ET May 12, 2017 News (Local, Thusoh Lahchom, Editorial, Blankfire)

ET May 12, 2017 News (Local, Thusoh Lahchom, Editorial, Blankfire)

181
0
SHARE

Kuki Inpi Kangpokpi District in gamsung’a cham le lungmon um nadia lhangsam

Kangpokpi, May 11: Achesa kum 45 valjen’a District pilhing hina dia lam ahinjot’a, lha nga (5) masang bep heuva genthei hesoh, lungjin lungdon tampi akon’a ana kicholnga bep, Kangpokpi District miten tunaicha’a gam le nam ngailutna jalla hem le thal dom’a nam natong ho kito theilou jeh’a avella khoisatna mipi abomkit tahjeh in Kuki Inpi Kangpokpi District in alhangsung le japi lah’a ‘Cham le Lungmon’ asamtan ahi.

Kuki Inpi Kangpokpi District President, Seikhomang Khongsai le Information & Publicity Secretary, Lamminlun Singsit in Inpi thalhenga soi akaina lhon ‘Cham le Lungmon’ lhang kisapna lekhathot chun, Nam sepoy ho kikah’a kihetthem tolouna aumji hi phamo asahna aphongin ahi.

Lungtup molso theilouva kum sottah ina um uva, genthei hesoh tinchang le lungdon lungjin na jouse dalha lel changa anaum’a, hahsatah le ulsa longpum pum’a ilungtup’u ihin molso jounung uva hi “Cham le Lungmon’ in vai ahin homdi tam tia kinepna dimsetna japi kium’a ahitai.Hinlah vangset umtah’a, Gam le Nam ngailutna thu’a hem le thal ana dom’a Nam na hintong Nam Sepoy ho kikah’a kihet themto louna hetman louva ahung umkit hi vangsetna lah’a achungnung pen ahitai tihi Nam sepoy hon ageldoh diu akul’e.Nunao chapang, nungah gollhang, tehse upa, office kai hihen lou natong hijongle lungling lao ditdet in aumkit tan, lungmong lhamonga puhsui thei aumta pouve, hiche hin lungthim asunan, alonaje akihethem jipoi.

Hijehchun, tunin inamsung uva kingaina dia ineiju Kuki Inpi bahkai Kuki Inpi Kangpokpi District lamkai chengin lhangsunga ‘Cham le Lungmon’ ahin kilhangsam tai, ju-neh motchon hinkho dalhah’a khaogui jamkhom botan, sattan lelkheh banga lungkhat thakhat a Chamna le lungmonga khosah’a khantou machalna lam’a pheiphung songkhom kit tadin Nam sepoy Nampi thalhengin temna sangpen kahin nei uve tin Kuki Inpi Kangpokpi District thuphon chun aseijin ahi.

Alangkhatna, hitobanga dei umloutah i-Nam sepoy houvin kihetthem louna ahin neiji teng leu achingtah tah jong, lunggel pilhing loulai khangthah ho hihen, alang alanga kikaina nei mi hihen, koihijongle Thupha le akihethem tolou teni kihetthem theina ding thu sei sangin akihetthem tolou teni sanga khohjo le khonunga geija kitomona thei thusei dohding itamjiu hi vangset aumlheh jengin ahi ati.Tulai hin social media in eihin phauvin, hiche khantouna to leng kibanga khantou khomding ti lungput nei talouvin, Nam sunga kitomona le thuse lhangsapnan aneikha kit un, khantouna hojeng jong amanchah je hethei jenin aum tauvin aphamo lheh jenge. Hijehchun, tua pat hiche social media mangcha’a Thupha thungei, chamna thu seithei louding hon khantouna hi chomkhat kidalhahsah un, kidalhahsah mohel ahitah le tunia konin nunao chapang, tehse upa dipdap tah’a hinkho mang ho khotona neijun lang, hiche social media hi Chamna lhangsapna joh in mang teijun tin Kuki Inpi Kangpokpi District in temna khohtah kahin nei uve ati. Akhumkhanan, mipin jong lungpi kengcheh in hiche thuchinlai hin hinkho mangu hitin, thusei lasah chingtheiju hitin chule akihetthem lou ka Nam sepoy teniu vin jong alang langin thangtom lunghan na ijat neilhon jongle chun Nam natong ihi nauva mopohna geldoh in Nam ngailutna dihtah lungthim kengin “Chamna” lamjoh mano lhondin Kuki Inpi in temna akineije tin Kuki Inpi Kangpokpi District thuphon chun aseije.

