ET March 28, 2017 News (Local, Thusoh Lahchom, Editorial, Blankfire)

ET March 28, 2017 News (Local, Thusoh Lahchom, Editorial, Blankfire)

989
0
SHARE

Lamlen tosetna thilsoh chom chom’a mi 21 thi, 30 val kitongkha

Imphal, March 27: Numei leh chapang panna mun chom chom lamen tosetna thilsoh in agom in mi 21 athi in ahi 30 val akitong khan ahi.

Senapati district hopsung Makan leh Chakhumai kikah, Imphal-Dimapur national highway’a Monday jingkah nidan thum don’a lamlen tosetna thilsoh masa um ahi. Imphal jon ding’a hung’a bus (regd no MN014 A 9503) khat Maram leh Makhan kho kikah, Imphal-Mao sector’a kol’a lenglha ahi’in, Imphal khopi’a kon km 90 vel’a gamlha mun’a thilsoh ahi. Police thulhut dungjuiya, tosetna thilsoh’a mi 11 athi in chule midang 25 akitongkha in ahi.

Tosetna thilso namun’a mi 8 thi’a chule hospital apoh nauva mikhat thi’a ahi’in, akitongkha mi phabep Senapati district hospital’a aum uvin, mi 7 Regional Institute of Medical Sciences, Imphal khopi’a apolut tauvin ahi. Akitongkha mi phabep dinmun agim toh kilhon’a vangsetna toh jat kal be ding’a ginmo ahi, tin thulhut in aseiyin ahi. Mao police station’a thilsoh toh kisaiyin case jihlut ahitan, thukholna achelha’e, tin police thulhut in aseibe in ahi.

Chief Minister N Biren Singh in Facebook’a sorkar in kithopina thei chan’a akithopi ding ahi, tin aseiyin ahi. “Makhan bus in tosetna atona’a athi leh akitongkha ho kapohnat hu’e. Keima leh sorkar in kithopina thei chan’a pan kalah ding ahi”, ati. Dinmun vesui ding’in Ministerial team jong asol in ahi. CM Biren hi tu-leh-tu’a New Delhi khopi’a um ahi’in, Prime Minister Narendra Modi leh senior Union Minister phabep kimupi ding’a kalsong ahi. Lamlen tosetna thilsoh anichanna hi Imphal-Jiribam lamlen, Khongsang leh  Irang kikah ahi’in, Jiribam’a kon Imphal jon’a   hung passenger winger khat in tosetna ato ahi. Nidan 12.20 am don’a winger in tosetna ato namun’a winger’ a tou mi 8 athin mi 6 akitong khan ahi.

Athum channa hi Lairou munvel, Imphal-Dimapur lamlen ahi’in, truck khat in mol ata ahi. Thilsoh’a truck driver pa apet pet’a athi in, handyman pa akitongkha in ahi.

Manipur minister ho lah’a N.Biren haosapen: myneta.com

Imphal,March 27:  Golnop kibolteng le kisuh halna ding’a touna kichu kibol ji bang’a chelha tuchung Assembly election a chun BJP in National People’s Party, Naga People’s Front, Lokjanshakti Party le All India Trinamool Congress tosotna noiyin sorkar ahin sem in ahi. Hitolhon chun BJP-led coalition sorkar noiya minister tuhding ho jong aban ban in akiphongdoh in kihahselna jong aneiyuvin ahi.

Myneta.com in aseidan in tuchung Manipur cabinet ho lah’a hin crorepati sagi le lakhpati 5 apang in ahi. Minister ho lah a mi gup hi graduate ahiuvin, mi ni post graduate ahilhon in, mikhat graduate professional ahi in, mikhat Pol-XII chai ahi’n, mikhat pol-X chai ahi in chuleh mikhat others category in apang in ahi.

