ET April 28, 2017 News (Local, Regional, National, Thusoh Lahchom, Editorial, Blankfire)

ET April 28, 2017 News (Local, Regional, National, Thusoh Lahchom, Editorial, Blankfire)

231
0
SHARE

Simlai chapang 2 kisuhset  deilou vetsah na a mipi kijotna um

Imphal, Apr. 27: Achesa April nisim 14 nikho’a Phaknung ‘gang rape’ thilsoh anaum demna in Imphal khopi’a mipi kijotna aumin, phaicham leh thinglhang’a kon, civil society organisation chom chom, simlai kiloikhomna chule club chom chom in ‘Core Committee Against Phaknung Gang rape of Two Minor Girls’ in agon kijotna’a pan alauvin ahi.

Achesa April nisim 14 nikho’a numei chapang ni pasal hon in hunam’a aluppi doudalna’a jat-leh-nam chule hou khenna umlouva numei tamtah in pan alah ahi, tin Rose Mangshi Haokip, Advisor, Kuki Women Union Manipur in aseiyin ahi. Manipur gamsung’a achesa kum som’a sim’a hitobang thilsoh hi gamsung in amu khahlou ahi. 21st century ahunglhun toh kilhon in setna thilsoh apunbe jing’in, Manipur gamsung numei hon hitobang thilsoh sangtah in demna aneiye, tin Rose Mangshi in thuso miho heng’a aseiyin ahi.

Thinglhang leh phaicham mi kipunkhom’a, khonung’a hitobang thilsoh avel’a alhun kit louna ding’a kijotna lentah agon ahi, tin aseibe in ahi.

Mopohna nei authority hon themmona nei ho kilomtah’a gotna apeh ding, ahithei leh hinkho lhung keiya songkul’a akoi ding’a thumna aneiyu ahi.

Mass rally hi Ima Khunthoknganbi Community Hall, DM College Gate, Thangmeiband’a kipan’a, Khuyathong, North AOC, Chingmeirong, Khongnang Ani Karak, Dinku Road, Khurai-Lamlong, Tillipati, Minuthong ajot uva chule Ima Khunthonganbi Community Hall, DM College Gate, Thangmeiband chan kijot uva, hiche mun’a public meeting abol-u ahi. Mass rally gong hon ‘signature campaign’ jong abol uvin ahi.

 

TSA-GHQ in pachatna thu phong

Imphal, Apr. 27: Achesa April nisim 14, 2017 nikho Phaknung a simlai numei 2 kisuhsetna chungchang deilou vetsahna mass rally public meeting hin gongtoh CSOs, NGOs, Student Organizations, Meira Paibi Lups, Activists  chule adang dang kigopkhomna Core Committee hengah Thadou Students’ Association, General Headquarters (TSA-GHQ) in pachatna thu aseiyin ahi. Tuni rally chu Khunthokkhanbi, Thangmeiband, Imphal a kibol ahi.

 Tumasang jep a hiche thilsoh toh kisaiya Meira Paibi Lups phabep in mona neiho huhna a thuso anabol’u hatah in demna aneiyin ahi.

Police leh court injong hiche thilsoh chungchang hi thutah a thutanna aneiya chule Prevention of Children from Sexual Offences, 2012 Act dungjui a akinthei pen’a gotna aphonkhum ding’in ngehna aneiyin ahi.

Hiche toh kilhon chun TSA in Child Welfare Committee leh State Commission for Protection of Child Rights hengah numei chapang teni ahiding lom’a compensation apeh ding’in Laljangam Hangshing, Secretary, Information & Publicity, TSA-GHQ in ngehna aneiye.

IGNOAPS noija tehse sum san anivei channa dia Kpi District a kihom ding

Imphal, Apr. 27: Chief Minister N. Biren Singh in Kangpokpi District avilnia District Social Welfare Office ana thenso tolhonin, lhakit (Lhaphul) nisim 2 apat Indira Gandhi National Old Age Pension Scheme(IGNOAPS) noija tehse sum san tulha lhabul’a ana kihom bangkhai ho chu kihom kitding ahi.

Hetdia kul khat chu, Kangpokpi District sunga hiche IGNOAPS noija tehse sum sang ding hohi agom’a tehse  4000 val ahin, tulha bul’a anahop nau chun athahlut diu lekha lhinglou jeh le adeh’a Bank Account a amin toh Aadhaar Card a amin’u kibahlou jeh’a atamjo anahop dohjou lou’u ahin, hiche ahop masat uva changlou sese chu tua hi ahopkit diu ahi.

