ET April 9 News (Local, National, International, Thusoh Lahchom, Editorial, ET Taona)

ET April 9 News (Local, National, International, Thusoh Lahchom, Editorial, ET Taona)

580
0
SHARE

JSCC in class XII Physics exam bol kit ding’a thumna nei

Imphal, Apr.  8: AMSU, MSF, KSA leh SUK kiloikhomna aumkhom na Joint Students’ Co-Ordination Committee (JSCC) in exam kipat masang’a ‘thudoh’ (question) kimu’a Physics paper avel’a abol kit diuvin thumna anei uvin ahi.

JSCC co-convenor, S Subhashchandra in thuso miho akimupi na’a, hitobang thilsoh hin themjilna atohkhah ding ahijeh’a sangtah’a lahding ahi, ati. Council of Higher Secondary Education Manipur in Class XII Physics exam hi April nisim 10 nilhah nidan 1 kah’a avel ‘a bol kit nading’a aphondoh diuvin aseiyin, chule themmona neiho gotna apeh diuvin aseibe in ahi. JSCC in DESAM kiloikhomna hen’a DESAM volunteer hitobang’a pan la um’em, ti kholna anei diuvin asei uvin ahi, ajeh chu DESAM organisation secretary ahi tia kisei E Mushuk khat hiche thu’a kiman ahi.

Alangkhat’a, Subhashchandra in Imphal West Police Cyber Crime Unit in aphatcha pan alah jeh uvin akipapina thu aseiyin chule gangtah’a athu kholdoh ahi’a themmona neiho gotna apeh diuvin ngehna aneibe’e. Athah’a state sorkar in asemdoh Anti Corruption Cell chule Vigilance department in athu hi giltah’a alah ding’in temna aneiyin chule Deputy Chief Minister leh Education Minister in agelkhoh ding’in aseibe in ahi.

Tribal martyr 9 ho vuidoh ahina ding’a Guv’ Dr Najma in ngehna nei

Imphal, Apr. 8: Manipur Governor Dr Nazma Heptullah in JAC Anti Tribal Bill heng’a boina thu aseilhah diuvin temna aneiyin ahi.

“ILPS toh kisai Bill thum phatsahna akipeh jouva thinglhang district’a boina um’a, achesa nisim 31/8/2015 nikho’a Churachandpur District’a khangthah 9 in thina ato ahi’in, kum khat aval tan, thilong ho khat tilou adang se morgue’a lahlouva um nalai ahi. Insung miten thi lhahna kin-gon anei theilou chule angailut acha/asopi hi avui theilou ahi. Phat akikhel tan, 11th Manipur Legislative Assembly election jouva sorkar kisemdoh’a sorkar thah in boina suhlhap nading’a pan alah hi kakipapi’e”, tin Najma Heptullah in aseiyin ahi.

“Democracy gam’a cheng ihiuvin, boina hohi toukhomna neiya seilhah ding hi alampi ahi. Kihoukhom’a seilhah theilou boina umlou ahi’n, ‘democracy’ chung’a tahsanna inei diu ahi. Hiche jeh’a avel vel’a, adeh’a JAC member hon athi ho lhahna kin-gon anei uva chule toukhomna’a kipe thengtah’a apan diuva temna kanei ahi”, tin Governor Najma Heptullah in aseibe in ahi.

Question paper leak thu’a Th. Radheshyam,Edn. Minister in hilchetna  nei

Imphal, Apr. 8 (DIPR): Rashtriya Madhyamik Shiksha Abhiyan (RMSA), Babupara office mun’a Hon’ble Education Minister Shri Th. Radheshyam in thuso miho kom’a asei na’a chun khantou na toh kitoh in   modern technology ho ahung kiman pan tan ahin mipi ten aman chah ding dan athep diu vin temna ahin nei in ahi.Tuchung’a Council of Higher Education Manipur Examination, 2017 ah hiche modern technology ho’a kon in Physics question paper ana leak khan ahi.

Hiche tobang thisoh hi tukum bou ahipon ning kum ma jong anasoh sa thil anahi chuleh hitobang thilsoh ho’a kon’a kiven nading nga lunggel leh ngaidan tamtah ana kinei naban’a implement  jong anakibol go ahitan hilah phat ana um lou jeh in ana kibol man tspoi tinjong aseiye.Tukum in ema anakibol thei tah lou vang in  examination centres mun 92 a flying squads chuleh student’s organisation hon jong government ho toh kitho khom’a  free and fair examination aum nading’a pan hatah’a ana kilakhom ahi.