Chief Minister N.Biren Singh hi themjilna lam’a Graduate chai ahi. Amahin aguom in nei le gou Dk.1,56,63,4891 cr man vel aneiyin ahi. Deputy Chief Minister Joykumar Singh hi  themjilnalam’a post graduate chai ahi. Amahin nei le gou Dk.2,06,12,343 cr man aneiyin ahi. Health Minister L Jayanta Kumar  hi Post Graduate chai ahi’n , amahin neile gou Dk.23,09,431 lakh aneiyin ahi. Sports Minister Letpao Haokip hi Graduate chai ahi. Amahin nei le gou Dk.52,95,392 lakh man aneiyin ahi. Revenue Minister Karam Shyam hi Graduate Professional ahi’n, amahin nei le gou Dk.37,86,768 lakh man aneiyin ahi.Tribal Affairs Minister  N Kayishii hi Pol-XII chai ahi. Amahin nei le gou Dk.1,29,26,000 crore man aneiyin ahi. Forest Minister Th Shyamkumar hi Pol-X chai ahi’n, amahin nei le gou Dk.1,29,99,3371 cr man aneiyin ahi. Agriculture Minister V Hangkhanlian hi Graduate ahi’n, amahin nei le gou Dk.1,81,85,8181 cr man aneiyin ahi. Education Minister Th R Singh hi Graduate chai ahi’n nei le gou Dk.56,35,278 cr man aneiyin ahi. PHE Minister Losi Dikho hi Graudate chai ahi’n neile gou Dk.1,70,71,115 cr man aneiyin ahi. Social Welfare Minister Nemcha Kipgen hin themjilnalam a ichan gei aphah ham tivang hetchen ahipo’n amavang nei le gou Dk.24,79,520 lakh man vel aneiyin ahi. CM N.Biren lamkaina noiya minister panmun tuh jouse hin criminal record khatjong aneipo’uvin ahi.

SEACO in Cheiraoba nikho’a kipathu thot

Imphal, March 27: South East Asia Cultural Organisation (SEACO) in Sajibu Nongma Panba Cheiraoba ahitoh kilhonin gamsung mi kipathu athot uvin, nikho hi Manipuri ho ding’a kum thah kipat ni ahi.

Organisation in malai chondan suhhing kit nading’a pan alah ahi’in, gamdang chondan ho akihal pol louna ding’a ngehna anei uvin ahi. Cheiraoba leh Charak Puja kihal hin gamsung’a kichepi chondan (culture) hoitah hi totna’a asemdoh ding ahi, tin aseiyun chule March nisim 29 nikho’a kilungtoh tah’a Cheiraoba man ding ahi, ati. Gamsung mihon Cheiraoba hi iti ahin man pan-u ham, ti thusim phabep jong organisation in aseiyin ahi.

CM N. Biren in PM Narendra Modi kimupi, Manipur a developmental works chuom chuom a ding’a Centre in Dk. 140-150 Crore phatsah

New Delhi, Mar 27(DIPR): Nongthombam Biren Singh in Manipur Chief Minister panmun aluojou a kipatna central government lamkai ho toh akimutuona masapen ding in tuni chun Indian Prime Minister Narendra Modi chu New Delhi a anakimupi in ahi. Chief Minister N. Biren chu Works Minister Th. Biswajit Singh in ana kilhonpi ahin chule Chief Minister in Prime Minister toh akimutuona a chun Manipur sung’a developmental work tohguon chuom chuom ho anatahlang in ahi. Hitoh kilhon’a Manipur a developmental works chuom chuom tohguon umho suhbulhit ahina ding’a centre in Manipur a ding in grant Dk. 140-150 crore phatsahna jong aneitauvin ahi.

Manipur a central sponsored scheme ho a Sharing pattern ding’a 90:10 mama chepi nalai ding in jong centre in aphatsah nalaiyin chule NH-2 a Four-Way Lane natohna jong kipan vah tading ahidan Centre in CM Biren ahin hetsah uvin ahi. NH-37 a ding’a construction work hi kipan ahitan chule akibol loulai cheng ho hi April 1, 2017 le natoh kipan ding ahi.

