ET May 10, 2017 News (Local, Thusoh Lahcohm, Editorial, Blankfire)

ET May 10, 2017 News (Local, Thusoh Lahcohm, Editorial, Blankfire)

782
0
SHARE

Sorkar kikhel toh kilhon’a khang thah kipan ahi, tia Nagaland CM in sei; Meilhei hon mi-upa umchan atho diuva tiemna nei

Imphal, May 9: Nagaland chief minister Shurhozelie Liezietsu in Manipur gam’a BJP lamkaina sorkar akisemdoh toh kilhon’a northeast’a chamna leh kihetthemto na khang alhung’e, tin aseiyin chule Meilhei ho sopi lah’a atahpen umchan atho diuvin temna aneiyin, nam neo ho phatchomna ding’a pan alah diuvin aseiyin ahi.

Nagaland leh Manipur gam kikah’a kiloikhomna tu masang’a ahoilou ho thu Nagaland CM in aseiyin, ahin, sorkar akikhel toh kilhon’a, hiche phat kichai ding ahitai, ati. “Achesa phat sung’a amachang phatchomna ding’a dinmun ana mangcha’a lamkai hojeh’a ngaidam kathum uve”, ati. Manipur gam’a CM akikhel’a chun keiho goljona bang’a kagel-u ahi”, tin aseibe in ahi.

Manipur gam’a nam tampen Meilhei hohi gamkaiya ding’a akhangtou pen ahiuvin, writer leh scholar phabep anei uvin, amaho hin chamna semna ding’a pan alah diuvin kouna kaneiye, tin aseibe in ahi. Gamsung tenin kijahmat tona anei jing ding chule kiloikhomna kisudet ding ahi, ati. Blockade hi tu masang’a anaum jing hijongleh tu’a kon blockade hi phat chesa hiding ahitai, tin thudoh donbutna aneiyin ahi. Thinglhang leh phaicham miho lungmong’a achen khom thei angaiye. Meilhei, Naga leh Kuki hon chamna’a kihetthem tona anei teng ulebou khantouna umding ahi, tin aseiye.

Dr.Shurhozelie in aseibe na ah chun Manipur gamsung’a cheng ho ding’a sorkar thah hin kinepna thah ahinpohlut ahi’n chamna umtheina ding’a hi thuso ho’n jong panmun lentah anei’u ahi. Thuso ho’n thilpha lam jeng ahinso teng’u le gamsung a cheng miho kah’a kilungsetna umthei ding ahi.

CM teni kihoulimna’a chun N.Biren Singh in Dr.Shurhozelie  loupitah in analiem in chuleh milim kisun khat jong ape in ahi. Dr.Shurhozelia in jong CM N.Biren chu dah khat ape in ahi.

Nagaland CM chu  Ex-CM T.R.Zeliang, Minister for School Education, Yitachu; Commissioner and Secretary to CM I.Himato Zhimoni; Vice President, NPF Zaku ; Personal Secretary to CM,  Dietheselhou Sachu le Press Secretary to CM, Sebastian in ahin jui’uvin ahi.

Alangkhat’a CM N.Biren Singh lamkaina in Minister for Education, Th.Radheshyam; Minister for PHE, Loshii Dikho; Parliamentary Secretary, PWD, Awangbow Newmai; Parliamentary Secretary (Home) , L.Sushindro; Parliamentary Secretary (Planning) Khasim Vasum chule Parliamentary Secretary (PHE), K.Leishiyo  in Kangla Helipad a ana liem’uvin ahi.

Chief Minister N Biren in Nagaland lamkai Liesietsu, TR Zeliang chule Yitachu kholjin hi thilpha ahi’in, agenda adang aumpoi, tin aseiyin ahi.