Phatteplou bandh kiladohta

Thoubal, May 11: Thoubal District MP Candidature Demand Committee in Wednesday ni jingkahlam’a pat Thoubal le Kakching District sung’a phatteplou bandh abol chu tuni nilhahlam  nidan 5 le kichai ding ahitai.  Hetthei khat chu committee hin  Heirok, Wangjing, Tentha, Khangabok, Wabagai, Kakching, Hiyangla, Sugnu le Jiribam a kon Rajya Sabha member khat sotdoh ahina ding’a ngehna anei ahi.  Achung’a kiminphah AC get (8) holah’a Outer Manipur Parliamentary constituency in ahop ho sung’a um voter ho hin Lok Sabha Election atet theilo’u amavang vote vang alhah theiyu ahi.

Committee Convenor le ex-MLA Y Thambal in aseidan in Thoubal, Kakching , Jiribam le Outer Manipur Parliamentary Constituency sung’a um mipi ho hin Parliament’a representation aneilou’u ahi ati.  Chuleh phatteplou bandh kilahdoh hi asung’a cheng mipi ho adeh’a niseh neh ding kiholthu ho le simlai ho  ding gelkhohnajal’a kiladoh ahi.

Lawyer Utsav Singh gihna kipeh thu state sorkar in thukholna pan ta

Imphal, May 11 (DIPR): Additional Chief Secretary (Home) Dr. J. Suresh Babu in aumtalou Irom Roger insung mite legal assistance (kithopina) pe’a Supreme Court lawyer pa thusei chungchang thukholna akipan tai, tin aseiyin ahi.

CM Secretariat mun’a Dr Suresh Babu in thuso miho akimupi na’a chun, national leh state thuso phabep’a lawyer Utsav Singh Bains in gihna thuthot kamu’e, tia kisei hi state sorkar in sangtah’a alah ahi, ati. SDPO-level officer hon thil umchan kholna apat ahitai, tin aseiyin chule state sorkar in ngaichat ahileh case hi National Investigation Agency (NIA) khut’a kipedoh ding ahi, ati.

Chule lawyer pa gamsung’a hiche thu toh kisaiya ahung teng leh security alhing’a kipe ding ahi, tin aseibe’e. Conference’a pang Director General of Police (DGP) L.M. Khaute in nikho phabep sung’a Manipur Police hon thil umchan ahetsoh diu ahitai, ati. Chule Manipur Police in Bains gamsung’a ahung teng security apeh ding ahi, tinjong aseiye.

 

MSF in CHOSEM chung’a ngohna anei hi abul abal umlou ahi: Secy. M.Vidyasagar

Imphal, May 11: Council of Higher Secondary Education Manipur (COHSEM) , Secretary, M.Vidyasagar in  staff 39 kilaho hi closed door a kila ahi’uvin Manipuri Students’ Federation, MSF in council chung’a ngohna asemho hi abul abal umlou ahi tin tuni Babupara a thuso miho toh akihoulimna’a aseiyin ahi. Kihoulimna’a chun Council, Chairman, L Mahendra le member phabep in pan ala’uvin ahi.

M.Vidyasagar in aseidan in staff 39 hi 2013 kum’a chu contract basis a ana kila’u ahi. 2015 kum’a chu contract natong ho cheng hin sorkar jah’a regular alhahna ding’uva ngehna aneiyu ahi.

High Court in natong ho plea angailhah jouva Council jah’a lhagup sung’a regularize abol ding’a thupeh ananei in, hitolhon chun council in jong tukum (2017) April’a chu regularize ana kibol’u ahi tin Vidyasagar in aseiye.

