ET May 11, 2017 News (Local,Thusoh Lahchom, Editorial, Blankfire)

ET May 11, 2017 News (Local,Thusoh Lahchom, Editorial, Blankfire)

649
0
SHARE

JACAATB leh Govt. of Manipur in kihouna neilhon MoU phabep sign bol lhon

Lien S. Gangte

Ccpur., May 10 (ET): Joint Action Committee Against Anti Tribal Bills (JACAATB), Ccpur leh Govt. of Manipur in Bill 3 chung chang leh Martyrs ho chungthu ah kinop tuo na Memorandum of Understang (MoU) 11th May, 2017 nilhah nidan 3:30 chun Mizo Peoples Convention (MPC) Office, Hmuia Veng ah anei uvin ahi. Hiche ahin, Tribe chom chom leh JACAATB a lamkai, Manistry of Home Affairs apat palai leh Manipur Govt apat palai ho apang uvin ahi. Ama ho chu, H. Mangchinkhup

Convenor, JACAATB; O. Nabakishore Singh Chief Secy, GoM; B. Dongzalian Simte President, ZC, Ghq; Vanlalrinlian, President, MZP, Manipur; Chinlunthang, President, UZO Ghq; T. Khailianthang, President, YPA Ghq; H. Pau Za Cin President, TCU Ghq leh A. N. Jha, Under Secy, Ministry of Home Affairs, Government of India ho ahiuve.

JACAATB leh Govt of Manipur kinop tuo na ho chu a-1 nah, Ministry of Home Affairs, Government of India vide letter No. 17/44/2015-Judl. & PP dated 11th May, 2016 chung chon in “Protection of Manipur People Bill, 2015” chu President of India in a pomlou ahi tin State Government hetsah in aum in, chuleh bill dang 2-ho “The Manipur Land Revenue and Land Reforms (7th Amendment) Bill, 2015” leh “Manipur Shops and Establishments (2nd Amendment) Bill, 2015” chu Government of India in a table ah a hentang nalaiyin, maban a hitabang bill thah akisem ding jong leh aki saikhahpi ho toh ngaidan seikhom masat ding ti ahi. Chuleh, maban a jong thinglhang mi ho sukha thei ding Bill thah akisem ding leh State government in ahiding bangtah leh Constitution of India dan dungjui a stakeholder-ho toh aki houkhom masat ding ti ahi. A 2-na ah, Manipur thinglhang gam ki vaihop na ding toh kisai a JACAATB in athum ho State Government in hetpeh toh kilhon’a, SoO group toh Manipur Govt tripartite talks JACAATB in a kithuopi theina chana kithuopi ding ahi. Chuleh, Manipur a thinglhang mi ho Interest venbit jing ding ti ahi. A 3-na, 25th May, 2017 masang ngei a Martyrs ho galna a mi khat chung’a dangka Rs. 5 lakh cheh apeh ding, Govt. natohna det (Permanent Employment) Martyrs insung mi khat cheh apeh ding ahi. A 4-na, 25th May, 2017 masang ngei a liemna tuoh mi 48-ho kithopi na a dangka Rs. 50,000/- cheh apeh ding ahi. A 5-na, 25th May, 2017 masang ngei a Bill jeh a kiphinna a kitong kha a tahsa el-bai (disabled) mi 8-ho Govt. in natoh na apeh ding, dangka Rs 2 lakh cheh apeh ding ahi. A 6-na, Lamka khosung’a Tribal Martyrs Memorial Park leh Singngat a Tribal Martyrs Memorial Hall Govt. in asah ding ahi. A 7-na, JACAATB in kivaihop na kitup jo aum thei na ding dei na athum u district thah athum’u District Boundary Commission in report apeh dungjui’a State Cabinet avetsui ding ahi. A 8-na, Bill 3 ho jeh’a mipi kiphinna chung’a Police ho thal chang lha na’a thina changei alhun na chung’a State Govt. in dan toh kitoh a avetsui a action alah ding ahi. Chuleh, A 9-na, 25th May, 2017 nikho ahilou leh hiche nikho masang ngei’a JACAATB in mithi long 8-ho a vui ding ti ahi.