Chingmeirong kithana chungchang’a JAC Convenor  in muona neiho jouse gotna pehna ding’a ngehna nei

Imphal, May 9: Lunglailu Rongmei kithana chungchang’a kisem JAC Convenor Panti Golmei in aseidan in Khuraijam Inaocha hingnu (mother) le asopipa jinu  Ashalata jong hi Lunglailu that’a pang ahilhon jeh’a guotna peh ding’a lomtah ahilhon’e ati. Hiche thu hi tuni Chingmeirong Kabui vangkho’a thuso miho toh akihoulimna’a asei ahi. Panti Golmei in aseidan in, Inaocha hin police jah’a aloinu chu school recess pet’a atha dan’a asei ahi’n, ahinlah school authority a kon kimu thulhut in aseidan in Inaocha hin hiche nikho chun school khatvei jong akhelkhapoi. Lunglailu kithana chung’a muona nei jouse guotna akipehlouva ahileh kiphinna khoutah kibol ding ahi tin Panti in gihna aneiyin ahi.

Inaocha hin aloinu Lunglailu kitha nikho’a chu ajilkung chankhompi khat toh School recess pet’a cha adonkhom lhon ahi. Hiche thu hi Inaocha toh jilkung’a pangkhom pa mama in asei ahi. School hi nilhahlam nidan 2:55 le kikhah ji ahi. Ahinlah hiche nikho a chu sports drill umjeh’a minute 20 vel geijep’a kikhah ahi. School recess a cha adonkhompi pa  mama to Inaocha chu In lang gei hungkilhon kit lhon ahi. Hiche hin avetsah chu ahileh Inaocha in hiche nikho’a chu School campus akhokal khahlou ahi tin Panti Golmei in kichehtah in aseiyin ahi.

CM in One Day Media Seminar hongdoh

Lien S. Gangte

Ccpur, May 9: Editors’ Guild Manipur leh Manipur Hill Journalists’ Union (MHJU) gonna noiyah 6th May, 2017 jinglam nidan 10.30 chun Lamka Press Club, HQ Veng ah Reception- cum- One Day Media Seminar on “Communal Harmony: Bridging the Gap” hon doh na leh CM Receiption kingon anaum in ahi. Seminar hondoh na N Biren Singh, Chief Minister, Manipur in aneiyin ahi. Hiche kingon ahin, K Radhakumar, Commissioner IPR; Sothing Shimray President, Manipur Hill Journalists Union leh A Mobi, President, Editors’ Guild Manipur ho Special Guest, Guests of Honor leh Functiona President in apang uvin ahi. N Biren Singh, Chief Minister, Manipur in Seminar hawnna nei ding a hi. Chuleh, Vungzagin Valte, Chairman MTDC, V. Hangkhanlian, Minister Agriculture, Vetenary & Animal Husbandary; T.T Haokip, Chairman HAC leh Ginsuanhau, MLA 60-Singngat ho jong apang uvin.

N Biren Singh, Chief Minister, Manipur in asei na’ah, Bill 3 jeh a thinatoh insung mi ho leh akitong kha insung mi ho athoh-pi na thu aphong in ahi. Ccpur mipi’n ni 600 val nakiphin na chung uvah genthei na leh boina tamtah na natoh uvin, iboi na hou isuhlhap phat’u ahi tai ati. Ccpur District sung’a nam chom chom umho toh lung kitoh tah’a Reception kingon maban sotlouva ihin nei diu ahi ati. Leisiet aumlaise’a boina hi umjing ding ahi ati. Ccpur District titah louvin Manipur sung ah jatle-nam chom chom ium uvin, Meitei, Naga Kuki leh Zomi tin kikhen jou leu hen tuapat lungkhat leh thakhat keng’a ichen khom diu ahi ati. Manipur ah Recognized Tribe 33 aum in, unrecognized tribe 4 agom in 37 ium uvin ahi ati. Manipur khan tou na ding a pan hatah’a kila ding ahi ati.

