ET April 30, 2017 News (Local, Thusoh Lahchom, Editorial, ET Taona)

ET April 30, 2017 News (Local, Thusoh Lahchom, Editorial, ET Taona)

262
0
SHARE

Thingnoi hidia ginmo hon Behiang kho’a mi 2 kaplih, ZC le ZSF in demna thu phong

Ccpur, Apr. 29 (ET): Phaicham thingnoi gamvah hida ginmo hon tujingkal lang nidan 8:15 vel chun Churachandpur district sung Behiang kho’a BRTF/GREF ho gari (water-tanker) analamtin uvin, hiche a chun Gari driver pa le a helper pa’n thina anatoh lhon in ahi.

Thulhut kimudan in; tujingkal lang chun Myanmar toh gamhi Behiang kho a kipat mun gamlha lou Suangphu le Khenmang kikah’a phaicham thingnoi hida ginmo hon BRTF gari tuipo dia che chu IED bomb apokhumsah jou uvin, meithal a anakap uvin, hiche a chun gari driver Ginlam Khaute (50) s/o Kamzagin, Bethel Veng, Singngat le helper Lallianmang (40) s/o Pastor (retd.) T. Chinkhothang, Behiang in thina anatoh lhon in ahi. Hiche thilsoh toh kisaiyin tuni chun Zomi Student’s Federation, General Headquarter le Zomi Council in jong demna thuphon ahin nei uvin ahi. Kiloikhomna teni demna thuphon in atahlang na ah; April nisim 28 le 29 ni’a Behiang area a phaicham gamvah thingnoi ho chalohna demna sangtah akineiyin chule tunung tuban le hitobang thil dei umlou ho asokitlou nadia Central Security Force ho jong achihthei diuvin tepna aneiyun chule thina toh Lallianmang le Ginlam Khaute innkuo te heng’a compensation/ex-gratia pehding in jong ngehna aneiyun ahi.

Thiluong teni ahile tunilhah lang chun YPA Singngat le Behiang Youth Club makaina in gari a kipat lahdoh ahitan chule tunilhah lang mama chun Singngat pohlhung ahin, Singngat a lhankuong ding asemchai phatleu Singngat Police hon Lamka lang’a aposuh diuvin akiseiyin ahi. Hetthei khatchu achesa april nisim 28 ni’a jong chun phaicham thingnoi hidia ginmo hon Seilsih khokom Tedim Road laitah’a IED bomb akam’u anapohjah ahin, hinlah hiche thilsoh a chun akitong kha le athi amang ana umpon ahi.

KNF kiloikhomna in MLA Ngamthang kisulham dia akouna chungchang’a Ngamthang Haokip in suhdihna leh hilchetna nei

Imphal, Apr. 29 (ET):  Eimi Times dated 29/04/2017 thuso’a ‘KNF in Saitu MLA Ngamthang Haokip kiloikhomna ang’a kisulham dia kou’ kiti heading noiya KNF Joint Secretary & Defence PRO Helien Kipgen in kiloikhomna thakhel’a amochanna ho chungchang’in Saity A/C MLA Ngamthang Haokip in suhdihna leh hilchetna ahinbol in ahi. Hiche a chun tuchung 11th Manipur Legislative Assembly Election a Congress Government in Sadar Hills a kon’a MLA 3 akaidoh leh district pilhing hisah ding ahi tia anasei chu JAC injong mipi thalheng’a nopna ananei jal a kaidoh teiding’a pan anakila ahin koi kiloikhomna douna (against) a na kitong aum khapon KNF kiloikhomna toh kihetkhel tona ding jong aumpoi ati.

Kakitetpi candidate hon phungle chang chule kiloikhomna minpan’a election kaitei ding agot’u ahin kenvang Congress party a kon’a kaitei ding kagot a kakihabol ahin phung le chang chule organization toh kihetkhel tona ding ima aumpoi tinjong aseiye. Election hi Pathen leh mipi deisah dungjui a free and fair tah a bolding tihi kana deipen ahi ati.

Alangkhat a KNF Joint Secretary & Defence PRO Helien Kipgen in election kaidoh teina ding’a thingnoi kiloikhomna aphudoh ahi tia ngohna einei chu ken ima kahe phapon kakikumna jong aumpoi tin Ngamthang Haokip in suhthengna aneina ban’ah politics kiti hi phungle chang chule kiloikhomna hotoh akisamkaina aumpoi ati.

Keima vote eipeh jeh’a hausa upa ho a-inmun uva umthei louva lamchom chom a genthei kithohsah hojong angah ding’in MLA Ngamthang Haokip in KNF kiloikhomna hengah temna anei kit in ahi. Hitobang thu media ho’a akithethang sang’a personal a kimuto a kihoutoh mo ahipoi tinjong aseikit’in ahi.

Janhi (Apr. 28) nikho a Congress party dalha’a BJP a kalut jonghi party worker hon gamsung khantou machalna ding chule Kuki society ding’a aphachom boldoh theina lampi aumtheina ding’a adeisah jal uva BJP join kabol ahi tinjong Saitu A/C MLA Ngamthang Haokip in aseikit in ahi.

