ET April 4, 2017 News (Local, Regional, Thusoh Lahchom, Editorial, Blankfire)

ET April 4, 2017 News (Local, Regional, Thusoh Lahchom, Editorial, Blankfire)

303
0
SHARE

State Cabinet in public transport system athahbeh’a semdoh ding’a thulhuhna nei

 

Imphal,  Apr. 3 (DIPR): Tuni CM Secretariat a Chief  Minister N Biren Singh lamkaina’a State Cabinet hon toukhomna aneina’uva chun gamsung a public transport system avel’a semdoh kitding in thulhuhna anei’uvin ahi. Public Transport system semdohkit ding dan hi Cabinet meeting a’umkit teng  le aseikhom ding’u ahi.

State Cabinet kihoulimna a chun  tumasang a retired chesa Government Employee ho Department chom chom’a avel’a natoh ana kipe jiho hi boltahlou ding in thulhuhna asem’uvin ahi.

 Ahinlah deserving/eligible junior officers/official umlouna technical post le position phabep a vang retired chesa ho avel’a  tohmun kipekit thei ding ahi. Manipur Bhawan, New Delhi’a  Assistant Liaison Officer avel’a koi kit ding in jong thulhuhna asem’uvin ahi. India gamsung  mun chom chom’a um Manipur Bhawan jouse’a Deputy Resident Commissioner (DRC) khatcheh koi ding in jong thulhuhna anei’uvin ahi.

Labour and Employment Department noiya Manipur Skill Development Mission chepi ding in jong thulhuhna anei’uvin ahi.

Highway tuosetna’a kitongkha mikhat thi; agom’a mi thi 23 lhingta

 

Imphal, April 3: Achesa March nisim 27 nikho’a national highway teni’a lamlen tosetna’a kitongkha mikhat Monday nikho’a athi toh kilhon in thilsoh’a thi mi 23 alhing tan ahi.

Athi pa hi S Ajit (22), s/o S Achoubi, mantripukhri Ahongei’a cheng ahi’in, Mao Maram mun’a tosetna’a akitohkhah’a kon JNIMS mun’a kijen ahi. Makan leh Chakhumani kikah, Senapati district’a bus khat kol’a alhah jeh’a mi 12 in thina ato ahi’in, hiche nikho ma ma’a Lairou mun’a tosetna’a mikhat thi kit ahi. Chule Khongsang leh Irang kikah, Imphal-Jiribam lamlen’a tosetna thilsoh umkit’a, hiche ‘a hi mi 9 thi ahi.

Tosetna thilsoh ‘a agom’a mi 23 kitongkha ahi’in, mikhat damdoh jou louva athi kit toh kilhon’a thilsoh’a thi agom’a mi 23 lhing ahitai.

Kikaptuona a Kuki thingnoi UKDA cadre 3 in thina toh

 

Guwahati, Apr. 3: Tuni jingkah lam in Assam ah um Red Horns Division of Gajraj Crops,East Karbi Anglong district ah Kuki thingnoi hotoh nasatah in ana kikap to uvin hiche kikap to na’a chun Kuki thingnoi mi thum ana thin ahi. Intelligence ho’a kon na thukija dan in hiche Kuki thingnoi ho hi East Karbi Anglong distict ah aum uve ti thu ajeh u toh kilhon na kholchil na 1 Apr 2017 jan chun ana nei un ahi.Hiche toh kilhon chun jingkah lam in inn khat na aum diu agin mo phat uvin hiche chu kholchil na anei got nau vah thingnoi ho toh kisu to uva pung makhai(30mnts) tobang kikap to nung uvin apet pet in thingnoi ni athin khat chu akisu kha in jen ding nga apui nao vin lamkah’a athi den tai.

Hiche toh kilhon chun hiche inn mun nah chun thal leh meichang jong amudoh un ahi.Aki mu thal ho chu M-16 rifle khat,7.62 rifle khat,hand grenades ni chuleh meichang tamtah amu un ahi.