Memorandum chom chom, Ccpur Govt. upgrade ding, Library sah ding, JPO in District Hospital a CT Scan koiding leh JPO Office cum Conference Hall District Hospital Compund sung a sah ahi thei na ding in Memoramdum apelut uvin chuleh, All Tribal Women Union in Bill 3 jeh’a thina toh ho Judicial Inguiry bol ding leh Manipur Hill Areas ho’a Sixth Schedule enten ding in memorandum apelut uvin ahi. Memorandum chom chom nahin pehlut hou suhbulhit na ding’a pankalah ding ahi ati. Chuleh, aman aseina’ah thusuo mi (Journalist) hon Democracy a ding a khom poimo tah 4th Pillar na hina bang uvin, Igam sung sem tup na ding in panmun poimo tah na nei uvin ahi ati. Khat leh khat nasu tuo thei uvin, chamna jong nasem thei uvin, Govt. na sempha thei uvin chuleh, nasuse thei uvin ahi ati.

Chapangho hi mipha ahungsona ding’uva tilkhou jing ngai ahi: Th Radheshyam

Imphal, May 9 : Chapang ho hi abolthei’u le abol theilou’u seipeh a dan khoutah noiya khoukhah sang’a alungletna ding’uva thilkhou jing joh ding ahi tin Edn.Minister Th.Radheshyam in tuni Kendriya Vidyalaya No.1, Imphal Lamphelpat a Annual Day Function kibolna’a Jin-gun’a apan nah’a aseiyin ahi.

Nu le pa te in achateho’u school hoitah khat’a admission abolpeh’u le akin’u kichai jeng dan’a agel’u jong alelhah diuvin Th.Radheshyam in temna aneiye.  Mipha/mi lolhing khat hina ding’a hi chapang ho’n lhoh pha le tahsa damtheina anei’u ngai ahi. Simlaiho’n alhoh’u semhoina ding’a phat asuhlut’u toh tahsa damtheina ding’a phat asuhlut’u aleptoh’u ngai ahi. Kinguon’a simlai hon cultural programme jat chom chom le Yoga asana avetsah ho’u chung’a alungkim dan jong Th.Radheshyam in aphongdoh’e.  Aman aseibena’a chun, Co-curriculum activity ho hi themjilna le simlai khat lungsung’a gamsung ngailutna lungthim khumlut pehna ding’a manchah hoitah ahi. Annual function hi themjilnamun ding’a phat achesa ho’a abol hoi na ho le abolkhelna ho vet toh phat ahi tin Th.Radheshyam in aseiyin ahi.

Consumer Affairs, Food and Public Distribution, Minister Karam Shyam in ahoulimna’a chun simlai ho khonung venbitna ding’a pan lahlou apoimo dan aseiyin ahi. Simlai ho khonung ding venbitna ding’a hi education system hi velvet’a job oriented hisah ngai ahi ati. Gamsung suh hat na ding’a hi themjilna hoitah le mipi jouse kipumkhat ngai ahi. Tu’a simlaiho hin themjilna hoitah ahin nei’uva ahileh igamsung’u hi mi hetthei le jathei’a hung umding ahi.

Kendriya Vidyalaya in co-curricular activity ho’a pachanna tampi aneina chung’a Principal Secretary (Educatoin-S) Vineet Joshi in akipapina aphongdoh in ahi.

