ET April 27 News (Local, Regional, Thusoh Lahchom, Editorial, Blankfire)

ET April 27 News (Local, Regional, Thusoh Lahchom, Editorial, Blankfire)

225
0
SHARE

Kangpokpi a CM N. Biren thupitah’a kivailhun, Economic Package

Imphal, Apr. 26: Chief Minister N. Biren Singh in tuni chun Kangpokpi district economic package a din Dk. 185 Crore ana phongdoh in ahi.

Hiche thu hi Chief Minister Nongthombam Biren Singh in Kuki Inpi le CSO ho gonna noiya Brig. Thomas Ground, Kangpokpi mun’a loppehna le phattheibohna kin’a ahoulimna a aphondoh ahi. Kin-gon’a CM in ahoulimna ah; mipi ten ahahsat naho’u government heng’a alhut theina dia government in kihot akihong jing in chule District DC ho kithopi ding’a government in Principal Secretary khatcheh kiguong ding ahi ati.

Kangpokpi district a dia economic package Dk. 185 crore a hi Women’s Market Dk. 10 crore vel lut’a kisa ding, Dk. 9.5 crore vel lut’a ITI semdoh hiding, Dk. 2.5 crore vel lut’a Sadbhavana Mandop sah hiding, Tribal Girls’ Hostel sahna’a Dk. 2.25 crore vel lutding chule Dk. 2 crore vel lut’a Guest House kisa ding ahi. Tuni kin-gon a chun IFCD Minister Letpao Haokip, PHED Minister L. Dikho, Social Welfare Minister Nemcha Kipgen, Forest and Environment Minister Th. Shyamkumar, Education Minister Th. Radheshyam, Tribal and Hill Areas Development Minister N. Kayasii, Hill Area Committee Chairman TT Haokip, Manipur Pollution Control Board Chairman L. Radhakishore, Parliamentary Secretary (Home) L. Sushindro, Parliamentary Secretary (Health and Family Welfare) S. Subhaschandra, Parliamentary Secretary (MAHUD) N. Indrajit, Parliamentary Secretary (Education) K. Robindro, Parliamentary Secretary (RD& PR) H. Dingo, Parliamentary Secretary (PHED) K. Leishiyo, Parliamentary Secretary (IT) Dr. Sapam Ranjan le Parliamentary Secretary (IFCD) L. Rameshwor Meetei hojong anajao uvin ahi. Kin a chun Kangpokpi district sung’a CSO chuom chuom a lamkai hole mipi tamtah in jong pan anala’n ahi.

Kin sung’a chun Chief Minister N. Biren Singh chu nampuon, dahpi le thilpeh jat jat jong peh’a ana um in chule nam chuom chuom a kon in nam laam vetsahna jong ana um naban’a Kuki Inpi Kangpokpi district in Chief Minister heng’a Memorandum khatjong anapelut uvin ahi.Tuni kin toh kisaiyin Chief Minister N. Biren Singh in  District Information Office leh District Social Welfare Office, Kangpokpi jong hondohna aneiyin ahi.

Kin-gon’a Minister ho, Parliamentary Secretary ho, MLA, ADC Chairman, ADC member chule bureaucrat leh police officer lamkai ho apang uvin ahi. District thah kisem holah’a Directorate of Information and Public relations noiya District Information Office kihon doh na masapen ahi. Athah’a kihongdoh office kitup tah’a achelhah theina ding District Information Officer khat, Information Assistant khat, Office Assistant khat leh rade IV staff DIO Kangpokpi’a aumsah uvin ahi. DIPR in tu’a hi Kangpokpi, Senapati, Ukhrul, Chandel, Churachandpur, Tamenglong, Thoubal leh Bishnupur district’a District Information Office aneiya chule New Delhi’a Manipur Information Centre ahon ahi.

State sorkar in Jiribam, Kakching, Tengnoupal, Kamjong, Pherzawl leh Noney district’a District Information Office ahon doh ding vat nalai ahi. BJP lamkaina coalition sorkar hi March nisim 15 nikho’a kisemdoh ahi’in, sorkar in natohna’a thudih’a natohna, kivaihom them chule nehguh umlou ding hi thinglhang leh phaicham’a chepi ding’a tupna anei lenpen ahi’in, japi in tosotna apeh louleh hiche hohi lolhing louding ahi. Athah’a kisemdoh district sagi’a District Information Office hon ngai ahi.

Alangkhat’a, Kangpokpi district’a tuhin district ICDS Cell chule State Social Wefare Department noiya District Social Wefare Office um ahitai. Social Welfare Officer, Saitu Gamphazol hi DSWO, Kangpokpi’a kikoiya Social Welfare Office, Saitu Gamphazol leh DSWO, Kangpokpi kigomkhom ahi. Alangkhat’a, CDPO, Kangpokpi jong District Programme Officer, Kangpokpi mopohna akipeh be in ahi.

