ET March 8, 2017 Local News

ET March 8, 2017 Local News

338
0
SHARE

KNO/KRA le UPF/KNF pum meithal kinahna’a nam gollhang khat mollem, khantou dingle kikhelna dia hiche hi kul am?

Kaybie Chongloi,

Kangpokpi, Mar.7: A som le khat channa Manipur Legislative Assembly Election, 2017 Phase I chelhahna ni 2 jou Lhakao nisim 6 nilhah lang nidan 4:40 vel’a Gamnom Sapormeina PS noija um Khengjang khosah Kongtam vellah’a nam gollhang ho pum meithal mangcha’a ana kinah nauva nam gollhang khat in ahinkho anachan lon ahi.

Amollem nam gollhang pa hi Khengjang kho’a cheng Seiminthang Hmar chapa Kamminlun Hmar ahin, kum 27 vel mi ahi. Amahi KNO/KRA-U a pang ahin tuni nilhah lam in alongdapsa vuilem anahi tai.

Tujing’a security force hon akikapto nau lhang operation abolnauva manchah khat le mazagine amudoh un ahi akiti.

Pum meithal mangcha’a kinah nam gollhang hohi Kuki chate jouse thalheng kahiuve tia Government of India le Government of Manipur jaona’a achesa June nisim 15 le October nisim 25 a Delhi tolpia Kukite khankho ding sutna ‘Political Talks’ nei KNO/KRA le UPF/KNF ahiuve.

Hitobang deiumlou thilsona gamkai hi ni phabep masanga Manipur State Legislative Assembly Election anachelhahna a anapang 51-Saitu AC sung ahi.

Election masang ngeichun tua kina teni hin election’a sottum party aneigel lhon’e tin ngohna jat jat ana umda pon hijongle amani akonin lhangphongin amahi ahiloule hiche party hi ka sot’u ahi ti phondohna ana umdeh pon ahi.

Ahin thuso phabep’a KNO/KRA in thet umtah election dalhah’a ja chang theitah election cham le lungmonga Kangpokpi AC thum adeh’a 51-Saitu AC a achelhahna dingin analhangsam in Alangkhatna, UPF/KNF in thuphon mong ana bol hih jong koi thingnoi kiloikhomna hijongle ama ama operational area tilou midang operational area a cham le lungmonga election chelhahna din kikum da hen tihi ana dinpi un ahi.

Alhangpia 51-Saitu AC hi UPF/KNF ho ahat in chule amaho hin tuchung election a BJP ason’e tia ngohna anaum ahin chule KNO/KRA hin INC asot ahi tia ngohna um ahi.

Alangkhatna, Kangpokpi district sunga civil society organization hon jong kilungtoh tah in election masanga ngei chun thulhuhna ana neijun, hiche aki thulhuh nauva chun gamsunga nam sepoy ho mopohna hi election lai le ahung khohpen jin, hijehchun na mopoh nauvin mipi kinepna asuh molphouna loudin chingtheitah’in na mopoh nauva na tongun, nangma nangma mopohna gamkai kalval a boina semlou din temna kaneijun ana tiuve.

Nampi thalhenga natong nahijeh’un mipin kakinep piuvin, tumasangin nangho kikah-a kitomona le kihetthem louna ana umkhah jongle tuchung election tengleh kitomona thei natoh nahin boldoh louvin jong hetsah le temna nahiuve tia jong ana seiju ahi.

Vote lhahna ding ana naijep jep le kingohto na jat jat ana tamcheh cheh in achaina lamin Khengjang lhang langa nilhah ni tobang chuh thalgin ana kijan chule Saitu AC sunga haosa upa kigihna le kigim bolna thulhut jong tampi ana umtan ahi.

Election laile vote lhah masanga pat akilhah chaijou akai kaiding akaidoh jouva Government sem sem dingin ahin kisemtup changei akhu milham lah’a ama ama tosot mi ahiloule party dinga hapan velji jeh in kinah kibao, adeh’a nupi ho sambuchinga kiloito kitiho hi ana umjing angaija thilsoh dan’a kigel thei ji ahin, ahin hitobang hochu thisan kisonan akhelding hitam tihi dipchahna lentah ahitai.

Election laija milham kinah kibao hinkho le khang hi nam gollhang ho kitha kimatna in ahin khel khahding hi nampi adeilou, tukhang ‘Political Talks’ inei jouva thilsoh dia dei umlou thil ahijeh in hiche chondan ihin chepi pai pai khahdiu lainat aum’e.

Tuchung thilsoh jeh in kho helou milham adeh’a Saitu AC sunga umho tampi lunglinglao le hesoh genthei tah in hinkho amang tauvin akhohcheh khat in aban ahin jombe diu ham ti kichatnan a in, akho dalhan Gamnom Community Hall a akichol ngah jong aumtai tithu akijan ahi.

Ka namite thalheng kahiuve tia akingaisangtah ‘Delhi Talks’ nei i-nam gollhang hou hin athalhenpiu mipi genthei sah ahikhah’u geldoh talouva thangtom lunghan joh gelkhoh’a aban pum meithal kinah aboljom diu ham ahiloule mipi thalheng mipi sugenthei kahi pouve tia ahatsatna tamsah lheh jongleu angah diu ham tihi lungkhamna lentah khat ahi.

