ET April 29 News (Local, Regional, Thusoh Lahchom, Editorial, Blankfire)

ET April 29 News (Local, Regional, Thusoh Lahchom, Editorial, Blankfire)

248
0
SHARE

Congress MLA 4 leh TMC MLA 1 in BJP jop’u

Imphal, Apr. 28: Congress legislator 4 leh Trinamool Congress MLA khat BJP’a alut tauvin, hiche hi Chief Minister N Biren lamkaina BJP sorkar ding’a hatchehna lentah ahi, ajeh chu Assembly’a bailam tah’a majority amu theiyu ahitai.

State Assembly’a BJP MLA tu dinmun’a agom’a 28 lhing ahitan, Assembly election’a BJP candidate goljou jat sang’a sagi’a punbe ahi. Alangkhat’a, Congress party MLA 28’a kon 22’a khesuh ahita. Congress dalha’a BJP’a lut’a MLA hohi Kakching Assembly constituency MLA Y Surchandra, Kumbi AC MLA Sanasam Bira, Wangoi AC MLA Oinam Lukhoi chule Saitu AC MLA Ngamthang Haokip ahi.

BJP’a lut MA ho BJP state unit president K Bhabananda, Chief Ministe N Biren chule BJP senior lamkai lh worker hon party office, Nityaipat Chuthek mun’a loupitah in aliem uvin ahi.

Alangkhat’a, TMC state unit jong BJP ‘a alut in, thulhut dungjuiya Thanga Assembly constituency’a MLA kaidoh’a Trinamool Congress MLA khat seh Tongbram Robindro jong BJP’a lut ahitai. Congress MLA 4 BJP’a alut kit toh kilhon’a BJP’a lut’a Congress MLA agom’a gup lhing ahitai. Tu’a Cabinet minister leh Andro AC MLA Th Shyamkumar in assembly election result kiphon jou jouva party adalhah ahi’in, hiche jouva Tipaimukh MLA Ginsuanhau in party adalhah’a BJP ajop ahi.

State Cabinet in lhakhat sung’a MST ‘full function’ hisah dia thulhuh na nei, gamsung khantouna natoh dang dang jong machalsah dia sei

Imphal, Apr. 28 (DIPR): Gamsung road transport service phatah a achelhah theina ding athupi pen’a neiyin tuni (Apr. 28) chun Cabinet meeting khat anaum in ahi. Hiche a chun Manipur State Transport (MST) jong apet pet’a manchah hitading’in thulhuh anei tauvin ahi.

Electric lampang leh adang dang’a tohding angaicha jouse lhakhat sung’a chaitheng ding’in kihoulhahna aneiyuvin, chule Manipur State Transport hi Transport Department in atuh ding (letna a) ahi. Hiche toh kilhon’a private gari neiho leh atol honjong panmun lentah aneiyuve tin Chief Minister N. Biren Singh in aseiye.

 Apetna a hi MST a kon route 14 cheding hichu Imphal a kipat district chom chom tichu Churachandpur, Pherzawl, Bishnupur, Jiribam, Noney, Tamenglong, Kangpokpi, Senapati, Ukhrul, Kamjong, Thoubal, Kakching, Chandel chule Tengnoupal hiding ahi.

Imphal sung gari tamjeh a keng’a vahle hon boina tampi anato’u, accident ho leh gari khaam nading mun aumloujeh a mipin boina tampi ato’u ahin hichu suhbeina ding’a Superintendent of Police (Traffic) khat leh Additional Superintendent of Police (Traffic) khatchieh phaisung’a koiding’in jong Cabinet meeting a chun kiphatsahna aneiyuve. Chule district jouse a Traffic Police ho post hojong kikoiding ahi.

Alangkhat ah tulai hin Cyber crime complaint tampi ahungji in adeh’in social networking site holeh SMS ho ahijiuve. Hiche chungchang jonghi phate’a vetkolna kinei ding, e-mail, website, chats database leh adang dang hojong bailam tah a holdoh thei a koiding ahi tin Chief Minister in aseikit’e. Hiche chungchang ho vekol ding’a Deputy Superintendent of Police khat kikoi ding ahi tin Cabinet chun aseikit’e.

 Thepna le hetna lhingset nei jilkung ho lhalo jong kalsahbe ding chule achesa September nisim 6, 2016 nikho’a Education Department (S) in hiche chungchang’a order anabol jong cancel kibolding ahi tin tuni Cabinet meeting ah chun aseilh’uvin ahi.

            Manipur Development Society (MDS) kivaipoh dan jong kheljep ding chule hiche Society a account asuhsah a umlou ho Central Bureau of Investigation (CBI) khut a kipelut ding ahi tinjong tuni Cabinet meeting a chun thulhuhna ananeiyuvin ahi.

 

Job Card holder ho heng’a Job Card bu kihomdoh

B.Lalboi Gangte

CCpur. April 28(ET):   Churachandpur District Deputy Commissioner R Sudhan in MGNREGS noiya Job Card holer ho khut’a Job Card bu pehcheh ding’a achesa april nisim 18 ni’a hetsahna thuso ana nei naban’a april nisim 26 kah’a pehdoh ding’a thupeh aneitoh kilhon in Tuibong Block huopsung Tuibong kho a inspection anabol in, mopohna neihon khosung’a cheng ho heng’a Job Card bu apehdohlou’u ahidan hetdoh anahi’e. Hitia mopohna neihon Job card holder ho heng’a Job Card bu apehdoh lou phat uvin DC R. Sudhan in Job card suhmang ding tohgon ana neitoh kisaiyin tuni chun SDO/Tuibong Doujapao Haokip le Hehem Haokip, S.O teni panlah najal in sutoh anahitai. Suhtoh ahitoh kilhon in tuni jingkah lang nidan 7 am chun  Tuibong Community Hall a Tuibong B a job card holder heng’a job card pehdohna ana um in ahi.

