ET April 6, 2017 News (Local, Regional, Thusoh Lahchom, Editorial, Blankfire)

ET April 6, 2017 News (Local, Regional, Thusoh Lahchom, Editorial, Blankfire)

615
0
SHARE

Hui-le-guo kitho in Kangchup le Leimakhong area a chenna Inn 17 val suse, agamkai MDC le Head Lambu in khuolchilna nei

Kangpokpi, Apr. 5(ET): Achesa April nisim 2 ni’a  gamsung’a hui-le-guo kitho in Kangchup le Leimakhong Area a chenna Inn 17 val asuhsetna ban’a ni ijat hamkhat tanglouva gojuh jeh in gari le mipi lamlhahna lampi tamtah jong anasuse in ahi.

Hitoh kilhon in tuni chun agamkai MDC (13-Kangchup DCC) S. Dama Vaiphei le S. Laltinpau Vaiphei, Head Lambu, Kangchup SDO Geljang in huiyin asuhset chenna inn ho chu vetlhahna aga neihon in ahi. Tuni’a 13-Kangchup MDC le Head Lambu S. Laltinpau Vaiphei in kholchilna  aga neihon na a chun Kangchup Area Tribal Youth Organisation (KATYO) lamkai hon jong ana kilhonpiuvin ahi.

April nisim 2 jaan’a hui-le-guo kitho in asuhset chenna inn chu abon’a inn 17 val alhing in chule kho 19 val anatongkha in ahi. Hui-le-guo kitho in asuhset chenna inn kho ho chu Awlmun Village, Kangchup Makhom, K. Phaizawl, K. Patzang, K. Twikun, Ireng, L. Phaizang, Kharam Vaiphei le Leilon Vaiphei kho ahi.

Awlmun Village a chenna inn 3 anase in; Henkhohao Lotjem chenna inn chu achunglang langva kikhu jouse abon’a huiyin analhohlha in chule innbang Leidang a kideng jong chu tamtah anajaldeh in ahi.  Inndang ni teni chu ahile Lhingneikim Hangshing le Doukholet Kuki chenna inn ahi. Kangchup Makhom a jong chenna inn 4 jen anasuse in ahi. Nehpao Gangte, Nengtinchong Misao, Thangjamang Kipgen le Seitinthang Kilong ho chenna inn cheng chu huiyin ana muset ahi. K. Phaizawl a Thanglenlal Kipgen te chenna inn Leidang a kisa chu huiyin abon’a achunglang langva jouse alhoh mang naban’a abang le akhom ho kisan gei in anasuse in ahi. Thanghillen Khongsai chenna in jong achunglang bii akikhu chu akehkhat huiyin analhoh mang in ahi. K. Patzang kho’a Dineihoi SItlhou chenna inn chu hui hat jeh in tol’a ana lhu matdeh in ahi. K. Twikun a jong Angom Boboy, Paokhohoi Hangshing, Hencha Kipgen, Jangminlun Kipgen le Lamneithem Kipgen ho chenna inn jong huihat in anasuse in ahi.

Ireng Naga kho’a Dikambui Thiumai chenna inn jong april nisim 2 ni’a huihat chun anasuse in chule L. Phaizang a Nempi Vaiphei chenna inn chu huihat jeh in abon’a anase chaikeiyin ahi. Huiyin inn asemlhuh pet’a chu Nempi Vaiphei hi asung’a geh ahin hinlah vangphat umtah in anajamdoh man in ahi. Kharam Vaiphei le Leilon Vaiphei kho’a jong chenna inn phabep hui hat jeh in anase in ahi.

Akisaipi mopohna neihon natural calamities jeh’a mipi genthei thoh ho hi agelkhoh uva kithopina pehding’a lomho hi akintheilampen’a ahinpeh dohji diuvin agamkai MDC S. Dama Vaiphei in ngehna aneiyin chule achesa 2016 kum ma ling-kiho jeh’a chenna inn tamtah anasuhset ahin hinlah tuchan’a compensation/Relief  Fund munailou jong um ahin, hiche ho jong akisaipi mopohna neihon akintheilampen’a ahinpeh doh diuvin jong ngehna aneibe in ahi.

Khwairamband Keithel ‘a ‘license’ nei thil-joh numei hon lamlen pam’a thil joh ho anodoh diuva thumna nei’u

Imphal, April 5: Khwairamband bazar’a um ima market thum kimvel’a thil joh numei ho anodoh diu thumna in Ima Keithel thum’a thil joh numei hon Khwairamband Keithel, Imphal khopi’a kiphinna anei uvin ahi.

Thingujam (O) Rani, general secretary, Khwairamband Nupi Keithel Sinpham amasung Saktam Kanba Lup (KNKSSKL) in thuso miho akimupi in, MAHUD Minister Shyamkumar in Ima Keithel leh bazaar sung thengset set’a koi ding’a aseihi katosot uve, ati. Ahin, vangset umtah’a Naga River’a MAHUD Minister in kailhang sem ding’a aphondoh jouva konin aniseh in lamlen pam’a thil-joh atam cheh cheh in, amaho hin mun alosoh tauve, tin aseiyin ahi.

