ET March 31, 2017 News (Local, Regional, Thusoh Lahchom, Editorial, Blankfire)

ET March 31, 2017 News (Local, Regional, Thusoh Lahchom, Editorial, Blankfire)

543
0
SHARE

Lamlen tosetna thilsoh chom chom’a chapang 3 thi, mikhat kitongkha

Imphal, March 30: Ni-ni masang’a lamlen tosetna thilsoh mun chom chom’a mi 22 athi’a, chule 30 val akitohkhah jouva mun chom chom’a lamlen tosetna thilsoh ni aumkit in, chapang thum athi in chule numei khat sangtah in akitongkha in ahi.

Thilsoh masa hi Wednesday jan nidan 8.30 don ahi’in, National Highway lamlen Khangabok munvel, Thoubal district’a ahi. Kum 14’a upa Th Abem Devi, d/o Th Tiken, Khangabok Sanilou leikai’a cheng leh api N Gambhini Devi Khangabok bazar’a thilcho’a che lhon’a, ahung kile lhon’a nel-po gari in ata ahi. Thulhut dungjuiya, truck hin dukan khat ata jouva numei chapangnu leh api atohkhah ahi.

Thilso na kimvel’a umhon pi-cha teni huhdoh ding ago uvin, ahin, gari’a nel akipoh jeh in alona je ahe pouvin, JCB’a truck akaidoh jou uva numei chapang nu hi athisa amudoh-u ahi. Api Gambhini sangtah in akitongkha in hospital’a tu-leh-tun aumin ahi. Numeinu apa Th Tiken hi achesa August nisim 14, 2003 kum’a Lilong lei’a bomb pokeh na’a bomb hal in amit atohkhah’a amit phatalou ahi.

Anichanna thilsoh hi Thursday sun nidan 11.30 don ahi’in, Oinam Keithel, Tiddim lamlen, Bishnupur district thilsoh ahi. Chitharembi Public School, Oinam’a kai simlai numei ni bus hattah’a lhai khat in atalih ahi’in, numei teni hi Mutum Mani Devi, d/o Mutum Sanou Singh leh Mutum Chitharembi Devi, d/o Mutum Samarendra Singh ahi.

Mihem damtheina ding’a har beiya lou kibol hi apha pen ahi: RSS Sah Sangh Chalak

Imphal, March 30: Mihem hohi ‘har’ (chemical fertilizer) jeh’a boina toh thei dinmun’a um ahi’in, har panna louva phailei kibol hibou mihem hinkho huhdoh nading leh damthei nading lampi ahi, tin Sah Sangh Chalak, Rashtriya Swayamsevak sangh (RSS) Manipur Pranta Dr L Ibungohal Singh in ni-5 lhing ‘awareness cum training programme’ kibolna kin-gon’a aseiyin ahi.

Rajarshri Bhaigyachandra Skill Development Centre, Haraorou in Central Agricultural University, Iroisemba toh Skill Development Centre, central hall’a kin-gon abol ahi. India gamsung hi agri-based economy ahi’in, ahin, chemical fertiliser akiman na atam cheh cheh hi society ding’a boina thei ahi. Loubol mihon gunchu tah’a na atoh diuvin temna aneiyin, mipi damthei nading loubol miho khut’a um ahi, tin aseibe’e.

Ningthoujam Shyamachand Singh, General Secretary Organisation, Bharatiya Kishan Sangh (BKS), Manipur Pranta kin-gon’a Guest of Honour in apang’in, gamsung’a loubol mihon hahsatna ato thu aseiyin ahi. Lekha hetlou jeh vaichat jeh’a loubol miho nehguh hat politician leh kitahna neilou agriculture lampang’a natong NGO ho khut’a vangsetna toh’a pang ahi, tin aseibe in ahi. Kitahna neilou politician leh NGO hon loubol miho ding’a kipe scheme chom chom’a fund alah uva alam louva aman-u ahi, tin General Secretary, BKS in ngohna aneiye.

