ET April 3, 2017 News ( Local, Regional, National, Thusoh Lahchom, Editorial,...

ET April 3, 2017 News ( Local, Regional, National, Thusoh Lahchom, Editorial, Blankfire)

555
0
SHARE

Mun phabep’a twi len jing nalai, vadung twi khang cheh cheh

Imphal, Apr. 2: Achesa ni phabep go tanglouva ajuh jeh in Imphal khopi’a vadung twi phabep akhang cheh cheh in ahi

Nen kipai thang leh nullah kisuhtheng/kitup lou jeh in mun phabep’a jong twi akivei den in ahi. Imphal vadung, Nambul vadung, Kongba vadung leh Iril vadung twi akhangcheh cheh in ahi. Imphal khopi mun chom chom Lamphel, Kakwa bazaar, Canchipur, Keishampat Dhobi Machu Leirak, Singjamei Waikhom leikai, Sagolband Moirang Leirak, Wangkhei Angom Leikai, Porompat, Nongmeibung, Keishampat leh mu dang dang’a mihem thilbol jeh’a twi kivei den’a, twi len ahi.

Alangkhat’a, Thongju Part 1 leh 2’a jong twi alen in ahi. Thongju Uniteed Flood Fighting Committee (TUFFC) hi Thongju constituency hopsung’a um club 12kipunkhomna ahi’in, janhi nilhah’a kon twi lon doh theina ding’a nullah ho suhthengna natoh apat-u ahitai. Nen-leh-boh akipai thang jeh’a twi lonna ding’a kisem ho kiting soh’a, mihem mitmo jeh’a tu kahlah gojuh sung’a hi mun phabep’a twi kivei den’a twi len ahi. Works Minister leh Thongju MLA Th Bishwajit leh Thongju Part 2 kithopina’a TUFFC in vadung asutheng uvin ahi.

ICAR, Lamphelpat’a jong 65 millimetre go aju in, nikho phabep sung’a go hajuh ding’in aseibe uvin ahi. Kwakeithel Moirang Purel, Keishamthong constituency’a twilen in atohkhah ho anchang leh hawai thil ho janhi nikho’a kon Health and Family Welfare Minister L Jayentakumar  vetsuina’a kihom pan ahitai.

DC Ccpur in NID/IPPI 2nd Round hongdoh

Lien S. Gangte

Ccpur, Apr. 2: Intensive Pulse Polio Immunization (NID/IPPI) 2nd Round chu District Task Force-Immunization (DTF-I), Ccpur lamkai na in Ccpur District sung’a ding in hondoh na 2nd April jinglam nidan 7:00 chun District Immunization Office (DIO) Compound sung ah aum in ahi. R. Sudhan, IAS, DC Ccpur in Chief Guest hina toh NID/IPPI 2017 Second Round hondoh na aneiyin ahi. NID/IPPI 2017 2nd Round hi 2nd April, 2017 apat 4th April sung hi ding ahi. R. Sudhan, IAS, DC, Ccpur in IPPI lolhing tah a achelhah ding adei dan thu aseiyin, Dr. Kim Simte, CMO, Churachandpur in Intensified Pulse Polio Immunization (IPPI) toh kisai ah holim na aneiyin, Dr. VC Pau Tonsing, DFWO, Churachandpur in kipa thusei na aneiyin ahi. Chuleh, DC, Ccpur; DFWO, Ccpur leh CMO, Ccpur ho mapui na in Chapang ho Polio lou adon sah uvin ahi.

Chuleh, 2nd April, 2017 IPPI Second Round kipat nikho’n District Task Force-Immunization (DTF-I) team ho’n khosung leh Veng chom chom achon uvin Polio Booth 448 ho’ah, Sectoral Supervisor mi 90, Divisional Supervisor mi 20 leh Vaccinator mi 1792 leh ASHA leh Anganwadi Workers ho’n Jengnat dalna Polio lou chapang kum 5 noilang ho adon sah uvin ahi. NID/IPPI 2nd Round a hi’n State Govt in Ccpur district a ding in target 35235 agon peh in hijong leh Ccpur District in target 36172  achieve ding in a kigong in ahi. Tuchung NID/IPPI 2nd Round a hi Polio lou Oral Polio Vaccine vial agom a 2235 a kimang cha’n ahi.