Lamlen pam’a thil joh ho jeh’a Ima Keithel’a licence neiya dukan bol ho thil joh sangtah in atongkha in ahi, tin Rani in aseiye. MAHUD Minister Shyamkumar in numei thiljoh ho sung’a politics aum’e, tia asei Rani in demna aneiyin, sorkar in numei dukan bol ho agelkhoh loujeh’a hitobang dinmun um ahi, tin ngohna aneiye. Sihnei langneina umlouvin state sorkar in thil-joh numei ho hahsatna vetlhah peh hen, ati.

Alangkhat’a, lamlen pam’a thil-joh numei khat, Ibetombi in Minister pa in thil johna ding mun peh ding’a asei hi atah aso ding kanga jing-u ahi, tin aseiye. Ahin, niseh leh keiho thil joh nathei ding mun kisem kanga-u ahi’in, hahsatna lentah ahi. Hiche thu hi akiseilhah louleh lamlen pam’a thiljoh hon chate ho school’a kasol joulou diu ahi, tin Ibetombi in aseibe in ahi. Lamlen pam’a thil joh numei hon thil joh nading mun hol’a mun ong lai hol’a kava le-le u ahi’in, sepai honjong eisuhgim jing uva chule thil kijoh masang’a asuhset nau jong um ahi’in, keiho touna ding mun eisem peh uvin, tia thumna aneiyu ahi.

UKLA President leh anungjui 2 kiman

Kangpokpi, Apr. 5: Manipur Police hodinga lolhinna lentah khatna, aluchunga Dangka Lakh 1 kikoi gamvah lamkai khat le anoidou mi 2 tujingkah matah’a operation kibolna khatna matdoh in anaum un ahi.

“Hiche mi thum hohi Senapati le Kangpokpi Police kigom’a tujing nidan 1:30 am vel’a operation abolnauva Hotel Serena, Senapati DHQs mun’a kimandoh ahiuve”, tin DGP LM. Khaute in Manipur Police Headquarters a Press Meet kibolna’a aphongdoh in ahi.

Aman aseibena’a, thuguh kimu dungjuija hiche hotel operation kibolna’a hi United Kuki Liberation Army (UKLA) lamkai thum hohi kimandoh ahi ati.

Akiman UKLA lamkai ho chu, Thangkhosei Guite alias James, President UKLA ahin amahi Kangpokpi District noija um Bunglung kho mi ahin chule amatoh kimat tha anoidou teni lah’a khat hi Saikul Gamkai a um Puleijang kho mi Seigoulen Doungel alias Gogou ahin khat hi Kangpokpi gamkai Keithelmanbi Ward No.6 a um Lenkhomang Kipgen alias Mamang ahi tin DGP pan aseibei.

Hiche operation hi Kangpokpi Police Station a Superintendent of Police, Heisnam Balaram in alamkai ahi ati.

DGP Khaute in aseibena’a, akiman gamvah thum hohi Keystone Infrastructure Private Ltd. a natong ho puimang (kidnapped) a pang’u ahin chule sum le pai don na a jong apangun,  Thinglhang a pansa (hill-based) gamvah phabep toh jong kikhutjopna aneiju ahi ati.

GS Haupu Zou MLA in kipathu phong: Gielchang in chenna Inn asuhset ho Langva hoppieh

B.Lalboi Gangte

CCpur. April 5 (ET):    Manipur Legislative Assembly (MLA) Constituency 60-Singngat AC (ST) ah MLA koima Term 2 kijom’a kai akhang um khah louna Constituency ahin Tuchung’a 11th Manipur Legislative Assembly Election 2017 ah Singngat AC khang’a kisei ding in Sitting MLA Ginsuanhau Zou akidoh toh kilhon’a term 2 ahin poh nading’a Tuni nilhah lang nidan 4:30 in achenna Lailam Veng ah thusoh lakhom akoukhom in ahi.

Hiche phatsung’a GS Haupu Zou Hon’ble MLA Singngat AC ahoulim na, tuchung’a 11th Manipur Election 2017 phatsung’a pathen toh pangkhom’a gamsung mipi ho lungset na chang’a koima 2vei MLA Election ah kaijom khalou Pathen leh Constituency mipi hon 2 vei gamsung’a natong ding’a eikai sah nao chung’a  gamsung mipi ho chung leh pathen heng’a kakipa nathu kaphongdoh e ati, Chuleh tunin kaki ngaiton Election phatsung’a  mitam tah in thudih lou ladih lou’a eidem vin election akachai tan ki demtoh kisei set toho hi milungneo ho ahin kichaisah phat eitan hijong leh tunichen’a kidem na chom chom awcheng umjing hohi phamo kasa in ahi, gamsung’a kidemna ho dalha’a malam’a Constituency sung khantou machal na di iti natoh ding ham tigel joh’a gamsung mipi ho kipana diho joh lhutding ahi,  Singngat Constituency mipi ho kipa nading’a agam mipin kingaicha japi lamlhah na, japi twineh leh iegam sung huhbit nadia pan kalhah theijing nadia pathen leh gamsung mipi toh kitho khom’a natong di kahi ati.