District Social Welfare Officer, Kangpokpi N. Usharani Devi in aseina’a, May nisim 2 apat nisim 4 chan DSWO, Kangpokpi office mun’a kihom ding chule May nisim 8 apat nisim 12 sunga Bal Bhavan, Imphal mun’a kihom ding ahi.

Hiche phatsunga kilah manlou hon hatpa khat sunga Monday le Wednesday nikho cha cha le DC office mun’a um District Social Welfare Office mun’a ahung kilathei diu ahi. Amavang nikho teng le Aadhaar Seeding le Field visit kibol jiding ahijeh in kot kihonglou ding ahi ati.

DSWO nun aseibena’a, tehse hohi a insungmi ten alekha hou dihchet a asuhtep uva ahile sum kihop peh hi navah jep’a gangthei jep ding ahijeh in gelkhohna neitah aahin boipi diuvin temna aneijin chule Bank Account le Aadhaar Card a min kibang lou hon Bank dan dungjuija asuhdih tei diuvin ahetsah in ahi.

Bank hetpeh loule Bank dan toh kikal’a computer a hin kisemdih tho hohin khonung a pension card achan thei ahijeh in hitobang hi bollou beh din DSWO nun hetsahna jong aneijin chule koitobang akisei nahsah louva boltei tei aum’a khonung pension card kilah louna aumkhah le Department le asunga natong ho ahin oimo lou diuvin jong aseijin ahi.

Congress councillor 23 in BJP jop

 Itanagar Apr. 27: Itanagar Municipal Council (IMC) akon in Congress Councillors 25 lah’a 23 in Wednesday ni nilhah lam’a chun Chief Minister Pema Khandu leh BJP state President Tapir Gao panna Bharatiya Janata Party (BJP) anajop taovin ahi.Itanagar Municipal Council (IMC) hin 30 councillors anei in hiche lah’a chun Congress in councilors 26 anei in ahi.Paty member hon member khat ana haisah utoh kilhon in tu tuhin Congress in IMC ah councilors 25 anei un ahi.

Councillor 20 hochu Chief Councillor Kipa Kaku leh Deputy Chief Councillor Tarh Nachng teni lamkai nan lalut nakin thupi tah chu ananei un ahi ahin mi thum ho vang chun boi na ananei tah  jeh uvin hiche kin na chun pan anala tahih’u jong leu a join nao thu lekha in ana thot tho uvin ahi.

Khandu in aseina’a chun; BJP nahin jop’u toh kilhonna tu apat lungkitoh tah leh lungthakhat tah’a Itanagar sung keu hilouva state sung pumpi hi esem hoi ding’u ahi ati.Chuleh hiche tobang BJP jop ding lunggel anei nao’ah apachat nathu jong aphondoh in ahi. BJP noi’a Prime Minister Narendra lamkai nahin thil jouse hung kikhel ding ahidan jong asei in ahi.

IFCD Minister in Mapithel Dam in asuhkhah khomi ho toh kihoulimna nei; high power committee khat semdoh ding’a thulhuhna nei’u

Imphal, Apr.  (DIPR): Mapithel dam in asuhkhah miho hahsatna sulham ding high-power committee khat kisemdoh ding ahi tin Irrigation and Flood Control Department (IFCD) Minister Letpao Haokip in aseiye. Committee hi Letpao Haokip in alamkai ding ahi. PHED, CAF & PD , Works and Agriculture Minister ho le Mapithel Dam-affected body thum ho’a kon mi khat cheh member hiding’u ahi.

High-Power committee semdoh ding hi tuni Mapithel Dam kimvel’a um khomiho le IFC Official hon Parliamentary Secretary (PHED) le Phungyar MLA, Leishiyo Keishing in kihoulimna aneina’uva thulhuhna ahinsemdoh’u ahi.

Tuni kihoulimna’a chun Khomiho’n gentheina atoho’u asei’uvin, Letpao Haokip in jong lunglut tah’a mipi ho houlimna angailhah jou chun higher authority heng’a mipi gentheina asuhlhap ding’a ngehna kinei ding ahi tin donbutna aneiyin ahi.

Tuni kihoulimna’a chunk ho 17 a kon haosa upa ho le Mapithel Dam Affected Coordination Committee (MDACC) Co-Chairman M.Ngaranmi in pan ala’uvin ahi. Chuleh government thalheng in Secretary (IFCD) Gopen Meitei, Chief Engineer (IFCD) Ksh.Pritam Singh chule IFC Department official phabep in pan ala’uvin ahi.

