ET April 26, 2017 News (Local, Regional, Thusoh Lahchom, Editorial, Blankfire)

ET April 26, 2017 News (Local, Regional, Thusoh Lahchom, Editorial, Blankfire)

232
0
SHARE

Minister Nemcha Kipgen in ADC Sadar Hills ho liemna nei

Kangpokpi, Apr. 25 (ET):  ADC Sadar Hills member ho tunia Congress apat BJP a lut jouvun Social Welfare&Cooperation Minister Nemcha Kipgen in ama quarter a lemna kin loupitah ana neijin ahi.

ADC Sadar Hills Chairman Haokholal Hangshing le Vice Chairman Thangjakam Misao jaona’a Executive Member cheng le adang ADC Sadar Hills member chengin tuni nilhah lam’a chu BJP office, Imphal mun’a Congress nungsun a BJP anajop’u lahlutna kin ana neiju ahi.

Hiche lahlutna kin kichai chun Kangpokpi AC akon tuchung 11th Manipur State Assembly Election a pachan na neija Social Welfare&Cooperation Minister hinmu Nemcha Kipgen in ADC Sadar Hills member cheng chu kipapina le lemna kin ananei ahi.

Minister Nemcha Kipgen in Congress nungsun’a BJP a lut ADC Sadar Hills member ho lemna le kipapina kin aneina’a, gamsunga khantouna dia ADC Sadar Hills member hon hitobang pachat umtah dinmun ahinlah uhi gamsung mipi dia hamphat umtah ahi ati.

Masangin party chom chomin umjongleu hen tun thakhat in iumkhom thei tauvin hiche hin kilungkhatna le kipunkhomna lungthim nasatah a ahin punbe sahding jong kinepna lentah kaneije ati.

ADC Sadar Hills Member ho chunga kipathu le pachatna thu aseitolhonin Minister nun gamsung khantou machalna lam masot cheh’a kihetkhel nathei ho nungsun tahdin temna aneijin ahi.

BJP alut ADC Sadar Hills member ho kipapina le lemnan Minister nun ankong sokhompi na jong ana neijin ahi.

 

IMP-JIRI Highway agang thei penna semchai ahina ding’a tohguon um

Imphal, Apr. 25 (DIPR): State Public Works Minister Thongam Biswajit Singh in tuni chun Imphal-Jiribam Highway agave lha in ahi. Hiche Highway hi National Highway Infrastructure Development Corpotation Limited(NHIDCL) makai nanoi’a kisem ahi.

Minister pan jingkah lam’a Makru Bridge vil’na aganei na’a chun;Imphal-Jiribam lampi boi jeh in gang tah’a sem chai ding hi hung hah ja jep ding ahi ajeh chu tulai go juh jing jeh in natoh ho amachal thei poi tin jong asei in ahi.Aman aseibe na’a chun tu tu’a government po ho hin mipi te hahsat akihet them peh in hijeh chun hiche lampi hi ahithei leh April lha kichai kah’a hi sep phat tei ding kigong ahi ati.Ahin go ho juh jeh in natong hon jong adei bang’a najong atoh thei tah lou jeh’u hin boi na sang tah atoh un ahi iti ham khat na go ahung kitan thei ja ahileh May sung nga agang thei pen na achai ding’u ahitai ati.Hiche Makru Bridge hi Highway lampi 154 meter a ahin khel doh ding chuleh hiche Bridge hi 122 meters a song ding ahi ati.Minister Biswajit in asei na’a chun hiche Bridge ni kisem nading’a hin alhom pen na  kum thum lut ding ahi dan asei na’a chun Union Minister of State Road Transport in kum thum chu sot asah val jeh in ahithei leh kum khat leh akeh  sung nga chai ahithei nading asei in ahi.

Tu’a naki tong ho ahung kichai teng leh mabang na  natoh ding nga kingaito hochu Imphal-Jiribam, Imphal-Mao-Maram chuleh Imphal-Moreh highways hojong kibol pai pai ding ahi tin Minister chun asei in ahi.

