ET May 13, 2017 News (Local, Thusoh Lahchom, Editorial, Blankfire)

ET May 13, 2017 News (Local, Thusoh Lahchom, Editorial, Blankfire)

1029
0
SHARE

SSA Jilkung hon Lhalo kipeh lou jeh a ZEO office kot khah’ u kinoptona kisem kah’a kikhah jom ding’a sei u

Thoubal, May 12: All Manipur SSA Teachers Association, Thoubal Branch member hon Friday nikhon ZEO Zone III office kot akhah uvin, lha 8 lha-lo apeh diuvin thumna anei uvin ahi.

District’a agom’a SSA staff 215 um ahi’in, phat sottah lhalo akimu loujeh’a hahsatna sangtah kitoh ahi, tin association joint secretary K Goutam in aseiyin ahi. Minister panna’a mopohna nei hotoh toukhomna ana kisem vang’a, lhalo kipe loulai ho peh nading’a kitepna hohi atah kiso lou ahi, ati. Administration in gelkhohna anei loujeh’a hichan gei pan kila ahi, tin aseiyun chule kinoptona akisem kahse’a ZEO Zone III kikhah jom ding chule teacher hon natoh aboljom loudiu ahi, tin gihna jong aneiye.

Jilkung khat in thuso miho heng’a aseidan in kiphinna hi December nisim 16, 2016 a chu bolding ana kiti ahi’n, ahinlah authority concerned in ngehna kineiho nakisuhbulhit peh diu ahi ti’a anaseijeh’a ana kivohai ahi. Ahinlah tunigeiya jong authority lang’a kon lhaluo muding thu akijahdohlou jeh’a tuni toumun kiphinna hi kibol ahi.

Chandel SSAJilkung hon phat tep lou cease work strike bol gou

Chandel, May 12 : All Manipur SSA Teachers’ Association (AMSSATA) in thumna/ngeh na kinei ho state government in phatsah/nop peh na aneilou leh SSA teachers Chandel in nisim  May 13,2017 ni’a pat  phat teplou cease work strike kibol pan ding ahitai tin Gen. Secy. Shongsir Nicodim Monsang in asei in ahi. SSA jilkung hon lhaseh’a amu ding’u lo (salary) abangkhai September, 2016 na pat in nakimu tapon ahi. Jilkung hohin natoh ka join uva pat in academic field chuleh non-academic sector ho’a phun louvin na phatah in katong jinguvin ahin tunichan gei in abangkhai lha 8 lo (salary) state government in suh theng ding angaito  pouvin ahi ati.

Chandel SSA teacher hon state government kom’a ngehna kinei hochu; agang thei pen na abangkhai lha 8 lo (salary) apet ding (Sep. 2016 to April,2017), tu lha sung’a SSA jilkung ho MGEL/EIN allotment chai tei tei ding, agangthei pen na state cadre sung’a conversion bol ding chuleh Zonal wise model school SSA jilkung ho ding bouva tundoh ding tiho hi ngehna anei un ahi.

United Welfare Committee in Kpi District sung’a kilungset tona aum nading’a temna nei

Kangpokpi, May 12 : The United Welfare Committee,Secy. Info. & Publicity Lamcha Chongloi in Kangpokpi District sung’a cheng eimi Kuki chanu chapa teho henga temna leh hetsah nom chu Kangpokpi District hi nao cha tobang mai thah ahi tohlhon in Pathen leh lamkai masa ho mapui na jalla kum 40 val struggle ihin bol nung uva hiche district hi ihin mu’u ahijeh in thilpha imu hou hi koiman amoh muthei lou ahijeh in Kangpokpi district sung’a cheng ule nao nam mite hon kilungset nale ki ngaidam to thei nan hinkho mang’u hite tin Lamcha Chongloi in tem naleh ngeh na ahin nei in ahi.

Thil thah inei jeh un hin kilungset nale kingai lutnan nei ju hite ati. Adeh in gamsung nam natong KNO/KRA leh UPF/ KNF kihet khelna ho a milham ho in whatapp leh adang adang dung’a thu tampi esei jeh un kho helou ho lung asu na in chuleh thujong sethei ahi jeh in apha chom lou ding mihem lung suna thei ho sei pou tin asei ding’a lom hon sei nao vinte tin asei in ahi.

