ET April 8, 2017 News (Local, National, Thusoh Lahchom, Editorial, Blankfire)

ET April 8, 2017 News (Local, National, Thusoh Lahchom, Editorial, Blankfire)

333
0
SHARE

Manipur Police Cyber Crime hon Physics question ‘leak’ thu’a ginmo mi 16 man

 

Imphal, Apr. 7: Manipur Police Cyber Crime Unit Class XII Physics question paper social networking site WhatsApp ‘a thot doh ding’a ginmo mi 16 aman uvin ahi.

Akiman holah’a WhatsApp group admin khat, Tourangbam Taison (26), S/o (L) T Imcoha Meitei, Patsoi Part-1 Lamkhai’a cheng jong apang in ahi. Ama tilouva Moirengjam Naocha @ Sanayaima Meitei (21), S/o M Tombabu Meitei leh Laishram Koireng Meitei (24), S/o L Nungshikanta Meitei, Terakhong Mayai Leikai, Bishnupur’a cheng, DESAM organisation secretary Elangbam Mushuk Meitei (21), S/o E Bijoy Singh, Hiyanglam Makha Leikai’a cheng chule Extra Edge chool, Millenium Institute of Science, Herbert School, HRD Academy, Ram Lal Paul Hr Secondary School leh Advance Public School’a kai simlai adang 12 jong apang in ahi.

April nisim 5 nikho’a DESAM in Physics question paper hi exam kipat nidan khat masang’a social media’a akisodoh’e, tia ngohna anei uva chule exam centre phabep pam’a notes pe hon thudoh khat’a kon somni chan hi kitoh chet’a apeh-u ahi, tia jong aseiyu ahi. Imphal West Cyber Crime Unit in-charge, Additional SP Dr S Ibomcha in thuso miho akimupi na’a chun Secretary, Council of Higher Secondary Education, Dr Meinam Bidyasagar in SP Imphal West’a April nisim 5 nilhah nidan 6’a melhetlou hon Physics question paper lim athot doh uve, tia hehna asem jouva thukholna kipan ahi, tin aseiye. Jingkah nidan 9.20’a WhatsApp ‘a Physics question hohi kimu pan ahi’in, exam hi nidan 10’a kipan ahi.

Sub-Inspector Abhijeet Karam leh Abdul Sarif, Cyber Crime Unit in police officer dang dang ho tosotna’a hehna kisem nidan 24 jouva ginmo mi 16 amat ahi, tin Additional SP in aseibe in ahi. Cyber crime unit in thil kipatna aphotchenna anei ahi’in, themmona neiho dan dungjuiya gotna kipe ding ahi, ati.

Khantouna in mijouse ahop ding, thinglhang leh phaicham khenna umlou ding ahi: CM N Biren

 

Imphal, April 7: Chief Minister N Biren Singh in Friday nikho’a Indira Gandhi National Tribal University, Regional Campus, Makhan kho, Kangpokpi district avil na’a, sorkar in khantou machalna pehna ‘a bungkhenna aneilou ding ahi”, tin aseiyin ahi.

Inspection abolna’a faculty chule simlai hotoh Library Hall, University’a phat amangkhom uvin, CM in, “Gamsung’a Trial University kisemdoh hi tu’a ngaichat ahi, ajeh chu gam pam’a lekha sim ‘a che joulou hon gamsung’a themjilna amu thei ahi, tin aseiyin ahi. University faculty leh simlai hon hahsatna ato thu aseiyun, CM in security barrack sah’a chule campus’a security kikoi ding ahi, tin kitepna aneiye.

Kanglatongbi’a kon University chena lampi ‘blacktopped’ kibol vahding ahi, tinjong aseibe in ahi. Union HRD Ministry in tu’a Regional Campus hi autonomous/full fledge University’a asem nading’a pan kila ding ahi, ati. Chief Minister in hiche mun avilna’a Tribal Affairs and Hills Minister N. Kayisii, Social Welfare and Co-operation Minister Nemcha Kipgen, Higher and Technical Education Commissioner Vineet Joshi, Director Education (U) Th. Chitra Devi, Tribal Development Director Smt. Mannuamching leh civil leh police official hojong apang uvin ahi.