“Sorkar natoh jouse hi mipi natoh ahi’n, sorkar in sum asuhlut jouse jong mipi sum ahi: IFCD le YAS Minister Letpao Haokip

Imphal, Apr. 29 (DIPR): “Sorkar natoh jouse hi mipi natoh ahi’n, sorkar in sum asuhlut jouse jong mipi sum ahi. Sorkar hi mipi a ahi” tin IFCD le YAS Minister Letpao Haokip in gamsung’a cheng mipi ho tilkhouna aneiyin ahi. Mipi hon aboina le agentheinaho’u sorkar heng’a pohlut ding akiphatlamlouna ding’uva tilkhouna aneina’a Letpao Haokip in tuni chandel  district sung’a um M.Munpi vangkho’a Kuki Chiefs’ Assocation (KCA) toh akihoulimna ‘a hiche thu hi asei ahi.

Mipi in sorkar hi amaho’a ahidan ahetthem loulaise’a khantouna umtheilou ding ahi. Jat le nam ahilou le phung le chang kikah’a kiboina ho hi khantou machalna sutang pipen khat ahi’n, mipi in jong hitobang thilho hi akikangsepi ding’uvin temna kaneiye tin Letpao Haokip in kinguon a chun aseiye.

Mipi ding’a sorkar in abol welfare scheme ho jong beneficiary ho’n lhingset’a amutheina ding’uva pan kalahding chuleh  mipi in jong welfare scheme ho phatah’a achelhah theina ding’a sorkar atosot’u ngai ahi. District administration in jong khentum umlouva gamsung’a cheng mipi jouse chanvou kibangchet’a apeh ding in Letpao in temna aneiyin ahi.

Tuni kinguon’a chun haosa kiloikhom ho le Kuki Women Human Rights, Chandel  in Minister pa chu kipa thilpeh tampi le memorandum khatcheh ape’uvin ahi.Minister pa chu Langching, Sugnu Zou veng, Sugnu Tribal le mun phabep a mipi in loupitah in ana liem’uvin ahi.  Minister pa chu Deputy Commissioner, Chandel District Krishna Kumar, District Level Officer ho,  PHED le IFCD Engineer ho chuleh Chief Engineer (IFCD) Ksh.Pritam Singh in akilhonpi’uvin ahi.

Health minister L Jayantakumar in Moreh a health facility kisemhoi ding ahi ti’a sei

Imphal, Apr.  29 (DIPR): State Health Minister L.Jayantakumar Singh in tuni Trade Centre, Moreh a CSO ho toh kihoulimna aneina’a chun Manipur gamsung adeh’a, Moreh  sung’a health sector kisemhoi be ding ahi tin aseiye. Chuleh CSO ho toh Moreh gamsung’a health services semhoi ahitheina ding in giltah in lunggel aseikhom’uvin ahi.

Moreh a kon natna jat chom chom suhbei ahitheina ding’a hi mipi in sorkar atosot ngai ahi. Sorkar hin moreh khopi sung’a natna jat chom chom ho suhbeina ding’a lunggel seinom CSO ho ding in kot akihong jing’e tin L.Jayantakumar in kihoulimna’a chun aseiye. Tuni kihoulimna’a chun ACODOM, MCM, HTC, KSO, Tammil Sangam Moreh, Muslim, Nepali le community leader phabep in pan ala’uve.

Kihoulimna chelhah masang chun Minister pa chun Khudengthabi vangkho’a 50 bedded Ayush Hospital kisahna ding mun aga velha in ahi. Ayush Hospital kisahna ding mun avetlhah jou chun Tengnoupal PHC le Moreh Hospital agavil in asung’a natong staff ho to jong kihoulimna aneiyin ahi. Health Minister p a chu Director Health and Family Welfare le health department official hon akilhonpi’uvin ahi.

Raja Goukhothang Guite Statue hondoh hita

B.Lalboi Gangte

CCpur. Apr. 29 (ET) :  Akhang’a mang thei talou ding leh thusim ah um jing ding in Thangkhosei Guite, Chief of G.Tonjang Village in achenna kho mun’a Raja Goukhothang Guite Statue( Lim kisemthu Song) atundoh chu jotheng ahitoh kilhon’a Tuni jinglam nidan 10:30 in hondoh nakin aum in ahi.

Hiche kin’a Phat kipat taona Henkholun Doungel, Chief of Saiheijang Village in amang in, chuleh ahungkhom ho vaidon na thusei na, Rev. G.Haukhomang Guite Chairman Guite Innpi in amang in ahi.

Chuleh Raja Goukhothang Guite, Statue hondoh na Guite Innpi Pauminthang Guite, Lamjang pa in aneiyin ahi, chuleh Upa. Thangchinlian Guite Senior Adviser, Guite Innpi in pathen heng’a lhandoh na kin aneiyin, hotoh kilhon’a ama geldoh naleh Jana salam bohna anei jou toh kilhon’a Innpi hojouse in pahvui pehna jong aneiyuvin ahi.

Thangkhosei Guite G.Tonjang Haosa pun ahoulim na ah;  hiche Raja Goukhothang Guite Statue kabol hi Guite kahi jeh’a kabol hilou Songthu chapa kahi jeh’a thusim bei nalou ding’a kabol joh ahin, chuleh khang thu kisut nadung jui’a Songthu chapa Lamjang te mi upa kahi jeh uva, thusim luiho suhbei ahi nalou dia hiche thusim ahin jing nadia kibol ahi ati.