Chuleh, Town area sung leh Thinglhang a um chapang kum 5 noilang ho’n Jeng nat dal na Polio lou hi adon sohkei thei na ding uva Khosung haosa, Civil Society Organization chom chom, School oija chuleh Minu-mipa ho’n DTF-I team ho kithopi cheh ding in Dr. VC. Pau, DFWO, Ccpur ngeh na aneiyin ahi. IPPI 2nd Round nikho sung’a Polio lou don khalou ho’n District Hospital mai’a um District Immunization Office (DIO) adon thei diu  ahi. Polio lou donsah ding’a kinganse, DTF-I team ho’n Khosung leh Vengsung achoh khah lou aum leh DC Ccpur, DIO leh CMO ho’a report bol thei ahi tinjong DFWO chun aseiyin ahi. Intensive Pulse Polio Immunization (IPPI) First Round a Polio lou andon hon jong IPPI 2nd Round sung’a Polio lou adon kit diu ahi.

TKSU Education Cell in ki houkhomna le maban a panlah ding dan tohguon nei

Imphal, Apr. 2: Tuni (Apr. 2) chun Thadou-Kuki Students’ Union General HeadQuater noiya kiboldoh TKSU-Educational Cell ho in TKSU-Adm. Office KIC Complex Churachandpur a kihoukhomna anei uvin mabanna Society sunga khantou machalna dingin tohgon hojong aseilha uvin ahi.

Hiche’a kiseiho lah’a hetthei hochu TKSU Education Cell makaina a Class X & XII Jouva Career Guide dinga Booklet khat Semdoh ding a phatsahna anei’u toh kilhonn’a Thadou-Kuki pao leh English a Tukum sung ngeiya boldoh dingin kihoulhahna aneiyuve.

Ccpur Sunga Auto Association in Bahara chungchang thu’a Student Concession akoi tahlou hi phamo asahdan’u jong phondohna anei uve.

Hetthei khat chu tuni ki houkhomna a hi TKSU Branch tin a Educational Cell lamkai dinga kilhengdoh honbou ki houkhomna anei u ahijeh in GHQ President/Secretary kijao hih jongle amaho tohgon thil ngaito jouse jong aki tosot jinge tin Doujathang Lhungdim, Gen. Secretary TKSU-GHQ in Thuso miho hengah aseiyin ahi. (Nitinthusoh)

Northeast’a go ju jom nalai ding’a Met department in sei

Imphal, Apr. 2: Meteorological department, Guwahati in asei dungjuiya Northeast India gamkaiya ho ju jom jing nalai ding ahi, tin aseiyin ahi.

North east tilou India gamsung khopi chom chom’a nisat kisei jing ahi’in, ahin, eiho gam’a go ju jom nalai ding’in weather forecast in aseiyin ahi. April nisim 1-3 nikho sung Arunachal Pradesh mun phabep’a go hattah’a ju ding hiche jou, April nisim 4 nikho leh go juh oljep ding chule nisim 5 nileh mun phabep’a go nalai ding ahi.

April 1-4 sung’a Assam leh Meghalaya mun phabep’a go hattah’a ju ding, hiche jouteng leh Assam leh Meghalaya’a go juh oljep ding ahi. Nagaland, Manipur, Mizoram leh Tripura (NMMT) gam’a April nisim 1 nikho leh mun tamtah’a go hattah ju ding’a ana kisei ahi’in, April nisim 5 nikholeh leh go juh oljep ding (light-moderate rainfall) ‘a kisei ahi.

April nisim 3 nikholeh Assam leh Meghalaya mun phabep’a go hat ding ahi’in, chule nisim 4 nikho leh Arunachal Pradesh gam’a go hattah ju ding’a kisei ahi.

2nd Round Intensified Pulse Polio Immunization programme hondoh hita

Imphal, Apr. 2 (DIPR) : Tuni  (April 20) chun Conference Hall, Family Welfare Services, Imphal a 2nd Round Intensified Pulse Polio Immunization (IPPI) hondohna ana um in ahi. Kinguon chu Family Welfare Services le State Health Society, Manipur in kiguom’a aguon lhon ahi.

Tuni kinguon a chun Health and Family Welfare Service’s  Minister L.Jayentakumar  Jin-gun in apang in  Parliamentary Secretary Soibam Subhas Jin-ja’um in apang in chuleh Commissioner P.K.Singh kin neipa in apang in ahi.

