ET May 1, 2017 News (Local, International,Thusoh Lahchom, Editorial, Blankfire)

ET May 1, 2017 News (Local, International,Thusoh Lahchom, Editorial, Blankfire)

316
0
SHARE

NH-2 a thingnoimi hidia ginmo hon thaopo gari anakap kit u; driver 1 kitongkha

Imphal, April 30: Dimapur jon’a che thao po gari thum Changoubung leh Kangpokpi kikah’a Sunday jingkah nidan 5.40 don in thal-choi hon meithal’a akap uvin, thilsoh’a driver khat akitongkha in ahi.

Akitongkha driver pa hi Raju Karki ahi’in, diesel tanker registration no MN-03-0911 atol ahi. Meichang 6-7 vel in gari akhah’a chule akhut akap khah peh-u ahi. Driver adang teni hi TB Singh leh petrol gari tol’a Chandra ahi’in, diesel gari AS-DD-4718 leh petrol gari MN-01-8327 ahi. Tanker mun phabep jong meichang in akhah ahi. Thulhut amu mu uvin Kailun Lupheng, IGP (Zone-II) leh IGP (AP/Ops) lamkaina police team hon thilso namun adel lut uvin, akimvel’a operation abol uvin ahi.

I/E, I/W, Thoubal chule Bishnupur combine CDO team hon Changoubung leh Kangpokpi kikah operation abol-u ahi. Hetthei khat chu, achesa April nisim 21 nikho’a kichomna thilsoh chule April nisim 18 nikho’a Kangpokpi mun’a thao po gari ni meithal’a kikap toh kisaiya police hon KCP (Lalheiba) leh KNF(N) toh kisaina neiya gang akiman’e, tia police hon asei jouvu thilsoh ahi.

April nisim 18 nikho’a petrol leh diesel gari ni Kangpokpi’a thingnoimi hiding’a ginmo hon meithal’a akap uva cule achesa January nisim 24 nikho’a jong national Highway-37, Impha-Jiribam lamlen’a thao kipohna gari khat Awangkhul mun’a meichang in akhah ahi. Thao pohna gari (tanker) hi meichang li in akhah’a, amalang kang chule driver pa maiya um glass ho se’a ahi. Thulhut kimu chan’a commando team hon operation abol jom nalai uvin, ahin, akiman aum’e, ti thulhut akimupoi.

CITOS/Winger chungthu suhlhapna leh Office Bearer kilhen na um

Lien S. Gangte

Ccpur. Apr. 30: Ccpur-Imphal Taxi Owners Society (CITOS)/Winger chungchang thu a boina ana um chu April nisim 29, 2017 nikho’n suhveng naleh thuchaina ana um tan ahi. Hiche toh kilhon a ahung lhung ding Maynisim 1, 2017 nikho apat angaina bang’a lhaipan (Service) diu ahi tai. Hiche CITOS chungthu a hi tule khonung’a koiman thunoh boutam achung uva asem tahlou dingin thu lhuhna Kuki Inpi Ccpur (KIC) leh abahkai KKL GHQ leh KSO Ccpur in asem in ahi.

Chuleh, April nisim 30, 2017 nikho chun KIC Head Office mun’ah term khat a dingin CITOS Office bearers lhenna aum in, anoi a minchong hohi lhendoh (Elected) ahiuve. Chairman ding M. Haopu Haokip, Vice Chairman ding Romeo Singh, General Secy. ding Rupachandra, Joint Secy. ding Letgoulen, Finance Secy. ding L. Basanta, Treasurer ding Onkhohao leh Secy. Information ding in Tomba Singh (Ccpur) leh Autumn Seamen Singh (Imphal) ho ahiuve.

Public Service System pat ding’a Cabinet in kilolna nei

Imphal, Apr. 30: Manipur Cabinet in Manipur State Transport (MST) pat ding’a kilolna aneiyin, che-le-va-le na man alhom nading, akitup nading bidoi neiya bol ding agot-u ahi.

Lhakhat sung’a bus service pat nading tohgon kipan ding ahi. Manipur Information official khat in Friday nikhon N Biren lamkaina Cabinet in hiche thu’a phat sottah toukhomna aneiyin, chule Manipur State Transport hi Transport Department in abol ding’in phatsahna aneiyui, tin aseiyin ahi. MST noiya private operator hon jong pan alah diu ahi.

