ET April 25, 2017 News (Local, Regional, Thusoh Lahchom, Editorial, Blankfire)

ET April 25, 2017 News (Local, Regional, Thusoh Lahchom, Editorial, Blankfire)

240
0
SHARE

Doctor hon private hospital joh’a lunglutna aneijeh’uva damlou tampi in anei le agou kijoh’a private hospital juon jing

Imphal, Apr. 24: Doctor hon private hospital langjoh’a lunglutna aneijeh’u hin genthei chaga chule neijoulou te’n dammo vetsahna ato teng’u le gentheina sangtah atohjing’uvin ahi. Mi phabep in vang private hospital a kijen na ding in a Inn le lou jong akijohdoh ‘uvin ahi.

State government in hitobang  thilkibol ho suhbeina ding in private hospital a tong doctor ho transfer bolding tohguon aneiyin hiche chungchon’a mi phabep in jong alunggel’u le angaidan’u aphongdoh’uvin ahi.

Hetthei khat chu Manipur sung’a medical college khatseh inei’u JNIMS a hi damlou ho kivetsah’a acheteng’u le asung’a natong doctor hon ama ama tohna private hospital a refer abolson ji’u ahi. Private Hospital alhung teng’u le  damlou ho hin sum tampi pi asuhlut ji’u ahi. Damlou phabep in private hospital a sumlut ho apohdoh joulou teng’u le JNIMS joh’a avel’a admit kithahbol ding ahin deisahji’uvin ahinlah doctor hon damlou ho chu “JNIMS a admit nakithah bol’a ahileh operation hi lhathum /lhali jou lang le kibolbep ding ahi” tin ana lhemlhaji’uvin ahi.

JNIMS le RIMS sung’a hi damlou tampi umkhom ahijeh’a operation bolding ho jong queue a kigol ji’u tithei ahi. Damlou phabep in anatna athohlal val teng le a Inn le lou ajohdoh’a private hospital joh ajot ji’u ahi. Sorkar thah in vai ahinhop tolhon’a hitobang thilsoh ho hi avel’a asokitlouna ding’a CM N Biren lamkaina BJP sorkar in ahingelkhoh ding in gamsung’a cheng mipi’n temna aneiyin ahi.

IFCD Minister in Singjamei vadung pang ho vil

Imphal, Apr. 24: Minister of Irrigation and Flood Control Department (IFCD)  Letpao Haokip in tuni (April 24)  chun Singjamei AC MLA  leh Manipur Legislative Assembly Speaker Y. Khemchand in Singjamei Oinam Thingel Waikhom Leikai a Imphal vadung vilna ananei lhon in ahi.

Vadung pang ahung chimthei ding laiho vetchilna jong aneilhon in ahi. Vadung pang hung chim kigo lai mun 3 chomkhat tadi a thing’a daal ding (retaining  wall) tohgon kibol vahding ahitan chujoule cement a pucca retaining wall semna natoh jong kipan paingal ding ahi  tin Minister Letpao in aseiye.

 

KPLF/KPLA in kicholsah, hilchen

Tengnoupal, Apr. 24(ET): KPLF/KPLA in organization daan toh kitoh in tuni chun KPLF/KPLA Finance department a tong T. Letkhohao Haokip @ Haopu Haokip s/o (L) Mangthang Haokip, Moreh Hill Town chu KPLF/KPLA kiloikhomna a konnin ana kicholsah tauvin ahi.

Chengjapao Kuki, President KPLF/KPLA a konna kimu lekhathot in atahlang dungjuiya; T. Letkhohao Haokip hi organization daankal a achonjeh’a tunia kipat ki kicholsah ahitan chule khonungle KPLF/KPLA Finance department min’a natoh abolthei tahlou ding le amachungthu’a boina ima aumjongle KPLF/KPLA in mo kipotalou ding ahi.

