ET April 25, 2020 News

ET April 25, 2020 News

64
0
SHARE

Langol Reserved Forest a in kisa ho ‘eviction’ kibol jeh a Mantripukhri a boina um; kinotona a police khat kisukha

Imphal, April 24(ET): Forest Department authority hon COVID-19 natna akisei laiya Langol Reserved Forest Area a in thum ‘eviction’ abol jou uva Heingang assembly constituency hopsung Macheng kho, Mantripukhri, Imphal East district a mi tamtah in kiphinna abol uvin, boina asoh in ahi.

Imphal East district Magistrate order dungjuiya Forest department in ‘eviction drive’ abolna a akithopi a police team hon kiphinna bol ho nomang nadinga tear gas phabep akap uvin ahi. Ahivanga, kiphinna bol hon gophel akap uva, song a police ho ase jeh uvin boina akhohse in, kinotona thilsoh a police khat gophel a akikap khah jeh a akisukha in ahi.

Macheng kho mi tamtah in Lamlongei Macheng area, Mantripukhri lampi akha uva, alangkhat a, RK Amarjit, DFO, Central Forest Division le Executive Magistrate, Imphal East lamkaina team holeh Additional SP, Imphal East lamkaina police team ho jingkah nidan 8.30 don a inmun ‘eviction’ bol dinga cheu ahi. Khosung miho henga athu asei uva, ahivanga mipin kiphinna abol phat a Executive Magistrate in kiphinna bol ho nomang nadinga thupeh anei ahi.

Thupeh aneitoh kilhon a police honjong tear gas le rubber bullet phabep akap uva, dan dihlouva Reserved forest area a cheng ho eviction abol u ahi. Reserved Forest Area sunga kisa inmun thum holah a khat hi Khonthuingampou Panmei, h/o Gaingamliu Malangmei a ahi’in, chule in ni hi aman in bahara a apeh ahi.

RK Amarjit, DFO, Central Forest Division in thuso miho akihoupi na’a, Reserved Forest sunga hi agom a in 1346 kisa ahi, tin aseiyin chule inmun ho ‘eviction’ bol nadinga case hi court a ‘pending’ a um ahi, tin aseiyin ahi. Chule forest reserved gam sunga inmun thah kisa theilou ding ahi tia ‘office memorandum’ jong um ahi.

MLA hon Local Area Development Fund hi mipi ‘account’ ahi ti asuhmil loudiuva CPI in sei

Imphal, Apr. 24(UNA): CPI Manipur State Council in MLA phabep in ama ama constituency a neh le chah hopna dinga ama sum apohdoh ahi tia sei ho demna sangtah anei uvin, MLA hohin Local Area Development Fund hi mipi ‘account’ ahi ti asuhmil loudiu ahi, tin asei uvin ahi.

Assistant Secretary, M Joykumar Luwang, CPI in soi akaina thuso a chun, MLA hon ama ama constituency a agamkai miho ngaichat peh nadinga Local Area Development Fund a dangka lakh 25 sanction amu ahi, ati. Ahin, Khurai constituency, Lamlai constituency chule constituency dang dang a MLA phabep in jouthu asei uva, neh leh chah kihom hohi amaho sum a kon ahi, tia jou aseiyu ahi, ati.

Khurai constituency mi phabep in Prime Minister Narendra Modi in insung khat mi jouse anchang kg 5 cheh peh dinga thuphon anei toh kitoh louva anchang le angaicha khoh khoh ho ahop u alhom jo e tia hehna asem uhi CPI in amoh vetlou ding ahi. Thuphon dungjuiya card nei le neilou thu umlouva mijouse anchang hop dinga kisei ahi. CPI Manipur State Council in insunga kum 5 chunglang jouse Khurai MLA in anchang ahop dinga temna jong anei uvin ahi.

