ET April 5, 2017 News (Local, Regional, Thusoh Lahchom, Editorial, Blankfire)

ET April 5, 2017 News (Local, Regional, Thusoh Lahchom, Editorial, Blankfire)

380
0
SHARE

Manipur thinglhang gam khantouna ding’a centre in Dk.150 cr sanction bol

 

Imphal,  Apr. 4: Central Government in Manipur thinglhang gamho’a kailhang semdohna ding in Dk.150  crore sanction aboltai tin Chief Minister N Biren  Singh in Monday ni jaan chu aphongdoh in ahi. Hetthei khat chu Manipur a kailhang’a tou hi atamjo numei ahi’n, Imphal khopi sung’a um Ima Market jong hi leiset chung’a  kailhang minthangloi khat ahi.

“Government hin development natoh lampang’a hi thinglhang gamho  hatah’a khohsahna anei ahi.  Manipur gamsung a mi umjat lah’a 80% vel hi thinglhang gam’a cheng ahi’uve. Hitobang dinmun ahijeh’a hi thinglhang gam akhantoulou’va ahileh Manipur  khangtou theilou ding ahi.  Manipur a jat le nam kah’a kitomuona, kimitthipna le kibungkhen na ho hi khat le khat kitahsan tuona alhomjeh ahi” tin Chief Minister in aseiye.

Alangkhat’a Tangkhul Naga Long President Weapon Zimik in aseidan in Chief Minister in April nisim 11 nikho le Ukhrul ahungvil ding ahi’n, hiche nikho le  hin Naga te jouse’n kikap le thanom’a CM aliem ding’u ahi ati.

Geldoh thei khat chu Chief Minister lui O Ibobi Singh in CM atuhlaiya Ukhrul avil nikho’a chu khopi sung a total shutdown ana kibol’a security personnel hon helicopter’a kon apotdoh sahlou’u ahi. Chuleh tribal kiloikhom hon O Ibobi Singh hi  communal lungput nei ahilou le thinglhangmite doudal ahi ti’a ana seijing’u ahi.

NH pang’a Jujoh kham ding kiseilou; Highway Protection force joh kisemdoh ding

 

Imphal, Apr. 4:  Supreme Court in thupeh aneidungjuiyin State government phabep in Highway  jet le vei a kon metre 500 sung dry area ding in phondohna aneiyin , ahinlah Manipur sung a hin danle muol chombeh khat sorkar in ahinsemdoh in ahi.  CM Biren Singh in April nisim 2 nikho’a aseidan in Centre  hin Highway a chele vahle ho venbitna pe ding India Reserve Battalion (Highway Protection Force)  li semdoh phatsahna aneitai ati.

Imphal-Dimapur lamlen a gari lhaile ho venbitna peh ahitheina ding’a hi Home Minister Rajnath Singh  palai hina’a Nagaland CM toh agreement khat soi kaki ding ahi tin jong CM Biren Singh in aseiye.

National Highway 2 hi Imphal a pat Dimapur geiya kilhunglut ahi. Masang’a chu NH-30 ti’a ana kihe ahi’n, Centre in 2011 kum’a chu NH-2 ti’a amin ahinkhel ahi. NH-2  a  hi gari lhai nikho sang’a gari lhailou nikho tamjo tithei ahi. Ajeh chu sorkar heng’a ngehna neiho le kiphinna jat chom chom neiho’n sorkar a kon adei angaiyu ho muna ding’a manchah phatah’a aneiyu chu NH-2 hi ahi. Tuchung BJP sorkar hin NH-2 a boina ho suhbeina ding tohguon kichehtah aneiye tihi kichehtah’a mudoh thei ahi.

TSA GHQ in avella President lhenna neiding

 

Imphal, Apr. 4 : Achesa  18th Feb. 2017 nikho’a Thadou Students’ Association GHQ cabinet mi 4 in TSA GHQ President thah chung’a “No Confidence motion” abol utoh lhon’a ahung lhung ding  April nisim 8 (Saturday) jingkah lam nidan 11:30  leh Youth Hostel, Khuman Lampak, Imphal mun’a avel la President thah lhen na um ding ahi tin TSA GHQ, Presiding Officer, Lalkholien Singson a kon kimu thulhut in asei’e.

Thulhut in asei dan in President thah lhen na ding toh gon hi TSA Constitution Article No.27 & 26 (viii) toh kitoh’a kibol ding ahi.Nomination bol nom hon New- Lambulane, Imphal a um Sahei Computer  chuleh Presidng Officer Lalkholien  Singson kom’aa form akilah thei ding u ahi. Form kilah hon April nisim 5 to 7 nilhah lam pung 6.00 kah’a TSA office’a ahin thah lut ding u vin thulhut chun asei’e.April 8,2017 jingkah lam nidan 11.00 apat 11.30 sung’a Scrutiny kibol ding ahi tin thulhut chun asei bei.