IRCS makaina a Ccpur munna World Red Cross Day kimang

B.Lalboi Gangte

CCpur. May 9 (ET):   World Red Cross Day chu Hill Town Cimmunity Hall, Thangzam road Ccpur mun’a International Red Cross Society (IRCS) Ccpur, Branch makai na in anakimang in ahi. Hiche kin nachun kum masang lang’a ana molliem ho geldoh na in minutes khat thip cheh in jana anape un chuleh ana molliem holah’a active member anahi (L) Dr. Lalzakung jong apang in ahi. Kin chu “Together for Humanity” ti thupi mangcha in anakimang in ahi. Hiche kin nachung lem na thusei ding in Dr. LS Gangte Vice President, Ccpur Branch in anei naban in Dongzakai Gangte, Vice President in asei na’a chun; Red Cross hi thil poi mo tah khat ahi ahin man power leh organistion ho lhahsam jeh in dei bang tah in ana kimang cha thei hih in ahi. Hiche keu hilou injong kum sot tah ana kho ngai na ajeh jong hi member tamtah akhanglou lai aum jeh jong ahi. Ccpur branch a member enroll kibol mong mong jat hi 20000 tobang ahin hilah koima gunchu tah’a pang leh  lunglut tah’a pang aum pon ahi. Hiche hojeh hin keima geldan in alunglut tah tah leh agunchu mong hobou lah’a member jong aja (hundred) ham bou hisah tah ding chuleh Ccpur branch bou hin Manipur State sung’a ding nga gam leh building kinei ahi in ahi ati.

Chairmanship chu D.C hinan ana kibol in ahin tu ding mun umchan dan evet leh D.C jao lou in ema kibol doh thei ponte atin ahi. Phat masa lang ho egah nung vet leh Red Cross hin ethics boina chung’a pan nasatah in anala in ahi, hiche ho jeh hin red cross hin tuchan in philanthropic organization tichu YMA, YVA chuleh YPA ho atet jou tapon ahi.

Red Cross society, Secy., Lalson Suantak in kin nachun IRCS’s Cccpur. District branch in 2016 kum sung’a atoh doh hou report peh na anei in ahi. Hiche kum sung’a abol doh hochu: 8 vei Water Sanitation & Hygiene (WASH) exercise, one time First Aid Training, Family News Service chuleh Mock Drill 2 vei anakibol in amun chu Ramakhishna Memorial School leh Ccpur. Govt. High School ahi.

CM in Lokchao kibulu na a molliem TA personnel teni jaana pe

Tengnoupal, May 9: Imphal -Moreh lamlen a umTengnoupal district sung’a um Lokchao a melhetlou hon bomb asuhpohna’uva molliem Territorial Army personnelteni CM N Biren in tuni chun jaana ape in ahi. Hetthei khat chu Koirengei Airfield camp’a um 165 Territorial Army Battalion, B Company in tuni’a chu sepai hangsan teni jaana salam pehna kin aguon nah’a CM N Biren in jong pan alah ahi.

Kinguon a chun 57th Mountain Division, Deputy GOC; IG Assam Rifles South; IG , DGP Manipur Police; high ranking police official ho le amolliem teni insungmite’n pan ala’uvin ahi. CM in kinguon a chun amolliem sepai teni insungmite lungmonna ding in tilkhouna thu aseipeh in ahi.

Kinguon kichaiya CM in thuso miho heng’a aseidan in, hitobang thilbol ho hi mi meisan ho natoh ahi’n, gamsung’a cheng mimal jouse adem ding’a lomtah ahi ati. Sorkar in thilsoh chungchang’a muona neiho  guotna kipe ding ahi tin jong aseiye.

JAC Langlailu in CM heng’a memorandum pelut

Imphal, May 9: R Lunglailu kitha na thu’a kisemdoh JAC hon Chief Minister N Biren heng’a Tuesday nikhon point 5 lhing memorandum apelut uvin, RIMS morgue’a thi-long um nalai hi thumna akisan peh kah’a kila louding ahi, tin aseiyui.

Memorandum’a chun JAC in Khuraijam Inaocha, (Lunglailu jipa) tolthat in ngohna aneiyun chule tu masang’a jong alekha hil na’a um tribal simlai khat amai (molest) jeh’a hehna um’a, hiche jouva simlai adang ni toh jong kingaiya, hiche tilouva asopipa jinu Ashalata toh jong chonse lhon ahi, ati. Anu Memchoubi leh Ashalata toh tolthat’a panla in ngohna aneiyun chule athi nu asuhgim jing-u ahi, ati.