JAC for District Demand Committee hi inpi lamkai jouse panlah na jallin district akimu in tun JAC khel in United Welfare Committee (UWC) in gamsung lamkai hojouse toh kilungtoh tah in Kpi. District HQ munna ana kisem doh tolhon in gamsung CSO lamkai jouse leh mipi toh kitho khom na’a gamsung’a thilphalam jouse kima sot ding kichepi ding chule thilse kedoujing ding ahi ati.

Lunglailu that’a kingoh mi 3 CJM Court in judicial custody a umding’a thupeh nei

Imphal, May 12: Khuraijam Ongbi Lunglailu that a kingoh mithum tuni chun CJM court in judicial custody a nikho 15 umding in thupeh aneiyin ahi. Thutan na chelhah masang chun JAC member hon police khut’a um mithat a kingoh ho ana bulu’uvin  police in JAC member ho nochehna ding in tear gas anakap’uvin ahi. Tuni CJM court a kipolut ho chu Khuraijam Inaocha (40), Memmi (63) le Ashalata ahi’uve. Amaho thum hi May nisim 26 gei judicial custody a umding ahi’uve.  Police in nidan 48 masang’a Inaocha confession record abol ding in Court in thupeh aneiye.

Ccpur Police in Ju amat hou hallhau

Lien S. Gangte

Ccpur May12: Ccpur police in Ccpur town area mun chom chom a Ju (Wine) ana mat hou hallhah na a-4 vei channa a ding in 12th May, 2017 nikho chun ana hallha uvin ahi. Hiche Zu (Wine) ho hi 25th April, 2017 nikho apat 12th May, 2017 nikho sung’a ana mat’u ahi.

Hallhah’a um Zu ho ahi leh, DIC 315 Litrs, Beer 28 Cans, Wine 47 bottles leh IMFC 67 Bootles ho ahi. Agom a dangka 76,250/- man hiding a ginchat ahi. Hiche ju ho hi jinglam nidan 11:00 chun thusuo mi ho mai’ah Police ho’n ahal lha uvin ahi. AK Singh OC, Ccpur Police in asei na’ah, maban’a jong hiche drive hi kibol jing ding ahi ati. Ccpur District adeh’a Town area boina leh monna aum ding deina’a hiche Drive hi kibol ahi ati.

Social Welfare Minister in ICM hostel building thah hondohna nei

Imphal, May 12: Social Welfare and Cooperation Minister Nemcha Kipgen in Friday nikhon New Hostel Building, Institute of Cooperative Management (ICM), Imphal leh Exhibition of Cooperative/SHG Products, Lamphelpat hondohna aneiyin ahi.

Chief Guest’a pang Pi Nemcha in ahoulimna’a Manipur gamsung hi North East’a ding’a Cooperative Institution lailung ahina ding’a pan kalah ding ahi, tin aseiye. Minister in ICM, Imphal pachatna thu aseiyin, 1988 kum’a akiphudoh’a kon lolhing tah’a pan alah uva chule training programme chom chom abol doh hojal’a kipathu aseiyin ahi. Athah’a hondohna kinei lupna 32 umna hostel’a hi room 16 um ahi.

Institute in tuchan geiya training program 80 val abol’a chule participant 3000 val ahi, tin aseiyin, chule institute in maban’a jong anatoh akehlet’a, cooperative machal nading’a pan alah jing ding’in temna aneiyin ahi. Cooperative/SHG product exhibition’a handloom, handicraft leh nehthei thil panna’a dukan 25 um ahi. Kin-gon’a Rajya Sabha MP leh President, National Cooperative Union of India (NCUI) chule Chairman, National Council for Cooperative Training (NCCT) Dr Chandra Pal Singh Yadav leh NCCT secretary Mohan Kumar Mishra, Registrar, Cooperation L Nabakishore Singh chule Joint Registrar Cooperation Michael Bepol Lamkang jong apang uvin ahi.