Myanmar leh India gamgi jui’a cheng kho ho’a Indian Army hon Solar Lamp 1200 hom doh u

 

B.Lalboi Gangte

CCpur. April 4 (ET):    Churachandpur district, Singngat Sub-division sung’a International Bolder Myanmar leh India gamgi jui’a cheng Kho ho’a India Army, Red Shield Division noiya um Khuga Battalion hon athou pha nao Thinglhang kho gam sung’a mipi in niseh’a amamo hou panpi nathei chan’a kipan piding ahi ti’a ana seijing utoh kilhon’a Kolphe meivah lut louna kho’a innsuon ah Solar lamp ahop peh uvin ahi.

”Chuleh  Indian Army Khuga Battalion Singngat kho’a pansa hon  hapta khat sung in  India leh Myanmar gamgi jui’a cheng Singngat Sub-division hopsung’a um Kolphe meivah lutlou na kho  Zoukhonou  Village, Theikhotang Village, Hiangtam khonou Village, Henjang Village, C.Lanchah village leh Buongmun kho ho’a Solar Lamp 1200 hopdoh na anei vin ahi.

“Chuleh Kolphe meivah mulou kho haosa hon Khuga battalion  leh 27 Sector Assam Rifles chung’a atoupha nao gam ho’a mipi ngaichat ho kithopi na chanvou apeh nao chung’a akipa nao aphong doh vin ahi, Chuleh gamkai mipi ho hahsat genthei naho eihetpeh naochung chon’a panpi na ho aum kham kham’a chanvou eipeh nachungchon’a tuchung’a ama ho toupha nao gamkai sung’a kho umho adia phatchom khat lhamong’a meivah mu nathei apeh kit uhi gamsung mite kalung u alhei vin ahi ati, Chuleh Khuga Battlion hohin phatma sa ho injong mihim hinkho tamtah ana huh doh nao ban’a Gul chuh ho jong mitam tah ana sudam vin, Lou le-Ai ho gamsung’a mipi ho dam mo veiset nikhon mipi ho ngaichat bang in ana pejing vin ahi ati.

Chuleh India leh Myanmar gamgi jui’a Cheng Kho 6 hon tuhin Solar Lamp chanvou amuphat vin, Jantin leh Twi khei, Bible sim na, An hun naleh jantou na in amangcha tao vin ahi, hiche Solar Lamp chanvou amu masang vin Candle kiti ho jong delou’a Thinglhang mite Meivah Butun Kerosene kide ho kidet’a hinkho ana man u ahin Bolder jui’a tou India Army jeh in kho tamtah in khanlit na in anei tao vin ahi.

Chuleh hiche India Army Khuga Battalion  hohin Churachandpur district ah khangdong ho ading in Career Counseling cell jong ahondoh nao chungchon’a khangthah hiche mun’a jao hon Govt. Service amu thei nading njong Consular access leh kichuh na ho jong abol peh kit vin ahi.

Ka chanu Hatchonghoi hi Singapore a johdoh dia kipuigo ahipoi: Khaizamang Touthang

 

Imphal, Apr.4: Lhamasa Lhakao nisim 28 nia Tulihar International Airport, Imphal mun’a Anti Human Trafficking Unit ho le CID hon Singapore jon’a che go Hatchonghoi ana henden uva tua Thangmeiband Punya Shelter Home a akoi nu’u chungchang’a tuni ahinga apan achanu chungchang thu thuso miho henga suhthengna ana neitan ahi.

Churachandpur District M. Lunmual kho’a kon Hatchonghoi Touthang hi achesa Lhakao nisim 28 nia chu Singapore jon’a chego ahin, hinlah Tulihar International Airport Imphal mun’a huilenkong sung akaldoh masanga Anti Human Trafficking Unit ho le CID hon ginmo’a ana henden uva Singjamei Police Station a ana thahlut jounung uva tua hi Thangmeiband Punya Shelter Home a akoiju ahi.

Anti Human Trafficking Unit ho le CID hohin chapang kum lhinglou anu apa hetlou ahiloule Singapore a natoh phapha le lo hoitah tah pedinga kilhemlha a kipuimanga mikom’a kijohdoh ahiloule suhgentheija kiumsah kitiho hiding ginmo’a Hatchonghoi hi ana henden’u ahi.

Athahdoh’a che apa Khaizamang Touthang le achanu khat jong ana henden un chule ticket thah’a che Kangpokpi a kon’a Tracy Kipgen jong chapang puimang le kijohdoh dan’in police in case asutkhum’in matna dingin areest warrant jong alhahsah un ahi.

Hiche ho jouse chungchang’a tunia Hatchonghoi apa Khaizamang Touthang in Kangpokpi DHQs mun’a press conference akouvin hilchenna ana neitan ahi.