March sung’a gari accident jeh’a mi 28 thina chungchang report government heng lhungta

Imphal, Apr 27 (DIPR): March lha a National Highway-2 leh 37 a gari accident na a mi 28 thina Inquiry report chu government hengah akipelut tan ahi.

Hiche report chu Director (Transport) H. Roshita in ahinpehlut ahin hiche a chun accident toh gari chun validity leh vehicle permit suhsah aneipon Ranjit Kumar (27) s/o Badhu Ram leh Deepak Rasaily (29) s/o (L) Khadka Bahadur Rasaily in achoilhon driving license jong adihlou ahi ati.

Hiche toh kilhon chun Chief Minister N. Biren in asungthu khuolgilbe ding’in Manipur Director General of Police (DGP) hengah hiche chungchang’a committee khat asem a chule nikho 15 masang’a detail lhingset ahin pehlut ding’in thupeh aneiyin ahi. Chule Transport Department toh kitho’a accident toh gari, driving license, registration/permit chule validity chungchang’a report jong lhakhat sung’a ahin pehlut ding’in DGP hengah aseiye.

Committee in report submit ahinbol joutengle Government in hitobang lekha dihlou issue bol authority ahiloule issue bolpa/nu chunga khoutah a action kilading ahi tin Chief Minister N. Biren chun aseikit’e.

Rongmei tribe ho indigenous Naga ahi ti’a hetpehna ana umsa Cabinet in ladoh

Nagaland, Apr. 27: Nagaland Government  in August nisim 4, 2012 nikho’a Rongmei tribe ho Indigenous Naga Tribe ahitai ti’a hetpehna  (recognition) ana bol chu tuni’a pat lahdoh ahitai tin official thuphon khat in aseiye. Thulhut in aseidan in Rongmei tribe ho lah’a mihem 1,313 vel hi Government of Nagaland in special enumeration abolna’a 01-12-1963 masang’a pat Nagaland a ana cheng’u ahitai tin hetpehna aneisa ahi. 01-12-1963 masang’a pat Nagaland a ana cheng Rongmei tribe ho hi Nagaland sung’a tutu’a indigenous status aneiyu le privileges le entitlement aneiho’u angaibang’a amujing nalai ding’u ahi tin thulhut chun aseiye.

AMWJU in Moreh khopi a Branch Office hongdoh

Tengnoupal, Apr. 27:  All Manipur Working Journalist Union (AMWJU) in tuni April nisim 27 nikhon Moreh Branch Office hondoh na kinguon chu Meetei Council Moreh (MCM) Office Conference hall ah anei taovin ahi.

Hiche kinguonna chun A. Bhakta Singh, President incharge AMWJU, Jit Ningomba Secretary AMWJU, Borun Thokchom Treasurer AMWJU hon pan alauvin ahi. Chule Moreh khopi a um Community Lamkai President le Secretary honjong ana op uvin ahi. Chule AMWJU a kon in Office thah a kiman chah nading in dangka 5000/- jong ana peuvin ahi. Moreh khopi sunga Thusuo mi hojong hiche kin ah ana jao uvin ahi.

Churachandpur hi Rhino horns kivei nalam’a munpi ahitai:Bibhab Kumar Talukdar

 Imphal, Apr. 27: Manipur sung’a ding in tu tuhin Churachandpur hi daan toh kitoh lou’a gamsaa lam’a  kivei nalam’a mun thupi pen ahung hidoh tan ahi. Wildlife crime hetgil na neihon aseina’a chun; Nagaland sung’a ding nga hitobang thil kibol na chu Dimapur anahi in ahin tun Dimapur gamsung’a sang in Manipur sung’a um Churachandpur mun ah hitobang rhino horn ah kivei mi atam lheh jeng tan ahi ati.

Tun Churachandpur hin daan toh kitoh lou’a rhino horn kivei nalam’a hin controlled abol tan ahi ajeh chu hiche thil ho hi atamjo Myanmar lam’a pat hung ngen ahitoh kilhon in Dimapur hi rhino horn kivei nalam’a mun thupi tah’a  anakihe chu tun ahi jou tapoi tin Bibhab Kumar Talukdar in asei in ahi.Hiche tobang thil ho hi atam jo’a Myanmar gam lang’a kivei hon aga lah ji ahijeh in Churachadpur ading in alampi avang lheh jeng in ahi.