Mini Secretariat proposal hi Ministry of DoNER heng’a kithotson ding ahin chule district jouse a jong Women’s Market shed ding kisadoh ding ahi. 60 Bedded Mental Hospital kisahna ding jong hi proposal kilomtah akithot jou phatle Ministry of Health in approved abolding ahin chule Khuman Lampak Sports Complex a Flood Flighting jong Ministry of Sports le Ministry of Power in ahingelpih diu ahi. Smart City Project noiya Flyovers semding jong tohguon umjing ahi.

CM le Guv.  in lunghempi; Thilsoh a thina toh ho Ex-gratia pehding a CM in phongdoh

Imphal, March 27: Dimapur-Imphal lamlen’a um Makhan lei a tuni gari ni in toset atuona’a molliem ho insungmite CM N.Biren in alunghempina aphongdoh in ahi. Hetthei khat chu tuni gari toset thilsoh teni’a chu agom’a passenger 21 vel in thina anato’a mi tampi ana kisukha ahi.  Thilsoh’a thina toh ho insungmite Dk. 2 lakh cheh peh ding in CM in phongdohna aneiyin  chuleh akiha suhkhah jep ho Dk.50,000 chukitle akiha sukhah lou jep ho mikhat a Dk.30,000 cheh peh ding in phondohna aneiye.

Alangkhat’a Manipur Governor Dr. Najma A Heptulla in jong thilsoh’a thina tuoh ho insungmite alunghempina aphongdoh in ahi. Chuleh akisukha hon jong damna lam amanuo theina diuvin wish abol in ahi.

TSA-GHQ in CM N. Biren kipapi, Thadou tribe khantouna dia pan ladia temna nei

Kaybie Chongloi,

Kangpokpi, Mar.27: Chief Minister Nongthombam Biren Singh in Kuki namsung’a Thadou chapa khat le Thadou chanu khat tahsan na neitah’a Cabinet Minister chanvou apehna chunga Thadou Students’ Association-GHQ in alungcham kimnau aphondoh’u tolhonin kipathu aseijun ahi.

TSA-GHQ President, Lamminlun Singsit in thuso miho lekhathot aneina’a, Manipur gamsunga phatsottah mipin anagaldot jing ‘kikhelna’ ahung um tolhonin tuchungin Government thah jong aumtan, hiche Government a hin Kuki namsunga Thadou chapa khat le Thadou chanu khat jong tahsan na neitah in Minister chanvou akipen, hiche BJP lamkaina’a coalition Government hin mipi kinepna banga na ahintoh jingding kinepna lentah akineije ati.

Aman aseibena’a, hitobanga Thadou chate tahsanna neija a Government sunga Minister chanvou hinpe’a Chief Minister Nongthombam Biren chunga TSA-GHQ in kipathu sangtah’in akiphongin ahi.

Chief Minister N. Biren Singh in tahsan neitah’a Minister chanvou apeh Thadou chapa Letpao Haokip, (Minister IFCD, Youth Affairs & Sports) chule Thadou chanu Nemcha Kipgen, (Minister, Social Welfare & Corporation) jong Thadou tribe thalhenga hitobang chanloupi tah achanlhon nachunga TSA-GHQ in kipathu akiseijin chule kithang-atpi na jong akiphongdoh’e tin Lamminlun Singsit in aseibei.

Aman aseibena’a, Kuki namsunga Thadou tribe hi atampen ahi goh hilouvin Manipur pumpia jong Manipuri te bantah’a anichanna’a atampen  (second largest tribe) chu ahin, hijehchun Chief Minister N. Biren Singh BJP Government in jong Thadou Tribe khantouna ding le ngaichat ahin khohsah dingin temna akineije ati.

TSA-GHQ in jong Chief Minister N. Biren Singh in Thadou chanu, chapa MLA ho jouse tahsanna aneina chungchon’a ngailutna lhingsetna ahin akivoppi jingdin jong temna aneijin ahi.

