ET April 7, 2017 News ( Local, Regional, National, International, Thusoh Lahchom,...

ET April 7, 2017 News ( Local, Regional, National, International, Thusoh Lahchom, Editorial, Blankfire)

446
0
SHARE

BJP in 37th Foundation Day nit: Chief Minister N. Biren in pensioner ho thohgimna olsah ding’a sei

Imphal, Apr. 6: BJP Manipur Pradesh in head office, Nityapat Chuthek mun’a Thursday nikhon 37th Foundation Day anit uvin ahi.

Kin-gon’a Chief Minister Nongthombam Biren in ahoulimna’a BJP lamkaina coalition sorkar gelkhoh pen hi gamsung’a chamna sem ding hi ahi, tin aseiye. “Tehse hon eihin puikhang-u ahi’in, amaho jana ipeh diu ahi”, tin CM in pensioner tehse ho nisa leh go noiya bank maiya ‘queue’ saotah’a akigol-u apohnatna thu aseiyin ahi. Sorkar in tehse pensioner ho gim olna ding tohgon agon ding ahi, tin aseiyin, chule Treasury office leh bank in Finance Secretary toh hiche thu’a kihouna anei diuvin kouna aneibe in ahi.

Sorkar thah in nam chom chom kikah’a kitahsan to na asem in, Ukhrul district’a kouna kamu in, Senapati leh Churachandpur district’a simlai ho ka office’a ahun uvin, eikipapi uvin, phatthei eiboh uvin, Nagaland gam injong gamkaiya chamna leh lungmonna aumding katahsan’e, ati, tin CM in aseiyin ahi. Sorkar masa in kum 15 sung’a atoh chailou natoh hohi keima sorkar in ni 15 sung’a kachai soh ding ahi, ati. JAC Churachandpur toh boina suhlhap nading’a kihouna achelha jing’in, gam khantouna ding’a bol thei chan kibol ding ahi, tin aseibe in ahi.

Tuchan geiya athah’a kisem doh anti-corruption cell’a hehna 300-400 kimu ahitan, hehna kisem ho vetsuina akineiyin, ama ama police station in thukholna apat ding ahi, ati. General Secretary Administration, BJP Manipur Pradesh leh PWD Minister Thongam Bishwajit in ahoulimna’a BJP lamkai hon ditah’a na atohna chung’a kipathu aseiyin, chule japi in atosot ding’a temna aneibe in ahi. Kin-gon’a BJP Manipur Pradesh Ksh Bhavananda, Chief Minister anahi Radhabinod Koijam, senior BJP lamkai Th Chaoba jong jin-gun’a apang uvin ahi.

Police Constable 2013 batch hon Govt. henga result phongdoh dia ngeh; Meeting jong umding

Imphal, Apr. 6: Phat sottah gentheina holeh vangsetna toh lhuntha kit ‘All Manipur D.P.C. Completed Candidates of Police Constable (Male) 2013 in tuthah a BJP government lemna aneiyuvin chule phat masang’a BJP in government ahintuh poule amaho ngehna leh adeidan ho’u asuh bulhit peh ding’in kitepna jong ananeiyin ahi. Hiche toh kilhon chun 2013  batch ho result phondohna  leh gamsung’a khangdong bolding helouva moh um a chule hiche ho jeh’a kingolsahna lang’a alutsang uva BJP government hin aphatcha a boldia lom ho ahinbol tei ding’in kinepna lentah jong aneiyuvin ahi. Hichetoh kilhon hin tuthah a government hinsem BJP leh akisaipi authority ho hengah jong memorandum ijat hamkhat anakipelut tan, tuni changei hin government lang’a kon’in donbutna khatcha akimu hih laiye tin AMDPCCCPC(M) (2013) Secretary A. Sobhajit Singh in aseiye. Hijeh chun keiho kinepna bang’a donbutna ngah jing’a um kahiuve tinjong aseikit’e.

Hiche chungchang’a ahunglhung ding April nisim 9, 2017 jingkah nidan 9:00 tengle Keishampat Leimajam Leikai Community Hall a 2013 Batch holeh a-inkoten meeting khat bolding’in jong hetsahna ahin neiye. Hijeh chun dandidate holeh a-insung miten jong hiche meeting’a hungpang chieh ding’in J.A.C. lang’a kon’in hetsah jong ahin neiyuvin ahi.

Minister Th Shyamkumar le Kayisii in munchim na mun vil lhon, sum-le-paiya kithopina nei

Ukhrul, Apr. 6 (DIPR): Thounaoujam Shyamkumar, Minister of Forest and Environment, Horticulture & Soil Conservation in tuni chun Ukhrul district a janni’a munchim namun Sirarakhong mun vilna aga neiyin ahi.

April nisim 5 ni’a munchim in chenna inn 4 asuhset naban’a inn 15 ana tohkhah ahin chule ni ijat hamkhat tanglouva guo ajuh jeh in Mahadev-Tolloi road le inter-state road phabep jong ana suhset ahi. Tuni’a Minister Shyamkumar in munchim namun vilna aga neipet chun Tribal & Hill Areas Development Minister N Kayisii in jong ana kilhonpin chule Minister tenin munchim in atohkhah innkuo ho chu kithopinan Dk. 6.5 lakh jong anape lhon in ahi.

Munhcim namun agavilna hon’a Th Shyamkumar in thuso miho maiya aseina ah; Chief Minister N. Biren Singh in amale TD Minister N. Kayisii chu munchim namun velha ding’a thupeh ahin nei ahidan asei naban’a concerned department in kho mipi ho kithopina lhingset a ahinpeh ding ahidan jong aphongdoh in ahi.

Minister teni chu Village Church munna loppehna kin jong khomi ten anabolpih’u ahin, hiche a chun Minister Shyamkumar in Dk. 3.5 lakh (Principle Chief Conservator of Forests a konna 50,000, Forest and Environment Department a konna Dk. 2 lakh chule Horticulture & Soil Conservation department a konna Dk. 1 lakh) pehdohna aneiyin chule Minister Kayisii in munchim in atohkhah kho miho ding in Dk. 3 lakh anatohdoh in ahi. Minister teni loppeh na kin’a chun Horticulture & Soil Conservation, Forests & Environment, Tribal & Hill Areas Development official, Police officials, former MLA Khasim Ruivah, church leaders , village chief le akim anaiya konna kho mipi hon jong pan analauvin ahi.