N Indrajit Singh, Parliamentary Secretary (MAHUD); Dr Th Robindro Singh, Deputy Director of Research, CAU chule Angad Prasad, Deputy Director, Department of Exention Education, CAU kin-gon’a chief guest leh guest of honour’a apang in, kin-gon’a pang  trainee ho centificate leh thing-nou ahop peh uvin ahi.

‘Blood Donation and Awareness Programme’ kibol

Thoubal, March 30: District Library cum Youth Centre Hall, Athokpam Thoubal mun’a DCYC, Athokpam in Blood Bank and Transfusion Unit, Thoubal toh akitho in ‘One Day Voluntary Blood Donation and Awareness Programme’ kin-gon abol uvin ahi.

Ch. Basanta Singh, District Programme Manager, District Health Society, Thoubal, L. Dorendro Singh, Medical Officer, Blood Bank and Transfusion Unit Thoubal chule N. Shiribasa, District Logistic Officer, District Health Society Thoubal leh A. Bilanta Singh, President, DLCYC, Athokpam jong apang uvin ahi. Ch Basanta in thisan kipe aphatchomna thu’a houlimna aneiyin, mikhat chu kum 18 alhin’a kon anop na’a thisan apeh thei ahitai, tin aseiyin ahi. Thisan kipe hin khat tahsa gih dan, haemoglobin, blood pressure phatna apeh’a chule Hepatitis B leh C, Syphilis, HIV/AIDS leh Malaria status man beiya hetna jong ahi. Clinic’a test ibol leh sum tamtah kisumang ahi, tin aseibe’e.

Thisan peh jing hin nat lentah tah- heart disease hojong aveng theiye, tin aseiyin chule khangthah thisan pe ho chung’a kipathu jong aseiyin ahi. Agom’a numei 5 leh pasal 20 in thisan ape uvin ahi.

Indo-Bhutan dialogue toh kimat’a Royal Bhutanese Government FEEDs/KVK Hengbung vilna hung nei

Kaybie Chongloi,

Kangpokpi, Mar.30: Indo-Bhutan dialogue toh kimat’a akhatvei channa ding in Royal Bhutanese government delegate mi 13 in Kangpokpi district sung’a um FEEDS/KVK Hengbung vilna ahung neiyun ahi.

Bhutanese government delegate ho chu jannia Imphal khopi hunglhung uva chule tuni’a kipatna chu Study le exposure trip a FEEDS/KVK Hengbung a ana pansau ahitan chule delegate member hohi jing nikho chan um nalai diu ahi.

Royal Bhutanese government delegate 13 ho chu Dasho Pema Chawang, Secretary, National Land and Commission Service, Royal Government of Bhutan in ahin lamkai’u ahin chule amaho vailhun nakin chu delegate hon ORDC le EMRC Field visit achaijou uvin FEEDS (Foundation for Environment and Economic Development Service), Hengbung in anabol in ahi. FEEDS Hengbung hi Krishi Vigyan Kendra (KVK) ding’a host institute khat ahinaban’a Centre for Orchid Gene Conservation of Eastern Himalayan Region (ORDC) le North East Centre for Ethno Medical Research Centre (EMRC) Centre jong ahi. Delegate ho vailhun nakin’a chun Vijay Chihber, Retd. IAS, former Secretary, Govt. of India, Haokholet Kipgen, President, FEEDS, Dr. HB. Singh, Scientist, Dept. of Science and Technology, Ministry of Science and Technology le Dr. Rao, Director, ORDC  le FEEDS/KVK staff ho jong anajao uvin ahi.

FEEDS le District Administration Senapati district in delegate member 13 ho chu traditional muffler khatcheh ana o-peh uvin chule delegate member ho chu tradition dress in akivonsah uvin chule ana jempah thet uvin ahi.

Vijay Chhihber in kin-guon a ahoulim na a chun; Leiset chung’a Negative Carbon Footprint nei umusn ahin chule hitobang hi Manipur a jong umthei ahin, mipin Bhutanese ho fashion le idea tobang anei nah’u le ati in ahi.