Thilsoh toh kisaiya themmona nei mithum ho thina chan gotna apeh diuvin JAC in thumna aneiyin chule Lunglailu apa R Kakhalan ni 5 sung (May 14 nikho’a kon) ‘a ex-gratia apeh diuvin aseiyun, kinoptona aum kahse’a thi-long kila louding ahi, tin aseiyui. Chingmeirong Rongmei kho’a themmona neiho insung mite alut theilou nadiu dan asem diuvin jong thumna aneiyui.

Chondan dungjuiya gotna (longh Garak) ahilouleh aleusah thei diuva sorkar in phalna apeh diuvin JAC in thumna aneiyun, thilse vetsui nading’a mithun ahilouleh vohcha aleu sah jiu ahi.

Aphat kichaisa lou kijoh jeh’a MSF in Pharmacy khat khah

Imphal, May 9: Manipur Students’ Federation (MSF) hon Thangal bazaar, Kasturi lei kom’a um pharmacy khat’a lou aphat kichaisa kijoh jeh in akhah tauvin ahi.

MSF office’a Tuesday nikho’a thuso miho akimupi nauva chun General Secretary W Wanglemba Khaba in, Konsam Ibomcha (40) kiti mikhat in lou (insulin) Rishika Medicos, Thangal Bazar’a janhi kachoh leh aphat kichaisa ahi, tia hehna thu asei kimu ahi, tin aseiye. Diabetis natna nei ahijeh’a doctor hon ajih peh’a kikap ahi’in, lou akichoh masa ‘expired’ ahi ahet jouva ajing nikho’a athah cho’a ache kit leh hiche jong aphat kichaisa ana hikit ahi.

Hiche thu MSF het ahi jouva MSF hon pharmacy kholna anei uleh pharmacy’a kijoh lou adang tamtah jong aphat kichai ahi amudoh-u ahi. Phat chomkhat jouva MSF hon pharmacy akha uva chule mopohna nei authority hon athu aban asei lou diuvin temna anei uvin ahi.

News Reporting course khumkha hita

Imphal, May 9 (DIPR): Tamenglong Dist. HQ a chelha 7 Day basic course in News Reporting tuni (May nisim 9)chun khumkha ahitai. 7 day basic course chu May nisim 3 nikho’a chu ana kipan ahi. Khumkhana kinguon a chun ADC, Tamenglong Jin-gun in apang in Estimate Committee Chairman Charles Liangdiang le Tamenglong Times Editor Jimmy Panmei Jin-ja’um in apang lhon in ahi.

Jin-gun in kinguon a ahoulimna’a chun Tamenglong dist. Sung’a journalism apoimo dan ho aseiyin ahi. Chuleh kinguon’a panla hon jong journalism ahin chepi teng’u le professional ho umchan atho diuvin temna aneiyin ahi.  Reporting course a chun agom in simlai 26 vel in pan ala’uvin ahi.

Thangal kailhang  footpath a dukan ho authority in phetlha

Imphal, May 9: Thangal kailhang a keng’a vahle ho chena ding’a kisem footpath a dandihlouva dukan kisa ho jaanhi nilhah chun IMC le police personnel hon aphetlha’uvin ahi. Dukan kiphetlhahna’a chun Kangla Siphai a kon Th Sanoubi kiti mikhat akisukha in ahi. Geldoh thei khat chu nikho phabep masang’a chu MAHUD Minister, Th Shyamkumar inThangal kailhang a dandihloua kisa dukan ho phetlhah ding’a thuphon ana neisa ahi.

ST demand committee in CM kimupi

Imphal, May 9: Scheduled tribe demand committee  in May nisim 14 nikho le kiphinna chejom theina ding’a kihoulimna khat kiguong ding ahi tin Convenor, Mutum Churamani in aseiye. Hiche thu hi tuni  Manipur Press Club a thuso miho toh akihoulimna’a asei ahi. Churamani in aseidan in  CM N.Biren le cabinet minister ho toh kihoulimna akineiyin, amaho’n jong ngehna kineiho atosot dan’u aphongdoh’uve ati.