 Hiche phatsung’a Hehem Haokip SO Tuibong Block in ahoulim na ah; kum 10 lang hi Job-Card bu hi aneiho kom’a umlou’a Haosa khut’a aum e ti DC in ahetdoh phat’a Inspection Block jouse kabol ding ahi ati naban’a milip hetding’a ajong thuphon anei jou’a dan juiding ho ijui lou jeh uva tuni’a Administration thupeh dungjui’a Job-card bu aneiho heng’a kipedoh ahi ati.  Tuni’a ama ma Job card bu hung kilah lou hohi Sanction amutah lou diu, Job Card bu hojong DC ah kipelut ding ki Cancel ding ahin, Govt. in na sum’u cheng khat chajong amanthai nalou ding’a Aadhar Card jaona Bank Account kihonu vin ti’a thupeh kineiho jong mitamjo in nahsah lou in akoi kit in, Job Card holder ho thakon doh jat ho’u Master Roll ah akho’a mopoh nanei Mate hon natong ho atoh doh jat nikho ajihlut uva, Office ah ahinpeh lut diu, keihon Centre ah kathot diu chujou teng leh na nitha ho le natoh doh jat’u lhingsel’a nang ho Account ah hunglut ding, Haosa khut’a lut talou ding ahi ati.

Doujapao Haokip MCS SDO/Tuibong in ahoulim na ah,  MGNREGS, Food Security, IAY hijong leh Monitoring hung kipan ham iti’a ahileh Govt. kikhel dungjui’a Funding System hung kikhel jeh ahin, Centre in Fund State apeh’a State in District apeh’a District in Block hojouse apehson’a Block in kho ho’a apeh ahin hitobang hi system hitalou’a  hi Natoh hoidung jui’a Funding Centre in apeh ding joh ahi. Tu’a hi natong hoi State ho chu Funding tam chanding atong hoilou ho lhom chang ding ahin chubang’a district level jong khuti ding block level ajong natong hoi fund tam chan diu, natong hoilou ho alhom mudiu, ajeh chu MGNREGS hi natoh hoidung jui’a atoh diu nikho atam mudiu tina ahi ati.

MGNREGS System ahileh 100% lah’a 25% ah nakitoh namun lemol hojouse Jio satellite akon’a Lim kikap ding, 25% ah Aadhar leh Bank Account kigom khom’a MIS a hetlut di, 50% ahileh  Job Verification kibol ding ami dih tah, alimtoh kitoh hinam ti’a SDO/BDO hon akhuol childiu, Master Roll, Job Card bu ho’a Job Card holders hon sum amuhou jih lut hinam, sum hoitah’a amu hinam ti avetsui diu ahi . chuleh Deputy Commissioner in adei chu mipi chanvou di hung sum ho amu dingdol hon akimu diu, natoh jong hoitah’a toh ding ti ahin chuleh sum amu diu ho mangthah lou’a ama ma Bank Account alut jat ho ahet thei nadiuva Job Card bu ama ama ho khut’a um di ti ahin,  Tuibong  bou hi Inspection abol dilou ahin Tuibong block sung’a  kho 164 um na Job Card Holder 12604 umna jouse khuol na ahung neiding ahi na ah mopoh nanei hojouse in Job Card holder hoheng’a job card bu pedoh cheh ding in jong Haosa holeh mopoh naneiho tepna aneijin ahi.

Govt. Jilkung ho’n ama thalheng’a mi dang koithei talou ding

 Lien S. Gangte

Ccpur, Apr. 28: Autonumous District Council (ADC), Manipur noi’a School um ho’a thiemjil na hoijo leh hat jo aum ding deina in Section 24 Right of Children to Free and Conpulsory Education (RTE) Act 2009; Autonomous District Council, Manipur Office Memorandum No. 2/150/2016-Hills, dated 20th April, 2017 toh kisai a Department of Tribal Affairs & Hills, Government of Manipur in ADC, Manipur noiya School um ho jui ding in hetsah na leh thuphon aneiyin toh kilhon in, Soimonlian Lengen, Chief Executive Officer (CEO) ADC Ccpur in thuphon aneiyin ahi.

CEO, ADCC akon thuphon chun asei na’ah, ADCC noiya School a tong, Oija ho’n ama thalheng (Substitute/Proxy) a koima asol-lou ding, asol aum a akimat doh leh dan toh kitoh a achungthu kitan ding ahi. Teaching leh Non-Teaching Staff koi hijong leh ama ama posting na mun’a thonlouva aum sohkei diu ahi. Chuleh, School a Headmaster/Headmistress ho’n apehlut’u Monthly Attendance Report Certificate, kho hausa/Chairman, Village Authority chuleh akisaipi Deputy/Assistant Inspector in hetpeh na soi a kai dungzui uva Oija ho’n lha-lo (Salary) akisan diu ahi.