Chuleh Manipur state Govt. innpi kisem thah ahi toh kilhon’a gamsung’a mipi hotoh jong kimutona phat kaneipon mipi hochung’a ngaidam kathum in ahi ati, chuleh tuni’a kaseidoh kaphondoh ho hi gamsung mipi nang hotoh kimai to’a kaphondoh ah Constituency mipin neina sanpeh diu vin kahin tem’e ati.

Chuleh kum 5 sung kitoh bangkhai u jomanlou’a Election in eilunkhum va tu’a toh bangkhai ho tongjom kit di’a Constituency mipin neisotdoh kit uhi pathen kathang vah in ahi, chuleh toh bangkhai Sangaikot Chura-Sugnu Road  jong toh theiding in aum tan, hiche lampi hi SIDF noiya kitong ding, 31 March 2017 nikhon New Delhi mun’a 5:00 pm in Section Order ladoh ahi tai, hiche natoh  kijotheng tokah’a gamsung mipi hon natoh subui thei ding venbitna pe’a natong ho kithopi naleh tosot na iepeh diu ahi ati, chuleh Manipur Govt. hi BJP in kivaipoh nalamkai hijong leh Manipur khantou nadia kipangkhom di ahi ati.

Chuleh Tuchung Election phatsung’a Churachandpur district sung’a mipi dei nabang’a election achelhah nachungchon’a mihim koima athi amang aki umlou hi khantou kibelap khat ahin mipi hochung’a kipa thu kaphong e ati.

Chuleh keiman kana chepi jing Election phatsung’a Vote eipeh eipi lou koima khanchom neilou’a kibang’a kami kasa ahi ti’a kaki koi ahin koima khantum kanei poi ati.

Chuleh  1 April 2017  jan ah Hupi nung leh Gil khi in Singngat Constituency sung’a chenna inn tamtah ana suse in ahi, hiche ahin Muallum ah inn 20, Haijang inn 11, MT Geltam inn 8, Mollen inn 7 Gilchang khi in innchung langva ho asep si in ahi,  hiche Inn kise hon kin lebung’a akikhu phat nadiu vin Singngat SDO Jamson Hangsing lamkai nan keima worker ho khotin’a inn sehon akikhu diu langva pehdoh na tunin anei vin ahi ati.

State forces ho highway vengtup ding in akitollut ta’uve: DGP

Imphal, Apr 4:  Imphal-Dimapur lamlen Mao le Taphou kikah’a ginmo umna mun gup ‘a boina asolouna ding in  state forces ho akitollut tai tin DGP LM Khaute in aseiye. Hetthei khat chu Imphal-Mao highway a chele vahle ho le thilpo gari ho’n boina atojing’u suhbeina ding’a State Government in IRB le MR Personnel ho tollut ding’a thulhuhna aneisa ahi.

Security forces ho kitollut tolhon’a  lamlen a vahle hon boina atolouna ding’uva extra security personnel jong kitollut be ding chuleh security forces hon lamlen ngatupna ding’a amanchah ding’u gari le manchah dang dang ho kipehbe ding’u ahi tin DGP LM Khaute in aseiye. Taphou a pat Sekmai kikah lamlen venbitna ding’a mopohna hi Kangpokpi Police  kipe ahi tin jong aseiye.

Hetthei khat chu tumasang jep’a chu CM N Biren in thuso miho to akihoulimna khat’a Central government in highway vengtup ding IRB battalion li lahbe ding’a phalna apeh ahitai tin ana seiyin ahi.

Alangkhat’a, State Home Department a kon highway a foreigner check-post a tou sepai ho kiging jing’a aumna ding’uvin thupeh aum in ahi. State Home Department in hitobang thupeh aneihi thuguh pole ho’a kon gampam miho dandihlouva ahunglut kigo’uve ti’a thuguh ajeh jeh ahi.  Home Department thupeh dungjuiya Foreigner check post jouse’a  tou CID personnel ho  Civil police in akithopi ding’u chuleh  district SP jousen jong ama ama mopohna lhangsung a dandihlouva hunglut foreigner ho matdohna ding’a drive khoutah’a ahinbol ding’u ahi.