Anoiya min chong ho hin kinoptuo na in soi akai uvin ahi. Ama ho chu ahileh, H. Mangchinkhup Convenor, JACAATB; O. Nabakishore Singh Chief Secy, GoM; B. Dongzalian Simte President, ZC, Ghq; Vanlalrinlian President, MZP, Manipur; Chinlunthang President, UZO Ghq; T. Khailianthang President, YPA Ghq; H. Pau Za Cin President, TCU Ghq leh A. N. Jha, Under Secy, Ministry of Home Affairs, Government of India ho ahiuve.

Social Welfare Minister Nemcha Kipgen liemna kin-gon kimang

Imphal, May 10 (DIPR): Social Welfare Department hi society machal leh khantou nading’a department thupi tah ahi, tin Social Welfare and Cooperation Minister Nemcha Kipgen in Department of Social Welfare in Bal Bhavan, Khuman Lampak mun’a reception programme abolna’a aseiyin ahi.

Department hi mijouse khantou na polut ding torch bearer ahi angaiye, tin Nemcha in aseiyin, chule social welfare department hi numei, chapang, tehse, chatmo, alhasam ho panna’a society section jouse toh kitoh ahi, ati. Department sung’a nehguh kibolna thilsoh demna sagtah aneiyin, chule staff ahilouleh koi tobang nehguh bol aumleh ngaidam kichan louding ahi, ati.

Hetthei khat chu Chief Minister N Biren Singh lamkaina Manipur BJP sorkar in nehguh umlouna society sem ding lungtup anei ahi. Kin-gon’a Principal Secretary J.C. Ramthanga, IAS, Director, Social Welfare, Surrender A.Shishak chule department official dang dang jong apang uvin ahi.

SSUM in ‘enquiry committee’ kisem nading’a CM heng’a memorandum pelut

Imphal, May 10: Socialist Students’ Union of Manipur (SSUM) in Wednesday nikhon Chief Minister heng’a memorandum apelut uvin, Maphou Dam’a kon Chinkeiching chan twi kipehna kisah thu’a enquiry committee asem diuvin ngehna anei uvin ahi.

Memorandum’a chun kiloikhomna in, pipeline kilhunna natoh phatah’a akibol lou jeh’a Imphal East, adeh’a Lamlai leh akimvel’a cheng ho ding’a kichatna aumin, pipe hi aphat seithei louva se thei ahi, ti lungjinna um ahi, ati. Tunnel project ni sah ding natoh kipehna’a thil dihlou kibol ahi, tinjong aseiyui.

Central Water Commission (CWC) 2015 noiya natoh chelha ahi, tin aseiyun chule sorkar akikhel jeh’a union nikho phabep thipbeh’a um ahi, tin SSUM in aseibe in ahi. May nisim 20 nikho’a kon sorkar in multi crore lhing Loktak Scam hi CBI khut’a apehdoh louvu leh simlai kiloikhomna in kiphinna apat ding ahi, tin gihna anei uvin ahi.

Fire Service Candidate holeh Guardian hon Dahkal 48 bandh boldiu

Imphal, May 10: All Manipur Fire Service Candidates’ & Guardians’ Association (AMFSCGA) in Moirangkhom, Imphal ah kihoukhomna aneiyuvin hiche a kisemdoh JAC chun tuni chan’a government lampang’a kon’a positive response akimulou jeh a tujan khangkim (May 11 midnight) a kipat pungkal 48 gamsung pumpi Bandh leh General Strike bol ding’in thuphon ahinbol tauve. Bandh kibol sung’a minu mipa, simlai ho, NGO, Meira Paibi, School College, Club, Organisation, Association chule kiloikhomna hojong kithopina apeh chieh diuvin temna aneiyuvin ahi. Bandh kibol sung’a deilou thilsoh aumle Manipur Government in mo akipoh ding ahi. Bandh kibol tajongle Hou-toh kisai, twi, electricity, medical chule press ho’a dia vang kilha kang ding ahi tinjong aseiyuve.

