ET March 30, 2017 News (Local, Regional, Thusoh Lahchom, Editorial, Blankfire)

ET March 30, 2017 News (Local, Regional, Thusoh Lahchom, Editorial, Blankfire)

441
0
SHARE

BJP Saitu Mandal in Central akon fund le scheme ho ahi dingdol’in akimangpoi tia Government ang’a thulhut nei

Kaybie Chongloi,

Kanggui, Mar.29: Central Government akon’a fund le scheme ho ahiding dolin akimang pon, akisuchavai je tin BJP Saitu Mandal in state Government ang’a thulhut aneitan ahi.

Tunia BJP Saitu Mandal office Charhajare, Kangpokpi District a Mandal workers, Mahila le Yuva executive chengtoh toukhomna anei nauva, central a kon fund le scheme chom chom ho ahiding dol’a kimangcha louva akisuh chatvaina chunga giltah in kihoulimna aneijun chule tuchung election’a Mandal ho dinmun velvetna le, memberships thu chule Saitu AC a BJP khantouna ding le machalna ding thu jong aseijun ahi.

Kikhopna a chun Deepesh Sharma, Secretary, BJP Saitu Mandal, Lamminlun Singsit, Secretary Organization, BJP Saitu Mandal Media in-charge, Joujam Kipgen, Saitu Mandal Mahila  Morcha President le Santosh Rizal, BJP Saitu Mandal Yuva President in jong pan alauvin ahi.

Akihou khomnau kikhen’a BJP Saitu Mandal office mun’a thusomi hotoh akihoulimna’a, BJP Saitu Mandal President, Khageshor Sharma in Ningkum 2016 kumbul January nisim 4 jingkah’a Ling in Manipur state ana ho’a asuhset in ho a innei hon athah akisah kitna diuva kithopina sum anapeh chu tuchanin first installment Rs. 25,000/- bou amu nalaijun adang hi kum khat le lhathum chenungin jong amuhih laijun ahi.

Ling ana suhset in nei hohi IAY khat (asum’a Rs.75,000) jaona’a agom’a Rs. 1,76,000/- amudiu dol ahin hilah tuchanin alhingin amupouve.

Hitobanga Ling in anasuh set in ho lah’a ‘Dry Wall Unit’ kiti noija in kisahpeh ding ho jong tuchanin khatcha chenlutna thei aumhih laijin chule atamjo a in foundation jengjong akisem hihlaije chule foundation kisem sun sun jong aban kijomta louvin akinga dentan hinlah hiche insahna dinga Central Government kithopinan sum anapeh ho akiladoh sohtai tin Khageshor Sharma in aseije.

Hitia Central Government kithopinan apeh sum le pai ho nehguh chahguh’a ahiding dol’a kimangcha louhin Ling in ana suhset in nei ho seitheilou gentheina abelap peh in, lungmong lhamonga chenna ding in neilouvin lunglengvai tah in hinkho amangun, neh le chah a agenthei seh’u hitalouvin chenna kitup aneitah loujeh’un achateu nat le sat jatchom chom in aphan seitheilou khop hel’in hahsatna atoh tauvin ahi tinjong aseibei.

Hiche chungchonin jong Central akon’a japi phatchomna dinga kipe AAY noija anchang ho jong mipi kom ahiding bangin alhungtapon, adeh’a Charhajare lhanga dinga AAY noija Anchang 112 Package muding lah’a Lha 9(Ko) sunga package 1 jong akimupon, chule PDS noija Kerosene jong kum 5 sungin 2(ni) vei sehseh akihom’in akhohdeh set’in Chini hi kum 5 sunga khatvei jong akihom khapoi ati.

MGNREGS noija kum khat sunga ni 100 natohna ding kipelah in jong Saitu area in ni 20 tobang bou amun adang ni 80 natohna hi hoilang gei ham akihetapoi tin BJP Saitu Mandal President pan aseijin ahi.

Hitia central fund le scheme ho ahiding banga akimancheh tahlou jeh in mipi adeh’a genthei dehset hodin Government umlou tobangin akilang tan, hijehchun tua BJP makaina’a coalition Government in hitobang japi boina le gentheina hi agangtheipen’a avetsui ding akul’e ati.

Mipi tahsan le kinepna N. Biren lamkaina noija BJP Government in adeh’a Ling in hetsoh gentheina anapeh na chungchon’a nehguh chahguh bol’a Central in kithopinan ahinpeh kisuh chatvaipeh jeh’a seitheilou hahsatna toh miho ahin gelkhoh’a agentheinau akon agangtheipen’a akiledoh sah diuvin temna sangtah akineije tinjong Khageshor Sharma in aseibei.