Alangkhat nah Works minister Thongam Bishworjit in Imphal-Jiribam lamlen kisahna amachal dan thukholna akichai tai, tin aseiyin chule Tuesday jingkah in Imphal khopi ahung kile tai.

Janhi nikho’a highway’a Jiribam chan kholjin’a inspection abol ahi. Bishorjit hi Chief engineer leh Public Works Department’a official hotoh kilhon ahi. Hetthei khat chu hiche highway kisah hi Prime Minister Narendra Modi in video conferencing’a vetlhahna jong anei ding ahi.

 

Thabal chongba’a pang mikhat constable khat in kap lih; mipin meithal kap pa inmun meiya hal, Imphal-Moreh lamlen kikhah

Imphal, Apr. 25: Ukhongshang Mayai Leikai mun’a ‘thabal chongba’ a pang kum 25’a upa khangthah khat jan-kim don’a Manipur police constable khat in meithal’a akap jeh in athi in ahi.

Thulhut dungjuiya, athipa hi Kh Santosh Singh, s/o Kh Ibohal, Thoubal  Athokpam  Awang Leikai’a cheng ahi’in, Institute of Rural Education, Wangjing’a teacher ahi. Meithal kap pa hi Nongpok Sekmai police station’a officer-in-charge pa driver, Elangbam Rajesh (30), s/o E Achou, Salungpham Mamang Leikai’a cheng ahi. Police hon aman uvin, thukholna achelha in ahi.

Meithal kikap jeh’a lunghang mipi kikhom hon Tuesday jingkah in meithal kap pa inmun anokhum uvin, meiya ahal uvin ahi. Hiche toh kilhonin toltha thilsoh demna in Imphal-Moreh lamlen’a bandh aumin ahi. Thilsoh umchan hetoh khat in aseina’a chun, mi phabep thabal chongba kichepna mun kom’a ‘ju-ar’ (lagao) kichem ahi’in, civil’a che police phabep in akichep-u angah diuva gihna aneiyu ahi.

Phat chomkhat jouva police ho uniform’a che kit uva, akichem ho mat’a chule kichep ngah sah ding agot-u ahi. Boina kahlah’a thabal chongba laam ve’a Santosh hi police khat in meithal’a a-oi akap khah ahi, ati. Ahin, midang khat in aseina’a chun, Rajesh hi Santosh hi naicha’a kon meithal’a akap ahi, ati. Jan-kim don thilsoh ahi’in, Thoubal district hospita’a Santosh apolut uvin, ahin, athi tan ahi. Thi-long tu’a hi JNIMS Hospital morgue’a um ahi.

Gamsung khantou ding deina jeh’a BJP kibel ahi: Khaipao Haokip

B.Lalboi Gangte

CCpur, Apr. 25 (ET):   Autonomous District Council, Churachandpur kivaipoh na Hill Peoples’ Alliance (HPA) in Lha 18 sung Langkhanpau Guite Chairman hina  District Council kivaihop na achelhah jing laiyin, District Council Members mi-24 hon kivaihop na thah deijeh vin Manipur State innpi vaipo Bharatiya Janata Party(BJP) ah kipehlut na  22 April 2017 nikhon N Biren Singh, Hon’ble Chief Minister of Manipur angsung’a anei vin, hitoh kilhon’a 24 April 2017 nikho Hotel Classic Imphal mun’a ADCC Chairman thah kilhengdoh Mr.Khaipao Haokip leh Vice Chairman V. Khaikhanmuang kilheng thah teni N.Biren Singh Chief Minister Of Manipur, Churachandpur Deputy Commissioner, R.Sudhan IAS, BJP State Vice President Mr. Ashini Kumar, leh Hill Area Committee, Chairman TT Haokip, Mr.Lelen Chief Executive Office, Ccpur  ho angsung’a  Kihatsel na (Oath Taking) ana la vin ahi, Hitoh kilhon’a District Council, Churachandpur, Govt. form thah ahitoh kilhon’a ADCC Chairman thah Mr. Khaipao Haokip  ET Correspondent  in  tuni sun nidan 12:00 in achenna inn mun’a  kimupi na akineiyin, hiche phatsung’a  Council chungchon’a District khantou machal nading maban’a toh gon aneiho leh BJP ah akipehlut nao chung thuho doh na akineiyin ahi.