MST kipat til leh Imphal leh district dang dang- Churachandpur, Pherzawl, Bishnupur, Jiribam, Noney, Tamenglong, Kangpokpi, Senapati, Ukhrul, Kamjong, Thoubal, Kakching, Chandel leh Tengnoupal chena lamlen 14’a lhai ding ahi. Gamsung’a gari atam cheh cheh jeh leh lamlen neo chule gari ngahna ding mun umlou jeh’a kumseh leh khopi sung’a traffic boi’a nohphah’a tosetna thilsoh jong aumjing jeh’a Cabinet in Superintendent of Police (Traffic) post khat leh Additional Superintendent of Police (Traffic) post khat Imphal area vesui ding’a sem ding’in kilolna anei uvin ahi.

Cyber crimes apunbe jing jong Cabinet in hetpehna aneiyin, Cabinet in Cyber crimes thukhol na vesui ding Deputy Superintendent of Police post khat jong sem ding’in kilolna anei uvin ahi. Cabinet in angaicha qualification neiya teacher ho lo kitup sah ding thu aseiyun chule nisim 6/9/2016 nikho’a Education department (S) in ‘cancellation order’ asodoh lahdoh ding’in kilolna aneiyui. Energy leh power sector’a Cabinet in solar power plant to nading’a KW kitun chan’a subsidy 10,000 peh ding’in asei uvin ahi. Ahin, subsidy hi beneficiary khat’a KW 2 chan bou kipe ding ahi. State Cabinet in Manipur Development Society thah gon ding’a jong kilolna aneiyu ahi.

Kuki/Zo community ho ding’a National Consultation for reconciliation kibol

Kangpokpi, Apr.30:Manipur sung’a cheng Kuki/Zo Community ho thusim a amasapen ding in tuni chun Imphal’a political issue ho chungthu gelkhomna le kipunkhom kitna ding bidoi neipum in kihoulimna ana chelha in ahi. Kinguon chu Hotel Imphal’a ana chelha ahi’n, Zomi Council, Hmar Inpui , Kuki INpi Manipur le United People’s Front  a kon lamkai 30 vel in pan ala’uvin ahi.

Political consultation meeting hu JMG Convenor, UPF Sanga Hmar le Joint Secretary, KNF Helien Kipgen in ana makai lhon in ahi. ZDV Chairman, Kamkhanpao Zou in ahoulimna’a chun Kuki/Zo community ho machalna ding’a frontal organization hon pan alahnaho chung’a akipapina thu aphongdoh in ahi.

“Tuni nikho hi Kuki/Zo miho ding’a nikho loupitah ahi. Ajeh chu tuni hi Kuki/Zo chate jouse kilungtohtah a akikhop khom na’u nikho ahi. UPF hin Kuki/Zo chate jouse kengkhat’a kilungtoh tah’a din ding akigelkhoh jing’e. Ipu ipate’u chu lungkhat tah’a hingkhom’uva, 1927-1919 sung ajong kilungtohtah’a gam leiset huhna ding’a British te ana kisatpi’u ahi. ” tin UPF Convenor, Aaron Kipgen in kinguon a chun aseiye. Aman aseibena’a chun, India in zalen ahinmu jou March nisim 24, 1960 kum’a chu Ipu ipate’u chun Kuki National Assembly minpu’a gamtum ana thum’u ahi. Ahinlah Sah-solam gamkai zalenna ding’a ahinkho jong ana tohdoh Kuki/Zo chate hi tuni hin socially, economically le politically neglected ihita’uve. GoI in kum 60 val not thap a eihin koijeh’uva hi Kuki te hi phung le chang’a iki bungkhen’u ahitai. Kukite kipumkhat theilou hi GoI vaihop theplou jeh ahi. Vangphat umtah in tutu’a vaihom BJP sorkar hin Kukite boina suhlhap ding lunggel ahin neiyin hitolhon chun New Delhi’a jong political dialogue ni vei ana kiboltai tin Aaron Kipgen in aseiye.

Tuni kinguon’a chun B.D.Baite, Chairman, Zomi Council; Hmar community thalheng in  Lal Dawn Lien Varter le Khaimang Chongloi, Kuki Inpi Manipur in houlimna anei’uvin ahi.Tuni kihoulimn’a a chun thulhuhna poimo tah ni asemdoh’uvin ahi. Akhatna chu, Eiho hi ethnic identity kibang nei ihi’uvin , khonung geiya ethnic identity khat noiya i’um ding’u ahi. Anina chu , UPF in political issue ho seilhapna ding’a National Consultation ahin guon hi kipa umtah ahi’n, hitobang kinguon hi ahunglhung ding nikho ho’a jong lekhathem , hetgilna neiho chuleh stakeholder ho jouse panlahna’a boljing ding tihi ahi.

Keithelmanbi vangkho’a Simlai Meet, 2017 kipanta

Imphal, Apr.30: Kumseh le simlai chapang ho kisuh halna le kichep golseh akon kipumkhatna lungthim anei theina diuva kiboljing Simlai Meet chu April nisim 28 nichun a nga vei channa din Kangpokpi District hopsunga um Keithelmanbi Sahlang Lentol a anakipan kittan ahi.