Saikul gamkai a tehse sumsan hopdohna nikho kisusao

Imphal, Apr.5:  Saikul Gakai CSO hon ngehna anei dungjui’uvin tuni chun Social Welfare  Officer Saitu Gamphazol le Minister le Chairman National Social Assistance Programe, Kangpokpi district in kihoulimna anei’uvin Saikul Gamkai sung’a Old age pension  hopdohna nikho suhsaobe ding in thulhuhna anei’uvin ahi. SWO, Saitu Gamphazol N.Usharani Devi in thuso miho heng’a aseidan in Saikul a tehsa kum tamho IGNOAPS   hoppehna tohgon hi Concerned Minisrter le Deputy Commissioner, Kangpokpi heng’a hetsahna akineiyin amani in jong  tehse ho gelkhohna jal leh CSO hon kineosahtah’a taona ahin neiyu gelkhohna jal in tehse sumsan hopdohna ding nikho hi April nisim 17 le 18 changei voh chon ding anopna lhon ahin phongdohlhon’e ati. Chuleh tehse sumsan kituptah’a hop doh ahitheina dingle polam’a kon asuboi umlouna ding’a Saikul CSO hon jong pan alah ding’uvin Social Welfare Officer in temna aneiyin ahi.

TI-GHQ thuso TSA-GHQ President in nielkal

Imphal, Apr. 5:  Thadou Students’ Association GHQ in President thah lhenna neiding tia Date 5th April, 2017 Eimi Times front page a Lalkholien Singson Speaker Thadou Inpi-GHQ minna anakiso chu bul le bal neilou lamkai deicha khat le ni natoh chule TSA sung’a kivaipohna suhkeh na dinga  na kitong ahidan mipi hetding  in TSA-GHQ President Lamminlun Singsit in suhthengna ahin neiyin ahi.

Chule achesa  11th – 12th January, 2017 sunga chu TSA-GHQ General Assembly leh President Election H. Kotlenphai munna Thadou Inpi-GHQ Election Commission ho makaina noiya election kibolla TSA-GHQ President dinga Pu Lamminlun Singsit lhendoh a ana um ahin chule  Thadou Inpi-GHQ Election Commissioner komma kitepna alah jouva Pakai thaonu Pastor khat in thensona aneija Cabinet expansion ding jong power akipeh to lhon’a Cabinet jong thalhingset kisem chaija lhani tobang natoh kipat nunga khat le nin Thadou kiloikhomna sung suhsetna dinga hitobang lunggel dihlou tah a thuso hung kibol hi kiloikhomna TSA-GHQ lamkai cheng in hetpehna akineilou toh lhon in elected president khat hinan demna sangtah kahin neije tin President Thadou Students’ Association- GHQ  Lamminlun Singsit akon kimu lekhathot chun aseiyin ahi.

Sorkar in bandh suhbeina ding tohguon nei

Imphal, Apr. 5: Manipur gamsung a bandh le general strike aniseh tobang a aum jing gamsung khantoulouna jeh pipen khat ahitolhon’a , hitobang thilisoh ho avel’a asokitlouna ding in Manipur government in tohguon jat chom chom aneiye tin Superintendent of Police /CID (SB) Manipur, Imphal Khoisnam Sharma a kon kimu thulhut in aseiye. Government of Manipur in Editors’ Guild, Manipur toh kihoutohna aneiya bandh le general strike thu ho asolouna ding’uva dan thah khat asemdoh ding ahi.  Chuleh Media house hon jong registered kibollou kiloikhom ho’n bandh le strike akouna thu ho asotahlou ding’uvin Khoisnam Sharma in temna aneiye.  Airport lamlen, RIMS  juotna lamlen chuleh Uripok lamlen hi kinkhohtah neiya vahle ho le damlou jeh’a hospital juon hon aniseh’a ajuot’u lamlen ahijeh’a avel’a um kho le veng local club ho’n hiche lamlen ho’a bandh le strike abollou na ding’uva  state police in khoutah’a avetkol ding ahi. Bandh toson ho bandh bolding’a ahung kipatdoh teng’u le agangtheipen’a suhthipna ding’a Police in jingkahlam nidan 8 a pat nilhahlam nidan 11 gei khoutah’a duty abol ding ahi.  Bandh bol kiloikhom ho hin bandh palkeh ho gari No. le bandh laiya dukan hong ho lim akapdohji’uva khonung le phu alahji’u ahi’n, hitobang thilho aumlouna ding’a Police in khoutah a avetkol ding ahi.  Kiloikhom phabep in social media mangcha’a bandh akouji’u suhbeina ding’a cyber security measure suhhat ding chuleh hitobang message hintahlang ho matdoh theina ding’a Police in pan hatah’a alah ding ahi.  Bandh bol kiloikhom ho hin bandh sung a thilkeu kisuse ho jouse chung’a mo akipoh ding’u ahi tin thulhut chun aseiye.

Class XII Physics exam kipat masang’a ‘question’ social media’a um ahitai, tia DESAM in ngohna nei

Imphal, April 5: Democratic Students’ Alliance of Manipur (DESAM) in Wednesday nikho’a kibol Class XII exam’a Council of Higher Secondary Education Manipur in adihlou abol’e, tin ngohna anei uvin ahi.

General Secretary, DESAM, N Adison in thuso miho akimupi na’a chun, DESAM volunteer holeh All Liangmei Naga Students’ Union, Assam Manipur and Nagaland in Hill district’a school 7 inspection abol ahi, tin aseiye. TS Paul Women College leh Kakching Higher Secondary School jong inspection kibol ahi’in, TS Paul Women College ‘a HRD simlai hon final exam apeh-u ahi’in, thudoh 1’a kon 20 channa hi pam’a kon’a kitoh chet’a donbutna (answer) kipe’a (supply) ahi, tin ngohna aneiyui.