Hitobang nga pan hatah’a anakilah jeng vang inmPhysics question paper chu  watsapp chuleh facebook dung’a  nidan 9:20 am exam ni in ana leaked khan ahi,ahin hiche thilsoh hi asung nga mi ho hiding in gin mo na akineiye tin Minister in aseiye.Hiche thilsoh toh kimat in case registered akibol in Cyber Crime Branch hon mi 16 aman un hiche holah’a mi 14 hochu akum lhing lou chapang ahin chuleh mi 4 ho vang hi mipi lhing ahitaove.Hiche mipi lhing 4 hovang ajao vang uvin alamkai/aluboh  ahilou hetchen ahitoh kilhon in bail in lha doh ahitai.Tuchan in koi lamkai na ahi tivang kholjing ahinalai’e tin jong hetsah na anei in ahi.

Aman aseibe nah’a chun koi hijong leh hiche tobang thilsoh na’a koi lamkai na ahi akihol doh teng leh department enquiry leh law dung jui ja got na kipe ding chuleh hiche case kikhol jing ahi toh lhon’a mipi ten jong ahin kithopi jing diu vin jong aseiye.Hiche kihou khom na achun Commissioner of University and Higher Education, Chairman of Council of Higher Secondary Education Manipur chuleh officials of education department hon jong pan anala uve.

Island gamkai mipi khohsahna jalla free medical camp umding

Imphal,Apr.8: Kangpokpi District hopsunga um Island Sub Division gamkai a cheng miho khotona jallin Sadar Hills Autonomous District Council, Kangpokpi in free medical camp boldin tohgon aneijin ahi.

  1. Thangboi, MCS, Chief Executive Officer, Sadar Hills Autonomous District Kangpokpi in seina’a, tule tua Island Sub-Division gamkai mipin angaichat khoh dungjuijin ahunglhung ding April nisim 12 le Laikoiching mun’a free medical camp kibol ding, sum le pai senglouva Island Sub Division gamkai mipi te manbeija loi le ai jong kihoppeh ding ahi ati.

Aman aseibena’a, hiche nikho le hin doctor phabep le Specialist hon jingkah lam nidan 10 apat nilhah nidan 3 chan mivet avetdiu ahi.

Hiche chungchon’a jong free animal camp jong anikho mama le amun mama a kibolding, gancha loukapna jong kineiding ahi tinjong DK.Thangboi jin aseibei.

TSA Sadar Hills lamkai khat le aloipa chung’a khut kilhana chunga CSOs Sadar Hills in nopmo sa

Imphal, Apr.8: Gollhang chapang phabep khat in Motbung khojol’a TSA Sadar Hills lamkai khat le aloi khat chunga jana neiloutah’a khut alhanau chunga Civil Society Organization Sadar Hills in nasatah a nopmo sahna tunin aphongdoh un ahi.

CSOs Sadar Hills Spokesperson, Lamcha Chongloi in thuso miho kom’a aseina, achesa April nisim 5 nichun Taloulong Damdei Christian College a Zillai gollhang chapang phabep khat in CSOs Sadar Hills kiloikhomna noija um TSA Sadar Hills Information Secretary Helen Lhouvum le aloipa Satjagin Lotzem chunga khut analha un ahi ati.

Aman aseibena’a, hitobang’a gamsung namsunga dinga aphat mantamtah itcha louva kimangcha jalhang kiloikhomna lamkai khat chunga khut kilha jeng hi adeh’a Zillai ho natoh thilbon ding jong ahipon chule avoh teniu hi amaho khankho ton’a kimangcha lamkai ahijong ahailou heldiu ahin i-ati le jana neilou hel’a hitobanga hi chonjeng’u ham tin CSOs ho lungnop mona le phamo asahnau aphongdoh in ahi.

Tulai adeh’a themjil chapang hon umcha pha angaisang uva, anu apa teu titah louva asanga lenjo le alamkai ho jana neitah’a akoiju akul’in, hitobang chapang umchaje hechu insung keuseh hilouva gam le nam adia jong nikhat le kinepna le kingaina theitah a lolhinna aneithei ding ahi tinjong Lamcha Chongloi in aseibei.