Chuleh Gaal hang (L) Raja Goukhothang Guite hi Manipur Contingent Force, lamkai Maj. Gen. Nuthall  in 11th March 1872 ah Songkul ah akhumlut’a 30 April 1872 ah Sana Konnung, Imphal  ahinkho anabei ahi .  Raja Goukhothang Guite hiche songkul alut nikho’a alut khompi  Songkul sung’a thiden ho chu Thangtonglal Valte, Pumthawng Valte, Liankhojam Guite leh Awtngul Samte ho chengse ahin, Songthu  in ana hin chate ho chu Guite, Thangpi, Sattawng, Samte, Neirong ahi, tulai adia Thadou, Kom, Paite, Sailo, Sukte, Samte, Zou, Vaiphei, Gangte, Hmar ho ahi ati. Songthu te chedan a hi;  Guite Innpi ahileh Lamjangpa ahin, Doungel Innpi ahileh Aisan pa, Kipgen innpi  ahileh Leikot pa, Haokip innpi ahi leh Chasat pa, Sitlhou Innpi ahi leh Jampi pa, Chongloi Innpi ahi leh Jangnoipa, Hangsing Innpi ahi leh Vongjang Pa, Singsit Innpi pa ahileh Bombal pa, Sailo Innpi ahi leh Champhai pa ahi ati, Chuleh Songthu apenpi asopi te ho chu, Songthu, Songja, Songkip, Zahawng, Hangmi, Songhen, Sonmang, Khawngthep, Thangtawl, Thangthurip leh Chinhil hocheng ahi.

Thangkhosei Guite in kipa vetsah nan, Khang guithu hinsut’a sopi te hojouse hin kaikhom  a pan hinla PS Haokip President KNO Memento khat ape’n chuleh Thanglianpao Guite, President ZRO/ZRA jong ape’n ahi.  Innpi ho Aisan pa, Leikot pa, Chasat Pa, Jampi Pa, Jangnoi pa, Vongjang Pa, Bombal Pa, Champhai Pa, ho heng’a jong Memento khatcheh  ape in ahi.

Hiche holah’a boina nei aum jeh in ahung lha theilou aum jong in, innsung miten alah peh uvin ahi.

Hiche phatsung’a Guite Innpi pa, Doungel Innpi, Kipgen Innpi, Haokip Innpi, Sitlhou Innpi, Chongloi-Hangsing Innpi, Khuptong-Valte Innpi, Tongsing Innpi, Ngaihte Innpi, Hmar Innpi, Vaiphei Innpi, Gangte Innpi, Zou Innpi, Hangmi Innpi, Mizo Innpi hon thusei na anei uvin, phatkhum kha naleh ankoung sokhom na Taona Rev. Jangkholam Doungel, Chief of Kotsohoi Village in amang in ahi.

Ukhrul district lampi kisem jing lai mipi ten chomkhat’a ding’a natoh khah’u

Imphal, Apr. 29: Lampi hoi leh lampi pha inei thei nading uvin lampi sem na ding in Ministry of Road Transport and Highway in Manipur state sung’a ding in 2015 kum chun  115 km asao (Dungrei Junction) Ukhrul via Toloi to Tadubi lampi NH-102(A) sem nading in dangka core 1,600 sanctioned anabol in ahi. Hiche lampi ho hi National Highways and Infrastructure Development Corporation vet kol nanoi in anasem uvin ahi. Lampi hi mipi te ding nga hin na lampi ahitoh kilhon in lampi hoi hin khantou najong ahin poh lut ding chunaban najong economic lampang jong ahin hoisah thei ahi jeh in lampi ho hi semhoi ding hi athupen jong ahi. Hiche mun kom vel’a cheng mipi hon lampi hoi lou jeh in  hahsat na tamtah atoh gam tao vin ahi. Hiche toh kilhon chun Ukhrul district,Civil Society Organisation in contactor hon construction norms ho dung jui’a na atoh lou jeh un lampi kisem ban ho asem sah tapou vin ahi.

Social media dung’a video ahung kilha thang toh kilhon in hiche lampi’a black topping asadan (thickness) chutoh MoRD specifications for Rural Roads in asei dan/guideline abol utoh akibang poi tin mipi ten alunglhai lou nao aphongdoh kit un ahi. Civil society member hon higher authorities hon hiche chung chang ahung vet toh ding uvin temna anei’u toh kilhon in hiche chung chang suh lhap ma aum nathei ding in Civil society member leh contractor hon kihou khom nading nikho ana kitep taovin ahi.

TKSU-GHQ lamkai thah kilhengdoh hon kihahselna nei

B.Lalboi Gangte

CCpur. Apr. 29 (ET):   Thadou-Kuki Students Union, Manipur General Headquarter, in Kum 2017 akipat 2019 sung’a vaipo ding lamkai kilhenna anei utoh kilhon’a tuni nilhah lang nidan 1:00 in TKSU Administrative Office, Tuibong mun’a  lamkai lui ho leh athah ho kikhut lheh naleh lamkai thah hon kihahselna kin anei uvin ahi.