Deputy CM in kithopina nei

Imphal, Apr. 6 : Deputy Chief Minister Yumnam Joykumar Singh in Meitei Langol Yumjao Manbi mun’a hui-leh-go kitho jeh’a hahsatna toh ho kithopina ape in ahi.

Joykumar Singh in thilsoh in atohkhah insung ho avil in, anchang, hawai, thao leh candle member 121 (insung 29) ahop peh in ahi. Achesa April nisim 2 nikho’a hui-leh-tho kitho in gamkai sangtah’a atohkhah ahi.

Deputy CM in thuso miho akimupi na’a chun, gamsung’a twilen tobang dinmun aumjing jeh’a ‘short term’ leh ‘long term’ a kigotna kinei ahi’in, aphat toh kitoh’a kichepi ding ahi, tin aseiye. Nambul leh Waisel Maril ‘a natoh akipan tai, tin aseibe in ahi.

Kpi DHQ a BJP kiphudohkal kum 37 lhinna kinit

Kangpokpi, Apr.6:  Tuni nikho (April nisim 6)  hi Bharatiya Janta Party (BJP) kiphudoh kal kum 37 chan na ahitolhon in BJP Sadar hills in Kangpokpi District HQ  a BJP kiphudoh nikho loupitah in anit in ahi. Tuni Kinguon a chun BJP National Vice President Mahila Morcha, Sarda Devi Jin-gun in apang in MDC Sagar Gewali Jin-ja’um in apang in chuleh MDC Thangjamang Kipgen kin neipa in apang in ahi. BJP Saikul Mandal, Saitu mandal chuleh Kangpokpi Mandal lamkai ho le BJP natong le toson phabep in jong pan ala’uvin ahi.

District President BJP Sadar Hills Thangjamang Kipgen in ahoulimna’a  aseidan in  Saffron Party hi Indian Political system sung’a um major party ho leh’a ahingsotloi khat ahi ati. Chuleh BJP hi Parliament a thalheng aneijat le party member anei jat dungjuiya  political party lenpen khat jong ahi.BJP hi april nisim 6 ,1980 kum’a chu ana kiphutdoh ahi. Ahinlah lunggel’a ahung kipatna hi 1951 lang chu ana hitai.  1951 kum’a chu  Congress politician Syama Prasad Mukherjee kitipa hin lunggel kibahlou jeh’a Nehru lamkaina a kon pohdoh’a Bharatiya Jana Sangh (BJS) ahinphudoh’a 1977 kum’a chu Janta Party ti’a hung kiminvuo ahi.  1980 kum chun Janata Party sung’a kihekhelna phabep ana umtah jeh in BJP hi achombeh in ahung kiphutdoh in hiche kum mama chun  Janata government jong ana lhu’e tin Thangjamang Haokip in BJP  hungkipat dan akikhom mipi ho le lamkai ho cheng jah ding in kichehtah in hilchetna aneiyin ahi.

Mahila Morcha National Vice President Sarda Devi in ahoulimna’a aseidan in BJP hi Gandhian ideology ho tomngai tah’a tongdoh  thei party khatseh ahi ati. Aman ahoulimna’a chun Saffron party ideology phabep jong hilchetna aneiyin chuleh Centre le State Government in nehguh suhbeina ding’a pan alahkhom lhon danho jong hilchetna aneiyin ahi.

Tuni kinguon a chun athahbeh’a kisemdoh Kangpokpi District chungchang’a kihoulimna le lunggel kiseipehtuona jong ana bol’uvin ahi.

Ngamthang Haokip, 51-Saitu (ST) A/C in kipa thuphon nei

Imphal, Apr. 6 (ET): Tuchung 11th Manipur State Legislative Assembly Election-2017 a 51-Saitu (ST) Assembly Constituency a kon pachanna nei Ngamthang Haokip (INC) in mipite hengah kipa thuphon ahin neiyin ahi. Tuchung  election a pachanna kanei hi keija ding’a term 5 channa ahitan chule hitiho jouse hi Reverend ho, Pastor ho, Hou lamkai ho chule area sung houbung ho’a mipite Pathen heng’a taona lam’a apottho jal’u ahi ati.

Election kaidoh kitchu kahitan vote eipe eipelou  ti hilouvin akoi koi thakhat tah’a pan ilahkhom jingdiu ahi tin temna aneiye. Achesa kum ho’a area sung’a khantou machal natoh bangkhai hojong ikilungto uva pan ilahkhom teng’u le imolso joudiu ahi tinjong aseikit’e. Vote kape poi tia kiphatlamna neilouva igam’u khohsahna jal’a malam nokhom jing ding’in mipite tepna jong aneikit in ahi.

CM leh India Ambassador to Myanmar in kihoulhahna phabep neilhon

Imphal, Apr. 6 (DIPR): Ambassador of India to Myanmar Vikram Misri in tuni (Apr. 6) chun Indo-Myanmar chungchang’a kihoukhom ding’in Manipur Chief Minister N. Biren Singh kouna aneiyin ahi. Hiche meeting ah chun Indo-Myanmar trade leh India-Myanmar International relation chungchang’in kihoulimna anei lhon in ahi. India leh Myanmar kikah a relation iti suhdet ding ham tiho jong akihou lhon’e. Biren Singh in Manipur leh Myanmar kah’a border chungchang boidan aseiyin hiche hi Myanmar Government heng’a alhut ding’in Ambassador Vikram Misri atem in ahi. Hiche dungjui chun Ambassador Vikram Misri injong lhut ding’in akamcheng anapei.

Hiche chungchang’a Vikram Misri, Deputy Commissioner leh Superintendent of Police, Tengnoupal in jing nikho (Apr. 7) leh Moreh town sung vilna aneilhon ding chuteng muntin a construction work ho, Check post holeh Indo-Myanmar border trade toh kisai ijakai ho jouse avil lhon ding ahi.