Tuchung thilsoh tobang hi adeh’a Kangpokpi District Sadar Hills igamsung uva akihekha behseh pon, khat le khat kijatona neitah’a phat hitichan hi ihung chekhom’u ahitan tu khangtouna ahung machal laitah’a themjil chapang ho’a kon’a hitobang chomchan hoiloutah ahung umkhah hi jachat jong aumin, vangset aumlheh’e.

Deiumlou tah hijongle anasoh ahitan, hijongle tunung tuban’a avel’a hitobang thilsoh hi aumkit louna din minu mipa ten jong nasatah in pan hin lauvin lang chule themjilna mun mopo hon jong ngailutna neitah a pan alahdiu vin ngehna akineije tin CSOs Sadar Hills spokesperson pan aseibei.

Tuchung thilsoh hi angahna din ngailutna neitah in akiseilham tan, aban’a hitobang umcha hoilou le alhangpia themjil chapang umchan dia kilom hel hi avel’a nao te hon jong abolkit tahlou vin hetsahna akineije.

CSOs Sadar Hills noija kikhailha kiloikhomna lamkai hohi genthei hahsatah’a inchen louchen donthei loukhop’a lhai le kimangcha jeng ahin hiche hi khangthah ten hetpehna aneidiu akul lheh e ajehchu nikhat le hiche kiloikhomna hou hi amaho chunga ahung lhunna jong umding ahi.

Ngailutna, kihepi chule khat le khat kijato a hinkhomna joh khohsah cheh din ikitem uve tin CSOs Sadar Hills Spokesperson pan ngehna aneijin ahi.

Silchar’a um Bengali thuso’n MLA Ashab Uddin in khamnatheiya kivei hotoh kisaina aneiyem, tia thudoh nei

Imphal, Apr. 8: Silchar’a um Bangali niseh thuso khat in Jiribam Assembly constituency MLA Ashab Uddin in Bangali khamnatheiya kivei (drug mafia) hotoh kisaina aneiyem, ti thudoh anei uvin, thulhut dungjuiya Ashab Uddin hi drug’a kivei Assam police hon avel vel’a amat mikhat in aliem ahi, ati.

Manipur Legislative Assembly’a Bangali MLA masapen chule Parliamentary Secretary panmun tuh’a MLA Ashab Uddin hi achesa April nisim 4 nikho’a Sonia Assembly constituency, Assam gam’a loppehna kin-gon’a pang ding’a che ahi. Kin-gon hi Gulam Owajid Barbhuiya @ Tinku in agon ahi’in, amahi Assam Police hon khamna theiya akivei jeh’a avel vel’a amat ahitai. Kin-gn’a Pradhan, Ram Nagar GP, Assam, Mumimur Raman Bhabhuiya @ Mumin jong pang ahi. Mumin jong hi Pradhan ahi masang’a police hon avel vel’a thudohna anei jing ahi.

Amani toh MLA Ashab Uddin in kiloikhomna anei dan hin thudoh tamtah aumsah in ahi. Myanmar ‘a kon Sonia AC, Cachar’a khamna thei kipolut ahi, tin thulhut in aseibe in ahi. Ahin, niseh thuso chun Gulam Owajid Barbhuiya @ Tinku leh Mumimur Raman Bhabhuiya @ Mumin khamna theiya akivei tapoi, ati’in, hijong leh intelligence thulhut in sumkol vei dan hi angah loulai ding’a tahsanna aneiyu ahi. Hiche thu’a Ashab Uddin in thuso miho akihoupi poi, tin niseh thuson aseibe in ahi.

Minister Thongam Biswajit in Charei Khudol Exhibition hondohna nei

Imphal, Apr. 8, (DIPR): Minister of Works, Power, Rural Development & Panchayati Raj, Commerce & Industry, IPR, Administrative Reforms & Training, Thongam Biswajit Singh in tuni chun Eastern Ground maiya um Panthoibi Arcade, wangkhei Charei Khudol Exhibition a Charei Khudol Exhibition  hondohna aneiyin ahi.

Tuni kinguon a chun Deputy Chairman State Planning Board S Rajen Singh, Handloom Promotion Council a kon Chingtam Luwang  chuleh Project manager, District Handloom & Textiles, Imphal East, P.Meenakumari  jong Kin neipa le Jin-ja’um in apang’uvin ahi.