AMUCO in Sirarakhong khosung miho kithopina pe

 

Imphal, April 7: All Manipur United Club Organisation (AMUCO) in Friday nikhon Sirarakhong kho, Chingai Sub-Division, Ukhrul district’a mun-chim thilsoh’a vangsetna toh ho kithopina anei uvin ahi.

Ph Devan, president, AMUCO lamkaina’a kalsong doh team hon Sirarakhong kho chairman L Ngathiingyao dangka 10,000 ape uvin, neh ding thil jong ahom uvin ahi. Kin-gon’a AMUCO president in BJP lamkaina sorkar in khosung miho akithopi na chung’a kipathu aseiyin, AMUCO in hitobang natoh hi atosot jomding ahi, ati. Chule sorkar in lamlen kijot to nading aganna thei pen’a asem phat diuvin temna aneiye.

Khosung anemsuh jouva lamlen chom khat kimang ahi, ati. Sirarakhong kho’a achesa April nisim 5 nikho’a go juh jeh’a munchim’a, thilsoh’a inmun 8 leiset toh chimlhah tha ahi. Khosung hi Imphal khopi’a kon 85 km’a gamlha chule Ukhrul district headquarter’a kon 136 km ‘a gamlha ahi. Thilso ni-ni jouva Forest and Environment Minister Th Shyamkumar lamkaina’a sorkar in thilso namun avil’a, khosung miho kithopina apeh ahi.

Haokeithel a thinglhangmi mejoh nupi ho touna ding kipelou; KSO in demna nei

 

Imphal, Apr. 7: Government in  Haokeithel Tribal Women Welfare Association  a registered kibol thinglhangmi nupi mejoh ho atouna’uva kon adal doh’u hi kiloikhom in sangtah in demna akineiye tin KSO-GHQ , General Secretary, Seiboi Haokip a kon kimu thulhut in aseiye. Seiboi Haokip in aseidan in thinglhang mi mejoh ho hi sorkar in Haokeithal Trial Women Welfare Association noiya registered abol ahi’n, ahinlah tuhin Police hon  thinglhangmi mejoh 70 vel atouna’uva kon adaldoh’uvin  athilpoh ho’u johna ding helou vin akoi’uvin ahi.  Kaal masa jong chun authority in  mejoh thinglhangmi ho hi temporary market a kon ana nodoh in ahi. Achesa kaal sung a chu police hon thinglhangmi mejoh ho hi kailhang sung’a atou touna’uva ana daldohji’u ahi. HItobang dinmun ahijeh hin thinlhang mi mejoh ho hin athilpoh ho’u johna ding helouvin aumta’uvin ahi.  Mejoh ho hi thanop man’a Imphal’a hung’uva me ahungjoh’u ahipo’n, a insungmite, achate’u le ajite vahna ding’a sumhol’a pang ahi’uvin ahi.

Government in street vendor phabep Naga Mapal a achonlut vang in thinglhang mi mejoh nupi  somsagi ho hi suhna ding helouvin kailhang sung’a  dinpum in athilpoh ho’u ajoh’uvin ahi. Sorkar in hitobang thil abol hi thinglhang mite kinoisena ahi’n kiloikhom in itihchan hijong le kidoudal ding ahi tin thulhut  chun aseiye.

Sorkar in thinglhangmi mejoh ho agangtheipen’a mun thah khat a achonlut’uva jat le nam thu’a kidalbolna ho asuhthip ding in KSO in temna aneiyin ahi.  Chuleh thinglhang miho kinoisena jouse hi kiloikhom in kimohvetlou ding ahi tin thulhut chun khoutah in aseiyin ahi.

59-(ST) A/C sung’a Booth Level Performance Review meeting um

 

Lien S. Gangte

Ccpur, Apr. 7: 59- (ST) Saikot Assembly Booth Level Performance leh Kipa thilpeh pehpdoh na chuleh, Congress Worker/Supporter ho’n jinglam nidan 11:00 apat chun Gibeon Cottage, Bijang ah kimu khom na anei  uvin ahi. Hiche kingon ahin, TN Haokip, Hon’ble MLA 59-Saikot Assembly Constituency, MDC ho, District Level Party a mopoh na nei lamkai ho chuleh, Kho Haosa ho apang uvin ahi. Keynote Address seina Holjang Lhungdim, Election Chairman in aneiyin, Report pehna Nehthang Mate, Ex-MDC in aneiyin chuleh, Khaipao Haokip, MDC, Kholmun ako’n holim na jong aum in ahi.