ZYO Moreh in Manglamthang inkom’a bomb pokeh sangtah a dem

Imphal, Apr. 6: Achesa March nisim 29, 2017 nikho Moreh khopia cheng Manglamthang inkom’a bomb pokehna a thilkeu ho asetkeu hilouva aloinu jong anathimilna chungchang’in Zou Youth Organisation Moreh in asangpen in demna aneiyin ahi.

Hitobang deilou umtah bol’a pang miho akinthei lam’a matdoh’a aum’a chule achan diuva lom gotna jong apeh diuvin government hengah ngehna aneiyin ahi. Hiche thilsoh toh kilhon’a government in compensation apeh dinjong kiloikhomna in ngehna aneikit’e. Thilso toh kisaiyin kiloikhomna in hiche lampi jong kha ding chule central leh state security honjong hiche chungchang’a phate’a kholchilna aneiyuva thil phalou bol  hojong songkul a atansah ding’in government hengah ngehna aneikit in ahi.

Hetthei khat chu hiche bomb pokeh nikho chun Moreh CSO hon government hetding’in press release khatjong anabol uvin ahinlah government lang’a kon’in donbutna ima amupouvin ahi.

27 Sector AR, Ccpur Battalion in Felicitation Ceremony mang

Lien S. Gangte

Ccpur, Apr. 6:Ccpur District sung’a khangthah SSC Exam a lolhing ho chuleh Arny Vocational Training chom chom a lolhing ho kipapi na kingon 27th Sector AR, Ccpur Battalion in 6th April, 2017 jinglam nidan 11:00 apat chun District Training Centre, Tuibong ah aum in ahi.

Hiche kingon ahin, V. Hangkhanlian, Ho’ble Cabinet Minister, Agriculture, Vetenary & Animal Husbandry apang in chuleh, Brigadier Ajay Kumar, Commander, Ccpur Sector, Assam Rifles; Rakesh Balwal, IPS, Superintendent of Police, Ccpur;  R. Sudhan Singh, DC, Ccpur leh District Administrative Officers chom chom, Members of Autonomous District Council, Churachandpur district sung’a  organization chom chom leh Student Body ho’a lamkai ho apang uvin ahi. V. Hangkhanlian, Ho’ble Cabinet Minister, Agriculture, Vetenary & Animal Husbandry in asei na’ah, Army ho’n hitabang kingon ahin nei na chung uvah akipa na thu aphong, khangthah ho’n Army lut thei na ding’a Pre-Recruitment Training leh Vocational Training abol na chung uvah apa chat na thu aphong in ahi. Maban’a jong District sung’a monna leh khantou na aum District Council Member ho, Tribe leaders ho leh mipi ho ipan khom’u angaiyin chuleh igam’a Education leh Employment, Law & Order toh kisai a boi na inei hou isuhlhap thei na ding uva ipan khom’u angaiyin ahi ati. Hiche, Felicitation kingon ahin Staff Selection Commission Exam (Army) a lolhing Pasal 7 leh Numei 7; Vocational Training tichu Hospitality a mi 22, Electrician a mi 14 ho heng’ah kipa thilpeh pehdoh na aum in ahi.

Sukhoi jet 2 Imphal Tulihal Airport’a ki-nga

Imphal, Apr. 6: Indian Airforce Sukhoi jet ni Tulihal Airport ahung lhun jouva Dalai Lama Arunachal Pradesh gam’a ahung kholjin thu’a China leh India kidou ding’in akigo’e, tia social networking site’a athu kisei jin ahi’in, thulhut dungjuiya lenna huikong hi Tulihal airport’a ‘landing’ leh takeoff’ (huikong alendoh leh achuh) khol tol ding’a hung ahi, tin aseiye.

Analyst hon huikong Imphal khopi’a ahung hi China bulu na ding ahipoi, ajeh chu Myanmar in China gamsung vanthamjol mang ding’a phalna apeh ti ngal louva Imphal khopi hi gamlha tah ahi, tin aseiyui. Ahin, airforce lenna teni hi India in gam kinaipi ho athahat na vetsah nading’a Imphal khopi’a alen sah jong himaithei ahi.

JACAATB toh Manipur Govt. kihou ding ahi; V. Hangkhanlian

Lien S. Gangte

Ccpur, Apr. 6: V. Hangkhanlian, Ho’ble Cabinet Minister, Agriculture, Vetenary & Animal Husbandry in Buallian kho’a Felicitation kingon a holim anei na’ah, 7th April, 2017 nikho leh Manipur Govt. leh JACAATB in Bill 3 ho jeh’a thina toh mi 8 ho chungthu seikhom na sun pung 12:00 le kinei ding ahi ati.

Chuleh, aman aseibe na’ah, Vetenary leh Animal Husbandry toh kisai’a mipi’n gancha ahin vah uva, khantou na ahin nei thei na ding uva pan kila ding ahi ati. Ccpur district sung’a tuineh kining lhing aum thei na ding’a programe kisem ding, Lamlien adeh’a Town area a um ho hatah’a kisempha ding ahi ati. Chuleh I.B. Road, Mission Road, Red Cross Road Thangzam Road leh Rengkai Road lamlien ho fund um hih jong leh Fund umteng peh ding in Concerned Dept. ho natoh akipat sah in, Black topping jong kibol ding ahi ati. Lamlien kehlet na jong compensation jat ding suhfel ahi teng kipan ding, Gari atam cheh cheh toh kilhon a By-Pass Road bol na ding DIPR jong akibol tan, Sanction aum teng Ccpur Town area a natoh kipan ding ahi ati. Ccpur District sung’a Tuineh kining lhing aum thei na ding leh Lamlien semhoi ding hi 1st Priority a kikoi ding ahi ati. MLA masa ho’n sum umjouse ana mang chai kei uvin, sum umsa aum po’n Centre Govt. kithopi na kingah ding ahi in mipi’n  nahet them diu angaiyin ahi ati.  District Hq, Sub-Divisional Hq leh Block Hq ho’a Agrobased Market Shed Central Funding NEC, Govt. of India fund mang’a kibol ding, tu tu in Manipur in fund aneipo’n, Manipur Govt. Budget hi Deficit budget lha 4 a ding Govt natong ho’a ding  in aki pass in, June/July le Assembly Full Budget seikhom na um ding ahi ati.