Kakching Higher Secondary School’a Padma Ratna English School leh paul Star College, Wabagai simlai hon exam apeh-u ahi’in, hiche mun’a jong hitima chun aum kit in ahi. Exam hi jingkah nidan 10 ‘a kon nidan 1 sung ahi’in, ahin, tuni’a Physics question paper hi social networking site’a jingkah nidan 9 don’a upload kibol ahitai. Hiche hin exam kipat masang’a simlai hon question amu uve, ti avetsah ahi, tin DESAM general secretary in aseibe in ahi.

Question paper ‘leak’ ahi hi Council of Higher Secondary School themmo chan ding ahi, tin Adison in aseibe in ahi. Hiche thu’a Council of Higher Secondary School heng’a hehna kisem ahitan, Council in athu suhthengna anei diuvin ngehna aneiyui. Exam’a akigu ahilouleh dan dihlouva thil kibol aumlou nading’a flying squad sem ding’a jong council in anasei ahi’in, examination centre pam’a exam bol ho kithopi’a mi tamtah DESAM in amudoh hi lungdon umtah ahi, ati.

ANTA in Anal khat kitha douna’a kiphinna bol; CM heng’a memorandum pelut

Imphal, April 5: Anal Naga Tangpi (ANTA) kiti Anal kiloikhomna in Wednesday nikhon DC Lamkhai, Chandel’a ST Kowa kivoh leh kitha thu douna in toumun kiphinna abol uvin, Anal simlai khat kitha na’a themmona neiho gotna kilom tah’a apeh diuvin thumna anei uvin ahi.

Anal kiloikhomna’a president, Kohring Victor in hiche thu toh kisaiyin Chief Minister heng’a Deputy Commissioner mangcha in tunin memorandum akipelut tai, tin aseiyin ahi. Nidan 48 sung’a dan dungjuiya themmona neiho gotna apeh diu, vangsetna toh pa insung mite compensation apeh diu, insung mikhat natoh apeh diu chule inquiry committee asemdoh uva, post-mortem recod avel’a kholna anei phat diuva thumna aneiyu ahi.

Chief Minister heng’a kipelut memorandum dungjuiya, athi ST Konwar, s/o (L) ST Kongam Anal hi Tera Lourakpam Leikai, Imphal West’a Takhellambam Jellel Singh kiti mikhat toh umkhom’a, Diana Computer Center, Sagolband, NC Road ‘a kum masa’a kon compute course asim ahi. Tukum March nisim 19 jan nidan 8 don’a mel hetlou hon Salam Mani Singh inn’a inn bahar’a aumna mun’a ana bulu-u ahi. Shija Hospital’a kipolut ahi’in, March nisim 21 nikho’a akitohkhah na ho jeh’a thi ahitai, ati.

Chandel district’a Circle MLA leh IFCD Minister Letpao Haokip’a kon Anal kiloikhomna in hiche thu hi sorkar hetsahna anei ahi’in, ahin, sorkar in pan alah lou ahi, tin Kohring in aseibe in ahi. Nidan 48 sung’a thumna san peh ahi louleh kiloikhomna in kiphinna chom chom abol ding ahi, tin gihna aneibe’e.

Hui le guo hat tah kithojeh’a Guwahati sung a mi 4 in thina toh

Guwahati, Apr. 4: Assam sung’a achesa nikho phabep hui le guo hatah akitho jeh in Inn Jakhat val ase in thilkeu lakh manval jong amangthaiyin chuleh mi li  in thina atuoh’e tin official thulhut khat in aseiye. Thulhut in aseidan in Cachar district sung a twilet jeh in mi ni in thina atuoh in chuleh Cachar sung mama le Dima Hasao district sung’a mikhat cheh akiholmo’e ati.

Gamsung a hui le guo in tunigeiya Inn asuhset jat 600 ahungval tan hitolhon chun State disaster response authority in twilen in asuhkhah district ho deputy commissioner ho toh video-conference mangcha in kihoulimna aneiyin ahi. Twilet  hin district phabep tongkha jongle aha tohkhah deh chu Dima Hasao hills district ahi. Dima Hasao hills district  sung’a guo hatah’a ajuh jeh hin mun phabep a mun-achim in hiche jeh hin lamlen phabep a gari alhaile thei tapo’n ahi.  Tanglouhel’a guo ajuh jing jeh hin district administration in themjilnamun jouse jong suty akilhadiuvin thupeh aneiyin ahi.

Dalai Lama’s in Arunachal Pradesh vil na nei

Itanagar, Apr. 5: Dalai Lama’s  in India gamsung Arunachal Pradesh’a ahung kholjin  tohlhon’a China gam lamkai ho in alutsah lou ding in asei in ahi. Ahin India in janhi chun India gamsung thu’a koima ahung kikum lut da hen tin aseiye.