Bhutan delegate hon FEEDS/KVK Hengbung ahungvil nau chung’a kipathu aphon naban’a Haokholet Kipgen in Hengbung mun’a hitobang Centre hinpodoh Haokholet apachat nathu jong Chihber in ahoulimna a chun aseiyin ahi. Bhutanese delegate ho hi jing nilhah langle Hengbung dalha a agam’u jondia kipatdoh kit diu ahitai.

Nungah chapang khat phone a photo leh thucheng melsetah ho thot jeh’a pasal khat kiman

Thoubal Mar. 30: Numei chapang khat phone a photo melse ho anathot pasal khat tuni (Mar. 30) chun Thoubal Police in Imphal West Cyber Crime Unit hotoh kithon anaholdoh uvin anaman tauve.

Akimandoh pa chu Thoubal Police station hopsung’a um Icham Khunou Makha Leikai a kipat Heisnam Suresh Singh (29) s/o H. Biren ahi.

Heishnam Suresh in nungah chapang nu phone a tulha nisim 25 nilhah lang’a photo vetset tah holeh thucheng melse tah ho anathot chungchang chu nungah chapang nu chun police ho hengah anaseidoh in ahi. Hiche dungjui a chu Thoubal Police hon Imphal West Cyber Crime Unit hetsahna aneikit uvin hichepa holna kin chu anapat u ahitai. Information amudungjui u chun Thoubal Police Station OC RK Tejbir, SIS. Robert leh SI M. Minabanda ho lamkaina team in tulha nisim 28 nikho nilhah lang vel’a Imphal Wahengbam Leikai a sana kisemna mun’a kon’a Heishnam Suresh chu anamatdoh u ahi.

Thoubal Police in Heishnam Suresh chungah IT Act noiyin case khat ajihlut uvin Thoubal CJM Heishnam Suresh hi nikho 7 songkul tang ding’in thupeh aneitan ahi. Nungah chapangnu henga anathot photo holeh thucheng hojong amathot mama ahinai ti hetchien ahitai.

Ni 6 chelha ding MIFF Award winning Film festival kipanta

Imphal, Mar. 30(DIPR): Ni 6 sung chelha ding MIFF(Mumbai International Film Festival) award winning films festival chu tunin State Information Centre, Palace Gate, Imphal a anakipan tan ahi.

Hiche festival hi Films Division, Ministry of Information & Broadcasting, Government of India, Department of Information & Public Relations, Government of Manipur, Manipur State Film Development Society le Film Society of Manipur ho gonna noiya chelha ahin chule tuni’a film festival chu National Filmfare awardee for Best Critic anamu R. K Bidu in hondohna ana neiyin ahi.

 Tuni’a Film Festival a chun international changei a minphao English documentary film The Immortals , Ingo Putze’s Solo Finale (USA) le Snigdha Banerjee’s Nuptial Memoirs ho chu mipi vetdin screened ana kibol in ahi.

Polish film “The Queen of Silence” chu jing nikho le screened kibol ding ahin chule film maker Borun Thokchom in hiche film chung chang hilchetna jong aneiding ahi. Hiche film hi kum 10 a upa Denisa thusim kitho ahi. DIPR Director Meghachandra Kongba jong tuni kin’a chun anajaovin ahi.

Army hon ganja 96 kg man; medical camp bol-u

Imphal, March 30: Achesa nithum sung’a Indian Army hon gamsung’a khamna thei jeh’a boina suhtheng nading leh angaicha ho kithopina anei uvin ahi.

PRO Defence diary dungjuiya achesa March nisim 27 nikhon Jwalamukhi Battalion, Senapati Brigade in Red Shield Division lamkaina noiyin Mobile Vehicle Check Post, Ekou Baxar, Comapny Operation Base Saikul’a gari ho kholna anei uvin Maruti 800 Gypsy gari no AS-01N 0255 ‘a konin ganja 96kg aman uvin ahi. Akiman hohi Thonglal Khongsai (gari neipa) (45), s/o Jangkhohen Khongsai leh Amang Khongsai (62), s/o Lenghao Khongsai, T Sumjang kho’a cheng ahi’in, akiman teni, gari leh akiman thil ho Saikul Police station’a FIR akijihlut jou March nisim 28 nikhon apedoh tauvin ahi.