‘Regularisation process’ a thil dihlou kibol aumpoi: Employee

Imphal, May 11: Council of Higher Secondary Education’a athahbeh’a regularised kibol natong hon recruitment process’a thil dihlou akibol’e, tia simlai kiloikhomna in ngohna anei demna anei uvin, vangset umtah ahi, tin aseiyui.

Athah’a regular lha’a natong ho thalheng’a mikhat in thuso miho akimupi na’a chun recruitment kilahna’a dan kidalhah na mun khatcha aumpon, chule dan dihlouva achang ding’a lomlou koima regular kipelou ahi, ati. Office’a staff alhahsam jeh’a council in 2013 leh 2014 kum’a recruitment order asodoh ahi’in, hiche jouva post ong hohi casual basis’a kisudim ahi. Recruitment hi chairperson leh secretary inbou abol ahipoi, tin aseibe in ahi.

Natong ho regular lhahna ding’a phat tamtah’a boina aum jeh’a natong hon high court’a athu apohdoh’a High Court in 2015 leh 2016 kum’a special dpc kibol jouva amaho regularised lhahsah nading’a thupeh anei ahi, ati. Hiche thu’a lunglhai louna kisei hi ginchat umlou tah ahi, tin aseibe uvin ahi.

Lokchao thilsoh UNLF hon kiphonna nei

Imphal, May 11: Thingnoi kiloikhomna UNLF hon Lokchao, Imphal-Moreh lamlen’a achesa May nisim 8 jingkah’a sepai ho kibuluna thilsoh kiphonna anei uvin ahi.

Kiloikhomna in thuso aneina’a chun Territorial Army 165 Bn sepai 2 in thina ato’a chule midang 2 kitohkhah na thilsoh hi Manipur People’s Army (MPA), UNLF wing in abol ahi, ati. Jingkah nidan 5.10 don’a buluna kipan ahi, ati. Thilsoh’a mikhat amun’a thi’a chule mikhat hospital’a thi ahi’in, midang ni jong sangtah’a kitongkha ahi. Ahin, UNLF hon thuso anei nauva chun buluna thilsoh’a gamsung mi athi khah nopmo asah nathu jong asei uvin ahi.

India sorkar in Manipur gamsung miho hi SF’a atousah uva, gamsung’a kivetdana apunsah got ahi, tin aseiyun, chule hitobang duha’a kon mipi akichih thei diuvin gihna aneibe uvin ahi. SF hon alunghan nau vetsahna in lamlen’a lhai gari ho akhah uvin, Indian Army ho umchan hin gamsung mi suhnem ding agot avetsah ahi, ati.

I/W police in black market a johding  petrol thenglou kisemna mun luonkhum

Bishnupur, May 11: Nambol Police Station hopsung’a um Nongmaithem Kuber brick field a kon tuni chun Imphal west Police in petrol stock a kikoi amandoh in ahi. Petrol chu thildang toh hal’a black market a johding’a kiguong ahi. Black market a johding’a petrol kikoi chu Imphal West SP N. Herojit, Addl SP (LO), Imphal West Narcotics OC L Priyadarsani le K K Ranjit lamkaina police team khat in aga matdoh ahi. Akimandoh thao chu petrol tanker Regn No. MN-05-C-0176 sung’a kikoi ahi. Thao chu 18 KL vel ahi.

Police team ho chun amun’a kon chun plastic water tanker gup (6) le metal tanker khat amudoh’uvin ahi.  Myanmar a kon hung kipo Zero oil litre 5000 vel , tanker a kon kiladoh petrol litre 2800 chuleh kerosene litre 2000 vel amudoh’uvin ahi.  Petrol le diesel thenglou kisemna a kimangcha chemical phabep jong amudoh’uvin ahi. Hiche chemical hi zero petrol toh kihal’a black market a kijoh ahi. Police in aseidan in tanker kimudohna brick field  hi Heikrujam Mamang Leikai’a cheng N Herojit a ahi. N Herojit hin Tera Market’a  Highway petroleum kiti petrol vend khat jong aneiyin ahi.