Jorhat’a bong sa poh jeh’a Muslim 3 kiman

Guwahati, Apr. 6: Assam gamsung Jorhat tolpi’a achesa Tuesday jan in chapang khat panna in Muslim thum bongsa lhangphong’a poh jeh in aman uvin ahi.

Akiman hohin Jorhat sa kitha na mun’a kon bong san eh ding’a ahin poh-u ahi’in, sa hi veterinary department’a athot tauvin, ngohna kisem khum teni ni 14 judicial custody’a um ding’in Jorhat CJM court in aseiyin ahi. Shah Jamal Haque, Abdul Rahman leh chapang khat hin Gohain Tekela lamlen’a lhangphong tah’a bong-sa apoh uva, hou thu’a mi pohnatna abol ahi, tia ngohna kisemkhum ahiuve.

Amaho hi Section 295 (A) IPC leh Section 568 (Assam Cattle Preservation Act, 1950) noiya hehna kisemkhum ahi. Police hon bongsa kg keh toh amat tha uva, veterinary department’a sa athot-u ahitai. Thulhut dungjuiya Muslim mithum hohi private industrial institute’a natong ahiuvin, mi phabep in sa poh jeh’a amat uva police khut’a apehdoh-u ahi. Thudohna aneiyu chun, sa hi neh ding’a kakichoh-u ahi, tin aseiyui. Tu-leh-tu’a sa kitha namun hi dan dungjui hinam, ti kholna apan tauve.

SC in teacher 10,323 natoh thu’a thutanna anei hi ginchat tobang ahipoi: Tripura CM

Agartala,  Apr. 6 (ANI): Tripura sorkar in teacher 10,323 lahdoh ding’a thu’a adinmun avel in aseikit in, ahin, December nisim 31 nikho kah’a March nisim 29 nikho’a Supreme Court thupeh ajui ding ahi, tin aseiye.

Civil Secretariat mun’a Tripura Chief Minister Manik Sarkar in cabinet toukhomna kichaiya thuso miho akimupi na’a chun, “Council of Minister in April nisim 5 nikho’a toukhomna’a aneiyin, March 29 nikho’a Supreme Court thutan vettohna aneiyin, state in special leave petition (SLP) thu hi adihpoi”, tin aseiyin ahi. “Thutanna hi ginchat tobang ahipoi”, tin Sarkar in aseiiyin chule court thuhilna dungjuiya state in April 30 ka’a employment policy asem ding, akisem loulai leh May nisim 31 kah’a vacancy ho suhdim nading’a advertisement apeh ding ahi.

“Kum tamtah lunglut tah’a pontho tah’a education institution machal nadig’a pan la’a simlai ho kithopi’a jilkung 10,323 ho chun’a thutanna chung’a kilolna kanei uvin ahi. Amaho khonung suhset louna ding’a sorkar in amaho adinpi ding, mopohna jouse alah’a akithopi ding ahi. Hiche hi amaho ding’a kakipeh nao ahi’in chule boina aumlou nading’a school’a aum diuvin temna kaneiyui”, ati. December 31 kah’a court thupeh bang’a athah’a selection process chelhah nading tohgon umding, athah’a process akichai kah’a akilheng sa teacher hohin anatoh ajom diu ahi, ati.

Court thupeh in atohkhah thei teacher ho khonung ding sorkar in agelkhoh’e, tin Chief Minister Sarkar in aseiyin, thuso miho toh kimutona’a State Education Minister Tapan Chakraborty leh Finance, ICA Minister Bhanulal Saha jong apang uvin ahi. May nisim 7, 2014 kum’a Tripura High Court in petition 58 kipelut donbutna’a state sorkar in 2010 leh 2013 kum’a alah teacher ho natoh alahdoh (terminate) abol ahi. State sorkar in National Council for Teachers Education (NCTE) guidelines, 2001 ajui poi, tia court in asei ahi. Right to Education Act hi 2009 kum’a kichepi ahi’in, state sorkar in Act dungjuiya recruit abol ding’a asei ahi.

Anatoh boi ding’a kisei 10,232 teacher lah’a 1,100 hi post graduate hi’a, 4,617 hi graduate chule 4,606 hi undergraduate ahi. High Court in thutanna anei masa January 2014 kum’a Manik Sarkar sorkar in Supreme Court ‘a special leave petition (SLP) apeh ahi’in, Ministry of Human Resource Development (MRC) heng’a lekhathot apeh uva, amaho ding’a daan (rules) a-ol sah diuva ngehna aneiyu ahi. Teacher anatoh dalha ding’a kisei holeh adang injong SLP ni apeh ahi.

Achesa December nisim 8, 2014 kum’a Justice JS Khehar leh Justice Arun Mishra panna Supreme Court division bench in Tripura High Court thupeh hi ‘stay’ abol’a, thupeh aumkit kahse’a teacher hon anatoh abanjom diuva phalna apeh ahi. Ahin, March nisim 29 nikho’a SC in thutanna achaina asem’a chun High Court thupeh atosot in, ahin, December nisim 31 chan teacher kila sa hohin anatoh ajom thei diuva asei ahi. State sorkar in athah’a Rights to Education dan noiya kisei bang’a Teachers Eligibility Test ‘a recruitment policy athah’a May nisim 31 kah’a abol uva chule December nisim 31 kah’a achai diuva SC in asei ahi.

 

Gamsung mipi hon Social media le Internet a thuso dihlou ho atahdoh lou diuva SCPCR le Police in gihna nei

Shillong, Apr. 6: Tuni jingkahlam a Nongmynsong PO hopsung’a um Atomic Minerals Directorate office building nunglam’a um toilet khat’a naosen pentil khat ana kidalhah thu hi gamsung mipi hon social media dung’a athethanglou diuvin State Commission for Protection of Child Rights (SCPCR) in gihna aneiye.