Centre le state Government jong Kukite boina hi akim akon hilouva abul’a kon suhlhap nadia akitah le agelkhohna tahbeh apohdoh dingle moh umthim louding ahi ahiloule hiche ‘Political Talks’ aneipi hi aboinau asuhlhap peh u nam mite ka le hagel kondoh kokhuh ahisah dem giltah’a agelding akul’e.

Datmo umtah khatchu, SoO noija um gamvah election sunga ama ama designated camp a ECI thupehna khoutah noija umding hohi i-ati le hichan geija hem le thal nasatah mangcha’a kinah nah’a pang theiju ahidem. Government  teni khutnung ajaodem tia gel ho oimo thei ahidem? Akhutnung ajao le ajaolou photchen dia Government tenin thudih le lamdih’a aban kinahna aumlouna dia akhamtang ding ahi.

Alangkhatna, KNO le UPF lamkai luboh ho 51-Saitu AC khoisatna hi kihetmosah’a aban sosetna, mipi hesoh gentheina chule thikah’a suhmilmo thilsoh aumdoh sahding ham?

Akinate nin alangto’a akinah lona lhon ajeh chu them kichujoh ding amasat sah lhonding kuljo em, dip phutdot dotna anneh tuidon je hetalouva um athalhenpiu mipi khankho amasat sahlhon ding kuljo em angaito khamset lhon ahin, mipi masatsah’a kihouchamna dokhang belding agelcheh lhonding thildang jouse sangin akuljoi.

Themjil chapang jatdang namdang tampi toh kitet Class X le XII Zillai ho themvetna sangpen nailam cha lhungding ahitai, meichang gin le kichapum’a themvetna’a mi toh kitetdia kigo diu hitam?

Akhumkhanan, kikhelna pohlutna dingle khantou machal semna dia sopi thisan kiso tei ngai hitam? Angai le, kikhelna le khantouna chu aumna mun lhon cheh’a machallou vin umden lhon jeng henlang, BC Khanglai bangin khantouna le kikhelna imacha umlouvin isopi toh kingailu tah le chamdel’a hinkho lhengjo jengu hite.

Lamzang kho’a mi-2 akivoh jou nung’a Nupi khat ana kivo kit; Mipi’n Phungzathang inn bulu

Lien S. Gangte

Ccpur. Mar. 7 (ET): Lamzang kho’a achesa 5th March, 2017 nikho a melhet lou thal choi ho’n North East India Development Party (NEIDP) candidate K. Paukhansuan Polling Agent hiding’a ginchat khosung mi Thangmuansang (26) S/o Chingpam leh Thangsuanmung (16) S/o Niangkhochin akai doh uva, hatah’a ajepjou nung uvin, Nupi khat melhet lou ho’n ana puimang uvin ahi. Puimang a um Vungbiaklun (19) W/o Thangbiakmang hi Ngoiphai toh kinai cha um lou lampi’ah khohelou vin akimu doh in ahi. Ama hi lou kon ding a che Phaibem kho’a um numei khat in ahin mudoh ahi.

Thulhut kimu’n asei na’ah, 7th March 2017 sun nidan 12:00 don ding chun Lamzang khuo ah melhet lou mi 3 in Vungbiaklun w/o Thangbiakmang chu a inn mai uva ponphou va aum lai in amai pon in a tuom peh uvin ana puimang uvin ahi. Loukon ding’a che numei khat in Vungbiaklun kho helouva um chu ahin mudoh in ahi. Lamzang leh Ngoiphai mipi’n ichan ham avet kol jou nung uvin, YPA ho lamkai na in Ambulance ah District hospital lhut in aum in ahi. Thulhut chun aseibe na’ah, Vungbiaklun hi 5th March nikho’a melhet lou hon mi 2 anapui mang uva anavoh lah uva jau Thangmuansang naupa numei ahi. Ana kipui mang te-ni hi North East India Development Party (NEIDP) akon 58-Ccpur (ST) AC a Candidate K. Paukhansuan  ading’a Polling Agent ahi dan thulhut chun aseiyin ahi. Hiche thilsuo na chung Mipi lunglhai lou ho’n 58-Ccpur (ST) AC akon National Peoples Party (NPP) Candidate Phungzathang inmun New Lamka abulu uvin, Gate mai’ah mipi lunglhai lou ho’n Gari neo 3 ahal lhah uvin ahi. Chuleh, Mipi kipunkhom ho nomang na ding in SP Ccpur jaona in Police ho’n Tear Gas akap uvin ahi. Tear Gas kimang ho hi Expire sa mu thei ahi. Hiche thilsuo na chung’ah thina toh um hih jongleh akitong kha jat thusuo sut ahi chan in het chen ahi nai poi.

CEO Manipur in official phabep toh 2nd phase election lolhingtah a achelhah theina ding’a kihoulimna nei

Imphal, March 7: Chief Secretary, Government of Manipur in tuni (March 7) sunkim nidan 12 vel chun ama office chamber sung’a Director General of Police, Manipur; Addl.Chief Secretary (Home) Govt. of Manipur; Major General , 57th Mountain Div., Leimakhong; Additional Director General (CRPF), New Delhi; Inspector General (CRPF), Manipur, Langjing; Deputy Inspector General (BSF), Manipur, Koirengei’ Police Nodal Officer/IGP (Zone-II), Manipur; Chief Electoral Officer, Manipur; Additional Chief Electoral Officer, Manipur toh  2nd Phase poll a security dinmun chungthu seikhomna aneiyuvin ahi.