Kakching Lamkhai- Wabagai lamlen kisem vahding ahi: MLA Y Surchandra

Imphal, Apr. 27: Kakching MLA Y Surchandra in Kakching Lamkhai ‘a kon Wabagai lamlen Kakching Municipal Council councillor leh chairperson, National Highway Division 1 engineer chule Kha Maikei Light Vehicle (Passenger) Association team member hotoh vetlhahna anei uvin ahi.

NHD1 thalheng’a tour’a executive engineer K Premkumar leh assistant engineer K Arunkumar pang ahi. Lamlen gangtah’a sem phat ding’a MLA pa in kitepna anei jouvin passenger service association hon kiphinna chom chom agon ho aladoh tauvin ahi. 15km lhing lamlen  semphatna natoh kipan ding ahi’in, centre sorkar in lamlen semna’a ding’a dangka 18 crore apeh ahi, tin MLA Surchandra in aseiyin ahi. Kho aphat phat leh natoh kipan ding ahi, tin aseibe’e.

Japi in tosotna aneiya chule sorkar gam, lamlen pang’a kisa inmun, dukan chule adang dang ho alha-ong diuvin temna aneiyin ahi. Chule lamlen’a thil kikoi hohi ngaichat ahileh hunam’a kiladoh/kisutheng ding ahi, tin aseibe in ahi.

Extra Judicial Killing thu’a Center in ‘curative petition’ apeh SC in san pehlou

Imphal, Apr. 27: July 2017 thutanna lekou kit ding’a center in ‘curative petition’ apeh Supreme Court Division Bench in asanpeh tapon ahi.

Curative petition hi April 12 nikho’a centre sorkar in apeh ahi’in, Manipur gam’a Indian Army chule paramilitary force hon hunam aval’a aman theilou ding chule hehna jouse khol ding’a SC in thutanna anei thu toh kisai ahi. Judge 5 panna division bench in ‘curative petition’ angailhah jouva ‘Rupa Ashok Hurra Vs Ashok Hura leh 2002 adang ho thu aseiya asan pehlou ahi.

Tapta in River Bank Music festival bol ding

Imphal, Apr. 27: Leipung Wah Entertainment in River Bank Music Festival fourth edition agong in, tukum thupi hi khangthah ho ding gelna’a vadung twi suhboh lou nading ahi.

Nongmaishang, Bhagyabati Leikai, Imphal East district, Imphal vadung kom’a ahung lhung ding April nisim 29 leh 30 nikho leh River Bank Music Festival umding ahi. Leipungwah Entertainment Director leh Co-ordinator, Tom Maisnam in thuso miho akimupi in, vadung pam’a nen-leh-boh kipai hi mipi themmona ahi, tin aseiyin ahi. Khonung teng gam-leh-go chule vadung dinmun itobang hiding ham, tihi thudoh lentah ahi, ati. Hiche jeh’a kho-leh-veng athen nading’a vadung thengtah’a koi ding thuthot neithei nading’a music festival kigong ahi, tin aseibe in ahi.

Music festival’a gamsung’a kisem thil ho kijohna dukan, nehthei kijohna dukan jong umding chule poster campaign leh media platform mangcha’a awareness campaign chom chom jong umding ahi. Kin-gon sung’a ‘cycle for change’ ti thupi’a cycle rally jong kibol ahi’in, Manipur Legislative Assembly Speaker Yumnam Khemchand in achesa April nisim 16 nikho’a ‘cycle rally’ hondohna anei ahi.

World Malaria Day  kimang

Chandel, Apr. 27: HTC Hall, Moreh tolpi, Tengnoupal district’a  ‘End Malaria for Good’ ti thupi in Word Malaria Day, 2017 achesa April nisim 25 nikhon akimang in ahi.

Diocesan Social Service Society in Intensified Malaria Control Project -3 (IMCP-3) tohgon noiya abol kin-gon’a Dr. Sebum Shakshung Moyon, District Malaria Officer, Chandel leh Fr. Dominic Kanmi, Director, DSSS Chief Guest leh President in apang lhon in ahi. St George leh Don Bosco School simlai hon Malaria Quiz competition’a pan ala uvin, kipaman hopdohna jong anei uvin ahi.

