ET March 29, 2017 News (Local, Thusoh Lahchom, Editorial, Blankfire)

ET March 29, 2017 News (Local, Thusoh Lahchom, Editorial, Blankfire)

715
0
SHARE

KPI AC a tehse sum san kihom panta

Kaybie Chongloi,

Kanggui, Mar.28: Indira Gandhi National Old Age Pension Scheme noija tunin Kangpokpi Assembly Constituency sunga ‘Tehse  Sum san’ tia ihet u Old Age Pension chu Social Welfare Officer, Saitu-Gamphazol in ahom pantan ahi.

Social Welfare Officer, N. Usharani Devile atohkhompi chengin tehse hiche chanvou changding ho se chu tunin Security barrack DC Complex, Kangpokpi sunga jingkah lam nidan 10 vel’in anahom doh panin nilhah lam nidan 3 chan anahom’in ahi.

Tehse a chanvou kilah dia che cheng chu touna ana peuvin nomin aphat’u ana kinga theijun sum kihop pehsunga koima boina toh ana um pouvin ahi.

Sum kihomdan thu’a Social Welfare Officer, N. Usharani Devi in aseina’a, tehse kum 60 apat kum 79 chan ho chu April 2015 apat August 2015 (Lha 5) adin Dangka 1000/- cheh akihom’in chule Tehse kum 80 apat achunglang ho chu Lha 5 ma tichu April 2015 apat August 2015 adin Dangka 2,500/- cheh akihom in ahi ati.

Tunia Tehse kum 60 apat kum 79 chan ho chu mi 160 tobang a chanvou u ana kihomdoh jouvin chule Kum 80 apat chunglam ho chu mi 21 ana kihomdoh in ahi ati.

Jing jongle amun mama a jingkah lam nidan 10 apat nilhah nidan 3 sunga kihom kit ding amavang Lhakao nisim 30 le 31 teng Keithelmanbi Community Hall a kihom ding ahitai tin SWO nun aseije.

Aman aseibena’a, Lhatun (April) nisim 3 le 4 teng Gamnom Sapormeina Police Station mun’a 51-Saitu AC ho kihom ding chule Lhatun nisim 5 le 6 teng Bal Bhavan Complex, Khuman Lampak, Imphal mun’a kihop peh kitding chujouteng 46-Saikul AC akon ho Lhatun nisim 10 apat nisim 13 chan Bal Bhavan Complex, Khuman Lampak, Imphal mun’a kipe ding ahi ati.

Hetthei khat chu, tehse kum 60 apat kum 79 chan hohin IGNOAPS noija Lhakhat na Dangka 200/- asan’u ahin Kum 80 apat chunglam hon Dangka 500/- asan jiu ahi.

Governor leh CM in gamsung mi Cheiraoba kipathu thot

Imphal, March 28: Manipur Governor Najma Heptula leh Chief Minister Nongthombam Biren Singh in Tuesday nikhon Sajibu Nongma Panba Cheiraoba festival ahitoh kilhon in gamsung mi kipathu athot lhonin ahi.

Governor Najma Heptullah in kin-gon hi gamsung’a chamna leh lungmonna hin polut’a hihen, tin aseiyin ahi. “Nam chom chom kikah’a kiloikhomna dinmun hoilou tah’a aumna thilsoh imu uvin, ahin, Manipur in pilhinna avetsah in, kinahna apam paiyin, chamna atuh chah in ahi”, tin Governor in aseibe in, chule lungtup khat molso nading’a pan lahkhom ding’a kouna aneibe’e.

Chief Minister Biren in thuthot aneina’a, Sajibu Nongma Panba Festival hi kum kipat na ahi’in, kipah tah’a kimang jing golnop ahi, ati. Nikho in machalna, kipana leh chenkhom theina ahin pohlut ding akinepna thu aseibe in ahi.

Social Welfare Minister Nemcha Kipgen loupitah’a vailhun diu

Kaybie Chongloi,

Kanggui, Mar.28: Tuchung 11th Manipur State Assembly Election a alolhinna le BJP makaina noija coalition Government a Social Welfare le Co-operation Minister ahinmu na chunga Kangpokpi AC MLA Nemcha Kipgen hi Lhakao nisim 31 le achenna vangkho Ngahmun a loupitah a vailhunna le thangvahna kin umding ahitai.