March nisim 28 nikhon Maram Battalion, Senapati Brigade in Red Shield Division lamkaina noiyin Koide kho, Senapati district’a Medical Camp abol uvin, Senior Medical Office leh Maram Battalion in agon camp’a thenna leh damtheina thu in houlimna anei uvin ahi. Agom’a mi 159 in pan ala in, akijen uvin, lou-leh-ai jong man beiyin ape uvin ahi. Khosung mihon Maram battalion chung’a kipathu asei uvin ahi.

Hiche nikho ma ma in Noney Battalion in Loktak Bridge, Red Shield Division lamkaina in Bakuwa kho’a ‘hygiene and sanitation drives’ abol uvin ahi. Khosung leh akimvel thengtah’a akoi diuvin khosung miho thuhilna aneiyun, khosung mihon jong kipathu asei uvin ahi.

Government office ho’a mobile phone kipolut thei tading

Imphal, Mar. 30: Secretariat leh Directorate office panna’a government office ho’a che’a (visitor) milham hon mobile phone apohlut theilou diuva dan kikoi hi Home Department, Manipur sorkar in thuso aneiyin aladoh tan ahi.

Additional Chief Secretary (Home), Manipur government, Dr Suresh Babu in thuso aneina’a chun visitor hon phone achoi theilou ding’a ‘ban’ akilahdoh hi Anti Corruption Cell no. 9402150000’a visitor hon hehna asem thei nadiu ahi, ati. State Home Department in Secretariat leh Directorate office panna’a government office ho’a office hour sung’a phone achoi diu aphal poi, ti ahetdoh jouva thuso aneiyu ahi.

“Visitor hon hehna asemthei nading’a visitor jousen Secretariat leh Directorate office panna’a office jouse’a thupeh aumkit kahse’a mobile phone akichoi theidiu ahitai”, tia Home department in thuso anei ahi.

AMWJU in CM Biren kimupi; thumna phabep neiyu

Imphal, Mar. 30: All Manipur Working Journalists Union (AMWJU) hon Thursday nikhon Chief Minister N Biren akimupi uvin, point 11 panna thumna apelut uvin ahi.

President Wangkhemcha Shamjai, Vice president Asem Bhakta, General Secretary Jit Ningomba, Advisor N Tombiraj leh Standing Committee member phabep panna AMWJU thalheng hon CM akimupi uva thumna apehlut holah’a Press Academy, journalist ho ding’a Housing colony, Thangmeiband Cheiraoching mun’a Journalist memorial complex kisah ding, Moreh, Jiribam leh Mao’a branch office sem nading gam leiset apeh diu, tosetna thilsoh’a thi journalist ho leh akitongkha ho dangka lakh 5 leh lakh 5 ex-gratia leh compensation peh na ding, journalist ho ding’a medical aids leh ‘family benefit scheme’, Manipur Press Club maintenance ding’a kipe dangka lakh 2 lakh 3’a kalsah ding, Nagaland gam’a kichepi bang’a lha’a journalist (accredited) ho dangka 3000 apeh ding, Imphal- Myanmar-Bangkok external tour journalist ho ding’a bol ding, Journalist pension scheme dangka sang-li’a kon 6,000 ‘a kalsah ding chule widow’s pension 2000 ‘a kon 4000 ‘a kalsah ding thu jong apang in ahi.

Thumna kipe hohi cabinet level’a kiseikhom ding chule anatoh’a vetsah nading’a pan kila ding ahi, tin CM in thuso miho heng’a aseiyin chule journalist hon sorkar dem jeng masat sang’a system semphat nading leh khantou nading lampi joh apohdoh diuvin temna aneibe in ahi.