Kipaman hopdoh na Ngamhao Touthang, MDC, Tuibong/Election Agent in kipaman hopdoh na aneiyin ahi. Booth Level Performance a 1 na la Polling Booth Kholmun A (J.B. Shool E/W) ahi in, kipaman dangka 30,000/- aki san uvin, Leisang U.J.B. School in kipaman dangka 20,000/- akisan uvin chuleh, Matalambulane LP School, a 3na Tuinom in kipaman dangka 10,000/- akisan uvin ahi. Hmar Area a Polling Booth Performance hoipen Hmar Veng A Polling Booth in kipaman dangka 10,000/- akisan uvin, Kom area a Polling Booth Performance hoipen Moirang Mantak Polling Booth in kipaman dangka 10,000/- akisan uvin ahi.

Kanglatongbi War Cemetary’a WWII ‘a thi ho jana kin-gon kimang

 

Imphal, April 7: British Army Ordnance Corps in World War II ‘a Axis force ho ana kisat pi na Kanglatongbi mun’a gal-hang athi ho jana kin-gon akimang in ahi.

Imphal Campaign Foundation WW2 in athi ho jana in pahcha akoi uvin, Kanglatongbi Memorial War Cemetary mun’a minute 2 thipbeh in aum uvin ahi. Khengjang kho, Kanglatongbi, mun’a um ahi. World War II (1942-1945) sung’a Japan sepai hon Imphal’a communication line honding agot-u ahi’in, 221 Advance Ordnance depot in ana douya, April 6/7, 1944 kum’a Japan hon hiche mun alokhum uva Depot abulu-u ahi.

Kanglatongbi’a kidouna hi Battle of Lion Box tia kihe ahi’in, Japan sepai holeh Allied Force ho kidou ahi. Imphal Campaign Foundation WW2 in Second World War’a thi William Howard jong jana ape uvin ahi.

Motor Vehicles Act. : Jukham pum a gari tolho Dk.10,000 kileusah ding

 

New Delhi, Apr. 7:  Gamsung a gari tosetna ho  alhomsuh ding lunggel neipum in Wednesday ni chun Union Cabinet in Motor Vehicle ( Amendment) Bill,2016 approved aboltan ahi. Bill thah dungjuiya hi license neilouva gari tol ho Dk.5000 hemkham kilading chuleh jukham pum’a gari tolho Dk.10,000 hemkham kibol ding ahi.  Hiche thulhuhna hi  Prime Minister Narendra Modi lamkaina’a chelha  Cabinet meeting a asemdoh’u ahi.

Bil lthah dungjuiya hi hit-and-run case a molphouna neiho Dk. 2 lakh compensation kipeding’u chuleh lamlen tosetna’a thiho Dk.10 lakh gei compensation kipeding’u ahi tin official thulhut khat in aseiye. Helmet khuhlouva gari tolho tu’a pat Dk.1,000  hemkham lahding tin jong cabinet in  recommend anabol in ahi.  Chuleh Insurance panglouva gari tolho tu’a pat Dk.2,000 leusah ding tin jong thulhuhna anei’uvin ahi.

Ccpur – Imphal Winger Parking kikhel ta

 

B.Lalboi Gangte

CCpur, Apr. 7(ET):  Churachandpur akipat Imphal kikah ah Services a lhai Ccpur Imphal Winger Society(COTOS) noiya Winger Service ho jouse 7 April 2017 nikho akipat Khuman Lampak Stadium kom Inter State Bus terminal (ISBT), mun ah kinga panding ahitai tin Lunkholal Haokip President CITOS in mipi ho hetding in thuso ahin neiyin ahi.

 Chuleh mipin ahetthem masang a ding’a  Checkon bazaar mun bou’a pickup point kihong tadi ding ahi.  Hiche thupeh hi Director Transport Govt. Of Manipur in phatsot tah masang akipat thupeh ana nei ahi tan, ahin mipi ding gel najeh ah tunichan’a kijui lou ahi ati, chuleh alampi dingdan chu ISBT akipat hung kipan doh intin, Hatta akon Checkon, Sanjengthong chuleh Keisampat hiding ahi ati.