Headmaster/Headmistress ho’n ama noiya tong Staff ho Min, Photo, Hina,  Address leh Phone Number ho School Office mai a atah doh ding ahi. Govt. apat phal na umlou va Teacher khat chu Non-Teaching Post atuh thei lou ding ahi. Chuleh, Deputy Commissioners (Ex-Officio Chairman of District Board of Education), Chief Executive Officer, ADC ho’n achunga dan kisiem ho avetsui diu ahi.

Edn. Minister in Moreh a Kondong Lairembi Guest House hondohna nei

Imphal, Apr. 28 (DIPR): Tuni chun Education, Labour & Health Minister Th. Radheshyam in Ima Kondong Lairembi Khubam Moreh vilna aganeiyin Ima Kondong Lairembi Mithung Shang (Guest House) jong hondohna anei ngal in ahi. Ima Kongdong Lairembi leh akimvel hohi religious tourist spot a semdoh thei ahi tin aseiye. Hitobang guest house kisemdoh jou hi mipite kithopina jal ahi atin amun jong mun nomtah ahin mitampi adeh a Lai Haraoba laileh mipi akikhol dimset jiuve tinjong aseiye.

Hiche munvel hi religious tourist spot a semdoh ahitheina ding’a Chief Minister pa henga jong kasei ding ahi tin mipi anga ahoulimna ah aseiye.

Tuni kingon a chun Parliamentary Secretry IFCD L. Rameshwar Meitei, Parliamentary Secretary RD & PR H. Dingo Singh, Parliamentary Secretary Education leh YAS K. Robindro, Autonomous District Council Moreh a Member ho chule Ima Kondong Lairembi Mithung Shang Construction Committee member hojong apang uvin ahi.

Kingon kichaiyin Minister pa’n Tengnoupal a akisai lai DIET Centre jong vilna aneiyin, Eastern Shine School vilna aneitoh kilhon in jilkung hotoh jong phat chomkhat kihoulimna aneikit in ahi. Hiche a chun jilkung holeh kiloikhomna phabep honjong Minister pa heng ah memorandum apelut uvin ahi.

Advt. General appoint kibol dan nielkal Senior Journlaist teni guotna kipeding ahi: Bar Association

Imphal, Apr. 28: All India Radio, Imphal le ISTV Network a Advocate General appointment kipehna chung’a thumanlou sei senior journalist teni chung’a dan dungjuiya action kilading ahi tin  High Court Bar Association of Manipur,  Vice-President, Yumnam Nimolchand in aseiye. Hiche thu hi Y Nimolchand in kiloikhom office’a press conference akouna a asei ahi.

Aman aseidan in Senior Journalist teni  in April nisim 19  le April  nisim 25 nikho’a Advocate General appointment kibol chungthu’a ngohna aneiho hi gamsung a um advocate ho le HCBAM in sangtah in demna akineiye ati. Chuleh  Bar association hin state government jah’a  Non-manipuri hilou Advocate General feltah khat akoi ding’a ngehna ana kinei jing ahi’n, Senior Journalist teni thusei hin Bar association in ngehna aneiho amolphousah ahi. ISTV discussion hour program a senior journalist khat in “thulhut kimu dungjuiyin, advocate general masa ho chun atoh ding doltah’u atongpo’uve” ti’a aseina’a chu “thulhut” chu koi ahijong aseidoh ngai ahi.  Naharolgee Thoudang Editor in ngohna aneiho jong aphotchetna apeh ding ngai ahi tin Nimolchand in aseiye.

Nimolchand in thuso miho heng’a aseidan in High Court Bar Association in hiche chungthu toh kisai in kihoulimna akineiyin hiche’a chun thulhuhna phabep akineiye ati. Kihoulimna’a  thulhuhna kisem dungjuiyn eight member committee khat akisemdoh in , hiche committee hin journalist teni thusei akholchil ding chuleh ni som masang’a journalist teni chung’a iti lamdol’a action lahding tijong ahin gelkhom ding’u ahi ati.

Geldoh thei khat chu CSO ho, MPCC le simlai kiloikhom hon Advocate General hi non-Manipuri ho tuhsahlou ding ti’a ngehna ahin neijing’u ahi.

KNF in Saitu MLA Ngamthang Haokip kiloikhomna ang’a kisulham dia kou

Imphal, Apr.28 (ET): Kuki National Front (KNF) kiloikhomna in ahunglhung ding Lhaphul (May) nisim 5 masanga Saitu AC akon’a MLA kaidoh chule Congress vaihom laija Minister kum sottah anatuh le tunia BJP Government anajop MLA Ngamthang Haokip in kiloikhomna ang’a thu mun phabep kisuhlhap na neidin kouna aneiyin ahi. Helien Kipgen, Joint Secretary & Defence PRO in Saitu MLA pa heng’a lekhathot ananeiyin hiche a chun Kuki National Front in tunichan’a akitong chule political decision kila jouse hi khonunga Kuki Nampi ding gelna’a kiboljing ahin, kiloikhomna in namsunga koima khentum jong akinei ngaipoi akiti.

Aman aseibena’a tuchung 11th Manipur State Assembly Election’a Lhaitet Golseh a pan ahinlahna’a  hin kiloikhomna deilou leh lunggel lou lamtah in Saitu A/C MLA Ngamthang Haokip in lunggel leh natoh phabep aneiye ati. Hijeh chun ahunglhung ding May nisim 5, 2017 kah’a kiloikhomna ang’a ahung kiseilhap ding’in hetsahna aneikit in ahi.

