ho phat kilemchang dungjuiya aphat agon theiyu ahi. Ahung lhung ho ama ama umna ding Quarantine centre ajot nauva che nading gari a boina ato diu jeh a ADC Sadar Hills in kithopi dinga pan alah ahi.

Amasapen a ADC Sadar Hills in gari ni alah ding ahi’in, gari teni a hi driver a ding compartment achombeh a umding ahi, hiche hi ahung lhung ho ama ama quarantine centre a puina a kimang ding ahi. Anichanna a ADC Sadar Hills in Councilor chule civil society organization hon driver touna ding compartment achom aumna gari agon peh diuvin temna anei uvin ahi. Amaho hi alhun nau Brig. M Thomas Ground a kon aumna diu quarantine centre chan apui diu ahi.

ADC Sadar Hills tohgon ho- COVID-19 Emergency Food Kiosk le Transportation kiti ho abon a Paominthang Doungel, Executive Officer (Town) le Satkholen Khongsai, PA in-charge of ADC Sadar Hills in avet kol ding ahi. Hiche hi May nisim 31 chan chejom ding ahi. Alangkhat a, district mi gamdang a tangden mi 12 tuni nilhah nidan 5 a ahung lhung uvin, hiche lah a hi Siliguri a kon mi 5, Kolkata a kon mi 5 chule Guwahati a kon mi 2 pang ahi.

Tuchan geiya district a hi gamdang a tangden mi 100 nailam hunglhung ahitan chule Chennai a kon Jiribam chan train a hung holah a district mi 38 pang ahi’in, tuni jan avaigei teng ahung lhun diu tahsan ahi. Chief Medical Officer, Kangpokpi thulhut dungjuiya, May nisim 12 nikho chan a Surveillance noiya um hi mi 494 hiya chule nikho 14 lhing ‘surveillance’ a aumna phat kichai hi 406 ahi.

May nisim 12 chan a test bol dinga kisol jat 15 ahi’in, chule mi 15 ho test result hi abon a kimu ahitan, positive khatcha umlou chule tuchan geiya district sunga Covid-19 case hidinga ginmo khatcha jong umlou ahi.

Health Department in gamsung Quarantine Centre ho a juiding SOP khoutah sodoh

Imphal, May 13(ET): Health Department Additional Director Sasheekumar in gamdang a tangden ho quarantine bol nadinga sorkar in Standard Operating Protocols (SOP) chom chom asodoh ahi, tin aseiyin ahi.

Train a kon hung passenger hohi medical team hon Jiribam district a ‘screen’ abol diu ahi. Koi tobang symptom neiya aumle apet pet a ‘examination, testing kibol be a kijen ding chule symptoms neilou passenger hohi state sorkar in agon bus a tou uva ama ama chenna district ajot diu ahi. DC jousen ahunglhung ding passenger ho ama ama District Screening centre a ‘Screened’ abol diu, hiche a symptoms neilou passenger jouse hi Community Quarantine centre a apuidiu ahi.

DC in ngaichat ahile Institutional Quarantine centre jong aman thei ding ahi. Koi tobang ‘symptoms neiya aumle achomkhen uva chule Hospital Isolation ward a apui diu ahi. Cabinet in achesa May nisim 6 nikho a thulhuhna anei dungjuiya, community hon local club, village authority a kon ama ama gamkai MLA le DC panna a Community Quarantine centre a lhunna le umna ding mun ho agon ding ahi.

State sorkar in gampam a kon hung kile ‘Community Quarantine Centre’ a umho hi dinga dangka 200 cheh mikhat chunga apohdoh ding ahi. DC in local club hotoh centre a umho neh ding agon peh diu ahi. DC leh CMO in District control room (24X7) asem ding, hiche mun a doctor le staff hohi roster duty a akoi diu ahi. Lamlen (by road) a kon hung kile hojong Mao gate le Jiribam gate a screening akibol jouteng ama ama district screening centre a asol u ahi.

Quarantine dan dungjuiya ni 14 lhing ‘quarantine’ a umdiu ahi’in, chule meter khat alhompen a ikom ivel a umho toh kikah/kigamlhat dinga dan kisem hi jui cheh ding ahi, ati. Quarantine centre jouse a dan khoutah a kichepi ding chule phalna kipe personnel hobou alut diu kiphal ding ahi. Insung mi chule adang dang toh akimuto diu kiphal louding chule Quarantine centre gate a, midang alut ding akikha thu signboard ahiloule placard tahdoh ding ahi. Dan hi insung mi le vengsung mi jousen khoutah a ajui ding ahi, tin Sasheekumar in aseibe in ahi.