Central Government in mipi chanvou diu kithopinan le adang thilphachom ahinpe ho hitia suchavaija nehguh chahguh’a kimangcha ho jong kineppi umtah N.Biren Singh makaina Government in gangtah in akholdoh’a alamhil diuva achandiu lom gotna apeh din ngehna jong aneijin chule tunung tuban le hitobanga mipi chanvou ding ho ahiding bangtah in japi kom alhingsetna alhun theina dia Manipur Government thah hin pan alahdin temna jong aneijin ahi.

TSP project beneficiary ho’a ding’a Training um

Lien. S Gangte

Ccpur, Mar. 30: Central Agriculture University, Imphal gonna noiyah 29th March, 2017 nikho chun nikhat dai ding Central Agriculture University (CAU), Imphal gonna in Tribal Sub-Plan (TSP) Project Govt. of India noiyah “Cultivation of Fields Crops (Cereals & Pulses)” training S. Khonomphai kho’ah aum in ahi.

Hiche training ahin, Resource persons in Professor Ph. Ranjit Sharma, Head, Dept. of Genetics & Plant Breeding, CAU, Imphal; Dr. Kh. Ibohal Singh, Associate Professor Dept. of Entomology, CAU, Imphal; Dr. Jamkhogin Lhungdim, Asst. Professor, Dept. of Agronomy, CAU, Imphal ho apang uvin ahi. Chuleh, Loubol mi 15 ho’a ding Anchang (Seeds of Cauri Rice) 60kg ape uvin ahi. Govt. of India in loubol mi ho chuleh thinglhang mi ho dopkang na ding in “Enhancing Socio Economic Status and Livelihood of Neh States through Agricultural Intervention” ti thupi ah Tribal Sub-Plan (TSP) Project agong in ahi. Hiche TSP Project noi a hi India Govt. in beneficiary ho panpi na jat chom chom tichu Poultry, Fishery, Horticulture, Mushroom, Field Crops, Animal leh Post Harvest Technology ho kithopi na apeh ahi. Amasapen’a ding in Ccpur District sung ah TSP Project hamphat na muding kho 5 lhen doh in aum in, S. Khonomphai, Janglenphai, Tuijang, Chullouphai leh Ujungmakhong ho ahi. Chuleh, 30th March, 2017 nikho leh Horticulture toh kisai’ah Janglenphai a Training umkit ding ahi.

ULFA(I) in kholjin ding Dalai Lama thuhilna nei, China adem louding’a seiyu

Guwahati, Mar 29 (Zeenews): United Liberation Front of Assam (Independent) in Assam leh Arunchal Pradesh gam’a April nisim 1 nikholeh hung kholjin ding Tibetan hou lamkai Dalai Lama thuhilna ape uvin ahi.

Dalai Lama in China chung’a India lungput tilkhouna’a Assam gam leiset thu aman lou ding’in ULFA(I) in Dalai Lama thuhilna ape uvin ahi. ULFA (I) chairman Abhizeet ‘Asom’ Barman in Dalai Lama e-mail athot na’a chun, “Assam gam’a nahung tahbeh ding’a ahileh China douna thu nasei louding ahi. India ngaidan hi Assam  leiset’a kon akitilkhou ding kathoh jou loudiu ahi”, ati. E-mail hi thuso chom chom’a athot-u ahi.

China gam hi kiloipi pha ahijing’e, tin ULFA(I) in aseiyin chule China leh Assam gam kiloikhomna hi thuhtah ahi, ati. Dalai Lama hi April nisim khat nikho leh Namami Brahmaputra festival’a pang ding, Tawang, Arunachal Pradesh gam’a cheding ahi. China in adoudal nung’a Dalai Lama Tawang’a kholjin tei ding’a akigot hi chihna ahipon, gelkhohna kaneiyui, tin ULFA(I) chairman in aseibe in ahi.

Hetthei khat chu ULFA(i) lamkai Paresh Baruah hi China gam’a kisel hiding’a ginmo ahi’in, Assam amachang akivaihom theina (sovereignty) ding’a Asia gam hon atosot diuva thumna jong anei ahi.

Baruah kiselna mun hi Ruili town, Dehong prefecture, China gamsung Yunan province ahi, tia security official hon thuso’a ana seiyu ahi.