Sorkar in Anche le theiga ho man kholchilna nei

IImphal, Apr. 8, (DIPR): Manipur gamsung a niseh kimanchahna thilkeu ho man akhanjing suhtang na ding lunggel neipum in tuni chun sorkar in anche le theiga ho man (Price) kholchilna abol in ahi. Anche le thei ho man hi lhamasa a sang in akemsuh in amavang aphat dungjuiya kimu theiga ho le anche ho man jong abang ahijing nalaiyin ahi.

Anche le theiga ho man hi lha masa’a sang in 10-20% vel akhesuh in ahi. Kg. Khat a Dk.360 ana kipe Lengpiga (Grapes) tuhin Dk.300 in akhesuh in chuleh masang’a Kg. Khat a Dk.90 ana kipe Komla (Orange) jong tuni kg khat a Dk. 80 bou amantan ahi.

Naga River’a dukan mun channa ding’a sum pe ho IMC in thuhilna nei

Imphal, Apr. 8: IMC Corporator khat in Naga River, Imphal’a dukan touna ding mun kapeh ding ahi, tia kitepna neiya sum leh aadhaar card dong ho’a kon adeh’a numei thil joh ho akikangse diuvin thuhilna aneiyin ahi.

A-inmun  Thangmeiband Thingelmarak mun’a Hijam Nutanchandra, Senior Corporator, Ward No 3, Imphal Municipal Corporation (IMC) in thuso miho akimupi na’a chun MAHUD Minister leh IMC in tu dinmun’a Naga River’a dukan bolna ding mun peh ding thu’a kihouna aneilou ahi, tin aseiye. Mipi chule Naga River kimvel’a cheng hon MAHUD Minister in Imphal gamkai suhtheng nading’a pan alah atosot joh diuvin temna aneiye.

Naga River’a dukan mun peh ding’a sum leh aadhaar card dong ho heng’a Nutanchandra in athil bol angah diuvin temna aneiyin chule Chief Minister leh MAHUD Minister in pan alahna hi gamsung’a numei dukan touho ding gelna ahijeh in hiche thu’a dukan bol numei ho hahsatna dinmun semlou ding’in dukan bol ho jouse heng’a temna aneibe in ahi.

Works Minister Th. Biswajit in Sirarakhong a Mun chim in asuhkhah ho vilna nei

Imphal, Apr. 8, (DIPR):  Public Works Department Minister Thongam Biswajit Singh in tuni chun Sirarakhong vangkho, Ukhrul district a mun chimna mun agavil in ahi.Minister pa chu Parliamentary Secretary Awangbou Newmai, PWD enginner ho chuleh India Red Cross Society team khat in akilhonpi’uvin ahi.

Village Community Hall, Sirarakhong a Minister Biswajit in ahoulimna’a chun mijouse hi kibangchet ihi’uvin koima alenjep ahilou le aneojep aumdehpoi ati. Chuleh khosung a transformer khatsehbou aum jong hi sorkar in phamo akisan agangtheipen’a MANIREDA unit khat kitungdoh ding ahi tin aseiye.

Munchim jeh’a In kisuse li ho alunghempina jong Biswajit  Singh in aphongdoh’e. Munchim in a In le lou  asuhset ho kithopina ding’a April kichailam leh Pradhan Mantri Awas Yojana Grameen kihongdoh ding ahi. Minister pan ahoulimna’a chun local handicraft le handloom skill khantouna ding’a natoh lou apoimo dan jong aphongdoh in ahi. Mahadev le Tolloi kikah lamlen semna ding vechil ding a jong engineer ho agangtheipen’a kisol ding ahi tin aphongdoh in ahi.

Khosung a community hall thahkhat semdoh ahina ding’a khosung miho’n jong anei kham kham’u ahintodoh’uva agangtheipen’a sahdoh ahitheina ding’a pan alahna ding’uvin Biswajit in temna aneiye.

Parliamentary Secretary Awangbou Newmai in ahoulimna’a chun mipi gentheina ho akhohsah dan le alunghemnaho’uva alunghempi dan aphongdoh in ahi. Khosung miho’n jong  khosung khantouna ding’a pan alah diuvin temna aneiye. Aman aseidan in boina jouse hi khat le khat kilungset tah’a achenkhom teng le bailamtah’a suhlhap thei ahi ati.

Tuni kinguon a chun  Minister Biswajit in Munchim in asukhah insungho sum le pai in kithopina ape in India Red Cross Society team in Kitchen thilho ahop peh in ahi.