Brick firm chu CAF & PD official hon jong kholchilna aneiyuvin ahi. Tanker chu IOD Oil Depot’a kon hungham ahilou le oil depot aphah masang’a brick firm a kitollut ham tivang hetchen ahinaipoi.

Akiman gal-manchah ho alepeh diuva NSCN-IM in sei

Imphal, May 11: NSCN-IM hon achesa May nisim 5 nikho’a 36th AR hon Asalu Zeliangrong Region Administrative Office, Jalukie Town ‘a operation abol uva, thingnoimi 2 leh milham 7 gal-manchah leh document hotoh akimat tha na thilsoh demna aneiyun, AR hon akiman gal manchah chule document ho alepeh uva chule akiman thingnoimi leh milham ho alhadoh diuvin jong asei uvin ahi.

NSCN-IM CSD mopohna kipe

Imphal, May 11: NSCN-IM hon tukhang’a Naga chondan minset sah’a dan dihlouva thil bol’a chule social’a thil phalou umho vesui ding’in Crime Suppression Department (CSD) ho mopohna ape uvin ahi. Hiche thu toh kisaiya Secretary, Ministry of Kilo Affairs M. Daniel Lotha in thuso anei ahi.

Medical camp

Imphal, May 11: Doctor, journalist leh member phabep panna’a Royal Riders Manipur team ho Azuram, Tamenglong district’a medical camp bol ding’in motorcycle’a akipan doh tauvin ahi. Gari tol 60 vel panna team hohi RRM office, Langol’a kon kipan doh ahiuvin, medical camp hi RRM in lhakhat lhing abol Mahousa Ima Ningshing Tha kin-gon noiya 9th edition channa’a abol-u ahi.

Exam centre phabep’a CrPC section 144 kichepi

Imphal, May 11 : District Magistrate, Kakching District Th. Kirankumar, IAS  in nisim 8/5/2017 nikho’a sub- section 2 of Sec. 144 Cr.P.C. of 1973 noiya Kakching Khunou College, Kakching Khunou leh Kha Manipur College, Kakching ‘a BA/B Sc/B Com/BTT/BFT/BSW 2nd/4th/6th Semester examination, 2017 kipehna mun meter 100 hopsung’a dan (prohibitory order) koi ding’a thuso anei hi nisim 9 nikho’a kon kichepi pan ahitai.

Section 144 CrPC hi May nisim 9 nikho’a kon June nisim 7 nikho, ahilouleh exam kichai chan jingkah nidan 8’a kon nilhah nidan 5 chan kichepi ding ahi. Ahin, thupeh hin Examination bolna’a panla’a Government Officials/machineries chule District Magistrate, Kakching District leh SP, Kakching District in phalna (special permit) apeh ho dan’a kon kilha-ong ding ahi.

Act east policy noiya strategic plan semdohna ding’a state cabinet in delhi’a pansa research centre khat toh MoU sign bol

Imphal, May 11: Act East Policy toh kisaiyin State Cabinet in tuni chun M/S India Foundation toh memorandum of understanding neiding in phatsahna aneiyin ahi. M/S India Foundation hi Delhi’a pansa Independent Research Center khat ahi. Government of India hin ahunglhung ding nikho ho’a Manipur sung’a Act East Policy chepina ding strategic plan phabep ahin semding ahi.  Loubol lai ahunglhun tolhon’a agriculture department in Dimapur a kon fertilizer nengtah’a atollut ding in Cabinet in thupeh aneiyin ahi. Lokchao, Moreh a melhetlou thalchoi hon bomb asuhpohna’uva thina toh Territorial Army Personnel teni insungmite jong Dk. 5 lakh cheh pehding tin Cabinet in phatsahna aneiyin ahi. Chuleh akisukha ho Dk.50,000 cheh pehding in jong thulhuhna asem’uvin ahi.