Chule achesa april nisim 19 ni’a Letginhao Haokip @ Haopu s/o Mangthang Haokip, T. Munnom Village chu KPLF/KPLA S/S Sargent Major dan’a kimanna Press statement hungkiso toh kisai hilchetna jong ahin nei uvin ahi.  Letginhao Haokip hi KPLF/KPLA Finance Secretary dia ana kila ahin hinlah chomkhatjou’a afellou jeh’a ana ki kicholsah pai kit ahitan, hitoh kilhon’a Letginhao Haokip hi KPLF/KPLA cadre ahitapoi ti mipi hetdia hilchetna ahin nei ahidan Demkhoseh Kuki, Information and Publicity Secretary min’a kimu thuso chun aseiyin ahi.

Tuchung Assemby (monsoon session) a ahithei leh ILPS bill hi kiphatsah hen: MLA Kh Joykisan

Imphal, Apr. 24: Thangmeiband Assembly Constituency apat hung kaidoh chuleh tu tu’a Manipur Pradesh Congress Committee Spokesperson Kh Joykisan in Manipur’a MLA ho (ruling or opposition) jouse in mipi lungdei tah’a ILPS  bill hi phatsah uhen tin temna anei in ahi chuleh sorkar in jong JCILPS hon kiphin na ahinpat kit’u ngah louva akin theipen na hiche thu hi asuh chet loi ding in Congress Bhavan mun’a tuni press conference achun asei in ahi.

Joykishan in thuso miho kom’a aseina’a chun; Ruling party hihen Opposition party hijong leh hiche ILPS bill chung thu’a JCILPS ho tu tu in thip chet in um’u jong leh anasah pehlou ding in jong asei in ahi.Congress hon state sung’a tha neita hih jongleh ILPS thu’a lunggel leh party in ana kidin pi chu mipi te ading’a napha toh ahi jing tohlhon in hiche lunggel hohi a itih chan hijong leh kikhel lou ding ahi ati.Hiche bill (protect and preserve the indigenous people of Manipur) hi mipi te deisah ahitoh kilhon na tuchung Manipur Legislative Assembly monsoon session hung um ding phat leh hiche bill hi kiphat sah hen ati.

MLA Joykishan in non-Manipuri khat Advocate General of Manipur a appoint kibol nachung’a alunglhai lou na aphondoh toh lhon in Govt. in hiche hi  non-Manipuri appoint kibol hi nung lah doh hen atin ahi.

Govt. employee hon phate’a atohdiu dol atoh teng’u le khantouna umbep ding ahi: A. Newmai

Imphal, Apr. 24: Gamsung’a government employee hon atohding dol u phate’a atoh teng’u lebou khantouna umbep ding ahi tin Parliamentary Secretary of Minor Irrigation Awangbou Newmai in tuni (Apr. 24) chun aseiye. Hiche thu hi tuni Minor Irrigation Department tohgon noiya Lamphel Office Complex a Awangbou Newmai loppehna kingon khat kimanna a asei ahi. Hiche kingon ah chun Principal Secretary of Minor Irrigation, JC Ramthanga leh hiche office a Chief Engineer Gourakeshore koulu in apang lhon in ahi.

Minor Irrigation Scheme ho ah maintenance fund apang poi tin Chief Engineer Gourakeshor in aseiyin hiche department in atohdia lom ho aphat cha ahin tohdoh lou tengle mipi honjong ana hetthem diuvin aseiyin ahi. Hiche toh kilhon in Parliamentary Secretary in akisaipi authority ho hengah hiche department in hahsatna ato hojong akinthei lam a ahin suhlhep ding’in temna aneiyin ahi.

Hindutva Nation’a kon mipi kichih thei ding’a KYKL Chairman in tiemna nei

Imphal, Apr. 24: Mainland Indian leader hon gamsung pumpi Hindutva nation’a puilut ding tohguon anei nah’a kon mipi jouse akichih thei diuvin Kangleipak Yawol Kanna Lup (KYKL) , Chairman  N Oken in kiloikhom kiphudoh kal kum 23 lhinna nikho in temna aneiyin ahi.  Thingnoi kiloikhom hin April nisim 25 nikho a chu kiphudoh kal kum 23 lhinna anit ahi.