Aman ahilchetna’a, phatsottah khokhatna kana chenkhompiu ka kinaipiu insungmi Thomi kiti nuhi Singapore a kum 5/6 vel natong ahitan, khatvei in ahungdoh chun insung genthei hahsatna ho jalla in akom’a kaloinu le kachanu Hatchonghoi toh kaga kholai lengun, ahithei dingle nanao Hatchonghoi jong Singapore chun neipui peh un lang nang panpina akonin natoh holpeh in lang sum le pai themkhat ahin lo theija insunga kaki ngoicho theina diuvin tin kaga tauvun ahi.

Amanjong ka inchen genthei hahsah nau chu avetjou loujeh in chutia nagel mong’u ahile hin sol tauvin ken ana vesui nange atin hichun keihon jong imacha helou kahijeh un ache nading le angaicha ho sutup din Thomi mama kanganse un, Hitichun imajouse ahin suhfel peh phatna Lhakao nisim 28 nia chu Singapore jondia kachanu hi Airport a kahung thah ahi ati.

“Kidney damlouna nei kahijeh in kum 20 val natong thei talouvin kaumtan, kaloinun jingkah a amu jingkah le kanechaijun, nilhah a amu nilhah le kanechaijun, kenla kakithopi theipon hijehchun kachanun jong avetle alainatpi valjeh chun Henu Hepa iba kilo ponte ka-u Thomi kom chun chengting sum le pai themkhat cha hijongle lona thei ahile kanu hin kithopi tange anati ahi”, tinjong Khaizamang in aseije.

Midang chunga kijoulhepna le nule pa hetlouva kipuidoh umkha jongle keiho chunga hin vang insungmi kakinop to sohkei uva kasol gotjoh’u ahin hikah lah hin koima themmona aumpoi ati.

Aman ahilchenbe na’a, Kangpokpi’a Lhingneo @ Tracy Kipgen to jong ana kihekha kahi pouvin, mu jong kana kimuto kha pouvin, Airport a ticket eihung thahpeh niuva kaki mutou chu amasapen ahijenge. Amahi Thomi toh Singapore natong khom anahi dan ahin hijeh achu Thomi hin kachanu flight ticket ding hi aloinu Tracy Kipgen ahin thot’a aman khohsahtah’a eihung thahpeh mai maiju ahibouvin tun keiho khohsah jallin jum le ja seh hitalouvin achunga case sangtah in jihkhum in aumlo tan police in amatding chan geijin jong akiseijin kakiphalam lhehjeng uve ati.

Thuchen helou le keiho chanchin genthei hahsahna helou hodin hitobang boina chunga hi oimo le thangtom eichan nauvinte, koima ka oimopoi ahin mihem in genthei behseh teng le kihinso nathei hiding ham itijouse hi bollou thei ana kihiji poi, hiche chungchon’a chanu Thomi in keiho le anaonu alhimlhah a katahsan nau banglouva natong ding jong ahiloujeh in kana lungmongun ahi ati.

Hinlah vangset leingem lholha akihitan, kajeh kajal uva jum le ja, tolou tomah tohkha chanu Lhingneo@Tracy Kipgen le Thomin mihem hin’a jalla Ngailut khosah jeh’a eikithopiu joh ahin amani eijol uva eilhim lhah nau imacha pon chule hiche ho jouse chungchon’a chanu Tracy Kipgen dehdeh hi mel’a jong aka kimukhah lou’u hetjong kana kihet khahlou u ahin, hiche hi mipi hetdinga kalungthim le katahsa limgeh cha kahin hilchen ahi tinjong Khaizamang Touthang in aseibei.

Tua Thangmeiband Punya Shelter Home a um achanu Hatchonghoi lhadoh’a aum’a a insungmi anu apa khutna pehdoh ahina din jong Khaizamang Touthang in amopo thunei vaihom ho kom’a ngehna aneijin chule mona neilou Tracy Kipgen chunga dihloutah’a ngohna kineiho lhap lhahpeh ahina dingjong ngehna aneijin ahi.

Parliamentary training’a Manipur legislator 20 pang ding

 

Imphal, April 4: 11th Manipur Legislative Assembly’a kilhengdoh legislator 21 ho Bureau of Parliamentary Studies and Training (BPST) in Lok Sabha Secretariat, New Delhi khopi’a April 5-7 sung’a umding ‘orientation programme’ a pangdiu ahi.

Manipur Legislative Assembly Speaker Yumnam Khemchand in thuso miho akimupi na’a chun Orientation Programme hi Parliament’a ‘constitutional role’ hetthem naleh pachat thei nading ahi, tin aseiyin, chule kivaipoh dan thep nading ahi, ati. Member thah hon ato hahsatna thu ho aseidiu, Legislator lolhing tah, Parliamentary custom, convention, etiquette, Legislator leh member ho phatchompi, financial committee, parliament thudohna, budgetary process leh adang dan thu jong seikhom na aneidiu ahi.