Singngat AC MLA GS Haupu in apienna kho vil; kho semphatna ding’a kitepna phabep jong nei

B.Lalboi Gangte

CCpur. May 10 (ET):  60-Singngat MLA Ginsuanhau Mate  in tuni jingkah nidan 9:00  velchun apenna kho M. Khaukul Sangaikot, Sub-division  a apenna apa (L) Thangzalang L.Mate lhansong vilna aneiyin ahi. 1959 a anapeng MLA pu hin 1995 kum’a apenna kho anadalhah ahitai.

Term 2 kijom a election ahung  kaidoh jal in khomiten kipapina kingon jong amanpi uvin ahi. Masang in kin le dong chule boina jatchom chom hojeh in deibang in lunggel leh toh anajou pon ahin tuchung kum 5 sung’a vang hiche kho hi kasemphat ding ahi tin MLA Ginsuanhau in kingon a ahulimna a chun aseiye.

Hiche kho a kikhop khomna ding Community Hall jong kasha ding, kholui ahitoh kilhon a khopi lhing hisah ding tihi kalungtup khat ahi tinjong aseiye.

Singngat Constituency semphatna ding’a government injong dangka crore 88.40 apeh ding ahin, Sangaikot Sub-Division sung’a um PHC jong pilhinsah ding, MBBS 5, Nurse 4, ANM 2, GNM 2 leh staff 10 jong koiding ahi ati. Hiche dinmun eihin phahsah constituency sung’a eingailutah, iding’a thingam a pang hojong hatah a kakithopi ding ahi tai. Gamsung semphatna natoh hi lampi/lamlen semna a kipan ding tia aseitoh kilhon in M. Khaukul khomiten hitobang kingon abolpeh jal in kipathu jong aseikit in ahi.

MLA pu’n aseibena ah M. Khaukul kho hi 1962 kum a ana kiphutdoh ahitan, tuni changei a MLA khatcha’n don’a akoilou kho khat ahi atin chule hiche kho vil masapen ahina chungah mipite ngailut kachan jel ahi tinjong aseikit in ahi.

  1. Monglen in kum 55 lam government a kon’a phatchomna amulouna chungah MLA Ginsuanhau Mate in alung kimlouna thu aseiyin PHSC, Community Hall, School leh building hojong umding’a lomtah ahi. Ahinlah tule tua hi Community Hall kisa masading chule adang dang hochu kum 5 sung’a ol ol a ngaito kitding ahi ati. Hiche keu hilouva hiche kho’a bi-inn a chenghon jong langva akikhu diu ahi ati. Tuchung Congress a kon’a BJP kajop jonghi nam lamkai holeh Constituency mipite deisah jal’a kalut ahi tinjong aseikit’e.

Kakching leh Thoubal District’a phat teplou bandh kipan ta; niseh kimanchah suboi

Imphal, May 10: Thoubal District MP Candidature Demand Committee in Thoubal leh Kakching district’a Wednesday jingkah nidan 5 ‘a kon phat teplou strike apat jeh uvin district teni’a niseh kimanchah aboiyin ahi.

Haji Abdul Salam thi jeh’a Rajya Sabha seat a-ong’a um ahi’in, May nisim 25 nikho leh ama khel ding kilhenna by-election umding ahi. Athi MP pa hi Wabagai assembly constituency’a ahi’in, Scheduled tribe ding’a reserved ahijeh’a Constitution in parliamentary election tet ding’a aphal lou Outer Parliamentary Constituency 8 lah’a khat ahi. Vote pe theiya ahivang’a election tet theilou assembly segment 8’a voter hi 2.35 lakh vel ahi.