 Hiche kihoulim naphat sung’a Khaipao Haokip Chairman ADCC in ahoulim na,  Council Govt. thah kibol nachung chang hi Council Govt. hi leader thah kikhel na umta hen tihi Council members ho lunggel ahisoh keiyin, hitoh kilhon’a kei alhinglal pen hijong leng Members chankhom pihon nang lamkai nan Govt. thah bol tao te atiuva hitoh kilhon’a Govt. hin ki form thah ahi ati. Council Govt. thah bol nadia mipi hihen lang lamkai jouse leh Members chankhom pijouse eiki thopi hojouse chung’a kipa thu kaphong’e ati.Chuleh district sung’a Development thah, schemes thah tohgon thah neidi hi kalungtup ahi jeh in hiche ho bolthei dia touna eipe pathen kathang vah e ati.

 Chuleh aman aseikit na, ITLC Chairman sung’a gamsung’a Peace and Harmony kiti thupi kana chepi jing khat ahin, tu’a ADCC Chairman hijong leng hiche Policy hi Nampi le phung le chang kikah’a  kitomo naho aumlou nading leh District sung khantou machal na ding leh Ie gamkai sung’a  chengkhom chi le namchom chom ho kah’a kilung tuoh tah leh ki ngailut tah’a chenkhom thei ahi nading’a Peace and Harmony kiti umthei nadia pan kalah di ahi tihi keima lungtup khat ahi. District milip in Sahlang, lhanglang ti’a kimin vo nahi suhbei ahi nadia pan kalahding ahi, hiche ho toh molso ding leh tohdoh ahi nadia Nam lamkai, Social le Civil organization leh district sung’a lamkai jouse tosot na ngaichat ahin hiche nachung’a mipi leh lamkai hojouse hi katep na ahi ati.

 Chuleh Indian National Congress (INC) hi kalungnop mo jeh’a kadalhah na ie ma aumpon, India Govt. hi INC in vai apoh lou jeh’a Ie gam ah Party hat khat noiya Development ho gamsung’a akilhun sah lou’a INC ah kaum den va leh Ie gam sung u Development kiti goding ahi jeh’a district mipi khol na leh mipi ho dangchah nalou dia BJP Govt. ah kipelut kahiu ve ati. Chuleh BJP hi Mipi tamtah in Christian sakhu doudal atiu vin, keiho kom’a Christian doudal na awcheng aginglou ding, agin jong leh katin diu kadou dal diu ahi ati. Chuleh Council members hon kidei chu gam mipi deidan tah’a mipi toh kilungtoh’a luongdel’a pangkhom ah gam uva Development ahiding bang tah’a chanvou iechandiu dol lhunlutsah nadia pankila ding ahi ati. Chuleh Council in maban’a Council chungchon’a Delhi akon’a Development Schemes ho kailut nadi tohgon kanei masa pen’e ati, chuleh Development kiti hi Party level ah iema umlou ahin Govt. lunglut leh khosah’a kingai ahin Party min’a Funds, Schemes Sanction kiti umlou ahin Govt. Policy ahoi’a kivaihop na Council Govt. akitup’a ahoi leh Funds, Schemes kimu ahi ati.

 Chuleh CCpur district sung’a mithi ho ni 600 val vuilou’a tunichen’a kikoi nachung thu aseikit na, hiche thina chung thu’a vui ding leh vuilou ding hi District Council in thujong akinei pon, Vaihom na jong kipang lou ahin Council te Concern jong hilou ahi, Manipur Govt. leh JAC te khut’a um ahin Council in mo kipo khalou ahi, ahin Council in panlah lah nathei chan pankila ding ahi ati.