Sagolband Assembly constituency’a MLA RK Imo tilou legislator atamjo hi athah’a kaidoh tobang ngen hiu ahi’in, Speaker Yumnam Khemchand in alamkai diu ahi. Ache ding holah’a PHED Minister Losii Dikho, IFCD Minister Letpao Haokip, TD and Hills Minister N. Kayisii, Education Minister Th. Radheshyam,  Parliamtary secretary L. Suchindro leh adang dang chule Manipur Legislative Assembly Secretariat’a Joint Secretary, Under Secretary, transator leh adang dang jong pang diu ahi.

Governor in XPD 2470 Roadtrip 2017 hondohna nei

 

Imphal, April 4: Manipur Governor Dr Najma Heptullah in Tuesday nikhon Expedition (XPD) 2470 Roadtrip Sangai Conference Hall, Hotel Imphal, North AOC’a hondohna aneiyin, ni 70 sung’a gam (country) 24 chule lamlen km 24,000 lhing numei team hon ajot diu ahi.

Team hohi Rtn Meenakshi Aravind lamkaina ahiuvin, Coimbatore’a kipan ahi’in, London chan che diu ahi. Kin-gon hi Rotary Club of Imphal leh Rotary Club of Polo City Imphal (Rotary International District 3240) in agon ahi’in, Rotary Literacy Campaign noiya kibol ahi. Numei chapan lekha simlou aumlou nading bidoi ahi. Chief Guest Najma Heptullah in ahoulimna’a Rotary Club in mihem ding’a natoh pha tah atoh ahi, tin aseiye.

Numei Rotarian ho ni 70 sung’a numei chapang themjilna peh ding thu’a gam 24 achot uhi kipapi umtah ahi. Prime Minister Narendra Modi in abol ‘Beti Bachao, Beti Padhao’ abol toh kilhon ahi, ati. Gamsung’a kon numei lolhing tah tah MC Mary Kom, MP, Rajya Sabha, Jacintha Lazarus, IAS, Special Secretary, Health and Family Welfare, L Tonthoingambi, national awardee Bombayla, thalpi kap them Asem Romabati, Polo player numei hojong kin-gon’a apang uvin ahi.

TPLA in kilungkhat tah a pan lahkom ding’a kholhang sam

 

Imphal, Apr. 4 (ET): Thadou People Liberation Army (TPLA) a kon thulhut kimu dung jui in Thadou Tribe hi 1956 kum’a Government of India in recognized anabol ahitoh kilhon na tuni channa kichepi’a asung’a kivaipoh kitup nathei ding’a Thadou Inpi, Thadou Students’ Association, Thadou Youth Association chuleh Thadou Women Association um ahijeh in koi hijongleh Thadou Tribe chung chang thu’a koima akisah lel lou nading uvin Organisation temna ahi nei in ahi.

Chuleh Organisation in aseibena ah Kuki hi Tribe 22 kiloikhom (Nation) ahin changvel a kineisah bol loudin jong aseiye. TPLA hi Thadou Tribe huhbitna leh machalna aumtheina ding’a Arm Wing kibol ahijeh in koitobang Thadou Tribe boina thei dinga lunggel ahilou natong aum khah leh Organiation angsung’a kipeh lutna aneiding uvin temna anei uve.TPLA hin Manipur thinglhang gamsung’a Thadou Tribe umna jouse kitoupha ahijeh in imalam jousea Thadou Tribe ding’a pan kila ahi ati.Non- Naga chengsen kilungtoh tah a Kuki mina politics ihin bollun ihung machal tou peh un ahin vangset umtah in Any Kuki Tribe ahung umdoh jeh in Kuki (Nomenclature) ahina chu deibang a kilungkhat tah’a aumthei lou hi phamo akisa lheh in hijongleh Thadou Tribe hi atampen ahitoh lhona phat chesa a kilungtoh tah’a Nampi Kuki mina kong itolkhom uva Nampi khonung ding’a  inatoh nao chu aguilhun theina ding’a thase louva pan alah jing dan u jong aphongdoh un ahi. Thadou Bodies hon jong lunglen tah’a Kuki Nampi sung’a avahmangho ahung kijop kitna Kuki mina lungkhat leh thakhatna idinkhom na diuva pan ahin lah jing na ding uvin jong temna ahin nei kit un ahi.

TPLA Operational Area mun jouse a koi Organisation hileh aum jousen TPLA Tectical Headquarter a ahung diuvin Galngam Thdou, Info. & Publicity Secretary, TPLA-GHQ in temna anei un ahi.