TKSU General HQ  2017-19 sung’a vaipo ding  lamkai thah kilhendoh ho chu ahile; Lunkhohao Haokip-President, Thangkhohao- V/President.(Adm), Hemang Haokip-V/P External, Doujathang Lhungdim-General Secretary, Thangboi Haokip – Gen. Secy (External) Lelien Kipgen – Assistant Secretary, Mangminlen Touthan – Finance Secretary, Kakai Doungel-  Education Secretary, Seigoulen Chongloi – Secretary Organisation, Lenboi Haokip – Development Secretary, Lunminlal Haokip – Secretary Social & Culture,  John Lucas – Asst. Secy. Social&Culture, Paotinchon Singson – Secretary Literature & Statistic, Thenthang Haokip  – Secretary Magazine, Lilim Haokip – Secretary Human  Resource & Environment, Khaiminthang Lhanghal –  Information & Publicity, Thangboi Haokip – Secretary Games& Sports, Hoineivah Haokip – Secretary Women’s Wing le Haominthang Haokip – Asst. Seretary Organisation, chengse ahiuvin, akilhengdoh lamkai thah  ho chu  Vice President KIC(Admn) Letpu Haokip in phondoh na aneiyin ahi.  Hitoh kilhon’a Letpu Haokip  in kihahsel na jong ana neisah paipaiyin ahi.Rev.Dr. Nguljathang Khongsai in pathen heng’a vangthum peh na aneiyin,

President Lui Lalkhohao Chongloi in injong lamkai thah kilhendoh ho akipapi nathu aphongdoh in ahi.

IFCD Minister Letpao Haokip in Pumlenpat/Khoidumpat vilna nei

Imphal, Apr.29 (DIPR): Tuni (Apr. 29) chun IFCD Minister Letpao Haokip leh Hiyanglam AC MLA Dr. Radheshyam Yumnam in Pumlenpat leh Khoidumpat vilna aganei lhon in ahi. Twi lonna ding akisuhlou jeh in chuhlai leh Pumlenpat leh Khoidumpat a um fishery farm kibol hojong twi in achup gam jitai tin MLA Radheshyam Yumnam chun aseiye. Hiche hin loulhou hodia hahsatna ahin pohlut keu hilouvin natong theilou leuvin agum gamji tauve ati. Hiche vel lah hi phatkhat laichun allu (potato) hapotna pen munkhat in anakiseiye. Ahin chuhlai tengle twi in aban chup gamji jeh in loulhou ho kinepna hojong amang gam jitai.

Tokpaching Bamon Leikai leh Hanuman Chingjin avilchai lhon in IFCD Minister Letpao Haokip in loulhou hob hahsat gentheina atoho’u suhbeina ding’a government injong abolthei chan abolding ahi ati. Ahin department in amasatah a sum lutjat leh natoh ding jat (cost-effect ratio) kholchilna ahin neiding chuteng hiche dungjui a natoh kichelha ding ahi tinjong aseiye.

Chule akinthei lam’a hiche assembly constituency sung’a Imphal river gei baang (retaining wall) mun phabep jong kilhengdoh a kisemding ahi tinjong aseiye. Tuni Minister pa leh MLA pa chu Chief Engineer, IFCD Ksh Pritam Singh, M. Borchand Singh, EE (IFCD-III) leh engineer dang dang honjong akilhonpi uvin ahi. Chule Tuni jingkah langchun IFCD leh YAS Minister Letpao Haokip in department official hotoh Chandel district Khopijang a playground kisalai vilna ananeiye.

Constable 2013 candidate hon kiphinna bol

Imphal, April 29: All Manipur Written Test Successful Candidate of Police Constable, Male (2013) Batch member hon May nisim 10 nikho kah’a recruitment test result aphondoh diuvin thumna anei uvin ahi.

Viva voce umlou lai ahi’in, batch’a candidate hon May nisim 10 kah’a viva voce bol ding chule ni-nga sung’a result phondoh ding’a thumna aneiyu ahi. Saturday sun nidan 1.30 don’a, recruitment test’a pang candidate ho Keishampat junction’a akikhom uvin, kiphinna vetsahna in kijotna anei uvin, result aphon diuvin thumna anei uvin ahi. Keishampat lei alhun uvin, police hon alamtin uvin, Keishampat Community Hall chan ano uvin, hiche mun’a candidate hon nidan phabep toumun kiphinna abol kit uvin ahi.

“The Thadous of Manipur” kiti lekhabu kithenso

Kangpokpi, Apr.29: Tuni (Apr. 29) chun Manipur University ah “The Thadous of Manipur” kiti lekhabu khat hondohna anaum in ahi. Hiche lekhabu hi Akasha Publishing House New Delhi in publish abol ahin Dr. Ngamkhohao Haokip in ajih ahi. Dr. Ngamkhohao Haokip hi Dr. S. Radhakrishnan Post Doctorate Fellowship noiya UGC Post Doctorate Fellow khat ahi. “The Thadous of Manipur” kiti lekhabu hi aman dangka 2, 500 ahi.