 Chuleh aman aseibe kit na, tu term sung’a Council Govt. lha 18 sung achelhah sung ahin Development Funds, Schemes kiti mal khat cha jong Centre leh State Govt. angsung akon in kamu povin, kamu sun u lhalho lhakhat’a dk, 9500/- kituptah in lhaseh in kakisan uvin ahi ati.

 Chuleh Council Executive members ding ho kilhendoh naleh phondoh na aum hih laiyin BJP State President in kouna eihin neiteng uleh EM/ADCC ding ho phongdoh na kinei theipan ding ahi ati.

 

Governor in ‘ASHA E-CONNECT’ toh kisai lekhabu leh CD Cassette hondohna nei

Imphal, Apr. 25 (DIPR): Digital India Mission tohgon toh kisaiyin Governor of Manipur Dr. Najma Heptulla in tuni (Apr. 25) chun Raj Bhawan, Imphal ah ‘ASHA E-CONNECT’ kiti Tele Medical Service Scheme natohna patna aneiyin ahi. Hiche ah chun State Health Minister L. Jayentakumar Singh leh Education Minister Th. Radheshyam Singh jong apang lhon in ahi.

 Kingon a pan alah toh kilhon in Mission PadmaShree a Medical Expert Dr. Ashok Gupta in hiche scheme phatchom dan ho aseiyin, hiche scheme a kon’a thinglhang kuchong langpeh a cheng mihon jong medical facilities amu theidiu ahi ati. Hiche scheme pohdohna ding’a ASHA volunteer ho kichuhna kipeding chule mobile app mangcha’a doctor hotoh patient ho condition jong hetdoh thei hiding ahi ati.

State Family Welfare Serivices Director Dr. K. Rajo Singh in power-point slide mangcha’n ‘Flying Doctors in Manipur’ chungchang in vetsahna aneiyin gamsung’a Mobile Helicopter service angaikhoh dan jong aseiye.

Tuni kingon ah chun achung’a kisei scheme chungchang’a lekha leh DC Cassette hondohna jong anaum in ahi. Health and Family Welfare Department leh Midical experts hojong tuni kingon ah chung apang uve.

Anti-Corruption & Vigilance wing in Boko PS SI khat nehguh jeh’a man

Guwahati, Apr. 25: Assam Police Anti-Corruption and V igilance wing in Boki Police Station sub-inspector Bokul Chetia nehguh toh kisaiyin aman in ahi. Bokul Chetia hin sum akilah’a police in ahenkol truck khat alhadoh ahi.

Truck chu Guwahati a um sumkolveimi Nabajyoti Kalita a ahi. Bokul Chetia hin truck lhadohna ding’a Kalita’a kon Sum Dk.50000 aguh’a akilah ahi.  Bokul Chetia in Kalita toh thihkhao guiya akihoulimna’a sum hi OC pa khut’a jong phabep lutding ahi ti’a aseitolhon’a OC pa  chungthu jong  Anti-Corruption and Vigilance Wing in akholchil laitah ahi.

TKSU Donbosco Branch Lamkai thah hon ki hahselna nei

Lien S. Gangte

Ccpur. Apr. 25: Thadou-Kuki Students’ Union (TKSU) General Head Quater makai na noi’ah TKSU Don Bosco College  Branch  2017-2018 a Executive Members ding ho chu TKSU-GHQ President Lalkhohao  Chongloi khut-ah 25th April 2017 jinglam nidan 7:00 chun TKSU Administrative Office KIC Complex, Tuibong mun ah kihahsel na ana nei sah in ahi.

TKSU Don Bosco College  Branch  2017-2018 a Executive Members kihahsel na nei ho, President, Obed Douminthang; General Secy. Kailalsiem; Joint Secretary Nengneivah; Finance Janggoulien; Treasurer, Chinneineng;

 Socio.&.Culture Secy. Jangminlal & Veinunnem; Info.Secy. Letminthang & Lhingneikim chuleh, Auditors Thanglunlen & Tingvahchan ho ahiuve.