Kihoulimna a chun Assam Rifles le Army in 2nd Phase Poll boina umlouva achelhah theina ding a Central Para Military Forces (CRPF, BSF, SSB, ITBP, CISF, IRB) le State Police Force kithopina lhingset apeh ding ahidan aphongdoh in ahi.  Assam Rifles le Army hin area domination, Polling Area Sanitize chuleh CPMF le State Forces ho angaichat dungjuiya kithopina apeh ding ahi. March nisim 9, 2017 nikho leh Chandel, Ukhrul le Tamenglong District a 2nd Phase election toh kisaiya scrutiny centre 10 kisemdohbe ho venbitna kipe ding ahi tin Assam Rifles le Army in tuni kihoulimna’a chun asei lhon in ahi. 2nd Phase poll phatah’a achelhah le achelhah lou vetchilna ding a Additional Chief Secretary (Home) le security agency official hon March nisim 8 nikho le helicopter amanchah’uva aerial surveillance abol ding’u ahi.

2nd phase election’a ding’a kigotna lhingta; BJP, Congress leh NPF sangtah’a kitet ding

Imphal, March 7: 2nd Phase Manipur Legislative Assembly election Wednesday nikho’a umding ahitoh kilhon in kigotna lhingset aumtan, jingkah nidan 7 ‘a kon Thoubal district, Kakching district, Tengnoupal adistrict, Ukhrul district, Chandel district, Kamjong district, Senapati district, Tamenglong district leh Noney district sung assembly constituency 22 noiya um polling station 1,151’a vote lhahna kipan ding ahi.

Electorate agom’a 7,83,562 ahi, tin Chief Electoral Officer thulhut in aseiyin, nilhah nidan 3 chan vote lhahna umding chule agom’a candidate 98 kitet ding ahi’in, hiche lah’a numei 4 pang ahi. Monday nikho’a kon poling duty hon ama ama polling station ajot pan ahitan, tuni’a kipandoh phabep jong um ahi. Second phase election’a jong state sepai ho kilha ong ding chule central paramilitary force hobou kimangcha ding ahi.

Election Commission in centre sepai company 280 akoi ahi. Second phase election’a candidate hetthei phabep hohi Chief Minister Okram Ibobi Singh (Thoubal AC), Deputy Chief Minister Gaikhangam (Nungba AC), Th Debendro (Jiribam AC), MPCC President TN Haokip (Saikot AC) ahi. Chule BJP candidate hetthei phabep hohi Dr Nimaichand Luwang (Andro AC), Vice President, BJP Manipur State unit Moirangthem Hemanta (Wangjing Tentha AC) ahi. Chule election atetna masa hettheiya um hohi BJP candidate Radheshyam (ex-SP, Manipur Police) ahi’in, Heirok AC’a atet ding ahi’in chule PRJA candidate leh AFSPA crusader Irom Chanu Sharmila (Thoubal AC) ahi.

Tuchung election’a Chief Minister Okram Ibobi in ajinu ana din na Khangabok AC’a achapa Okram Surjakanta Congress candidate’a adin sah ahi. First phase election’a BJP leh Congress sangtah’a kitet’a kisei ahi’in, second phase election’a NPF injong pan alahding ahi’in, political analyst hon NPF, BJP leh Congress sangtah’a kitet ding’in asei uvin ahi. NPF in election’a candidate 15 atosot ahi.

First phase election’a political party jousen campaign abolna’a UNC in phat sottah economic blockade abol leh sorkar in hiche jeh’a boina asuhthip joulou thu hatah in akiseiyin ahi. Voter hon agelkhoh adang hohi khantou machalna lhahsam, nehguh ahat, fund dihlouva kimang chule ‘law and order’ aset cheh cheh hi ahi.

Kangpokpi District CSOs in chamna umna dia ngehna nei

Kaybie Chongloi,

Kangpokpi, Mar.7: Kangpokpi district sunga um civil society organization hon gamsung lhangsunga cham le lungmonga nunao chapang akhosah theina din Nam gollhang ho temna tunin anei tauvin ahi.

Hiche CSOs ho temna hi jan hi nilhah langa Khengjang khosah lhanga Nam gollhang KNO/KRA hole UPF/KNF ho in nasatah a mechang lha’a ana kikapto uva kon’a alhang lunglinglao nan abomtah jeh in mipi ding khotona jalla hiche temna hi aneiju ahi.

Nam gollhang ngailut umtah ho gamsunga mipi lungmonga akhosah theina din kinah kibao, kitha kimat, kikapto bol be tahih un, nunao chapang alunglinlao tan, in na gam’a lungmong lhamongin akhosa thei tapouve, tijat lungjin na pumin an ajong’un, hesoh genthei tah in ajan imu tauve.

Hitobanga ikithatou kinah’u hi chenkhompi namdang jatdang ho kipana ahi ti nahesoh keijun, mi noise a iumna loudingun, hem le thal pan’a kitha kimat pan kit tahih un khosuh khosah umthei louvin lungjin na eibom ji tauve.