“WESEA gamkai sung’a cheng ho malam’a boina lenpen um chu ahileh identity crisis hi ahi. Hindi hearland a um lakai hon multinational state-nation hi mono cultural nation-state khat sodohna ding’a pan hatah’a alah jing’u ahi” tin  N Oken akon kimu thulhut in aseiye.

Kum phabep masang’a chu WESEA gamkai sung’a um ho hin lhanphongtah le lungsa’ih lou hel’a non-Indian kahi’uve ti’a ana kisei ngam ahi. Naga le  Mizo ho hin tumasang’a chu identity kibah jeh’a ahina’u kiletsahpi tah’a ana phondoh thei’u ahi. Chuleh tu’a jat le nam jouse Hindi Hearland lamkai hon ol ol’a ahin luosoh thei’u hi Revolutionary movement amachal theilou jeh ahi tin jong N.Oken in aseiye.

N.Oken in thulhut a chun Jawaharlal Nehru le Congress party lamkai hon Hindi Nation semdoh ding tohguon ananei danho’u hilchetna aneiyin ahi. Chuleh tutu’a vaihom BJP sorkar in adoi le atup pipen jong Hindi Nation khat semdoh ding hi ahi tin aseiye.

Hinduism hi hou le bih tampi kigomkhom’a kisemdoh sakho khat ahi’n, Hindu demon ho jong jat le nam chule hou le bih phabep in pathen’a aman kit’u ahi. Aryan hon hou le bih phabep le identity phabep ana gopkhom’uva Hindu sakho hi ana semdoh’u ahi tin N.Oken in aseiyin ahi.

HTC Moreh in town sung suhtheng na nei

Moreh, Apr. 24 : Hill Tribal Council, Moreh in tuni chung Moreh Town sung leh Moreh Govt. Higher Secondary School mun vel ho suhtheng na ana nei un ahi. President in-charge Hill Tribal Council,Moreh ND Samte in asei na’a chun; Chairman of Autonomous District Council,Chandel, Lunkhosei Zou leh Member of ADC, Lamboi Gangte in khovel sung suhtheng na’a manding in gari ahin to jeh lhon in nakitong ho amachal lheh’e tin kipathu phongdoh in  ahi.

IMC in hetsahna pe

Imphal, Apr. 24: Imphal Thanga Market pang a alam louva gam kiguh a dukan kisah ho phetna akipantan ahi. IMC team in Gandhi Avenue area a nullah ho suhthengna natoh jong apan tauve. Hiche toh kilhon chun IMC in lamdih louva lampi pang a innsa/acheng ahiloule dukan bolhon akinthei lam’a adalhah diuvin hetsahna aneiyuvin ahi.

Legal Service camp, Moirangkhom Maring Village a um

Imphal, Apr. 24: Janhi chun District Legal Service Authority,Chandel hon one-day legal awareness programme chu Kakching Khunou,Moirangkhom Maring Village Community Hall lah ana mang un ahi.Hiche kin hi Manipur State Legal Service Authority hon Moirangkhom Village Chief,Okho (Okeshwor-Homeshwor) Trust, Langmeidong chuleh Elangbam Tondonbi Singh Memorial Charitable Trust,Hiyanglam Awang Leikai hotoh kithokhom ma abol’u ahi.Chief of Moirangkhom village P Merun Maring, Chief Guest; Executive direction of Okho Trust Thounaojam Ngouba Sing, Pesident chuleh Pastor of Moirang Baptist Church Th Akham, Guest of Honour hinan kin chu anamang un ahi.