Alangkhatna, TSA-GHQ in jong Kuki namsunga tuchung BJP makaina coalition Government a MLA ho jouse kipapina le malam hinkho’a Kuki namsunga lungkhat kengpum’a nam khankho ding gelna’a kalsep khomjing tadin tilkhouna le ngehna aneijun ahi.

Police constable kilahna a pang hon result kiphonna ding’a thumna nei

Imphal, March 27: All Manipur Police Constable Male Viva Voce Completed Candidate , 2016 hon Monday nikhon December nisim 5, 2016 kum’a kibol exam kiphondoh nading’in authority ho heng’a thumna anei uvin ahi.

Manipur Press club’a thuso miho akimupi nauva chun, candidate hon toukhomna anei jouva hiche thu’a JAC semdoh ding’a kinoptona kineiya chule sorkar in result aphon nading’a thumna nei ding’a kilolna kinei ahi, ati. Mutum Rohit, president, JAC in thuso miho akimupi in, Okram Ibobi Singh lamkaina Congress sorkar in May nisim 17, 2016 kum’a athah’a recruitment test abol ahi’in, December nisim 5 nikho’a recruitment process akichaiyin, ahin, tuni chan geiya result kiphong lou ahi, ati.

BJP lamkaina sorkar in aganna thei pen’a result aphondoh nading’in ngehna aneiyin ahi. Assistant Secretary, JAC, Manichandra in Physical Efficiency Test leh Written Test kichai jouva candidate 8000 vel viva voce’a pang ahi, ati. Sorkar in police natoh’a pang nom’a, gamsung leh sorkar ding’a natoh nom’a khangthah ho ding gelna’a result aphondoh ding’in ngehna aneiyin ahi.

Ni 9 sung chelha ding “Film Making Workshop” kipanta

Imphal, Mar. 27 (DIPR): Ni 9 sung chelha ding “Film Making Workshop” chu tunin MSFDS auditorium, Palace Gate a anakipan tan ahi.

Hiche workshop hi Films Division, Ministry of Broadcasting, Government of India in Department of Informartion & Public Relations (DIPR), Government of Manipur, Manipur State Film Development Society le Film Society of Manipur toh kithokhom’a abol ahi.

Workshop a chun thinglhangmi 6 jaona in candidate 28 anajaovin, Workshop a jao ho hi Group 2 a hopkhen hidiu chule Group khat in film khatcheh aboldiu ahi. Film kibol na a hi Sumit Ghosh in Editing lang amopoh ding, Manesh Madhavan in Camera, Aruit Dutta in Sound lang amopoh ding chule Joshy Joseph Joshy in Direction lang avetsui ding ahi.

Tuni workshop hondohna kin’a chun Joshy Joseph, Deputy Director General of Films Division, Meghachandra Kongbam, President Film Societies of Manipur chule DIPR Director jong anajaovin ahi.

Dy. CM in ni 2 sung chelha ding “Farmers’Fair cum Exhibition” hondoh nanei

Imphal, Mar. 27 (DIPR): Deputy Chief Minister Y. Joykumar Singh in ni 2 sung chelha ding “farmers Fair cum Exhibition” chu tunin ICAR, Complex, Lamphelpat a hondohna ana neitan ahi.

Hiche kin hi ICAR-KVKs Chandel, Churachandpur, Imphal West, Tamenglong, Ukhrul le ICAR-RC, NEH Region, Manipur Centre kithokhom’a abol’u ahin chule TSP, ICAR-RC, NEH Region in sponsored abol ahi.

Farmers Fair hondohna kin’a chun Prof. M. Premjit Singh, Vice-Chancellor, CAU, Imphal; Prof. Srinivas Murty, Director of Research, CAU, Imphal le Dr. N. Prakash, Joint Director, ICAR Research Complex for NEH Region, Manipur Centre ho chu dignitaries in anapang uvin ahi. Tuni hondohna kin’a chun district sung munchom chuom a kon in loubol mihon alougasoh ho vetsahna jong ana neiyun ahi.