Private water supplier ho kholchilna kineiding ahi ti’a PHED Minister in sei

Imphal, May 11: Private water supply hon mipi nehding twi apeh’u hi athen le athenlou hetchen ahina ding’a safety health treatment kibol ding ahi tin PHED Minister L Dikho in aseiye. Hiche thu hi tuni Wangoi water Supply scheme  avilna’a asei ahi. Minister pa chu MLA O Lukhoi le PHED department engineer hon akilhonpi’uvin ahi. Minister pa le anungjuiho chun Govindagram’a um Wakching Khulen Water Supply, Erom Meijrao Accelerated Rural water Supply, Wangoi a um Samurou Urban Water Supply, Eram Siphai, Murum Phibou, Thongkhong Laxmi Bazar le Heiningroi water supply vetchilna anei’uvin ahi.

Minister pa le anungjui ho’n vetchilna aneina’uva chun water supply scheme phabep’a akisuhlou tampi amudoh’uvin ahi. Kholchilna aneijou chun Minister in concerned authority le MLA ho chuleh department official hon aselai ho agangtheipen’a asemphat ding’uvin thupeh aneiyin ahi.

Minister  L Dikho in aseidan in 2019 kah’a Manipur sung’a cheng jousen dongding twi theng amu ding’u ahi ati. Private supplier hon jong mipi don ding twitheng apehthei na ding’uva concerned department in avetchil ding ahi.

Nikho 5 chelha ding science meet kihongdohta

Imphal, May 11: District Headquarter jouse’a science & technology in institute khatcheh kihongdoh ding ahi tin Secretary, Science and Technology, H Gyanprakash in tuni Akampat a science meet ahondohna’a chun aseiyin ahi. Science meet hi National Institute of Electronics and Information Technology  le Manipur Science and Technology Council, MASTEC in kigom’a aguon lhon ahi.

Kinguon a chun Science and Technology Director Th Surendranath,  Institute Director Uttam Chand Laishram le Th Prameshore in pan ala’uvin ahi. Kinguon hi ni nga chelha ding ahi. Kinguon sung’a chun themjilna mun chom chom’a kon simlai phabep in model  phabep atahlang’uvin ahi. Johnstone Higher Secondary School Lecturer Chongtham Indrani in kinguon a chun State Science Communicator award akisan in ahi.

H Gyanprakash in ahoulimna’a aseidan in, kinguon kimang hi mipi in science phatchomna ahettheina ding’a kibol ahi ati. Themjilnamun jouse’a science equipment ninglhing tah’a kikoi ding ahi tin jong aseiyin ahi.

BJP vice-President le Hijam Nutanchandra in Major Khul public toilet vetlhahna nei lhon

Imphal, May 11: IMC Ward No.3 Hijam Nutanchandra le  BJP Manipur Pradesh, Vice-President, Jyotin Waikhom lamkaina team khat in tuni chun Major Khul Community  Hall Complex sung’a um public toilet complex vetlhahna anei’uvin ahi.  Jyotin Waikhom in aseidan in, Major Khul Community Hall complex sung’a um public toilet hi aniseh’a mipi in kisuh jangkhai na mun’a amanjing’u ahi’n, hiti’a condition hoiloutah’a aum hi mipi ding’a hahsatna lentah khat ahi . Department concerned in toilet complex kol kimvel’a metre 200 sung’a toilet thahbeh asemdoh ding in ngehna kaneiye tin Jyotin in aseiye.

Nongpok Leingak apunba Nupi Lup in kiphudohkal kum 3 lhinna nit

Imphal, May 11: Tuni chun Lamyanba Shanglen, Palace compound’a Nongpok Leingak apunba Nupi Lup kiphudoh kal kum ni lhinna anit’uvin ahi. Kinguon a chun kiloikhom president , Y Memma Leima, AMKIL President Ph Sakhi Devi, Nupi Samak  President K Taruni, Women Police Station Imphal East OC , N Memtu, MU Manipuri Department Head Professor, Nahakpam Aruna chuleh member phabep in pan ala’uvin ahi.