Tuni kinguon a panla VIP ho le dignitary ho chun kinguon’a panla chapang kum nga noilam ho Oral Polio Vaccination adonsah’uvin ahi.

Tuni kinguon a chun 2nd round IPPI le Mission Indradhanush 3rd Round IC phase chungchang’a  ‘Media Sentitisation Workshop’ khat jong ana chelha in ahi. Nodal Officer Immunization Th.Nandakishwor in aseidan in  Mission Indradhanush 3rd Round, IV phase hi April nisim 7, 2017 a kpan ding nikho sagi chelha ding ahi ati. Mission Indradhanush 3rd Round phase IV  hin Tamenglong, Churachandpur, Ukhrul le Chandel district ahuop ding ahi. Mission Indradhanush hi chapang 2593 vel le naovop nupi 1267 vel in aphatchompi ding’u ahi tinTh.Nandakishwor in aseiye.

Mission Indradhanush noiya hi vaccine mangcha’a kivendohna thei natna sagi (Diphtheria, Pertussis, Tetanus, Childhood Tuberculosis, Polio, Hepatitis B le Measles) suhbei na ding tohgon ahi. Kinguon kichailam chun resource person ho le thuso miho’n kihoulimna anei’uvin ahi.

Haolenphai khosung mihon state leh centre chung’a lunglhai louna thu sei

Imphal, Apr. 2: Indo-Myanmar gamgi’a um Haolenphai, Moreh khosung mihon Manipur leh centre sorkar in Manipur leh Myanmar gam teni gam leiset kichu chungchang’a pan alah dan alunglhai louna thu aseiyun, sorkar in agelkhoh poi, tin asei uvin ahi.

Gamkaiya Myanmar in thil asah pan toh kilhon’a kinel baotamna gam hi alo vah maitheiyu ahitai, tia thulamleng um ahi’in, Haolenphai kho hi Myanmar in kagam hopsung ahi, tia asei jing ahi. Gamkaiya thil sa ho (construction work bol ho) hi gamgi ngah’a pang Indian Army hon amoh vet uve, tia khosung mihon ngohna aneiyu ahi. Achesa kum ni sung’a India vaipo hon Myanmar natoh suhtang nading’a pan ima alah louvu ahi. Khosung mihon Haolenphai kho hi Myanmar khut lhung inte tia kichatna aneiyu ahi.

Hetthei khat chu achesa March nisim 3 nikho’a Myanmar Army hon khosung anokhum uva saw mill asuhset uva, thil phabep insung’a kon acom-u ahi.

Sorkar in kum 3-4 jouseh leh sum ‘security features’ khel ding’a tohgon nei

Imphal, Apr. 2: Sorkar in sum dangka 2000 leh 500 note ‘a ‘security feature’ hohi kum thum-li jouseh leh sum lhem kisem venna ding’a khel jing ding’a tohgon anei ahi.

Sum lui kisuhmang jou, achesa lha li sung’a India sum-lhem/kisem thu tamtah akimat doh jouva sorkar in tohon anei ahi. Thursday nikho’a Finance leh Home Ministry’a senior official holeh Union Home Secretary Rajiv Mehrishi panna’a toukhomna anei na uva hiche thu seikhomna aneiyu ahi. Gam khangtou (developed country) atamjo in kum 3-4 jouseh tobang’a sum ‘a kikoi security feature hohi akhel jing-u ahi, tin Home Ministry official hon tohgon tosotna thu aseiyun, chule India injong hiche policy ajui ngai ahi, ati.

CDO hon  KRA-U member khat man’u

Imphal, Apr. 2: Tuni (April nisim 2) jingkahlam nidan 7  vel’a thuguh pole ho’a kon’a thu akijah dungjuiyin Taothong Ayungba Maning Leikai  a  M. Amit Singh, MPS, Dy.SP CDO-IW , Inspector Somayo R.Shimray 2nd OC, CDO-IW   lamkaina team khat in Dr.S.Ibomcha Singh (MPS), Addl. SP (Ops) I/W vetkolna noiya operation abol’un ginmo um mikhat ana mandoh’uve tin police a kon kimu thulhut khat in aseiye.