Pakistan in India gam toh toukhomna neiding anom’e: Islamabad

Islamabad, Apr. 8 (Zeenews): Pakistan sorkar in Friday nikhon India gam toh thingnoimi thu’a toukhomna nei ding’a nopna akineiye, tin asei uvin ahi.

“India in thingnoimi thu aseinom in, keihong jong thingnoimi thu kaseinom uve”, tin Foreign Office spokesperson Nafees Zakaria in thuso miho heng’a aseiyin, chule Kulbhushan Yadav le mi dang dang hohi Pakistan gam’a India kikum vetsahna ahi, tin ngohna jong aneiyin ahi. US-UN Ambassador Nikki Haley in India leh Pakistan kah’a chamna semna ding’a US palaiya apan nom’e, tia asei thu’a, Zakaria in Pakistan in palaiya pang ding ho kipehna aliem jing ahi, tin aseiyin ahi.

Trump sorkar in India leh Pakistan kah’a chamna semna’a pan alah nom thu Haley in tu masang’a asei ahi. “US in India leh Pakistan kiloikhom agelkhoh hi thildih ahi”, ati. India gam-mi hi’a Ambassador Haley hin India leh Pakistan gam’a peace talk semna ding’a Washington in pan alah ding ham, tia thudoh donbutna’a asei ahi. Haley thusei Indian External Affairs Ministry (MEA) in adonbutna’a sorkar in India leh Pakistan chungchang’a adinmun akhel poi, tia asei ahi. “Pakistan gam’a kon kipan thingnoi natoh hothu’a international community in pan alah ding hi tahsanna kaneiyui”, tia MEA official spokesperson Gopal Baglay in asei ahi.

Syria gam US in missile’a abulu jeh’a UN Security Council’a US leh Russia sangtah’a kinielkal

United Nations, Apr. 8 (PTI): Syria gam missile’a akibulu thu’a UN Security Council’a US leh Russia sangtah in akinel kal in, Moscow in ‘international law’ apalkeh ahi, tin ngohna aneiyun, alangkhat’a, Washington in buluna natoh bol be nalai ding’a kigotna um ahi, tin aseiye.

Syria gam’a um Shayrat Airbase mun US in 59 Tomahawk cruise missile ‘a abulu jouva gam 15 panna Security Council in toukhomna anei ahi. US-UN Ambassador leh Council President (tulha’a ding) Nikki Haley in, Washington in atoh hi dihtah’a hilchenna apeh ahi’in, maban’a jong action lah ding’a kigotna anei ahi”, tin aseiye. “Chemical gal-manchah kikap na airfield keiho sepai hon asuhset ahi. Hiche’a hin kadih uve”, ati. Aban’a action lah be ding’a jong kigotna um ahi’in, Syria gam’a thilse soh ho suhthip nading’a gam khangtou hon pan alah phat ahi, tin aseibe in ahi.

Assam vaihomna sorkar in mihem douna’a na atoh hohi aphatai, ti phat seh ahipon, anatoh’a vetsah phat ahi. Bashar al-Assad in chemical weapon amanchah kit louhel ding ahi, ati. Syria gam’a thilsoh’a Russia leh Iran injong themmona anei ahi, tin Haley in ngohna jong aneiyin, Assad adinpi ahi, ati. Alangkhat’a, Russia in US natoh hi ‘international law’ palkehna leh lunghan  nading’a kibol natoh ahi, tin demna aneiye. US natoh sangtah in demna kaneiyun, hiche hi thu lentah ahi, tin Russia deputy UN ambassador Vladimir Safronkov in aseiyin ahi.

Washington, London leh Paris in Syria achang’a akivaihom suhmang nading’a lunggel anei ahi, tin Safronkov in ngohna aneiyin, chule Britain-UN envoy Matthew Rycorft in athu umlouvin Russia chung’a ngohna moh sem sem dahen, tin aseibe in ahi. “Ngohna hohi jou thu ahi. Arab gam jousen colonial hyprocrisy hi ageldoh jing-u ahi”, ati. US in lunghan natoh angah’a, political dialogue’a pan alah ding’in aseibe’e. Syria envoy Mounzer injong US natoh demna sangtah aneiyin, UN charter leh dan kisukeh ahi, ati. US in anatoh hi jouthu’a hilchen ding agot ahi, ati. “Syria in chemical weapon aneipon, aman louding chule hitobang gal-manchah adoudal ahi. Thingnoimi hon Syria gam’a chemical agent akhol uhi mijousen ahet ahi”, ati. US natoh hin thingnoimi ho atilkhou cheh’a khonung’a jong hitobang gal-manchah aman nading dinmun asem ahi, tin gihna aneiyin ahi.