Hiche vailhunna le pathen henga thangvahna kingol hi Central Election Committee, BJP 50-Kangpokpi AC in agon ahin Rev. Y. Haokip kin Thempu a pang ding ahi.

Hiche kingol’a pangdin Kangpokpi AC mipite jaonan keng le kang akon ana tosot ho, thu le la ana kithopi, tha le junga ana panhu hole adang dang ho Central Election Committee hon temna aneijun ahi.

Maoist hon Cheiraoba kipathu thot; Jiribam MLA adoudal dan thu seiyu

Imphal, March 28: Sajibu Nonma Panba Cheiraoba nikho’a thal choi kiloikhom Maoist hon gamsung mi kipa thuthot aneiyu toh kilhon in gamsung mi dihtah ho venna peh ding agelkhoh dan thu asei uvin ahi.

Kiloikhomna in thuso aneina’a chun, gamsung mi dihtah hilouva election tet ho mun phabep’a gihna kipe ahi, ati. Mi phabep in Jiribam Assembly constituency’a kon kaidoh’a MLA pa hi 1906 kum’a kon gamsung’a cheng ahitai, tia asei thu’a, Maoist hon itih phat’a cheng hijong leh gamsung mi dihtah ahi, tia kila theilou ding ahi, tin aseiye.

MLA ‘a hi Meitei Pangal thu um theilou ahi’in chule Pangal MLA Ministry’a kilalut phabep aumin, koiman ana doudal poi. Jiribam Assembly constituency MLA ding’a phabep in seat athum’a ahileh ipi jeh’a MLA Shyamkumar (Andro Assembly constituency) in abol bang’a tu naicha election’a kilhengdoh Muslim MLA hohi sorkar sem leh Ministerial berth chang ding’a atep louvu ham, ati. Gamsung’a CM hi Muslim in anatuh na phat jong um ahi’in, sorkar masa’a chun Muslim (Meitei Pangal) Minister tamtah aumin, society khatcha in adoudal lou ahi, tin aseibe uve.

Maoist hon gamsung mi kipathu athot toh kilhon in Meitei Pangal hon Muslim thah ho seat apeh loudiuvin temna aneiyin, hiche hin nam manlut dan amansah ding ahi, ati.

IFCD Minister lamkaina team in Waisel Maril vil-u

Imphal, March 28: IFCD Minister, Chief Engineer, IFCD Department leh Health Minister phabep panna team hon Tuesday jingkah in Keishamthong Assembly constituency noiya um Waishel Maril mun phabep avil uvin ahi.

Letpao Haokip, IFCD Minister leh Lakpoklakpam jayenta Kumar, Health Minister in Waishei Maril gamkai miho heng’a gojuh kipat masang’a nullah (canal) ho suhtheng ding’in aseiyin ahi. Hiche suhthengna’a IMC toh pan lahkhom hi thilpha hiding ahi, tin Letpao Haokip, IFCD Minister in aseiyin chule IFCD in gari len JCB leh adang dang ho apeh ding ahi, ati.

G Robindro Sharma, Chief Engineer, IFCD in Waishel Maril ‘a thil kisahna leh semphatna natoh hi phabep akibol vang’a atamjo MAHUD noiya kibol ahi, ati. Department chom in na atoh’a chule twilet teng ahilouleh boina dang dang aum teng IFCD themmo kichan ahi, tin aseibe’e. Athah’a kisemdoh BJP sorkar in Waishel Maril leh adang dang’a natoh hi IFCD apehdoh diuvin ngehna aneibe in ahi.

Keishamthong Hodam Leirak’a kon Nganappi Thong sahlam chan ‘a um twi-lam team in vetlhahna anei ahi. Minister hon gamkai miho boina ahetthem thei nading uvin vengsung miho jong akihoupi uvin ahi.