CDO team hon spot verification abolna’uva chun akimandoh pa chun amin Chongtham Ibomcha Singh (43) s/o (L) Ch.Mani Meetei ahidan  le KRA-U active member ahidan aphongdoh’e tin thulhut chun aseiye.  Ibomcha hin 2016 a kipat’a s/s Finance in-charge Khagembam Raju Singh @ Ting (49) s/o (L) Kh.Iboyaima Singh, Keishamthong Hodam Leirak noiya kiloikhom ding’a na ahintohpan ahi.  Ibomcha Singh le Raju Singh hin February nisim 16,2017 nikho a chu Lamdeng Khunou’a um SDS Brick Field Proprieter Soibam Dhanabir Singh (70) s/o (L) S.Amuba ana kaimang lhon’a Dk.2 crore ransom anathum lhon ahi. Hiche case hi Lamphel Police a jong ana kisunlut ahi.

Geldoh thei khat chu Soibam Dhanabir Singh ni CDO I/W in 2017 February nisim 23  nikho nilhahlam nidan 4 vel’a chu Samurou a kon ana huhdoh’u ahi.

CCTV kholchil na thulhut umjou’a BJP govt in traffic light scam kholchil na thulhut neikit ta

 Imphal, April 2: CCTV camera scam kholchil na ding nga thulhut aum jou in BJP-led coalition government in traffic light scam jong kholchil nading thulhut aneikit tan ahi.

 Officials ho’a kon na thulhut kimu dan in thildang dang jong maban na kholchil na thulhut hung kinei ding ahi ajeh chu Bharatiya Janata Party (BJP) in election ding kon’a  Manipur sung neh guh chah guh kisumang ding ahi keiho party in Manipur a  Government kasem uva ahileh atibang un kholchil na anei pan taovin ahi.

Additional Chief Secretary (Home) Suresh Babu in Saturday nia asei nah’a chun member thum pan na committee khat anakisem in  hiche a member  ho chu ahileh Additional Director General of Police Pramod Ashatana, Rural Development and Panchayati Raj Secretary Sumant Singh, and Inspector General of Police Soibam Ibomcha amaho in scam ho hi khol chil na anei diu vin hetsah na aneitai. Hiche committee hin ni 15 sung a report ahin peh diu vin aseije. Hehna kimu dung jui in Manipur a um sub-standard traffic signal light ho jong nikhat cha jong manthei aumpoi ati.

Official sources thulhut a kon kimu dung jui in Imphal la mun 12 a koi ding traffic signal lights chuleh solar,battery back ups a ding dangka 1,93,75,000  deposited akibol in ahi.Hiche sum hi 2005 kum  a traffic signal lights sem nading nga deposited anakibol la 2011 kum ma ana kisem chai ahitai.Congress hon Government ana poh lai anahi toh kilhon in amahon hiche hi ahung kikoi doh teng traffic mun lah ho hoitah in anache lha tante ana tiuvin ahi.

Imphal khopi hi India gamsung a ding a traffic light system neilou ahitoh lhon in traffic police ho in jong gari tam nalah bou in aum uvin gari lhom nalah’a aum ji pouve tin BJP official hon asei uve.

Hiche toh kilhon chun  Chief Minister N. Biren Singh in Centre in thinglhang  district a marketing complexes sah nading in dangka crore 150 sanctioned ahin bol dan thu jong asei in ahi.

Manipur a highway protection force kisem doh ding ahi ti’a CM in sei

 Imphal, April 2: Chief Minister Nongthombam Biren Singh in Saturday ni’a thuso mi ho koma  asei nah’a chun India Reserve Battalion (IRB) battalions 4 highway veng tup ding’a  Centre in phal na ahin peh toh kilhon in Manipur highway ni’a(Imphal- Dimapur & Imphal- Jiribam) boi na ema um lou hel’a gari ho alhai ding thu asei in ahi.

Hiiche toh kilhon chung CM pa office mun na Transporters’ Associations lamkai hotoh akihou lim nao’a  chun  Chief Minister Nongthombam Biren Singh in aman asa tah’a Nagaland leh Assam lamkai ho akimu to pi a lampi dung nga Manipur transporters hon boi na ato jing ho suh lhap ahina ding a ngeh na anei ding ahi.