Congress MLA 15 ho hung kile tau

 

Imphal, April 7: Manipur Legislative Assembly toukhomna masapen kichaiya gam dang’a camp bol’a Congress MLA 15 ho Friday nikhon Imphal khopi’a ahung kile tauvin ahi.

Phat sottah ipijeh’a MLA ho gamdang’a um hiuvem ti ajeh kicheh het ahipon, ahin, BJP toh kihoumat theilou nading hiding’in thulhut in aseiyin ahi. MLA 15 holah’a Govindas Konthoujam, Kh. Koykishan, Henry Okram, S. Bira, Y. Surchandra, Yamthang Haokip, L. Loken, DD Thaissii, D. Korungthang, K.  Meghachandra, W. Lukhoi, AK Mirabai , Dr. Chaltolian Amo, Surajkumar Okram leh Md. Fajur Rahim apang uvin ahi.

MLA 10 hi 6E 4114’a hung kile-u ahi’in, adang hohi AI-713’a hung ahiuve, tin thulhut chun aseiyin chule speaker anahi Th LOkeshwar hi Kolkata khopi’a kon nilhah lenna’a hung ding ahi, tin aseibe’e.

Ambassador in Moreh sung mun phabep vil

 

Moreh, Apr. 7: Indian Ambassador to Myanmar Vikram Misri in tuni (Apr. 7) chun Moreh a Integrated Check Post (ICP) ho vilna ahung neiyin ahi. Hiche ah chun government lampang’a kon’in Kh. Raghumani Singh, DC Tengnoupal, N. Gojendro Singh ADC-Tengnoupal, S. Somorjit Singh, SP Tengnoupal, M.Mubi Singh, ASP Moreh, Lawrence, SDPO Moreh, R.K. Singh Brigd 26 Sector Assam Rifles Pallel, Manoj Ap, CO 11 Assam Rifles chule Moreh sung’a official tampi jong apang uvin ahi.

Vikram Misri (Indian Ambassador to Myanmar) in India leh Myanmar kah’a sumkol veina lampang’a thil agih dan (weight) leh itobang thil ahiding lampang’in kihouna aneilhon in ahi. Sumkol veina lampang toh kisaiyin ICP semdohna ding lampi hi ichan phatam tin Contractor khat in anadong’e.

Indian Ambassador to Myanmar Vikram Misri in tumasang jep’a temple khat a bomb pokehna mun leh Indo-Myanmar Friendship Gate chule mundang dang jong vilna ananeiyin ahi.

JAC against Anti-Tribal Bills leh state sorkar in toukhomna nei

 

Imphal, April 7: State sorkar leh Joint Action Committee Against Anti Tribal Bills (Churachandpur) in Chief Minister’s Secretariat mun’a Chief Minister N Biren Singh lamkaina in toukhomna masa Friday nikhon anei uvin ahi.

JAC toh toukhomna’a Chief Minister N Biren Singh in athiho insung miten thi-long hahna anei diu adeina thu aseiyin, insung mite ding’a ahahsat dan hi aseije umlou ding ahi, tin aseiye. Gamsung ahilouleh insung’a boina neilou koima aumppon, boina hohi toukhomna kisem’a kiseilhah ahi, tin CM in aseiyin chule JAC leh Churachandpur gamsung miho kihouna’a apan diuvin temna aneiyin, sorkar in boina suhlhap nading’a toukhomna phabep sem ding anom’e, ati.

Manipur gamsung hi thinglhang leh phaicham’a kisem ahi’in, thinglhang leh thinglhang mi umlouva Manipur umlou ding ahi. Sorkar hi mipi’a ding ahi, tin Biren in aseiyin chule sorkar thah in vai ahom jouva phat teplou economic blockade jeh’a boina asuhlhap ahitai, tin aseiyin chule UNC chung’a eco-blockade alahdoh jeh uvin kipathu aseiyin ahi. Toukhomna’a JAC Against Anti Tribal Bills in sorkar heng’a thumna phabep apelut uvin, ahunglhung ding April nisim 10 nikho leh toukhomna banjom sem ding’in kilol lhahna anei uvin ahi.