Naosen chu jingkahlam nidan 8 vel’a ana kimudoh ahi. SCPCR in naosen chu Ganesh Das hospital a checkup bolding ana polut in ahi. Nongmynsong OP incharge LD Sangma in aseidan in chapang hi kum ijatvel ahiding hetchen ahinapoi ati.  Tutu’a hi medical report akinga laitah ahi’n naosen nu le pa holdohna ding in jong akiboipijing’e ati.  Medical formality jouse akichai teng le Commission in Naosen khoukhahna ding mopohna akilah ding ahi tin jong aseiye.

“Naosen khat lungsetna beihel’a toilet a kidalha hi amopohna kihetlou le mihem lungput pulou miho natoh ahi. Chuleh mi phabep in khonung ding gellouhel’a naosem lim social media a ahintahdoh’u hi ngolhoitah natoh ahi” tin SCPCR Chairperson Meena Kharkongor in aseiye.

Meena Kharkongor in aseibena’a chun , achesa Otober nisim 3,2016 nikho’a East Khai Hills District’a chapang khat kimu chu November nisim 1, 2016 nikho chun Api (grandmother) khut’a akipeluttai ati. Tumasang jong chun numei khat pool pam’a athisa a umdan’a social media dung a miphabep in ahin tahlang’u chu athi ahipo’n, ju akham jeh’a ihmu ahibouve tin Kharkongor in suhthengna aneiye.

Alangkhat’a SP (City) Vivek Syiem in aseidan in social media le internet a thulamleng ho tahdoh hi mikhantoulou ho natoh ahi’n, hitobang bol ho akimatdoh’a ahileh IPC section 505 dungjuiya kum 3 songkul tangding’u ahi ati.

Lijum Ronya avel’a BJP  lut tading

Itanagar, Apr. 6: Arunachal Pradesh sung, adeh’a 27 Liromoba sung’a political le social status loupitah aneijeh in Lijum Ronya chu tuni chun Bharatiya Janata Party (BJP) in avel’a party homsung’a hunglut kit ding in kouna aneiyin ahi.

Geldoh thei khat chu  election nukhahpen’a  BJP ticket amujoulou jeh’a Ronya hin kiphinna ananei’a, hiche jeh’a chu BJP in ama le anungjui phabep party a kon ana nuodoh ahi. BJP hin Bai Gadi khel’a Ronya joh party ticket anapeh hileh BJP in bailamtah’a pachanna ana nei ding ahi tihi mipi jouse kihoulimna thupi khat jong ahi.

Lion of 27th Liromoba constituency ti’a kihe Ronya hi Arunachal Pradesh BJP legislator lah’a NHPC le  project dang dang ho gamsung’a hinpolut masapen jong ahi. Donyi Polo Degree College  kiphudohna ding’a alhoh seng’a jong ana apang ahi.  Ronya in BJP abelkit’a ahileh BJP hi Arunachal Pradesh sung’a suhling hoi hilou hiding ahitai tithei ahi. Ajeh chu Ronya hi gamsung mipi ho’n miphatah le vetjuitheitah mikhat a ahet’u ahi.

Hetthei khat chu December , 2016 a chu Peoples’  Party of Arunachal (PA) MLA ho le CM Pema Khandu in BJP ana bel tolhon’a  Arunachal Pradesh sung a BJP sorkar ana kisemdoh ahi.  Ronya in party ahinbel kit ding hin 2018 panchayat election le  2019  general election’a ding’a BJP in kiguotna khoutah aneidan avetsah ahi.

Mumbai Huikong ngahmun’a Northeast numei khat kham nathei 2.85kg toh kimat tha

Shillong, Apr. 6: Monday ni chun Narcotics Control Bureau (NCB ) in Chhatrapati Shivaji International Airport, Mumbai’a  Meghalaya  a cheng kum 47 upa Khiangte Lalthlamuani chu khamnathei thil 2.85 kg toh amat tha’uve tin thulhut kimu khat in aseiye. Narcotics Control Bureau (NCB) seidan in Khiangte Lalthlamuani hi Lome khopi Togo,West Africa apat hung ahin  khamnethei apo ‘e tithu thuguh pole ho’a kon akijah toh lhon’a  kholchil ana kinei nah’a chun handbag’a khamnathei thil 2.85kg ana kimudoh  in ahi.Ama nu hi India sung’a khamnathei thil la kivei jing mi ahidan jong aphong doh’e. NCB in hiche thilsoh toh kilhon in khol chil na anei uvin ahin tuchan in hiche kham nathei hi hoilai’a athah got ahi ahedoh nai pouve.Hiche kham nathei hi atamjo African gam’a kon hung lut jing ahi.Chuleh hitobang khamnathwi toh kimatdohtha hi Khiangte pum’a numei ni ahitai. Amasa nu chu March 26, ni’a Air Intelligence Unit hon amat u ahi.Ama nu min chu Vanessa De kock ahin athilpoh chu kg 4.9 /crore 1.47 man thil ahi.

Nagaland Disaster Management Dept in mipite kiging jing’a aum diu’a hilchahna nei

Kohima, Apr. 6: State Home Department  noiya um Nagaland State Disaster Management Authority (NSDMA)  in Nagaland miho kom’a  tu hapta sung’a hi hui leh guo hatah’a hung kitho nalai ding ahijeh in mipi te kiging jing’a aum diuvin hilchahna aneiye.Commissioner and Secretary Khrienuo Metha in thuso miho kom’a asei nah’a chun hiche weather data hi Indian Meteorological Department dung jui’a  akilah naban’a Nagaland gamsung weather data hi Soil and Conservation Department kom’a kon kimu ahidan jong aseiye.

 NSDMA seidan in Zunheboto DDMA in ahin hetsah dung jui in Zunheboto town leh Pughoboto town a hui leh guo kitho jeh’a munchim in inn le lou tamtah asuse tai ati.

Khangdong pasal 2 in numei 1 pohmang ding guong; avel’a umho hapan jal’a molphou lhon

Guwahati, Apr. 6: Tulai gamsung aboitah jeh hin  numei ho ding in chele vale jong ahah sa cheh cheh tan ahi.Wenesday nichun Guwahati a numei khat  pasal ni in gari kangni mangcha in ana jampi lhon in ahinlah avel lah’a um ho hapan jal in ana molphou lhon in ahi.