Biren Singh in asei kit nah’a chun Guwahati a kihoukhom na ding ah hin Union Home Minister Rajnath Singh jong hung pan ding ahin hiche kihoukhom nileh hin Nagaland lamkai ho toh kinop tona soi kikai toh lhon na Imphal – Dimapur lampi a boi na umtalou va  gari ho alhai tah ding jong aseije.Chuleh Transporters’ association ho kom mah  blockades jong um lou ahi in convoy ngah lou va passenger gari hinen thilpo gari ho hijong leh nom tah’a alhai diu vin asei peh in ahi.

Chief Minister Biren Singh in hiche kihoukhom nah chun Chief Secretary in jong tulai tah’a lampi’a toset aum jing toh lhon na mi 23 hinkho bei holeh akisukha ho khol chil na anei na ding in thu apen ahi.Chule Transport Commissioner honjong lamlen na kon boina aum be lou nading’a zebra crossing,traffic signs ho schools,roads diversions chuleh lam koi lah a jing’a pat akoi diu vin ahet sah tai.

FC Zalen in Annual Award Distribution Ceremony nei

Imphal, Apr. 2 : Manipur State League a team dang ho’n kimaitopi ding’a akichat pen’u FC Zalen in tuni chun officer’s quarter, Sanjenthong, Imphal’a Annual Thanksgiving Programme cum Award Distribution  Ceremony 2017 aneiyin ahi.

Kinguon a chun Hon’ble Minister (IFCD, Youth Affairs & Sports) Letpao Haokip , Saitu AC MLA Ngamthang Haokip chuleh milen milal phabep in pan ala’uve.

Kinguon a Ngamthang Haokip in ahoulimna’a chun football club khat semdohna ding le club pilhing khat sodohna ding’a sumle pai  , lungthim le tha alutdan ho  aseiyin ahi.

Jin-gun a pang Letpao Haokip, Hon’ble Minister in ahoulimna’a chun FC Zalen President Mangboi Haokip apachatna aphongdoh in ahi.

Tuni kinguon’a chun Paolenlal Khongsai in Player of the season kipaman akiasn in,  Ng.Bedeenpar Moyon in Top-Scorer kipaman akisan in chuleh  Lalminlian Vaiphei in  Best disciplined award akisan in ahi. FC Zalen a gol ngah’a ana pang Raju Lhunpu Haokip le Helun Haokip in club khantouna ding’a pan analah lhon na chung’a kipathu sei vetsahna’n Lifetime Achievement Award akisan lhon in ahi.

NSCN-IM talk team ho New Delhi juon ding’a kipandoh ta’u

Dimapur, Apr. 2: NSCN (IM) luboh Th Muivah le  Vice President Gen (Retd) Kholi le talk team member ho tuni chun Indo-Naga Political talks a panla ding in Delhi juon in ana lengdohta’uvin ahi. New Delhi juon’a alendoh masang’uva chun talk team member ho chun 38th Naga Republic Day kimanna kinguon, NSCN Council meeting le Tatar Hoho Budger Session’a pan ala’uvin ahi.

Alangkhat’a MIP a kon kimu thulhut khat in aseidan in Indo-Naga talk hi agasuo koncha ahitan, kihoulimna hi ahung kichai teng le Nagate thusim athahbeh a hung kisung ding ahi ati. Hitobang dinmun ahijeh’a Nagate jouse’n athusei alasah’u chingtheitah’a abol ding’uvin thulhut chun temna aneiye.

“Khonung ding gei gellouva thusei hi mingol ho umchan ahi. Chuleh thulamleng ho tahsan’a photlot chang’a mingol ho bang’a na moh tohlou ding ahi. Miching hon vang chingthei tah in hinkho amangji’uvin chuleh angaikham hat’uve” tin MIP thulhut chun aseiye.

Assam Rifles hon Accident toh khat ana kithopiu

Imphal, Apr. 2: Assam Rifles hon thulhut amu dungjui uvin March nisim 31, 2017 nilhah lam 1:00 vellin Chamol le Angbrasu axis kikah a Tata Sumo No. ML 05K0329 in tuoset atona a 12 Assam Rifles Unit Doctor Capt. Ashish Pandey lamkai nan anadel lut uvin akisukha hochu first aid anabol uvin chijou chun a insungmiten Imphal a aban jenbe ding in ahin kipoh taovin ahi.