CM N Biren in MHJU kimupi; thinglhang leh phaicham kah’a kitahsanna aum kitding hi ka chepi ahi, tia sei

Imphal, April 3: Chief Minister N Biren Singh in gamsung’a chengkhom nam chom chom kikah’a tahsanna mangthah suhhing nading’a pan kalah ding chule thinglhang leh phaicham kah’a palaiya pan nading’a thupi hi ‘Go to Hill’ ahi, tin aseiyin ahi.

Office Chamber’a Manipur Hill Journalist Union (MHJU) hotoh toukhomna aneina’a CM in hiche thu asei ahi. “Nam chom chom kikah’a kibahlou na hi ipi hijong leh khat ihiuvin, thuso mihon nam puikhom nading’a pan lentah anei ahi”, tin CM in aseibe in ahi.

Sorkar kivaipoh dan hi aguh’a na kitong umlou ding ahi, tin aseiyin chule MHJU member hon kitahsan to na aumkit nathei ngaidan apeh diuvin temna jong aneiye. TD& Hills Department noiya um scheme chom chom hohi beneficiary khut alhun tei nading’a amatah in mopohna nei Minister toh ama ama Hill District HQ’a pehdoh na nei ding’a tohgon um ahi, ati.

MHJU in apeh memorandum’a thumna kinei ho chungchang’a Chief Minister in Chief Engineer, PWD thuhilna aneiyin, Churachandpur’a um Press Club semphat na natoh alah nading chule Imphal khopi’a Union Press Club sahna ding gam leiset peh ding’in phatsahna aneiyin, Union in gam alhen masat ding’in aseiyin ahi.

Hill district’a um district headquarter jouse’a Press Club khat cheh sah ding thu’a Chief Minister in ama ama district administrative hon Union hi Mini Secretariat’a mun apeh diuvin ngehna anei diuvin thuhilna aneiyin ahi. Member 6 lhinna MHJU hohi President Sothing Simray leh General Secretary S Negkhalun lamkaina’a kalsong ahiuvin, toukhomna’a Director, IPR, Meghachandra Kongbam jong apang in ahi.

JNMDA kiphudoh kal kum 63 lhinna kinguon khumkha hita

 

Imphal, Apr. 3 (DIPR): April nisim 1,2017 nikho a ana kipan Jawaharlal Nehru Manipur Dance Academy (JNMDA) kiphudoh kal kum 63 lhinn akinguon tuni chun Open Air Theatre, JNMDA a khumkha ahitai.

Tuni khumkhana kinguon a chun Director, IPR, Government of Manipur, Meghachandra Kongbam Jin-gun in apang in  chuleh Professor (Retired), Manipur University Dr.P.Nabachandra Singh Kinneipa in apang in ahi.

Meghachandra Kongbam in kinguon a ahoulimna a chun Manipuri dance hi  Meitei te chondan lah’a mi hetthei khat ahi’n lam jat chom chom ho toh akibahlouna tampi aum’e ati. Chuleh tunigeiya gamdang miho’n Manipuri Dance angaisang’u hi adang toh abahloujeh ahi. Gamsung a cheng mipi ho kipumkhatna ding’a hi jat le nam jouse’n lam aneiho’u mipi mutheiya tahlang ngai ahi tin jong aseiye.

Dr.P.Nabachandra in ahoulimna a chun Manipur gamsung’a Manipuri Dance in social development umtheina ding’a panmun poimotah aluodan ahilchen in ahi. Manipuri Dancer ho le gamdang  dancer ho kah’a kihet tuona aumlou apoimo dan jong aseiyin ahi.

Tuni kinguon a chun JNMDA student ho le artist hon pan ala’uvin ahi. Kinguon a chun artists minthang tah tah hon  Nupa Pala le Gourleela jong avetsah’uvin ahi.

Twilet jeh’a lungkhamna umjom jing

 

Imphal, April 3: Achesa ni phabep sung go tanglouva ajuh jeh’a mun phabep’a twi kiveiden’a twilen ahi’in, janhi jan’a hui-leh-go hattah akitho jeh in inmun leh thingphung phabep asuse in ahi.