Hiche lekhabu hondohna kingon a chun Prof. Dr. S. Rajen Singh, HOD, Political Science, MU leh Prof. S. Mangi Singh chu Chief Guest leh Functional President in apang lhon’e. Professor teni’n lekhabu jihpa leh simlai, Research Scholar holeh Post Doctorate Fellow ho masang’in hondohna aneilhon’e.

“The Thadous of Manipur” kiti lekhabu a hin Kuki Nation sung’a jat len lah’a pang Thadou te chonchan khanchan chule tulai kivaipoh dan hojong apang in ahi.

CALL Manipur in themjilna mun semphat nading’a Education Minister Radheshyam heng’a memorandum pelut

Imphal, Apr. 29: Coalition on advocacy for life-long learning (CALL) Manipur in Saturday nikhon Education Minister Th Radheshyam heng’a Sustainable Development Goal (SDC)-4 kitup tah’a chepi ahina ding’a point 13 lhing thumna memorandum apelut uvin ahi.

CALL Manipur in achesa April nisim 23 nikho’a kon Global Action Week for Education campaign apat’a tuni’a khumkhana aneiyu toh kilhon’a memorandum apehlut-u ahi. Memorandum hi CSO, hou thu’a kiloikhomna, nu-leh-pa, right activist, numei lamkai, khangthah chule simlai aja’a sim in soi akai ahi. Education Minister Th Radheshyam in CALL Manipur panlahna pachatna thu aseiyin chule memorandum hi Chief Minister heng’a pehlut ding’in aseiyin, gamsung’a themjilna semphat nading’a CM toh kakihou ding ahi, ati.

State sorkar in government school leh college dinmun semphat nading’a ‘draft policy’ jong asem ahi, tin aseibe’e. Chule teacher ho transfer leh posting policy thu jong aseiyin ahi. CALL Manipur in apehlut thumna point 13 holah’a elementary school’a Continous Comprehensive Evaluating (CCE), chapang kum 6-14 kikah ho compulsory enrollement bol ding, elementary school’a detention policy umsah louding, teacher ho quality training peh ding, SDG-4 kitup tah’a chepi ding, Child Labour (Prohibition and Regulation) Act, 1986 jui ding, budget 6% GDP’a kal sah ding chule National Fellowship Fund noiya simlai (differently abled) ho 3% reservation peh ding jong apang in ahi.

SEACO in CM heng’a memorandum pelut

Imphal, Apr. 29: South East Asia Cultural Organisation (SEACO) in Chief Minister Nongthombam Biren jana anei utoh kilhon in Umang Lai pathen (deitie) cule Historical Monument Act noiya historical site ho venna apeh ding’in ngehna memorandum apelut uvin ahi.

SEACO in jana vetsahna in CM thilpeh ape uvin ahi. Toukhomna’a Chief Minister N Biren in hiche thu cabinet toukhomna’a pohdoh ding chule masang’a kon anaum gamsung in ahou pathen holeh mun lui ho venna ding’a pan lahthei chan lah ding’in kitepna aneiye, tin SEACO in thuso aneiyin ahi.

Thal-choi hon ex-MLA inmun bulu

Imphal, Apr. 29: Mel hetlou thal choi hon Saturday jingkah khovah masang nidan 1.30 don in Lamshang Assembly constituency MLA anahi W Brajabidhu inmun meichang 4-5 in akap uvin ahi.

Thilso pet’a legislator lui pa inmun’a guard um ahi’in, ahin, thilsoh’a akitongkha koima aumpoi. Alangkhat’a, tuni jingkah nidan 7 don in ROP post, CI post, Lamlai mun’a bomb apohkeh in ahi. General CI post, Imphal east district’a kon km 2.5 vel’a gamlha ahi’in, thulhut dungjuiya IED hi ‘timed device’ (aphat kisemtoh’a pohkeh) ahi. Thilsoh’a akitongkha koima aumpoi.

Thilsoh chom khat’a, mel hetlou hon Tiddim Road’a kon Behiang kho’a kon km 3 vel’a gamlha Sialshi kho’a bomb asupoh uvin ahi. Thulhut kimu chan in akitongkha aumpoi.

Textile Minister Biswajit in MSME noiya project thum be

Imphal, Apr. 29 : Textiles, Commerce and Industries  Minister Thongam Biswajit Singh in Manipur Ministry noiya gamsung’a tohmun neilou atam jeh’a boina suhlhap theina ding’a scheme leh project apeh be ding’in Union Micro, Small and Medium Enterprises Kalraj Mishra heng’a aseiyin ahi.

Kalraj Mishra, Union Minister, MSME lamkaina’a New Delhi khopi’a Friday nikho’a State leh Union territory jouse’a kon Minister leh Principal Secretaries (MSME/Khadi/Coir) in toukhomna aneina’a asei ahi. Toukhomna’a Prof. Jagdish Mukhi, Lt. Governor, Andaman & Nicobar Islands; Rohit Bhai Patel, Minister (Gujarat); Vipul Goyal, Minister (Haryana); Th. Biswajit Singh, Minister ( Manipur); H. Rohluna, Minister (Mizoram); Jogendra Behera, Minister (Odisha); Satyadev Pachauri, Minister (Uttar Pradesh) chule Madan Kaushik, Minister (Uttarakhand) in ngaidan aneiho asei uvin ahi.