Edn & Labour Minister Th Radheshyam in Heirok le Yairipok a um government school ho vil

Imphal, March 28 (DIPR): Education & Labour Minister Thokchom Radheshyam in tuni chun Heirok le Yairipok sung’a um government school 13 veilna aneiyin ahi. Minister in vilna aneisung’a chun jilkung ho  toh kihoulimna aneiyin themjilna mun a avat le alhinglal ho jouse itilamdol’a suhlhing dingham tin lunggel aseikhom’uvin ahi.

Minister in themjilnamun avilna’a chun Yairipok High School kom’a Power station le water supply plot khat kisem agamudoh in ahi. Aman aseidan in hitobang thil kisemho hi themjilnamun’a themjil simlai ho kisuhkhahna thei ahi ati. Phoudem Upper Primary School  building aphalou lai phabep kithahsem’a Urban Primary Health Centre khat kisemdoh jong agamudoh in ahi.

Thuso miho to akihoulimna’a Radheshyam in aseidan in  tutu’a themjilnamun ho’n akimaitopi’u boina lenpen chu student-teacher ratio ahi ati. Health le Education sector hi state department lah’a apoimo pen teni ahilhon’e.  Ajeh chu Education sector hin khonung a nampi hin jemhoi ding simlai ho asem ahi’n, health sector hin khangdong ho tahsa damtheina lam avetkol ahi.

Radheshyam in aseidan in tuni themjilna munho   vilna aneichu adihlou kholdohna ding hilouvin, masang’a ana kibolkhelho suhdihna dingjoh ahi ati. Minister pa chun themjilnamun ho’a jilkung ho heng’a boina jouse suhlhapna ding’a aboltheichan abol ding in kitepna aneiyin ahi.

Tuni Radheshyam in avil government school ho chu Tentha High School, Tentha Khunjao Junior High School, Lamding High School, Heirok High School, Lupo Manjuri Girls High School, Heirok Higher Secondary School, Kangthokchao Upper Primary School, Sekmai Khumbi High School, Shikong Khunou Hijam Khunour Primary School, Inganglokmacha Primary School,Kasturba Gandhi Balika Vidyalaya, Yairipok High School chuleh Phoudem Upper Primary School ahi’uve.

Assembly constituency 8 in tuchan’a parliamentary election tet theilou lai

Imphal, March 28: Manipur gamsung’a assembly constituency 8 ‘a voter hon parliamentary election atet nading’a tuchan’a phalna kipelou lai ahi’in, Member of Parliament election’a vote pe theiya ahivang’a atet thei diuva ngehna tuchan’a phalna kipelou lai ahi.

Assembly constituency 8 hohi- Khangabok, Wangjing-Tentha, Heirok, Wabagai, Kakching, Hiyanglam chule Sugunu ahi’in, Scheduled tribe candidate ding’a kikoi (reserved) Outer Parliamentary Assembly constituency in ahop jeh’a constituency mihon vote apeh thei vang’a, Parliamentary election atet diu phalna kipelou ahi.

Achesa 2002 kum chun Thoubal District MP Candidature Demand Committee kiti committee kisemdoh in Delimitation Commission heng’a memorandum apeh uva assembly constituency 8 ‘a cheng hon parliamentary election atet thei nading uva Inner parliamentary Constituency’a apansah diuvin memorandum ape uvin ahi. 2003 kum ‘a state assembly in kilolna phatsahna aneiya chule delimitation committee in assembly constituency 8 hi Inner Parliamentary constituency’a akoi nading uva ‘recommend’ bol ding’a aseiyu ahi. April nisim 21, 2003 kum’a Jantar Mantar, New Delhi mun’a kiphinna anei uva, Delimitation Committee Chairman anahi (Retd) Justice Kuldip Singh akimupi uva, thumna ho hetsahna aneiyu ahi.

Joint Non-Government Voluntary Organisation advisor P Somorendro Singh in Tuesday nikhon Manipur Press Club’a thuso miho akimupi na’a chun assembly constituency 8’a cheng hon athaneina (democratic rights) amu kahse uva state sorkar in assembly constituency 8’a kon Rajya Sabha MP alhen ding ahi, tin aseiyin, chule thudih’a thutanna aum louleh constituency miho thipbeh’a umlou ding ahi, tin aseibe in ahi.