Pehlum kichep akon Kipumkhatna(Unity through Football) kiti thupi noija a nga channa Simlai Meet chu Sadar Hills District Sports Association President, Chongpu Kipgen, MCS (Retd) in local MDC Lamminthang Kipgen le adang milun jaum ho jaonan hondohna ana neijin ahi.

Hiche 5th Simlai Meet hondohna kin’a chun Chongpu Kipgen, MCS(Retd), President SHDSA chu Jingun in apangin chule Thangpu Kipgen, Inspector, Manipur Police le Paogoulun Chongloi, President Keithelmanbi Youth Association chu Jin Ja Um le Kin neipan anapang lhonin ahi.

FC Simlai Keithelmanbi tohgon na noija May nisim 19 chan chelha ding Simlai Meet ponlap khaidohna le hondohna Jingun pun aneijouvin Pastor Lamseh Chongloi, KCBC in lhandohna ana neijin ahi.

ISL player Boithang Haokip, Seiminlen Doungel le Thongkhosiem Haokip in jong Simlai te tilkhouna ding le kithopina a hiche Simlai Meet hi a op ding’u ahi.

Ccpur ADC Chairman in member thah phabep lhendohna nei

B.Lalboi Gangte

CCpur. Apr. 30(ET): Autonomous District Counci, Churachandpur  Chairman Khaipao Haokip leh Vice Chairman V.Khaikhanmuang makai nan 29 April 2017 nikhon ADCC Finance Committee  leh Executive Members ADCC ho gon aum ho phondoh na anei lhon in ahi.

Hiche chung chang thu’a  Khaipao Haokip Chairman ADCC in ADCC Executive Member kilhengthah hochu, T Paukhanlian  9- Ngazam ADCC, P Kamkholal 22- Haopi Range ADCC,  Lalhrilhlien 19- Saikot ADCC, Seilenmang Khongsai 1- Khousabung ADCC, Hausuanthang  24- Singngat ADCC, ho ahi ati, chuleh  Finance Committee a lhendoh a umho chu Lalditsang, Chairman, 8- Senvon ADCC, Chuleh Member ding hochu Paolal Haokip, 3- Henglep ADCC, KC Chonsei, 20- Sagang ADCC,  Lalhmangpui, 6- Parbung ADCC, Pumtulthang, 21- Sangaikot ADCC, Th Jamchinthang, 5-Thanlon ADCC, CT Lian Guite 16-New Lamka west ADCC, ahiuve.

Executive Member cheng ho min leh Finance Committee ho jing nikho (May 1) le Bharatiya Janata Party (BJP) Manipur head office a, Bhabananda BJP State President heng’a phondohna kineiding, chule Council Member jouse panna a May nisim 4, 2017 nikho a kipat Office hoitah’a kaipan diu ahitai ati.

Hui-le-go kitho jeh’a inmun, thingphung chule meivah khom tamtah se

Imphal, Apr. 30: Saturday-Sunday jan-kim’a Imphal khopi’a hui-leh-go hattah akitho jeh in inmun, thingphung, meivah khom, meigui phabep ase in, chule akitongkha jong aumin ahi.

Imphal Times (niseh nilhah thuso) office inchung panna’a Imphal khopi’a hui-leh-go kitho in inchung phabep asuse in ahi. Vadung pang’a kisa inmun hon hahsatna ato asang dehset in ahi. Hui-leh-go kitho ahat dan hi thingphung lentah tah phabep amut lhuh’a, che-le-va-le jong asuhboi ahi.

Singjamei mun’a HT power line alhu in chule Singjamei lei’a kikoi meigui aset jeh in che-le-vah-le ho asuboi in ahi. Keishamthong Irompukhri Mapal mun’a inchung thih pheng in ase jeh in ase in, ahin, thilsoh’a akitongkha aumpoi. Imphal khopip mun chom chom’a hitobang vangsetna toh phabep aumin, electricity department hon meivah sem phatna ding’a pan ala jing uvin ahi.

Kongba lamlen, Imphal East mun’a um Manipur Hindi Parchar Sabha building phabep thilsoh’a achim in, pasal chapang khat akitongkha’e, tin thulhut in aseiyin, akitongkha pa hospital’a pohlut ahitai.