Nam ngailutna le khonunga Cham le Lungmon ding gelkhohna jal’a kiloikhomna deisah banga ahung chon teidin Helien Kipgen, Joint Secretary & Defence PRO, KNF in Saitu MLA Ngamthang Haokip temna leh hetsahna aneiyin ahi.

Numei 2 suse’a ngohna kinei mikhat Cheirap court’a apui nau numei tamtah in nokhum

Imphal, Apr. 28: Pasal phabep in hunam’a asuhset numei teni chung’a thudih’a thutanna aumna ding’a pan la numei tamtah in Friday nikhon Cheirap Court Complex mun’a numei suse’a ngohna kinei mi 7 lah’a mi khat court’a apuiyu chun nokhum ding ago uvin ahi.

Mi 7 lah’a mi 6 hi akum lhing loulai (juvenile)’a kisei ahi’in, pilhing’a kisei mipa bou Special Court (POCSO), Cheirap Court, Uripok’a ding ding’a apuiyu ahi. Court complex’a um numei tamtah in ngohna kisem khum pa twi bottle’a asep uvin, gotna apeh diuvin thumna anei uvin ahi. Amun’a um police hon mipi asuthip uvin, phat chomkhat jouva court complex’a kon anodoh uvin, gate akhah tauvin ahi.

Numei 2 suse pa hi ni 15 judicial custody’a um ding’a thulhuhna um ahi. Achesa Thursday nikho’a mihem sang val in Phaknung’a numei ni pasal sagi in achesa April nisim 14 nikho’a hunam’a asuhset douna’a ‘mass rally’ abol uva, themmona neiho gotna apeh diuva thumna aneiyu ahi. Police thulhut dungjuiya numei teni hi aloi hotoh Thabal chongba ve ding’a cheu ahi’in, ahung kile na uva pasal sagi in alamtin’a hunam’a aluppi lhon ahi.

Health Minister in TPL Public Health Centre vil

Tengnoupal, Apr. 28: Health Minister L.Jayentakumar in tuni chun Tengnoupal Public Health Centre vilna aneiyin, akimvel’a cheng mipi ho toh kihoulimna jong aneiyin ahi. Jayentakumar in mipi heng’a ahoulimna’a chun Health Centre a thilkeu avatnalaiho le staff ho agangtheipen’a ninglhing tah’a kikoi ding ahi tin aseiye.  PHC a kon a apotdoh chun lupna 50 umna  Ayush Hospital kisahna ding mun vetlhahna anei in ahi. AYUSH Hospital hi Dk.10 crore vel lutding ahi’n, natoh jong agangtheipen’a kipan ding ahitai  tin Jayentakumar in thuso miho heng’ a aseiye.

RIMS Director thah chung’a RIMS officer ho lunglhai lou

Imphal, Apr. 28: Regional Institute of Medical Sciences (RIMS) director ding’a RK Dinesh (IAS) kilhen hin institute leh teaching faculty atongkha in, RIMS faculty leh high rank administrator hon apotdoh ding’in thumna aneiyun, Medical institution’a director chule medical superintendent panmun tuh ding’a non-medical civil servant hohi dan dungjuiya kilheng theilou ahi, tin aseiyui.

Khut kikhelna aum jouva kon institute official holah’a lunggim kipan ahi, tin thulhut in aseiye. Photchenna aum loulai vang’a, thulhut kimu dungjuiya alamkai jep hon subordinate staff ho heng’a financial chule administrative toh kisai file hohi achon loudiuva thuhilna apeh ahi. Account section panna’a officer phabep in staff hon file hohi officiating director in office adalhah’a director thah akilhen kahse’a apeh lou diuva thuhilna anei ahi, tin thulhut in aseiye.

Hiche toh kilhon’a hiche lampang’a file tamtah toh louva kikoi ahitai. Thulhut dungjuiya RIMS ‘a engineer ho tuhin office ache uvin, ahin, natong louvin ahung kile ji tauve, RIMS Director thah chung’a…

ati. Director thah in achesa phat sung’a bolkhel ho semphat nading, hehna suhnem nading chule natoh thepna ding’a natong ho thupeh jong anei ahi. Chule lha 6-12 sung’a kitong chailou file aum’e, ti staff ho’a kon hehna amu jouteng achelhah nading’a official hojong thupeh anei ahi, ati. Hetthei khat chu director kikhel’a kon staff attendance hi kikhel’a hatah’a phachom ahi.

Institute’a senior official hon natoh ding agelkhoh loujeh’a machine, manchah chule lou-leh-ai lahna ding’a phat lut ahi, tia ngohna jong um ahi. Officiating director in pan alah dan hin kikhelna aphalam’a ahin pohlhung ding tahsanna aumin, chule RIMS’a achesa kum phabep sung’a suhkhel anaum hojong ahettoh ahi.

Maphou Dam pipeline kisem thu’a Maoist hon gihna thuso nei

Imphal, Apr. 28: Maoist Communist Party Manipur (MCPM) in Maphou Dam’a kon Chingkhei Ching Water Treatment plant’a pipeline kisahna’a thil dihlouva natong ho chung’a action alah diuvin gihna thuso anei uvin ahi.