Chief Minister in nehguh doudal nading’a sorkar in pan alah na chom chom- government office sung’a mobile phone kipolut thei tading, thinglhang leh phaicham’a lamlen se lai semphat ding, district headquarter jouse’a Ima keithel sah ding chule fund pehdoh ding’a tohgon anei ho thu aseiyin ahi. Chule National Sports University ahi’in, JAC Churachandpur in jong donbutna anei ho aphatna lam in ache’e, tin CM in aseibe in ahi.

ISIS ho India le Bangladesh kah’a avale theilouna ding’uva BSF le BBG in pan lakhom

Shillong, Mar. 30: Bangladesh Sylhet District a ISIS hon natoh akibe jing tolhon in  Border Security Force (BSF) le Bangladesh Border Guards (BBG) in ISIS ho gamteni kikah’a avale theilouna ding in gamgi’a khoutah in vetchilna aneijing lhon in ahi.

“ISIS ho hi thuphalou samphong le ahi’uvin, amaho hin asei sei aboljeng’u  ahijeh’a mipi aki chihthei ngai ahi” tin Inspector General of BSF, Meghalaya Frontier, PK Dubey in aseiye. Aman aseidan in ISIS ho’n International border ahin pal galkailouna ding’uvin BSF toh BBG in na akitongkhom’e ati.

Hetthei khat chu March nisim 17 nikho’a chun Rapid Action Battalion ho umna  Ashkona Camp a ISIS activist khat in suicide bombing anabol’a March nisim 24 nikho a jong chu ISIS activist khat in Dhaka huikong ngahmun kom’a um Uttara Police box a suicide bombing ana bol kit  ahi.

Dubey in aseidan in BSF  hin gamgi khoutah in vetkolna akineijing’e ati. Bangladesh in  ISIS hou doudalna’a na atoh ho jong aseipha in ahi.

March nisim 24 thilsoh jou chun army, police le RAB in  Shibbari a um Jama’atul Mujahedeen Bangladesh (JMB) ho butsatna mun ana luonkhum’uvin ahi. March nisim 26 gei chun ISIS ho khut’a milham gu le policemen  ni ana molliem in ahi.

Supreme court in thupeh anei dungjuiya border fence umnalou mun ho BSF in avetkol ding chuleh mihem lutna theilou mun ho’a technology mangcha’a gamgi kivekol ding ahi tin Dubey in aseiye.

President Pranab Mukherjee in  jing nikho le river festival masapen hondohna neiding

Guwahati, Mar. 30: India sung’a river festival lenpen Namami Brahmaputra Festival ahunglhung ding Friday nile President Pranab Mukherjee in Guwahati ‘a hondohna aneiding ahi.  River festival kiman na ding’a hi Assam sung a kiguotna achesa nikho nga sung’a ana chelha jing ahi.

President khouljin ding ahitolhon in Guwahati sung a security khoutah achelha pantan ahi.Hiche kumhei hi April nisim 4 nile khumkha hiding ahi. Government official khat in aseidan in April nisim 2 nikho le hin Tibeten hou lamkai Dalai Lama in pan ahunglah ding ahi. Chuleh Baba Ramdev in jong closing ceremony a pan alahding ahi.

Kinguon a hi Union Minister Nitin Gadkari, Uma Bharati, Mahesh Sarma chuleh VVIP 40 vel in pan alah ding’u ahi. Kingon sung a hi gamkai sung a cheng mipi hon a chondan’u, kichep golseh aneiho’u, arts, craft, skill industry, tourism chuleh neh le chah aboldan ho’u avetsah ding’u ahi.

Assam: Golap Rabha  in Mr.India 2017 title kisanta

Guwahati, Mar. 30: March nisim 25 -26  sung’a  Ludhiana, Punjab a anachelha Mr.India 2017 kitetna’a chun Assam  mi Rabha in 80 Kg weight category a Mr.India title akisan in ahi.