Prime Minister’s Employment Generation Programme (PMEGP) thupi dan jong Th Bishwajit Singh in aseiyin, hiche chung’a phatseina hi MSME Ministry kichan ahi. Manipur gamsung’a hiche scheme noiya tohmun akisem be nading’a Ministry heng’a ngehna anei ahi. Toukhomna’a Union Minister, MSME Kalraj Mishra in aseina’a chun, “Micro, Small and Medium Enterprise Sector khantou nading’a Centre leh state kijahmat to ngai ahi”, ati. Chule natoh hol alhom theina ding’a sorkar in gelkhohna anei thu jong aseiyin ahi.

Toukhomna’a Union Ministry in state jousen department achom ahilouleh Micro, Small and Medium Enterprises (MSMEs) khantou machalna ding’a Directorate chom asem diuvin thuhilna aneiyin ahi.

World Veterinary Day 2017  kimang

 Imphal, Apr. 29  (DIPR): India chule vannoi mun chom chom’a kimang bang’in gamsung injong ‘Antimicrobial  resistance: Frome Awareness to Action’ ti thupi in Lamyanba Shanglen Auditorium, Palace Compound mun’a  ‘World Veterinary Day-2017’ amang in ahi.

Manipur State Veterinary Council in agon ahi’in, kin-gon’a Minister (MAHUD/Town Planning/Forests & Environment/Horticuture & Soil Conservation) Th Shyamkumar, Minister (Agri/Vety & AH) V Hangkhanlian, Principal secy (Vety & AH) L Lakher, IAS, Director (Vety & AH) Dr H Chaoba Singh chief guest, president chule guest of honour in apang uvin ahi. Gancha vah hon natna’a kon houidoh nading’a veterinary doctor chule expert ho’a kon kihilna alah angaiye, tin Th Shyamkumar in aseiyin ahi.

Apao theilou gancha kitup tah’a kijen hi ngailutna ahi, tin V Hangkhanlian in aseiyin, chule veterinary doctor leh expert ho sei louva anti-biotic injection peh lou ding ahi, ati. Additional Director (Public Health) Dr Kh Sasheekumar Mangang, Principal Scientist, ICA-NEH Region, Meghalaya Dr I Shakuntala Devi resource person’a apang lhon in, district jouse’a kon veterinary Officer jathum vel in pan ala uvin ahi.

JNIMS a 11 channa Workers’ Union nikho kimang

Imphal, Apr. 29 (DIPR): Tuni (Apr. 29) chun Jawaharlal Nehru Institute of Medical Sciences (JNIMS) ah 11 channa Workers’ Union Manipur (WUM) kiphudohna kingon anakimang in ahi. Hiche a chun Th. Shyamkumar, Minister of MAHUD, Town Planning, Forest & Environment, Horticulture and Soil Conservation in Chief Guest a apangtoh kilhon in hitobang kingon kimanlona jehpen chu natong khat ama le ama kitosot theiding hichun gamsung economic jong ahin hoisahbe ding ahi ati. Mi atamjo hi anatoh nauvah akitah pouvin, umchan je leh helou chule hiche tongleng min einuisat inte ti atam’e ati. Koitobang Labour Department card neihon anatoh’u toh kisaiya achandiu dol chang louva umhon jangpet a keikom a complaint nahinbol thei’u ahi ati.

Gamsung thenna lampang mano natoh kisaiya awareness programme hojong boljing ding ahi atin khopi sung suthengho jong mipiten ahithei channa kithopi ngai ahi tinjong aseiye. Hijeh chun nenboh ahiloule mi hitobang natoh ho boljeh hi jachatna a neilou ding’in gamsung khangdong ho atilkhou kit in ahi.

Minister katuh sung’a hi katohna lampang’a kitah tah’a katoh ding ahin, natoh danjong shift a khel a ima aboi umlouna ding ngaito ding ahi ati.

Alangkhat a government school a kai simlai ho phatchomna ding’in vengsung meira paibi hon pan hatah a alah diuvin temna aneiyin amahon pan alah uva aboldiu dol phate’a abol teng’u le government school ho’a simlai hojong hung kibe ding chule khantouna jong umding ahi tinjong aseiye.

Tuni kingon a chun WUM a member ana mollemsa ho pahcha lhanna aneiyuvin union sung’a atohding dol phate’a dongho kipaman hopdohna jong aneiyuvin ahi. Kingon a chun Professor Deben Laishram, Director JNIMS; Keithellakpam London, President Workers’ Union Manipur chule Mutum Churamani, President LOUSAL  hojong apang’uve.

SSA/IED noiya Disability Certificate kihom doh

Ccpur, Apr. 29 : Sarva shiksha Abhiyan (SSA) ,Inclusive Education for Disabled (IED) noiyah 29th April, 2017 nilhah nidan 1:30 chun golbanglou ho’a ding in Disability Certificate hop doh na ZEO Office, Hill Town mun ah a um in ahi. Disability Certificate hi Hearing Impairedment a mi 2 leh Mentally Retarded a mi 36 ho heng’ah hopdoh in aum in, Pakashsana, DI, Samulamlan in Certificate ho pehdoh na aneiyin ahi. Disability Certificate hi District Medical Board, Ccpur in apeh ahi.

