ET March 27, 2017 News (Local, Thusoh Lahchom, Editorial, Blankfire)

ET March 27, 2017 News (Local, Thusoh Lahchom, Editorial, Blankfire)

311
0
SHARE

CM N Biren, PWD Minister Th. Biswajit leh official phabep New Delhi jon’a cheu

Imphal, March 26: Assam Minister Sarbanand Sonowal in gamsung gamgi kehso nading sorkar in atoh louding ahi, tia asei jouvin Manipur Chief Miniter Nongthombam Biren injong gamsung gamgi ventup ding hi sorkar in agelkhoh pen ahi, tin avel in aseikit in ahi.

New Delhi jon’a akipatdoh masang Imphal Tulihal Airport mun’a N Biren in thuso miho akimupi na’a chun gamsung hi sorkar gelkhoh pen ahi, ati. Framework Agreement chungchang’a CM Biren in gamsung tohkhah nathei thu’a kinoptona kisem louding ahi, ati. “Gamsung akikehso ding leh Chief Minister kahi lo ipi umding ham?” tin Biren in aseiyin, chule NSCN-IM lamkai Th Muivah thusei hi Union Home Ministry in kicheh tah’a asuhtheng ahitai, tin aseibe’e.

NSCN-IM in asei tobang centre in thuso aneipoi, ati. Chief Minister N Biren, PWD Minister Th Bishwajit chule government official phabep New Delhi jon ding’a kipandoh-u ahitai. Monday sun nidan khat teng Prime Minister Narendra Modi akimupi diu ahi. “Kholjinna hi Prime Minister in kouna anei bang ahi’in, Union Government lamkai luboh phabep kakimupi maitheiyu ahi”, tin PWD Minister Th Bishwajit in thuso miho heng’a aseiyin ahi.

President pa akimupi diu ham, ti thudoh aneiyu chun Bishwajit in, tu dinmun’a President kimupi nading’in phalna kala pouvin, phat in aphal leh kangaito maitheiyu ahi, tin adonbut in ahi.

DESAM bandh bol sung’a khopi’a um dukan ho kikhah, gari lhailou

Imphal, March 26: DESAM in nidan 17 bandh abol jeh in gamsung’a kimanchah atongkha in, dukan leh cinema hall jouse akikhah in ahi.

Bandh sung’a inter-state bus service leh passenger auto service jong alhai pon, ahin, private gari ho ache in ahi. Sunday nikho ahitoh kilhon in Khwairamband Keithel akikhah in, ahin, bandh aumjeh in nilhum in dukan ho akikhah in ahi. Democratic Students Alliance of Manipur (DESAM) in Saturday jan-kim’a kon nidan 17 bandh akou ahi’in, MLA Ashab Uddin hi gamsung mi dihtah ahipon, Parliamentary Secretary ding’a akilhen hi sorkar in ladoh hen, tia thumna aneiyu ahi.

DESAM bandh bol tilouva Manipur Muslim Welfare Association injong Saturday jan-kim’a kon Sunday jan-kim chan Framework Agreement thu’a ‘white paper’ apehna diuva kiphinna anei uva bandh akou ahi. ILPS Bill chepi nading leh ‘white paper’ apeh diuva thumna aneiyu hi sorkar in boldoh ding’a aseijeh in bandh aladoh tauvin ahi. Thilse aso louna ding’a khopi sung’a security akikoi be in ahi.

Noney’a UNC president Gaidon Kamei loupitah’a liemna neiyu

Imphal, March 26: UNC president Gaidon Kamei liemna kin-gon Longmai (Noney) Bazar Marketing Shed mun’a loupitah in Sunday nikhon amang uvin ahi.

Achenna kho’a Longmai Area Villagers Council, Rongmei Naga Council, Inpui Naga Union, Naga Women Union Longmai Area, Longmai bazaar Board, Zeliangrong Students’ Union Longmai Area leh Longmai Area Churches Fellowship in liemna kin-gon agon ahi. Gaidon Kamei in ahoulimna’a boina leh hahsatna hohi kihoutoh’a seilhah thei ahi, tin aseiyin ahi.

“Itobang dinmun hijong leh Naga nam mihon athaneina hi ajohdoh louding ahi. Naga ho kihetna leh gam leiset kijoh mang louding ahi’in, japi hi thahatna ahi.

 Mipi thahat ngaichat ahi pet tah ahi”, tin Gaidon Kamei in houlimna aneiyin, chule Naga nam ding’a songkul’a lut ding chan hijong leh kanom’e, tin aseibe in ahi.