Molnoi Youth Club in akiphudoh nikho mang; thingnou tampi jong kitudoh

Kangpokpi, Apr.24:  Kangpokpi district Saitu Gamphazol Sub-Division noiya um Leikot area a Molnoi Youth Club in tuni chun ‘Youth Day’ kingon anamang uvin ahi. Hiche Youth Club hi 1993 kum a anakiphutdoh ahitai. Tuni Youth Day kingon chu ‘Global Warming without Plantation’ kiti thupi noiya kimang ahi. Youth Day thupi toh kilhon in dignitary hole mipi ahung lha hon Leikot area National Highway 2 gei ah Km 2 sao in thingnou tampi atu uvin ahi.

Tuni kingon ah chun Deputy Commissioner, Kangpokpi, T. Ranjit Singh, IAS Chief Guest in apang in, S. Gourokishore Singh, Coordinator, NYK Kangpokpi District, Col. B. Angousana Sharma (Retd.), National President, master of Atheletic of India leh Maj. Vinod Kumar, Post Commander, 38 AR Motbung Post chule koulut honjong thingnou atu uvin ahi.

Amaho keu hilouvin Manipur film star chule social worker jong hi RK. Kaiku, senior actress Manda leh Gurumayum Bonny Sharma honjong kingon a apan’u toh kilhon in thingnou atu uvin ahi.

Dignitary ho, koulut holeh film star chule mipi tampi in hiche Molnoi Youth Club kiphudoh nikho kimanna pan ahunglah jeh uvin kipathu aseiyuvin chule hitobang lunggel hinpodoh social leader Nehthang Kipgen chungah kipathu jong aseikit uvin ahi.

Deputy Secretary in IAS phabep Transfer leh posting order suo

Imphal, Apr. 25: Robita Yumnam, Deputy Secretary (DP), Government of Manipur in tuni (Apr. 25) Governor min a transfer and posting thuso ahinbolna ah O. Nabakishore Singh, IAS (Chief Secretary (Cabinet/Revenue) & Chief Vigilance Commissioner, Manipur) a kon Chief Secretary (Cabinet/CP/Power) & Chief Vigilance Commissioner, Manipur hitading, W.L. Hangshing IAS (Addl. Chief Secretary (IFC/PHE), Government of Manipur a kon Addl. Chief Secretary (Fisheries), Govt. of Manipur hiding, Shambhu Singh, IAS (Additional Chief Secretary (AR) & DG/SAT) a kon’a Additional Chief Secretary (PHE/AR/Forest & Env.) & DG/SAT hiding, Dr. Suhel Akhtar (Addl. Chief Secy. (Labour & Employmeng)) a kon Addl. Chief Secy. (Adult Education) hiding, Dr. J. Suresh Babu IAS (Addl. Chief Secy. (Forest & Env./Home/MAHUD)) a kon Addl. Chief Secy. (Home & MAHUD), M.H. Khan IAS (Principal Secy. (MOBC/Adult Edn) & Member Secy. State Commission for OBC) a kon Principal Secy. (MOBC & SC/Relief & DM) & member Secy. State Commission of OBC hiding, Lungmuana Lakher IAS (Principal Secy. (Vety. & AH/Sericulture/Commerce & Industry)) a kon Principal Secy. (Com & Ind) & Commissioner (Departmental Enquiry) in addition hiding, J. C. Ramthanga IAS (Principal Secy. (Social Welfare/MI)) a kon Principal Secy. (Social Welfare) hiding, Paulunthang Vaiphei IAS (Principal Secy. (SCERT/Eco & Stats)) a kon Principal Secy. (Cooperation Eco & Stats) hiding, Vineet Joshi IAS (Principal Secy. (Finance/Power/Planning/Hr & Tech. Edn) Resident Commissioner (Manipur Bhawan, New Delhi)) a kon Principal Secy. (Finance/Planning/Hr. & Tech. Edn), Resident Commissioner (Manipur Bhawan, New Delhi) & Principal Secy. To CM in addition hiding, Prashant Kumar Singh IAS (Commissioner (DP/Health & FW/GAD/It)) a kon Commissioner (health & FW/IT) hiding, V.K. Dewangan IAS (CEO, Manipur) a kon CEO, Manipur & Commissioner (Election/Labour & Emp) hiding M. Lakhsmikumar Singh IAS (Commissioner (Edn.S/Transport) & Chairman BOSEM) a kon Commissioner (Edn-S/Transport/SCERT) & Chairman BOSEM hiding, K. Radhakumar Singh IAS (Commissioner (Works/IPR/CAFPD/Cooperation)) a kon Commissioner (Works/IPR/CAF&PD) hiding, Th. Chittaranjan Singh IAS (Secretary to Governor, Manipur) a kon Secretary to Governor, Manipur & Commissioner (Revenue) in addition hiding, Jason Shimray IAS (Commissioner (Relief & Disaster management/Horti & SC)) a kon Commissioner (Agri/Horti & SC) hiding, Sumant Singh IAS (Secy. (RD& PR) & Director Vigilance) a kon Secy. (RD & PR/ Vety & AH) & Director (Vigilance) in addition hiding, Gopen Meitei IAS (Secretary (Agri/IFC/Fisheries)) a kon Secretary (IFC/MI/Seri) hiding chule N. Ashok Kumar IAS (Secretary to Chief Minister (Manipur) & Secy. (DP/Cabinet & Confidential/IT/Tourism)) a kon Secy to Chief Minister (Manipur) & Secy (DP/GAD/Tourism) & Special Secy. (Cabinet & Confidential) hidiu ahitai.