VDF hon April 6 a kipat duty bol louva kiphinna pan tading’u

 

Imphal, Apr. 4: Tuni (Apr. 4) chun Manipur district 16 a VDF lamkai holeh member hon Imphal ah General body meeting khat aneiyuvin hiche a chun government heng’a VDF lhalo (honorarium) kalsahbe ding, service security leh aphatcha a lhalo amutheina diuvin ngehna aneiyuvin ahi. Hiche chungchang a hi government heng’a memorandum ijat ham kipelut ahitan Congress Government in cabinet decision file no.8/14(10)/15-H(WPC)PT date 24/12/2016 dungjui a phatsahna ananei chu tu le tua BJP government hin anatoh in apodoh hih laiyin ahi. Achesa April nisim 1, 2017 nikho jongchun Chief Minister kimupina ding appointment letter anakila chu tuni chan hin kimuto thei in aumhih laiye. Chule VDF ho hahsatna leh ngehna phabep kisutna lekha pum’in VDF Welfare Association in achesa March nisim 31, 2017 nikho jongchun Chief Minister hengah memorandum khat anakipelut kit in ahi. Government law and order dungjui in VDF in Mao ah ROP duty akibol in Economic Blockade laitah injong duty anakibol in ahi. Jiribam a railway tunnel semna mun in jong duty akibol kit in chule mundang dang injong Government in anganse dungjui in duty akibol jing’in ahin Congress hihen lang BJP hijongle VDF ho gentheina ahetpeh poi tin Association chun aseiye. VDF ho lhalo kalsah ding thu hi Election Code of Conduct kichai tengle hithei ding ahitai tin government in anaseiyin ahinlah tuni geihin government in anatoh in apodoh hihlaiye tin Association chun aseikit’e.

Hiche ho jouse toh kisaiya district 16 sung’a um VDF hon ahunglhung ding April nisim 6, 2017 a kipat duty bol louva kiphinna joh kibol ding ahitai kihoulhahna anei tauve. Hiche keu hilouvin government in ijem tia ngehna ho ahin suhbulhit loule kiphinna sangcheh hung kibol kitding ahi in aseiyuve.

District jouse’a VDF personnel hi 10,050 um ahin abon uva duty bol louva kiphinna neiding kiti hi amasapen jong ahin hiche a hungpang chieh ding’in amun mun’a VDF personnel jouse jong pangchieh ding Association in hetsahna aneikit in ahi. VDF personnel koitobang kiphinna a panglouva duty bol aumle Association in achung uva thu atanding, aminho’u jong news paper ho’a kitahlang ding chule mo jouse jong amahon akipoh diu ahi.

Kiphinna kineina ding phatsung’a officer honjong VDF personnel ho ada acham louva duty abolsah lou diu chule hiche phat sung’a VDF personnel ho absent ajihpeh loudiuvin temna aneikit in ahi. Hijeh chun government injong anakitepna ho akinthei lam’a anatoh’a apohdoh ding’in temna aneiyin chule ijem tia nahsah louva akoija deilou um thil aso khahleh government in mo akipoh ding ahi tin S. Laltingen Vaiphei, General Secretary, AMVDFWA in hetsahna aneiyin ahi.

HSLC 2017 exam lolhing tah’a kichai

 

Lien S. Gangte

Ccpur, Apr. 4: High School Leaving Certificate (HSLC) (Class X) Examination 2017 tuni 4th April, 2017 nikho’n akichaiyin ahi. Tuchung HSLC Exam 2017 ahin Ccpur district ah Total Candidate 2740 aum in, candidate 2704 in exam ape uvin chuleh, Candidate 36 a absent in ahi. Tuchung HSLC Exam 2017 hi achesa 17 March, 2017 nikho chun ana kipan in, candidate ho’n Exam Centre mun 2, Main Exam Centre Ebenezer Academy, New Lamka, Exam Sub-Centre Don Bosco Higher Secondary School, Salem Veng ho ahi. Tuni HSLC Exam 2017 kichai nikho 4th April, 2017 nikho’n Optional Subject ah exam anei uvin ahi.

Alangkhat ah, Council of higher Secondary Education Manipur (COHSEM) Exam 2017 a che lha jing in, exam 20th March, 2017 chun exam ana kipan in ahi. 5th April, 2017 nikho leh Physics, Political Science leh Accountant subject a candidate ho’n exam apeh diu, 7th April, 2017 nikho leh Physical, Health Education, Sports, Psychology leh Boitect subject ho’a exam apeh diu, 10th April, 2017 nikho leh Mathematics a exam apeh diu, 12th April nikho leh Home Science a exam apeh diu, 15th April nikho leh Anthrology leh Economics a exam apeh diu, 17th April nikho leh External Language a exam apeh diu, 19th April nikho leh Statistics  leh music a exam apeh diu chuleh, Council of higher Secondary Education Manipur (COHSEM) exam kichai nikho 21st April nikho leh English Drawing leh Sociology subject a Candidate/Students ho’n exam apeh diu ahi.