Makhan khomite’n M Niister Kayisii kipapi’u

Kangpokpi, Mar.26:  Kinguon chu Tadubi Circle Union (TCU) , Makhan Union, All Makhan Youth Organization chuleh Makhan Khuman Men Group in kiguom’a aguon’u ahi.

N  Kayisii in kinguon a ahoulimna’a chun Tadubo AC miho chung’a akipana le hitobang kinguon lolhin na ding’a hung kisalal kiloikhom ho chung’a akipana aphongdoh’e. Aman ahoulimna’a chun society sung’a kikhelna khatbeh pohlutna ding’a na atohding danho aphongdoh in ahi. Gamsung mipiho’n jong kilungtoh tah’a na atohkhom’uva boina umlou society khat semdohna ding’a pan alahdiuvin temna aneiye.

Tuni kinguon a chun lamkai minthang tah tah movitational speaker phabep in houimna aneiyuvin ahi.

March 28 le JACAATB in Consultation Meeting neiding

Ccpur, Mar 26: Manipur government in JAC-AATB  heng’a kihouna ding’a tepna lekha anapeh toh kilhon’a ahunglhung ding March nisim 28 le JAC-AATB in YPA GHQ Hall, Hiangtam Lamka Public Consultation anei ding ahi.

Mijousen ngainatah’a pan ahunglah cheh din JAC-AATB in tiemna aneiyin aneiyin ahi. Amun’a hung pangtheilou di hon jong March nisim 27 chan’a jac.tribals@gmail.com a ngaidan thot jing thei ahidan jong JAC-AATB thuso chun atahlangbe in ahi.

Hetthei khatchu achesa ni phabep masang’a chu Chief Minister N. Biren Singh in CS O. Nabakishore mangcha’a JAC-AATB ho kihoupi March nisim 25 le kihoupi dia lekhathot ana nei ahin, hijongle JAC-AATB in Public Consultation kichai jou phatle kihoudia hungbep diu ahidan ana hetsah’u ahi.

MNRF in Th. Muivah dem

Imphal, Mar 26: Manipur Naga Revolutionary front(MNRF) thuso khat in atahlangna ah;  Th. Muivah in Northeast a Naga te gopkhom’a um ding ahitai tia thusobu khenkhat a anasei chu bul-le-bal umlou jou thu ahin, Manipur a Naga ho lungnohphah nading maimai aseidoh’e tin demna ana nei uvin ahi.

Hetthei khatchu niphabep masang’a chu nitin thusobu ho’a Th. Muivah in NSCN(IM) le Indian government Framework aggrement a hi Naga integration jong jao ahi tia ana phondoh ahin,  Th Muivah thusei jeh’a Assam le Northeast state chuom chuom ho’a lungling laona ana um man in hinlah janni chun Centre government in Th. Muivah thusei chu ana nelkal uvin chule mipi Framework aggrement in State dang ho atohkhah louding ahidan jong ana phongdoh uvin ahi.

Hiche thu toh kisaiyin Assam a jong boina anasoh man in chule Manipur a jong Framework aggrement toh kisaiyin Bandh ana kikoulo in ahi.

Thi-long kimu, tou-mun kiphinna um

Imphal, Mar 26: Patsoi Police station noiya um Konthoujam Leirembi Leikai vengsung’a um pukhri khat’a Sunday jingkah in thi-long khat akimudoh in ahi.

Athipa hi Mutum Jiban Singh (37), s/o (L) M Rajen ahi’in, Khonghampat Mayai Leikai’a cheng chule tu-leh-tu’a Konthoujam Maning Leikai’a cheng ahi. Thulhut dungjuya achesa March nisim 22 nikho’a kon Jiban Singh hi kiholmo ahitai.

Thi-long kimuna nga-kul hi Basanta kiti mikhat’a ahi’in, iti thi ham, ti het ahihih laiye. Ahin, thulhut kimu masa dungjuiya, twiya lhum’a thi hiding’a ginmo ahi. Police hon thi-long RIMS Morgue’a akoi tauvin ahi.

Leikai sung’a thilsoh deilou vetsahna in tuni chun leikai nupi hon toumun kiphinna ana nei uvin chule hitobang natoh hi koi khutnung ahi ahung kiphondoh nadiuva ngehna aneiban uva akisaipi mopohna neihon kinchel’a amatdoh loichel diuvin jong ngehna aneiyun ahi.

Territorial Integrity kelouna ding’a pan kila ding ahi: N.Biren Singh

Imphal, March 26: Manipur territorial integrity hi kahinkho sang’a manlu jo ahi’n itih chan hijong le Manipur gamsung neokhat jong midang khut’a kipedohlou ding ahi tin Chief Minister N.Biren Singh  in tuni Delhi juon a alendoh masang’a Imphal Airport a thuso miho toh akihoulimna’a chun aseiye.