TYCM in free medical camp bol

Tengnoupal, Apr. 30: Tribal Youth Council Manipour (TYCM) in April nisim 29, 2017 (Satturday) nikho chun Rilram Centre, Tengnoupal a one day free medical check-up le treatment camp khat ana bol in ahi.  Kinguon chu Autonomous District Council (ADC),Chandel  , Medical Department toh kitho’a TYCM in agon ahi. Camp a chun Rilram le akimvel’a um kho ho’a kon mi 300 vel in pan ala’uvin ahi. Service camp’a doctor ho chu Dr.M.Keshore Singh (Medicine &AIDS), Dr.Kh.Nabakeshore Singh (Medicine, Malaria, Allergy), Dr.Y.Nando (Child Specialist) chuleh Dr.Kodearson (M.O., PHC, Rilram Centre) ahi’uve. Camp’a kivetsah’a che ho chu blood test consultation chuleh lou le ai manbeiyin ape’uvin ahi.

Ksm.Mathew Maring, Hon’ble Member, 5-Rilram, ADC, Chandel in kinguon’a ahoulimna’a chun , doctor ho le medical staff ho’n damlou ho kithopina aboljom jing diuvin temna aneiyin ahi. Zosanglur Joute, MCS/SDO, Tengnoupal in kinguon’a ahoulimna’a chun TYCM apachatna aphongdoh in chuleh ahunglhung ding nikho ho’a jong mipi ding gelkhohna jal’a hitobang kinguon ho aboljom jing diuvin temna aneiyin ahi.

Tuni kinguon’a chun Momo Tantanga, President, ATDUM , Aaron Keishing, Advocate , Tolkham Maring, P resident, TYCM le Lh.Demcemhring in jong pan ala’uvin ahi.

Camp kichai chun khosung miho le lamkai cheng chun kihoulimna anei’uvin hiche’a chun thulhuhna ni asemdoh’uvin ahi. Thulhuhna teni chu: akhatna, Chief Minister in gamkai sung khatvei beh ahung vil ding’a ngehna neiding chuleh anina, Concern authority in  Rilram Centre a SDC office khat ahon ding’a ngehna neiding tihi ahi. Tolkham chun Hon’ble Member, 5-Rilram le SDO, Tengnoupal heng’a Water supply, capacity le skill development chungthu toh kisai memorandum khat jong apelut in ahi.

Behiang thilsoh a thina toh teni ex-gratia 5 lakhs kipe ding ahi : V. Hangkhanlian

Lien S. Gangte

Ccpur. Apr. 30: Singngat A/C sung’a um Behiang (Indo-Myanmar Border) kho toh kinai cha’a um Suangphu kho leh Khenman kho ki kah ah BRTF Tuipo gari (Water Tanker) khat Phaijang (Valley) thingnoi hiding a ginmo ho’n analam tin naova thina toh mi 2,  Lallianmang kum 40 s/o (Retd.) Pastor Chinkhothang Taitom of Behiang/Gouchinkhup Veng, Ccpur leh Gari Driver pa Ginlam Khaute, kum 50 s/o  Kamzagin of Singngat Bethel Veng ho vilna April nisim 30, 2017 nikho chun Ginsuanhao MLA, 60-Singngat; V. Hangkhanlian MLA, 58-Ccpur A/C, Minister Agriculture, Vetenary & Animal Husbandary leh ADCC Chairman Khaipau Haokip in Dist. Hospital Morgue mun’ah anei uvin ahi.

Ginsuanhao MLA, 60-Singngat in thilong ho Pondum a silpeh in, thilong 2 ho vilna in dangka 5000/- cheh ape in ahi. ADCC Chairman Khaipau Haokip in ADC, Ccpur thalheng in mithi 2-ho  vilna in Dangka 5000/- cheh ape in ahi. Chuleh, V. Hangkhanlian MLA, 58-Ccpur A/C, Minister Agriculture & Animal Husbandary in hitabang thilsuo demna sangtah aneiyin, thilong ho vilna in pondum silpeh na aneiyin, Manipur Govt. in May nisim 5, 2017 masang ngei’a ex-gratia dangka 5 lakhs cheh kipe ding ahi ati.

 

KSO Singngat Block in Behiang ambush toh kisai a lungkim louna phuong

Lien S. Gangte

Ccpur. Apr. 30: Kuki Student Organisation (KSO) Singngat Block akon thuphon chun aseina’ah, achesa 29th April, 2017 jinglam nidan 8:15 don ding a Behiang, Singngat, Ccpur Dist. mun’a melhetlou hon ana lamtin naova thina toh Lallianmang kum 40 s/o (Retd.) Pastor Chinkhothang Taitom of Behiang/Gouchinkhup Veng, Ccpur leh Gari Driver pa Ginlam Khaute, kum 50 s/o  Kamzagin of Singngat Bethel Veng ho’n thina anatuo na chung uvah KSO Singngat Block in demna sangtah anei uvin ahi.