State sorkar thalheng’a toukhomna’a Works Minister Th. Biswajit Singh, Agriculture/Veterinary Minister V. Hangkhanlian, Social Welfare Minister Nemcha Kipgen,TD & Hills Minister N. Kayisii, Chief Secretary, O. Nabakishore, DGP L.M. Khaute, Law Secretary Th. Kamini Kumar leh Deputy Commissioner Churachandpur R. Sudhan apang uvin chule JAC hohi Chief Convenor H mangchinkhup lamkaina’a member 11 ahiuvin, Young Paite Association, United Zou Organisation, Tidim Chin Union, Mizo People Convention leh adang dang thalheng ahiuve.

Thusoh Lahchom

NSCN-K 2 kiman

35 Assam Rifles hon Longwa khosung, Arunachal Pradesh gam’a achesa April nisim 4 nikho’a operation abolna uvin NSCN-K thingnoimi 2 aman uvin ahi. Mikhat hi self-style sergent, NSCN-K Wangchak ahi’in, chule khat pa hi self-style Corporal Nokwang ahi.

TSA-GHQ

Lamminlun Singsit, President Thadou Students’ Association, General Headquarter (TSA-GHQ) a kon kimu lekhathot dungjuiyin; Thadou Inpi–GHQ President leh atohkhompi chengin Lamminlun Singsit hi TSA-GHQ President tohmun na konna upgrade bolla Thadou Inpi–GHQ panmun khat tuh ding’a ana jol’u ahin, hitoh kilhonna Lamminlun Singsit in Thadou Inpi-GHQ makaina a TSA-GHQ a ama thakhel ding mi phatah khat’a hol’a chule asung’a lamkai dingho suhtup chet ding’a kihoulhahna ana nei’u ahin, hinlah kihoulhahna um chai nung in koima nganse louva khat-le-ni in amachang phatchomna dia thuso ana neihi phamo asahna thu ahin phong in ahi. Mipin Thadou lamkai ho kah’a kidin tena umdan’a ana gelkhah diu ahitah jeh’a mipi hetdia suhthengna ahin nei ahidan TSA-GHQ President min’a kimu lekhathot chun atahlang in ahi.

Numei khat kivo

Tuni sunkim don chun Guwahati a um Nehru Stadium kom’a cab driver khat in  akeng’a lamjot numei khat  melsetah in ana vo in ahi. Numei nu chu avel lah’a umhon ana huhdoh’uvin GMCH a ana polut’uvin ahi. Police in cab driver pa holdohna ding in kholchilna apantai.

CID SSP

Silapathar thisoh thu’a kholchil na document  ho ana lha thang jeh’a suspension ana kibol CID SSP Dr. Raja Marthanandan chu Thursday ni chun anakiman tai. “Rajamarthandan hin service dan toh kitoh lou leh document ho dan dih lou’a aman chah jeh’a akimat naban’a criminal case ah jih lut” ahitai tin Assam Police Director General Mukesh Sahay in aseiye.

Thilpo gari khat in Bus phutkha

Lalung Gaon, Guwahati a thilpo gari khat in passenger bus khat aphutkhah jeh in asung’a tou mi 12 vel akitongkha’uvin ahi. Akisukha ho chu Gauhati Medical College and Hospital a akijen’uvin ahi. Thilsoh a chun mikhat  in thina atuoh in ahi.

Michom 6 kiman

Thulhut kimu dung  jui in 3 April nichun Songsak mun vel’a  michom ho aum me tithu ajah jeh un kholchil na anei nao’a chun mi 6 ana man doh tao vin ahi.Hiche thilsoh hi Sampalgr village noija um Williamnagar Police Station East Garo Hills chuleh Nongalbibra mun South Garo Hills  lah ahi. Hiche toh kilhon chun 7.65 mm pistol factory made 2 leh magazines ni ana man doh un ahi. Michom ho  min chu ahileh  Sathing N Marak, Jaseng T Sangma, Jithu R Marak, Claybirth M Sangma, Wevstar G Momin chuleh  Sengkam R Marak ahi uve.