Jiribam, Ukhrul leh Kpi district a AYUSH Hospital sahna ding’a AYUSH Director in temna nei

Imphal, Mar. 29: Dr. L. Lokendro Singh, Director AYUSH in Jiribam, Ukhrul leh Kangpokpi district ho’a AYUSH Hospital sahna ding’in Commissioner (Health, FW & AYUSH) Government of Manipur hengah lekhathot khat anabol in hiche a chun thingna louna a kon’a kisemdoh AYUSH lou-le-ai hohi World Health Organization (WHO) sei dungjui in leiset mihem 80% tobang in kingaina a aneiyu ahi ati.

Achesa 2016-17 State Annual Action Plan (SAAP) submit anakibolna ah Government of India in, Ministry of AYUSH in Churachandpur leh Chandel district teni’a lupna 50 ket AYUSH Hospital sahna ding’in phatsahna ananeiyin chule hiche building teni jong tulai akisah laitah ahi ati.

Chule Government of India guideline dungjui a Ministry of AYUSH in Manipur state sung district jouse’a lupna 50 ket AYUSH Hospital khatchieh koiding’in anaseiyin ahi. Tuhin Manipur ah district 16 aumtan ahin AYUSH Hospital 3 bou tichu Imphal West sehbou hin na atong’in Churachandpur leh Chandel district a ding’a building akisah laitah ahi.

Hijeh chun Administrative Department hengah Jiribam, Ukhrul leh Kangpokpi district sung ho’a gambeh 2 acre tobang lupna 50 ket AYUSH Hospital sahna ding’a akinthei pen’a phalna ahinpeh ding’in ngehna aneiyin ahi. Hiche hi April lha leh Government of India, Ministry of AYUSH in Annual Action Plan 2017-18 heng’a report apehlut masang’a natoh pat tei ding’in jong temna aneikit in ahi.

Hichetoh kilhon chun District Administration, KPI in district sung’a public leader, Chiefs/Chairmen, District Council a Chairman leh adang dang ho hengah Kangpokpi District HQ a lupna 50 ket AYUSH Hospital sahna ding’a gambeh acre 2 ahin phatsah diuvin temna aneiyin ahi.

India-Myanmar gamgi’a um temple khat kibulu; CSO hon demna neiyu

Imphal, Mar. 29: India gam hopsung India-Myanmar International Border’s um Hindu temple khat tuni (Mar. 29) chun anakibulu in, gamkaiya cheng holeh official hon alungkhampi uvin ahi.

North East’a ding’a temple lenpen lah’a anichanna chule Shiva temple tia kihe minthang hi jingkah nidan 8:45 don’a remote control bomb’a kibulu ahi tin police hon aseiyun, thilso’a akitongkha aumpoi. Temple hi kum 18 masang’a Tamil Sangam Moreh in hondohna ananei ahin, Moreh town’a hi Hindu, Muslim leh Christian chengkhom ahi. Bomb kisupoh jouvin 11 Assam Rifles leh local police hon thilsona mun adel lut uvin ahi.

Electric bulb, twi tanki, window glass leh temple mun phabep ase’e tin temple’s natong Brahmin attendant khat in aseiyin, chule temple ho heng’a sum kithumna dinmun aumpoi tin aseibei in ahi. Gamgi’a police hon security akhousah ahitai. Sunday nikho’a jong Myanmar gam hopsung Nepali temple kom’a bomb pohkeh ahi. Temple hi Namphalong International Market’a kon metre 500 vel’a gamla ahin ipijeh’a temple kibulu ham tijong kahe pouve tin temple vaipo hon asei uvin ahi.

Moreh a pansa milham kiloihom ho- Kuki Student’s Organisation , Hill Tribal Council, Kuki Women  Union & Human Rights,  Moreh Youth Club  chule  Gamnom Veng Administrative Committee in Gamnom veng Moreh, HTC Unit-V a bomb pokehna thilsoh chu sangtah in demna anei’uve.thilsoh a chun mi thum athi in , amaho lah’a khat chu numei ahi. Athiho chu Muanching Zou W/O Manglamthang Zou, Gamnom Veng, Moreh, Manish Karam (Pol-IX simlai) chuleh Lalremui Mizo (Pol-VIII simlai) ahi’uve.