Hiche kin nachun Imphal West district, K Dhane in ‘ Food Security Act and Mental Health’ chuleh General Secretary of All Manipur Lady’a Advocate Association, L Ashapurn Devi in ‘Crime against Women and Domestic Violence’ chungchang thu’ah houlim na ananei lhon in ahi. Resource persons akon in advocate B Prem Sharma in ‘ RTI and Consumers Act’ chuleh Executive director of Okho Trust Thounaojam Ngouba in ‘ Right to Education’ chuchang ah houlim najong anei lhon in ahi.

Adovacate Dhane Singh moderator hina in henom ahilouleh doh nom phat jong ana nei un ahi.

Ccpur ADC Chairman ding’a Khaipao Haokip lhendoh hita, kihahselna nei

Imphal, Apr. 24 (ET):  Tuni chun Kholmun District Council Constituency a konna kaidoh Khaipao Haokip chu Churachandpur Autonomous District Council Chairman ding in lhendoh anahitai. Churachandpur ADC Chairman lhenna chu tuni’a Hotel Classic Banquet Hall a ana um ahin chule Protem Speaker Lalhmangpui Fimate in Chairman dia lhendoh’a um Khaipao Haokip Certificate pehdohna le kihahselna ana neisah in ahi.

Tuni’a MDC Chairman lhenna le kihahsel na kin’a chun TT Haokip MLA, HAC Chairman, R. Sudhan, DC Ccpur, Soiminlen Lengen, CEO ADC Ccpur le BJP vice-president Ahnikumar hon jong pan analaovin ahi. Churachandpur MDC 24 lah’a MDC 19 in tuni kin’a chun pan analaovin ahi. Khaipao Haokip hi Chairman dia uncontest a anakaidoh ahin chule vice-chairman ding’a V. Khaikhanmung lhendoh’a ana um in ahi.

Tibukimlou ho tilkhou nading nga painting kitet na kibol

Imphal, Apr. 24: National Panchayat Day kiman ni ahitoh lhon in tibu kimlou ho’a ding in painting kitet na Mongsangei Mayai Leikai ah ana um in ahi.Pradhan of Mongshangei Gram Panchayat, H Premkanta in asei na’a chun; hiche painting kitet nahi tibu kimlou ho tilkhou nading nga kibol ahi dan jong asei in ahi.Hiche toh kilhon chun painting kitet na’a pachan na neiho jong kipa thilpeh najong anei peh in ahi.

DESAM hon blood donation bol

Imphal, Apr. 24: Tuni chun DESAM volunteers hon 126th Khongjom Day kipa pi najal in RIMS Blood bank ah blood donation camp anabol un ahi. DESAM in ‘blood donated for the student community and the people of the land’ ti thupi mangcha in blood donation camp chu ana nei in ahi.Hiche camp hi State Blood Cell, NHM,Manipur, IHBT chuleh RIMS ho makai na’a ana kibol in chuleh volunteers 100 Staff of RIMS, Shija Hospital chuleh mi dang dang jong nan thisan ana pedoh un ahi.

Volunteers of DESAM today organised a blood donation camp at RIMS Blood bank to commemorate the 126th Khongjom Day celebration today. The Blood donation camp was organised under the theme blood donated for the student community and the people of the land. The camp was sponsored by the State Blood Cell, NHM, Manipur and IHBT along with RIMS. As many as 100 volunteers including staffs of RIMS, Shija Hospital and other individuals donated blood.

Agiyathuri-Mangaldai mun toset jeh’a mi 3 thi chuleh mi 7 kitongkha

Guwahati, Apr. 24: Monday nichun Agiyathuri,Kamrup mun’a  car khat in truck khat aphut khah jeh in mi thum ana thin ahi. Hiche car hin kichen na kin’a pang ding mi Suwalkuchi a konna Changsari  jon ding nga ahung naova hitobang thilsoh hi atokhah u ahi.Athi ho min chu Biswajit Kalita, Bikash Das leh Mormeswar Medhi abon uva Suwalkuchi mi ngen ahi uvin ahi.Hiche toh kilhon chun anung jui bus khat ma ma jong Mangaldai mun’a toseh atoh kit in ahi hiche’a  chun mi 7 akisu khan athi amang vang ana um pon ahi.