Thingnoi kiloikhomna in thuso aneina’a chun pipeline kisahna’a thil dihlou kibol jeh’a Lamlai munvel’a um phailei tamtah leh akimvel hi se thei ding dinmun’a um ahi, ati. Central Water Commission in achesa 2015 kum’a kon apat natoh hi EE, Thoubal Project, Division No 6 leh contractor phabep in sum-ko’a aman’a ahi’in, project’a din’a sanction kibol jat hi dangka 300 crore ahi, ati. Mopohna nei department in athu akhol louleh kiloikhomna chule mipi in Maphou Dam’a natoh jouse angah sah ding ahi, tin aseibe uve.

Lamlai gamkai hi Maoist Communist Party Manipur in ‘revolutionary model’a semdoh ding’a pan alah jing ahi’in, bolkhel ho kimoh vetlou ding ahi, ati. Chule Lamlai Municipal Council leh Oil Depot in suhthengna aneina ding’a Maoist Manipur in phat atep peh sung akichai tai, tin jong aseiyui. Vice Chairman, Lamlai Municipal Council inmun’a bomb akisupoh in, LMC in Lamlai gamkai khantou nading’a fund kipe ho alam louva aman dan jong Maoist in ahilchen ahi, ati. Vice chairperson in sorkar toh SoO sem’a thingnoimi kiloikhom ho dangka 10,000 apeh ahi, tin ngohna aneiyui. Alangkhat’a, Itam lei kom’a um Oil Pump’a thil kibol jong kiloikhomna in ahet ahi, ati. Oil pump neipa hi MLA toh naicha kiloikhom ahijeh’a police hon venna apeh’a chule Lamlai gamkai miho kam kisip peh ahi. Hijong leh Maoist in hitobang thil aumsah louding ahi, tin thuso anei nauva aseiyui.

Lamshang MLA in Heibi Lok Water Supply Scheme vil

Imphal, Apr. 28: Lamshang Constituency MLA-Deputy Chairman , Manipur State Planning Board, Salam Rajen in tuni chun  Thangjing Chiru a um Heibi Lok Water Supply Scheme vilna aneiyin ahi. Hetthei khat chu Heibi Lok Water Supply Scheme hin achesa lha ni sung’a chu akimvel’a um kho ho ahina ding bangtah’a twi theng ana pehtheilou ahi. Hitolhon chun local club, Meira Paibi le PHE Department Engineer ho’n tuni chun water supply scheme chu ana sutheng’uvina hi.  Heibi Lok Water Supply Scheme hin Lamshang le Sekmai A/C sung’a um kho som (10) vel don ding twi theng apeh ahi.

Volunteer ho chun water supply scheme chu asuhtheng’u keu hilouvin aselai ho jong ana sempha’uvin ahi. Aselai ho asemphatjou’u chun  scheme sung’a chun twi theng ana luonlut sah’uvin ahi.

Deputy Chairman, MSPB, S Rajen in kinguon kichaiya thuso miho toh akihoulimna a aseidan in, BJP lamkaina coalition sorkar hin Manipur sung’a um kho jouse don ding twi theng pehding akigel khoh in , h itolhon chun water supply scheme ho jouse semphat ding tohguon akineiye ati. Tukum sung mama’a hi gamkai sung’a cheng jouse’n a Inmun cheh’uva donding twi theng amu ding’u ahi tin jong aseiye.

State Level Honey festival kimang

Imphal, Apr. 28: Nikho thum chelha ding State Level Honey festival tuni chun GM Hall complex a hondoh ahitai. Kinguon hi Manipur Bee Keepers Federation in aguon ahi. Kinguon’a chun Parliamentary Secretary, K Leishiyo,  Minister lui Dr M Nara, Asst Prof , CAU, Dr M Sumajit le Federation luboh, S Nilakamal  in pan ala’uvin ahi.

Dr M Nara in kinguon’a ahoulimna’a chun mihem khat damtheina ding’a khoiju apoimo dan ho ahilchen in ahi. Aman aseidan in khoiju hi lou phatah khat ahi’n, niseh a ineh a ahileh natna tamtah’a kon kihuoidoh thei ahi ati. Damtheina keu hilouvin Khoiju hi sum muna phatah jong ahi tin aseiye. Parliamentary Secy.  K Leishiyo in ahoulimna’a chun  honey festival hi kumkit lang’a pat pilhing jep le hoijep’a bolding adeisah dan aphongdoh in ahi.

2-Day dist. Level orientation workshop kibol

Bishnupur, Apr.  28: Nikho ni chelha ding Hepatitis B, Japanese Encephalitis, Measles le routine immunization chungchang’a kiboll district level orientation workshop tuni chun District Hospital , Bishnupur a ana kipan in ahi. Workshop hi District Family Welfare in National Health Mission noiya aguon ahi. Kinguon’a chun CMO Dr H Bebichand, State Immunisation Officer, Dr Nandakishore le District Family Welfare Officer, Dr Shyamkumar Pukhrambam in pan ala’uvina hi. Health workers phabep le doctor phabep in kinguon’a chun pan ala’uve.