KSO Singngat Block thuphon chun aseibe na’ah, athi te 2 hi BRTF/GREF gari driver leh helper ahi lhon in, phat khat phat khat leh hitobang thilsoh aumjing in, hiche hi Centre Force/State Force in phatah a avet-tup jing ding in KSO Singngat Block tepna akineiyin ahi ati. Chuleh, thina toh te 2 insung mi ho henga Govt. in Compensation/Ex-Gratia apeh ding lom pe ding in tepna jong akibol e tin TL. Seipu Haokip, President, KSO Singngat Block leh Thangjangam Haokip, Gen. Secy. KSO Singngat Block akon thuphon chun aseiyin ahi.

 

Rah Bhavan a Cultural Programme kibol

Imphal, Apr. 30 (DIPR): Jawaharlal Nehru Manipur Dance Academy in tuni chun Raj Bhavan Darbar Hall’a cultural programme thupi tah in amang in ahi. Knguon’a chun cultural troop chom chom hon Lai Haraoba, Thougal Jagoi, Kabui Jagoi, Pung Cholom le Basanta Raj ana vetsah’uvin ahi.Kinguon’a chun Governor Dr.Najma Heptulla le  official phabep in pan ala’uvin ahi.

Lai Haraoba   hi maibi ho laam dan jatkhat ahi. Thougal Jagoi hi ahileh pathen nu le pathen pa in gamsung khantouna ding’a phatthei abohna ding’a kibol laam jatkhat ahi. Pung Cholom kiti hi classicial dance lah’a atho hahloi khat ahi. Hiche laam hi Meitei te Pung (Khong) le mridanga vohging pum’a kitho ahi.

Kinguon kichaina pen’a chun artist vetnom umtah tah hon Basanta Raj chu ana vetsah’uvin ahi. 18th Century laiya Vaishnavism ahunglut tolhon’a Basanta Raj hi hung minthang pan ahi. Basanta Raj hi Lord Krishna houna’a kimang laam jatkhat ahi.

Kichep golseh hin tahsa le lungthim adamsah theiye: Th.Radheshyam

Imphal, Apr. 30 (DIPR): Kichep golseh hin tahsa chung damtheina apehkeu hilouvin lungsung damtheina jong apetheiye tin Education, labour and Employment Minister Th.Radheshyam in The New Light English School, Malom Jaliyanbi, Yairipok 11th Annual Sports meet cum prize distribution kinguon’a pan alahna a aseiyin ahi.

Minister pa’n ahoulimna’a chun school khantouna ding’a pan alahding dan ho aphongdoh in hitolhon chun school sung’a toilet khat le classroom ni kasahbe ding ahi tin phondohna aneiyin ahi. Chuleh ahunglhung ding nikho ho’a waiting shed khat jong kisadoh ding ahi tin aseiyin ahi. Ahoulimchai chun 11th Annual Sports Meet a lamchom chom’a pachanna neiho kipa thilpeh hop pehna aneiyin ahi.

Inter Gc/Bn (ops) Hockey Tournament 2017 lholhing tah a anakichaita

Imphal, Apr. 30: Inter GC/Bn CRPF, (Manipur & Nagaland) Sector Hockey Tournament 2017 chu April nisim 30, 2017 (Sunday) nikhon 32 Bn CRPF, Loktak Project ah ana hitan ahi. Hiche tournament hi Manipur leh Nagaland State a CRPF Bn deployed jouse adia hockey kitetna thupitah ahi. Hiche hockey a pan la CRPF Bn hochu; 32 Bn, 69 Bn, 78 Bn, 86 Bn, 87 Bn, 109 Bn, 143 Bn, 173 Bn chuleh GC Imphal ahiuve.  Chule hiche Hockey chu April nisim 28, 2017 nikho a ana kipan ahi. Kichep chu knock-out system a kibol ahin boina ima umlouva April nisim 30, 2017 nikho a chu kichai ahi. Chule Umpire/Referee chu Manipur Hockey Assn ho vetsuina noija ana chelha ahi.

Champion chu 32 Bn, Loktak in ana kilah in ahi. Final match chu 32 Bn, Loktak leh 86 Bn, Lamphel ana kichem in first half chan chun koima goal kikhum to umlouvin draw ana hiuvin ahi. Hinlah Second half a 32 Bn hon goal khat akhum uto kilhon a Champion hina chang u ahi. Chule hiche Tournament sung’a Man of the Match chu 32 Bn Hockey team Captain HC/GD Manoj Kumar in amun Trophy le Certificate ana kisan in ahi.

L Birendrakumar in Padma Shri Award sang

Imphal, Apr. 30: Manipuri musicologist Laishram Birendrakumar Singh (97) tu naicha chun Padma Shri Award kiti gamsung’a ding’a civilian award alichanna’a sang pen ape uvin, music lam’a apan na jal’a kipe ahi.