Chule Hiche thil hohi centre le state sorkar in mipi dinga apeh ahi’in, amaho sum a kon kicho ahipoi, tijong suhthengna anei dinga CPI in aseibe in ahi. Kamjong district mi phabep in jong mikhat a anchang kg 5 khel a kg khat le keh bou kamu uve, tia hehna asem u ahi, tin CPI in aseiyin, sorkar in Covid 19 jeh a lockdown akikoi sunga mipin hahsatna sangtah ato soh ahi’in, thinglhang hihen lang phaicham hijong le mijouse kithopina peh dinga sorkar henga CPI in temna anei uvin ahi.

 Mipi thil kihopna a adih louva thil kibol auma ahile mipi hon CPI monitoring cell a itih phat hijong le hehna asem thei ahi, tin CPI thuso chun aseibe in ahi.

Corona Lockdown sunga activist le themmona neilou ho kimat jing douna a pan lahkhom dinga Popular Front in kouna nei

Imphal, April 24: Popular Front of India Chairman O M A Salam in thuso aneina a Delhi khopi a themmona neilou Muslim khangthah ho le human rights activist ho kimat jing demna aneiyin ahi.

Delhi Police Special Cell in North East Delhi a boina thilsoh anaum kholna anei uva chule Jamia Millia Islamia simlai Meeran Haider le Safoora Zargar amat u ahi’in, UAPA provision noiya ngohna asemkhum u ahi. JNU simlai anahi Omar Khalid jong FIR a kimin phah ahi.CAA douna a kiphinna anabol simlai activist ho mat dinga akihol jing hi imadang ahipon, nam chule politics a kivetda na ahi. Delhi police hohi centre sorkar in amanchah a, vaipohna doudal ho suhthipna a aman u ahi, ati.

 North East Delhi a kiphinna hi Muslim douna tohgon ahi’in, Sangh Parivar ho natoh ahi. Muslim ho bulu dinga tilkhouna thu seiya BJP lamkai Kapil Mishra chamlhatna neitah a vah le ahi. Tu masanga ana mat u AAP lamkai Tahir Hussain jong UAPA noiya hehna kisem khum ahitai. Hiche jouva Delhi a District President Pervez Ahmed le District Secretary Mohammed Ilyas panna a Popular Front activist hojong boina sem a apang e, tia jouthu a ngohna kisemkhum a kiman ahi.

Themmona neilou Muslim tamtah jail a um’a, FIR a section sangtah tah kipan khum ahi. OMA Salam in thuso aneina’a, gamsung pumpi Covid-19 venna dinga inmun a aumtup a kivenna anei laitah a BJP sorkar in a engsetna le aphatlouna hi aumthim sah dehlou ahi, tin aseiyin ahi. Akithopi ding umlou ho asuhthip ahi, tin aseiyin chule political party, community organization le CSO hon thipbeh a aum angah uva, dihlou tah a Muslim ho kitupna doudalna a pan alahkhom diuvin kouna aneibe in ahi.

 

Ukhrul boina umjom jing; Kihouna anei vang uva kinoptona umthei lou

Ukhrul, April 25(ET): Ukhrul district a nikho chan nigei, Friday nikho a jong boina aum jing in, Manipur Police senior officer holeh Civil society organization (CSO) member hon Honpei a kihouna anei vang uva kihou lhahna anei thei deh pouvin ahi.

Gamkaiya Assam Rifles tamtah ‘deploy’ akibol thu a boina um ahi. Meeting a thulhuhna aneiyu mipi het a aum jou jouva gamkaiya cheng ho, adeh a numei hon Honpei a pansat dinga thulhuhna anei uvin, kiphinna bol jom a chule lamlen (tri-junction) kha dinga kigel lhahna anei uvin ahi. Go ajuh a adap khoh vanga lamlen a numei tamtah akikhom uvin, Friday nilhah a kijotna (torch rally) abol uvin ahi.