Tuilaphai kho’a World Malaria Day 2017 kinit

Ccpur. Apr. 25: Intensified Malaria Control Project – 3, Caritas India/DSSS Imphal, Churachandpur DPMU ho tohgon na noi’ah World Malaria Day 2017 chu “End Malaria for Good” ti thupi a mang in Ccpur District Headquarter apat Km 26 kigam lha a um Tuilaphai kho mun ah ana um in ahi. Kingon hondoh na Rev. Sehkhohen, Area Pastor, ECA Church in aneiyin, welcome address leh Project toh kisai a holimna P. Thangsuanhau, District Project Officer in aneiyin ahi. Chuleh, Dr. Kimngaihching Simte, CMO Churachandpur  Chief Guest in apang in ahi.

Chief Guest in, ahung kikhom mipi simlai ho kitho khom a Malaria doudal na’a pankhom angaiyin ahi ati. Malaria natna in ahou-avai, khangthah-tehse khen tum anei po’n, galhang Alexander the Great jong chu malaria natna a thi ahi ati. Dist. Health Society toh kitho a Malaria doudal na toh kisai’a iki tho khom diu ahi ati. Dr. T. Pumzathang, District TB Officer, Churachandpur Malaria leh Tuberculosis natna akon kiven doh ding dan toh kisai’ah holimna jong aneiyin ahi. Chuleh, Field Supervisor team ho’n thoukang/mosquito net/LLINs Malaria natna akon kiven doh na ding’a poimo ahi dan Skit Show toh tho in avet sah uvin ahi. Change Agent ding’a lhendoh a ana um Daisy Lamneivah, Class X, Vumhao Govt. High School in Malaria Natna akon kiven doh ding dan toh kisai ah holim na jong aneiyin ahi. 22nd April, 2017 nikho’a Kasturba Gandhi Balika Vidyalaya, Tuilaphai kho mun’a Painting Compitition kipa man hopdoh na jong aum in ahi. Malaria natna hatjo leh phajo a doudal a aum ding tup na in Signature campaign leh simlai/students ho’n Tuilaphai apat Sabuol kho chan lamjot na anei uvin ahi.