Kiloikhom aseidan un mipi kititna mun le themvetna (cl-X le XII) chelhah laitah’a bomb kisu poh hi mi meidoi ho le gamsung ngailu ho natoh ahi tin  kiloikhom ho chun asei’uve. Chuleh hitobang chonvalna  neiho’n athilbol/anatoh ho’u chungthu agangtheipen’a asuhchet diuvin kiloikhom hon ngehna anei’uve. Hiche chungchang thu hin Hill Tribal Council MD Mate, Acting President in sangtah in demna aneiyin ahi.

TML Dist. Magistrate in hetsah thuphon bol

Tamenglong, Mar. 29: Assembly election boina umlouva achelhah theina ding’a licensed thal neihon akinaipi pen police station a apehlut diuva thupeh ana um chu  election akichaitah jeh in lahdoh ahitai. Hitolhon’a  District magistrate in January nisim 4, January nisim 19 chuleh February nisim 1 ni’a thupeh anei dungjuiya  police station a license thal pelut hon akile lahthei ding’u ahitai tin District Magistrate Tamenglong B.John Tiangtinkhuma a kon kimu thulhut in aseiye.

Thaopo gari 1 meiyin akah jeh’a mithum thi

 Guwahati, Mar. 29:  Wednesday ni jingkahlam chun Jakhalabandha, Assam a thaopo gari khat in toset anatoh in ahi. Thilsoh a chun numei khat panna in mithum in ahinkho achan’uvin ahi. Amun’a um hon aseidan un thaopo gari chu Upper Assam a kon Guwahati juon a lhai ahi’n, Baghjaan aphah’a driver pan steering atuhjoulou jeh a kibung ahi.

Toset atojou’a thaopo gari chu meiyin ahinkah kit jeh’a asung a tou mithum in ahikho achanlo’u ahi tin top police official khat in aseiye. Meika chun avel’a um Inn ni le gari ni akavam in ahi. Fire tender ho le police official hon thilsona mun chu adellut’uvin mei phalmit na ding in pan ala’uvin ahi.

Indigo ‘FitToFly’ gym Nagaland a kihong doh

Dimapur March 29: Damtheina hinkho man ding deina jeh in Monday nikhon ‘Fit to Fly’ thupi mangchan Indigo Airline in Nagaland police ho man ding  gym anahong’e tin thulhut in aseiye.

Gym hi President chule IndiGo Director Aditya Ghosh in hondoh na ananei ahi.  Gym hondoh na kin sung chun gym hin tahsa tilkhouna keu hilouva, damthei na hinkho a dinga ngaichat khohpen khat ahi chule  adeh in police personal ho hi damthei ding ngai ahi tin police officer khat in aseiye.

Police personal hon damthei na hinkho hi khohsah na nei’a, damthei tah a hinkho aman theina ding uva kigong ahi tin  Ghosh chun aseiye. Hiche hin damthei na apoimo dan hetsah na aneiya police ho lah a damtheina hinkho hi atilkhou ding katah san’e tin jong aseiye.

‘Fit To Fly’ gym a hin machine, treadmill, trainer, bench press chule facilities dang dang jong hung kikoi be ding multi-purpose gym kiso ding ahi tin ana seiye.

Cherrapunjee sung nikhat bouva 48.2 mm go anaju

Shillong, Mar. 29 : India state dang dangho’a nichang satjeh mipi hon nilhumkeiya fan akilhajing lai’uvin Meghalaya sung aum Cherrapunjee sung’a aniseh in go ajujing in ahi. Alhangpi in Sah-solam gamkai sung’a tukaal sung chun go kisuhtah in aju jing in ahi.

Cherrapunjee sung a hin Tuesday ni jingkahlam nidan 8:30 a pat nidan 24 sung chun 48.2 mm guo ana ju in, Mangan a 26.3 mm anaju in, Tadong a 15.8 mm anaju in chuleh Gangtok a 13.6 mm anaju in, Mazbat a 11.4 mm anaju in, Tinsukia a 10 mm anaju in chuleh Jorhat a 8.8 mm anaju in ahi.

2015 kum chun Cherrapunjee sung a nikhat in 471.7 mm go anaju in kum 10 val record ana um asukeh in ahi.

Tu kaal sung a Sah-solam gamkai sung go ajuh jing hi Sub=Himalayan West Bengal le akimvel’a cyclonic circulation umjeh ahi. Skymet Weather in aseidan in Sah-solam gamkai sung a hi phat chomkhat go jujing ding ahi.