Editorial

Boina bul Hou lamkai

(Arunachal thua India leh China kiboina umjing)

                            6th April (2017) ni’a Imphal Airport a galkap Bomb-po vanleng minthang Sukhoi Fighter Jet ni (2) ahung ki-ngah-a khojin jou lang’a alendoh lhon gin chu thukhoh khat um hitante tia gel anatamdi ahi. Hiche vanleng hung chu ijem tia Arunachal thua India le China kikah-a kiboina ahung umkhahleh “India in a inheng ho athaneina vetsahna’a kibol” dan’a kisei ahi. Sukhoi vanleng hi Nuclear Bomb pothei, vanthamjol’a hat tah-a alen teng jongleh Missile (meichang lien, bomb) in akapkhah theilouna dia akhup athal’a kipeilele thei ahi. Thu hung kipatna hi Tibetan hou lamkai Dalai Lama ni phabep dia Arunachal gam akholjin jeh ahi. Nagaland leh Mizoram hi North East gam’a dia thisan sona dimset jouva State anahidoh ahin, Arunachal Pradesh vanghi State delna’a hinkho khatcha beina umlouva Centre in State khatna anasemdoh ahi. Hiche hi China in agam achujing jeh-a Centre in Mizoram State toh Arunachal Pradesh hi thakhatna India State a anasemdoh ahi. Dalai Lama Arunachal gam’a akholjin hi moh a gamve maimai hilou, Tawang khopi a Budhist ho ‘Monastery’ (hou-in) ho leh asung’a hou natong ho vilna ahi. Chuban’a “Politics” jong aluttei di hetsa ahi. India in Tibet ho chamlhat del atosot jeh-a Tibetan (Tibet mi) ho asang aja-a India gam munchuom chuom’a achensah uva sum le pai’a jong akithopiuva India mi sang’a galjam hohin govt akon’a chanvou tamtah ahamujoh u ahi. Tibet hi China thuneina nuoiya um ahin agammi hon China govt chung’a Independent gam kahiuve tia kiphinna anei u ahi. Hiche jeh-a China govt nin Tibetan ho asuhgenthei jeh uva India a hung galjam dimset u ahi. Ipi jeh-a India in Tibet chamlhatna del hi atosot jong ajeh bei ahikitpoi. China in North East thingnoimi, adeh-a Naga leh Mizo ho anakithopi chu tua aumtahlou vang’a Assam a ULFA thingnoi Faction khat aguh-a atosot jing, chuban’a Jamu & Kashmir a thingnoi tosot jing Pakistan jong China in aguh-a atosot kit ahi. ULFA-I Faction hogeiyin Dalai Lama Arunachal kholjindi jahdana thuphon anabol ahi. India in Tibet ho atosot jingleh J & K boina’a kikikumdi ahi tia China in tuchung Dalai Lama Arunachal kholjin thu’a gihna asei nahlai ahi.

                     India leh China gamgi hi ‘Mac Mohan Line’ kiti, British ten India anadalhah dikon’a India leh China gamgi lang’a muol le lhang hoa kon lungsuhto tobang’a gamgi anakai maimai ahi. Phatah-a gamgi kikaina aumlou jeh-a China in Arunachal leh Sikkim gei achujing ahi. Arunachal mi hohi lim le mel leh chondan ho’a China mi ho toh akinaijoh vang uva China sang’a India a umdi adeijoh u ahi. Huoilai hileh hou lamkai hohi ‘politics’ a akikum jeh uva thuboina tamji ahi. Dalai Lama jong hi “Tibetan Spiritual leader” (Tibetan ho hou lamkai) ahivang’a China govt nin “thilha” ahibouve ati ahi. Tuchung Arunachal gam avil jeh in China a India Ambassador jong Chinese govt nin akouva India govt chunga alunghanna thu asei ahi. Hou lamkai hohi politics ah kikumda uhenlang Govt injong manchahda leu dihdi ahi.

Blankfire

Thil phachom dia kisalel tamlou, aphachomlou dia kihabolten tam, ama inchen dibon kiboipi joulouva koisol louva society phatchomnadi kabole tia aphat neisun maimai hitalouva anei agou sumang hojong pachat aum ngap uve.