AR Ex-Servicemen hon Rally nei

Imphal, May 9: Assam Rifles Ex-servicemen rally chu AR Churachandpur Sector ho gonna in 6th May, 2017 nikho chun DTC, Tuibong mun ah aum in ahi. Hiche rally ahin 200 Assam Rifles veterans, 45 widows of Assam Rifles personals leh Ccpur leh Bishnupur district akon Veer Naris ho apang uvin ahi.

Hiche kingon ahin, V. Hankhanlian, Cabinet Ministern Agriculture, Veterniary and Animal Husbandry; Brigadier Ajay Kumar, Commander 27 Sector Assam Rifles, Khaipao Haokip, Chairman, Autonomous District Council, Churachandpur, Colonel Sanjay Kumar, Commandant 25 Assam Rifles, District Council member ho chuleh, District Administrative Officers chom chom ho jong apang uvin ahi. Rally hun sung ahin, ex-servicemen ho’n pension toh kisai a boina chom chom anei hou suhlhap na ding in Stall chom chom aki hong in, Assam Rifles ah Ex servicemen insungmi ho’a ding in Medical camp, CSD Stall, Addhar card stall chuleh, District Administration, Agriculture Department, Horticulture Deparemnt leh Krishi Vigayan Kendra (KVK) ho’n Stall ahong uvin ahi. State Bank of India (SBI) leh Axis Bank hon jong stall ahong uvin ahi.

Chief Guest apang V. Hankhanlian, Cabinet Ministern Agriculture, Veterniary and Animal Husbandry in Neithinkip Haokip w/o Late Rfn/GD Lunminlal Haokip of 23 Assam Rifles, ama hi 2015 kum a chu NSCN (K) Counter Insurgency Operations ana thi ahi. Thangzagin father of  Late Rfn/GD  L Ginlalven Ngaihte  of 13 Assam Rifles ho kipa thilpeh peh na aneiyin ahi. Chuleh, 49 widows of Assam Rifles Ex Servicemen Personals ho award pehdoh na Brig Ajay Kumar, Commander in anei yin ahi.

NSCN-IM in India toh ‘Shared Sovereignty’ kitosot jing ahi, tia avel’a sei kit

Imphal, May 9: Indo-Naga political talks hi kitup tah leh gangtah’a chelha ahi, tin NSCN-IM in aseiyin chule India gam toh ‘Shared Sobereignty’ ding’a adin thu avel in aseikit in ahi.

Nagalim gam phabep British hon alo ahi’in, British hon India adalhah jouva Naga leh India kipunkhom ding’a kinoptona umlou ahi. India in Nagalim gam’a Naga ho phatsahna umlouva gamgi asem’a Naga ho akhen ahi, tin thuso anei nauva asei uvin ahi. Alangkhat’a, Shillong Accord (Nov 11, 1975) hi accord dihlou tah ahi, ati. “Duha dimset hiche accord 1975 kum’a India toh soi kaina aum jouva NNC/FGN ho India sorkar heng’a gal-manchah toh kipelut uva, Indian constitution atosot-u ahi. HIche jeh’a NNC/FGN ‘a um hohi amaho nop’a India’a um ahiuve tihi nelkal thei ahipon, chule Naga National movement ‘a ding’a midihlou (traitor) ahiuve. NNC/FGN in anam mi ajoulhep ahi’in chule hiche soi kikai hi Naga nam’a ding’a bolkhel lenpen ahi, ati.

“Ahin, Pathen in Naga ho Yaruiwo, Lt Isak Chisi Swu leh Ato Kilonser, Th Muivah lamkaina in venna ape jing’in, Naga khangthah ho vangphatna ahi”, ati. India sorkar toh kisem ‘Framework Agreement hin chamna leh khovah ahin pohlut ding tahsan ahi”, tin aseibe uve. NSCN-IM hon thuso anei nauva chun Dr SC Jamir (ex-CM leh Governor) chungchang thu kicheh tah’a jih’a Jagdamba Mall hetna kidang asah thu jong asei uvin, Dr SC Jamir lunggel dihlou ho Jagdamba in abon’a asosal ahi, ati.