Nakah uva palaija pang kahiu na jallun, nahin gelkhohten diuva kul kasha u chu, ahunglhung ding nisim 17 March le chate naote Class X simlai hole Class XII simlai hon Board le Council exam themvetna khohtah apat diu ahitah jeh in lung hesoh pum’a mitoh themvetna’a apandiu dei aumpoi.

Hijehchun, hitobanga nunao chapang lungjinna thei ho supoh kit talouvin cham le lungmonga khosah nathei ding joh na ngaito tei diuvin temna khohtah kaneijui atiuve.

Alangkhatna, janhi nilhah a kikaptona mollem Kamminlun Hmar long opna le insungmite lunghem huna jong CSOs Kangpokpi in aneijun chule tunia alongdapsa vuilemna kin’a jong Saipikhup khatna ana tom’un ahi.

Manipur sorkar in 2013 kum’a Myanmar heng’a gam leiset phabep ajohdoh ahitai: Manipur Maoist

Imphal, March 7:  Thal-choi kiloikhom Maoist Communist Party, Manipur in Tuesday nikhon Manipur gam sung mun phabep hi Myanmar thilpeh’a kipe ahi’in, akhel’a Prime minister anahi Dr Manmohan Singh lamkaina India sorkar in Okram Ibobi Singh lamkaina Congress sorkar hi alunglhai nading’a dangka lakh 503 thilpeh’a ana peh ahi, tin asei uvin ahi.

Myanmar vaipo ho India gam hopsung, India-Myanmar gamgi’a um Haolenphai khop’a alut uva, hunam’a thil amat peh thilsoh jouva Maoist hon thuso anei ahi. Compensation kipeh hi Home Affairs Ministry in phondona anei ahi’in chule achesa October nisim 31, 2013 kum’a Times of India’a ana kitahlang ahi, tin aseibe uvin ahi. Congress party in lhangphong tah’a gamsung mi ajoulhep ahi’in, gam leiset beh phabep dangka 50 million’a akijoh doh jou nung’a, gamsung ventup ding thu’a kitepna anei ahi, tin sorkar demna anei uvin ahi.

Kpi District sunga Polling Station 7 Re-poll dinga ngehna um

Kaybie Chongloi,

Kangpokpi, Mar.7: Achesa Lhakao nisim 4 nia vote lhahna mun phabep a dan to kikal’a chalohna aum’e tin Kangpokpi District hopsunga 46-Saikul AC le 51-Saitu AC tenia polling station 7 avel’a vote lhahna umkit din ngehna aumin ahi.

46-Saikul AC a Returning Officer, L. Geetchandra Singh in Chief Electoral Officer, Manipur henga Re-poll umdia a ngehna polling stations ho chu –  46/3 Molkon; 46/5 Molkon; 46/24 H.Champhai chule 46/42 Kamuching ahi.

Alangkhatna, 51-Saitu AC Returning Officer, Dr. N. Johnson Meetei in Re-poll umdia a ngehna mun hochu- 51/2 Mayangkhang (A), 51/3 Mayangkhang (B) le 51/12 L.Simol ahi.

Hetthei khatchu, 46/3 Molkon Polling Station hin kho li (4) tichu Molkon, Puleijang, Chonjang chule Molkon bazar ahop’in hiche a vote um jat chu 1028 ahin 46/5 Molkon Polling Station in Makeng Ngamneh le C.Aisan kho ahop’in agomin vote 546 aum’e.

46/24 H.Champhai Polling Station hin H.Champhai, Songphel Lutjachong le N. Mollen ahop’in agom’in vote 803 aumin chule 46/42 Kamuching Polling Station hin Kamuching, Bewlahland and Kamuching Jang kho ahop’in vote agom’in 476 aum’e.

Alangkhatna, 51-Saitu AC a re-poll umna dia ki ngehna mun 51/2 Mayangkhang (A) Polling Station a 1082 aumin Mayangkhang le Mayangkhang Khunou ahop’in chule 51/3 Mayangkhang (B) Polling Station a vote 600 aum’in Mayangkhang Ningthoupham kho bou ahop ahi.

51/12 L. Simol Polling Station a vote 476 aumin kho 9 tichu S. Bongjol, Phaijawl, S.Vengnom, T.Phaimol, Lower Simol, Ch.Ollim, L.Simol, C.Phailen chule L.Kholkim ahop in ahi.

Hiche thu kisut chan hin hiche laimun hoa re-poll umdia ngehna hi ECI le adang amopo hon aphatsah aphatsah lou hetchen ahiman hihlaijin ahi.

Jiribam Polling Personnel hon ama ama polling station jon tao

Jiribam, March 7: Security khoutah noiyin 40-Jiribam Assembly constituency’a polling official leh security personnel ho ama ama polling station jon ding’in DC Office, Chingdong leikai, Jiribam’a konin jingkah nidan 8 don in District Election Officer, Jiribam, Ranjan Yumnam lamkaina in akipandoh tauvin ahi.