Thilsoh umdan chu ahileh khangdong pasal teni chun numei nu chu Gari kangni mangcha’a jampi ding aguot lhon ahi’n, ahinlah avel’a um hon ahin mudoh phat’u chun khangdong teni chu matding ana guong’uvin ahi. Mipi’a kon sochat na ding in khangdong teni chun numei nu chu Assam Zoo maiya ana dalha lhon in ahi. Hiche thuso kisut gei hin numei nu min le chenna mun hetdoh ahinaipoi.  Police hon jong  chonvalna neiteni matdohna ding in kholchilna apanta’uvin ahi.

Guwahati, Lokapriya Gopinath Bordoloi Airport  kisem hoi tading

Guwahati, Apr. 6: Centre in Guwahati’a um International Airport, Lokapriya Gopinath Bordoloi Airport  sem hoi leh kehlet nading in  Dk. Crore 1,000 ahin petai tin Assam Industry Minister Chandra Mohan Patowary  in Wednesday nichun aseiye. Patoway in aseidan in mi 2000 um nathei ding’a ana kisem Airort hi kikehlen ding mi 6000 ket ding’a kisem hoi ding ahi ati. Hiche naban in Civil Aviation Ministry in jong hiche tohgon ho lolhin sah nading in  gam (land) phabeb cargo terminal’a ding in ape in ahi.

Patowary in asei kit nah’a chun Assam government in jong Brahmaputra vadung jong hi  water transport’a ding’a semhoi ding tohguon aneiye ati.Centre in Brahmaputra vadung  hi Dhubri apat Chittagong port Bangladesh chan suh sao nading’a  Dk. crore 250 jong ahin peh tai tin aseiye.

Go juh jom jeh’a J&K gam’a twilen dinmun tobang lhung

Srinagar, April 6 (Zeenews): Thursday nikho’a go tan louva ajuh jeh in Jammu and Kashmir gam’a twilen dinmun tobang aumin, Jhelum vadung pam’a cheng Kashmir gam-mi ho akichih thei diuvin authority hon thuhilna anei uvin ahi.

Ahin, Met official hon Friday nikho’a kon pha ding ahitai, ati. Aphat louva buh khe’a nithum kijom’a go ajuh jeh in Kashmir Valley’a school jouse Monday nikho chan kha ding’in administration in Thursday nikhon thuso aneiyin ahi. Jhelum vadung twi hi Thursday jingkah nidan 1 chan’a Sangam, South Kashmir, Ram Munshibagh, Srinagar leh Asham, North Kashmir ‘a ‘danger mark’ noiya um ahi.

Ferozepur vadung, North Kashmir, Baramullah district’a twi aletdoh in,  khosung phabep’a alut’e, ati. “Thursday nikho’a kon buh-khe leh go juh kem ding ahitan”, tin Sanam Lotus, director, J&K Met department in thuso miho heng’a aseiyin ahi. Kichat ding aumpon, ahin, mun nem’a cheng hon hahsatna ato thei ahi”, tin aseibe in ahi. Met office in Jammu-Srinagar highway’a landslide’ jong um maithei ding’in aseibe uvin ahi.

Shiv Sena MP Gaikwad in Air India official pa injong eivoh masat ahi, tia Lok Sabha’a sei

New Delhi, April 6 (Zeenews): Air India natong khat vo’a ngohna kinei Shiv Sena MP Ravindra Gaikwad in Thursday nikhon Parliament’a themmona kanei poi, tin aseiyin, airline staff ho chon val masa ahi, ati.

Lok Sabha’a Gaikwad in aseina’a chun AI official pa akhoh jeh’a hichan soh ahi, ati. Air India natong pa kason’e, tin Sena MP in aseiyin, chule democracy minsetna ding ahileh Parliament’a ngaidam kathum ding, Air India official heng’a vang kathum louding ahi, ati. “AI official pa’n thu ngailou tah’a eihouva, ka sangkhol ngong’a eimat ahi’in, ahin, thipbeh in kaum’e”, ati.

Achesa March nisim 23 nikho’a Gaikwad hin business class ticket anei vang’a economy class’a atousah-u ahi’in, hiche’a kon kinahna anaum ahi. Pune-Delhi lenna New Delhi khopi alhun’a chun, complaint register kathum in ahi. “Officer khat ahung’in, mi 2 leh 3 ahung be kit in, politician kahi tia kasei chun, Narendra Modi nahi ham, tin eidonbut’e, tin hilchenna aneiyin ahi. Airlines in ‘no fly list’ a akoi lo ahi’in, thilsoh kitup tah’a kholna anei diuvin thumna aneiyin ahi.

Osmanabad, Maharashtra Lok Sabha member kum 57’a upa Gaikwad in thuso mihon sihnei langneina anei uve, tin ngohna aneiyin ahi. Sena MP pa in kum 60’a upa Air India duty manager khat slipper’a avoh jeh’a Air India leh domestic airlines phabep in MP pa lenna huikong’a tou thei louding’a ‘black list’ abol ahi. Ahin, Gaikwad in AI official Sukumar injoh eivoh masat ahi, tin nelkalna aneiyin ahi.

Dalai Lama Arunachal ‘a akholjin thu’a China in Kashmir gam’a jong pan kilathei ahi, tia sei

New Delhi, April 6 (Zeenews): China thuso in Thursday nikhon India gam in Tibetan hou lamkai Dalai Lama Arunachal Pradesh gam’a akholjin phalna aneiyu hi demna anei uvin ahi.

China in India douna’a Kashmir gam’a jong pan alah thei ahi, tin gihna aneibe in ahi. “GDP (Gross domestic product) hi India sang’a jat tamtah’a sangjo ahi’in, military thahatna in Indian Ocean pha jouva China gam in India toh geopolitical game’a pan alah’a ahileh New Delhi khut’a Beijing in gol alel ding ham?’ tin aseibe uvin ahi. “Arunchal Pradesh gam’a Dalai Lama kholjin hi New Delhi in China chung’a ‘pressure’ (pohgih) apeh na ahi”, ati.