Thusoh Lahchom

Torch Rally

Joint Action Committee against Drug and Alcohol, Thangmeiband in Tuesday nilhah in torch rally abol uvin, Manipur gamsung’a khamnathei thil kine/kidon leh kijoh suhmang ding in awging in asam uvin ahi.  Thangmeiband United Club’a rally kipan ahi.

Lekhabu hondohna

“Bangladesh ki Thamoinungdagi” leh “Punshichuppa Sennabiyu” kiti Ananta Kumar Sheram (AK Seram) leh Ayekpam Anju in ajih lekhabu teni Tuesday nikhon hondoh ahitai. Leikhabu jih teni hi anilhon’a Bangladesh gam-mi Meilhei hilhon ahi.

Anchang kihom doh lou

State Assembly Election chung’a LJP ticket na Naoriya Pakhanglakpa Assembly Constituency’a tet K Manoranjan in asei na’a chun;  authority concerned hon hiche constituency sung’a National Food Security Act noi’a  lha 8 sung anchang quota apeh lou uleh kiphinna kapat ding’u ahitai atin ahi. Thuso miho kom’a Manipur Press Club ma asei na’a chun; concerned authority hon Naoriya Pakanglaka mite deilou va thil abol uva ahileh ki um thim beh lou ding court chan gei ja heh na kinei ding ahi ati.

RIMS

RIMS hospital jot na lampi tuchan na semphat lou va aum anlai jeh in RIMS  sung’a natong hon hahsat na nasatah in atoh taovin ahi. Hiche keu chu hilou vin adammo hon jong hospital ahin jot teng uleh lampi nop lou jeh injong hahsat na ato da pouvin ahi. Concerned authority honjong hiche lampi chung chang thu’a akimu mo sah uvin ahi ati. Hiche tailou vin jong lampi pang dung’a dukan leh inn sa ho in nel leh song lampi dung’a akoi’u chuleh traffic police leh authority concerned honjong RIMS lampi don in jong anei pouve ati.

Paoki fest

Oinam kho, Tamenglong district’a Paoki plantation festival akipat toh kilhon in Monday jan in Oinam kho’a wrestling competition abol uvin ahi. Kum seh’a Poumai khosung mihon abol jing golnop ahi.

Vaccination camp

Pakhangkhong Leirak Youth Development Association, Thoubal Achouba leh KVK, Thoubal in Joint Director, District Veterinary Office, Thoubal tohgon noiyin Tuesday nikhon ‘free Anti-Rabbies vaccination camp’ abol uvin ahi. Agom’a gancha 87 vaccine ape uvin ahi.

RS by-election

Manipur Rajya Sabha seat a-on toh kilhon’a election May nisim 25 jingkah nidan 9 ‘a kon nilhah nidan 4 chan kibol ding ahi. Nomination pehlut na ding nikho nukhah pen hi May nisim 15 nilhah nidan 3 ahi’in, May nisim 16 nikho leh Manipur Legislative Assembly secretariat mun’a sun nidan 11 teng leh scrutiny umding ahi. Candidate hon withdraw abol nathei nikho nukhah pen hi May nisim 18 ahi.