Noney’a kon kimu thulhut dungjuiya landslide leh mudlisde chule songpi ho akheh (boulder) jeh in gamkai miho hahsatah dinmun’a aum uvin ahi. Athah’a kilhou’a loumun leh phailei ho twiyin achup soh in, anche louhing tamtah asuse in ahi. Meivah jong atan in chule che-le-va-le ahahsat jeh in school leh college mun hojong akikhah tan ahi.

Noney leh akimvel’a um hon department leh state sorkar in kithopina apeh diu anga ahi, tin thulhut in aseibe’e. Alangkhat’a, Imphal khopi’a vadung tamtah jong go juh jom jeh in akhang cheh cheh in ahi. Imphal khopi mun chom chom’a mihem mitmo/gelkhoh lou jeh’a twi kivei den’a twilet na mun phabep jong aum nalaiyin ahi. Kalimai Mandir, Yaiskul, Moirangkhom mun’a jong hui-leh-go kitho in phat chomkhat man ding’a kisa dukan, buh chule thingphung lui ho asuse in ahi. Sorkar in Imphal leh akimvel’a kithopina thil hop ding panna’a kigotna phabep anei ahi.

IFCD Minister Letpao Haokip in Twilet namun ho velha

 

Imphal, Apr. 3 (DIPR): Irrigation and Flood Control Department (IFCD) Minister Letpao Haokip  in local MLA le Affairs, Food and Public Distribution Minister  Karam Shyam toh tuni chun Langthabal AC sung’a twilet namun ho vetlhahna ana neihon in chule Minister tenin Manipur University Campus sung’a twilet namun ho jong vetlhahna aga neihon in ahi.

Go chomkhat ahungjuh jongle le Manipur University campus sung le akimvel lah twi alet paipai najeh hi University sung’a Dam neokhat kisah jeh ahidan mudoh ahin, Twi kholna ding’a kisa dam neo hinvadung neo le lhanghoh twi ho aluona nading bang’a aluon lhahsah thei tahlou jeh’a go chomkhat ajuh jongle twilen pai pai ahidan hetdoh ahitoh kilhon’a IFCD Minister in University campus sung’a dam kisa chu phetlhah ding in thupeh aneitan ahi.

CAF&PD Minister in twilet najeh hi atamjo mihem semthu ahitan, hiche jeh’a chu koiman twipang ho iha nehlut loudiu chule vadung pang’a ehbuh le thildang dang sah/tun kiti jong ingahdiu ahi tin mipi tiemna aneiyin ahi. Tuni Minister teni inspection aneipet hon chun IFCD le Manipur Universtiy official ho jong anajao uvin ahi.

FEGOCTA in Radheshyam le Robindro liemna nei

 

Imphal, Apr. 3 (DIPR):  Tuni chun Federation  of Government College Teachers’ Associations, Manipur  (FEGOCTA) in D.M.College of Arts a Minister Education, Labour & Employment, Th.Radheshyam le Parliamentary Secretary of Education, Youth Affairs and Sports , K.Robindro Singh lemna kinguon ana  bolpeh in ahi.

Kinguon a Th.Radheshyam  Singh in ahoulimna’a chun , themjilna hi natoh muna ding bouva phachom ding ahipo’n, mihem khat in hikho lolhingtah aman theina ding’a jong poimo ahi ati. Jilkung ho’n boina atojing ho’u hi  jilkung ho mama in akisuhlhap thei ding’u ahi, ajeh chu jilkung ho hin ahinkho lhumkei’uva kitah tah le tomngai tah’a society semhoina ding’a pan ahinlah’u  ahijeh’a boina ho suhlhap dan jong ahet mama ding’u ahi tin Radheshyam in aseiye.