Dr Shakshung in ahoulimna’a, chapang chule naovop numei hon Malaria natna alah bailam jep thu aseiyin, chule natna suhmang phat ahitai, ati’in, NGO DSSS pan lahna chung’a kipathu aseiyin ahi. 2020 kum kah’a Malaria suhmang nading lungtup hi bulhit ahina ding’a simlai hon pan alah ding thupi ahi, tin Fr Dominic Kanmi in aseiyin, chule Th Rocky, IMCP-3, District Project Officer in pan la ho jouse chung’a kipathu aseiyin ahi.

Centre in Northeast job creation policy thu’a kihou khom na nei’u

New Delhi, Apr. 27:  Narendra Modi led NDA government in Himalayan state leh Northeast sung’a job creation policy chung chang thu’a kihou lim na ananei un ahi. Niti Aayog leh department of industrial policy and promotion members hon tu tu’a government toh akihou nao report asem lai tah’u ahitoh kilhon in  chomkhat jouleh hiche kihou naho chu ahin phongdoh vahtah ding uvin jong thuso miho kom’a  chun anasei in ahi.

Northest leh Himalayan states ho hin hiche tobang policy hohi ana kithum jing ahi tin Commerce Minister Nirmala Sitharaman chun aseiye.Hiche police hi Northeast leh Himalayan seh hilouva Jammu and Kashmir’a jong kiche pi ding ahi. Atal Bihari government in special package ading nga J&K,Himachal Pradesh leh Uttarakhand jong ana phondoh sa ahitai.

Hiche package chu fiscal incentives leh concessions chom chom, North East Industrial and Investment Promotion Policy (NEIIPP) hi 2007 na chu ana kiphal peh’a  tukum March 31 na chu anakichai ahitai.

Nagaon mun’a daan dih lou’a sum kitha najeh’a mi 13 kiman

 Guwahati Apr. 27: India Premier League (IPL) chelhah jing toh kilhon in daan in aphal lou sum kitha na hiche cricket kichep seh lehS aum jing toh kilhon in hiche sum kitha na’a hin atam jo gang ho kichep na ana hiji in ahi. Phat masa injong Nagaon district mun’a gang ho in Indian Premier League kichep na’a sum ana kitha jing jeng ji  uve tin police ho’a kon kimu thulhut chun asei in ahi.

Nagaon, Senchowa mun na hotel khat nah hitobang daan din lou/sum kitha na aum me tithu akijah toh lhon in kholchil na anakinei na’a chun mi 13 ana kiman in ahi ati Nagaon deputy superintendent of Police Samiran Baishya in aseiye.

Hindi film superstar Vinod Khanna in aleiset hinkho dalha ta

Mumbai, Apr. 27:  1960s le 70s laiya Hindi film a hatah’a hung minthang superstar Vinod Khanna in tuni chun aleiset hinkho adalhatan ahi. Vinod khanna hi October nisim 6, 1946 kum’a chu Peshawar a anapeng ahi. Anu le apa min Kamla le Kishanchand Khanna ahi.  Vinod Khanna hin St.Mary School, Mumbai’a lekha ahin siman’a phat chomkhat jouva Delhi’a um St.Xavier’s High School’a ana kichonlut ahi. Apa natoh na mun mun’a kichonle ahijeh’u chun phat chomkhat jouvin, Mathura Road a um Delhi Public School a lekha ahinsimkit in  1960 kum chun a insungmite toh Mumbai’a ana kichonlut kit’uvin ahi. Mumbai a aum sung chun Nashik kom’a um Deolali, Barnes Chool’a lekha ahin simpan kit in ahi. Phat chomkhat hou chun Sydenham College, Mumbai’a kon Commerce degree a graduate ahin chai in ahi.

Boarding a aumlai chun nikhat aloi ho toh ‘Solva Saal’ le ‘Mughal-e-Azam’ agave’uvin ahileh hiche film teni chun Khanna chu cinema lang a akailut tul tul jeng in ahi. Graduate ahin chai jou chun Sunil Dutt kichepna ‘Man Ka Meet’ (1968) kiti film khat’a role neokhat ahin mu in ahi. Hiche film  hi Adhurti Subba Rao in direct abol ahi. Film a chu Khanna negative role’a ana kichem ahijeng vang in lead actor ho sang in hatah in ahung minthang in ahi. Mainstream film ahung lut masang in jong film neo cha cha (budget lhom ho) a negative role (miphalou ) in ana kichem jing in ahi.