Ima Panthoi Sana keithel Lup in kiphudol kal kum 6 lhina nit

Imphal, May 11: Tup Mahal Theatre’a tuni chun Khwairamband Keithel Temporary Market Shed a tou nupi thiljoh ho kiloikhomna ‘Ima Panthoibi Sana Keithel Lup’ in kiphudohkal kum gup lhinna anit in ahi. LOUSHAL President, Mutum Churamani Meitei, LIPUN President, Somorendro Thokchom, Ima panthoibi Sana Keithel Lup President , Ningombam Ibemhal le member phabep in kinguon’a chun pan ala’uvin ahi.

Concerned authority in license neilou jeh’a lamlen pam’a thilkeu joh nupi ho ding gelkhohna jal’a kailhang thahbeh khat ahilou le tu’a aumsa kailhang akehlet be ding in Mutum Churamani in ngehna aneiyin ahi.

Thusoh Lahchom

International Nurses’ Day

International Nurses’ Day (May 12) galdot vetsahna in tuni chun Nurses’ Association TNI JNIMS unit in JNIMS hospital children’s ward a um chapang ho momlhum le nehthei ahop peh in ahi.

Simlai 1 thi

Yairipok Khoirom mun’a truck khat in scooter khat atat kha in, thilsoh’a scooter’a tou kum 14 bou hinalai tuition’a che numei chapang khat athi in ahi. Thulhut dungjuiya numeinu hi Phouden Moirangpalli’a cheng Antartic English school’a class X simlai SM Rukaiya, d/o Abdul Barik ahi. Thi-long Yairipok CHC’a aumin ahi. Truck driver pa ama-leh-ama police khut’a akipedoh in, driver pa apehdoh diuva mipi tamtah akikhop jeh uvin police station kimvel’a security khoutah in akoi uvin ahi.

Torch rally

Lilong Youth Social Service Union (LYSSU), Santipur Youth Development Association (SYDA) Lillong Shantipur, Lilong Keithel Meira Paibi Lup chule Santipur Meira Paibi Lup in Lilong Area, Imphal West’a Wednesday nikhon khamnathei thil kibol doudalna in ‘torch rally’ abol uvin ahi.

Music video kithenso

Manipur Film Development Society, Mini Auditorium a tuni chun Loitangleng in asem ‘Khonjel Ama’ ti’a kimnivo music video hondohna ana um in ahi. Kinguon a chun Director of Education (S), S Prabin le Film Maker Makhonmani Mongshaba  in pan ala lhon in ahi.

Eye camp kibol

Tuni chun Kangleicha Yaipha lamjing Lup le Shiya Eye Care Foundation in Naorem Leikai Primary School’a free eye examination camp ana guong lhon in ahi.  Mit hi khomu theina ahijeh’a mihem tibah lah’a apoimo pen ho lah’a khat ahi’n, tuni eye camp kibol hi gamkai sung miho khomuna ahoitheina ding gelkhohnajal’a kibol ahi tin  Kangleicha Yaipha Lamjing lup, Secretary, Y Chalamba in aseiye.

CEF India

Child Evangelism Fellowship (CEF) of India, Imphal Branch in “Let the little come to me” ti thupi hinan  The 1st Foundation Day Cum Thanksgiving chu May nisim 9, 2017 nikhon KBC Centre Church Haokip Veng, Imphal a ana mang uvin ahi. Hiche kin achun Pastor Lalboi Singson CBCA Speaker in apang in chule Miss Thenkim Khongsai le Miss Chochong Haokip chu Artist a apang lhon in ahi. Chule Thangminlun Chairman le Seilal Vice Chairman akon kipathu seina le Lamthang Haokip Staff In-charge in Ministry report chomcha apen ahi.