Alangkhat’a, Halley in Syria gam’a chemical weapon suhmang ding hi Russia mopohna ahi’in, aum hin Russia anatohna’a athep lou ahilouleh ahe na sa sa’a akoisah , ahilouleh Assad in Russia angolbol ahi, ati.

Thilsoh chungchang’a UN Secretary-General Antonio Guterres in Syria gam-mi thoh gimna thei natoh koiman abol louna ding’a akitim them diuvin kouna aneiyin ahi. “Political dialogue tilou boina suhlhap nading lampi umlou ahi” tin UN chief in aseiyin chule chemical weapon kiman demna aneiyin, US in Security council kilolna toh kitoh’a pan alah ding’in aseiyin ahi. UN Under-Secretary-General for Political Affairs Jeffrey Feltman in US buluna natoh hi Iran leh Russia in demna aneiyin, United Kingdom, Australia, Germany, Turkey, Saudi Arabia, Italy, Japan, Netherlands leh New Zealand in atosot’e, tin aseiyin ahi.

India in Bangladesh PM Sheikh Hasina liemna nei

New Delhi, Apr. 8 (Zeenews): Saturday nikhon Rashtrapati Bhavan mun’a India in Bangladesh Prime Minister Sheikh Hasina liemna anei uvin ahi.

Prime Minister Narendra Modi in Bangladesh PM toh toukhomna kanei ding, India leh Bangladesh kiloikhomna suhdet nading thu kaseikhom diu ahi, tin aseiye. PM Modi leh Hasina in Saturday nikho leh toukhomna anei lhonding ahi’in, toukhomna’a kinoptona 20 val anei lhon ding, hiche’a hi civil nuclear khat leh defence co-operation chungchang’a memorandum of understanding 2 jong soi kaina aneilhon ding tahsan ahi.

Bangladesh PM Hasina leh India PM Modi in Bangladesh chamlhatna ding’a India sepai martyr chang ho jana ‘Sommanona Ceremony’ a jong nilhah leh pan alah lhon ding ahi. Delegate-level toukhomna’a kinoptona 20 val soi kaina anei diu ahi’in, defence lampang’a kinoptona ni kisem ding ahi. Chule India in Bangladesh gam in defence thil achoh nading’a Line of Credit hi 500 million’a akehlet ding ahi. Sunday nikho leh Hasina in Ajmer avil ding chule Monday nileh India gam-mi business lamkai ho akimupi ding ahi. Bangladesh PM Hasina minister-in-waiting’a MoS (Heavy Industries and Public Enterprises) Babul Supriyo um ahi.

Thusoh Lahchom

RMSA

India Trust Act 1882 noiya um ee Manipur kiti kiloikhomna khat in anti-corruption cell chairman heng’a RMSA noiya school kisahna’a national guidelines kipe akijuipoi, tin hehna asem uvin ahi.Hehna’a chun, Engineering Wing, Education Department, Manipur sorkar in gamsung mun chom chom’a um school 20’a upgradation natoh alah ding ahi, ati. Ahin, Chief Engineer in dan juilouva ‘open tender’ bol louva ‘restricted tender’ abol ahi, tin aseiyui. Anti-Corruption cell in Chief Engineer in ipijeh’a dan apalkeh ham ti akhol diuvin ngehna anei uvin ahi.

CM in kipathu thot

Lord Mahavir pen nikho (Mahavir Jayanti) ahunglhun tolhon in CM N.Biren Singh in gamsung a cheng mijouse , adeh in Jain ho kipathu athot in ahi.  CM in aseidan in Lord Mahavir hin mihem ho kah’a chamna, non-violence chuleh kingaidamtuona umna ding’a thu ana hil ahi’n, ama thuhil hi tulaitah’a  gamsung’a cheng mipi hon ijui ding’uva phatah ahi ati.

Bomb kimu

27 Assam Rifles sepai hon Saturday jingkah nidan som don in Nungsang lei leh Ukhrul town kikah’a um culvert’a polythene vom’a kichun IED khat amudoh uvin ahi.Sepai hon Ukhrul jotna lamlen leh Hundung cement factory kimvel’a operation abol na uva Nungsang lei’a kon km 3 vel’a gamlha mun’a bomb amudoh-u ahi, tin thulhut in aseiye. Bomb Disposal Squad team, IGAR(S) in bomb alhamlha tauvin ahi.