Congress member 7, NPF 1 le LJP 1 in BJP bel

Imphal, May 12: Tamenglong ADC congress member sagi, NPF member khat le LJP member khat in tuni chun BJP abeltan ahi.  Mi ko (9) ho chu tuni chun BJP office Nityaipat Chuthek a liemna kin abolpeh’uvin ahi.  Tuni aparty cheh’u hindalha’a ruling party hinbel Congress ADC member hindalha ho chu  Alar Thoitak, Poulowthui Rongmei, Kamei Khakpou, Meitrijin R Naga, Zino Kamei, Satkhojang Kipgen chule SG Pamei  ahi’uve. LJP a kon BJP hinbel chu G Apoukhui ahi’n NPF a kon BJP hinbel chu B Thambou ahi. Congress member ko in BJP abel tolhon’a tutadi a hi Tamenglong ADC sung’a Congress member khatjong umlou ahitai.

Tuni lahlutna kinguon a chun BJP Manipur Pradesh, President, Ksh Bhabananda; Education Minister, Th Radheshyam; Parliamentary Secretary, K Robindro le S Subhaschandra in pan ala’uvin ahi. BJP hin gamsung a khantou machalna natoh , thudih a thutanna chuleh gamsung a cheng mipi ho kah’a kingailutna le chamna umtheina ding’a na atoh jeh’a anitin a member kibe jing ahi tin Edn.Min. Th Radheshyam in ahoulimna’a chun aseiye.

BJP Manipur, President, Ksh Bhabananda in aseidan in Chief Minister N Biren lamkaina state sorkar hin  sorkar lui in abolkhahlou le aboljoulou natoh tampi ahinboldoh jeh a mipi in tahsanna lentah anei ahi. Political party dangho’n jong BJP abel diuvin temna aneiyin ahi.

All Manipur Petrol Oil Dealer Assn. in kiphinna ladoh ta

Imphal, Many 12: Director of Consumer Affairs, Food and Public Distribution , Yumnam Ranjan in thuso ho’a oil pump ni chung’a ngohna aneiho doudalna’a All Manipur Petrol Oil Dealer Association in oil pump jouse khading ti’a aphondoh chu CAF&PD minister toh kihoutohna aneitolhon in aladohtan ahi.

However, the minister has refused to give any comments regarding the Director of CAP&PD’s formal apology through media for making false allegations. A meeting was held with the representatives of the association, commissioner of CAF&PD, K Radhakumar and Director, Y Ranjan and CAF&PD minister at the office of the Old Secretariat. The meeting resolved to open the oil pumps with immediate effect. Due to the absence of employees at the oil pump, many will be convenient to open but it has agreed that some oil pumps with sufficient employees will be opened. Minister Karam Shyam spoke in detail about the meeting held today and advised to be careful so as to avoid such instances in the future.

MSF in COHSEM natong ho demna neiyu

Imphal, May 12: COHSEM natong hon employee 38 kilahna leh mi 38 lah’a mi 27 regularized kipeh na chung’a thil dihlouva natohna aumpoi, tia suhthengna anei jouvun Manipur Students’ Federation (MSF) hon Friday nikhon suhthengna hi demna aneiyun, thil dihlou kibol hetdohna um ahi, tin nelkalna anei uvin ahi.

MSF spokesperson in thuso miho akimupi na’a chun 2014 kum’a natong 38 ho kilahna’a advertisement ahilouleh notification aumpon, chule April 22, 2016 kum’a natong 38 lah’a 27 in regularized hina ding’a court ‘a petition apeh-u ahi, ati. April nisim 27, 2016 kum’a COHSEM in athu ageltoh’a donbutna apeh ding’a court in aseiya, hiche’a chu COHSEM chairman in employee ho regular lhahna ding tohmun a-ongpoi, tia court ana donbut ahi, tin aseiyui.

COHSEM natong hon mipi joulhep ding agot ahi, ati. Alangkhat’a, MSF hon COHSEM kivaipohna’a thil dihlou kibol phabep asei uvin, campus khat’a school 2 affiliate kipehna aumin, chule duplicate certificate lahna ding’a sum aval’a kilah be ahi, tin ngohna aneiyui.