Gamsung’a DigiDhan Mela hondohna um; Kikhelna hi mimal cheh’a kon hung kipan ding ahi tia CM N Biren in sei

Imphal, Apr. 2: Manipur gamsung’a digital payment chungchang’a awareness aumtheina ding’a kibol “Digi-Dhan Mela” tuni chun City Convention Centre , Imphal’a Chief Minister N.Biren Singh in hondohna aneiyin ahi.

Tuni kinguon a chun CM N.Biren Singh Jin-gun in apang in Union Minister of State (Home Affairs) Kiren Rijiju, Union Minister of State (Railways) Rajen Gohain, Deputy Chief Minister Y.Joykumar Singh, Parliamentary Secretary (Finance) Th.Satyabrata Singh chule Parliamentary Secretary (IT), Dr.Sapam Ranjan Singh Jin-ja’um in apang’uvin ahi. Kingon a chun Member of Parliament (Rajya Sabha) MC Mary Kom jong Special Guest in apang in ahi.

CM N.Biren in kinguon a ahoulimna’a  aseidan in  gamsung  ningli a cheng mimal jouse’n digital payment ipi ahi ahetthem na ding’uva awareness peh ngai ahi ati. Digital payment hin gamsung’a kon nehguh chahguh jong asuhbei ding chuleh khopi toh kigamlatah’a chengho jong banking system hopsung a ahin puilut ding ahi. Mun gamla ho’a jong bank branch le micro ATM ho hondoh ngai ahi. Prime Minister Narendra Modi lamkaina noiyin India sung’a hin kikhelna tampi ahung um’e. Ahinlah kikhelna hi mimal cheh in ama ama panmun/hitheina dungjuiya ahin chepi tengle bou lolhing ding ahi.Gamsung a (Manipur) kikhelna aumtheina ding in Centre in JNIMS sung’a lupna 100 umna Cancer hospital khat le lupna 60 umna Mental Hospital khat semdoh ding phatsahna aneitai. Healthcare services semhoina ding in union Home Ministry in mobile/helicopter ambulance service semdoh ding tohguon aneiye. Hill  district jouse’a numei ho kailhang semdohna ding le  Khuman Lampak a um Hockey le Main Stadium a flood light koina ding in Dk.150 crore sanction ahin boltai tin N.Biren in aseiye.

Union Minister of State (Home) Kiren Rijiju in  ahoulimna’a chun “Digital India” campaign hi gamsung’a kikhelna pohlutna ding’a poimo tah khat ahi tin aseiye.Manipur gamsung hi Art & Culture, kichep golseh chuleh mol le lhang hoi tah tah umna mun ahina ban’a Central government in Manipur gamsung a chengho ngaichat jouse suhbulhit na ding’a jo chan’a pan alah ding ahi tin aseiye.

Tuni kinguon a chun digital payment chungchang’a kisem video chomcha jong akap’uvin ahi. Hiche kichai chun digital lottery scheme a pachanna neiho min jong aphongdoh’uvin ahi. Lottery scheme hi NITI Aayog thupeh dungjuiya NPCI in aguon ahi. Hiche scheme kibol lona jeh pipen chu kiveina neocha cha bolhon digital payment manchahna ding’a thanopna aneithei nading’u ahi.  Kiguon a chun Slogan writing, poster Making le Jingle competition a pachanna neiho min jong aphongdoh’uvin ahi.

Tuni kinguon a chun Cabinet Minister ho le Parliamentary Secretary ho, Chief  Secretary O.Nabakishore Singh, NITI Aayog official ho  le NPCI commissioner ,IT P.K.Singh in pan ala’uvin ahi. Tuni kinguon  chun Department of Information Technology, Government of Manipur in aguon ahi.

Gundung in alhoh khangdong teni holna kin machal jing

Imphal, Apr. 2: Tahsan umtah thuso khat kimu dungjui in tuni (Apr. 2) chan hin thilong teni Kailalmon Khongsai (Joljam) leh Thanglenmang Haokip (Gamphajang) akimu naipoi akiti. Amani longdamsa holna kin a hi KKL hon amun a ahol a um mi 30 val ding  anchang – relief a kon’a apeh diu, achenadiu gari, me leh thao ho Constituency MLA  TN in atodoh ding. Khaukual haosapu lamkaina a jingleh apoh tou diu ahin, thilong teni amu kahseuva camp den diu ahi. Thukhoh dungjui a Sangaikot Area Chief Association hon avet kol diu, hilang a Line DC holeh SP, Army lang leh adang dang KIC leh a apex body hon avat jouse angaito diu ahi. (Moreh Alert)