Tahsa dammo jeh’a Delhi khopi’a award sang ding’in ache thei tapon, hiche jeh’a Chief Secretary O Nabakishore Singh in Saturday nikho’a a-inmun Kwakeithel Ningthemkol Leikai mun’a award pehdohna anei ahi. Padma Shri asan na chung’a Birendrakumar in akipana thu aseiyin, Manipuri music folk simna’a ahinkho apeh dan thusim aseiyin ahi.

Kum lhomcha ahi’a kon folk music’a lunglutna anei dan thu aseiyin, mikhat chondan leh hina jana pehding ahi, ati. Chule Manipuri chondan dihtah venna ding’a folk music hetthem angaiye, tin aseiyin ahi. Sangeet Natak Akademi awardee jong hi’a Laishram Birendrakumar Singh in khangthah hon folk music jana apeh diuvin thuhilna aneiyin ahi. Chief Secretary O Nabakishore in Birendrakumar kipapina thu aseiyin, gamsung ding’a kithang-at pi umtah ahi, ati. Chule Padma Bhushan leh Padma Vibhushan asan kit ding akinepna thu jong aseibe in ahi.

58-Ccpur A/C MLA in hilchet na bol

Lien S. Gangre

Ccpur. Apr. 30: V. Hangkhanlian MLA, 58-Ccpur A/C, Minister Agriculture, Vetenary & Animal Husbandary in 30th April, 2017 nikho chun ama in mun Zenhang Lamka mun’ah Thusuo mi ho kimupi in thulamleng chom chom um ho’ah hilchet na abol in ahi.

Aman asei na’ah, Manipur Govt. in JACAATB demand chom chom ho lah ah khenkhat asuhbulhit thei ding aneiyin, adeh in, Paite ham leh Pao mang District Council member ho toh toukhom na ana kineiyin, JACAATB toh State Govt. kihou na chung thu seikhom na akineiyin ahi ati. Hiche achun 6th Schedule demand toh kisai ah Govt. of India in Manipur Govt. heng’ah Certain Local Adjustment kiti hi hilchet na hinbol uvin ti’a ana hetsah nau nukhah pen Sept., 2016 lha chu ana hin, hiche achun Manipur Govt. in adonbut na ah “Extension of full Support & Cooperation of State Govt. in Tri-Parties Talk with SoO groups where Various Other Issue will be Consider” tin kitepna ana neiyin ahi. Martyrs ho Ex-Gratia dangka lakh 10 kipe ding, insungmi ho heng’a Govt. natoh na khat cheh jong kipe ding chuleh, lemle-bai 8 um ho jong dangka Lakh 2 cheh kipe ding chuleh akitong kha mi 48 ho dang 50,000/- cheh kipe ding ahi tin Manipur Govt. in kitep na (Assurance) MOU akibol nom in ahi ati. Martyrs ho Memorial Park bol na ding mun hun hinpe lut uvin lang Sum alut ding jat Sanction kibol ding ahi tin kitepna abol ngam uvin ahi ati. Chuleh, Bill 3 toh kisai a nakiphin naovah mi 9 in thina na toh uvin, hiche toh kilhon a Bill 3 ho Congress Govt. in ana Pass tajeng jong leh India President in assent pelou vin Manipur Govt. heng’ah anung peh in ahi ati. Bill 3 ho chung a nakiphinnao na lolhing uvin, BJP Govt. in Bill thah Thinglhanggam sukha ding ahilou leh Bill thah akisem ding jong leh Stake holder chom chom, Civil Society Organisation chom chom ho toh kihoutoh na leh kinoptuo na umlou a kisem lou ding chuleh, Hill Area Committee (HAC) phatsah na louva Bill thah ki Pass/Introduce kibol lou ding ahi ati. Hiche toh kilhon chun Martyrs ho thilong vuidoh phat hitalou ham tin Manipur Govt in aseiyin ahi.