Themjilna machalna ding’a hi infrastructure  semhoi ngaiding ahi’n, ahinlah resource umho alolhin nathei pen’a manchah hin society  ahin puijang thei ding ahi.  Jilkung ho’n jong kilungkhat tah’a na atohkhom’uva society semhoina ding’a pan alahkhom ding’uvin Radheshyam in temna aneiyin ahi. Chuleh simlai hon jong  Manipur sung a kisem thilkeu ho amanchah’uva gamsung economy semhoina ding’a pan alah diuvin temna aneiyin ahi.

K.Robindro Singh in ahoulimna a chun Manipur gamsung jong imalam jouse’a  state dangho bang’a ninglhingtah’a aumtheina ding’a sorkar in pan kilading ahi ati. Kinguon a chun Principal DM College of Arts, Acting President FEGOCTA , college Principal phabep  chuleh simlai phabep in pan ala’uvin ahi.

MAHUD Minister Th Shyamkumar in Khwairamband Keithel vetlhahna nei

 

Imphal, Apr. 3 (DIPR): Manipur Municipal, Housing and Urban Development (MAHUD) Minister Thounaojam Shyamkumar in tuni chun Khwairamband Keithel vetlhah na aga neiyin ahi.

Tuni’a MAHUD Minister in Khwairamband Keithel vetlhahna  aga  neipet chun achesa January 4, 2016 a ling kiho in ana suhset Ima Keithel building kithahsem ho jong vetlhahna aneiyin ahi.

Shyamkumar in Khwairamband Keithel ban’a Temporary Market Shed ban’a BT Park le akim vel ho jong vetlhahna aneiyin, hiche jou chun thuso miho ana kimupi in; Street Vendor (Lampi laiya thiljoh) ho ding jong mun hung kingaituo peh vah ding’u ahitan chule street vendor ho touna ding’a Nambul River mailing khu hung kiguong ding chule Temporary Market shed munna Parking Space jong kisu ong’a street vendor ho kitousah ding ahidan Shyamkumar in thuso miho heng’a ana phongdoh in ahi. Imphal Municipal Council (IMC) noiya khopi sung’a nen ho jong lha khat’a kah’a suhtheng hiding chule dukan bolhon a dukan maicheh uva dustbin akoilou ule Shop License u jeng jong kikah pih thei nalai ahidan Shyamkumar in aseiyin ahi.

Mipi tamna Bazar lah’a double  parking chung chang thu jong hapta khat kah’a suhchen ding in jong aseibe’n chule tuni’a Minister pan Bazar sung munchuom chuom vetlhah na aga neipet chun Dukan bolhon jong ahahsat nau analhut uvin ahi.

 Tuni’a Shyamkumar inspection bol’a ache na a chun Parliamentary (Home) L. Susindro Meitei, IMC Mayor, OSD Solid Waste Management le adang dang ho jong anung anajui uvin ahi.

Mitcho ho phatchomna ding ‘federation’ kihongdoh vah tading

Imphal, April 3: National Federation of the Blind kiti mitcho ho ding’a kibol self help organisation lenpen, gamsung mun chom chom’a um hi Imphal’a branch unit kihong doh vah ding ahitan, North East’a regional centre Guwahati khopi’a um ahi.

Md Imran Ali, Secretary cum In-charge North East Affairs, National Federation of the Blind in asei dungjuiya, organisation hi 1972 kum’a kisemdoh ahi’in, Dharmtul, Morigaon district, Assam gam’a mitcho ho ding’a themjilna, training chule  rehabilitation centre jong ahon ahi, ati.

 Braille press’a tohmun, Braille E-Text leh Talking Book Library, computer leh career development centre, mitcho simlai ho college’a hostel, chule kijenna’a sum-leh-pai’a  kithopi na leh adang  dang’a pan alah ahi, ati.

Mitcho ho ding’a phatchomna tohgon chom chom ahin boldoh jing ahi, tin aseiyin chule state sorkar in federation alolhinna ding’a tosotna apeh ding’in ngehna aneibe in ahi.