Kangpokpi district’a ICDS project thum um ahi’in, chule project noiya Anganwadi centre 656 leh Mini-Anganwadi centre 65 um ahi. Manipur Old Age Pension Scheme noiya tehse 3538 in phatchomna amu’a chule Indira Gandhi National Old Age Pension Scheme noiya district sung’a mi 4011 in phatchomna amu ahi. Indira Gandhi National Widow Pension Scheme leh Indira Gandhi National Disability Pension Scheme’a beneficiary 206 leh 59 cheh um ahi.

District Information Office leh District Social Welfare Office, DC Complex, Kangpokpi’a hondohna in-gon kichaiyin ‘Go to the Hills’ kiti DIPR Manipur in produces abol minute 24 lhing documentary jong Chief Minister N Biren, Works leh IPR Minister Th Bishwajit, IFCD Minister Letpao Haokip, Social Welfare Minister Nemcha Kipgen leh Parliamentary Secretary K Robindro leh Dr Sapam Ranjan in hondohna aneiyin ahi.

Gamgiphai leh Kalapahar mun’a CM liemna neiyu

Imphal, Apr. 26: Kangpokpi district headquarter’a che Chief Minister N Biren Singh Gamgiphai leh Kalapahar mun’a mipi tamtah in liemna anei uvin ahi. Kangpokpi district’a ama ding’a Kangpokpi mihon kipapina kin-gon asem’a pang ding’a che ahi. Go ajuh vang’a chapang, numei leh pasal chule simlai tamtah Chief Minister liem ding’in lamlen pam’a jingkah’a konin ading uvin, ‘Kaliem uve”, chule “N Biren damsot in” tia lekha kisun akidop uvin ahi. Gamgiphai alhun’a Sadar Hills Chiefs Association in khosung miho thalheng in CM jat pon ape uvin ahi. Kalapahar mun’a jong CM liemna anei uvin, Gorkha tamchenna mun’a Sadar Hills Gorkha Union in liemna kin phat chomkhat aman peh in ahi.

Union lamkai hon Gorkha thil Khukri, Topi leh del CM ape uvin ahi. Khosung teni’a CM liemna in lekhajem lentah’a kisun thil atahdoh uvin ahi.

Chapang ho khonung hi lunggel pha’a sempeh ding ahi: Th. Radheshyam

 Imphal,  Apr. 27 : Education, Labour & Employment Minister Th Radhesyam in chapang ho lungthim hi sem ngai ahi’in, idei deiya puithei ahijeh’a thil pha khumpeh ding ahi, tin Smart Universal Academy, Sekmaijin Khunou, Kakching mun’a 6th Foundation Day kin-gon’a chief guest apanna’a aseiyin ahi.

School in chapang lhasam ho asem phat’a, lhahsamna nei jong leh asemdoh thei teng lebou school pha tia kisei ahi, tin Minister in aseibe’e. Nu-leh-pa chule teacher hon simlai ho ahetthem angaidan thu aseibe in ahi. Themjilna hi tohmun mai mai ahipon, chapang ho khankho lolhing tah’a sem nading ahi. Haosatna leh vaichatna hi lolhin leh molphou kilepna hilou ding ahi ajeh chu lolhinna hi tupna’a um ahi, ati. Kin-gon’a Dr Yumnam Radhesyhyam Singh, MLA Hiyanglam A/C leh Chairman (MANIDCO & MANITRON), Sapam Kunjakishwor (Keba), vice president NEIDP chule DIPR’a retired officer hojong apang uvin ahi.

Eimi simlai 2 hunam a kisuhsetna demna a Imphal khopi sung japi kijotna umding

Imphal, April 26 (ET): Eimi simlai 2 hunam a kisuhsetna thilsoh demna leh thilsoh chunga thudih kitanna ding ngehna a 27th April 2017 (Thursday)nile Imphal khopi sunga japi kijotna umding ahi.

Japi kijotna hi jinglam nidan 9 leh kipan ding, mipi kisuhtona ding mun Thangmeiband Gate (NCC Ground) a pat Khoyathong, Nagamapal, Ima keithel, GM Hall, DM College Gate (PCTC side) jotpa a kijotna chelhading, chujoule kijot kipatna Thangmeiband Gate a ‘Public Meeting’ umding ahi.

Achesa 14th April jaan thilsoh -Eimi simlai 2 hunam a kisuhsetna thilsoh deilou vetsahna leh khansetna neiho atotoh a gotna chansah ding ngehna japi kijotna hi KSO injong akitisot in, Imphal khopi sunga eimi hojong tamnathei channa panla dingin KSO-Imphal a kon Paolien Kom, Secy. Info.& Publicity in mipi tiemna togom in hetsahna ahinneiyin ahi.