CM Biren in Manipur leng jana apeh tamtah in pahcha

Imphal, March 28: Chief Minister N. Biren in Manipur leng khanggui (titular king) akhohsah na hi tamtah in pachatna anei uvin ahi.

Facebook post’a RK Sivachandra, spokesperson, BJP in, “Chief Minister in Manipur Leng akhohsah leh 12 channa Manipur Chief Minister ding’a kitepna anei jouva Royal palace avil hin chondan’a ahaona leh abulhinna avetsah ahi”, tin aseiyin ahi. “Thailand, Cambodia, Nepal injong hitobang chena anei ahi’in, Leng ho thaneina noise louva jana ahithei chan’a apeh-u ahi”, ati. Chief Minister Biren hi Manipur gamsung seh hilouva North Eastern Circle leh Asia ‘a ding’a jong lamkai hetthei tah hiding ahi’in, Manipur adopsang ding ahi, tin aseibe in ahi.

PCM in accident na thi simlai khat lunghempi

Kaybie Chongloi,

Kanggui, Mar.28:  ‘Black Monday’ ti leuva seithei khop hel Lhakao nisim 27 jingkah lam nidan 3 vel’a Imphal jon’a hung Inter-State passenger bus khat in Maram le Makhan kah’a toset atona’a mollem Presidency College Motbung (PCM) simlai Sachin Poudel chu tunin Students’ Union, PCM jaonan teaching le non-teaching staff hon lunghempina kin ana neijun ahi.

Sachin Poudel hi Charhajare a um Dilip Poudel chapa, PCM a B.A. 4th Semester simlai gen ngaitah le it umtah khat anahi.

Sachin Poudel in hetman louva adalhah insungmite lunghemna le thohnat na thoh hu pumin PCM teaching le non-teaching staff ho chule Students’ Union, PCM in lhamon aneijun, tupettah’a apohgih nau apoh hu’un ahi.

Sachin Poudel a itnau le ahomtho nau aphondoh utolhonin ama mollem hi insung mite seh’a ding hilouvin College adin jong man na lentah khat ahi atiuve.

Pathenin adalhah insungmite cheng hatna le lhamon a aumpi jing din jong taona aneijun ahi.

March 30 leh ‘5-day MIFF award winning films Festival’ kipan ding

Imphal, March 28: Films Division, Ministry of Information & Broadcasting, Government of India, Department of Information & Public Relations, Government of Manipur, Manipur State Film Development Society leh Film Society of Manipur tohgon noiya 5-Day Festival of MIFF (Mumbai International Film Festival) Award Winning Films kin-gon March nisim 30 nikho leh State Information Centre, Palace Gate mun’a nilhah nidan 5 leh kipan ding ahi.

Film critic leh Swarna Kamal Award (Best Film Critic of National Awards 2008) sang’a RK Bidur in Festival hondohna aneiding, Shivendra Singh Dungapur in abol ‘The Immortals’ leh musical film ni- Ingo Putze in abol Solo Finale (USA) leh Snigdha Banerjee in asem ‘Nuptial memoirs’ kiti film kin-gon hondohna’a kivetsah ding ahi.

Polish, Danish, Khasi, Malayalam, Gujarati, English, Manipuri leh Marathi pao chom chom’a kitho film 15 vel festival sung’a screen kibol ding ahi’in, film jouse hi MIFF 2016’a award mu cheh ahi. Film screening hi niseh nilhah nidan 5 seh leh umding ahi’in, hiche jouteng leh film tho hon kihouna aneidiu ahi. Film Critic leh Documentary film sem’a Bobby Wahengbam in festival nikho masapen’a kihouna’a pan alahding ahi’in, film tho’a Dr Meena Longjam, Oinam Doren, James Khangemban leh Borun Thokchom injong nidang leh pan alah diu ahi. Film society member leh intellectual hon pan alah uva, ngaidan aseikhom diuvin Films Society in kouna aneiyin ahi.

Postal natong hon toumun kiphinna bol

Imphal, March 28: Gramin Dak Sevak (GDS) committee ‘a recommendation pha jouse chepi ding chule semphat ding’in All India Gramin Dak Sevak Union (AIGDSU) in aseiyin, chule All India Gramin Dak Sevak Union, Manipur Division, NE Circle in Imphal Head Post Office, Babupara mun’a Tuesday nikhon toumun kiphinna abol uvin ahi.