Manipur a Congress Govt. in District thah 7 anasem doh jeh in United Naga Council in ni 200 val Economic Blockade ana kouvin, tu ding mun’a Lamka District semdoh ding hi thilhahsa ahi ati. District Boundary Commision vetkai na noiya District thah semthei ding dinmun a aumleh kibol ding ahi ati. 6th Schedule thu toh kisai ah, SoO groups, Govt. of India chuleh Manipur Govt toh kihou na achelhah jing lai ahi toh kilhon a Manipur Govt. in full support kibol ding ahi tin aseiyin ahi. Chuleh, Martyrs ho vui ding kanop thu MDC ho heng’ah kasei khapoi, mipi deina banga na katoh ding ahi ati. Chuleh, Khaipao Haokip leh Congress Councilor ho’n Party High Command, State Chief Minister, State BJP President chuleh kei kom ah Concilor 14/15 BJP a hunglut ding kahiuvin, kei ho sung’ah lamkai ding kana kilheng doh uvin, kahi na bang uva nei lahlut ding uleh BJP kajop diu ahi ati. Khaipao Haokip leh aloi 14 leh outside support 1 jaona in Manipur a State BJP President, Manipur CM leh Central BJP ho heng’ah keiho sung a lamkai ding kilheng dohsa kahiuvin, kahi na bang bang uva neipom peh uleh BJP a kalut diu ahi tin asei uvin ahi. State leh Central BJP ho phatsah na bang in lahlut in aum uvin ahi. Langkhanpau hi minority ahung hitan ahi. Hiche toh kilhon chun ADCC Chairman leh Member dang ho phatsah na bang a Secret Ballot mang’a Chairman Election ana kineiyin, Khaipau Haokip hi ADCC Chairman ding’a kilhendoh ahi ati.

Turkish sepai hon northern Iraq a thingnoi 14  that’u

Turkey, Apr. 30: Turkish Air force in achesa phat phabep sung’a chun northern Iraq bomb ana lhahkhum jing in hiche’a chun thingnoi 220 vel athi’e tin President Tayyip Erdogan in Saturday ni chun aseiye.Erdogan in aseidan in Syrian-Kurdish fighter ho hi thingnoi kiloikhom ahi’uvin , northern Syrian sung’a athahatna’u akibe jing’a hileh Kurdish insurgency hi gamsung mipi ding’a lhohsatna tah hung hiding ahi.

Alangkhat’a Turkey Military a kon kimu thulhut khat in aseidan in Saturday ni chun Northern Iraq sung’a kikaptuona’a Kurdistan Workers Party (PKK) member 14 athi in adang tampi jong akisukha’e ati.

Saturday ni jingkah lam chun Air Force in Adiyaman kimvel’a um thinglhang gamho bomb alhahkhumna’a chun thingnoi gup athi’e tin military thulhut khat in aseiye.

Alangkhat’a Syrian-Kurdish YPG  hi NATO in apom kilou ahi. Ajeh chu United State in Syrian-Kurish YPG hi Syria a Islamic State ho douna ding’a kikhutjop pi/kivop pi  phatah’a aneikit ahi. Hiche chungthu hi Erdogan in lhakit tengle US President Donald Trump toh aseikhom lhon ding ahi.

Thusoh Lahchom

 

Maoist Manipur

Maoist Communist Party, Manipur in May Day nikhon gamsung pumpi kipathu athot uvin ahi. Thuso anei nauva chun Indian Maoist, Manipur Maoist leh Nepal Maoist chule Maoist adang 21 in May Day nikho’a vannoi kipathu athot’e, ati. “Tukum hi October Revolution kum jakhat lhinna ahi. Imperialism, capitalism, mipi lamdih louva akiman chah na, gal chule adang dang suhbei nading’a proletarian revolution ngai ahi. Working class hon ruling class ho thuneina asuhkeh’a, thaneina asemdoh ding ahi”, tin Maoist in thuso aneina’a aseiyin ahi. Lenin in tohdoh lentah tah ho thu tekahna in aseiyun, Imperialism hi sum dinmun’a ding’a gal ahi’in, kichomna ahi’in, chule capitalism dinmun achaina pen ahi’in, niseh leh hiche dan isuhmang-u angaidan avetsah jing ahi, tin aseibe uve.

Bomb kimu

Heirok Part 3, lairou Loukol mun’a leiset kilaina in 2nd World War laiya kimang Vestige bomb tia kisei minthang rocket bomb khat akimu in ahi. Bomb hi sun nidan 12.30 don in Heirok Part 3 mol kom’a bomb disposal squad hon alhamlha tauvin ahi.

Chakma leh Hajong

Union Minister Kiren Rijiju in Arunachal Pradesh sung’a um Chakma leh Hajong hohi scheduled Tribe status kiphal peh theilou ding ahi ati.Hiche chungchang thu hi sensitive tah thil ahijeh in Supreme Court ah jong affidavit filed jong kanabol ahitai tinjong aseiye. BJP in Thursday nichun khopi sung’a ni 2 chelha ding state executive kihou khom na’a chun hiche chung chang thu’a hin keiman central level a kabol thei chan kabol ding ahi tin Rijiju chun asei in ahi.