MSF in ngohna eineikhum’u hi abul abal umlou ahi: Bhim Higher Sec. School authority

Imphal, May 12: Bhim Higher Secondary  School hi khamnathei bolho ding’a kisuhnalna mun ahi ti’a MSF in asei hi abul abal umlou thu ahibouve tin School authority in suhthengna aneiyin ahi.  Tunigei hin themjilnamun sung’a khamnathei bol akimandoh kha hihlaiye. MSF toh kijah mat tuona akineina’a chun MSF in school gate sem’a pang mistry ho hin Talab ane’uve tin aseiye. MSF in themjilnamun ahung viljing hi pha akisalheh in ahinlah tunung tuban tengle themjilnamun khantou na ding le semhoibena ding lampang joh aha sei diuvin temna akineiye tin School authority in aseiyin ahi.

Nagaland CM in Manipur ahungvil hin gam teni kiguijopna asemhoi ding ahi tia Committee of Civil Society, Kangleipak in sei

Imphal, May 12: Nagaland CM, Shurhozielie Leizeitsu in Manipur ahungvil hin gamsung teni kiguijopna asemhoi be ding ahi tin Committee of Civil Society, Kangleipak in aseiye. Nagaland Chief Minister in phat chesa ho suhmil a malam’a kingailutah’a hinkho manding thu asei hin gamsung teni kah’a kingailutna ahin sem ding ahi tin  Committee of Civil Society, Kangleipak a kon kimu thulhut chun aseiye.

Henglep A/C sung’a Govt. Jilkung ho MLA in kimu pi

Lien S. Gangte

Ccpur, May 12: Thangzalam Haokip, MLA, 57-Henglep A/C, Chairman, Hill Area Committee kipapi na kingon keh Henglep A/C sunga Govt. Oija ho toh holimna kingon 12th May, 2017 jinglam nidan 11:30 apat chun B. Vengnuom Community Hall mun’ah aneiyin ahi. Hiche kingon ahin, Welcome Address seina H. Paokhothang Haokip, DI/ADC/Henglep in aneiyin, DI of Schools, Henglep leh DI Staff ADC Henglep Block akon kipa thilpeh peh na aum in ahi.

Thangzalam Haokip, MLA, 57-Henglep A/C, Chairman, Hill Area Committee in asei na’ah Ccpur District sung’ah Henglep A/C hi akhang tou lou pen’a het ahi in, kahi thei chan’a Henglep A/C khan tou na ding’a pan hatah’a kalah ding ahi. Hiche toh kilhon’a ZEO leh ADC noiya School um ho’a themjil na toh kisai a Simlai chapang ho leh alhang sung’a um nule-pa hon masang’a sang’a phat chom na ahin nei thei na ding uva tin-le ha tho a pan kalah ding ahi ati. Oija ho’n tua apat pan nasa tah alah uva themjil na toh kisai a atoh na mun cheh uva aum diu ahi ati. Iham ti’a atoh na mun’a um lou leh Inspection hun’a mat doh aum leh dan toh kitoh a achung thu kitan ding ahi ati.

Ccpur Town area sung’a genthei tah’a nule-pa ho’n acha teu Lekha asim sah uhi igel doh uva, Govt. School a oija ho’n Salary kisan na ding bou hilova thinglhang’a Nule-pa ho’n genthei na atuo hou isuhlhap diu ahi ati. Maban a jong Govt. School a themjil na toh kisai a Haosa ho kakimu-pi ding ahi ati. Henglep A/C sung ahin agom in Govt. School 41 aum in, oija agom in 246 aum in, Student agom in 1902 aum in, Poen 39 aum in chuleh, Teaching & Non Teaching Staff agom in 285 aum in ahi.

Lamlen a nen kipai hon Loktak lake hoina le thupina sumolphou

Moirang, May 12: Moirang Municipal Council (MMC) in Moirang Sendra le Omba Nurathel kikah lamlen pang le Moirang College le Moirang Community Cente kikah’a lamlen pang a nen aboh jing hi Loktak Lake environment hatah in asukha in ahi. Nen kisedim set ho hin Loktak Lake hoina le loupina asumolphouvin ahi.  Hiche keu hilouvin nen kibohna’a kon Loktak lake sung’a longlut toxic liquid ho hin asung’a cheng nga le ganhing chom chom ho population akemsuh sah in ahi. Loktak lake hi donding twi kilahna mun khat jong ahijeh in nen kibohna’a kon toxic liquid luonglut ho hin mihem tahsa jong asukha in ahi. Avel’a chenghon thuso miho heng’a aseidan un, neng kiboh jeh hin chapang ho adamtheitapo’uvin chuleh mipi ho’n jong twi hah jeh in gentheina simsenlou atoh jing’ue tin asei’uvin ahi.