Tura mun’a mipa(step-father) in achanu (step-daughter) suse go

Tura, Apr. 28: India sung mun chom chom’a kisuhset na aum jing jeng toh lhon in janhi chun Tura,Dobasipara veng  sung’a cheng mipi hon pa thah (step-father) khat in achanu (13) (step-daughter) suhset ding ana got jeh in ana vo uvin ahi.  Mipa min chu Vincent S Sangma @ Benson (36) akitin ahi. Hiche chapang nu nu hi damlou najeh’a Tura Civil hospital mun’a um ahitoh lhon in hiche mipa hin phat gom kom ahol’a suhset ding ana gon ahi ahin hiche chapang nu hin lungleng tah in hiche mipa kom’a pat chun anajam doh in a room’u khat lang’a chun kot ana kikha khum khovah in ahi.Ajing nikho ahung vah phat in hiche chapang nu chun aninu leh aheng akom ho asap phat in aveng mipi hon ahin hetdoh’u ahi tin police ho’a kon kimu thulhut chun aseiye.

Miphalou mi 2 in ajinu asuhset jeh’a Mipa in ajinu nungsun: Meghalaya

Tura, Apr. 28: Thulhut kimu dungjui in Tura mun’a miphalou mi 2 in nupi khat ajipa Guwahati’a natong’a apotdoh kah’a anu suhset jeh in hiche mipa chun ajinu ana nungsun tan ahi.Hiche miphalou teni min chu Dhola Sheikh leh Moza Sheikh ahilhon in hiche nupi nu toh hin kho khat na cheng khom ahi uvin ahi.

Dhola Sheikh leh Moza Sheikh teni hi ka inn sung’a ahung lut lhon in kholang kasap nalou ding in ka lol lah chem (knif) asuto lhon in napen na ahileh katha lhon di nahi tia gih na anei jeh chun kenjong ema bol ngam louvin kana um in ahi. Hiche mi teni lah’a khat hin kei toh hinkho’a cheng khom pi ding anop jeh hitia hi kahinkho asuh genthei ahi. Eisuhset jou nung lhon in jong Dhola kiti pa toh hin vet hoilou tah in lim (photo) ekilah khom sah kit in ahi ati.Hiche lim (Photo) chu koi thim beh honlou in ka jipa anavet sah lhon jeh in kajipa in hiche tobang nga thil ahung so doh thei hi keijeh ahi tijeh in ei nungsun tan ahi tin hiche nupi nu hin New Bhaitbari mun’a chun aseiye.

Aman seibe na’a chun; hiche teni hin kahinkho asuh genthei nachung’a tun kajipa in jong einung sun kit tan tu’a koi kom’a kithopi na kaga thum ding hitam tin lung phamo tah in aum ahi. Akisukha leh aki suse chu kei kahin tun kei joh hi thilphalou bol joh in kaum doh tai atin ahi.

Hiche thilsoh toh kisai in April 17 nichun Phulbari Police Station,West Garo Hills mun’a FIR jih lut in aum tai. Hiceh FIR kibol’a pat in miphalou teni hi ajam mang lhon in tuchang in ama ni hol na in pan akila jing nge tin police ho’a kon kimu thulhut chun aseiye.

PIL chungchang thu June 15 leh final hearing um tading

Imphal,Apr. 28: Former Chief Minister of Manipur, RK Ranbir chapa Rajkumar Premjit in LDA, MDS, Anganwadi chuleh PDS(amongs eight other cases) August 3, 2016 doudal na’a  Public Interest Litigation na nao’a cases ana jihlut chu tukum June leh final hearing um ding ahitai. Premjit in Manipur press Club mun’a thuso miho akimu pi na’a chun; final hearing hi June 15 tukum leh um ding ahitai. Gah hetthei khat chu PIL noi in LDA leh MDS hon August 3,2016 kum sung’a sum leh pai lam’a kituplou tah leh daan dih lou tah’a aman jeh uva hiche doudal nading nga chu cases ana kibol ahi. Chu naban injong fund ho government schemes apat hung hojong kitup tah’a anakiman lou jeh in  Anganwadi, Midday Meal, Fishery department, MOBC, PDS/Food Bill chuleh Agriculture department ho chung’a jong PIL cases kana jih lut anahi ati.

Salai Holding Pvt. Ltd in Chinese company khat toh MoU neiding

Imphal, Apr. 28: Salai Holding Pvt Ltd, N Somorjit tutu hin China’a pansa Anyang General International Company toh MoU soi kaiding in akalsuongtai tin Salai Holdings Private Limited  Vice President Brojendro in aseiye. Aman aseidan in Anyang General Int. Company Ltd. Toh Salai Holding Pvt. Ltd hin lam chom chom’a khantou machalna natoh ho’a kikhutjopna kinei ding ahi ati.  Aman aseiben’aa chun Salai Holding Pvt. Ltd hin Hong Kong’a jong overseas company khat akihongdoh tai ati. Gamdang a um company ho toh kikhutjopna hin Manipur sung’a kikhelna lentah ahin pohlut ding ahi tin jong aseiye.

Manipur State Museum in abol workshop khumkha hita

Imphal; Apr. 28 : Manipur State Museum, Imphal khopi’a “5-Day Workshop on Conservation & Preservation of Biological Specimens” khumkhana kin-gon Friday nikhon akimang in, kin-gon hi tulha nisim 24 nikho’a kipan ahitan, Manipur State Museum in Y Binita Devi, Curator, Manipur State Museum lamkaina’a abol ahi.