Achesa kum 10 sung’a crorepati politician 35% kibe

 

Shillong, Apr. 4: Sah-solam gamkai sung hi Infrastructure lhahsamna gam ahikeu hilouva BPL noiya um Insung tampi jong um ahi.Ahinlah Politician ho hi ivet’a ahileh atamjo Crorepati ahikit’uve.  Meghalaya gamsung a achesa kum 10 sung a chun crorepati politician  akibe jing in ahi. 2008 kum’a chu politician 15 vel crorepati anahi’uva 2013 kum’a chu mi 36 vel crorepati anahi’u ahi.

www.myneta.info in aseidungjuiyin 2013 Assembly Election a pachang  politician ho  lah’a mi 36 (60%)  crorepati ahi’uvin adangse lakhpati ahi’uve. Hiche hin politician ho sum le pai dinmun masang sang’a ahoijoh dan kichehtah in aphongdoh’e.  Ajeh chu 2008 assembly election a chu  mi 15 bou crorepati anahi’uvin ahi.  Lunglut umtah khat chu www.myneta.info  date  hi phatah’a ivet’a ahileh kum 5 masang a lakhpati anahi ho tu’a hi crorepati kisoh gam’u ahitai. Tutu’a Meghalaya politician lah’a ahaosapen chu  Ngaitlang Dhar (Umroi Constituency) ahi. Amahin nei le gou Dk.2,35,64,31,227 (235 crore) aneiyin ahi.

Amit Shah Tripura a kholjin ding

 

Agartala, Apr. 4:  Ahunglhung ding May nisim 7 nikho le BJP President Amit Shah Tripura sung’a nikho ni kholjin ding ahi tin Party central observer Sunil Deodhar in thuso miho heng’a aseiye. Amit Shah in Tripura akholjin sung’a hi party worker ho  kihoulimna aneiding chuleh tutu’a vaihom Left Front ho chung’a galjuona aumtheina ding’a tohdin le thamding ho aseikhom ding’u ahi.

“Sah-solam gamkai sung  a um state li ho’a ana chelha Assembly election a chun BJP in abol hoi lheh in tu’a hi Tripura a jong pachanna neitei ding hi lungtup  ahi. BJP hin Tripura sung’a Organisational strength lentah anei ahi’n ahunglhung ding election a jong pachanna aneiding kinepna lentah akineiye” tin Deodhar in thusoh miho toh akihoulimna khat’a aseiye.

Amit Shah  Tripura  ahungvil ding tolhon’a Chief Minister Manik Sarkar in apanmun adalhahna ding’a kholhang kisam ho khoucheh’a kibol ding ahi tin BJP state President Bipal Deb in aseiye.

Sah-solam gamkai sung  ju jing; Hui le go hat tah kitho ding gieljong kheding ahi ti’a Met Deptt in sei

 

Guwahati, Apr. 4: Ahunglhung ding April nisim 4 le 5 kikah’a hi  India sah-solam gamkai ho’a  hui le guo hatah’a juding chuleh giel  jong kheding ahi tin Met Deptt a kon kimu thulhut in aseiye.

Hetthei khat chu India Sah-solam gamkai sung a guo hatah’a ajuh jing vang’a  state dangho’a nichangsat jeh’a mipi hon gentheina tampi atuo’u ahi.  Monday nikho jong chun Guwahati sung’a tanlou hel in guo ana ju in lamlen le damlai jouse twi in achup in ahi.  Twi halet dehsetna mun ho chu Sarumotoria, Panjabari, Zoo Road, Anil Nagar, Nabin Nagar, Narengi chuleh Hengrabari ahi’uve.

Karimganj a Bangladesh mikhat police in man

 

Guwahati, Apr. 4:  Karimganj police in Kalibari gamkai a kon Bangladesh migrant khat amandoh’e tin police a kon kimu thulhut khat in aseiye. Akimandohpa chu amin Sujit Ram Das ahi. Amahi Cement company khat’a gari tol’a pang ahi. Sujit Ram  Das kimatdoh to kilhon’a kaal masa’a pat  Police in Bangladesh  a kon dandihlouva hunglut amatdoh mithum alhingtan ahi.

Khopi pam lang’a um kho hon meivah mu ta diu :Arunachal Pradesh

 

Itanagar, Apr. 4: Arunachal Pradesh  khopi sung ah meivah hoitah in mu jong leu khopi pam ma cheng hon meivah lam’a hahsat na  ato u toh kilhon in China gamgi toh kinai ja um kho 900 val jen chuleh inn 16,000 tobang in meivah amu thei ding u ahitai tin Minister Piyush Goyal chun asei in ahi.

Hiche toh kilhon chun Govt. in jong  4,000 street lights koi na ding in companies dang dang toh hiche project ah kihou khom na jong anei uvin ahi.Govermet toh Companies hon kihou na anei dung jui uva Comapanies hon meivah man ahin suh nem utoh kilhon na Govt. in khopi pam lang’a um kho ho meivah mulou lai ho’a ding nga hiche meivah hi ahin bol doh peh thei u ahi.

Deen Dayal Upadhyaya Gram Jyoti Yojna kiti scheme hin adoi leh atup chu ahileh  khopi pam ma um kho ho ding nga meivah mu thei nading tohgon ahitohlhon na Prime Minister Modi injong nisim 1 May 2018 kah’a kho 18,452 in vei vah amu ding dan thu jong aphong doh in ahi.Hiche tohgon hi 2015 a ana kipan ahin, tu chan gei in kho 13,002 in hiche tohgon na noi’a hin meivah amu thei tauvin ahi.