W Ibohalbi, President, AIGDSU, Manipur Division in thuso miho akimupi in, union in kiphinna anei hi achesa January 2016 kum’a kon kichepi pan’a commission report dungjuiya pay commission hi tuchan geiya AIGDSU, Manipur Division’a kichepi loulai ahi’in, achepi nading uva thumna kinei ahi, ati. Pay Commission chairman in pay commission hi state sorkar heng’a recommend abol ahitan, ahin, vangset umtah’a review committee asem uva chepi nading hi kivaigei sah ahi, tin aseibe in ahi.

Toumun kiphinna’a Gramin Dak Sevak natong leh departmental employee hon pan ala uvin chule Union in natong jouse thakhat leh kibang cheh’a abolna diuvin thumna aneiyui. Gramin Dak Sevak Committee in India gamsung mun chom chom’a jong toumun kiphinna abol ahi.

Thusoh Lahchom

NPF in lunghempi

 Janhi (Mar. 27) gamsung munchom chom’a gari tosetna ho’a thina toh ho  NPF in lunghempina sangtah akineiye tin MLA Awangbou Newmai, President, NPF in aseiye. Hiche tosetna hotoh kisaiya akitongkha hojong kintah a adamthei theina diuva thupha athot ahi.

TB

AXSHYA project Senapati in Tuesday nikhon Kangpokpi’a TB natna neiho ding’a ‘awareness programme’ abol uvin ahi. Kin-gon’a TB natna neiya mi 28 vel in lou akilah uvin, chule district Co-ordinator Keisham Okendrojit Singh in ahoulimna’a lou-leh-ai aphatcha neh angaichat dan leh worker hotoh kijahmatna nei angai dan thu aseiyin ahi.

Assam Rifles

Mach nisim 26, 2017 nin 9 Sector HQ IGAR (South) kithona noiya 6 Assam Rifles hon Andro Kharam Leikai, Imphal East  munna Free medical & Dental camp anabol uvin ahi. Medical camp chu jatchomchom a natna nei hon aphatchom pi nadinga kibol ahi. Lamchom chom’a natna nei mi 210 Pasal 81, numei 73 le chapang 56 in hiche camp achun kivetsahna anei uvin chule lou jong free a akilah uvin ahi.

JACAATB

Joint Action Committee Againsts Anti Tribal Bills (JACAATB) in Bill 3 ho deilou na jeh a ana kiphinnao ni 571 lhinni tichu 23rd March, 2017 nikho chun Manipur Govt. in JACAATB toh Bill 3 ho jeh’a boina um ho seikhom a seitoh ding in tepna ana neiyin ahi. Hiche toh kilhon chun, JACAATB in Manipur Govt. heng’ah  nam lamakai chom chom ho toh kihou khom a ngaidan seikhom na kinei phot ding ahi ti’n 25th March, 2017 nikho chun Manipur Govt. heng’ah donbut na lekha ana thot uvin ahi.  JACAATB lamkai na in 28th March, 2017 jinglam nidan 11:00 apat chunYPA GHQ Hall, Hiangtam Lamka mun’ah Nam lamkai chom chom leh ache khom mipi phabep ho’n Consultative meeting anei uvin ahi. Hiche toh kilhon chun, tuni kho’a ngaidan kisei khom ho geljing pum’a maban sotlouva Manipur Govt. heng’a Charter of Demand kipe lut ding ahi tin JACAATB akon thulhut chun aseiyin ahi.

Solar street light kihom

Achesa March nisim 26, 2017 nichun 10 Sector Assam Rifles HQ IGAR (South) noiya 27 Assam Rifles hon Khamasom Khullen, Ukhrul District chu twi lahnading thil-le-lo le Solar street light anapeuvin ahi. Khamason Khullen in donding twija le light a hahsat na atonao ichan ham a ahin kithopi diu ahitai. Chule solar lights chu khomite khutna anape doh uvin Khasom Khullen village authority hon Assam Rifles ho chunga kipathu seijoulou anaphong uvin ahi.