Nga-man khat in thuso miho heng’a aseidan in, nen kibohna’a kon loktak lake sung’a luonglut toxic liquid ho jeh hin nga jong alhom suh cheh cheh in ahi. Gamgot lai le  jong nen kibohna mun’a kon lake a lenglut plastic bag ho hin loktak lake keu hilouvin akimvel jong nasatah in asukha in ahi. Hiche thu hi Moirang Municipality Council heng’a jong hetsahna akineiyin ahinlah tunigei yin notthap in aumjing’e tin Nga-man lensep pa cun alungkimlouna aphongdoh in ahi.

Health Minister in Thoubal le Kakching a um PHC le sub centre ho vilna nei

Thoubal, May 12: Health Minister L Jayentakumar in tuni chun Hiyanglam Assembly sung’a um Public health centre le sub centre ho kholchilna aneiyin ahi.  Local MLA  Y Radheshyam, Health Director Dr K Lokendro le Thoubal le Kakching CMO teni in Minister pa chu akilhonpi’uvin ahi. Minister pa le anungjui hon avetlhah ho’u chu Hiyanglam PHC, Mayeng Lamjao PHC,  Langmeidong health centre, Waikhong health centre, Thongam Mondum health centre chuleh Arong Nongmaikhong health centre ahi.

Minister L Jayentakumar in aseidan in thinglhang le phaicham’a health sector a hin avat le ahinglal tampi aumnalaiyin ahi.  Health Centre khat’a umding dol manchah phabep jong tunigeiyin ninglhing tah in aumnaipoi. Governor le Chief Minister in jong health sector semhoina ding tohguon aneiilhon in , hitolhon’a agangtheipen’a health centre jouse a avat le alhinglou jouse kisubulhit ding ahi tin L Jayentakumar in aseiye.

Heingang PHC a International Nurses’ Day nit’u

Imphal, May 12: Leiset chung gam chom chom’a kinit bang in tuni chun PHC Heingang a jong International Nurses’ Day ana nit’uvin ahi.  Kinguon chu PHC Centre, Heingang a anit’u ahi.  Kinguon a chun Social Worker, P Toma le Heingang Health Centre, MO-in-Charge Dr L Suranjoy in pan ala lhon in ahi. Tuni kinguon a chun thinkeu nou phabep atu’uvin ahi. Dr L Suranjoy in kinguon a ahoulimna’a chun,  nurse hi ja’umtah profession ahina ban’a natoh hahtah le  boitah khat jong ahi tin aseiye.

e-waste management chungchang’a 1 day workshop kibol

Imphal, May 12: Tuni chun Classic Grande, Chingmeirong a e-waste management chungchang’a one-day workshop ana kibol  in ahi. Kinguon chu Government of Manipur, Central Government, PSU, Bank le Industry natong hon aguon’u ahi. Kinguon a chun State Pollution Control Board, Chairman, L Radhakishore; Parliamentary Secretary, H Dingo; Department of Environment, Director, M Homeshore; State Information Offficer, NC, Th Rajen le NIELIT, Executive Director Pameshor in pan ala’uvin ahi.

Chairman L Radhakishore in kinguon a ahoulimna’a chun natural resources ho le tutu’a thil umdan ho hi leptoh ‘a hiche dungjuiya chu natural resources ho manchah ngai ahi ati. Concerned department hon jong State Pollution Control Board dan le muol ho ajui diuvin temna aneiye.