Thusoh Lahchom

Saipi khat in Dk.40,000 ne chai

Assam Sahlam a um Sonitpur district sung’a Saipi gilkel tah khat in  dukan khat anolhuh jouvin asung’a um Dk.40,000 ana nechai in ahi. Chomkhat jouchun Saipi chu Dk.14,000 ahin lohdoh kit in ahi. Dukan chu Rajendra Dugar kiti mipa khat a hi. Saipi in aneh sum lah’a Dk.26,000 chu 100 note ahi’n chuleh Dk.14,000 chu cheng 10 note ahi. Sonitpur district forest official hon aseidan un saipi chu deforestation jeh’a mihem chenna lah’a hung vahlut ahi ati’uvin ahi.

Manchah kiman

Salungpham leh Nongpok Sekmai mun’a sepai hon operation abolna uvin gal-manchah phabep aman uvin ahi. Thulhut dungjuiya, thingnoimi aum’e, ti thuguh amu utoh kilhon’a Field G Team, B Coy CI, Wangjing Tekcham post, 54 Bn BSF leh Heirok Police station team hon thakhat’a operation abol-u ahi. Tuesday jingkah nidan 4 leh 6.30 kikah’a operation abol-u ahi’in, hiche sung’a police holeh 54 Bn BSF hon gal laiya kimang thil tobang leh manchah amudoh uvin ahi. Akiman holah’a lethod shell 5, 7.62 mm meichang 28 (akikap loulai), .38 mm meichang 5, 5.56 mm meichang khat, US made pistol, PEK  350 gram cheh’a gih piece 5, safety fuse 5 chule detonator 35 apang in ahi. Hiche toh kisaiyin FIR jihlut ahitan chule akiman thil ho Heirok Police Station’a apelut tauve.

Pandit Brajabihari

Sahitya Akademi Manipur leh NG College in Jubilee Hall mun’a Pandit Aribam Brajabidhu hinkho thusim leh natoh ho’a seminar abol uvin ahi. Pandit Aribam Brajabidhu hi Sanskrit scholar ahi’in, Sanskrit lekhabu tamtah Manipuri pao’a aledoh ahi. Abhyan Sakuntalam kiti thusim jong Pandit Brajabihari in aledoh ahi. Kin-gon’a NG College Principal, Y Mamon Devi, Prof H Bihari Advisor Manipur Sahitya Academy chule Gahal Paul, Officer in charge Sahitya Akademi Kolkata jong apang uvin ahi.

Prin. Secy GoM in hetsahna nei

Financial  management ahoibe theina ding le Govt. Funded Scheme ho ahina ding doltah’a akimanchah theina ding’a department/agency jousen payment, advances chuleh transfer abona’uva PFMS module aman diuvin GoM, Principal Secretary (Finance) Vineet Joshi in thupeh aneiyin ahi.  Hitolhon’a scheme implement bol department/agency hon scheme account chombeh khat ahihon ding’u ahi.  Hiche account hi department DDO account toh akisaina umlou ding ahi.

Ganja 50 kg

Thulhut kimu dungjui in Tuesday nichun Govt. Railway Police hon Rajdhani Express ah ganja 50kg anaman doh un ahi.Hiche chungthu toh kisai in mi khat mat in aum in ahi. Hiche ni masang in jong police hon hitobang thil kipoh jeh in mi thum jong anamat sa’u ahitai.