40-Jiribam AC’a agom’a polling station 40 um ahi’in, hiche lah’a polling station 30 hi ‘sensitive’ ahi. Voter 28,140 in vote alhah ding, hiche lah’a numei 13,695 pang ahi. Wednesday nikho leh 40-Jiribam AC’a candidate 6 kitet ding ahi. Election boina umlouva achelhah nading’a Election Commission in 40-Jiribam AC’a Election Observers 5 alhendoh ahi’in, General Observer, Expenditure Observer, Central Awareness Observer, Police Observer chule Assistant Election Observer khat cheh pang ahi’in, hiche tilouva Micro Observer 3, Sector Magistrate 6 chule Police Personnel ho ding’a Sector Officer 6 jong kipe’a ahi. 40-Jiribam AC election’a CPMF company 7 kimangcha ding ahi’in, chule polling official leh security personnel ho poh-le na’a gari 104 kimang ding ahi.

Bomb 2 kisupoh; AR jawan 1 le milham 1 kisukha

Kamjong, March 7: Tuni (March 7) nilhahlam nidan 3:15 vel chun  Kamjong Police Station hopsung a um Aishi vangkho’a pat km 3 vel gamla munkhat’a IED khat ana pohkeh in ahi. Thilsoh a chun ROP  bol’a kalsuong 31 AR jawan khat akisukha in ahi. Akisukha Jawan pa chu amin R.Vasnet ahi’n, ama hi D Coy a um ahi.

Chule nilhahlam nidan 4 vel chun Kamjong police Station hopsung mama’a um Ashang Khullen 43/49 polling station toh kinaicha’a bomb khat ana pohkeh kit in ahi. Thilsoh a chun election duty bol ding’a um milham khat akitongkha in ahi. Bomb teni chu Naga thingnoi hon asuhpoh hiding in ginchat ahi

Class X leh XII exam’a adihlou akibol lou nading’a DESAM in ngehna nei

Imphal, March 7: Board of Secondary Education Manipur (BOSEM), Council of Higher Secondary Education Manipur (COSEM) leh Central Board of Secondary Education (CBSE) Class X leh XII exam anaitoh kilhon in Democratic Students’ Alliance of Manipur (DESAM) in exam pe ding’a simlai ho, exam authority chule simlai ho insung mite heng’a exam thengtah’a akibol nading’a kouna anei uvin ahi.

DESAM office, Sagolband Moirang Leirak mun’a Nameirakpam Edison Meitei, Secretary General, DESAM in thuso miho akimupi na’a chun, kum phabep masang’a exam ho’a lam chom chom’a akigu anaum ahi’in chule exam authority leh invigilator hon simlai ho answer apeh na jong um ahi’in, hiche hi vangset umtah ahi, ati. Exam centre’a mopohna nei invigilator leh school authority hon thengtah leh dihtah’a exam achelhah theina ding’a avetsui diuvin aseibe in ahi.

DESAM injong team sol’a, exam centre ho’a thil dihlou kibol aumlouna ding’a pan alah theina ding’a exam centre authority, school principal chule invigilator ho heng’a asei uvin ahi. DESAM in drive abol sung’a, thil dihlouva mang’a, ahilouleh simlai ho kithopi’a aumleh DESAM in action alah’a chule japi het ding’a amin atahlang ding ahi, ati. State sorkar in yaoshang suty nikho ni bou ahisah ding’a Edison in temna aneiyin, angaiya ni-nga ho kimang ahi. Ni-nga Yaoshang kimang hi phat sumang ahi, tin Edison in aseiyin chule nithum ni’a kon suty man tahlou ding’a temna aneibe in ahi.

DESAM leh Principle, Central Superintendent, CBSE in March nisim 8 nikho leh DESAM temporary office mun’a toukhomna aneiding ahi’in, CBSE toh kisai mopohna nei hon pan alah diuvin DESAM in temna aneibe’e.

2nd phase election’a Sharmila leh Ibobi kitet ding

Imphal, March 7: Irom Chanu Sharmila in March nisim 8 nikho’a umding second leh last phase election’a Chief Minister Okram Ibobi atet ding ahi. Assembly election phase masa chun seat 38 ahop ahi’in, ginchat sang’a voter tamtah in vote ape in, tu’a hi Sharmila in election atetna Thoubal constituency hi mijousen ahetnom ahi. Second phase election’a candidate holah’a Chief Minister Okram Ibobi Singh, Deputy Chief Minister M gaikhangam, rights activist Sharmila pang ding ahi. Sharmila hin kum 16 lhing an ngol kiphinna abol angah’a AFSPA kilahdoh nading lampi akhel’a People’s Resurgence and Justice Alliance kiti ama political party asemdoh’a election atet ahi.

Chungjalen Haokip INC Candidate, 41-Chandel (ST) AC in hilchet na nei

Lien S. Gangte

Ccpur, March 7: Chungjalen Haokip Candidate, INC 41-Chandel (ST) AC in hilchet na’ah 7th March 2017 Eimi Times Issue (4th Page) a “Commando ho’n UKLF lamkai khat chenna in ah numei chapang ho ana kichat sah ui; Kiloikhom na chung’ah Chungjalen Haokip chaloh dan hi vangsiet um ahi: Jacob Thadou UKLF, JMG” in asei hi kahil chet nom in ahi ati.