State Government leh JACAATB kihou lhah na chung’a Governor in kipathu sei

Imphal, May 12: Dr. Najma Heptulla, Hon’ble Governor of Manipur in JAC Against Anti Tribal Bills (JACAATB) toh State Government tenin nisim 10/05/2017 ni’a ILPS bills thum(3) jeh’a phatsot tah kiphin na ana um chu tuchung nga kinop tona signed abol thei tah jeh uvin akipana sangtah ahin phondoh in ahi. Hon’ble Governor in lha masa’a pat nachu JAC kom’a Ccpur morgue’a um thilong hochu vui doh ding leh toukhom ma kihou khom na nei ding in temna ana nei jing in ahi. Hiche chunga JAC hon thilong hochu nisim May 25 nileh vui doh tah ding’a nop na anei nachung uvah Hon’ble Governor in JAC chung ngah kipa thu aphongdoh in ahi.

Governor in State Government leh JAC Against Anti-Tribal Bills lamkai hon phatsoh tah kihou lhah na ana um thei ta hih jong leh tuchung nga boina ema umlou hel la kihoulhah na akichai thei tah jeh in lamkai ho chung’a kipa thu asei in ahi. Chief Minister Nongthombam Biren Singh hapan najal la kihou lhah na hung um thei ahi tin Governor in asei naban’a State Government in jong tu’a pat state sung’a thil jouse hoi tah’a ahin vet lhah jing ding injong temna anei in ahi.

IMFL kiman

Thoubal, May 12: Thangmeiband Salungbam Leikai mun’a Friday jan nidan 11 don’a operation akibolna in Salam Sunita, w/o (LT) Rajen ‘a konin IFML tamtah amandoh uvin ahi. MSF, Thangmeiband United Youth Club, Khongnangkhong Meira Paibi Lup, Takhellambam Maning leikai Meira Paibi, Khoirom Leikai Meira Paibi chule JAC Against Drugs and Alcohol in thukholna’a pan alah-u ahi.

Body builder hon thisan pe

Thoubal, May 12: Royal Fitness Academy Gym (RFA) in Blood Bank Transfusion Unit , District Hospital Thoubal toh ‘one-day blood donation camp’ Thoubal Wangamataba Sorok Makha Community Hall mun’a Friday nikhon abol uvin ahi.

Gym founder Ak Lashami leh World Championship Bronze medallist Th Sarita jong numei thum lah’a apang uvin chule body builder pasal 35 in thisan ape uvin ahi. Thisan peh athupi dan thu doctor hon camp’a asei uvin ahi. Thoubal district hospital transfusion medicine specialist Dr L Robindro in, body builder hon hitobang tohgon aneihi kiletsah pi umtah ahi, tin aseiye. Atheletes hon thisan apeh nading’a boina ima aumpoi, tin aseiyin chule ni 120 sung’a thisan kipedoh jat kidit kit ji ahitai, ati. Thisan peh hi tahsa ding’a jong pha ahi, tin aseibe’e.

MGNREGS noiya ‘Mission Water Conservation’ thu’a workshop kibol

Imphal, May 12, 2017 (DIPR): ‘Mission Water Conservation-Natural Resource Management’ chungchang’a MGNREGS noiya Rural Development and Panchayati Raj Department in Classi Hotel’a Friday nikhon workshop abol uvin ahi.

Chief Secretary O. Nabakishore Singh; Chief Conservator of Forests, Government of Manipur, D.J. Anand; Undersecretary, MGNREGA Rajeev Sharma; Deputy Secretary(RD & PR) Valentina Arambam chule Secretary(RD&PR), Sumant Singh kin-gon’a chief guest, guest of honour leh president in apang uvin chule Pankaj Shrikant Duberkar,Project Executive Alternative Technologies, MGNREGA Division, MORD, Government of India leh Sonal Kulshrestha, MORD resource person in apang in ahi.

MNREGA hi ni 100 lhing natoh pehna ding ahi’in, dangka 20,000’a toilet man lhom peh nading jong pang ahi. MNREGA noiya um programme jouse hi bidoi neiya kibol ahi’in, ahin, achepi hon kihoutohna aneilou ahi, tin Sumant Singh in aseiyin ahi. Madhya Pradesh gam’a NREGA leh PMGsy programme lolhin dan thu aseiyin ahi. Scheme convergence leh water conservation thu’a Rajeev Sharma in houlimna aneiyin, scheme khat akichepi’a ahileh scheme khat jong aphatchomna ahiding hi igel diu ahi, tin aseiye. Khonung’a boina venna ding’a Crisis Management’a kon Resources Management’a natoh khel angaiye, tin aseiyin, chule MGNREGA noiya um National resource Management project 100 lah’a 71 hi twi khol tup ding dan, ahilouleh twi man ding dan thu ahi, ati.