Thusoh Lahchom

JCO Kom jana kipe

Jammu and Kashmir gamsung Line of Control, Poonch Sector’a janhi jan’a bomb pokeh na’a thi’a JCO Naik Subedar, J&K Rifle, S Sanayaima Kom Monday nikhon Imphal Tulihal Airport’a jana pehna aumin ahi. Indian Army Kom thi-long hi Monday ni’a Airforce lenna in ahin poh lhung ahi’in, Indian Army hon jana apeh jouvun thi-long insung mite khut’a apedoh tauve.

CORCOM in gih

Thal-choi kiloikhom CORCOM in thuso anei uvin, CoRCOM min’a sum kidong’a sumang’a Konsam Ongbi Sanahanbi kiti mikhat gihna nukhah pen ape uvin ahi. Sanahanbi hin CORCOM min’a project ahop’a chule mi tamtah alhep lhah ahi, tin thuso aneiyun, RIMS’a MBBS leh Nursing seat peh ding’a sum tamtah jong akilah’a, Manipur University leh RIMS’a tohmun peh ding’a jouthu’a mi phabep alhep lhah ahi, ati. Sanahanbi gihna kinei hi anukhah pen ahitan, April nisim 30 nikho kah’a ama-leh-ama akipehlut louleh achung’a action kila ding ahi, tin CoRCOM in thuso aneiyin ahi.

RIMS Director

President, Board of Governors, Regional Institute of Medical Sciences (RIMS) in regular basis ‘a Institute Director akilah kahse’a RK Dinesh Singh in Director panmun atuh ding’in thuso anei tauvin ahi.

Operation

Dewlahland, ISBT kom’a Monday jingkah nidan 5.15’a kon 6.30 chan in sepai hon operation abol uvin, mikhat aman uvin, Imphal PS’a verification bol ding’a apelut tauvin ahi.

Dr S Ibomcha, Addl SP (Ops) vetsuina leh Rojit Irom, Deputy SP (CDO), IW lamkaina’a operation chelha ahi’in, Insp SR Shimray OC i/c (CDO) IW, Insp Ingocha SJM OC, Insp H Rameshwor, CAR-IW in akithopi ahi.

Assam Rifle

2 Assam Rifle leh HQ IGAR (South)  Medical team ho kitho khom na in 2 Apr 2017 ni in Pulse Polio Immunization Camp Thoubal mun nah anabol un ahi. Hiche Polio drops hi chanpang kum 5 apat anoi lam ho don di ahi naban ah  anu apa te uvin  kipah tah leh thanop tah in chapang tamtah ahin pui doh thei un ahi.

Felicitation Camp

District Administration, Kakching in Serou Practical High School mun’a One day Felicitation camp abol uvin, kin-gon’a Deputy Commissioner Kakching Th.Kirankumar in houlimna aneina’a chun department chom chom in service chom chom abol ho Serou mihon ahet nadiuva kibol ahi, tin aseiye.

Serou hi Kakching district headquarter’a kon mun gamlha tah ahijeh’a gamkai mihon domicile, OBC/ST/SC, income, residential certificate ho lahna ding’a hahsatna atoh uvin ahi, ati. Hiche camp hi Kakching mundang dang’a jong kibol ding ahi, tin aseibe in ahi. Revenue , Police, BDO, CMO,DFWO, ZEO, MSPDCL, ICDS, Banks kiti department chom chom in camp’a pan alah ahijeh’a tuchung’a kibol camp hi jatchom beh ahi. District SP injong phat amang in, chule birth certificate, simlai ho lekhabu kihop, medical camp, meivah kito thah, bank account hon dan, Aadhaar registration, loan chule Digital payment ho thu jong hilna anei uvin ahi.

Tuni camp kibolna’a panglou Agriculture, Industries, CAF & PD ,YAS, Transport, PHED leh DRDA hojong khonung’a District Administration in agon camp’a pang diu ahi, tin DC in kitepna aneiyin, chule District Level Officer, Serou vengsung miho, club leh organisation chule thuso miho chung’a kipathu aseiyin ahi.