Sah-solam gamkai sung’a Bongsa joh le Bongtha kikhah louding ahi: BJP

Imphal, Mar. 29: Kumkit (2018) a assembly election umna ding sah-solam gamkai ho’a bong tha le asa joh kikhahlou ding ahi tin BJP in aseiye. Hetthei khat chu kumkit le Meghalaya, Mizoram chuleh Nagaland a assembly election umding ahi.

Manipur gamsung a BJP-coalition government kisemdoh hi BJP ding’a Sah-solam gamkai sung’a tha kibena khat ahi. Chuleh 2016 kum’a jong chu BJP hin Assam a lolhin na aneiya hiche jouva chu Arunachal Pradesh a jong pachan na sangtah ahin nei ahi.

Nagaland , Meghalaya le Mizoram a hi Bongsa joh ahilou le Bongtha kikhahlou ding ahi. Ajeh chu UP toh Sah-solam state ho hi akibahlouna tampi um ahi. Chuleh Central leader hon jong  Sah-solam state ho chondan , kimanchah dan chuleh neh le chah ho ahet’u ahi tin BJP lamkai khat in aseiye.

Sah-solam gamkai sung a gantha kitihi chondan le khandan khat ahi. Hiche thu’a hin Meghalaya BJP luboh Shibun Lyngdoh in thuso miho heng’a hiti hin ana seiye: UP jeng’a jong lincense neilou slaughterhouse ho bou guotna kipe ahi’n, bongtha vang kikhahlou ahi.  Sorkar hin gankithat ho dandungjui le thengtah a akibolna ding’a pan alah ding in temna kaneiye.

Bru refugee hon Mizoram a hung kile kit ding phalna kipe

Agartala, Mar. 29: Mizoram akon Tripura hunglut Bru refugee ho hi phatchom khat jou’a achenna gamsung uva nung kile kit thei din Supreme Court in Mizoram state government heng a tunin  hetsah na ananei’e tin thulhut in aseiye. Chief Justice J S Khehar chule Justice S K Kaul jaonan Supreme Court in achesa February nisim 6 nikho achu hiche hetsahna anei ahi tai.  Bru refugee tia kisim jouse koi tobang  Tripura akon Mizoram kile nom jouse phalna kipe ding ahi. Chule ahung kile jouse chu achenna ding inn sahna ding angaichat jouse jong kipe ding ahi tin Solicitor General in Court le Union home secretary heng a Joint Meeting Group (JMG) sung chun aseiye. JMG kinei sung chun Mizoram Bru Displaced Peoples Forum in jong pan ahunglan  ahi. Chule refugee ho kile na ding chung a boina ho jouse suhlhap ding Centre, Mizoram government chule Tripura government kitoh a pan alah khom ding ahi.  Bru refugee ahung kile jouse hi compensation Rs  80,000 – Rs 10 lakh cheh kipe ding ahi tin Solicitor General chun aseiye. Thudoh donbutna anei sung chun solicitor general in asei dan in Bru refugee hi insung 5,455 akon mi 32,876 alhing jou’e tin aseiye.

Irrigation department Secretary nehguh jeh a kiman

Guwahati, Mar. 29: Anti-Corruption and Vigilance Wing, Assam Police in Tuesday nikho chun Irrigation department secretary Pujendra Doley chu sumguh neh jeh in ana man in ahi.  Official pa chu Assam Secretariat a kon kiman ahi. Irrigation department official pa hin State government employee khat heng’a ceiling suhthengna ding’a sum athum ahi.  Chuleh amahin file 300 vel akhut’a akoiya clear bolna ding’a sum tampi pi akilahji ahi.

Sah-solam gamkai a Robotic technology mangcha a surgery kibolpan ta ding

Guwahati, Mar. 29: Sah-solam gamkai sung a jong robot in patient ho surgery abolpan ding ahitai tin thulhut kimu  khat in aseiye.  Guwahati, Assam a um Dr.Bhubaneswar Borooah Cancer Institute (BBCI)  hin  tunaicha chun Vattikuti Technologies a kon robot-assisted laparoscopid surgery machine khat acho in, hitolhon’a tu’a pat Robot in mihem tahsa chung’a natnaho jendamna ding’a pan alah pan ding ahitai.

BBCI director Amal Chandra Kataki in aseidan in robotic technology hi natna khat jendamna ding’a specialised technology vang ahipo’n ahinlah operation lolhinna ding le precision umna ding a poimo tah khat ahi ati.