Achaina in 1971 kum chun Bharati Vishnuvardhan toh ‘Hum Tum Aur Woh’ kiti film khat a lead hero in ahung kichem in hatah in ahung minthang in ahi. Hiche film ki release jouva kipat chun Khanna in nung heilou veisan atho in  hit film bang neicha in ahin neipantan ahi. 1973 kum’a ‘Achanak’ kiti film a acting aboldan chu critics hon sangtah in ana seipha’uvin ahi.

Khanna in ahin laiya film anatho ho lah’a hetthei ho chu Mera Gaon Mera Desh, Gaddaar, Jail Yatra, Imtihaan, Inkaar, Kuchhe Dhaage, Amar Akbar Anthony, Rajput, Qurbani, Kudrat, Dayavan, Kaarnama, Suryaa: An Awakening chule Jurm kitiho hi ahi.

1980 laiya ahung minthan laitah chun leiset nopsahna ho le loupina ho ana nungsun in hinkho theng mang ding in ana kipedoh in ahi. Kum 5 vel hinkho theng tah ahin manjou chun Film lang’a ahung vel lut kit in ‘Insaaf’ le ‘Satyamev Jayate’ ahin tho in  film teni jong ana hit in ahi. Khanna in kipaman jong tampi ana sang in ahi. Hiche ho chu-Filmfare Best Supporting Actor Award (Haath Ki Safai), Filmfare Lifetime Achievement Award, Kalakar Awards Lifetime Achievement, Stardust Awards-Role Model for the Year, Zee Cine Award for Lifetime Achievement ahi’uve. Aleiset hinkho adalhah masang chun Gurdaspur AC sung’a jong MP ana tuh in ahi. Vinod hin 1971 kum chun Geetanjali toh houdan theng in kichenna ana neilhon in chapa ni-Rahul le Akshaye Khanna- ahin lhon in ahi. Ahinlah phat chomkhat jou chun a inneipi Geetanjali toh kikhenna aneilhon in ahi.

1990 kum chun Kavita toh kichenna ana neikit in  chapa khat -Sakshi le chanu khat -Shraddha ana hing lhon in ahi. Khanna hin akum ahung tam lang’a chu Cancer natna ahin neiya April nisim 27, 2017 nikho’a chu aleiset hinkho ana dalhah ahi.

Zillai GHQ le Heiroklian  VA in Lamthianlal kimat demna nei lhon

Imphal, Apr. 27: Imphal West Commando le 6th Assam Rifles, Andro Post in combing operation abolna’a Heiroklian vangkho’a cheng Lamthianlal s/o Thanggen amatna chu Zillai (Vaiphei Students’ Association) in sangtah in demna aneiyin ahi. Combined force ho chun thingnoi hon khosung’a adalhah’u manchah phabep amudoh jeh’uva ginmo husan’a Lamthianlal amat’u ahi tin Zilllai GHQ Inf. & Pub. Secy. Khailalpiak Vaiphei’a kon kimu thulhut in aseiye.  Chuleh khonung ding gellou va khosung’a manchah dalha thingnoi ho chung’a jong alungkimlouna aphongdoh in ahi.

Heiroklian Village Authority  lamkai hon aseidan un Lamthianlal hi Heiroklian vangkho  a ding’a  church Elder ahi’n, ipi lam hijong le thingnoi ho toh kisaina aneipo’n ahi.  Combined force hon minphatna ding’a thukholtoh umlouva Lamthianlal amat jeng’u hi vangset umtah ahi tin VA lamkai hon asei’uve.  Chuleh combined force in Lamthianlal agangtheipen’a ahin lhadoh ding in jong VA le Zillai  in ngehna aneiyin ahi.

EVM tampering chungthu’a Uttarakhand HC in EC  heng’a EVM ho seal abolding’a thupeh nei

Uttarakhand, Apr. 27: Dehradun, Vikasnagar constituency sung’a EVM tampering kibol jeh’a petition khat amu dungjuiyin Uttarakhand High Court in Thursday ni chun Election Commission le State government heng’a EVM jouse seize  le seal abol ding in thupeh aneiyin ahi.

February lhasung’a ana chelha assembly poll a chu BJP candidate Munna Singh Chauhan in cabinet minister lui le congress candidate Navprabhat chu vote 6,418 a ana sotlhah ahi.

Hetthei khat chu Uttarakhand High Court’a petition seplut chu Navprabhat mama hi ahi. Navprabhat  in petition aselut dungjuiyin Justice Shailesh Kumar Gupta in  Election Commission le state unit,  state chief secretary le RO in lhagup sung’a donbutna apeh ding in thupeh aneiyin ahi. Chuleh Vikasnagar Judical Magistrate in jong EVM ho seal le seize abol din gin jong thupeh aneiyin ahi.