Langkhanpau Guite in ADC Chairman a kon ahaina jeh hilchen

B.Lalboi Gangte

CCpur. Apr. 26(ET):  Autonomous District Council, Churachandpur  Chairman lui Langkhanpau Guite in tuni jinglam nidan 11:00 in thusoh lakhom ho kimupi nakin achenna inn mun’a aneiyin ahi. Hiche phatsung’a Langkhanpau Guite in ahoulim na ah; 2010 akipat 2015 sung ADC Term 1 lhingsel vaipoh na akineijou in Term 2 nading in kum 2 lhingdeh chet vaipoh na ahung kinei kit in vannoi hi kikhel na leiset chung’a ahitoh kilhon’a kivaipoh na lamkai kikhel na ahung um in ahi ati.

Term khat le lha 18 sung Chairman kahin poh naphat sung’a kithopi naleh tosot na hinpe jing MP, MLAs, Council Members ho, DC, SP, DLOs, 27 Sector AR, BLOs, Hou lamkai, Tribe Leaders, Students Organisation ho, Phinlantrophic,  Women Organisation ho District mipi hochung’a kakipa nathu kaphongdoh e ati. Maban’a Council kivaihop na ahatcheh nading leh ahoi cheh nading’a lamkai ho keimatah injong tosot naleh full support kapeh ding ahin chuna ban’a district mipi leh CSO hon jong tosot na pecheh din tepna aneiyin ahi.

District Council hung ki form dan hi 2010 -2015  term khatsung INC Govt. ah form akibol in, hitoh kilhon’a Govt. toh kitho khom na in mipi toh pangkhom in 2010 MLA Election ah District sung’a  MLA 6 Congress ah tundoh ana hin, hitoh kilhon’a ADC suhpilhin nading leh 26 Subject Council in ana kipodoh in hiche holah’a Separate Budget hihan Council suhpihing ding’a Congress Govt. heng’a kingeh ho khatcha suhbulhit na aneilou naban’a KNO leh UPF jong Talk neipiding’a ana kisei jengjong Congress vaihop naphatsung’a ama dokhang chung’a seipoh ana hilou toh kilhon’a 2014 MDC Election phatsung’a Congress ticket kilalou’a Independent ah ana kitet’a akilhin toh kilhon’a HPA Members 27 jaona Council Govt. ana kibol ahi ati.

Chuleh tuchung BJP kilut nading ahin Condition aum in  ahhi, Chairman touna napailhah’a nahai masat ding chuti lou leh nakipeh lutthei loudiu ahi, Leadership nachu thei lou di ahi tiho aum in, ken vang khoh kasapon kum 5 sung leh tuchan pathen goljona’a Leader kahin mitam jo dei chu kenjong kadeiyin keiman jong tosot na pedi’a kimansa’a um kahi ati.

Council in tohbang khai ho toh dohding’a kithulhah naho lamkai thah hon ahin suhbulhit diu jong kaki nem in, Council thah lamkai ho pathen in goljo na pehen lang district sung’a Community chom chom kichengkhom ahi na a lungkhat le thakhat’a tusang’a kingailut na ahinlhut diu hi kei kinep na ahi ati, District mipi jouse in jong Council tha hat nadia mipi ietoset chih diu hi keiman mipi ho katepna ahi ati.

CM in Sugnu a SBI branch ahondoh ding’a SBI Branch Demand Committee in ngehna neiyu

Chandel, April 27: C.M. N.Biren Singh lamkaina BJP sorkar in Manipur thinglhang gam le phaicham kitang guol’a akhantouna ding’a pan alahnaho chung’a Ex-MDC., Chairman-S.B.I.Branch Demand Committee, Sugnu Th.Haokhothang Baite in apachatna thu aphongdoh in ahi.

Th.Haokhothang Baite a kon kimu thulhut in aseidan in, Sugnu Municipality sung’a um district li (4) – Kakching, Chandel, Bishnupur le Churachandpur khomiho hin Sugnu’a SBI branch khat hondoh ahina ding’a 2008 a pat ngehna hung kinei ahitai ati. Gamkai sung miho hin banking facility ho aman nom teng’u le district headquarter ajot tei’u ngaiji ahi’n, hiche hi mi tampi ding’a thil hahsatah khat ahi.  Gamkai sung miho hin CM kinep pina lentah akineiyin, CM in jong agangtheipen’a ngehna kineiho ahin suhbulhit ding akihetjeh in achung’a kipathu akise masa’e tin Th.Haokhothang Baite’a kon kimu thulhut chun aseiyin ahi.

Lhaseh’a Date 15 hi ‘Mijouse Nikho’ ahi:CM

Imphal, Apr. 26 (DIPR):  State Government in lha sung nga nikho 15 chan ni khu/a nikho 15 chan ni suty ana um khah leh ajing nikho khu Meeyamgi Numit/People’s Day a ding in phondoh na anei tan ahi.

Hiche Meeyamgi Numit/People’s Day nileh hin Chief Minister,Deputy Chief  Minister, Ministers, Chief Secretary, DGP, Administration  Secretaries, Heads of Departments,Deputy Commissioners, SPs chuleh SDOs/BDOs hon mipi te amaho office cheh’a jingkah lam nidan 10 apat jilhah lam nidan 4 chan ahahsat nao leh alunggel’u asei thei nading uvin hiche nikho leh hin akimu pi thei ding’u ahitai.