Assam gam hi kum 5 sung’a ‘top state’ hithei ahi: Yoga guru Ramdev

 

Guwahati, Apr. 4: ‘Namami Brahmaputra’ kin-gon’a Ramdev in ahoulimna’a Assam gamsung hi achungnung pen hina ding’a thusim chule boltheina ho jouse anei soh ahi, tin aseiye.

Chief Minister Sarbananda Sonowal lamkaina’a sorkar in Assam gamsung hi kum nga sung’a state luboh holah’a sem nading’a pan sangtah’a alah ahi. Organisation in school, hospital, gaushalas asem doh ding chule kum 5 sung’a tohmun pehna thei dinmun asemdoh ding ahi, tin Ramdev in aseibe in ahi.

“Pan ilahkhom uva ahileh iboldoh diu ahi”, ati. Yoga asana chom chom vetsahna aneiyin, Union MoS Babul Supriyo injong yoga asana abol in, ahin, kho aphatlou jeh in houlimna nei talouvin Hindi film laa phabep asa in ahi. Chief Minister leh atohkhompi minister phabep jong apang uvin ahi.

Assam gam’a hui-leh-go kitho jeh’a mi 4 thi

Guwahati, Apr. 4: Assam gam’a achesa ni phabep sung’a hui-leh-go hattah akitho jeh in mi 4 athi in chule inmun aja’a sim leh thil tamtah ase in ahi.

Official thulhut dungjuiya Cachar district’a hui-leh-go kitho jeh in mi 2 athi’e, tihi photchen ahitan, Cachar leh Dima Hasao district’a mikhat cheh kiholmo ahi. Tuchan geiya inmun 600 val se ahitai. State disaster Response Authority hon thilso na district 10’a deputy commissioner hotoh video-conference abol uvin ahi. Dima Hasao Hills district hi thilsoh khohset na pen ahi’in, ni phabep go ajuh jeh’a mun phabep’a landslide um ahi.

Silchar-Haflong leh Haflong-Guwahati lamlen panna in lamlen phabep ase in, district administration in DIma Hasao hopsung’a um themjilna mun jouse jong suty alha in ahi. Guwahati khopi’a hui-leh-go janhi nilhah in akitho in, khopi mun chom chom’a twi akiting den in, ahin, tuni’a go aphat toh kilhon in dinmun apha dom tai.

Thusoh Lahchom

RIMS

RIMS Director ding’a athah’a kilhengdoh RK Dinesh Singh Tuesday nikhon RIMS faculty member leh staff hon liemna kin-gon aman peh uvin ahi. Mini Auditorium, RIMS mun’a kin-gon kimang ahi’in, RK Dinesh in RIMS faculty member hotoh natong khom thei ding’a kaum kakipah’e, tin houlimna aneiyin ahi. Kin-gon’a Medical Superintendent, RIMS, Prof. Ch. Arunkumar Singh, Chief Accounts Officer/ FA, Deputy Director chule adang dang jong apang uvin ahi.

Combing Operation

Imphal West Police commando hon Tuesday jingkah nidan 5.30 don in Nagaram munvel’a operation abol uvin, ahin, operation kibol sung’a akiman koima aumpoi.

Bongaigaon

Baitamari, Bongaigaon’a inchung khat’a electric wire (meiche) alhah jeh in mi 15 val akitongkha uvin ahi. Gamkaiya’a hui-leh-go kitho in thingphung leh meivah khom ho asuhlhuh ahi.

Gamsai

South Garo Hills hopsung Dalupara kho’a gam sai (saipi) alhailut jeh in inmun thum ase in, khosung hi Bangladesh leh India gamgi kom ahi. Saipi in asuhset inmun hohi Winston R Marak (35), Lokesh A Sangma (25) leh Mini Marak (48) inmun ahi’in, Tuesday jingkah nidan 4 don thilsoh ahi. “Jingkah’a saipi hon ahon hon’a khosung’a alhailut uva hi go hattah’a ju ahi. Vangphat umtah in mihem akitongkha aumpoi”, tin thulhut in aseiyin ahi. Ni-ni masang’a jong Gaptuli, West Garo Hills kom’a saipi hon alhai na’a jilkung khat achot khah-u ahi.

Polio Immunization

Red Shield Division noiyin Senapati Brigade in ‘Polio Free Nation’ lungtup bulhit theina ding’in Senapati, Kangpokpi leh Tamenglong district’a pulse polio immunization program abol uvin ahi.