Editorial

Humpi haabei MDC, Chairman ding kichuna beidehlou ding

            April  nisim 24 ni’a Churachandpur Autonomous Dsitrict Council Chairman thah ding’a 13-Kholmun DCC a kon anakaidoh Khaipao Haokip kilhendoh chu thilthahbeh ahipon ahi. Term kimlah’a MDC Chairman kikhelna hi MDC Term masa’a chu Sadar Hills ADC ho sung lah’a jong anasoh khasa ahijeh in datmah ding vang aumpon ahi. Kum ijat hamkhat Manipur a ADC election ana umkhah lou nung’a achesa 2010 kum’a chu Manipur thinglhang district ho’a ADC election ana um ahin, hiche a chun ADC tamjo’a hiche phatlaiya state le centre a vaihom Congress in ADC election a guoljona ana nei uvin ahi. Sadar Hills ADC jeng’a jong Seipu Sithlhou in Chairman hina anatuh in hinlah phatchom khatjouva ADC member holah’a dissident party ahung potdoh toh kilhon in term kichai nailouvin akimlah’a konnin Haokholal Hangshing in ADC Sadar Hills Chairman hina ahintuh in ahi. 2010 kum’a ADC election ana um’a chu Ccpur ADC ho hi atamjo Congress ticket a uncontest anakaidoh’u ahin, hitoh kilhon’a Congress party mama in Council ana formed uva Langkhanpau Guite chu Chairman ding’a lhendoh a ana um ahi. Hinlah 2010 a toh kibang louvin 2015 chu Ccpur ADC a konnin Independent a mi 17 anakaidoh uvin chule Hill Peoples’ Alliance (HPA) kiminvo in Council ana formed uvin, Langkhanpau Guite mama Chairman ding in lhendoh’a ana umkit in ahi. Hiche Chairman ding’a kitetna ana nei chu Langkhanpau Guite le Khaipao Haokip ahi hon in,  Langkhanpau Guite in vote 17 anamu in chule Khaipao Haokip in vote 5 bou anamu in ahi. Manipur a BJP makaina government masapen ahung kisemdoh toh kilhon’a tuchan hin thinglhang’a MDC ijat hamle phaicham a Councillor ijat hamkhat state a vaihom BJP bel akibe jing in ahi. April nisim 22 ni’a chu Ccpur ADC 23 (2-Leimata MDC Demmang Haokip molliem jeh’a Ccpur MDC 23 bou ahitai.) hon’a state a vaihom BJP chu anabel tauvin ahi. Hitoh kilhon’a 13-DCC a kon MDC anakaidoh Khaipao Haokip chu akitetpi umlouvin Chairman thah ding in lhendoh’a ana um in chule V. Khaikhanmung chu Vice-Chairman ding in lhendoh anahi’e. Chairman ding’a lhendoh’a um Khaipao Haokip in tuchung CCpur MDC hon BJP abel naojeh hi Development fund hung tamlut nading jeh ahidan le state a vaipo party in council a formed loule development jong ahiding bangtah’a lhunglou ding ahidan thu aseiyin ahi.

            MDC ho hi amaho jeng in jong akamcheng tah uva Humpi haabei tobang ahidan’u akiseisa ahiuvin chule Function dung’a Guest a apan’u tilou atoh atham’u jong kihebehseh lou ahi. Humpi haabei dan’a akitekah vang uva Humpi lu’a pang ding kichuna hi beideh lou ahi.  ADC hi thinglhang gam hubitna dingle khantouna lhunsah theina ding’a Indian government in Manipur (Hill Areas) District Council Act, 1971 tia anasemdoh ahin chule hiche hi Indian Constitution a Sixth Schedule noiya um ahi. Manipur in 1972 kum’a Statehood ahinmu toh kilhon’a ADC hi state government khotuona noiya ahung umphat’a achesa 1990 kum a konna chu thinglhang mi hon Sixth Schedule hi thinglhang gam’a extend akibol loule ADC election boycott kibolding ahi tia kum 21 val boycott ahinbol’u ahi. Party le Fund bou kilepna akineiji vang a MLA election sang’a jong nasajo’a MDC election a ki kiboltuo kitji ahin, akaidoh ho sung’a Chairman kichuna jong sangcheh kit ahitoh kilhon’a district dang ADC a Congress vaihopna lah’a jong Chairman duchatna a BJP hinbel di hi hung tam teiyinte.

Blankfire

Tulai khantouna to lhona thu le la boinadi  jong kivatlou aboipidi jangpu le jangpi dila kivat kitdehlou ahijeh in boipidi umlou hile tohding theilou jong tam maithei ahijeh in boina boldoh hojong oimodi hilou tithei leubon hinte , olebah!!??