Governor’s Cup Invitation Polo Tournament khumkha hita

Imphal, Mar. 27 (DIPR):  Manipur Horse Riding and Polo Association in guonna noiya March nisim 19, 2017 nikho’a ana kipan 27th Governor’s Cup Invitation Polo Tournament, 2017 le 16th Governors’ Cup Womens’ Polo Tournament , 2017 tuni chun Mapal Kangjeibung, Imphal ‘a khumkha ahitai.

Tuni 27th Governor’s Cup Invitation Polo Tournament, 2017 kichepna’a chun Ibudhou Thangjing Polo Club in Manipur Police Sports Club-B chu goal 5-4 in ana jouvin chuleh 16th Governor’s Cup Women’s Polo Tournament final ‘a chun Imphal Riding Club in K & MM Riding School chung’a 4-0 in goljuona aneiyin ahi. Imphal Riding Club goal li ho  lah’a amasapen chu Kh.Deventy Devi in akhum ahi. Kh.Habe in jong goal ni ana khum in chuleh A.Romabati Devi in jong goal khat ana khum in ahi.

Ibudhou Thangjing Polo Club ding’a goal khumho chu  Captain M.Manihar Singh (goal ni) , P.Ojit Singh , L.Kokeshwar Singh le P.Ojit Singh ahi’uve.

Kinguon a jin-gun a pang Minister (CAF & PD/Rev/Weight & Measures) Karam Shyam in ahoulimna’a chun sorkar hin Polo-Pony venbitna ding tohguon aneidan ho aseiyin ahi. Sorkar hin Khundrakpam le Heingang a Polo-Pony vahna mun khat hondoh ding tohguon jong aneiye tin aseiye.

Sports Minister Letpao Haokip in ahoulimna’a chun hitobang kinguon hinguong Manipur Horse Riding and Polo Association  le Polo player ho apachatna thu aphongdoh in ahi.

Tuni kinguon a chun 27th Governor’s Cup Invitation Polo Tournament, 2017 le 16th Governor’s Cup Womens’ Polo Tournament, 2017 a pachanna nei team ho dignitary hon kipaman in trophy, citation le cheque ahop peh’uvin ahi.

Ni 6 lhing Craft Exhibition kipan ta

Imphal, March 27: The Manipur Apex Handloom Weavers and Handicrafts Artisans C.S.Ltd. (AWAS) , Imphal, Manipur in March nisim 27 nikho’a kon April nisim 2 chan Development Commissioner (Handicrafts), Textiles Ministry, India government sponsor na noiya Trade Centre Porompat, Imphal East’a  ni-gup ‘Craft Exhibition’ apan tauvin ahi.

Badrur Rahman, Adhyaksha, Imphal East Zilla Parishad; S Bhubol , Board Director of AWAS, P Meenakumari Devi, Project Manager of District handlooms and Textiles, Imphal East; M Sanjeev Kumar Singh, Assistant Director (Handicrafts), Office of the Development Commissioner (Handicrafts), Ministry of Textiles, Government of India, M leh SEC, Imphal kin-gon’a Chief Guest, President leh Guest of Honour’a apang uvin ahi.

P Meenakumari Devi in ‘crafts exhibition’ kibol hi gamsung’a ding’a amasapen ahi, tin aseiyin, chule customer tam thei nading’a thil khui leh thil sem hon athil sem-u hoitah tah avetsah diuvin kouna aneiyin ahi. Thilse khat chu thildang khat semna’a kimang thei ahijeh’a moh pai louding ahi, tin aseibe in ahi. M Sanjeev Kumar in weaver leh artisan hina’a identification card neilou lai hon March nisim 31 nikho kah’a akilah uva, state leh centre sorkar in phatchomna apeh ho amuthei nading uvin hetsahna leh tilkhouna aneiyin ahi. Exhibition’a handloom leh handicraft ‘a kon mi 30 vel in pan alah ahi.