Biren in thuso miho heng’a aseidan in Framework Agreement hi Prime Minister  amatah le Home Ministry in kichehtah’a Manipur gamsung atohkhohlou ding ahidan aseilhon ahi. NSCN-IM luboh Muivah in tumasangjep’a asei chu ama lunggel akisei ahibouve.Thuso miho’n ILP chungthu toh kisaiya thudoh aneiyu adonbutna’a CM in aseidan in, hiche thu hi  election masang’a anathip ahitan, hijongle lamkai cheng le thulahthei phabep ngaidan kidong ding hiche dungjuiya chu maban’a kal kisepding ahi tin aseiye.JiribamMLA Ashab Uddin hi India citizenship neimi khat ahinaban’a mipi in alhendoh ahi. HIche masang a jong nivei tah Pradhan ana kaidohsa ahi tin thuso miho thudoh ana donbut in ahi.

Tuchung akholjin nah’a hi CM in PM heng’a Manipur boina jouse alhutding chuleh maban’a kalse ding dan ho jong aseikhom lhon ding ahi. Biren hin tuchung akholjin sung a hi President of India, BJP National President le Home Minister jong akimupi ding ahi. CM Biren hi Minister Works/IPR Th.Biswajit Singh in akilhonpi in ahi.

Lilong Panchayat BJP councillor akikaimang’e kiti hi jouthu ahi: Shyam

Imphal, March 26: Langthabal MLA leh CAF and PDA Minister Karam Shyam Saturday thuso’a ama worker hon BJP councillor, Lilong Panchayat akaimang uve, tia kisei hi jouthu ahi, tin suhthengna aneiyin ahi.

BJP Councillor Thounaojam Amil amatah injong hichet thu’a ama kikaimang na aumpoi, tia aseiya chule amah in sum thu’a boina suhlhapna ding’a Lilong Nagar Panchayat sem ding’a LJP councillor hotoh amacham’a pan alah dan thu jong asei ahi, ati. Ex-MLA O Joy worker hon Councillor Amil LJP hotoh akilhon’e, ti thu ajah uva Karam Shyam worker khat loiho inmun’a Amil hol’a ache na uva boina kipan ahi, tin Minister Karam Shyam in aseiyin ahi.

Langthabal AC MLA jong ache in thilsoh kholna aneiyin chule Wangoi SDPO jong athu kholna’a pang ahi, ati.

Mi phabep in jouthu athe thang hi vangset umtah ahi’in, Minister pa minset nading tohgon kisem ahi, tin Shyam in aseibe in ahi.

 

Thusoh Lahchom

Lei(Bridge) kikhah

Tuni chun Myanmar Nampalong le India international gamgi’a um Namphalong kailhang thupeh um masanlouva akikha chun mipi ho niseh kimanchah dan sangtah in atongkha’e.

Hetthei khat chu achesa March nisim 4, 2017 nikho’a chun Border Pillar No.76 a um Haolenphai kho haosapu Saw  mill Myanmar Army ho ho nana suse uvin ahi.

Civil society tampi in jong thilsoh achet achai ho aphatcha’a anarecord a  k iconcerned  department heng’a vel tampi ana pehlut sa’u ahitai.

 

Social Service camp

 District  Library  Cum Youth Centre,  Athokpam  Thoubal leh  NCC Unit, Chaoyaima Higher  Secondary  School, Thoubal in Deputy Commissioner Office, Thoubal,  Athokpam  Bazar’a ‘one  day  social  service  camp’ abol uvin ahi.

Camp’a khangthah lamkai leh NCC volunteer 80 vel in pan ala uvin ahi. AK Lolendro Singh, ANO, NCC Chaoyaima Hr Secondary School, Thoubal leh Advisor, DLCYC AThokpam, Th Priyokumar, Lecturer, DM College of Commerce in jong social service camp’a pan ala uvin ahi. Kin-gon hi Swachh Bharat Mission noiya kibol ahi, tin Akoijan Jiten, Secy. DLCYC in aseiyin chule khopi thenna ding’a mijousen pan anei ahi, ati. Tahsa damtheina ding’a kikhelna pohlut na ding’a khangthah hon pan lentah aneiyin, mikhat in lamlen asuhtheng ding ahipon, ibon uva pan ilah diu ngai ahi, ati. Thoubal Municipal Council in camp’a kimang nen suhthengna manchah chom chom apeh jeh in Jiten in kipathu jong aseiyin ahi.

 

CM in DESAM kiphinna dihsalou

Simlai kiloikhomna DESAM hon kiphinna anei hi san thei dol hilou chule ajeh kisuhlou ahi, tia Chief Minister N Biren in donbutna anei toh kilhon’a simlai kiloikhom ho lunghan kibena ahiding ginmo ahi.