Aman asei na’ah, tulai hi Manipur State Assembly Election a 11-channa Process laih ahi in, Chandel’a Voting day ding 8th March, 2017 ahi in, hiche masang chun Campaign phat ana hi in, Campaign phat sung hin Sachihtampak ah Ka poster ho abotkeh uvin, 5th March, 2017 nikho chun Songjang kho ah NPP worker ho’n ka flag kikoi jouse ana bot lha uvin chuleh, Haosa ho hi ada da in meeting bolna’ah UKLF ho’n vel-3 akou uvin Sugnu ah, NPP natosot diu ahi tin aseipeh uvin hinla ana jou tapou vin ahi ati. Haosa ho’n kakom ah Report ahin bol uvin, ajo lou napen uhi Haosa ho’n Indian National Congress (INC) asuport jeh’u ahi. Tuchun hin INC Candidate keima hi gamsung mipi ho lungsiet na leh hepi na chuleh, ginchat na leh lamkai khat hina ding a phatsah na einei sohkei uve ti hi Household Campaign kabol chai toh kilhon in kahedoh in ahi. Nasatah’a support eibol na chung uleh, adeisah pau NPP Candidate Letpau lunglam ahi lou jeh in, aman UKLF ho atil doh in, Home Secy. Khupmang @ Mangboi Thadou instigate abol in, 24th Feb., 2017 jan pung 9:00 chun ka innmun L. Thingkangphai ah Mi-4 hon thal choiyin ei hung bulu uvin ahi ati. Ahinsol ho’n thilphalou bol ding’a ahin sol’u ahi in, kaki ngailut pi kanaote ho ahi jeh uvin ima eina lo tapou ve ati. Hiche thilsuo na chung’ah ajan jan in FIR No. 3(2) 2017 SGN-PS U/S 25(1-C) A. Act 442/171F/34 IPC Sugnu Police station ah kana jihlut in ahi ahi ati. SoO noiya um uva ibol a ground rule jalou’va hiti a chu ibol uham tin jong aseiyin ahi. Hiche nikho chun insung ah kichat tijat na alhung in, election laiya boina dei kahi lou jeh in ima kana lehthu pon ahi ati. Election Process leh mipi chung a boina alhun lou na ding chuleh vote capture a umlou na ding’a Concerned Authority in avettup angaiyin ahi ati.

Chuleh, Commando ho’n UKLF ho innchen’na aga khol hi INC in ima cha het na aki neipoi. Jacob Thadou, UKLF JMG in asei, kei hin complain kabol e ati hi adih ahi, hijong leh Election process asuboi uvin, congress worker ho asuh boi jing jeh uva complain ka bol ahi ati. India Govt leh Election Commision of India in dan asem suboi ho’n boina invite akibol u ahi ati. India hi democracy ahi toh kilhon a mipi’n ama ama dei na’a vote alhah thei na ding’a concerned authority in Law & Order avet tup ding ahi tin tepna aneiyin ahi. Chuleh, mipi’n eima eima deina vote lhah’a koima isuh boi lou ding’u ahi tin jong mipi ho tep na jong aneiyin ahi.

Chandel le Tengnoupal a vote lhahna ding mun ho gontup hita

Chandel, Mar. 7 (DIO-CDL): Chandel leh Tengnoupal Assembly Constituency teni’a Phase-2 election kigotna akichai sohtan hiche toh kilhon chun Polling Personnel holeh security hojong tuni chun hiche district teni’a polling station ho’n alhung tauvin ahi. Jing nikho (Mar. 8) jingkah nidan 7:00 a kipat nilhah lang nidan 3:00 chan vote lhahna umding chule Chandel A/C a polling booth 74 leh Tengnoupal A/C a polling station 70 a vote kilha ding ahi. Hichena ding chun Central Paramilitary Forces section 275 honjong abol diuva lom abolpan tauve.

Monday (Mar. 6) nikho chun Chandel A/C sung’a polling booth 26 leh Tengnoupal A/C sung’a polling station 36 ho’a ding’in polling personnel holeh security team ho dispatch anakibol tai. Avatcheng Chandel A/C sung’a polling station 50 leh Tengnoupal A/C sung’a polling booth 34 ho’a din tuni chun polling personnel holeh security personnel ho anakipatdoh tauvin ahi.

Chandel district sung’a hin candidate 7 alhing’in chule Tengnoupal district a kon’in candidate 4 ading uvin ahi.

Kahlah chun District Election Officer in DC Office Complex, Chandel a March nisim 11, 2017 nikho’a vote simna ding arrangement hojong aboltoh pantan ahi. Central Paramilitary Forces ho hiche Office Complex angasah keu hilouvin CCTV camera hojong akoiyin ahi.