Mr. India 2017 kitetna chu World Amateur Body Building Association (WABBA) in Punjab Body Building Sports and Welfare Committee toh kitho’a aguon ahi. Rabha hin Mr.India title akisan masang’a chu Mr.Assam, Mr.Eastern India , Mr Luit title chuleh title tampi anasan ahitai.

Tangkhul haosa hon CM pon silpeh’u

Imphal, Mar. 30, 2017: Tuni chun Tangkhul kho haosa somle ni in Tangkhul Naga Wungnao Long, Ukhrul min in Chief Minister Nongthombam Biren Singh ana kimupi’uvin Tangkhul pon khat ana silpeh’uvin ahi.

Tangkhul Naga Wungnao Long President Sweeten Raihing in Chief Minister tohphat ho le pontho tah’a mipi ding’a na atohna ho chung’a akithang’at pina thu aphongdoh in ahi.  Chuleh gamsung a cheng mijouse ding’a khantou machalna ahinpohlut ding akinepna jong aphongdoh’e.

Chief Minister Nongthombam Biren in jong gamsung a cheng thinglhang miho le phaicham miho kah’a kingailutna avel’a ahung um kitna ding’a Tangkhul Naga Wungnao Long in pan alah ding temna aneiyin ahi.  Pathen in keima hi Manipur sung a khantouna le chamna polut ding’a ngansena einei ahi tin jong aseiye.

Chief  Minister in ahoulimna ‘a aseidan in  sorkar thah hin cabinet meeting anei tengle hill district headquarter ho’a abolji  ding ahi ati. Minister ho, Secretary ho, Director ho chuleh Engineer ho jong thinglhang miho ding’a khantou na natoh ho velha ding’a thinglhang gamho’a kisol ding ahi.  Scheme chom chom kibolho’a beneficiary dingho lhendoh ahiteng le government in a’in mun cheh’uva gakithahlut ding ahi tin aseiye. Thinglhang gamsung a damlou ho agangtheipen’a hospital a pohlut ahitheina ding’a helicopter kimangcha ding ahi tin jong aseiye. Thinglhang gam’a chengho hi dum (tobacco) mangcha ahijeh’u le thing’a bu le me kihon nalai ahijeh’uva Cancer natna bailamtah’a aneitheiyu ahi’n, hiche tolhon in Centre in Manipur sung a lupna 100 nei Cancer hospital khat semdoh ding tohguon jong aneiye. State government in hiche cacner hospital hi thinglhang gam’a koi ding tohguon kinei ahi tin jong aseiye.

Centre in hill district jouse’a numei ho kailhang semdoh ding tohgon aneiyin chuleh district headquarter le sub-divisional head quarter jouse a mass lighting system koiding tohguon jong aneiye. Thinglhang gam’a jong kolphemeivah kisuhtah aum theina ding’a prepaid system kipolut ding ahi .  Thinglhang gam’a chengho gelkhohna in sorkar in Housing Scheme jong akibol’e tin Biren in aseiyin ahi.

Assam Rifles hon Yaoshang Sports bol u

Imphal, Mar. 30: 5 JAK Rif, 45 Assam Rifles, 6 Assam Rifles, 2 Assam Rifles, hon Imphal East, Imphal West, Thoubal, Kangpokpi le Bishenpur Districts ho a ni 10 chelha Yaoshang sports anabol uvin ahi. Hiche sports chu 9 Sector Assam Rifles ho organised bolna noiya kibol ahi. Sports achun Volleyball, Football, Tug of War, Kilhai tet ho ana kibol in chule Thabal Chongba jong Manipur jat le nam chom chom lah a 9 Sector Assam Rifles ho mopoh nan akibol in ahi. Sports Club, Khosung vaipo chule lamkai hon Assam Rifles hon hitobang a chapang hole khangthah te sports lamma pan alasah nao chunga apachat naole akipna nao anaphong uvin ahi.

the units of 9 Sector Assam Rifles under the aegis of HQ IGAR(South) celebrated Yaoshang with locals of different localities in Imphal East, Imphal West, Thoubal, Kangpokpi&Bishenpur districts. The ten days long ‘Yaoshang Sports Festival’ was organised by 9 Sector Assam Rifles to celebrate the spirit of sportsmanship and festival fervor in the State.