 

Editorial

Thina Gari Accident tamna nikho khat

                            27 March 2017 nikho hi Manipur’a dia munchuom chuom’a gari accident tamnapen leh athi leh akisukha tamna nikho khat a kiseijingdi ahitai. Hiche ni’a munchuom chuom’a gari accident a thi chu agom’in mi 21 ahin akisukha 30 val ahi. Athi tamnapen leh amelse jep chu Mao leh Makhan kikah a lei (bridge) khat kom vadung nuoilang’a khelha Dimapur’a kon Imphal hinjon Tourist Bus chu ahi. Hiche a chun mi 1o athin ahi. Imphal-Jiribam lamlen’a Khongsang leh Irang  kikah-a mipo gari (Cruiser) khat jong hiche nikho maman accident atoh in mi 8 lang athin ahi. Hiche sun mama chun Senapati district a Lairouching kom’a lamlen nuoilang ah Truck khat akitang kitnin a driver-pa athi’e. Moirang leh Langol a jong gari neo accident jeh in akitongkha mi 4 aumkitne. Hitobang toset jeh-a hinkho beina hohi pelthei ham, hilouham ti hi gelthei khamset hidi ahi. Ipi jeh-a hiche accident hohi ana umham ti ajeh jatjat kisei sohkei nante. Gari accident tamjo (jakhat lah-a somko – 90%) hi Gari Engine kisuhlou jeh sang’a mihem (driver) suhmo jeh hipen ahi. Ipijeh-a Driver themmo chansah diham ti hi ngaito khohtah hidi ahi. Machine/Engine hi mihem thilsem ahin atuh, atham, atol (driver) khutna abitdi le biloudi ki-ngapna hi sang mama ahi. Khongsang le Irang kikah a accident toh Makhan a accident chu jan khovah masang ahigel’e. Achutileh khothim petna gari tol, adeh-a mipo (passenger) gari hohi ahithei chan’a lhaisahda’a phadi tina ahi. Khothim khovah masang ahitah jongleh ol tol jep umjileh ichan ham’a accident ho pelthei hidi ahi. Sunchang laitah a lamlhang lamsah bo kiti umji jong hi hat-tah (speed) a gari kitol jeh ahipen’e. Hiche chung chon’a imut soh sasa ham, lunggel chuom neipum’a gari tol ham hojeh-a jong accident tam ahi. Gari tolpet leh Mobile Phone manloudi ti kihasei, ahia koiman angai/ajuilou khat ahi. Gari accident kiti hi mitphet kahlouva soh thil ahijeh in atol (driver) hon limgeh-a atol di hi seilouva hetdi khat ahi. Jukham pum’a gari itol leh ipi sohthei ham tijong koiman ahaipon aboltei tei jong dimkit ahi.

                         India hi vannoi leisetna gari accident tamnapen leh gari accident jeh-a mithi tamnapen gam ahijing nalaiye. India a gari accident a thi hi kum khatna 1,30,000 (lakh khat le sang somthum) chunglam hijing, hichu nikhat a mi jali (400), nidan khat seh-a mi 16 thijing ahi. America (USA) ah ningkum (2016) sung chun mi 40,000 (sang somli) lang gari accident ah anathi-e. Achomlam tah-a seidin niseh leh munchom chom’a gari accident a thi hi atam’a tam ahi. Khantouna dungjuiya gari la tam cheh cheh, gari accident umlounadi (lhomna di) a govt leh NGO hon ipi agon’a asei vang’a angai bepbep tobang ahi. Gari neo tol hon Helmet (thih lukhuh) kikhuhdi kiti jong mi phatchomnadi dan’a gel tamjo nalai ahi. Toset, vangset kiti hi umnante, ahin gari accident hohi pelthei jong tamdi ahi. Govt injong lamkon (turning) ho beh-a song bang (RCC Wall) asem’a phadi ahi.

Blankfire

Mi khat kahi kitia phone hamkhatna midang toh ikihou jongleh ikoma mi khat nin hitin khatin seitango iti gunkeidi jong vang mitmona tojong akilouve. Ahilouleh thunung tah leh mipha tah ho hijo hamla kihe talou!