Moreh town sung’a sign board jouse’a Tengnoupal district joh tah tah ding’a hetsah na

Moreh, Apr. 26: Thulhut kimu dungjui in tuni chun Moreh town sung’a  sign board dung’a Tengnoupal district kitah lou ho jouse ana lalha taovin ahi.

Kuki Students’ Organisation,Moreh makai nanoi in town sung’a dukan,hotel,office chuleh school hon Chandel district hitalou va Tengnoupal district joh suh tah ding tia thuso miho ana hetsah utoh kilhon in tuni chun kolchil na anei nao’a sign board dung’a Chandel district kitah  nalai ho se se chu ana la lha uvin KSO,Moreh office complex mai’a ana hal lha un ahi. Tonglal Lhungdim,Vice President(external) KSO in thuso miho kom’a aseina’a chun;Moreh town sung nga sign board dung nga Chandel district tia kitah nalai mi tamtah aum nalai in ahithei leh Moreh sung hi Tengnoupal district sung’a um ahitah jeh in mijousen thuso mangcha’a kisei anit ding uvin hetsah najong anei in ahi.Koi tobang in Chandel district tia sign board kitah nalai ana um khah leh achung thu nasatah a kisei ding chuleh sign board hojong kihal lhah peh ding ahi tin jong hetsah na aneibe kit in ahi.

Numei chapang 2 hunam’a suse Th. Sadananda Singh Cheirap court mai’a woman activist hon bulu

Imphal, Apr. 26: Aloi phabep toh numei chapang ni (2) hunam’a suse Thongam Sadananda Singh ,22, chu tuni Cheirap Court Complex maiya Women Activist ho nana bulu’uvin ahi.  Hetthei khat chu Thongam Sadananda Singh hi numei chapang ni suse ho lah’a apilhing (adult) amabou ahi. Sadananda chu tuni Imphal East Session judge G Gomei angsung’a thutanna’a gading ahi.

Tuni thutanna’a Sadananda Ukil pa in judge heng’a case apohdohna’a chun, Sadananda hi rape case a panglou ahi’n, jouthu’a kiheh ahibouvin bail peh ding’a lomtah ahi tin aseiyin ahi. Bail petition chungthu hi hearing aban tengle (April 8) kihe chen ding ahi.

Hearing kichai chun Court in Sadananda chu Police custody a nikho li (4) um ding in thupeh aneiyin ahi. Police in Sadananda court juon a ahinpui’u chun women activist phabep in ana lamtin’uvin  muona neiya kingohpa chu atamse ‘uvin abang chun twi thei (water bottle) a ajep’uvin ahi. Police hon Sadananda chu armoured vehicle a akailut’uva ajampi phat’uva boina chu hung kemsuh bep ahi.

Thilsoh’a muona nei mi gup (6) ho vang tugei hin Takyelpat a um Juvenile Home’a aum nalai’uvin ahi. Amaho chungthu hi Juvenile Justice Board in jing nikho le ngailhahna aneiding ahi.

Hiche kahlah hin kiloikhom chom chom le lunggel thei gamsung mihon thilsoh demna aneijing’uvin ahi. Juvenile dan’a kisei muona nei mi gup ho scientifically very bolding in woman activist hon ngehna anei’uvin ahi. Ajeh chu mi pilhing khat kumlhinglou lai sosahna ding’a certificate hi bailamtah’a jong semthu thei ahi.Woman activist ho chun muona nei migup ho ossification bolding tin jong ngehna anei’uvin ahi. Muona neiho atotohchet’a guotna peh ahina ding’a April nisim 27 nikho le United Peoples Front (UPF) lamkaina’a rally khat jong chelha ding ahi.

‘Cleanliness drive’ aumjing vang’a khopi mun phabep’a nen tamtah kise jing nalai

Imphal, Apr. 26: Imphal Municipal Council (IMC) in tuni chan geiya Imphal khopi leh akimvel’a ‘cleanliness drive campaign’ lentah tah abol imu uvin, Imphal khopi suhtheng ding mipi lungthim’a aum theina ding bidoiya campaign kibol ahi.

Ahin, vangset umtah in Imphal khopi’a Chandu Wine Shop kiti Majorkhul munvel, MG Avenue, Impha’a nen kipai tamtah akimu in, khopi lailung’a thenna ding natoh akichepi jing vang’a nen-leh-boh tamtah akikhol nalaiyin ahi. IMC in ama noiya um gamkai hi tuchan’a iti asuhtheng louham, tihi thudoh ahi’in, nen kipaina kom’a mipi cheng’a chule dukan tamtah jong kigol ahi’in, hijongleh koima in nen kilahdoh nading’a hehna asem lou ahi.