Thusoh Lahchom

Kpi Pvt. Centre akon Hetsah

Achesa March nisim 17 ni’a Kangpokpi Private Centre (KT Hr. Sec School) a HSLC Exam kibolna a External le Regular candidate ho Question ana kibah khah jeh’a ana kinungsolla chule ahunglhung ding April nisim 4 le nahung thahbol diu ahi tia ana kiseipih chu BOSEM in April nisim 1 ni ding joh’a fixed ahin boltah toh kilhon’a, hiche ni’a ana kinungsol external le regular candidate jousen April 1 ni le exam nahung boldiu ahi tin Demkhosei Haokip, MES, Officer in-charge Kangpokpi Pvt. Centre HSLC Exam-2017 in hetsahna ahin neiyin ahi.

53rd KNT

Ahung lhung ding Dt.31 march to 1-2 April chan nampi taokhom na umkit ding ahitah jeh in,muntin a um nam mite jouse,Nampi adinga taokhom ding in pakai min in kahin tem uve. Amun L.Phaimol CCpur Dist. Lamhil: Lamka singat parking a gari umding,kijah mat nading no. 8974955912 (Chairman KNT)

Bomb pohkeh

Thongju Assembly constituency ‘a MLA anahi Bijoy Koijam inmun Thongju Part 2 Pheija Leitong mun’a Wednesday jan nidan 10.30 don in bomb hattah apohkeh in ahi. Thilsoh’a akitongkha aumpon, ahin, inmun gate maiya kikoi street lamp, tube light leh window glass ho ase in ahi. Police hon bomb hi IED hatlou ahi, tin aseiyun, tuchan in koiman kiphonna aneihih laiye. Bomb kisuhpoh gamkai numei hon demna aneiyun, Pheja Leiton Community Hall’a toumun kiphinna abol uvin ahi. Ipijeh’a kibulu ahi, ti hilchenna apeh uva chule khonung’a mi chenna mun’a hitobang abol louna diuvin kiphinna bol hon thumna anei uvin ahi.

AR

Thanglhang gamho khantou na dinga Assam Rifles hon pan alah jing uto kilhong in 10 Sector Assam Rifles HQ IGAR (South) noiya 31 Assam Rifles hon Grihang, Kamjong District chu Solar Street Lights 5 anapeuvin ahi. Hiche hi Assam Rifles Civic Action Programme noiya kibol ahi. Border area ho a Solar Street Light kihom hin thil-le-lo a khantou nakeu hilouva Assam Rifles hole mipi kikah a kingailut na akhantou sah a “Friends of the Manipur” kiti hi aphot chet ahi. Hiche khosung mite hin hitobang light hi niseh kiman chah na a angaichat u thil khat ahi. Khosung miten 31 Assam Rifles hon hitobang natoh anei nao chunga pachatna nale kipathu nasatah in aseiyun ahi.

JAC

PMEGP, 2016-17  noiya Chandel District sung a KVIB/KVIC/DIC beneficiary kilhengdoh ho lah’a SBI, Headquarter Chandel, SBI Kangsang, SBI  Chakpikarong  le SBI Moreh in sponsor abolho  Regional Business Office (RBO), SBI, Imphal  in fund sanction abolna pehlou na chung a Joint Action Committee (JAC)  Selected Beneficiary 2016-17 in alungkimlouna aphongdoh in ahi. Industry Department le State Bank of India in beneficiary ho chung’a thildoh lou abol hi sangtah in demna akineiye tin JAC a kon kimu thulhut in aseiye.  Concerned Bank hon hiche thu hi nikho thum kah’a asuhchetlouva ahileh  kiphinna jat chom chom kibolding ahi tin JAC a kon kimu thulhut chun gihna aneiyin ahi.