Thoubal District MP Candidature Demand Committee in adoudalna’a phat teplou bandh akou ahi. Heirok, Khangabok, Wabagai, Kakching, Hiyanglam leh Sugnu ‘a konin mi tamtah Khongjom bazar’a akikhom uvin, Imphal-Moreh lamlen ating uvin, dukan chule inter-district gari hojong akikhah in alhaisah pouvin ahi. Committee chief convenor leh legislator anahi Y Thambal in achesa kum 65 lhing Assembly constituency 8’a um general category voter hohin election atet nathei diu thaneina kipelou ahi, tin aseiye.

Voter hohin tribal candidate bou alhen theiyu ahi’in, second class citizen bang’a kibol ahiuve, ati. Committee in phat sottah hiche hi adoudal jouva Haji Abdul Salam hi nominate kibol ahi, tin aseibe’e. Salam hi aphat (term) kichai masang’a thi ahi’in, hiche panmun tuh ding’a bulhinna neiya general category khat ma Rajya Sabha member ding’a akilhen nading’a thumna aneiyu ahi.

 

CM in thinglhang District’a CSO leh Haosa ho boina ngailhah peh

Imphal, May 10  (DIPR): Chief Minister N Biren Singh in thuphon ananei masat bang’in a-inmun’a thinglhang district’a kon kho haosa holeh civil society organisation lamkai chom chom ho Wednesday nikhon akimupi in ahi.

Hetthei khat chu Chief Minister in April nisim 11 nikho’a Ukhrul’a akholjin na’a thinglhang gamkaiya kon kho haosa holeh organisation lamkai hotoh lhaseh nisim 10 nikho leh toukhomna nei ding’a anasei ahi. Jingkah nidan 8 ‘a kon nilhah nidan 1 chan Chief Minister in civil society organisation leh kho chom chom 50’a kon mi 500 vel hahsatna ho angaipeh in ahi.

Thinglhang mihon CM toh kimuto nading hahsatna aneijeh’a N Biren Singh in hiche nikho hi thinglhang miho toh kimuto nading’a achombeh’a agon ahi. Nam aneo ahilouleh alen aumpoi, tin CM in aseiyin, chule nam jouse jana neitah’a cheng cheh ding ahi, ati. Chule CSO lamkai leh haosa chom chom hon apehlut Photostat copy hohi maban’a action lahna thei ding’a office’a kikoi ding ahi, ati.

Akilhengdoh lamkai leh government official hon ‘Meeyamgi Numit (lha seh nisim 15 nikho) leh gamsung miho hahsatna angaipeh diuvin N Biren in temna aneiyin, aphat leh amun anikho masang’a hetsahna anei diuvin aseiyin ahi.

NVBDCP-2017 toh kisai a ASHA ho training kipan

Lien S. Gangte

Ccpur, May 10 (ET) : Chief Medical Officer, Ccpur Dr. Kimngaihching Simte thupeh na bang in Accredited Social Health Activist (ASHA) ho’n National Vector Borne Diseases Control Programe (NVBDCP)-2017 training chu 10th May, 2017 nikho chun Singngat Community Hall mun ah ana kipan in ahi. Hiche training hi Training Centres 4 (4Blocks) a chelha ding chuleh, 25th May, 2017 nikho a kichai ding ahi.

15th May, 2017 nikho leh Sibapurikhal, Tipaimukh Block; 23rd May, 2017 nikho leh Thanlon, Thanlon Block chuleh, 25th May, 2017 nikho leh Parbung, Tipaimukh Block a training um ding ahi. Training sung a hi DMO, IEC Consultants, DVBD Consultants, MTS leh ASHA Facilitator ho Resource Persons a pang diu ahi. ASHA agom a mi 189 hon training anei diu ahi.