Thulhut dungjuiya, Assam Rifles sepai ho Thursday nikho a kho khel a che ding agot ule Kashung Bungdung kho a boina soh ahi. Friday nikho a numei personnel ho panna a IG IK Muivah lamkaina le DIG Kabib, Deputy COC Cecelia, IRBn panna Manipur Police, IRB le Assam Rifles ho gari 25 a Kashung Budung jon a ache nauva khosung numei hon Honpei kho a ana lamtin u ahi. Hiche mun ma ma a hi Thursday nikho a Army hole lhang numei ho kah a kinotona/boina um ahi.

Friday nikho a Honpei kho a Army personnel holeh gamkai numei hon kihou lhahna aneithei deh pouvin ahi. Bundung Kashung a kon Honpei kho hi km 50 vel a gamlha ahi’in, jingkah nidan 10 a kon kiboi pan u ahitai. Tangkhul Naga Long (TNL) lamkai Hopingson Shimray le Tangkhul Shanao Long (TSL) Veronica Zingkhai lamkaina a Naga CSO chom chom amun a dinmun velha dinga aum uvin ahi.

Thulhut dungjuiya, khosung mihon sepai ho alut sah louvu ahi’in, Honpei lampi abon a atin soh u ahi. Achesa Thursday nikho a, mipi, adeh a numei hon Kashung Bungdung kho a kiphinna sangtah aneiyu ahi. Assam Rifles hon gamgi a um kho ho a NSCN-IM akisel ho khol dinga thuphon nei masa louva kho agalkai got ule khosung mihon kiphinna aneiyu ahi.

Ahivanga, boina asolou nadinga sepai hohin gamkaiya patrolling ache got nau ajeh aseidoh louvu ahi’in, law and order’ vettup nading ahi, tia aseiyu ahi. Kashung Bungdung kho a kon numei 300 vel inmun a kon hungdoh uva, sepai hon kho agalkai theilou nading uva sepai ho alamtin u ahi. Gamsung pumpi covid-19 pandemic jeh a kiging jinga aum laitah a Army ho umchan le lungput hi kisang lou ding, kimoh vetlou ding ahi, tin lamlen ting a pang numei khat in aseiyin ahi.

Thulhut dungjuiya, Kashung le akimvel a Assam Rifles le paramilitary 200 vel um ahi. Sepai holeh khosung miho phat sottah akimaito jouvu, jan nidan 7 don a Kashung outpost a sepai ho akile tauve, tin thulhut in aseiyin, ahivanga, sepai ho hung kile kit  maitheiyu ahi ti kichat jeh a khosung miho amun a umden nalaiyu ahi.

Myanmar akon hung lut khat kimandoh kit

Ccpur, April 24(ET): Myanmar Phaisat akon Singat Vengnom hung lhung Munglamkhai @ Khaipu,akum 21 a upa chu ana kimat doh toh lhon in hospital a isolation in ana kikoi in hinlah tu chan in natna anei hih lai in chuleh adam lou ho symptom jong hetdoh thei aum hih lai in ahi akiti.

Myanmar lam a apau le api kithopi a ache nalam a hung tang dank ha ahi akiti. Khaipu chu Myanmar akon a achesa nisim 18 nikho a Zoukhonom jotpa hung ahin, a inn vengnom Singat chu a phone recharge bol le kisil ding a ahung phah ahi akiti.

Khomi hon Mynamar lam akon ahung lut jeh a Singat a medical team khat hetsah na ana nei utoh lhon a Ccpur quarantine centre a ana thah lut u ahi. Tu chan in dammo na ima vang anei hih lai in ahi akiti.

Lockdown thu toh kisai a videoconference um ding

Imphal, April 24(ET): Mipin lockdown toh kisai a sumkol veina lam a MHA daanpeh na noi a kailhang ho honding thu, gam pam akon natong ho natoh jomsah ding thu le India mi gampam a taangden  ho thu toh kisai a seikhom ding thu aum toh lhon a Cabinet Secretary in April 25 nikho jingkah lam nidan 10 lam le videoconference, Committee Room, Cabinet Secretariat, Rashlrapati Bhavan, New Delhi akon anei ding ahi akiti.