PREPAK in 37th Red Army Uprising day nit; Nikho’a bandh bol ho chung’a lunglhai louna thu seiyu

Imphal, March 27: Thingnoimi kiloikhom PREPAK in 37th Red Army Uprising Day anit uvin, Secretary-in-charge Leibakngakpa Luwang in soi akaina thuso’a chun kin-gon pipen General Head Quarter’a akimang in, chule Technical head quarter, base area, training centre leh transit camp dang dang’a jong kin-gon akimang’e, tin aseiyin ahi.

General Headquarter’a kimang kin-gon’a Red Army Chief, Lt Com N Romi Meitei Chief Guest’a apang in ahi. Chamlhatna ding’a pan la’a thi ho jana pehna anei uvin, Chairman, Military Affairs Committee in houlimna aneiyin, mipin atosot diuvin kouna aneiyin ahi.

Alangkhat’a, PREPAK in thuso aneina’a chun thingnoimi ho ding’a nikho loupitah nikho’a general strike kouna aum hi agelkhoh nau thu aseiyin, hitobang’a na kitong hi party movement suhboina ding tohgon ahi, tia kila ding ahi, ati. Thingnoimi hon loupitah’a agel nikho ho’a mopohna neihon bandh leh blockade abol lou diuvin ngehna aneiyin chule atosot’a mipi jouse kipathu athot uvin ahi.

Nagaland Zoological Park in tourist ho kailut jing

Nagaland, March 27: India sah-solam gamkai hi pathen thilsem jouse kikimna le biodiversity tamna mun ahijeh’a tourist ho mitla tah gamkai khat ahi. Tourist ho kailutna ding le thingkeh le gancha ho venbitna ding in  Nagaland a zoological park thah khat semdoh anahi’e. Nagaland Zoological Park  hi Dimapur khopi a pat kilometer 6 vel gamla’a um ahi. Park sung a hi Indian Hornbill le Bengal Tiger jong muthei ahi. Hiche park hi August 2008 a chu  Central Zoo Authority  noiya mini zoo ding’a ana kisemdoh ahi. Park sung a hi ganhing ju le va tampi  busa’u ahi.

“Hiche zoo hi aletdan 176 hectare ahi’n, Sah-solam gamkai sung’a ding’a alenpen ahi.  Kumseh le mainland a kon mi 50-60,000 vel in ahung vil jing’uvin   international visitor 100 vel jong ahung jing’uve” tin Director Sentichuba Aier in aseiye.

Zoo hi jingkahlam nidan 9 a kihong’a nilhahlam nidan 4 gei kihong ahi. Kaal khat sung a nikho khat (Monday) bou kikhah ahi. Zoo a ganhing umlah a tourist ho mitla pen chu Hoolock Gibbons ahi.

Meghalaya: Bangladesh a bomb 2 pokeh jouva BSF hon gamgi a chele vahle ho phatah a vechil panta’u

Meghalaya, March 27: Bangladesh Sylhet khopi sung mun nitah’a bomb apokeh jouvin India-Bangladesh gamgi vengtup’a pang Border Security Force (BSF) ho kigingjing’a aumdiuvin thupeh akineiye  tin Inspector General, Meghalaya frontier PK Dubey in aseiye. Aman aseidan in bomb pokeh thu’a hin BSF official ho leh Meghalaya Police in intelligence input ho avekhom lhon in hitolhon chun Bangladesh a kon boina sem ding’a India sung’a hunglut kigoho suhtangna dingin pan nasatah ala lhon’e ati.

Saturday ni Sylhet a bomb pokehna’a chun police official ni pannah in mi gup in thina anatoh’uvin ahi. Thursday ni’a chu Islamic State suicide bomber khat in Dhaka Airport security checkpoint a bomb ana supoh ahi.