Nambul vadung’a nen kipai, leinoiya nen kipai mutheiyiin aumin, chule mipi injong jan kah’a nen lampang’a pai aboljing nalai uvin ahi. Nen pai hohi IMC in Imphal Municipal Council Bye-Law (Cleanliness and Sanitation) 2011 dungjuiya leusah ding’a asei ahi. Ahin, hiche dan hi hoiya um’a chule action ipijeh’a kila louham. Amin’a bou dan’a um ham? Aveng veng’a nen-leh-boh chom’a gari honjong niseh’a nen achom joulou chule lha’a nivei ham bou nen achom uva, sum lah nading phat ahiteng leh vang nen chom ding ahaimil ngai pouvin ahi. Mikhat in nen chu munkhat’a kon achom’a mun dang’a apai jeng theilou ahi.

Manipur Maoist in Naxal 50th Anniversary nikho’a thuso nei

Imphal, Apr. 26: Indian Maoist hon Naxal movement 50th Anniversary ahitoh kilhon in sepai 25 athat uvin, Proletarian Revolution vannoiya avetsah uve, tin Maoist Communist Party, Manipur in aseiyin ahi.

Maoist Communist Party Manipur in thil kibolna’a pan la’a sepai ho jana ape in, “Indian Maoist hon hangsan tah’a pan alah hi Manipur Maoist seh hilouva vannoiya um Maoist ho ding’a kitilkhouna ahi. Hitobang natoh leh adang dang hohin Marxism-Lennism-Maoism athahat sah’a chule pan lahkhom’a galsat thei ahi ti thuhilna apeh ahi”, tin Maoist thuso chun aseiyi ahi. Achesa 40s khang’a Revolutionary movement leh 60s khang’a kiphinna hi ajeh kibang ahi’in, ahin, achesa kum 20 sung’a India in tohgon thuhtah aneiya Naga, Kuki, Meitei ahilouleh Pangal nam in ajeh kibang aneihi nam thu’a alhahsam sah ahi, ati.

Mi vaicha vaicha jing ding ahi, tina aumpon, nam van khanggui’a che jom ding ahi’in, Manipur gamsung hi phailei natong’a kivah atamho ahi’in, japi in pan alah teng lebou nam thu’a kikhenna ding tohgon umhi kisumang theiding ahi, ati. Chule revolutionary hi dihlou tah’a koiman aseilou nading’a temna aneiyun, hiche hin akisem lo na asuhmang’a, boina asodoh thei ahi, tin aseibe uvin ahi.

WESEA gamkai gal kisatna mun India in asodoh louding’a RPF in gihna nei

Imphal, Apr. 26: Revolutionary People’s Front (RPF) in Wednesday nikhon WESEA gamkai hi gal mun India in so dahen, tin gihna aneiyun, achesa kal phabep sung’a India leh China gam kikah’a boina aumjing jouva thuso aneiyu ahi.

Secretary Publicity, Roben Khuman in soi akaina RPF thuso’a chun India gamgi atamjo’a China aum hi mipi in amudoh in, Aksai Chin, Jammu and Kashmir’a Pakistan leh China tan loouva akijot to theina ding’a Rail track akisem in, China sorkar in Nepal gam toh kiloikhomna asem in, Bhutan leh China kiloikhom athahat cheh cheh in chule Myanmar gam in India sang’a agam thu’a China ngaidan alajo in ahi. India gam in Bangladesh toh bou kiloikhomna dettah’a asem ahi’in, Sri Lanka jong China khut’a umjo’a ahi, ati.

China in tu’a hi Arunachal Pradesh hi Eastern Tibet ahi, tia asei ahi’in, Arunchal gam’a kholjin ding ho chung’a India in pan alah hin agam’a agel khoh dan avetsah ahi. India in Dalai Lama atosot’a, gamsung’a Tibetan 10,000 mun apeh thu jong aseiyun, India in Tibet atosot hi China in sangtah’a adoudal ahi, ati. Tawang ‘a kholjin din’a India in Dalai Lama phalna apeh jeh’a gamsung teni kikah’a boina sang ahi. India sorkar in WESEA region (North East) ‘a lamlen gangtah’a asah hi imadang ahipon, India sepai chule gal manchah poh nading ahi, tin aseiyun chule tu naicha Tikendrajit airport’a fighter plane akingah leh oil tanker lenna huikong’a akipoh hi China toh gal semna ding’a kigotna ahi, tin demna aneiyui.

India sorkar in tu masang’a jong chule tu’a jong WESEA gamkai gelkhohna anei lou ahi’in, CIA leh DIA, USA report dungjuiya China leh India akidou’a ahileh China Army hon Burma gam’a kon Ledo lamlen, Khunming-Dibrugarh lamkai chule Khnming-Tezpur, Mandalay lamlen’a kon India abulu diu ahi, ati ahi. Hitobang dinmun’a WESEA hi gal kidouna mun soh thei ahi’in, hiche hi gamkai mihon asan louding ahi, ati.