Alangkhat ah, Nipi ahung hi toh kilhon in thoukang atampan tan, hiche toh kilhon chun Dengue natna (Khosih-pi) vei Nehru Marg akon mi khat matdoh in ana um in ahi. Dengue natna kholchil ding in State Malaria Team; Dr. Sashi Kumar Mangang, Director, State Epidemiologist, Manipur; Dr. Gojendro, State Malaria Officer, Dr. Brati, State Epidemiology Officer ho 9th May, 2017 nikho chun ahung kalsong uvin, Dr, Kim Simte, CMO, Churachandpur leh Dr. Ngaineikim Haokip, District Surveillance Officer ho’n ana kithopi uvin ahi.

Hetthei khat chu, Dengue natna hi thoukang chikhat Ades Mosquito in ahit apo uvin, hiche thokang ho hi tuitheng lah a kon hung kipan ahiuve. Tuitheng manding sottak koilou ding, phate a thoukang lut theilo nading a sit tup ding ahi. Hiche thoukang hon mi a pe jou akon ni-2 nung apat ni 10/12 jou in Dengue natna kilang dohji in, phate cha’a ikivet kol le kidampai thei ahi. Dengue natna vei ho hi khosik sang, tahsa kham, vun san chuleh lu-na kiti ho hi ahi. Khosih jouse vang Dengue natna ahi deh poi.

Manipur Education Service Officer Induction Training kipan ta

Imphal,  May 10 (DIPR): Education Minister Th. Radheshyam khantou machalna ding’a organisation jouse’a natong ho hetna thah thah’a update bol jing ding hi ngaicha ahi’in, chule society sem nading’a pan lentah alah ahi, tin lha khat lhing Induction Training Programme of Manipur Education Service Officer kin-gon’a Chief Guest hina in aseiyin ahi.

State Academy of Training, Takyelpat mun’a Wednesday nikho’a kibol kin-gon’a Minister in Manipur Education Service Officer hohi aphalam’a kikhelna aumna ding’a panla ahiu angaiye, tin aseiyin chule trainee hon education toh kisai topic ho apohdoh diuvin ngaidan aseiyin ahi. Ngaidan chom chom kipekhom hohi kin-gon kichai teng lahkhom’a khonung’a thilphat cheh ding’a tohgon semna’a man ding’a asei ahi.

Training’a pang hon athil to, ahetna chule athepna kiseipeh to nading’a phat gomkom lentah anei ahi, tin aseiyin chule mi atam jeh in akipana thu jong aseiyin ahi. Training sung’a national pension system, income tax, SSA, RMSA, mid day meal, national education policy chule adang dang thu topic’a aneidiu ahi. Education (S) Director N Praveen injong houlimna aneiyin, MES Officer ho service’a kipolut ahi, ati. Education Department tu’a hi khantou nading’a malam jon ding’a kigosa um ahitai, tin L. Nandakumar Singh, Deputy Secretary Education (S) E/O Additional State Project Director, RMSA in aseiyin ahi. Kin-gon’a W. Chandra Kumar Additional Director State Academy of Training, Educational Department jong apang in ahi.

Ministers hon donlou in eikoi uve tia Assam BJP MLAs hon Speaker kom’a hehna nei

Guwahati, May 10: Ruling BJP legislators hon Tuesday nichun ministers hon ka lekha thot’u khatvei cha jong in le donbut kha pouve tin Assam Assembly Speaker kom’a heh na ana nei un ahi. Legislators hon lekha ana thot’u chu phat kitep peh sung’a Ministers hon gangtah’a ahin le donbut nading in ngeh na anei un ahi. Speaker Hitendra Nath Goswami in aseina’a chun; hiche chung chang thu hi Chief Minister Sarbananda Sonowal in avet lhah ding in asei in ahi. Hiche chung chang thu Speaker hetsah na neichu Palasbari MLA BJP MLA Pranab Kalita ahi.