Thusoh Lahchom

BJP a kon kinodoh

42-Tengnoupal BJP Mandal Executive hon achesa march nisim 25 ni chun executive meeting ana nei uvin, hiche a chun Jangkhosei Haokip, Presdient Local Committee Moreh, Ngamson Haokip, President BJYM, Local Committee Moreh, Lamkho Baite, President Mahila Morcha Local Committee Moreh le Haopu Haokip, President Kishan Morcha Local Committee ho chu BJP Primary membership hina a konnin ana nodoh tauvin ahi. Amaho cheng hi achesa 11th Manipur Assembly election a Party daan toh kitoh louva achon jeh uva kinodoh ahidan BJP Tengnoupal Mandal thuos chun atahlang in ahi.

Blood donation

CAF & PD Labourers’ Welfare Association member hon Monday nikhon ‘Give Blood Together’ ti thupi in Mega Blood Donation camp’ IHBT, RIMS, Lamphel’a abol uvin ahi. W Olypus leh Radio Therapy’a cancer natna nei ho ding’a thisan pehna camp abol-u ahi.

Bomb kimu

Ukhrul Police station noiya um Hundung Cement factory’a Monday sun nidan 11 don in bomb khat akimudoh in ahi. Khosung mihon bomb amudoh uva police ho hetsahna aneiyu ahi. Police honjong gangtah in bomb kimu namun adellut uvin, aladoh tauve.

Kikhailih

Assam lailung’a um Morigaon district hopsung’a um Gosorguri kho’a tuni chun chapang khat  a  insung’a ana kikhailih in ahi. Chapangpa hin ipi lungnopmona aneiya kikhailih ahidem tivang tugeiyin hetchen ahinaipoi. Ahinlah Police in a inkom’uva chengho thudoh aneina’uva chun lungdon umtah thilkhat ahin hedoh’uvin ahi. Chapangpa  nu le pa hi nikhotha lo’a kivah lhon ahi. Chuleh inchen hahsat jeh leh boina dang dang jeh’a niseh a kina ji lhon ahi. Hihe ho jeh’a hi chapangpa nu hin thumvei jen ahinkho kilah ding ana guot ahi. Police in aseidan in chapangpa hin anu in ahinkho kilahding aguot ho amuji jeh’a hi ama hinkho jong akilah hiding in ginchat ahi ati. “Chapang pa tichung a chun kivohna maha aumpoi. Chuleh athidan ho hi ivet’a ahileh akikhailih mong mong ahiding ginchat aum’e. Chapangpa hi jalhang hinkho’a jong itobang mi ham hetdohna ding in athemjilna mun’a jong thudoh phabep akibol’e” tin SP Swapnaneel Dekha in aseiye.

Athisa kimu

North Tripura district , Dharmanagar a kum 16  numei chapang khat luongdamsa akimudoh’e tin Police a kon kimu thulhut in aseiye. Thulhut in aseidan in  numei chapangnu chu akitha masang’a kisuse ahiding ginchat ahi ati. Numei nu chu Pol-IX simlai ahi. Amahin Saturday ni nilhah’a chu melhetlou mikhat’a kon phone call amujouva In ana dalhah’a Saturday ni jaankim’a chu Link Road a Ingem khat a aluongdamsa ana kimudoh ahi tin Superintendent of Police Manik Das in aseiye.  Hiche thu toh kisai in Police in Rajat Tanti (22) kiti mikhat amandoh in ahi. Police in thu adohna a chun Rajat Tanti in chapang nu asuhset dan le atha dan ho kichehtah in aphongdoh’e tin SP in aseiye.