China in Dalai Lama  chaloh hi tuni chan gei jin ave lhijing in ahi chena ban’a tu tu’a Arunachal Pradesh ahung vai lhun  jong hi nasatah in ajah da in ahi,ejam ti’a India in Dalai Lama’s khol jing ding hi phal na apeh leh ” bilateral” relation jong  boi thei ding ahi tin Chinese Foreign Ministry in aseiye.

India government in asei nah’a  chun, Dalai Lama hi Pathen thulam’a  lamkai ahi’n India mipi ten jana sang tah jong kipe ahi ati. External affairs ministry in thuso miho kom’a  asei dan in Dalai Lama India gamsung’a ahung kholgin na chung chang nga hi koiman “artificial controversy” abol lou ding uvin temna anei in ahi.

Tu naicha  jong chun  Minister of State for Home Kiran Rijiju in China luboh ho kom mah India gamsung thu’a koimsa ahung kikum lou ding injong hetsah na anei in chu naban’a  New – Delhi in “One- China” policy jong hi jana akipe in ahi.Dalai Lama in Arunachal Pradesh ahung vil hi Politic lang toh akimah na ema aumpoi tinjong aseiye.Arunachal Pradesh hi India gamsung ahinaban’a kikhen theilou ahilou toh lhon’a  China injong Dalai Lama hung kholjin hi anop peh ding in temna aneiye.

Nagaland gam’a hui leh guo in inn tamtah suse

Kohima, Apr. 5: India gamsung mun chom chom mah guo ju hih jong leh  North East India lang go aha juh jeh in mipi ten hahsat na tamtah atoh tan ahi. Jan nilhah in Nagaland nah guo, hui chule giel kitho jeh in inn tamtah asuse in ahi.

Thuso kimu dung jui in Nagaland district sung jouse ah guo hatah’a ajuh jing jeh in mipiten hahsat na seijou lou ato utoh kilhon in inn leh lou jong tamtah asuse tai akiti’e.

Assam gam mi numei chapang khat Kolkata’a ana kisuse jing

Guwahati, Apr. 5: Thulhut kimu dung jui jing Guwahati’a cheng simlai numei chapang khat Kolkat-based businessman Rakesh Chowdhury  in city guest house  Kolkata’a asuhset  jing dan thu asei in ahi. Hiche numei chapang nu hi ninkum chun cosmetology sim ding’a Kolkata gam’a ana kalsong doh ahin south Kolkata’a flat khat’a um ahidan jong aseiye.Simlai chapang nu seidan in kaloi ho in Salt Lake a cheng Rakesh Chowdhury  gi nei sa khat toh eikihet to sah un ahi.Hiche toh kilhon in ninkum June lha chun Rakesh Chowdhury toh city restaurant nah kakisu to kha lhon in kham na thei eidon sah in khohelou va kaum phat in  City guest house ah eipui in eisuhset naban in phone nah jong akap doh in ahi.Hiti chun June lha’a pat in phat set leh eisuse jing in kada ji leh nanop lou leh video hi kalha thang ding ahi tin gih na einei jing in ahi,hitia eibol jing phat in nao jong ni vei kana vop in ani ni in eina suh (abortion) lhah sah in ahi.

Hiche tohkilhon chun numei chapang nu chun athoh lel beh set phat”a  Lake Police Station Tuesday nichum hiche teni nupa chu complaint  aga bol tan ahi.Senior police official hon thuso miho kom mah asei nah a chun complaint ahung toh kilhon in FIR register akibol tai tin aseiye.

Meghalaya state a lha 3 sung’a rape case 33 kijihlut

Shillong, Apr. 5: Meghalaya state hi anini in setna langah akhangtou jing’in adeh’in numei chung’a khansetna hi akibe jing’in ahi. Alangkhat a Meghalaya hi numei letna/thanatna gamjong ahikit in ahi. Lhathum tichu January a kipat March 2017 sung’in jong numei kisuhsetna case 33 jen police station alhung’in adang jong umtei nalai ding ginchat aume’in police source khat chun aseiye. March lhasung seh seh chun numei chang’a khansetna case 6 police station alhung’in East Jaintia Hills a kon’a 3, North Garo Hills, RB leh EKH a kipat in case khatchieh ahiuvin, attempt to rape case 5 alhung’in hiche hochu RB a kon’a 2, EKH, SWGH leh WKH a kon’in khatchieh alhung’in ahi.

Numei chung’a khansetna case 11 lah’in 8 hi numei chapang kum lhingloulai leh lungthim bulhing loukhat jong apang’in ahi.

Ningkum January a kipat March lhasung chun hitobang case 44 ana kijihlut in ahi. Chule March lhasung seh chun rape case 16 alhing’e.