BJP

BJP in Monday nikhon CPM hon Tripura gam’a Left sorkar in centre fund ho adihlouvin amang uvin, amangcha pouve, tin ngohna anei uvin ahi. Bharatiya Janata Party Tripura unit president Biplab Kumar Deb in thuso miho akimupi na’a chun, CPM hon court thupeh jong ajui pouve, tin aseiyin ahi. “Tripura gam’a Left Front kivaipoh dan hi dan dihlou ahi, tihi Supreme Court in government teacher 10,323 natoh cancel bol ding’a thutanna anei hin aphotchen ahi”, tin Deb in aseibe in ahi.

Bus tuoset

Tuesday  jingkahlam chun tourist pilgrim ho po passenger bus khat in Dhubri a toset anatoh in asung’a tou tourist 30 vel hatah in ana kisukha’uvin ahi. Akisukha tourist ho chu tutu hin Dhubri civil hospital a akijen’uvin ahi. Pilgrimho po gari chun Kamakhya Temple juon’a alhai nah’a toset atuo ahi.

Editorial

Police Recruitment thu kiseidoh kha loulai

                              Tuchan’a BJP lamkaina State govt nin ipipi aseitoh abol athopatna Congress govt nin anabolsa phabep kheldi atiloi jong aum vang’in Congress govt nin 2013 a pat 2016 kum kichaidikon (Election dikon) geiya Police kilahna (Recruitment) anabol aban chejom louva umho thu ima aseiloulai hi mi tamtah in angalel khat hidi ahi. Prime Minister NJarenda Modi lamkaina BJP govt nin achepi khat chu ‘Corruption’ (nehguh chahguh) dou ding ti ahin, hicheto lhon’a Manipur Chief Minister (CM) N Biren injong tohdi thamdi tamtah aseiho lah-a ‘Corruption’ galsatdi ti jong khat ahi. BJP hon Election Campaign anabollai uva anahasei uleh Congress anahadem nau khat chu Govt Department hoa natoh kilahna (Recruitment) thu ahi. Hiche Recruitment jatjat kibol lah-a Police Constable Recruitment thu hi BJP hon anatup pen’u ahi. Ahileh N Biren govt hin hiche thu hi olthamjep di (oljepma boldi) ati ahidem, ahilouleh mipi honjong govt masaho thilbol ahijeh-a govt kikhel tolhon’a athu hi thipmang jengdi dan’a ageljeh-a N Biren govt jonghin kilimsahda tajongleh akhohpoi ati ahidem? Sum pehguh, nehguh, chahguh (corruption) hi munjouse ah umjongleh mijousen ahamulou, aha hetlou chuleh khoh ahasahlou tithei ahi. Ahin Police Recruitment hi hutkhatna tamtah (asang’a sim) kilahna ahiban’a lentol’a mipi muthei tah-a Candidate tamtah kitetna jong ahiktne. Chuche nakah-a Police Recruitment tobang’a lhangphong’a sum pehguh leh kilahna umloudi ahi. Thepna leh hatna’a kitetna hileh ahat le athem hobou kiniel baotamna beiya kilajengding, nehguh pehguh thu jong umlouding, ahao avai kitilouva kibangchetna athepna leh ahatna dungjuiya kilhenna umdi ahi. Chutileh aphundi, alunghangdi, ademdi jong umloudi ahi. Apha adih chu koiman ahetloujeh-a adihlou kibolji jong ahidehpon, henasa’a kibol ahijeh-a kiboina dimsetji lo ahi. Hijeh-a chu CM N Biren in Corruption kidou ding ahi atileh amasapen’a mutheitah leh lhangphong’a nehguh pehguh kibol ho asuhbei masat ngaidi ahi.

                        CCTV leh ‘Traffic Light’ thua kholchilna umdi kiti jong hi N Biren govt in Corruption umna thu hidia agel khat kholchilna neidi atimasatpen loi hidi ahi. Hiche thu hi iti hung kikhol’a mona nei, nehguh bol ho matdoh a hung um’a ipi gotna hung kipe am, chuleh gotna kipe ahung um’a ichan nehguh hung kisutang jouvam tijong hinvetdi ahinalaiye. Assam a BJP govt injong Congress govt nuoiya Department khat le ni’a sum akimanna kihelouva kisuhmangna thu kholna ahinnei tolhon’in govt service bol mi phabep ‘Suspend’ ahinbolpan tai. Huoilai hileh khat le ni bolchahna di bepma nehguh thu kholna aumleh nehguh beinadi (lhomnadi) hidehloudi ahi. Police Recruitment lah-a 2013 a anakibolpen leh kiboilonapen chu High Court a Case kichailouva umnalai ahi. Hiche thu ahung kichiehleh adang aban ban’a hung kichiehdi tina ahijeh in N Biren govt nin Corruption thu ahaseipoh masang’a hiche hi asuhchet masat dia pha ahi.

Blankfire

Phung le chang thu haseilou di ti atamlai chana apum apeh a phung thu le phung kiloikhomna thu a kivaipei loi umjing kit ahi. Phung lamkai phatah tah atam jeh a nam lamkai ahithei belbul behjong kisep dohlou hija hi o!!