           

Editorial

Naga ho gam jouse kigom dia kiseijing

                               Naga ho chenna jouse kivaipohna khat nuoiya umdi hi India govt leh NSCN (IM)in 2015 kum’a kinoptona ananeina’a jao ahi tia IM lamkai Th Muivah in ahinsei kit jeh in athah beh in alunglinglao loi ahung umkit tai. Hiche thu kisuhgin kit jeh in Assam ah kiphinna neiloi ana umpaiyin, Manipur’a vang Opposition Congress hon BJP govt khetna in aneipaiyun hinlah tutadi a din hitia mipi kiphinna lomvang aumhih nai. Chief Minister (CM) N Biren CM panmun sang’a Manipur gamgi bitdi hi khohjo ahi ati chun imajouse asei ahitai. Hiche Framework Agreement (FA) thu ah Manipur CM in Prime Minister leh Home Minister gaki mupi jongleh ahindonbut lhonnadi chu hetsa ahi. Centre in Manipur gamgi kehponte ti thu asei hi khatvei bep hilou, Th Muivah in tuchung’a Naga gam jouse kigopdi FA ah ajaove ahintikit joujou chun Home Ministry in jou thu ahibouve tin suhthengna ahinneipaiye. Alangkhatna Th Muivah jong hin thu suboi thei kahi tina dia khatvei veileh hiche thu ahinseiji jong himaithei, Centre toh asunglang’a kinoptona khat neijongleh Naga chenna jouse kigopkhomdi ti hi thil hahsatah ahijong Centre in ahet mama di ahi. Naga chenna jouse kivaipohna khat nuoiya akigopdileh atohkhahpendi hi Assam leh Manipur ahin Assam leh Manipur suhlung hangdi kiti hi Centre injong agel lou behdi khat ahi. Tu deh-deh-a Assam leh Manipur hi BJP govt in apoh ahijeh in ipi kiseijongleh hiche State teni’a BJP govt in Muivah thusei hi apomloudi khat ahi. Naga gam jouse kigopkhomna dia hi Arunachal Pradesh leh Myanmar gam jong atohkhah ahi. Arunachal Pradesh akon Centre’a Minister (Kirren Jajiju) umkit nalai ahijeh in Arunachal gam Nagaland a pehdohdi kiti jong mang tobang hidi ahi. Myanmar ‘a Naga gam hola Khaplang in apohna lenjo ahiban’a Khaplang leh Myanmar govt nin Ceasefire kinoptona aneijeh in IM to India govt kikah-a kinoptona jeh-a Myanmar a Naga gam Nagaland a alutdi kiti jong tutadi a dia van’a ga tobang ahi. Nagaland Naga ho beh hin State dang’a kon Naga ho Nagaland a alutdiu adei u hile thu khat ahin, midang theida tamjo nalaidibon u ahi.

                   Hiche jeh-a hin Th. Muivah in Centre toh kinoptona Framework Agreement ah Naga ho gam jouse kigopkhomna di thu aum’e tijongleh Centre in IM ho ajoulhepna leh phat mansah sahna dia IM ho lunglhai lhaina di asei ham bep hidi ahi. Manipur’a jong hi Election dikon teng deh-deh leh hiche Naga Integration (Greater Nagaland) thu hi phaicham mi hon vote holna’a neidi ham, govt kitungsohsa khat suhboina dia mandi bep a pha saloi umji ahi. Framework Agreement kiti hi kinoptona hilou, alhangpi leh athuguol kinoptona bou ahidan avel vel’a muntin’a kiseisa ahi. Manipur Naga pumpi’n jong IM ho thu angailou mutheina jong um ahi. Tuchung Manipur MLA Election’a jong chu IM hon Naga Area jouse’a thu aneijou u hileh asot u NPF chun Seat 10 lah a 4 bou amuloudi ahi. Naga Area jeng’a jong chutitah a hatjou lou chun North East akhup athal’a alekadahdi jong tahsan umlou ahi. Hijeh a hi Naga Framework Agreement kiti jong hi khat le khat chi le nam’a kivetdanadi leh politics kiboltonadi bep hidohdan ahitai.

Blankfire

Mi kiti vang hi akoi koi ahia ichomcha hilou eijong midang te jong kibang bep hina tam ahi. Ei le ei election kitet jeh a midang kai, midang ho kitet jeh a ei kikaidoh thei jong ahi. Nam khat sunga akihatet to jeh uva anam in MLA khatcha neiloulo ho sangin vang iphajep uve tidi ahi.