India sung’a terror attacks a thi sang’a angaitah hon adalhah jeh’a thi jat 6 a tamjo

 New Delhi, Apr. 2: Tulai khang hin thingnoi hon gamsung asuh boi jeh’a akisukha leh athi sang in kilungset/kingai hinkho mang ho athi amang atam jotai tin kum 15 masang record evet leh mudoh thei in aum’e tin akiseije. 2001 akipat 2015 kum sung  kikah’a athi amang hi official hon khol chil na anei naovah kilungset hinkho mang  chuleh khat leh khat kitha to na’a mi 38,585 in thi na atoh tai tinjong asei bei.Goverment record dungjui in ama leh ama kithat(suicide) jong mi 79,189 alhing in chu naban in mi kikai mang jong lakh 2.6 kum 15 sung’a alhin jou dan jong aphong doh be’e.

Chu ban jom in alhom pen in mi kitha na cases 7,ama achang a kithat(suicide) cases 14 chuleh akipui mang cases 47 hiche ho cheng hi niseh’a soh jing thilsoh ahi dan jong asei bei.Data apat kimu dan in Andhra Pradesh, Uttar Pradesh, Maharashtra, Tamil Nadu and Madhya Pradesh hiche ho gam cheng hin India sung’a ding nga kitha kimat na sang pen nag am ahitai ati.Gam(state) len holeh mi tam na ah hiche thisoh hi atam jep tei jing ahi.

Professor Uma Chakravarti in asei na’a  hiche kinah kibou, khat leh khat kisuh nem na abol jing u hi kichen nalam dol ahi ten khat lel khat kihetthem to gi lou jeh ahi chuleh khat in ahet ding khat chu insung um dan leh caste chedan jong ahet ngai ahi ati.

Thusoh Lahchom

PREPAK (PRO)

Tuni (Apr. 2) chun Imphal West police commando hon nupi PREPAK (PRO) worker khat anamandoh uvin ahi. Amachu Geeta Sharma (39) d/o (L) Chandra Prasad, Moreh Premnagar Part-2 Purana Bazar a cheng ahin Imphal, Majorkhul a inn bahara a um ahi. Akiman nu hi S/S Commander Ningthi, PREPAK (PRO) khat noiya natong ahin amanuhi Imphal a kipat Moreh chule Moreh a kipat Imphal a cadre ho ding’a kai le don ho pole a pang ahi.

TSA

Tuni (Apr. 2) TSA Office, Ukhatampak, Churachandpur ah Thangminlun Haokip, President, TSA Kangvai Block lamkai na’n TSA Kangvai Block Executive Member 2 lhenbena kingon anaum in ahi. Akilhenbe Ex. Member teni chu Letminlen (Asst. Gen. Secretary) leh Jamkhanthang Tonsing (Asst Edn. & Statistics Secretary) ahilhon’e.

Gul chuh

2 Assam Rifles Medical team hon April nisim 1, 2017 nichun Gul chuh khat ana huhdoh uvin ahi. Gul chuh pa chu Mala (40) Ukhongsang, Thoubal District a cheng ahin alouche na a Gul in ahinchuh khah a 2 Assam Rifles Unit Hospital ahinlhut u ahi. Unit Hospital Assam Rifles hon First aid abol jouvun amapa chu District Hospital, Thoubal a referred abol taovin ahi. Assam Rifles medical team hon hitobang napha atoh u hi mihem hinkho ahuhdoh keu hilouva Ukhongsang khomiten tahsanna lentah anei uvin ahi.

Iroisemba Zoo

Tulai guo ahajuh jeh in Imphal, Iroisemba Zoo a kikoi saampi (python) khat akikhumna a kipat akithol doh in hichetoh kilhon chun Forest Department in mipite chingthei tah a akhosat diuvin hetsahna aneiyuvin ahi.

Assam Rifles

Assam Rifles Civic Action Project noiya 27 Assam Rifles hon march nisim 30, 2017 nichun  Wahong, Ukhrul District  a Solar Street Light 4 anapeuvin ahi. Khomiten street light umlou jeh a hahsatna atonaova Assam Rifles hon khomite chu akithopiu ahi. Hiche Solar lamp chu New Wahong khomite khutna pehdoh na Assam Rifles hon ana neiyun Wahong haosapu le khosung miten Assam Rifles ho chunga seijoulou kipathu aphong uvin ahi.