Monday nikho chun Machine kikhutlhehna kinguon khat jong ana chelha in, kinguona chun Assam le Sah-solam gamkai mun chom chom’a kon surgeon 200 vel in pan ala’uvin ahi.

“India sung a hin tutu hin robitic surgery machine 46 aum’e. Assam toh kinaipen’a um robotic surgery machine chu Calcutta Apollo Gleneagles Hospital a um khu ahi. Sah-solam gamkai sung’a jong hitobang technology ho pohlut ding apoimo’e” tin Vattikutti Technology luboh Sanjay Mehrotra in kinguon a chun aseiye.

Zoom Air in Shillong le Jorhat kikah’a daily flight koitading

Shillong, Mar. 29:  India sung a full service airline thahpen Zoom Air in May nisim 1, 2017 a pat Jorhat le Shillong  kah’a aniseh’a huikong alensah ding ahitai.  Hiche chungchon’a  Kolkata a pat Jorhat le Shillong chuleh Shillong a par Kolkata gei direct flight jong akoi ding ahi tin Zoom Air CEO le Director Koustav Mohan Dhar in aseiye.

Zoom Air hi India sung a operational carrier 12 channa ahi.  Market khantou laitah’a Zoom Air  launch akibol hin competition akhousah be ding ahi tin analysts hon aseiyuve.

“Zoom Air hi Zexus Air Services in promote abol ahi. April nisim 14, 2017 nikho leh huikong ani channa le athum channa jong hunglhun ding ahitai. 2nd le 3rd Aircraft jong hi CRJ-200LR (50 seater) hilhon ding ahi. Huikong teni hin Europe a Mandatory C Checks achailhon tengle India jon’a hung lengdoh lhon ding ahi” tin Dhar in aseiye. Aman aseibena’a chun Zoom Air hi Debt Free organization ahi’n Director in project ho fund akibol ahi.

 Shangshak nikho kinit

Imphal, Mar. 29: World War II laija hinkho phalla gam huhna a anapang ho geldoh nale janan 10 Sector Assam Rifles HQ IGAR (South) noiya 17 Assam Rifles hon March nisim 26, 2017 nichun pahvui pehna Shangshak war memorial a ana mang uvin ahi. Hiche gal achun sepai ho seh hilouvin civil hojong thina toh anaum in ahi.

Hiche memorial chu Shangshak kho a um ahin chule kingon chun mipi le Assam Rifles tampin pan alan ahi. IGAR (South) le 17 Assam Rifles thalheng in Commandant 17 Assam Rifles in pahvui pehna aneiyin ahi. Hiche kin kichai chun Ex-serviceman office Phungyar ho din Chair, tables, CGI Sheet, water tank ho peh na anaum in ahi.

Garo Hills a Kum 17 numeikhat kipuimang thu’a insung miten police chung’a alunglhailouna  sei

Tura, Mar 29: Achesa March nisim 27 niho’a kum 40 a upa pasal khat in akaimang kum 17 bou hinalai simlai numeinu insung miten police ho thukholna chung’a alunglai louna thu asei’uvin a, mi puimang’a ngohna kineikhum numei nu police  hon thudohna aneipoi tin asei’uvin ahi.

Moday nikho’a kum 40’a upa pasal khat chung’a mi kaimang’a hehna kijihlut ahi’n, Monday (March 27) nikho’a kum 17 a upa simlai numeinu  school’a kon ahung kile na’a k akaiman ahi, tia kisei ahi. Phulbari Police station’a hehna kijihlu ahi’n, hiche jouva police thulhut in khangkthah nu huhdohna ding’a  thu kholna apat ahi.

GAmsung’a numei chapang kipuimang na thilsoh umjing ahi. Phulbari, West Garo hills toh kinai Chibinang kho thilsoh ahi. Vangsetna toh numeinu anu in FIR’a ajih dungjuiya numeinu hi Monday nikho’a schooo’a kon ahung kile na’a phat chomkhat achenna/apansat na Inn neinu Ruksana begum (50) in apuimang ahi, ati. Inneipi in numeinu hi auto rickshaw anangah’a  Sahihur Mondal (40) khu’t apahlut’a, numeinnu hiMonday in Assam a apui ahi,tia asei ahi.

Numeinu  akipehto pet hi mi phabep in amit’a amu ahi. Police thulhut in aseina’a chun numeinu apui nau hiding  ginmona Dhubri, Assam gam’a police pasal leh numei phabep civil von’a akivon’uva cheu ahi , ati. Ahin, FR a a min kiphapoh ho hi Ruksna Begum tilou adang se aumna kholeuva jam-U ahitai.