Editorial

Saitu AC sung KNF le KRA

                             Election kiti to kisaiya kinah kithatona kiti hi hop 2 in akihom’in, hichu – Election lai (vote kilhah masang) leh Election kichai (vote kilhahjou) ahi. Saitu ‘Assembly Constituency’ (AC) a athah beh-a KNF le KRA kikah-a thu le la keu hilouva meichang’a kikaptona hi Election jouva kinah kithana (post poll violence) ahi. Mi 2 akinahleh athemdi kichuna umjongleh ichan ham’a alang lang’a thepmona nei higeldi ahi. Koi thep le theplou chu thuchuom lachuom ahitan ahin hitobang Election a akaidi-di kaijou nung’a khat le khat kah-a kithatona leh mipi masang’a athemdi kichuna’a thuso hoa kitahlangto leh kigihtona hohi aphatchomna sang’a aphatlouna atamjohdi hi angolpen’in jong ahetdi hisa ahi. Chuleh kon itobang ipi thilpha le thilse abol’am tiho jong milah ah kiki lhangsapto hih jongleh mijousen ahet mamadi ahi. Election laileh ei le ei kah-a kiboltona’a ana kithang Saikul le Henglep AC teni hi vangphat umtah in tulang hin kitha kimat lom akijakha tapon, ahin kum phabep’a pat tuchan’a Election jeh-a Saitu AC sung’a “nam sepai” hinkho chanlo ijat ahitadem ti hi ivetleh vangset umtah ahi. Ahamdoh jousen nampi politics machalnadi leh society khantounadi ho ban’a cham le lungmonna umtheinadi ti ngen ahivang’in asunglang’a eimadi kigelna athupipen’a koi ngenbeh ahikit jeh-a gamsung lhangsung’a chamna umlou, khat le khat kikah-a kimit thipna pung cheh cheh ahi. Election’a thingnoi kikum kiti hi adih adihlou thuchuom hitaleh Kuki thingnoi ho bou hilouva muntin gamtin’a thingnoi thalchoi kiti phot hi Election’a kikum sohkei ti thei ahijeng’e.Thingnoi Party ni le thum hijongleh khat kitoh tah a asotkhom teng kinah kibaona umjilou ahin munkhatna sot tum ahinnei saosaoji teng uleh boina umdoh jia abangleh thingnoi party khat sung jeng’a jong kikehsona (Faction) hung umdohloji ahi.

                          Kuki thingnoi sepai hung kipatna hi gam le go huhbitdi maimai hitalouva midang nam sepai hoa kon’a ihinkho tahbah kihuhbitna di anahin vangset umtah in tulang hin ei le ei kikah-a kiboltona leh gamlodi kichuna’n achedoh sihseh gamtai. Tua Saitu AC sung, adeh-a New Keithelmanbi lhang’a Kuki thingnoi party 2 kikah-a kitha kimat hi MLA Election toh kisamkaina in akiseijin midang-te ‘Media’ (thuso) invang “turf war” (thingnoi ho umnadi gam kichuna) ahi atiuve. Ahoichi chu hitaleh MLA Election jeh-a society sung’a boina umlona bep ahileh mipin jong kitoh tah-a hitobang vang akideipoi ti thei ahitai. Kuki thingnoi party khatna hi alamkai phung khat akon hidi mong ahin hinlah anungjui le asepai (cadre) hohi phung le chang dangdang’a kon’a jong tamtah jao ahisohkei uve. Hiche jeh-a tua KNF le KRA kikah a kiboina hi thingnoi party 2 kikah ahi tia lah ding, phung khat le phung khat thua seiloubehdi hinte. KNF le KRA hi phat masalang’a chu UPF a ana umkhom lhon ahin tua hi Camp chuom-chuom’a umkeu hitalouva akitohmo gunkeiya umdoh ahitai. Ahin politics kiti hi chapang kichem tobang jong ahijeh in jing le thaileh hung kihoutoh kitlhon’a ahung kithokhom kitjong seithei hidehlou ahi. Hiche hi lamkai lang ho khutna ki ngam ahi.

Blankfire

Tulai hi ajatjat soh ahitai. Tila chu ajipan ajinu ahavohji behseh jeh a ajinu a ina jam ahi akitin tulanga hi ajinun ajipa avohji jeh a ajipate inko hon amounu u adeldohtho u ahitai kiti jong aumtai. Ole ajinun avohthei jipa chu molne thei mong ahidemla kiseitalou. Datmo um um soh ahitai tidi himai.