Editorial

Haolenphai boina suhchet dohdi

 

                         Moreh kom’a Haoplenphai gam thua kiboina hi kum masa lang chun ana kithang lheh jeng’in chomkhat hi athip hitam akitileh tun boina jatchom beh agingjing kitne. Amasa’a kiboina chu ahileh Manipur govt nin Haolenphai gam Acre 3000 (sang thum) langpi Smart City sahna dia analahgot (chohgot) thu ahin tua hi Myanmar govt nin aman amol thu umlouva Myanmar gam ahi tia mi nuoise tah-a abol’a achujing thu ahi. Hiche hi itidan’a Manipur govt leh India govt nin thipbeh a avetjing ham ti hi datmo umtah ahi. Manipur govt nin Haolenphai gam’a Smart City sahdi ti tohgon ananei chun tin le ha tho’a jahdana (noplouna) thu anaseiya kiphinna neiloi jong ana um’in hinlah tua akhohleh Myanmar sepai ho khutna lut thei (mangthei) a aumphatna koima uhpoh louva aum jong datmo umcheh ahi. Tunaicha’a Myanmar sepai ho Haolenphai khosung’a ana kitollut uva Saw Mill asuhset uva manchah (Machine) phalai ana kipohdoh jeng ujong Haolenphai kho kinuoisena’a India govt nin agelbepdan ahin adihtah chu Manipur govt titah louva Centre (India) govt ija selouna joh ahi. Ajeh chu Haolenphai hi Manipur sung hijongleh India leh Myanmar govt kikah thu hididol ahi. Centre govt injong Act East Policy gelna’a Myanmar govt hi ahithei chan’a suhlunghang loudi atinalam’a Myanmar Army hohin hilai kho le veng sung’a gucha michom umchan atholo u tina ahitai. N Biren govt injong amuntah a kholna nei dia mi (Manipur govt official) soldi anati chu ichan aphah hitam aban amol akijakit tapoi. India leh Pakistan gamgi’a Pakistan Army hon India khosung khatna hitobang umchan apohdoh u hileh gal soh maithei ahi. India in Myanmar hi kibolpi kham asahlou jeh ham, akichat jeh ham, North East lang akhohsahlou jeh ham dohchet phaat hitadi ahi.

                    India dia Myanmar to kitomodi chu India-Myanmar gamgi  hoa North East thingnoimi pansa ho Myanmar Army in akithopi thei ahijeh-a jong India govt hin ichan ham’a Myanmar sepai ho chaloh hi amoh vet jong hithei ahi. Myanmar sepai hon Border Pillar phabep abodoh uva India (Manipur) sunglang’a ahinchonlut ujong hi UNO gei lhunna thei thu ahi. Sopi meilhei ten Myanmar Tamu lhang’a Kabaw Valley thu alainatpi ten vang uva phaicham thingnoimi ho hiche lhang gamgia abusat jeh uva Myanmar sepai (govt) hon Manipur gam ahinneh u thua ima asei ngamlou un akilang’e. Border Fencing Km aja’a sim bon sahdi kitina mun’a Haolenphai gam kikah sung beh hi thihkhao le song thopal thuo ni’a sahthei ahi. Alhang agam’a um Asam Rifles hojong hin aguh-a kivei thil pole ho matna sum mudi bou ahagel joh jeh uva Myanmar sepai ho India gamgi sung kho khat a ahung kivaipei jiu hi agel thupilou lam u hidan’in akilang’e. Moreh leh akimvel’a kho leh CSO hon athu hi Manipur govt kom’a hoitah-a alhut uva Manipur govt injong Centre’a alhutson’a athu hi suhchetdoh phaat ahitai.

Blankfire

 

Mi mumu dia von hoi show bol lele khang jong hitalou, mi mumu dia boltheina show boljong ngailou, mi het het dia aumtalou kingaipi khat lungsetna thimthu social media hoa tahdoh lele jong aphatchomna ipi umlou ahijeh in ngaikhel lou ahi.