Hinkho’a twi athupi dan DJ Anand in aseiyin, mihem tahsa hi hop 70 twiya kisem ahi, ati. Twi kholtup nading’a natoh amun’a kibol ho Chief Guest O Nabakishore Singh in thudohna aneiyin, hiche hohi pukhri laiya kipan ding ahi, ati. Akilhengdoh lamkai hon hiche twi kholtup ding thu’a pan alah diuvin temna aneibe in ahi.

 

Assam Rifles in Charangching Khullen khomite Solar light pe’u

Imphal, May 12 : 26 Sector Assam Rifles IGAR (S) noiya 18 Assam Rifles hon May nisim 10, 2017 nichun Charangching Khullen, Chandel District chu Solar Light  ana peuvin ahi. Civil lamkai ho jaona kingonna chun Commandant 18 Assam Rifles in thinglhang mite chung’a thilpha abol uhi aboljom jing ding’u ahi ati.

Thusoh Lahchom

AMSU

AMSU Volunteer hon jaanhi jaan’a kon chun Khoyathong PCTC Oil pump kom’a um DM college gate khahpan ta’uvin ahi. Hiche Gate hi aseikoncha ahitan, itih le achimlhah ding seithei hitalou ahi. Authority concerned in jong gate hi agangtheipen’a athahsem din AMSU in gnehna aneiyin ahi.

MPCC

 MPCC Vice-President, Elengbam Dwijamani hi Pradesh Election Authority, MPCC in tutu’a a’ong a um Rajya Sabha seat tetding in lhendohna aneiyin ahi. Alangkhat’a BCC in Chandel ST le Churachandpur ST tet ding  in SR Francis Anal le Mangcha Gangte lhendohna aneiyin ahi.

Awareness camp

HDFC Yairipok branch in Reserve Bank of India, Guwahati toh Laimanai mun’a Friday nikhon ‘banking ombudsman scheme 2006’ thu’a awareness camp abol uvin ahi. AGM, RBI Sanjay Gupta leh senior manager, HDFC Surchand Puyam camp’a resource person in apang lhonin ahi.

Chakpi lei

Chakpi  lei (bridge) chung’a May nisim 12 jingkahlam nidan 7 a pat gari alen hihen aneo hileh lhaithei talou ding ahi tin Executive Enginner, PWD, Brridge Division a kon kimu thulhut in aseiye. Hiche thupeh hi  EE a kon hetsahna ahung kibol kit kahse’a kichepi ding ahi tin thulhut chun aseiye.

Gul chuh

9 Sector IGAR (South) noiya 2 Assam Rifles Medical team in May nisim 10, 2017 nichun Gul in achuh khat ana huhdoh uvin ahi. Hiche Gul in achuh pa chu K Suranjay Singh kum 57 a upa Kangabok, Thoubal District a cheng ahi. Lou ache na a gul in ahin chuh a 2 Assam Rifles Unit Hospital ahinlhut uva kon medical team in ana boipiuva ana huhdoh u ahi. Chujouvin District Hospital Thoubal a din referred abol taovin ahi. Assam Rifles medical tam hin mikhat hinkho ahuhdoh keu hilouvin Khangabok khomiten achunguva tahsan na lentah aneitaovin ahi.

AISF

ll India Students’ Federation, Manipur State Council in tuni chun college phabep vilna aneiyin ahi. AISF in vilna aneina’a chun college simlai hon governing body umloujeh’a lungboina aneiho’u agamudoh’uvin ahi. Simlai hon governing body chungthu suhlhapna ding’a pan alah’uva political idea a kon akikangse diuvin AISF in temna aneiye. Simlai ho gelkhohna jal’a pan lajing ho hi governing body a pansah ding’a lomtah ahi’uve.  Simlai hon jong themvetna nikhole bou college kai abol’u hi angah diuva pha ahi.  State government in jong college bou hiliouva Pol-X le Pol-XII ho jong agelkhoh ding in AISF in ngehna aneiye.