Hiche video conference ahi state sung a Chief Secretary, Director General of Police, Principal Secretary (Home) ho jousen panlah na anei cheh ding u ahi akiti. District Collectors / Superintendents of Police ho jousen angai tho ding u ahi akiti.

Class X leh XII answer paper ho checking bolna ding mun Education Minister in velha

Imphal, April 24(ET): Education Minister Th. Radheshyam in tuni chun Class X leh XII ki check nading mun ho vetlhahna anei in ahi. Hiche teni examination paper checking kibolna ding mun ho chu TG Higher Secondary School, CC Higher Secondary School, DM College, COHSEM leh BOSEM office ho ahi.

Minister pa in thuso miho heng a aseina achun gamsung boilheh jong leh simlai chapang ho makho ding gelna jeh a result hi aphatcha a phondoh ahitheina ding a pan kila ahi ati. Minister pa in aseibena achun jilkung ho panlah na chung a kiphathu asei in chule police duty hon jong jilkung hon suboi louva lha-ong ding in asei in chule jilkung answer paper check ho a ding a gari thao thunna ding pump achom a honpeh ding ahi dan jong aseiyin ahi.

Government anchang kalah thei nading uvin phalna neipeuvin, tia ADC Sadar Hills Councillor in sei

KANGPOKPI, Apr. 24: ADC Sadar Hills a Councillor hon Kangpokpi district a ama ama constituency miho Covid-19 Lockdown sunga kithopina ape jom jing uvina hi.

Lunthang Haokip, Member, ADC Sadar Hills, 10-Gamnom Saparmeina District Council Constituency in Friday jingkah in ama constituency a gentheina toh a mi 400 val anchang kg 5 cheh, chi chule allu ahop peh in ahi. Councillor pa in ainmun, Saparmeina a thil ahop ahi.

Lunthang Haokip, Member, ADC Sadar Hills in thuso miho akimupi na’a, anchang hi 10-Gamnom Saparmeina District Council Constituency noiya um ama ama mopohna a kho haosa hon ahop peh ahi’in, lockdown constituency sunga koiman kel athoh louna dinga anchang kihom ahi, ati. Chief Minister N Biren Singh lamkaina a sorkar in gamsunga Covid-19 nat douna dinga pan alah hi pachat umtah ahi, tin aseiyin chule frontline worker hon choltih neilouva pan alah ujong pachat umtah ahi, ati.

Tuchan geiya District Council hohi local self government ahivanga Covid-19 nat douna dinga mopohna kipe loulai ahi’in, ahivanga nat vendoh nadinga District Administration jo chan a kithopina kinei ahi, ati. Government anchang hi manlhom a lahthei ahivanga mipi hahsatna kigel a anchang man tamtah a kicho a kihom ahi, tin jong aseiyin ahi.

Mopohna nei MLA, Minister le District Administration hon Open Market Sales Scheme noiya abol banga District Council injong government anchang deposit abol a alah theina ding a Chief Minister in phalna apeh dinga ADC Sadar Hills Councillor in temna aneiyin, chute le mi tamcheh kihop jouding chule sorkar le mipi dinga thil phachom hiding ahi, ati.

Alangkhat a Twilang area a kho 50 val hop tha a Irang Part-II a MDC le ADC Sadar Hills Executive Member hi a Bhumi Prasad Vikas Basnet in ama mopohna noiya um khosung jouse anchang chule angaicha khoh thil dang dang ni phabep masanga anahop peh pan ahitai. ADC Sadar Hills Executive Memebr BP Vikas Basnet in tunin Maohing kho a anchang panna a, ngaichat khoh thil dang dang ho athah lut peh in ahi.

Akihom thil hohi Irang Part-II, District Council Constituency noiya um mipi ho phatchomna ding chule lockdown jeh a hahsatna ato u olsah nadinga ama sum a achoh thu jong Councillor pa in aseiyin ahi. Irang Part-II constituency noiya um jousen anchang kg 5 cheh chule thil dang dang ama a kon amu diu ahi, ati. Maohing a anchang chule thil khoh adang dang hohi khosung haosapu inmun a kihom ding ahi, tin aseibe in ahi.