Workshop’a agom in mi 30 in pan ala in, pan la ho ahtwi, nga chule vacha ven ding dan hilna anei uvin ahi. Workshop’a Y Binita Devi, Curator leh Guide Lecturer L Sadhana Devi chule Artist N Ima Singh resource person’a pang ahiuve. Khumkhana kin-gon’a Dr. Chongtham Jamini Devi, ex- Chairperson, Manipur State Commission for Women leh Dr. Kh. Shamungou, Environmentalist jin-gun leh kin-neipa in apang lhon in, participant ho certificate ahop peh uvin ahi.

‘Rational Use of Blood and Blood Products’ training kipan ta

Thoubal, Apr. 28: Conference Hall, District Hospital, Thoubal mun’a Two days ‘Training Programme on Rational Use of Blood and Blood Products akipan tan ahi.

Kin-gon hi Dr. N. Jayantakumar Singh, Chief Medical Officer, Thoubal in Dr. N. Hemantakumar Singh, Medical Superintendent, District Hospital, Dr. Arke, Sr. Specialist(Medicine) District Hospital Thoubal, Dr. Geetchandra Okram, MD, Transfusion Medicine, Asst. Prof. Dept. of Transfusion Medicine, JNIMS, Imphal leh Ch. Basanta Singh, Distriçt Programme Manager, District Health Society, Thoubal umna’a hondohna anei ahi. Bank and Transfusion Unit, District Hospital Thoubal in District Health Society, Thoubal chule Blood Cell, National Health Mission, Manipur government tosotna’a abol ahi.

Resource person chom chom in thupi chom chom in houlimna anei uvin ahi. Dr. Doendro Loitongbam, Specialist, (Transfusion Medicine), District Hospital Thoubal in ‘Rational use of blood and blood products’ ti thupi in thuhilna aneiyin, Dr. Kh. Memtonbi in ‘Massive Transfusion and its Management’ thupi in houlimna aneiyin chule Dr. Geetchandra Okram in ‘Component Therapy and its importance’ ti thupi in houlimna aneiyin, Kakching, Thoubal leh Chandel district’a um Health Institution chom chom’a kon agom’a Medical Officer 60 in pan alah ahi.

       USRA in hilchetna bol

B.Lalboi Gangte

CCpur. April 28 (ET): United Socialist Revolutionary Army(USRA)  kiloikhom na Information & Publicity Secretary Slash Vaiphei in  Suh thiengna thuso anei kimun asei na ah; achesa 28 April 2017 nikho’a State Newspapers khenkhat ho’a hung kitahdoh Combined team of Imphal West District Police leh 6th Assam Rifles hon gaalman chah toh amat’u Suantak Lamthenlal Vaiphei (37) S/o Thangneigen hi USRA cadres ahi ti’a kisei hi USRA kiloikhom na a hitobang mi ajaokha pon, akihekha pon chuleh milham kiman’a thingnoi ahiti’a kingoh nahi phamo akisa lheh’e.  Hiche nikho’a USRA Cadre  amat tha’u Lamneimang @ Messi Vaiphei (45) hi tunichan’a hoi’a um ham ti akihe pon, hiche gaal manchah ho agalah doh sah jounung uva Messi Vaiphei hi alhut nao kihelou ahi naban’a News jeng ajong limlah leh amin jong apansah lou uva aselmang uva, amakhel’a kho hephalou Lamthenlal Vaiphei achenna inn akon’a akaidoh uva USRA Cadre ahi ti’a gaalmanchah toh kimat tha ahi ti’a aphondoh’u hi demna sang tah Police leh Assam Rifles chung’a akineiyin ahi.

Thusoh Lahchom

KCA Machi Block

  1. Thangbul Haokip, President, Kuki Chiefs’ Association, Machi Block, Chandel District in thuphon ahin nei dungjui in phatmasa lang’a Sokhothang (Senpu) Lupho General Secretary, Machi Block KCA a kon’a anahai tah jeh in ama khelding’in Onkhojam (Senpu) Haokip, Advisor KCA Machi Block in General Secretary tohmun aluoding chule Onkhojam (Senpu) Haokip tohmun Advisor chu Ts. Ngamkhohao Haokip in aluoding ahitai akiti.

Torch rally

Janni (April 27) nilhah in Social Development Organisation makai nanoi in Singjamei mayengbam leikai mun’a kham nathei thil Singjamei vel lah’a kijoh dei lou najeh in torch rally kijot na ana nei uvin ahi. Hiche kiphin na’a pang ho chun placards dung leh awgin in kham nathei (drug leh intoxicants) ho suhbei ding leh numei ho muset lou ding tin asam un ahi.

World Veterinary Day

World Veterinary Day ahitoh kilhon in tuni chun anti-rabies vaccination programme kin chu Joint Director Veterinary,Imphal East lamkai na in Kshetri Leikai, Uchekkon Khunou, Takkhok, Thambalkhong Sabal Leikai leh mun dang dang in anakimang in ahi. Joint Director,S Thoiba in kingon na mun’a asei na’a chun; hiche anti-rabies vaccination programme hi jing chan na kikap jom jing ding ahi.Chuleh mipi koi hijong leh uicha (dog) nei ho sese in ahiche kin na hi ahung lhah cheh ding in jong temna anei kit in ahi.

Gallen II

Tuni chun Moreh College pal getna ding’a natong hon lei alaina’uva Gallen ni na a ana kimang bomb 18 le meichang 600 vel alaidoh’uvin ahi. Bomb le meichang ho chu Police Station, Moreh khut’a apelut ta’uve.