Assam a munchim jeh a mi 2 thi, keh in mi 3 seplih

Guwahati, Apr. 5: Tuni (Apr. 5) chun Guwahati ah landslide jeh in natong 2 in thina anatoh lhon in ahi. Chule adang mi 3 jong keh in aseplih uvin ahi. Hiche thilsoh hi Bonda area ahin, private school a natong ahilhon’e. Hapta khat lang tanglouva guo ajuh jeh chun leiset ahung chim in hiche’a chu vangsetna atolhon ahi tin police hon aseiyuve.

Leiset in khehkhum natong teni chu Saifuddin leh Rahimuddin ahilhon in Alamganj, Dubri district, Assam a kon ahilhon in police holeh rescue worker hon alongdamsa lhon chu ana ladoh uvin ahi.

Hiche keu hilouvin state sung munchom chom ah numei khat panna’n keh in mi 3 anaseplih kit in ahi. Athiho seh hilouvin mi tamtah jong akitongkha uve.

Thina toh hochu Hailakandi, Bongaigaon leh Karimganj distrct a kipat ahiuve akiti. Chule akitongkha holah’a anasa dehset teni chu Hailakandi leh Bongaigaon district a kon ahilhon’e.

27th Hmar Martyrs’ Day nit a um

Lien S. Gangte

Ccpur, Apr. 5: Hmar Martyrs’ Day avei 27 nitna kingon  leh avei 14 channa State Level Hmar Martyrs’ Trophy Opening Ceremony 5th April, 2017 nilhah nidan 1:30 apat chun Saikawt Playground mun’ah aum in ahi.

Hiche kingon ahin, Chief Guest in Thangjang Haokip, President, Kuki Inpi Ccpur apang in, Guest of Honour in B. Dongzalian, Chairman, Zomi Council apang in chuleh, Functional President in Joseph Lalrothang, President, Hmar Inpui Gen. Hq. apang in ahi. Chief Guest a pang Thangjang Haokip, President, Kuki Inpi Ccpur in Hmar Martyrs Day akinit toh kilhon in Hmar nam sung’a galhang ana molliemsa ho ajana thu aphong in chuleh, 14th State Level Hmar Martyrs’ Trophy in thinglhang mi ho kikah a kingailut na leh kipum khat na hoijo le phajo ahin lhut ding akinep na thu aphong in ahi. 14th State Level Hmar Martyrs’ Trophy Opening Match a kichem Neihsial Veng Youth Club (NVYC) in 2-1 in Zawlbuk FC ho ajou uvin ahi.

Thusoh Lahchom

Transfer and Posting

Governor of Manipur  in tuni(April. 5) thupon anei dung jui in C. Arthur Worchuiyo (DC Imphal West) chu DC Senapati hiding, Khrisna Kumar (SDO Ukhrul) chu DC Chandel hiding, Anand Prakash,IPS (On return from Central Deputation) chu ADGP (L & O) ADGP (Prison), Dr. Promod Asthana,IPS (On return from Central deputation) chu ADGP (AP/Trg) hiding,  P.Doungel IPS (ADGP (Prisons/Intelligence)) chu ADGP (Intelligence) hiding, Christopher Doungel,IPS (ADGP (AP/Trg) and ADGP(HG) in addition) chu ADGP (HG) hiding  chuleh R.K. Meme Devi,DIG/CID(CB) chu DIG/CID (CB) and Director of Fire Services in addition hi diu ahitai.

VDF

 Governor of Manipur in Village Defence Force (VDF) lha lo Dk. 1000/- a akal sah  toh kilhon’a VDF hon 03-01-2017 apat na lha lo Dk. 6000/-  amu diu ahitai tin M. Yaiskul Meitei Special Secretary (Home) in aseiye.

Operation

Imphal West Police Commando hon Additional SP Imphal Wes (Ops) D S Ibomcha lamkaina in Wednesday jingkah nidan 5.30 don in Tera Lourakpam Leikai ‘a combin operation abol uvin, ahin, akiman koima aumpoi. Janhi nikho’a jong Imphal West Police hon National Games Village ’a operation abol-u ahi. Game Village Zone 3 quarter no. 34 ‘a tu-leh-tu’a cheng Khoupum kho-mi Johnson Kamei kiti ZUF thingnoimi khat aman uvin, Lamphel Police station’a apelut tauvin ahi.

Whatsapp

Tuni (Apr. 5) chun Supreme Court in whatsapp privacy case kholchilna ding’in judge 5 panna special bench khat semding’in thupeh aneitan ahi. Hiche chungchang’a hearing chu April nisim 18, 2017 nikho leh umding ahi. January lhabul langchun apex court in whatsapp data privacy chungchang’in whatsapp leh central government hengah notice khat jong anapetai. Hetthei khatchu Supreme Court a petition file anakibolna khat ah facebook leh whatsapp ah data jouse protect akibol jing’e akiti.

Competition

Tamei Battalion in Apou Kading High School, Tamei’a ‘painting competition’ abol uvin, kitetna’a simlai numei 110 in pan ala uvin ahi. ‘My Manipur: Pride of India’ chule ‘Women: The Nurturers of Nature’ ti thupi’a kitetna um ahi. Chapang kum 10 leh 16 kikah hon pan ala uvin, nidan ni sung’a lim asem diu ahi. Painting competition result hi April nisim 7 leh kiphong ding chule Tamei kho’a kibol Volleyball Tournament result jong kiphong ding ahi.