Mizoram a MCG toh kibang Cricket Stadium khat kisemdoh ding ahi: CM Lal Thanhawla

Aizawl, Apr. 26: Supreme Court panel in Indian cricket board a northeastern state ho’n jong chanvou aneiding’u doltah ahi ti’a asei tolhon in Mizoram Chief Minister Lal Thanhawla in leiset chung’a Cricket pitch lenpen-Australia’a um MCG- toh kibang cricket pitch khat Mizoram sung’a semdoh ding tohguon aneipantan ahi. Mizoram CM Lal Thanhawla hi kichep golseh ngailutah mikhat ahi.

“Cricket Pitch hi Sairang football ground kom’a kisemdoh ding ahi. Chuleh aletdan jong Melbourne Cricket  Ground (MCG) toh kibang ding asung’a mi 100,024 touthei ding ahi. Mizoram Cricket Association (MCA) in Board of Control for Cricket in India’a  full voting rights aneitheina ding’a sottah kahin boipi ahitai.Ahinlah BCCI hin ngehna ana kineiho ana sang khapo’n,  Lodha Panel in recommend ahin bol jou’va bou Sah-solam state ho full affiliation bolding tohguon hung chelha ahi. Tumasangjep’a chu Assam le Tripura bou BCCI a affiliate ana kibol ahijeh’a Ranji le BCCI in aguon tournament ho’a ana kichem thei ham ham’u ahi. Sharad Pawar in BCCI ana pohlai le Arun Jaitley in  affiliation board chairman ana tuhlai’a pat’a chu affiliation muna ding kana boipi pan ahitai. Affiliation eipeh’uva ahileh kumnga sung’a world-class cricketer tampi kasemdoh ding ahi ti’a jong kitepna kana neisa ahi ” tin Lal Thanhawla in aseiye.

Lal Thanhawla hi kichep golseh’a lunglut ahikeu hilouva School le college akai laiya Undivided Assam kiti club khat min’a football le hockey jong ana kichem ahi. Lal Thanhawla hin  tutu’a hi Mizoram Cricket Association  President panmun jong atuh ahi.

Sairang hi Aizawl khopi sung’a pat minute 30-40 kijuot ahi. Lal Thanhawla in aseidan in, Cricket pitch khat semdoh ding tohguon kinei hi gamsung’a kon world-class cricketer tampi pohdoh/semdoh ding lungtup kineijeh ahi ati.

Lal Thanhawla in aseidan in Mizo pasal ho hi pendol’a thahat tah le chamkang tah ahi’uvin chuleh lunggel lam’a jong milung lentah ahi’uve ati. Local Tournament ho ve’a kache teng jongle khangdong talent nei tah tah kamuji in ahinlah BCCI in affiliation eipehlou jeh’un a talent’u chu amoh manthai ji’e tin Lal Thanhawla in aseiye.

“Indian cricketer ho hi sum le pai ninglhing tah’a um ahijeh’uvin, field sung’a chop le lhaile chuleh ball mat tangna ding’a kikho tiho bolnom lou ngansen ahi’uve. Ajeh chu amaho hin kisuhkhah ding akichat’u ahi. Kichep golseh mi ho hin kisuhkhah ding akichat lou ding’u doltah ahi. Mizo pasal ho hi mihangsan tah ahi’uvin, field sung’a kisuhkhah ding jong ginglou hel ahi’uve. State sports body hon jong nehguh chahguh abollou diuvin temna kaneiye. Ajeh chu Nehguh’a kon a hi thilpha hung sodoh kihekhalou ahi” tin Lal Thanhawla in aseiye.

Achesa kum 3 sung’a Mizoram sung’a Malaria jeh’a mihem 61 in thina toh

Aizawl, Apr. 26: Mizoram gamsung’a Malaria jeh’a thina tuhtang na ding tohguon achelhah jing vang in tunigei hin  Malaria jeh’a thina tuoh mihem aumjing nalaiyin ahi. Achesa  2014-16  sung’a Malaria jeh’a thina tuoh Mizoram mi 61 ana lhing in ahi.

Mizoram Health & Family Welfare Commissioner Lalrinliana Fanai in aseidan in 2015 kum’a chun mihem 26,400 Malaria natna jeh in akijen’uvin amaho lah’a hin mi 21 in thina atuoh’uvin ahi.  Chuleh 2014 kum chun Malaria jeh in mihem 31 in thina atuoh’uvin ahi. State Health Department in gamsung’a kon Malaria jeh’a thina suhbei na ding in pan nasatah alajing’e tin Finai in Tuesday nikho’a Aizawl khopi sung’a World Malaria Day kinitna kinguon’a  aseiye. Aman aseibena’a chun 2016 kum sung chun mihem 2,67,747 in Malaria kiginmo jeh in thisan test akibol’uvin, amaho lah’a 7583 positive ahiuvin chuleh mi 9 in thina atuoh’uvin ahi. January-March 2017 sung chun mihem 35,801 in thisan test akibol’uvin amaho lah’a chun mihem 582 positive ahi’uve. Ahinlah Malaria natna hi kumdang sang’a hatah’a akhehsuh ding kinepna lentah akineiye tin Finai in aseiyin ahi.