AFSPA

Concerned authority in Manipur sung’a kon Armed Forces (Special Powers) act, 1958 alahdoh ding in milham kiloikhom 12 vel in kilungkhat tah in ngehna anei’uvin ahi. State le Centre government hin Act lahdohna ding’a tohgon anei ngai ahi tin District Convenor , United NGO Mission, Manipur, L Pishak in aseiye. Hiche thu hi tuni  Manipur Press Club a press conference kibolna kin khat’a ahoulimna’a asei ahi. AFSPA lahdoh na ding’a hi National le International level’a kholhang sap phat ahitai tin jong aseiyin ahi. Kinguon’a chun NEDF, Shillong, Consultant Dr PBM Basaza NOy le Social Action Development Organisation,  Secretary, Mandir in jong pan ala lhon in ahi.

 

Editorial

Lamkai kitah

            “Thangkip tabanga kikhel lele” tihi tehse ho thusei (pu-pa thuchih) khat ahi. Thangkip hi mijouse hetdana a hina (colour) vel tamtah khel thei ahin, koi hileh ahina petchah louva, huinun na langa lon lele, mikitahlou ho hi ‘thankip’ toh ana ki tekah ji e. Tunia I sei nom uchu tulai political huinun —party khat apat a party danga chopsuh-choptou thu a miho houlimna hi ahi. A itih a party khellou dinga tahsan um Congress MLA phabep hon ginchat phah lou hel a party ahin dalhah uva BJP a alut uhi kidang salou leh akipapi atam lou dan miho houlimna akon ahet thei e. Henge, politics kiti chu chopsuh-choptou a um ding mong ahi. Chuleh, I let-i lal na ding kihol ding mong ahi nai. Ahinla, hiti ho bol ding ahi mong jong leh midang injong abol nai ti jeh a moh bolbol thei thil hinam/hilou ham ti geltoh masat vang ngai inte. Thil jouse hi a phat (timing) um ahin, aphattoh a kitoh a kal kisep hinam tihi ei-le-ei kikhol masat a ngai phat jong umji ahi. A miten ipi jeh a election a chu ana tundoh uva, ipi dinga ama chu tutah a party khel a boi pai jeng ham ti kahlah hi gellou theilou thilkhat ahi tai. Zingkah ahung kitho a vom, buneh phat a san, sun a eng, zan a dup kiti chu mi dammo vetsahna ahi bang in, hitobanga ahina khel lele lamkai ho chu a lhinlel nao khattou umkha em ti chu phatecha vetsui angai ding tahsan a um e. Ipi hileh, Congress MLA chomdoh ho hin amite ding gelnaa party akhel u ahileh vang, kipapi um nante. Ahinla, amaho phatchomna ding bou gel a party khel ahi khah ule vang a gamkai mipi ho ding bou hilouva mijouse ding in phamo lheh inte. Ajeh chu, ahat lam lam bel jeng kiti hi mihem ngaina ahi vang in, mihem ngai (normal person) chunga min akoi lamkai hon hitobang thil aphatlou tah a ahin bol teng akilompi lou jong umda ah ahipoi. Tuchung 11 veina Manipur Legislative Assembly a hi Congress 28, BJP 21 ahin, BJP in party neo-neo ho kithopina in Government ahin sem tai. Hiche a mipi kinepna chu opposition hat ding ahin, government in jong anop nop a na atoh thei deh lou ding ahi ti hi ahi. Ahin, kinepna banglou in Congress MLA ho party dalha a hung kilhah tho uvin, ipi jeh a MLA a mipin ana sotdoh ham tiho haimil leu hileu kilom in government sem party a jao ding akichu tho ahung bang taove. Thilkhoh tah vang ahi atilou thei tapoi.

            Cheho ban ah anaijo cheh in gah kisei leh, Manipur hi nam len cheh thum —Kuki, Naga leh Meitei, chenkhomna mun ahi tihi alen-aneo i bon uva i hetsau ahi. Nam thum chengkhom ho hi akitoh jong umlou, ama chang phatchomna ding cheh gel a khosa i hitaove kitileh ki seival ponte. Akitoh umlou, khat in khat chotnem a alenpen, a thuneipen, a boltheipen hiding ti hi nam/jat lencheh thum hon tulaia i boipi u ahi pipen e ati thei tai. Khat jong khat noija kun nomlou na gam/phat a khosa I hi jeh uvin, khat thilbol khat in phatecha kivetsui tona a um jing e. Mikhat thil phalou bol jong nam pumpi a minsetna khang ahi tai. Hitia khat-le-khat ki ginmo tona leh ki tahsanna lhahsam pet a hi nam lamkai leh political leader ho mopohna a len dehset e. Mopohna lentah la/po dinga hung kisa a mipi natong dinga hung kipedoh political (elected) leader ho  dehdeh hi milah a I hi nao phatvet (mirror) tobang a podoh (reflection) khat ahiuvin, amopohnau hi a len dehset e ti hi seitam louva I na hetsau ahi. Milham (common man) leh lamkai hon Christian chonchanpha I pohdoh jing dingu hi hou/lhagao lam bou hilouva, mi jabol channa khat ahi tihi suhmil lou a pha khat ahi.

Blankfire

Mi chop chopna a chom hohi adih ham adihloujo ham aki hethei tapon achomkha achomkhel umdi ham umloudi ham jong seithei hilou. Ipi hileh chop kiti lampanga hi koima ochatloudi himaidan hinte