Editorial

Bill 3 a kon kihilnadi

                               Ahunglhung ding 25 May (2017) a vuiloulai ‘Tribal Martyr 8’ ho vuidia kinoptona hi apomlouloi umnalai ahijeh in akivuidoh kah-a kon koi tokuo ahinkheuva boina hung kichaimo diham seithei ahideh hihlaiye. Ahin Bill 3 thua kiphinna jeh-a mi 9 lang’in hinkho anachanlo chu kiphinlona jehpen thu (issue) kiseitalouva lamchuom-chuom’a ama ama phatchomna dia ananeigo hon tuchun kihilna’n (lesson) neimai taohen. Ajeh chu achaina keiya May 10 (2017) nia JACAATB leh Manipur Govt nin kinoptona soi akai chu ‘Tribal’ ho dia aphachomdi thil thah vengvung jao dehlou, abon tobang’a chu boina kipat til’a pat State govt nin ana noppeh tobang hisoh kei ti thei ahi. Athahpen’a seithei chu ahileh – tunung teng Tribal ho tongkhathei daan (Bill) semdi akitileh atohkhahdi (stakeholder) Tribal ho dohna (nopna) neilouva ima kibolloudi ti ahi. Hiche hi UNC in district thah kisem thua kiphinna anei suhthipna dia State govt toh kihouna’a kinoptona dungjuiya ‘stakeholder’ ho nopna louva Govt nin ima abolloudi kiti ‘photocopy’ tobang ahi. May 10 soi kikaitona’a chu ‘District gamgi (boundary) thu jong kijeplut ahi. Hichu District Boundary Commission nin district gamgi khel dia lunggel le natoh ahinnei khahleh JACAATB hon mithi vuiloulai ho vuidohna dia ‘demand’ abol u lah-a Churachanpur district a-kon district thah khat semdohbe di ti ki-ngaitodi (consider) ti ahi. JACAATB bou hi Bill 3 to kisamkaina neilouhel ‘demand’ bol ahipoi. Boina kipat til chun KNO leh UPF hogeiyin Centre toh Political Talk (kihouna) aneina diuva Martyr 9 ho thiluong hi manchahdi ti anahie. Chuban’a Sixth Scheduled thumna’a neidi tiloi jong ana um’e. NSCN-IM geiyin UNC maichang’a neiya hiche mi 9 thiluong hi India govt toh akihounauva manchah teidi tijong hung kilang doh cheh cheh anahie. Hiche jeh-a Inpi ho jaona JACAATB jong hung keh-a achomdohloi ana um, Martyr thiluong khat jong kihoutohna beiya ana kivuidohman ahi. Bill 3 jeh-a kiphinna’a athilo hijat umhi khonung’a dia ichan hung phachomdi ham seithei ahilou vang’in Churachanpur Town Assembly Constituency a hiche petna Sitting MLA/Minister sotlhahna invang apang’e ti thei ahi. Ahin JAC lamkai lah-a Political Career kisemdohna’a neigo ho dia aphatchomloudan vang muthei ahi.

                     Tua hi State govt injong Tribal ho deilou Bill moh pohdoh a ‘pass’ moh bolbol dijong ‘second thought’ (phate gelna) ahinneidi, Tribal MLA hon jong State Assembly a khu ipi kiseiya ipi kibolgoham ti thipbeh-a vedia koiman atun u ahiloudan khahdohna khat aneilou uleh inn kihalna khohcheh sohthei ahidan ahet tahdiu tahsan aum’e. Mipi injong kiphinna khat jeh-a moh lenpheng jeng hi meichang nehna thei ahi ageldohjep tahdi ahi. Kiphinna’a mithi vuilouva kikoi koijeng kiti jong avuije, akoikoije umlou dinmun lhunthei ahidan jong hiche thua kon kihilna aumdi tahsan ahi. Thil solonapen (main issue) to kisamkaina umlou thudang moh pohdoh aphatchomloudan kihilna’a neidi hi akhohpen hidi ahi.

Blankfire

Tu masang jep geija chu NGO kiti hi tonglouva sum munapen business hoitah loija kisei ahin tulanga JAC kiti hi sum umna business khat a chedoh thim ahitan thil khat asoleh jangpu le jangpi ho dia boipia lahdoh thei thei kilahdohdi ti jong kivatlou ahitai.