‘Khankho Day’ kimang

Ccpur. Mar. 7: Bethesda-Khankho Foundation, India in kumseh a ana mangji bang in tuni (March 7) jong chun “KHANKHO DAY” lolhingtah in ana mang in ahi. Tuni Khangkho Day chu Bethesda Academy le Bethesda Som-In (Children Home) Staff le chapangho tohgon noiya kimang ahi. Hiche nikho kiman lo najeh lenpen ni (2) chu ahileh – (i) Genthei hahsa ho kithopi na nikho (Khankho tho na nikho) chuleh (ii) simlai chapang ho tua pat’a mi khoto leh kithopi dan kijilsah ding’ tihi ahi. Tukum a din “Ruth Blessed Home” kiti Mrs. Niengpi Singson in meithai ho dia ana tohna mun Lajangphai kho’a aga kitong in ahi. Hiche mun ah chun Oja ho lamkai na in thilpha bolna lam chom chom aganei’uvin ahi. Thilpha kibol na ho chu – Widow Home campus sung suhtheng na, Room sung ho juttheng/suhtheng na, avon hou leh pon ho sopna chuleh thil neo neo tamtah jong akibol in ahi. Hiche program kiman a kon in Oja ho leh simlai chapang tamtah in mi akithopi nauva kon a lungthim kipana anei uleh lungnop um asah nau jong aphong doh un ahi. Chukit leh ‘Nu te hon’ phatthei bohna ahin nei nauva akipa naojong aphong doh un ahi. Chapang tamtah din hiche program in akhatvei channa hijeh in akipah lheh un chuleh maban a mi kithopi ding anop nau jong aphong doh un ahi.

12-Keishamthong le 13-Singjamei AC RO in hetsah thuphon nei

Lamphel, March 7: 12-Keishamthong  le 13-Singjamei AC a vote kilhadoh ho simna hi March nisim 11, 2017 nikho le chelha ding ahi tin ADC/RO, Imphal West Ksh.Lemba Singh in Candidate ho le Election Agent ho jouse hetding in thuphon aneiyin ahi. 12-Keishamthong AC  vote simna hi Counting Hall Linthoinganbi Hall, DC Office Complex , Imphal West District  a jingkahlam nidan 8 a pat chelha ding ahi.  12-Keishamthong AC vote simna akichai teng 13-Singjamei AC vote simna hilai mun mama’a hi chelha kit ding ahi.  Vote simna nikho’a hi ARO table le counting table aguom’a som (10) kido ding ahi. Vote simna nikho’a hi Candidate/Election Agent hon  table khatcheh’a pang ding Counting Agent 10 appoint abolthei ding’u ahi.  Candidate/Election Agent in Counting Agent ding’a ngansena aneiho hi  Form 18 a passport size photo ni ahin beh’uva March nisim 8 masang’a RO heng’a apehlut’u ngaiding ahi. Counting Agent hon vote simna nikho le Photo Identity Card le Form 18 dungjuiya appoint akibolna’u lekha ahin kichoi ding’u ahi.  Candidate/Election Agent chuleh Counting Agent ho hin counting Hall sung a mobile phone achoilut theilou ding’u ahi. Chuleh Vote simna nikho le hin Postal Ballot Paper kisim masang ding ahi tin thuphon chun aseiye.

ASUK in Yaoshang suty suhchom ding’a temna nei

Imphal, March 7: Thingnoi kiloikhomna KYKL leh KCP kipunkhomna Alliance for Socialist Unity, Kangleipak in Tuesday nikhon gamsung mihon March nisim 12 ‘a kon 16 nikho chan tilou nidang’a Yaoshang aman lou diuvin temna aneiyun, gamsung’a um simlai ho ding gelkhohna jal ahi, ati.

Kiloikhomna in thuso aneina’a chun gamsung miho gampam’a kon kipolut thil ho’a kon venna ding’a programme chom chom kibol jing ahi, tin aseiyun chule themjilna hi gam-leh-nam khantouna ahi, ati. Hiche jeh’a themjilna dihtah aumthei nading’a kin-gon chom chom kibol ahi, ati. Themjilna hi ipi thu hijong leh suhboi louding ahi, tin aseibe uvin ahi.

Election jeh’a simlai ho kisuboi khop ahitan, tu’a Yaoshang hi amaho ding’a boina khat ahikit in ahi. Festival man ding hi thupi akisa in, ahin, aval’a kimang hin phatchomna asemdoh louding ahi, ati. Class X exam March nisim 17 nikholeh kipan ding, Class XI exam March nisim 20 leh (BOSEM/SOHSEM) kipan ding chule Class XII (CBSE) hi March nisim 9 leh kipan ding ahi. Exam khoh tah tah aumjeh’a simlai ho khonung semthei ding gelkhohna inei uva Yaoshang nikho isuhchom diuva ASUK in temna anei, tin thuso chun aseibe’e.

Meghalya sunga numei chung a khansetna apunbe jing hi sorkar lhinlel jeh ahi: Opposition

Shillong, Mar. 7: Meghalaya gamsung a numei chung a khansetna thilsoh akibe jing hi ruling Congress-led government lhinlalna ahi tin Meghalaya Opposition lamkai Donkupar Roy in asosal in ahi.  Meghalaya  sung’a numei chung’a khansetna thilsoh ho hi Uttar Pradesh a sang in atamjotan ahinlah tunigei hin sorkar in numeiho venbitna ding tohgon khat jong anei hihlaiye tin Roy in alungkimlouna aphongdoh’e.  Police Department data dunguiya 2001 sung a chu Meghalaya sung seh seh’a rape case 26 ana um’a, 2013 sung a 183 ana lhin’g a 2016 kum’a chu 91 analhing ahi tin Roy in ahoulimna’a chun aseiye.