Alangkhat a, Maohing kho haosapu Letkhosei Haokip in Irang Part-II kho haosa ho thalheng a amaho local MDC in pan alahna apachatna thu aseiyin, phat hahsat pet tah a mipi dinga nap ha atohna chunga kipathu aseiyin ahi. ADC Executive Member, BP Vikas Basnet hi lamkai dihtah chule amite kithopi dinga itih phat hijong le pan la jing lamkai ahi, ati. Khosung khangthah honjong MDC pa panlahna chunga kipathu sangtah asei uvin ahi.

 

State sorkar in anchang kihop thu a May 4 kah a Affidavit apeh dinga Court in thupeh nei

Imphal, Apr. 24(UNA): Lockdown jeh a hahsatna sangtah toh a mipi ho angaicha khoh thil ho hop ding chungchang a Manipur High Court in state sorkar henga May nisim 4 kah a affidavit apehlut diuvin notice ape in ahi.

PDS anchang kihopna thu a Court in thulhuhna aneithei nadinga mipi honjong ngaidan/lunggel asei diuvin Court in aseiyin ahi. Ngaidan chule lunggel, aphachom ding hohi Registrar General, High Court of Manipur henga Whatsapp number 9436204458 ahiloule rg.mnphc@nic.in ahiloule hcmefiling@gmail.com a May nisim 4 nikho kah a thot thei ahi. Ngaidan pe hon amin, akum, apa min, achenna le adang dang ho asei diu ahi.

Registrar General, Manipur High Court in hiche thu a Friday nikho a notice asodoh ahitai. Justice Lanusungkum Jamir le Justic Kh Nobin Sinh panna Manipur High Court ‘double bench’ in state sorkar henga PIL no 11 of 2020 kisem dungjuiya notice apeh ahi’in, PIL hi Human Rights Alert in state sorkar chule ‘respondent’ adang li douna a asem ahi. Court in PIL in Friday nikho a angailhah ahi.

Petition pe hon asei dungjuiya, Chief Minister Biren in PDS anchang hi April lha a dinga March lha kah a manbeiya hop ding chule PDS quota lhathum a hi lockdown jeh a mipin hahsatna ato jeh a hop dinga jong asei ahi. Ahivanga thu (information) kiholkhom dungjuiya, angaicha khoh ho thil kihopna hi phatah a akivet sui loujeh a genthei, simlai, chapang, sector a natong, NFSA card neilou chule ‘economically weaker section’ ho thil kihopna a pang lou ahi. Thil kihom hohi gamsung mi jousen amu nadinga state sorkar in avettup dinga jong ‘writ of mandamus’ kisodoh dinga ngehna anei uvin ahi.

Chief Minister in thuphon aneihi pachat umtah le seiphat umtah ahi’in, ahivanga thuphon mai mai hi lhing joulou ahi’in, mopohna neihon jui ding dan toh asemtha ngai ahi. Guidelines a hi PDS thil ho itih le, hoilai a chule iti kihop ding ham tihi seichen ding chule koi hopding ham jong suhcheh ding ahi, ati.

PDS anchang panna a thil ho hop dinga dan dungjuiya koi mopohna ham? PDS anchang hi aum jousen CM thuphon banga amu hinam? Amu a ahile ipi thil ham tiho state sorkar in photchenna document apeh ding, amusoh lou uva ahile koi themmona hiya, action kila hinam ahiloule thukholna um em, ti aseidiu, thil kihopna a boina toh aumle athu asei nadiu phone number, whatsapp ahiloule email kipe em, ti thudoh phabep kisei ahi.

Court in athu angailhah jouva gangtah a seilhah ding akhohsah a May nisim 4 hi aban a hiche thu seina dinga phat atep ahi. English thuso ni le pao dang thuso ni a kipe gamsung niseh thuso ho a ageipen a April nisim 26 kah a notice akisodoh nadinga Registrate General in pan alah dinga jong thupeh anei uvin ahi.