Aman aseibekitna’a chun, Mizoram gamsung hi Anopheles mosquito (thoukang jatkhat) tamna mun ahijeh’a State Vector Borne Diseases Control Programme (SVBDCP) in Malaria a kon mipi vendohna ding’a pan hatah’a alahjing ahi. Malaria  a kon mipi kivendoh theina ding in gamsung’a tantih neilouvin DDT akikapjing in chuleh Malaria natna chungchang’a jong awareness proframme akiboljing in, hitolhon chun 2016 a pat 2017 sung’a hin Malaria jeh’a thina toh 71.28% akemsuh’e tin Finai in aseiye.

World Malaria Day chu “End Malaria for Good” kiti thupi mangcha in Mizoram sung’a um district jouse’a anit’uvin ahi.State Information & Public Relations Auditorium , Aizawl a chelha World Malaria Day nitna kinguon’a chun Health & Family Welfare Commissioner Lalrinliana Fanai Jin-gun in apang in ahi.

Pasal khat in nupi khat lup pi ding anop lou jeh’a achapa lhumpen puimang

Guwahati, Apr. 26: Thulhut kimu dungjui in Assamese pasal khat in nupi khat lup pi ding ago in ahin nupi nu anop lou jeh in achapa  khat anapui mang chu police hon ana mudoh taovin ahi. Akiman pa min chun Udyeshwar Saikia (26) ahi. Amahi Dhemaji district of Assam noija um Joyrampu kho mi ahi in ahi.

Police hon aseina’a chun; hiche nupi nu leh achate thum hi Kalamassery,Toshiba junction mun’a inn bahara’a um ahi uve.Hiche akiman pasal leh nupi nu hi kho khat na cheng khom ahi uvin ahi. Sunday nichun Saikia in nupi nuchu lup pi ding ana go in ahin nupi nu anop lou jeh chun lunghang tah in anapot doh tan ahi. Ajing Monday nichun agache kit in achapa lhumpen chu anaman in anajam pi tan ahi.Hiche thilsoh chun achate dang in anu kom’a ahetsah phat in anun jong gangtah in police ho kom mah hetna a nei in ahi. Hiche thilsoh toh kilhon chun police hon kholchil na anei utoh kilhon in hiche pasal pa hi Aluva railway station nah Monday ni jaan chun anaman uvin chapang pa jong chu ana kihuhdoh in ahi ati.

 Hiche thilse bol pahi daan dungjui in IPC sections 361 (kidnapping), 354 (assault), 506 (punishment for criminal intimidation) chuleh section 84 of the Juvenile Justice (Care and Protection of Children) Rules noi in jih lut in aum tai.

Thusoh Lahchom

MUTSU in dem

Achesa april nisim 14 ni’a simlai chapang 2 hunam kisuhset na toh kisaiyin Manipur University Tribal Students’ Union (MUTSU) in demna thuphon ahin neiyuvin ahi. Hiche thilsoh hin gamsung hi numei chapang a ding’a bitlou ahidan atahlang naban’a akisaipi mopohna neihon hiche thilsoh chung chang’a mona neiho daan toh kitoh’a gotna apeh diuvin jong MUTUS Info & Publicity Secy. Rakuyio Khrasi min’a kisuo demna thuphon chun ngehna aneiyin ahi.

Mi 20 kisukha

Tuesday ni jaan chun Guwahati, Nagaon district sung’a um Samaguri mun’a night bus khat le thilpo gari khat ana kiphut lhon in ahi. Thilsoh’a chun night bus sung’a tou mi 20 hatah in akisukha’uvin ahi. Akisukha ho chu GMCH , Guwahati a akijen’uvin ahi.

Ling kihot

Thulhut kimu dungjui in 4.2 magnitude ling Northeast India,East Garo Hill,Meghalaya gamsung’a ana kihot in ahi. Hiche ling kiho na’a chun athi amang koima vang ana umpon ahi.

Lhaseh’a Date 10

Chief Minister,Manipur N. Biren Singh in lha sung nga ni som chan ni/ ani som chan ni suty ahi khah leh ajing ni leh kho haosa,ADCs lamkai ho chuleh Civil Society Organization ho hiche nileh jinglam nidan 10 apat nilhah lam nidan 4 chan Chief Minister office’a lamkai hon ahahsat nao/ aboinaa anei naho’u asei thei ding uvin kot ahon peh in ahi.

Gam saa kap mi 2 kiman

Thulhut kimu dungjui in Wednes nichun Police hon Biswanath mun’a gamsa kap mi ni ana man un ahi. Akiman teni min chu Abdul Karim leh Ismail Ali ahilhon in ahi. Hiche tohkilhon chun police hon  saipi haa(elephant task) 8kg jong amudoh un ahi.

KSO-M in demna nei

Achesa April nisim14 nikho a numei ni kisuhset nachung’a KSO,Moreh in demna nasatah in anei un ahi. Mo na nei ho daan dungjui ja got na apeh ding un M. Ngamminlal Haokip Info. Secy KSO,Moreh in ngeh na jong anei in ahi.