Alangkhat ah, Ccpur dist. sung’a ZEO noiya Private leh Govt. School a Class VIII simlai ho last date of Registration 30th April, 2017 ahi toh kilhon’a concerned authority in hiche nikho a hi regiatration bol cheh ding in ZEO, Ccpur in hetsah na aneiyin ahi. Director of Education thupeh na bang’a Private leh Govt. School akai Class 1 apat achung lang simlai ho Adhar Card Xerox copy ZEO Office a Concerned DI ho kom a pelut ding in jong hetsah na aneiyin ahi.

Gamsung mun chom chom’a bomb 2 pohkeh

Imphal, Apr. 29: Saturday  (April 29) jingkah nidan 7 vel chun  thingnoi hon Imphal East district sung’a um Nongren vangkho’a um BSF camp’a bomb ana supoh’uvin ahi. BSF personnel hon thingnoi ho chu ana lethuh’uvin ahinlah khatcha ana mandoh joutapo’uvin ahi. Thilsoh kichai chun State le Central forces hon combing operation ana bol’uvin ahi. Thilsoh hi koipen kiloikhom in abol ahi ding hetchen ahi naipoi.

Thilsoh dangkhat’a chun Behang Boundary pillar, Churachandpur district toh kinaicha’a um Silshi vangkho’a bomb khat ana pohkeh in ahi. Thilsoh’a chun athi amang chuleh akisukha aumpoi. Thilso na mun chu police hon ana dellut’uvin ahi. Bomb chu koipen kiloikhom in asuhpoh ahiding hetchen ahi naipoi.

Shyamkumar in Lamlong Kailhang sahna ding natoh hondohna nei

Imphal, Apr. 29 (DIPR): Th. Shyamkumar, Minister MAHUD, Town Planning, Forest & Environment, Horticulture and Soil Conservation in tuni chun Lamlong Bazat a Khurai Lamlong Keithel sahpatna ding in In-ning songphuna aneiyin ahi. Manipur sorkar hin CM N.Biren Singh lamkaina’a modern market place sahdoh ding kideisah ahi’n, hiche market hi ahung kisahdoh jouteng le Imphal East sung’a chengho keu hilouva thinglhang a pat sumkolveiya hung ho ding’a mun kiliemtah khat hiding ahi tin aseiyin ahi.

Lamlong kailhang hi masang’a pat  an-chang a kiveiho tamna mun ahijeh in anitin in mi tampi in ajuon jing in ahi. Chuleh chele vahle ho le sumkolvei hon bailamtah’a kailhang ajuot theina ding’uva foot bridge khat jong kisemdoh ding ahi. Kailhang semdohna ding’a sum le pai hi state le centre in 10:90 ration a apohdoh ding ahi tin jong aseiye.

L.Sushindro Meitei, Parliamentary Secretary (Home) -MLA Khurai A/C in kinguon’a ahoulimna a chun mipi hon sorkar thah natoh ho asuhml lou ding’uva le tosotna apeh diuvin temna aneiyin ahi. Kilhang thah kisadoh’a hi thinglhang miho touna ding mun jong kipeding ahi tin aseiye. Bandh le strike aum tengle kailhang’a thiljoh nupi ho ageden theina ding’u mun khat jong sorkar in angaituo ding in temna aneiyin ahi. Aman aseibena’a chun hiche kailhang hin thinglhang le phaicham miho kikah’a kiguijopna hoitah khat ahin semdoh ding ahi ati. Chuleh  Bandhan Bank toh kitho’a kailhang sung’a thiljoh ho Dk.20,000 cheh loan’a kipeding’u ahi tin jong aseiye.

Kinguon’a chun local club, Coordinating Body Khurai, meira paibi ho le working class hon  Chief Guest palai hina in Chief Minister heng’a memorandum khat apelut’uvin ahi. Memoran a chu Ekou, Yengkhuman, Guwaltapi  le Itham vangkho’a smart village khatcheh semdoh ahina ding’a ngehna thu kisun ahi.

Lamlong Keithal Phambi Apunba Lup le tribal street vendor hon kinguon’a panla milen milal ho chu kipathilpeh khatcheh ape’uvin ahi. Kinguon’a chun PDA Chairman, T.Robindro; N. Indrajit Singh, Parliamentary Secreary, MAHUD, Manipur le constituency mipi phabep in pan ala’uvin ahi.

Thusoh Lahchom

SAHILCA

Paotong Doungel, General Secretary, Sadar Hills Chiefs’Association (SAHILCA) in thuso ahinbolna ah tu le tua Sadar Hills Kangpokpi District sung’a Kuki Inpi Election kibol hi Haosa Inpi hotoh kihettona leh kidohtona umlouva Election kibol ahijeh in gamsung Haosa hon aki pompoi tin tuni (Apr. 29) chun lekhathot ahinbol in ahi.