“Setna natoh bolna’a akithopi’a midan thum kahol’u ahi’n, tuchan in akinupi,  Numeinu huhdohna ding’a natoh achelha jing’e, tin polic  thulhut in aseibe in ahi. Ain insungmite’n police ho inneinu thudohna anei pouve, tin alhunglhai louna thu asei uvin ahi. Amanu hin miphalo  ho akithopi pet  amu’a  ahi’n, ahin police hon thudohna aneipon, hiche hi kidang kasa uve tin insung miten asei uvin ahi.

Hetthei khat chu Sahinur in tu masang’a numeinu hi kichenpi dinga anajol ahi’n, numeinu insung mite anop pehlouvu ahi. Achanu uvin lekha asimjom ding in insungmiten adei ahi. “Hiche jeh’a numeinu kikaimang a hi thei ahi’n, ginmo thei jouse kivesoh’a thukholna kinei ahi” tin police official khat in aseiye.

Thusoh Lahchom

53rd KNT

Ahung lhung ding Dt.31 march to 1-2 April chan nampi taokhom na umkit ding ahitah jeh in,muntin a um nam mite jouse,Nampi adinga taokhom ding in pakai min in kahin tem uve. Amun L.Phaimol CCpur Dist. Lamhil: Lamka singat parking a gari umding,kijah mat nading no. 8974955912 (Chairman KNT)

AR

“Let’s make Manipur a Drug free state” thupi hinan Maojang, Tengnoupal District a March nisim 26, 2017 nichun 26 Sector Assam Rifles HQ IGAR (South) noiya 11 Assam Rifles hon hon lecture and interaction bol uvin ahi. Hiche kingon achun Pasal 20, numei 34, Chapang 65 pannan mi 119 in pan analan ahi. Hiche hin atup chu ahile gam sung adeh a khangthah te drug akon ahoithei nadiu ahi. Chule mi 103 jong Basic medical checkup abol uvin ahi.

Water Taxi

Assam, Guwahati  khopi le Airport kikah’a water Taxi kimangvah ding ahitai tin Assam  Minister khat in Tuesday ni chun aseiye. Assam Industry minister Chandramohan Patowary in thuso miho akimupina’a  chun sorkar in water taxi 50 ahin pui vahding ahitai, ati. Water taxiakipohdoh’a hileh Guwahati khopi leh airport jotna lam hi ‘Minute 18 bou lut ding, Phat kisumang lhomjep ding ahi. ” Lokpriya Gopinath Bordoloi International Airport kom’a “Jetty’ kisem doh ding ahi’,, water taxi hin akhopi’a um Jetty a kon airport kom’a um jetty chan mi apohding ahi. Hiche’a kon Asssam State Transport Coporation  air conditioned bus I airport chan khojin o apui ding ahi” ti n Patowary in aseiye.; Assam gam’a ‘Inland water transport’ semphatanaleh sem hoi na ding’a sorkar in pan phabep alah ahi , tin aseiyin  chuleh Centre sorkar in Brahmaputra, le Barak national waterway tilou Assam gam’a  national  waterway 9 ho hetsahna jong anei ahitai, tin Aseibe in ahi. ‘Assam gam’a h Jetty ho swehoi nading tohguon aumin, tu dinmun’a 191 um ahi. Atamjo hi dinmun houlouv um ahi”, ati.

Hilchetna

Nisim 28 March  Eimitimes a thusolah chom a BJP a kona kinodoh tia hung kitahlang,March 25 meeting a kona kinodoh kitichu ,Ml.Jangkhosei Haokip,Nn,Lamkhohoi Baite,Ml.Thangkhohao Haokip, chuleh Ml. Ngamson Haokip chengse jaona a Moreh Local Committee President 4 in Nisim March 3 nikho a chu BJP Manipur State Unit President Pu.Bhabananda  koma kanup natah uova haina kanapeh u ahitai,tin hilchetna kahin  peove.BJP Moreh Local Committee lamkaihon haina apehjou u nikho 22 joununga 42 Tengnoupal Mandal in nadoh thu ahinsei uo ahi.

Hunam’a kisuse go

Tuni chun Bongaigaon a numei khat atouna autorickshaw sung’a pasal ni in hunam’a suhset ding aguotjeh’un auto a kon ana chomlha in ahi. Numeinu chu tutuhin hospital’a athi ahin kihelouvin aum nalaiyin ahi. Numeinu insungmite’n thilsoh toh kisaiyin Bongaigaon Police a case khat asunlutuvin ahi.