Hiche chungtu’a Chauhan in thuso miho akimupina’a aseidan in EVM tampering chungthu toh kisai hin  High Court a kon in notice jong kamu’e ati. Aman aseibena’a chun EVM tampering hi tumasang’a jong ana kisei jing ahi ati. Election Commission in jong EVM ho jouse hi tamper-proof ahi ti’a ana seijing sa jong ahi tin Chauhan in aseiye.

Thusoh Lahchom

PHE official 2 suspend kibol

Yaiskul Chingakham Leirak a Drainage and Severage kisemchai louva kidalhahna mun’a accident anaum jeh in Chief Minister N. Biren Singh in tuni (Apr. 27) chun Public Health Engineering (PHE) official 2 kitah tah’a na atoh lhonlou jeh’in suspend aboltan ahi. Hiche thuphon hi Addl. Chief Secretary (PHE) Shambhu Singh in ahinbol ahi. Atohna a kon’a suspend kibol official teni chu Assistant Engineer Laishram Irish Singh leh Section Officer Keisham Patel Singh ahi lhon’e. Suspend a aumlhon sung’a hi lhalo lhomcha bou amu lhonding chule a headquarter lhonjong Imphal hiding ahi akiti.

Thingnoi kiman

Imphal West commando leh 6 Assam Rifles hon KNA thingnoimi 2 leh AK rifle 3 chule meichan 500 Kamu Tamnong kho, Senapati district’a Thursday jingkah nidan 12.40 don’a operation abol na uvin aman doh uvin ahi. Akiman thingnoimi teni hi Thoilen Vaiphei (32) leh Lelen Vaiphei (30) ahi. Sepai hon AK rifle 2, M3 rifle 1, pistol 1, AK rifle magazine 6 chule meichan 215 jong amatdoh-u ahi.

Padma Shree

March nisim 30, 2017 nikho’a Rashtrapati Bhavan, New Delhi’a Padma Shree kipaman sang ding a lhendoh hi Birendra Singh  chun boina khat aneijeh’a ama khut tah’a kipaman akisan theilou ahi tin Information and Public Relations, GoM, Assistant Publicity Officer (Press) N.Krishnakumar Singh a kon kimu thuphon khat in aseiye. Padma Shree kipaman hi Chief Secretary O.Nabakishore Singh in April nisim 28, 3017 nikho le Birendra Singh chenna Paite Veng, Kwakeithel a agapeh ding ahi tin thuphon chun aseiye.

‘Amamba Numit’

Thoubal Apunba Lup (TAL) leh International Peace and Social Advancement, (IPSA) Kangleipak Manipur in Thursday nikhon achesa 1891 kum’a Manipur in Anglo-Manipur gal’a gol alel’a chamlhatna alhaso nikho geldohna in Amamba Numit (Dark Day) kin-gon amang uvin ahi. Thoubal Melaground Community Hall mun’a kin-gon kimang hi 19 channa ahi. Kin-gon’a Leishemba Sanajaoba chief guest in apang in chule TAL Samom Raghumani leh national awardee Kh Ibotombi leh social scientist Dr Dhanabir Laishram president leh jin-thupi in apang in ahi.

AR

HQ IGAR (South) 26 Sector Assam Rifles kithopina noiyin 4 Assam Regt in khonung’a kingailut napun cheh nadin April nisim 23, 2017 nikhon Chandel sung’a Khengjoi leh Moltuk kho ah Houin kikhom khomna ananeiyun hiche kin a kikhop na achun kho 100 lang’a kon lamkai, numei chapang tampin pan analan hiche kikhop na a chun methai ana hom un chadon khomna jong ana neiyun ahi.

 

Editorial

Phai sung’a Eimi Simlai chapang ho umchan

(Vetkol jep’a pha)