PLA 1 kiman

Imphal East’a police hon Friday nikho’a operation abolna uvin People’s Liberation Army (PLA) thingnoi khat aman uvin ahi. Imphal East Commando hon DSP (CDO) Robinson Khamnam lamkaina’a April nisim 7 nilhah nidan 2 don’a JNIMS jotna main gate kom’a operation abol na uva PLA thingnoi khat amat-u ahi’in, akiman mipa hi Nungoi Awang Leikai’a cheng Mutum Rabikanta @ Yaima (28), s/o (L) Mutum Ingocha Singh ahi. Rabikanta hin achesa 2012 kum’a Inao kiti Revolutionary People’s Front (RPF) mikhat’a kon thingnoimi’a lut ahi’in, army number 2885 Rabikanta hin Eastern Nagaland’a kichuhna anei jouva Sergeant Major, PLA panmun atuh ahi. Akiman mipa Porompat Police station’a apelut tauve.

NSCN-IM

3  Assam Rifles hon Major Narendra thupeh dungjuiya April nisim 8 jingkah nidan 1.25 don’a kon nilhah nidan 2.45 chan Kohima khopi’a Z James Angami, Kilonser leh Cease Fire Monitoring Cell member pa inmun ‘a operation abol NSCN-IM hon demna thuso anei uvin ahi.Thuso’a chun NSCN-IM in cease fire monitoring cell’a member kahi tia kiphonna anei vang’a AR sepai hon Chinese Rifle naneiye, tia ngohna anei uva chule amaho khut’a apehlut ding’a hatah’a ano-u ahi, ati.

Editorial

‘Go to the hills’ slogan And the big Boast

                                The new BJP led government in the state has started bragging about its achievement claiming that it could accomplish in fifteen days what the former regime (congress) could not in fifteen years. Although this could be a tall claim by Chief Minister N Biren but considering the closer ties between the hill and the valley which seems to have developed ever since the formation of the new government it can be said that the present government has been able to achieve what its predecessor could not for years. No specific thing is also mentioned as the government’s achievement but the seeming withdrawal of the communal government tag to the Manipur government by certain hill tribal communities must be reason enough for the new government to boast off. The new government has rightly woken up to the reality of the neglect suffered by the hill people for ages and so thought it essential to “go to the hills”. If red carpets are to be laid for the new Chief Minister or reception and welcome bouquets are arranged in his honour at hill district such as Ukhrul where previous Chief Minister was not even welcome to inaugurate government hospital buildings it goes without saying that the trust deficit has been reduced, if not completely erased. “Go to the hills” is Chief Minister (CM) Biren’s slogan to give equitable attention and share between the hill and valley. Mr Biren also said that Cabinet meetings would also to be conducted in hill district headquarters on rotation. This is also easier said than done. The bad road conditions coupled with security threats from anti-social elements would make things difficult for the entire cabinet and their officials to travel up to some of the far flung district headquarters.

                        It would be too early to weigh success or failure stories. The BJP led coalition government could so far be swimming smoothly due to the anti-incumbency factor also but nothing can be guaranteed when coalition partners drawn from divergent and conflicting interests pursue their own ethnic or community interests. With regard to CM’s proposed Ukhrul visit the Tangkhul Naga Long, the apex body of the Tangkhul tribe, had initially announced their readiness and happiness to roll out a red carpet for the visiting guest only to retract it afterwards by clarifying that they would not be a part of the ‘reception program for the Chief Minister though they would not oppose it either. The Naga Students Association has started to voice its displeasure at the state government’s effort to secure the highways by deploying more police force and to raise a dedicated Highway Protection Force (HPF). It will be interesting to watch how the new government tackles the unsolved issues bequeathed by its predecessor, the congress government. Anyway, getting a protracted economic blockade lifted and starting a talk with an agitating Anti-Tribal Bill JAC certainly is a breakthrough irrespective of the ultimate outcome.

 

ET taona

Van’a um kapau pathen, Christian khat kahi tia bible thua neljoula hilou, damla damsel chuleh boina jong imala neilou, ahia Sunday ni leh khatvei beh nangma houin jonnomlou ho hi thanopna lungthim hinpen tin kahung tao uve, amen.