AR

HQ IGAR (South) makai na noi in 12 AR,26 Sector AR hon pasal chapang khat UNLF akon hung jam doh khat a insung mite toh ana kimuto sah taovin ahi. Hiche chapang pa hi thilphalou lam’a hil na anei jeh uva  UNLF thingnoi’a ana lut kha ahi. Hiche chapang pa min hi Laishram Ibungo Singh (20) Imphal East district akon ahin thingnoiya aga lut jou nung in athil bol khel ahin kihet doh phat a April nisim 22 nikho a traning camp a pat ahung jam doh na’a  AR sepoy hotoh ana kitoh kha u ahi. Assam Rifles hon hiche chapang pa chu kihilkhel ahi ahetdoh phat uvin April nisim 23 ni jan chun api nu kom’a ana thah lut taovin ahi. Hiche’a kon’a chapang tamtah chekhel hon kihil na anei ding uvin jong AR hon temna ahin nei uvin ahi.

Editorial

 

Kpi Dist. a CM kholjinna

                Manipur a BJP makaina government masapen ahung kisemdoh toh kilhon’a Chief Minister Nongthombam Biren Singh in thinglhang district ho avilna anivei channa ding in tuni chun Kangpokpi district anavil kit in, Kangpokpi district Economic Package a ding in Dk. 185 Crore ana phongdoh in ahi.  Tuni’a chu Kuki Innpi makaina a district sung’a CSO hon Brig. Thomas Ground munna CM N.Biren hi loupitah’a ana vailhun’u ahi. Brig. Thomas Ground a Nongthombam Biren Singh loupitah’a kivailhun hi anivei channa ahitan, hijongle amasa laiya akivailhun sang’a tuchung hi thupi le lolhing jep hile akilom in ahi.  Hetthei khatchu achesa 2010 kum’a Ibobi Ministry a IFCD Minister anahilaiya jong chu Kangpokpi Thomas Ground a Chavang Kut kimanna a Jin-gun hina toh Souvenir anahondoh ahi. CM in economic package aphondoh nalah’a chu Dk. 10 Crore vel lut’a Women’s Market sahding, ITI semdoh ding, Sadbhavana Mandop le Tribal Girls Hostel semdoh ding ti ho ahi.  CM in ahoulimna a chun Centre government in “Housing for All” ti scheme noiya agenthei inn-le-lou neilou jouse Pucca inn sahpeh ding le innsung khatna government natoh khatcheh pehding in jong aseiyin ahi. Achung’a kiminphah Women’s Market le Tribal Girls Hostel sahding kiti ho vang hi toh muolsuo ahung hiding jong kinep aum nan hinlah innson’a government natoh khat pehcheh ding le pucca building tundoh ding kiti ho hi ichan’a government in ahin tong muolso nadem ti vang hi seingam ahinaipon ahi.

                CM in april nisim 10 ni’a Ukhrul avil’a chun Ukrul district a din Dk. 201 crore ana phongdoh in chule Siroy Lily Festival hi kumseh le state level a May nisim 5 le manjing ding in jong anaphondohbe in ahi. Thinglhang district cheh ahivang in Economic package a dia kiphongdoh jat hi akikheh naban’a Ukrhul district avilna a chun innson’a government natoh khatcheh pehding le mijouse ding’a pucca building tundoh ding ti ho ana minphah lou ahi. Kuki Innpi le CSO hon tuni’a CM aga kholjinna a Memorandum apehlut nauva chun Kangpokpi district DC le SP athaneina ding hon bangtah’a thaneina pehding ti jong jao ahin hinlah CM in ahoulimna a chun hiche thu hi aphapoh hih hel in ahi. Manipur a BJP in government ahin semjou uva kipat in CM pa ti a  Minister ho ti numei mouthah til bang in afel thet jeng uvin, Development project chuom chuom ho vetlhahna aneijing naban’a uva  CM  pa’n  jong  thinglhang gam ho aban ban’a ahinvil a Economic package ahin phondoh jahjah jeng ahin, Election campaign laiya kitepna jatjat ana nei’u le tua kitepna anei ho’u hi ichan in ahin tong muolso nadiuvem ti hi mipi’n ahin vetlhih keu ding ahitai. Centre a jong BJP government ahijeh’a sum-le-pai neng nante tia ngamtah’a aphonlhah jung jung’u ahidem vang akihepon, hijongle tuchung government thah hin kikhelna le khantouna thahbeh ahinpohlut ding hi mipi kinepna ahi.

 

Blankfire

VIP ho hungdi ahi akitile koima koulouva ama khamchabepma kihaboltena jaogotei loi , kingonga pang honla mijouse achama koulouva hung lhai thojeng dia gelloi umkit tobang , nehkhomna beh a jaoteidi tiloi umkit , anedia min akoukou jongle jamtholoi umkit , mi hi ajatjat um mong ahi.