Achesa april nisim 14 (Good Friday) nilhah’a Eimi simlai chapang mi 2 miphalou phabep in hunam’a ana suhset’u chu eimi nungah ho chung’a isopiu phaigam miho suoset akhatveina keoseh jong ahitapoi. Hitoh kilhon’a April nisim 27 ni chun hiche thilsoh deilou vetsahna in phaisung’a mipi kijotna ana um in ahi. 2015 kum a jong chu phaisung’a eimi simlai nungah chapang khat le meilhei upa khat Restaurant a akimutuo nahon’a phaicham thingnoi hon anakap pil jep’u ahi. Hiche thilsoh chu tuchung’a thilsoh a sang in phaicham nitin thusobu ho’a ana kihaso jep in chule hiche thilsoh a chun eimi numei nu jong chun akhut ana kisuhkhah in ahi.  2015 kum mama chun Eimi Simlai nungah chapang 2 phaisung vengkhat’a sun noiya jukham pum’a lampi pang a konna matdoh ahi hon in, KSO-Imphal in amaho office a apohlut jou nung uvin anu-le-pa teu akou uvin ana pedoh uvin ahi. Phaisung hi themjilna munpi khat ahitoh kilhon’a simlai ho kinotna mun khat jong ahin, hitoh kilhon’a phaisung’a eimi simlai atamjo hi nu-le-pa toh umkhom louva inn-san a um ngen tobang ahin, nu-le-pa toh umkhomlouna mun’a simlai ho hi avekol ding le aphoh ding aumlou phatle amaho le a innsungmi dingkeu hilouva nampi kisan gei minsetna ahin lhut khahjiu ahi. Tuchung 14th April nilhah thilsoh’a mona neiho demdia lomtah ahinaban’a achan diuva lom gotna pehdiu mong chu ahinai, ahinlah hichelaiya isei nompen’u hi phaisung’a simlai chapang adeh’a numei ho umchan hi vetsui jep dingle avetsui dingdan hi ahi. 14 April thilsoh jong thip nailouvin april 22 nilhah lang nidan 6:30 pm vel in class-X simbep nalai Eimi nungah chapang 2 meilhei pasal ho toh Silheipung a avah’a acheu chu ahung kile lang uvin Lamlai PS a detained anakibol uvin ahi.  Hiche a eimi nungah chapang 2 meilhei pasal toh akingai/akigop chu se ahipon hinlah jaansot nung’a avadoh hon chu se ahinaban’a anu le apa ajoulhep’a tuition ladia kiseihon’a gollhang hotoh avadoh hon chu thilpha hilouhel ahi.  Vangset jeh le thildang dang jeh in jong numei ho chung’a  khansetna  jatjat lhung nante hinlah mihem in jong ijo chan’a vendoh  thei thil  um  ahi. Leiset chung’a numei  kisuhset  kiti  hi thil thahbeh ahipon chule NGO chuom chuom in jong pasal hon alungput akheldiuva alhangsap jing naban uva government in jong mi suse a pangho gotna sangpen pehdia jong aseijingsa ahi. Hinlah hitobang kigahbolna aum jou nung jeng’a jong numei chung’a khansetna hi asuo jing thei le ei-le-ei kivenbit chu thilpha pen hung  hiding ahi.

            Hiche na ding’a chu phaisung’a  simlai kiloikhomna hon pan nasatah alahdiuvin deisah ahin chule phaisung’a eimi veng um hon jong simlai kiloikhomna ho hi kithopina apehdiuva pha ahi. Hiche thu hi akintheilampen’a simlai kiloikhomna um hon ahin gelkhoh uva phaisung’a simlai chapang ho umchan khanchan hi itilampang’a kivekol le aphadem ti khat ahin ngaituo diuva dei umtah ahi.  Thil phalou soh ho hi alhangpia jaan noiya soh ngen tobang ahiji in, hijeh’a chu numei jaan valou ding chu aphapen hung hiding ahinaban’a chondan khandan neite ihi dungjui uva ipi ipa teu jeng in jong numei jaan va ana phallou pehpeh’u ahi. Ijemtia ipotdoh jongle isopi pasal ahiloule boina ituo chan’a jong ipanpi ngam ding mi kivet ngai ahi ti jong hi numei hon jong  ahetdiuva lom  ahi.  Natahsa chu nangthu thu hinante hijongle nang minsetna jong chu nampi minsetna hithei  ahi ti hi hetcheh ngai ahi. Achung’a kisei ho hi tuchung thilsoh a isopi teniu mo sona ahipon hinlah khonung’a hitobang dei umlou thil ho a konna ikivendoh theina diuva kisei ahijoi.

Blankfire

Dangka hijaja sanction akibolin kipedi ahi akititeng kinepna a dim tamdi akhohle thika kichuna jong kipanta maithei ahi. Mijousen khantou machal adeibang hin khantou machal tohguon ho kitosot sohkei levang ajeje uminte. Ijat kanedoh theidem kitisoh keilevang khansuh nungchal joh hidi ahi.