Jiribam Assembly constituency MLA Ashab Uddin hi gamsung mi dihtah ahipoi, tia Parliamentary secretary panmun apeh lou diuva DESAM in kiphinna anei ahi. Ashab Uddin in Panchayat Election nivei atet ahitan chule Jiribam Assembly constituency mihon lamkai ding’a alhen-u ahi, tin Chief Minister N Biren in donbutna aneiyin chule India gam-mi hi’a, election hi dan dungjuiya kibol ahi’in, hiche chung’a state sorkar in ipi abolthei ding ham, tin Biren in aseibe in ahi.

Editorial

Nehguh chahguh bol lhomna di tohgon

Gam khat, nam khat hin minthanna leh minsetna jatjat anei chiehna’a Manipur akitileh minphatna khat le ni nei jongleh aminsetna lah a ‘corruption’ (nehguh chahguh) kiti hi athupiloi hidi hidi ahi. Heche jeh-a hi N Biren govt nin hiche thua ipiham khat bol in aphai ati hidiham, ahilouleh Prime Minister Narenda Modi in gamsung pumpi’a ‘corruption’ doudi atijeh-a State govt jong hin mi mumudi beh-a ipiham khat beh bol angaiye atijeh-a ‘Anti-corruption cell’ kiti nehguh chahguh bol ho douna dia office khat ahinboldoh hithei ahi. Hiche Anti-Corruption Cell a MCS officer khat leh MPS officer khat mopohna hidi, hehna (complaint) jouse ajihlut lhondi ahi. Ahin hiche officer teni hin koima gotna pehna thei tha anei lhonlou, athu ala (Case) chu Chief Secretary leh Additional Chief Secretary 2 jaona Committee a apehlut lhon ding, chujou teng Chief Minister kom’a kilhut nalaidi bep ahi. MCS leh MPS officer teni hin ‘complaint’ Case jihlut le jihlut lou di thua tha aneilhondi jeh in amani kom’a tao masa di hung tamdi tina ahi. Nehguh chahguh hi kon ipiti akham got vang’a mijousen lampi khat beh-a abol ahijeh in suhbeiheldi vang hahsa thou thoudi, ahia lhomsah divang hithei mamadi ahi. Chief Minister office ah hitobang office akihongtai kiti maimai jeh seh seh-a jong nehguh chahguh bolgo hon lung sa-ihna khat ahinneidiu ahi. Koimachan sum pehguh boltahihleh kon koiya kon ipi anehguh diham tijong um ahi. Ahin nehguh tamjo leh alenjo hi koima pehguh hilouva mi mudi khat amudiho hetlouva kinehmang loi, khantou machalna natohna di sum ho kinehmang loi jong aum’e.

                  Mipi hohin a lhalo (tolop) u ham, anikhotha u ham khat akilahpeh jeng ule bou alunghanpiu ahi. Ahin mipi phatchomna di govt sum ho khat nin akinehchaileh koiman khoh asahlou tobang ahi. Hiche Anti-Corruption Cell in aboipidi hi hitobang mipi phatchomnadi leh khantou machal natohna dia govt sum kinemang ho hung hahi pendi ahi. Achutileh koidang sang’a MLA/Minister leh govt officer len langho nehguh chahguh suhlhomnadi tohgon hidi ahi. Grade IV khat corruption bol thu koiman Chief Minister gei lhung dia hehna aboldi tahsan umlou ahi. Complaint bolho min le umna, hina leh athu umdan kichiehsel’a jihlutna um masadi ahijeh in kiseidoh loudi kiti jongleh koiman khat ‘complaint’ amoh bolkhum di jong ginchat umlou ahi. Ipi hileh nehguh chahguh hi suhbei/suhlhomdi akitileh achunglang (milen milal leh govt officer len lang ho) akon’a kipat ngaidi ahi. Kon mengcha lawng a awpeh diham kitidan’a abolthei ho chung’a hehna (complaint) boldi aumdi jong tahsan ha umlou ahi. Corruption douna dia Vigilance Department jong umsa ahin achombeh-a Anti-Corruption Cell hung kikoibe hi ichan hung phachom di hinam, ahilouleh khat le ni bolchahna dia hung kikoi hidiham hinvetdi ahitai.

 

Blankfire

Ithil semdoh khat leh iboipi cheng khat hi eiman thupi tah a igel vanga midangin ima a agellou jong umdi ahi. Ihina jong sangtah a ikigel vanga kon hole jong atilou umthei ahi. Hiejeh a chu ithilbol jong chutitah a kihitheisahpi loudi eima jong kigel sang behlou di ahijenge.