Editorial

 

Leng khat jana kipe Politics

                              Mi bolkhahlou khat bol kiti hi apha le tonna (phatchomna) di ahileh abolpa/abolho dia bou phatchomna le tonna hilouva midang injong aphatchompi le akipapi ahi. Manipur Chief Minister (CM) N Biren in hitih chan koiman ana khohsahlou Manipur lengpa jana vetsahna’a avengtupdi ‘security guard’ (sepai) ahinpeh hi lengpa jong kipahdi, meilhei nam pumpi injong apachat leh pha asah khat hidi ahi. Meilhei lengpa security kipeh jeh-a state govt sum haleu jepdi jong hilou ahi. Chuleh meilhei lengpa hi engset jeh-a athatdi kigoloi umjeh a security kipe jong hilou, amin maimai hijongleh leng khat ahinajal’a jana achandidol chansahdi ti hi ahipen’e. India Independence jou leh Manipur Statehood mu jouva pat meilhei leng kiti hi akisumang tobang ahitan, hinlah nam khat chonna leh leng’a kivaipote leh leng neite nam khat hina’a ‘power’ neitahih jongleh amin beh-a leng hina hi tuni geiya meilhei ten ahinchepiu ahi. Tulai Democracy khang’a hi Manipur CM hung hidoh doh chu Manipur leng hijeng tobang ahi. Leng kiti hi mithei hen mimoleh apa akon acha in leng hina akilahson ahi. Manipur CM N Biren nin Manipur lengpa hina leh dinmun ahingeldoh-a jana pehthei tah ahi atina a chun English te leh Japan te tekahna jong aneiye. British (English) le Japan te jong tulai Democracy kivaipohna dungjuiya lamkai le thunei kilhenna’a thunei vaipo jong kilhen tho’a khel jong kikhel jing, ahia aleng teu chu leng’a chuti um uva mipi (nampi) injong jana sangtah apeh jing u ahi. Ahin English leng te hi amin maimai hilouhel, tuni geiya leng chate (Royal family) hon masanglaiya lengte galsat lamkaiya apan jiu bang’a ‘military Training’ ho kisan achamlouva abolsah u , adang dang mopohna jong tamtah anei u ahi.

                        Manipur leng kiti vang hi meilhei ho tahbah injong ichan ham’a hetphah a akoilou u tithei ahi. Meilhei te jeng’in jong jana peh-a athu themkhat beh lahdi’a agel behlou lengpa chu 2011 kum lang’a Sadar Hills District thua kiphinna khucheng umlai chun Sadar Hills District Demand Committee (SHDDC) President anahi Milun Ngamkhohao Haokip in Manipur lengpa jana vetsahna’a Sadar Hills thu agalhut chun meilhei lekhathem khat le ni’n thinglhang gam geiya aneipa hi Manipur leng te ahijeh-a akom’a district gathum dan’in anaseilo (lekha jih) uve. SHDDC lamkaipu chun hiche gaki bolleh meilhei te panpina umjep diham anati jong hithei ahi. Chutah sang’in meilhei lekha kithepsah loi khat nin nuoisena neina joh in anamang go uve.  Lengpa’n jong “hiche (Sadar Hills) thu ah ken ima tha kaneipoi ahin seithei thei seinang’e ” ti’n SHDDC President-pu anadonbut nin akiseiye. Hitobang amatah jong ima boltheiya kigel lou, meilhei te jeng injong agel thupi beh tahlou u lengpa hi N Biren govt nin ahin dopsang got hi ‘politics’ khat lut jong himaithei di ahi. Ipi hileh N Biren govt hi akipat til ahijeh hitam, amati, a-Minister/Parliamentary Secretary hoti thanom tah in alhaile pai jeng’un govt masa ho bollou-lou boldi ti abang jeng uve.

Blankfire

Iphah joulou ho kidemji ahi akitin adem tahbah kidemjoulou hopi hi demdadi hijeng didan hibouvinte. Abang khat chu koiman idemlou manna demthei kihilou jong hipon tin demkham tahbah kisahlou jeh a demna changlou loi jong umteidi ahi.