Editorial

Thingnoimi’a kilepma gihna kinei ahidem

                                Tutua songkul a um mithat CM Biren chapa Jail a kon lahdoh ahilouna dia ‘Case’ boipi Supreme Court a Lawyer (Ukil) Utsav Singh Bains gihna kinei thu hi kholchil din aumtan, koi kichepna ham ti ahung kihedoh dem, ahilouleh akikholdoh jouva jong selmang le im mahthah ahung hidem seithei ahipoi. Tutua Manip[ur CM chapa N Ajay in akum golpi  gollhang Roger kiti khat achesa 2011 kum’a sunchang laitah a Imphal khopi lamlen a Pistol a anakaplih ahi. Hichu apa N Biren Congress Minister khat anahipet ahi. N Ajay hi chomkhat Jail a ana umjouva Bail a anakiladoh a akiseidan ahileh gampam (foreign) geiya gakiseldoh a jong kisei ahi. Hiche Case hi athite insungmi hon mithatpa hi Jail a-kon lhadoh ahilouna teidi leh achandidol gotna akisanteina dia Supreme Court geiya Case ahinbol uva hiche Ukil (Utsav Singh) hi ahinthalah u ahi. Mi tamtah geldan’a chu N Ajay hi apa CM ahung hiphatna athaneina mangcha’a achapa Jail akon ahinladoh khadem ti ahi. Hiche thua hi athite pandan hi sum le pai a kijol lungdamna leh kihoulhahna ho umloudi ti ahi. Seisetna hilouvin, sopi meilhei te hi sum dei leh sum a kichai jeng uva akisei vang uva Roger insungmi te pandan hi thudih joh a chedi, milen mi bolthei ahiman’a koima chung’a noisena amoh neitheiloudi ti ahin alamkhatna iseileh pachat umtah ahiuve. Sum thua kichaidohdi hileh aseijat-jat u luongman CM khat chun apehjeng thei hidi ahi. Ahin hinkho hi sana dangka to kilheh thei ahiloudan leh mihem khat hina’a adinna khatna dindet jingdi ti hiche Roger insungmite hin achepiu mudoh thei ahi. Mithatpa hi itobang gotna kipe henlang ahinkho gei kisubei jongleh anathapa (Roger) hinkho hi hung kiledi ahidehlou vang’in ahat apao hon ajotho khat hinkho noise tah a amohlah jeng hi hiche Roger kithana Case akon’a mi tamtah in kihilna’a ahinnei thei hidi ahi. Chuleh CM N Biren injong tuchan’a achepi hi “kachapa hijongleh mona nei mithat chun achandidol gotna anehdi mong ahi” ti ahin vetjui theitah lamkai khat ti thei ahi.

                          Ahileh tua N Ajay Jail akon kilahdoh khante tia a Case boipi Ukil-pu Telephone a gihna bol hi koi hidi hitam ti hi ahi. Ukil-pa seidan’in gihna bol hi phaicham thingnoimi leh NSCN-IM hon akisei uve ti ahi. Ipi jeh-a thingnoimi ho hiche thua kikum u ahidem, ahilouleh N Ajay insungmi (CM te) lang’in hiche thingnoimi ho athalah u ahidem, ahilouleh hiche thingnoimi party hoa kilepma Ukil-pa hi kigih ahidem ti ahitai. Hitobang kigihna hi Politician ho kikumna beiya Police hon kitah tah leh maipha vetna beiya akhuol uleh akhuoldoh mona diu umloudi ahi. Ajeh chu tulai Mobile phone hi thilse bolna’a jong manchah kijentah ahito lhon’a thilse bol (gihna) ho matdohna bailam tah jong ahikitne.

Blankfire

Leiset chunga hi itobang hi boina hia itobang hi chamna hitam akihethei tapoi. Mun khatna mi loikhat hon boina adimin hunama kibolna adime ti, amun mama a loikhat nin ima boina leh hunama kibolna aumpon chamna adime tikit, loikhat hon chamna umna dia lhangsap bolkit. Mipi hi ngol gamdi ahite.