Gul chuh

5 JAK RIF Medical team hon April nisim 4, 2017 nichun Th Thompok (62) chu gul in achuh na akon ana huhdoh uvin ahi. Th Thompok hi Leimasang Waroijing Mamang Leikai, Bishnupur District akon ahin Gul in achuh jouva 5 JAK RIF Unit Hospital ana kilhut a medical team hon first aid ana bol uva ana huhdoh u ahi.

Editorial

 

IRB Battalion 4 kiladi, VDF ho kiphingo

                              Lhalo kal lou jeh-a VDF hon April 6 apat kiphinna patkitdi atiu hi tumasang’a jong kiphinna ananeijing u tina ahi. Election dikon tah-a jong VDF hon hiche thua kiphinna jeh-a Election Duty bollou dia gihna ananei uva State govt nin ipi hileh Election kichai tengleh olgeljep uhite tia jollhahna khat ana umjeh-a VDF honjong Election Duty anabol u ahi. Hichu govt masa – Congress govt toh kihouna anahivang’a tua govt thah,- BJP lamkaina govt injong boldidol khat ahijeh-a ahinauhbulhit ahi. VDF ho kiphinna hi lhalo/tolop tua Rs 5000/- (‘Ration Money’ jaova) akon Rs 8,000/- hihen ti ahin tua hi agom’a Rs. 7,000/- dia hung kibol ahitai. VDF hohi Service Book kisempehlou, chomkhat nikhotha adi tobang’a kiguoi tobang ahiuvin anakinepnau chu Police Constable a hung kilalut diu tia anakiseijap thu jong um ahi. Police Constable adi chu Class 10 beh pass hidi, atahsa jong lhingjepdi ngai ahi. Tua VDF hohi atamjo Class 10 pass hiloudiu, IRB a Rifleman dileh Police Constable dia lhingjouloudi jong tamdi ahi. Chuleh pontho tah a sun le jan’a muntin’a Police Constable leh IRB Rifleman ho bolbol (natoh) boljong tam kit u ahi. Hitobang naa katoh tohsang’a tia ama macham’a hai (dalha) jong umsausau kit ahi. Hijeh a chu State govt injong tua Highway Protection Force dia IRB Battalion 4 lang lahbedi atina’a hin VDF holah-a atahsa leh adamtheina in ato ho sese jong kilalut jeng henlang, adangse chu VDF a chuti um uhenlang alhalo ujong themkhat beh kikalsah leh phadi ahi. Chuleh IRB Battalion ijat kilahbe jongleh lhingtheilou hel’a aumdoh hi State govt injong aipi jeh ham ti avet jep ngaidi ahi. Manipur hi thingnoi tamna gam ahi kiti manna kaboltheiye tidom jouse leh Chief Minister/Minister hoto kinaijep jouse VIP dan’a Escort akipeh jinglaise’a IRB ijat kilahbe jongleh Highway Protection Force di mi alhing’a hung umdeh dehloudi ahi. Tujeng’a jong MLA Election’a IRB Escort anakipe Candidate holah a akailou ho geiyin CM/Minister hoto akihouthei manna Escort ho lhadoh loulai umsau-sauvin akiseiye.

                            Manipur a phaicham miho dehdeh hi “gopthi” (show off) bolnom tam, Police/IRB Escort sepai pum’a chele vale hi kihi theisahna tah-a gel tam ahi.  VIP (CM, MLA, Minister, Govt Officer, engineer, Contractor len ho, adang dang) duty a um IRB/Manipur Rifles agom gom’a hi Battalion 2 (mi sangni) lang beh hidi ahi. Hiche hose lah-a Battalion khat hi Highway venbitna din kikoi jongleh Km ijat hamkhat atoupha jou diu ahi. Chuleh lamlen lhungkeiyin sepai/IRB kigollha jongleh Duty phatah a abollou uleh thingnoi thalchoi hoa kon gari lhaile ho chung’a sumdon leh mi suhgentheina beideh loudi ahi. Highway (lamlen) vengbit dia kikoi ho tah-tah in thilpo gari ho kom’a sum ahin hadon diuham, kin le dong’a chele vahle ho gari suhkham toukham athouva ahinsuhgenthei joh diuham tijong umnalai ahi. Ipi hileh IRB Battalion 4 akilahbe leh govt service mu/nei hung tambedi tina ahijeh in phachom thou thoudi, lamlen adondon’a aumphot ujongleh kahlah a thalcjoi sumdong ho ichan ham’a thipdi ahi.

Blankfire

Mi tahsanna kiti changtheilou ho chu ipi bol uhenlang tahsan theitah in hung umjongleu atot them ho  thipbeh a aum ujongleh mi anuijat jeng banga koima tahsan changdeh loudiu, akisuhmona diu lampi umthou thoudi ahi.