Chuleh sorkar in gamsung khangdong ho natoh apehjoulou chungthu’a jong alungkimlouna aphongdoh in ahi. Aman aseidan in rate of unemployment hi phaicham/town sung jeng a jong akhantou jing’e ati.”Congress in vai ahin hop hi kum 10 hungval ahitan, ipi atileh khangdong ho ding a policy khat jong lungthengsel leh pohnatna neipum’a kisemdoh lou lai ham.  2018 election masang a government hin youth policy khat asemdoh ngai ahi” tin Roy in aseiyin ahi.

Resubelpara a milham ho le police ho hatah a kinoto, mi 3 thi phabep kitongkha

Shillong, Mar. 7: North Garo Hills, Meghalaya a Police le milham phabep  akinotona’uva mi thum athi in phabep akisukha’e tin thulhut kimu khat in aseiye. Thilsoh chu miphabep in Resubelpara police station meiya ahallhah jeh’uva anasoh ahi.  Hetthei khat chu police in thuguh pole ho’a kon a thu ajah dungjuiyuva Resubelpara a thingnoi ho raid agabolkhum’u ahi. Ahinlah mipi ho chun police ho chu ana kidintepi’uva , gari phabep jong meiya ana hal lhah’u ahi.

Editorial

Election kichaiya kiboltona kipan

                                  Tuchung Election to kisaiyin kitha kimat aumpon aphalheh e tia kisei chailou laiya adon don’a kitha kimat leh kikaptona thu hung kisei hi vangset leh jachat umtah ahi. Akhohjopen vang chu ahileh phung le chang ho kiminsetsah a kikhenna leh kimit thipna akiboldoh nahlai leh politics kiti umloulai tina hidi ahi. UTLA kiloikhomna sung’a boina hung chejing chu tun alamkai General Secretary Sehjahao Singsit @Abu Nadal chu akikaplih tan ahi. Akiseidan ahileh Sehjahao hi “achapang hon” (a sepai ho maman) akaplih in ahi akiti’n ajeh jong ajat-jat akiseiye. Ahin hiche thilsoh masang’a jong hi President/Chairman Seipu Singson achenna inmaiya tha dia anuoiya sepai ho maman ana kap a ana sohcha in akiseiye. Kiloikhomna khat sung’a kitha kimat leh chehchaona kiti hi lamkai lang lhinlel jeh hipendi ahi. Lamkai kikah-a chungnun kichuna jeh ahijongleh lamkai lang lhinlel jeh hithou thou ahi. Kuki thingnoi kiloikhomna ho sung’a akithatdoh jat hi simjou hetjou ahilouna sot ahitan ichan ahung chebe dem ti jong dip dap umnalai ahi. UTLA lamkai khat kithana hi Election to kimatna aneiham, aneilouham akihepon, ahin thilsona phaat le nikho hi ivetleh Election thu toh lampi khatna kisamkaina aumteidi ginchat umtah ahi. Churachanpur district sung mama’a gollhang ni (2) “amai kitom hon” anamat uva voh kiticha’a avoh uva mipi in adel’a aga huhdoh thusoh jeh a phulou helouva Lamka khopi sung Bandh kibollo jong chu Election thu toh kimat tina ahi. Hiche’a kiman’a kijep pasal khangthah teni chu Polling Station khatna Booth Capture kibol ho Mobile Phone’a Video Recording anaboljeh lhon ahi ti’n akiseiye. March 6 nilah lang’a Sadar Hills Khengjang kho kom’a thingnoi group ni kikah a kikaptona thilsoh jong chu ijat kisei jongleh Election “gu” (poison) hung pomdoh (kiphongdoh) tina hijengdi ahi. Vote lhah kichai ni geiya ima boina sangtah aumpoi kiti chu ajing athai’a boina hung kipan ahileh akaidi-di kaijou, akailou-lou di kailou nung ahijeh in a-ngaikhohlou beh khat ahi.

                         Election jeh a Society sung’a ichan kibungkhenna um hitam, hitia hi iti chejingdi ham ti hi mopohna nei lamkai jousen agel/angaito a phadi ahi. Let le lal, thunei vaipo’a pan kiti jong hi koima dia kum sot tah hidehloudi ahijeh in thuneina leh thilboltheina mun’a i-umpetna Society sung’a thilpha boldoh joh kitetna umleh khonung peh geiya jana leh ngailutna channa ditah hidi ahi. Phung le chang, phungbah min ho panna thusei lasah hovang ahitheichan’a mijousen abolda’a phadi ahi. Chuleh hitobang khat le khat kikah a kitomona thu hohi Print Media (Newspaper) leh Social Media (Facebook, Whatsapp) hoa jong soda, thejalda, kinelda, kikaltoda in phante. Achutilouleh ijat inam’a mi nuisat channa di bep hidi, aphatchompi dijong umdehloudi ahi. Chamna le kitonadi, kihet themtona di thu hojoh aseidi kichu phaat ahi. Hichu i-pathen hou uto jong kitoh ahi.

Blankfire

Meithal aginleh kicha a lunglinglaova ima bolje umje helou loi, athanoma a imut nomloi, abuneh tuijep loi, houlim thanom holeh thudu ho dia seidi leh ngaidi (jah di) vana kon hung kisunglha bang kit.