PTC

Paite Tribe Council in 29th April, 2017 nilhah nidan 1:00 apat chun PTC-GHQ Conference Hall, Hiangtam Lamka mun’ah Central Working Committee (CWC) a 19-veina toukhom na leh MLA 2; Vungzagin Valte, MLA, Thanlon, Chairman, MTDC leh V. Hangkhanlian, MLA, Ccpur, Minister, Agri. Vety. & Animal Husbandary ho lahlut na aum in ahi. V. Hangkhanlian in kingon dang aneijeh in ahung pang thei pon ahi. Ama ni Pathien a vangthum peh na Rev. S. Vung Minthang, General Secy., EBC in aneiyin ahi.

Ju tamtah kiman

Moirang Ibudhou Thangjing Haraoba festival anaitoh kilhon’a ‘anti-liquor drive’ abolna uvin Moirang mun chom chom’a IMFL leh gamsung’a kisem ju tamtah akiman in ahi. Drive hi Bishnupur police in SDPO Bishnupur lamkaina’a Bishnupur commando ho tosotna’a abol ahi.

Thi-long kimu

Sishu Nistha Niketan, Kwakeithel Mayaikoibi nullah kom’a pasal khat thi-long akimu in ahi. Thulhut dungjuiya, athi pa hi Kwakeithel Thounaojam Leirak’a cheng ahi’in, jukham val jeh’a hiche mun’a khelut’a thi hiding’a ginmo ahi.

Sachung Ki a kivei mi 6 kiman

Bargaht Police in Saturday ni chun Nagaon bypass a kon Sachung ki a kivei migup amandoh’uvina hi. Amaho chu Baharul Islam, Zubed Ali, Abdul Matlib, Sahidul Rahman, Arun Saikia le Ranjan Saikia ahiu’ve.Police in akimandoh ho thudoh aneina’a chun Assam sung’a international poaching racket chungthu a thilpoimo tampi ahetdohbe in ahi. Operation chu Additional SP Sanjib Saikia le DSP Samiran Baishya in alamkai lhon ahi.

Bomb pohkeh

Tuni chun Lamlai Police Outpost maiya bomb khat ana pohkeh in ahi. Police in aseidan in bomb chu low intensity improvised explosive device ( IED) ahi ati. Thilsoh’a chun akisukha le athi amang vang ana umpoi.

World Veterinary Day

 ‘World Veterinary Day’ ahitoh kilhon in tuni (Apr. 29) chun Kangpokpi district sung Hengbung kho a Krishi Vigyan Kendra (KVK)-Sylvan ah hiche nikho nitna king anaum in ahi. Kin sung’a chun Dr. N. Muhindro Singh in anti-rabbies vaccination manbai in uicha 60 val anakap e.

Editorial

A society caught in time warp

Two distinctly correlated startling events that shook the foundation of human civilization unfolded in the State in the past week. The first event is the detestable ‘gang-rape’ of two minors by some ‘devils’ im the guise of humans. As is the wont here, protests were launched to condemn the beastly act of gang-raping the two minors. We are aware that such incidents of gang-rape were not new here. Memories of such incidents in the past like the gang-rape of a chilly trader from Tamenglong district some five years back in Bishnupur district were too fresh in the mind to be forgotten. Ask any child/women’s rights activists and you come to know how hard in the State is to get accurate statistics about incidents of rape or molestation. We have had enough nightmares of such incidents outside and inside the State. The involvement of State and non-state actors in such heinous crimes had been major issues at one point of time or the others. The recent Phaknung gang-rape incident will just remain another incident of crime against women in the State. Manipur was left paralysed for few weeks in protest against the ‘molestation’ of a celebrity in December 2012. If we may add, the precious live of a scribe on duty was lost while covering the agitation. The intensity of the agitation was so high that many students and employees who were on their way home for year-end vacation were forced to return to their respective places without even reaching their destinies. While some of the victims in the long lists of such incidents get justice, most of the victims are awaiting justice besides living a live on their shadow. In all fairness, the backlash of the gang-rape incident this time is negligible as compared to others. Maybe this is due to the fact that no communal tinge is given here. But the same ghost is continuing to haunt us.

          More astonishing episode, rather dangerous, than the rape that surfaced in the backdrop of the rape incident is the unwavering attempt made by some groups to justify the gang-rape of the two minors. The narrative sold by these protagonists is that the minors were out in the street at such odd hours thus inviting rape. Not surprisingly, these groups are ‘women’ who cloaked the garments of ‘meira paibis.’ These women are ‘frontrunners’ of the society who are ready to render services when called for. Whether they have any buyer to their outdated tale is another case, their audacity to justify the gang-rape of the minor had already sent a very wrong signal to all concerns. Insofar as humanity is concerned, they are more detestable than the perpetrators of the crime by any yardsticks. We can only wish that it’s not them or their daughters/sisters who find themselves raped in the near future by the ‘devils’ on whose behalf they are speaking now boldly about. If these two abhorrent cases are of any reflection of our society, then we can say we are caught in time warp, leaving our women and young girls vulnerable. Here we must also underline the need about our culture, mindset and values to go through a revolutionary transformation.

ET Taona

Van’a um kapau pathen politics lam hihen nungah gollhang kidei kingai nopsahna lam hileh manbai tah kahilouna diu chuleh mi noppal thinna ho kahilouna diuvin iti hinkho kaman diuham neihin hil diuvin kahung tao uve, amen.