Prime Minister in bon ni 6 sung’a donbut na ahin peh thei leh iti dan na Ministers hon phat kitep sung’a donbut na ahin peh thei lou’u ham tin Kalita chun House achun asei in ahi. Hiche thu toh kitoh in Dhekiajuli BJP MLA Ashok Singhal in aseina’a chun; hiche chung chang thu in lekha aki thot thot jeng in chuleh doh najong akinei nei jeng in ahin Ministers hon in khatvei jong donbut na ahin pe poi ati.BJP MLAs dang dang in jong Kalit leh Singhal hi kithopi na ape jing un ahi.

Thusoh Lahchom

MCPCR

Manipur Commission for Protection of Child Rights (MCPCR) in May nisim 5 nikho’a simlai 21 kipohna school van pukhri’a alhah lut thu ‘a ‘suo motto case’ abol uvin ahi. Commission in Director, Transport department, Manipur heng’a jong lekhathot ape uvin, Child Rights kipalkehna, dan kijui louna, ahilouleh policy decision, guidelines kijuilou na um em, ti akhol uva chule Commission heng’a report apeh diuvin asei uvin ahi.

Toumun kiphinna

Kakwa Landaibung Leikai mun’a Langdaibung Meira Paibi Lup president Thongbam Lata Devi (52), w/o Th Rajen chenna inmun’a Tuesday jan’a meithal kikap demna in toumun kiphinna abol uvin ahi. Kiphinna mun’a um numei hon asei dungjuiya, motorcycle’a tou mi thum in Thongbam inmun hi meichang 2-3 ‘a akap ahi, tin aseiyui. Kiphinna bol hon thilsoh demna aneiyu toh kilhon’in ipijeh’a hitobang thil kibol ahi hilchenna apeh diuvin thumna aneiyun chule khonung’a chenna inmun akibulu louna ding’a temna anei uvin ahi.

Gelchang leh guo

Tunin Nagaland gamsung’a gelchang leh go nasatah in ana kitho in ahi tin official akon kimu thulhunt chun aseiye. Nagaland State Disaster Management Authority (NSDMA) OSD, Johnny Ruangmei aseina’a chun; Nagaland gamsung’a tukum ma hin go normal tah in aju in ahi ahin erratic nature jeh in volume jong asang in chuleh a impact jong ahat deh set in ahi ati. Nagaland sung’a Dimapur leh Mon district sung in vang go leh gel kheh na vang ana umpon ahi.

SSB SI Khat thi

Assam,Manas Reserve Forest, Chirang district mun’a Tuesday nichun 15 Battalion Sashastra Seema Bal (SSB) holeh National Democratic Front of Bodoland (NDFB) thingnoi ho ana kikap to na’a chun sub-inspector khat ana thi in ahi. Hiche operation chu SSB, local police leh Indian Army kitho khom ma anabol’u ahi. Hiche kikap to na mun’a chun INSAS rifles 1 anamu doh un chuleh tuchan in combing operation achelha jing nalai in ahi.

Dk. 21 crore man sana kigu

MP Jewellers, chrisian Basti mun’a michom ho in crore 21 man sana(gold) agu un ahi ahi. Hiche michom ho chun sana (gold) 8 kilogram guh doh chai un ajam doh thei tah lou phat un amun’a um ho suh kichat nading in  meichang 3 vei ana kap man un ahi. Hiche michom 4 hochun Hindi leh English pao’a hiche mun’a natong numei khat jong ana no khum un ahi.