“Ahin, hiche hi lunghan nathei leh ngol kai natoh ahi. Chule India in aloupina amansah ahi, tin Chinese official khat in aseiyin ahi. Dalai Lama in south Tibet avilna masapen ahipon, India gam hopsung ahi’in, gam kehkhen ding tohgon anei ahi, ti avetsah ahi, tin Zhu Weiqun, National Committee of the Chinese People’s Political Consultative Conference in aseiyin ahi. Dalai Lama India in kouna apeh hi tu naicha China gam toh toukhomna um chung’a lunglhai louna aum’e, tina ahi, tin Zhao Gancheng, director, Center for Asia-Pacific Studies of the Shanghai Institutes for International in aseiyin ahi.

Wednesday nikho’a Dalai Lama Arunchal Pradesh gam’a akholjin thu’a China in alunghanna thu anasei ahi’in, India in avel’a Tibetan hou lamkai pa kholjin hi politics toh kisaina nei ahipoi, tin avel in aseikit in ahi. China in Arunachal Pradesh gam hi South Tibet ahi, tia asei ahi’in, alangkhat’a India gam in agamsung ahi, tia asei ahi. China in tu masang’a US envoy anahi Richard Verma Tawang ‘a akholjin got doudalna aneiya chule New Delhi leh Bejing gamgi thu’a Washington in pan alah louding’a gihna jong anei ahi.

South Korea gam in ballistic missile ‘test’ bol

Seoul, April 6 (AFP): South Korea in lolhing tah in ballistic missile patepna aneiye, tin Yonhap thuson aseiyin, North Korea in Japan twipi’a Ballistic missile khat akap lut jou thilsoh ahi’in, hiche hi China-US summit gihna ahi, tia analyst hon aseiyu ahi.

South Korea hi American security umbrella leh US sepai asang’a sim in aven ahi. Achesa 2012 kum’a United States toh kinoptona asem uva, North Korea gihna’a kon kiven nading ballistic missile system range hi ajat thum’a kal sah ding’a kinoptona kisem ahi. South in patepna anei missile hi 800 km (500 miles) range ahi’in, Pyongyang gam chan lhungjou ahi, tin Yonhap thuson aseibe in ahi. “Test-firing alolhing’e”, tin official khat in aseiyin ahi.

South Korea in tukum leh missile thah koi ding’a tohgon anei ahi. Missile thah hin North Korea gam apumpi’a aphah jou ding ahi, tin thuson aseibe in ahi. Kum masa June lha’a South Korea in lolhing tah’a agam’a kisem missile ni lolhing tah’a patepna anei ahi. US President Donald Trump in China gam lamkai Xi Jinping achenna Mar-a-Lago estate, Florida mun’a akimupi teng leh Pyongyang nuclear weapon programme thu sangtah’a akisei ding tahsan ahi.

Sasikala umna Bengaluru songkul’a dan kijui lou; lhakhat sung’a mi 12 kimupi

Bengaluru, April 6 (Zeenews): Parappana Agaraha songkul’a um All India Anna Dravida Munnetra Kazhagam lamkai VK Sasikala in songkul’a aum sung’a hin lha khat leh mi 12 (visitor) akimupi’e, tin akiseiyin ahi.

VK Sasikala hi ‘disproportionate asset case’ thu’a themmo kichan’a kum 4 songkul’a tang ding’a thutanna um ahi. Central Prison in Right to Information (RTI) thudoh donbutna apehna’a chun, Sasikala in February nisim 16 leh March nisim 18 sung’a visitor akimupi thu aseiyin ahi. Asopi leh gotna achan khompi Elavarasi leh VN Sudhakaran in hiche phat sung’a hi visitor li vei cheh akimupi ahi.

Sasikala kimupi’a che holah’a ama lawyer ho, asopi cha TTV Dinakaran leh Vivek J chule Lok Sabha Deputy Speaker Thambidurai jong pang ahi. Achesa February nisim 20 leh March nisim 8 sung’a Dinakaran in Sasikala akimupi in, akimuto na lhon phat hi minute 45 alhing’e, tin Times of India thuson aseiyin ahi. MP anahi leh Telegu Desam Party MLC Magunta Srinivasulu Reddy in March nisim 1 nikho’a Sasikala agavil ahi.

Activist Narasimha Murthy in RTI apeh ahi’in, PTI thuso’a kisei hi jail dan palkehna ahi, tia asei ahi. Achungthu kisei nalai leh themmo kichan hohin Karnataka Prison manual leh Karnataka Prison Rules dungjuiya visitor akimupi ding ahi. Dan dungjuiya achungthu kisei nalai (undertrial) hohin kal khat sung’a a-insung mi, aloi chule lawyer khat bou akimupi theiding chule themmo kichan hohin ni 15 sung’a visitor khat bou anei theiding ahi. Ahin, Convict No 9234 Sasikala chungthu’a hi dan kipalkeh ahi. Achesa February nisim 15 nikho’a Sasikala songkul’a um pan ahi’in, Supreme Court in themmo achan jouva ama-leh-ama kipelut ahi.

Thusoh Lahchom

Kuki Inpi Kpi

Ahunglhung ding April nisim 8 nikho le Kuki Inpi Kangpokpi District election umding ahi ti’a ana kisei chu peldoh theilou boina khat aumtah jeh in April nisim 18 ni’a ding in vohchon ahitai tin Kuki  Inpi Manipur Election in-charge Lunpi S.Thangjom a kon kimu thulhut in aseiye. Election kibolna ding mun chu District Council Hall, Kangpokpi DHQ hiding aphat chu ahileh jingkahlam nidan 11 hiding ahi.  Hiche nikho le hin Lhang Inpi (Block Inpi) le CSO jouse’a kon voter ni  cheh in vote alhah thei ding’u ahi.

Gamsai

Guwahati Nagaon gamkai sung’a um Hatimura kho’a gamsai in  mikhat asukha in ahi. Akisukhapa chu  Bikram Mala ahi.  Akimvel’a chenghon aseidan un tulaitah hi gamsai ho’n khosung miho asuboi jing’uvin ahinlah forest department in khomiho venbitna ding tohguon khat jong aneipoi tin asei’uve.  Bikram Mala sukha gamsai ho chun loujao khat jong achonse’uvin ahi.