Editorial

Nikhat a nidan 20 natong dia kisei

                          Tuchung State phabep a Chief Minister (CM) thah ho lah-a Uttar Pradesh (UP) CM Adityanath Yogi hi akhu vevu pai jeng’in CM ahi hapta (kal) khat sung mama’n thil thah, kikhelna tamtah apodoh e. Athilbol holeh boldia asei hohi ahoi tah-tah jong aumthouvin ahi. Ahin govt officer (bureaucrat) hon ni khat sung’a nidan/dahkal/pungkal 18 apat 20 gei office naa atohdiu, atong ngapchalou lou service ngadoh hen tigeiya asei chu mihem koipou jodi ahipoi. Nikhat’a nidan 24 um ahin nidan 18 apat 20 chan natong ho chu nidan 4 apat nidan 6 bou natohlouna phaat ong aneidi, imutnadi chu lhom chehdi ahi. Kisil phaat, buneh phaat, office le inn kikah-a chelena phaat ho ikoidoh leh imutnadi phaat chu nidan 2 apat atampen’a nidan 4 hidi tina ahi. Govt officer ho CM pu kichatna’n office ah chenden tho jeng jongleu atohdoh u ichuom’a kikhedeh loudi ahi. CM thah hohi natoh thanom mong jiu ahijeh in UP CM jong hi choh jeju jeng ahi. CM Yogi amatah hi mi fel, mi pontho khat ahijeh-a midang jouse jong ama tobang’a fel’a office natoh gutchu dia agel jong hithei, agam khantoudi adeival behseh jeh-a akilom loulou asei jong hithei ahi. Chuleh UP hi CM kikhel sehleh politics jeh-a IAS/IPS officer ho chung’a phulahna nei ngen ahiji jeh un Adityanath Yogi jong hi ichuom ahilou jeh-a IAS/IPS phabep bolchahna dia hitobang asei jong hithei ahi. UP hi State len ahijeh in a CM ho jong hi India Prime Minister bang’a naa hatoh ngen ahikit uvin alhangpi’a nikhat (jan khat) sung’a nidan 4 tobang bep imu ngen hiuvin akiseiye. Leng te khang’a leng len hojong galsat loulai thunoplai jongleh jan teng nidan 4 tobang bou kicholdona phaat aneijiuve kiti to thakhat ahi. Japan gal (world war-II) a Japan ten gal analel uva agam u alhahsam chun nidan 4 bou a-ihmu un phaat dangse chu natohna’n anei uve akiti-e.

                          Thilsem dungjuiya mihem hi sunle natongdi, janle kicholdo (imu) didol ahi. Hiche jeh-a sapte thuchih a matah a imut a matho hi damtheina, haona le chihna ahi akiti-e (early to bed, early to rise ….). Imut/kicholdo kiti hi damtheina le tha le lungthim kidodohna ahijeh in phate imulou chu damtheilou, alunggel jong kisuhtheilou ahi. Mipilhing ho nikhatna nidan 6 beh a-imut ngaiya doctor hon asei ahi. Tulai khantouna dungjuiya electric meivah umjeh in khopi (city) dung deh-deh ah sun le jan thakhat tobang ahitan, office kai ho dia itih phaat, itih chan hijongleh office naa tohthei ahitai. Office a toumun naa hatoh jeh-a damona jatjat tamna khang jong ahikit tai. Govt office natoh phaat sung hi nidan 8 bou ahin hiche jeng jong ajoulou tam, tohdi umbeh louna jong umkit ahi. Ahin nidan 18 apat 20 lang office natohdi kiti chu chomkhatdi ahilouleh koiman ajoloudi ahi. Ipi hileh UP CM Yogi in hitia asei hi officer hon naa hatoh in tong uhen tina hidi ahi. Koi hileh nikhat a nidan 4 bou ihmua adangse natohna’a nei ho vang atahsan ajo pouleh incheng teidi ahi.

Blankfire

Mi khat chu ipiham khat ahung hidoh tengleh kei panlah jeh ahi tia seidi tamji mong ahi. Mijouse kithokhomna a lolhinna khat hoa jong ama panlahdan hasei ten loi dimji, abangkhat chun ama sehseh boldohdan’a aseiji nahlai ahi.