Editorial

 

Manipur a Tribal MP um hung hahsadi

                                 Thoubal hon Outer MP tet theina dia kiphinna ahinnei uhi athahbeh ahipon tua hiche thua Bandh ahinbol uhi Congress hatna District ahijeh-a BJP govt tana jong hidi ahi. Manipur a MP Seat 3 lah a khat hi ST (Tribal) ho dia ‘reserved’ kibol ahin, hiche jengjong hi tua ‘Thoubal District MP Candidature Demand Committee’ (TDMPCDC) ho kiphinna hi sanpeh ahung hikhahleh acham’a kiladoh tobang hung hidi ahi. Thoubal district a Assembly Constituency 10 lah-a 8 hi Outer MP Constituency a jao ahin. Ahin hiche AC 8 sung’a vote nei mipi hohin MP election’a vote alhah thei vang uva Candidate hitheilou ahiuve. Hiche hi ‘democracy’ chena dungjuiya vote nei khat nin Election tetna thei tha (right) aneito kikal vang ahithouve. Ahin hitobang kibollona hi Thinglhangmi ho MP khat aumtheina teidi ti ahi. Tua Outer MP Constituency a voter agom gom’a hi Lakh 7 chunglam ahin Thoubal akon Voter hi Lakh 2 vel ahi. Thinglhangmi holah-a MP Candidate ki ot to malah khucheng’a kitetna um thou thoudi ahijeh in Thoubal hon Outer MP tet theina hinnei tau henlang Candidate khat kitoh tah in hinson leu akaina diu bailamtah hung hidi, hichu Manipur’a Tribal MP kiti umdoh nadi hahsa cheh chehdi tina ahi. Tuchan’a Manipur Outer MP hi Election 16 vei ana umna ah Meijinlung Kamson 4 (li) vei anakaidoh in, Rishang Keishing, Paokai Haokip leh Thangso Baite nivei vei akaidoh un, khatvei anakaidoh se chu ahileh Yangmaso Shaiza, Kaiho, Gouzagin, Kim Gangte, Holkhomang Haokip leh Mani Cheranamei ahiuve. Hiche hi ivetleh Kuki leh Naga lang hi kibang hiuheuva MP hung kilhapeh u tobang ahi. Thoubal hohin Outer MP atet theilou vang uva vote alomchang’a apehpeh u Candidate chu kaidoh jeng (deciding) ahi. Hiche jeh-a Outer MP Candidate hon election laileh Thoubal lang bou campaign aha khohsahjiu ahi. Ahin Naga langse kitoh tah a khat ahung din teng uleh Thoubal hon pele pehihleu kaitei jiu ahi. Hiche jeh-a hi tua Thoubal hon MP Election tet theina dia kiphinna anei u hi ahung lolhinkal chu Kuki group lang dia MP umdohnadi hahsa dehsetdi ahi.

                             Tu-tu hi Lok Sabha Election dikon jong ahipon, ipi jeh-a Thoubal hon Outer MP tet theinadia kiphinna’a bandh ahinbol jeng uhitam tijong ajeh bei ahikitpoi. Rajya Sabha MP Seat khat hi Sitting MP pa thi jeh-a ahunglhung ding May 25 leh By-election umding jeh ahi. Thoubal hohin Outer MP katet theitahlou ujongleh hiche Rajya Sabha Seat beh hi keiho eikipeuhen tia kiphin jong ahiuve. Ahin Rajya Sabha MP hi ‘indirect election’ ahin, Lok Sabha election bang’a mipi in vote alhahlou, MLA hon vote alhah u ahijeh-a Ruling party in atun khat chu bailamtah a kaidoh jeng ahi. Rajya MP Mary Kom ahileh President in ‘Nominate’ abolho lah-a khat ahin State MLA ho tunle tunlou jeh ahikitpoi. Thoubal hon Outer MP tet theina dia akiphinnau hi tutun sanpeh hihih jongleu khatvei ahinboldoh tei maithei u ahi.

Blankfire

Kipanina kin, loppehna kin, vailhunna kin, maicham sempehna kin kiti hohi boldi mong jong hinantin ahin hitobang kin hohi thil thumnadi leh vanomba bolna jatkhat injong achetan kin kibolpeh hodia jong bat khat neina hidohji danin aumtai.