Aadhaar card

Post office’a kon kithot Aadhaar card jakhat val Lilong Sub Division Post Office in hopdoh louvin akoiye, ti thu hetdoh in aumin ahi. Mikhat in post office’a kon kithot’a ama ‘PAN’ card hung lhung tam, ti khol’a achena’a Aadhaar kihop louthu hi hetdoh’a um ahi. Aadhaar card hop ding’a asei uleh post man pa in Aadhaar card khat’a 30 neipeh diu ahi, tia asei ahi.

Polio

Loktak Brigade lamaina in Noney Battalion in Noney Primary Health Centre mun’a Pulse Polio immunization programme abol uvin, kum 5 noilang chapang ho Polio drops ape uvin ahi.Vaccine bol ding athupi dan thu unit medical officer in khosung miho hilna aneiyin ahi. Tohgon hi 8 Assam Rifles hon abol ahi’in, khosung mihon sangtah in akipapi uvin ahi. Gamkaiya khantou nading’a pan kila jing ding ahi, tin medical officer in aseibe in ahi.

IIM Shillong

Indian Institute of Management (IIM) Shillong kumkit lang leh aum nading mun New Shillong’a kichon lut ding ahitai tin Institute Director, Amitabha De in aseiye. Indian Institute of Management (IIM) Shillong hi 2008 napat’a aum namun ana lem chang lou jeh in  Mayurbhanj complex’a anakha ahi. Kumkit lang leh aum nading mun New Shillong a kichon lut ding ahidan thu aseiye.Hiche campus hi New Shillong mun(120 acre) ahi naban’a campus hi phases ni in aki hom khen in  phases masa pa hi tukum kichai lang leh asah chai ding u kum kit leh kichon lut tei ahi nading’a aseiye.Hiche institutes hi north eastern nading nga alen pen ahina ban in kum set leh chapang simlai 800 tobang a graduate in ahi.

Editorial

Bandh bolbol kibolchahdi !

                               Bandh suhbei/suhlhomna dia govt nin bandh kidoupina dia panlah didan leh juidi phabep jong ahinkoi tai. Hiche lah-a akhoh (athupi) dom chu ahileh bandh kou, bandh bol lamkai ho Police Case (FIR Case) bolkhumdi, thuso (media) hoa bandh kiboldi thu moh soso loudi, akisotah jongleh bandh kou, bandh bolgo kiloikhomna lamkai amin kichiehsel umdi, soi (signature) kikaina jong kichiehsel’a umdi, dukan bolhon jong bandh kikou jeh-a dukan amohkha jenglou diu, thilpo leh mipo gari hojong bandh jeh-a lhaida jeng loudi, hichu sepai/police in avenbitna dia pan alahdi tiho ahi. Hiche hin ichan’a bandh ahinlhomsah diham akihepon, chuleh bandh ahung kikouva akou ho ipi hung kilo am tinjong ahinpohdi ahi. N Biren govt hung kisemdoh jou jouva Bandh umtaloudi ahi tia ahinphondoh u nikhat nini jou kah mama’n Student kiloikhomna DESAM hon Jiribam a kon MLA hung kaidoh Ashaf Uddin Parliamentary Secretary a ana kipansah thu ah nidan 17 (nikhat lhinglou) bandh anakou un hinlah govt nin hiche thua DESAM ho kiphinna hi pomthei santhei ahipoi ti kalval ima anabolpoi. Tua hi govt injong bandh thua khujeng jung’a thuphon thusei boldi tijong hidehlou, ahia bandh kimaitopi didan themkhat kiguotna aanei tina ahi. Ahin hiche thua ‘Media’ (thuso) ho adon achang louva themmo kichansahna hung himaitheidi ahi. Ajeh chu bandh boldia kigo ho chun Newspaper leh TV News a thuphon boldi atiimasatpen jiu ahi. Newspaper Editors’ Guild (Editor kiloikhomna) injong ipi kiloikhomna hileh lamkai soi kaina umlou Press Release (thuphon) solou dia kilolna aneisau ahi. Tulai Computer leh Internet khang ahitah jeh in Letter Head semthu, mi khat soi (sign) bolthu/guh hojong thil hahsa loutah ahitah jeh-a kiloikhomna khat min’a thuso, thuphon bol khat aumleh ajing athai teng kiloikhomna in hitobang thuso akihephapoi tia suhthengna hung kineipai umji ahi. Govt leh mipi’n thutah a alahtheipen Newspaper leh TV News a bandh kikou thu ahung kisoleh bandh kou alamkai leh soi bol koiham tia athu kisona Newspaper leh TV News a mopo ho hung kihol’a kidong humhaldi’n aum’e. Bandh akikouve akitileh sumlo a lhai Gari ho lhaida jeng jiu ahijeh in govt nin mun jouse ah Security apetheinadem ti jong umdi ahi. Dukan bolho jong chutima ahi.

                       Chief Minister N Biren jong hi amatah ‘Journalist’ (thuso mi) khat anahi tolhon’a Journalist holeh ‘Media’ ho boina jong ahet themthoudi jeh in Media ho hung boisam ponte. Tua hi bandh kikouna thuphon ho koiman asoloudi ti hilouva Letter Head a soi kikaina ahilouleh soloudi tibou ahi. Ahin ipijeh-a bandh kou, bandh bol ngen hitam tijong gel masatna um ngaidi ahi. Thil khat thua Govt kom’a seididol sei masatna umlouva jangpet (direct) a bandh kou jong atam thou jinai. Ahin Manipur’a bandh kou, bandh bol kiti hi govt kom’a lekha (application) kipelut dan’a umdoh ahitah jeh-a ahamdoh sun’in bandh akou loji ahi. Mipi’n jong bandh kouthei, bolthei ahinai tia moh aolah-lah jong lamkai khat kimat lona hung hithei ahijeh in bandh koudi tiho nivei thumvei akigel u hung ngaididan ahi.

Blankfire

Ama ding bou kigel, ama boina bou boina a gel, midang di gelphalou, midang boina gelphalou, ama deibou kigela midang dei gelna umlou. Hitobang mihem atam jeh a mito sato kitohlou tam, society machalna jong umtheilou ahi.