Survey kibol

Mipi hon public services mutheina ding’a sumguh asun’u chungchang’a Centre for Media Studies in India sung’a state umho jouse’a survey abol in ahi. Survey chu -‘CMS India Corruption Study 2017’ = tin akiminvo in ahi.  Survey abolna’auva chun Karnataka sung’a thudoh aneiho’u jakhat lah’a som sagi le sagi vel in sumguh asun danho aphongdoh’uvin ahi. Andhra Pradesh a chun mihem 74% vel in sumguh sunlouva public service mu ahahsatdan aphongdoh’uvin, Tamil Nadu a chun 68% vel in aphongdoh’uvin, Maharashtra a chun 57% vel in aphongdoh’uvin, Jammu and Kashmir a chun 44% vel in aphongdoh in chuleh Punjab a 42 % vel in aphongdoh in ahi.

Editorial

Anti-defection law kichatna umtalou

(Opposition umlouna Assembly )

Manipur a BJP makaina government ahung kisemdoh a kipatna tuni chan hin party dang a kon BJP jop akibe jing in ahi. Achesa niphabep masang jong chun Churachandpur ADC member hon BJP abel’u toh kilhon in Sadar Hills ADC member hon jong BJP a merged anabol tauvin ahi. Chief Minister Biren Singh makaina government noiya Congress MLA Shyamkumar in Minister panmun atuhjouvin 60-Singhat AC a konna Congress MLA Ginsuanhau in jong BJP anajoptan ahi. Amani banjom in Congress MLA 4 in april nisim 28 ni chun BJP anajop uvin, Congress MLA 4 ho chu CM N.Biren Singh le BJP lamkai hon lahlutna ana nei uvin ahi. Congress a dia senior MLA cheh 4 in ipijeh a amaho party dalha’a BJP ajop’u ahidem vang het ahinaipoin, hinlah politics huinun dungjuiya chom’u ahidi jong ginchat ahi. Tuchan’a Congress a kon BJP jop hi MLA 6 alhingtan,maban’a a jong ijat hamkhat hung choplutbe nalai ding in akiseiyin ahi. Tuchung government kisemdan hi ivetle Regional Party (NPP, NPF) ho panmun alen lheh in, Election a chu Congress in seat 28 a guoljona ana aneiya, Single largest party anahi’u ahin chule MLA 21 toh BJP ani na’a anapang’u ahi. Hijongle BJP in NPP le NPF MLA 4, Independent le Congress MLA khatcheh toh government anasem ahin, BJP makaina a government kisemdoh ahivang’a Cabinet a hi NPF le NPP ho thuchejo ding tobang dinmun leu’a um ahi. Ajeh chu NPP MLA 4 hon abon uva Cabinet Minister amusoh kei naban uva NPF MLA ho jong abon uva Parliamentary Secretary a gonna um’u ahi. Hiche party teni alunglhai honlou le government hi lhupai jeng thei dinmun ahijeh’a government semna a makai BJP ding’a jong lungkham umthou ding ahi. Tu’a Congress MLA ijat hamkhat in BJP ahinjop’u hin government sem BJP ding’a lungmon hung umchom lheh ding ahitai. Regional Party NPP le NPF in BJP makaina government dalha jongle BJP in amaho chang’a jong government ahinsemjou diu dinmun a hung um vah ding ahitan, BJP dia machalna khat jong hung hiding ahi.

                 Hinlah hitia MLA hon party khatna konnna party dangkhat’a chopsuh choptou abol’u hin gamsung’a Anti-Defection Law umlou abahsah tan ahi. Anti-defection law dungjuiya MLA a lhendoh’a um khatchun ama party dalha’a party dangkhat abel le achamlouva lha 6 joule MLA ahina a konna ‘disqualified’ cheding chule hiche constituency a chu athahbeh’a election umkit ding tina ahi. Hinlah Political party khat a konna kaidoh MLA sethum lah’a seni (Two-Third) in kilungtoh tah’a party dangkhat abel le “merger” a kisim ding, disqualify chekit loudiu ahi. Tua Congress MLA hi’a BJP jop ho hin maban’a jong Congress a kon BJP hinjop di dim nalai intin merger a hung kisim nahta tia lungmong ahi diuvem ahiloule election kithah bol jongle kikai kit nante tia kisuong ahi diuvem vang akihepon ahi. Term masa ho’a Congress in government apoh laiya Opposition party hattah aumlou jeh’a government po ho adei deiya chat’u ahi tia mipi ana phun phun ji chu tuchung’a hi hung bei ditam tia kinepna ana um chu tu huinun dan hi ivetle tuchung jong hi Assembly a Opposition hung umkit louding dinmun in aumtai.

Blankfire

Tulai hi khantouna dungjuiya anakibol khaloulou jong hung kihabolta, Raja jong umbebe, songlim jong kitunbebe, phung level Inpi jong umbebe, kin le dong hoa jong Inpi lamkai jatjat toumun loding umbebe. Hiche hi khantouna khat ahi tidi himai loudiham!