Editorial

Chamkaang lai twilet le nisat

                               Kum kiheichin li (4) lah-a chamkanglai – March-April hi phalbi dap kichaito lhon’a adap jong umtalou, nipilai ni hasatna jong hunglhung loulai, asat adap anop laitah ahi. Ahin tu kum phabep hi March le April lha hoa go hajuh-a ajuhna aumjingtan ahi. Tuchung (tukum) ni phabep go hajuh jeh in phaigam ah twi alen’in athilo jong mi ni aumnalaiye. North East a go ahajuh lheh vang’in India sunglang –lhumlang, sahlang leh alailung lang) gamkai ho ah tumapan louvin nichang sat akipantan temperature (asat adap kiseidan) jong 43 degree Celsius aphatan, ahasat behseh jeh-a thilo jong aumpantai. India sunglang’a nipilai leh asat jeh-a thina toh hi tam jing ahi. Tua nisat jeh-a athi aumpatleh mi ijat hung thidi hitam seithei ahipoi. Chuhlai (July –September) leh go hajuh jeh-a kumsehleh phaigam vang twilet jeh-a hahsatna umjing tei, athi jong umjing ahi. Ningkum tuphat nin hui le go, chimpei hat tah anakitho’n thinglhang lang’a inn le lou tamtah anasuse e. Gojuh hi alhomleh loubol honbol hodia hahsatna ahiban’a phalbi laiya pat chamkanglai sung’a gojuh themkhat beh aumlou jongleh donding, nehding twi tahbah hahsatna umkit ahi. Manipur phaigam’a twilet jeh-a hahsatna aumteng phaigam’a chenghon thinglhang lang’a chengho angohjiu chu tuchung hin koima ngohnadi umlou ahi. Ni thum le janthum tobang go ahajuh jeh in munkhat khatna vengsung leh lamlen ho twijin achuppai jeng’in ahi. Hichu vengsung hoa kon lhanghoh twi potdohnadi twilam (nala/drainage) kituplou jeh ahipen’e. Munkhat vengkhat khat ho deh-deh hi nala/drain pum umlouna jong um ahi. Hiche hi koima ngohdi hilou, a insung’ah twi lut henlang a-inmai lampi ah twi kikhol jongleh govt department ho themmo chansahnadi umlou ahi. Chuleh kho khat vengkhat sung’a cheng jousen ama ama inmai beh nala/drain phate akisem chiehlou leh mi/inn khat le ni’n kituptah a akisem vang’a go hajuh teng twi phate luongtheilou, akisemlouna mun hoa twi letdoh a abon’a atohkhah thou-thou ahi.

                           Vannoi leiset pumpi’a gojuh le nisatdan hi kum phabep masang’a pat hung kihakhel ahi (global climatic change). Hiche thua jong ki-ngohtona aumjing’in ahin gam khangtou le haosa holeh gam vaicha le khangtoulou ho themmo channa kibang ahi. Gam khangtoulou hon kihinsona dia thingphung gophung umna gammang ho chai hemhum’a alhajing jeh uva nisatdan jong kibe jing, gam khangtou hon thilsemna mun (factory) hoa kon meikhu vanchung lang geiya vomlha jeng geiya alhadoh jing u, Factory/Industry hoa anchahdia jong thingphung le gophung ho angaichat kit jeh-a gamkhangtou lou hon gammang avatchat ujong gam khangtou ho jeh ahina chan jong umkit ahi. Hitobang thilsem (nature) chung’a chalohna hi haosatdi kitetna jeh jong ahin, mihem punbe jing jeh a jong ahi. Koima ki-ngohto’a thil kichaidi ahilou jeh in go hajuh leh nichang sat aumteng eima eima hinathei cheh di kivet a kiguontupdi chu ahipen’e Hichena dia gamsung le vengsung lamkai ho moh touthim thei ahipoi.

Blankfire

Amin maimaia haosa hidijong thasetna a neilou loi um, amin maimaia lamkai hia mi dem le seiset chandi jong khohsalou loi um, haosa le lamkai khat hia amadibou kigel a amipidi gelna jong umkitlou ho chu lhasetna thu seikhumdi bou hijengdidan ahi.