Meghalaya CM in ama min’a fake Twitter account kihon jeh’a FIR jihlut ta

Shillong, Apr. 24: Meghalaya Chief Minister Mukul Sangma in Sunday nichun Sadar police station mun’a ama min’a  fake Twitter account anakihon jeh in FIR ana jih lut in ahi tin Davies Marak,district police chief of East Khasi Hills a kon kimu thulhut chun aseiye.

Hiche Chief Minister Mukun Sangma min’a kihong fake Twitter account achun; Ijem tia  tuchung election a lolhin na kanei ja ahileh Shilllog gamsung’a kham nathei (marijuana) hi legalise kahi sah ding ahi tin ana kitah doh in ahi.Police ho hiche chungthu toh kitoh in Information Technolog Act leh  the Indian Penal Code daan noi in jih lut in aum tai atin ahi.

Parliamentary Secy. N. Indrajeet loppehna kingon kimang

Imphal, Apr. 24: Tuni (Apr. 24) chun Porompat Thawanthaba Community Hall ah Lainingthou Thawangtha Thougal Lup tohgon noiyin MLA Kshetrigao AC, Parliamentary Secretary MAHUD Nahakpam Indrajeet loppehna kingon ana kimang in ahi. Hiche kingon ah chun Thougal Lup President, Kh Ibochouba, Advisor Th. Tomba leh Lai Selungba, S. Mangi jong apang lhon in ahi. Parliamentary Secretary Nahakpam Indrajeet in ama Assembly Constituency sung’a khantou machal natoh hojong kibol panding ahitai ahi.

National Panchayat Day nit’u

Imphal, Apr. 24 (DIPR): Tuni’a kipat nikho 65 sunga Zilla Parshad Office ho kisachai ding ahi tin Rural Development & Panchayati Raj Minister Thongam Biswajit Singh in tuni Panchayat Bhawan, Porompat’a  National Panchayat Day kinit na kinguon’a chun aseiye. Rural Development & Panchayati Raj department jong Major department khat dinmun’a doptou ahilou apoimo’e tin  jong aseiye.

Aman aseibena’a chun birth certificate ho jong electronic mode a peh thei ahina ding’a pan hatah a kilading ahi ati. Housing for All Scheme noiya sorkar in Inn 10,000 sahdoh ding tohguon aneidan jong aphongdoh’e.  Gamsung’a khantouna  pohlut na ding’a hi mijouse kilungtoh tah’a pan ngai ahi. Elected representative khat mipi ho lungdei lou lam’a achon’a ahileh mipi’n achung’a tahsan na aneilou ding ahi tin jong aseiye. Prime Minister Narendra Modi in mipi ding’a scheme aphongdoh 126 ho hi mipi hon lolhingtah’a amutheina ding’uva Pradhan ho le Zila Parishad hon pan alah diuvin jong temna aneiye.

Kinguon ‘a chun RD & PR Parliamentary Secretary Heikham Dingo Singh, Health & Family Welfare Parliamentary Secretary Soibam Subhaschandra Singh, MAHUD Parliamentary Secretary N Indrajit Singh le RD & PR Secretary Sumant Singh  in jong pan ala’uvin ahi. Tuni kinguon a chun  Keirao, Kyamgei le Kanglatombi Gram Panchayat in Gram Uday Se Bharat Uday Abhiyan kipaman akisan’uvin ahi.

CWSN chungchang’a jilkung ho kichuhna kipe

Imphal, Apr. 24:  Kakching district sung’a um jilkung ho  kichuhna kinguon “Cirriculum Adaptation of Children with Special Needs” tuni chun  ZEO Office Kakching kom’a um Practising  Junior High School’a ana kipan in ahi. Kinguon hi ni nga chelha ding ahi. Chuleh kinguon hi District Project Office Sarva Shiksha Abhiyan (SSA), Kakching in aguon ahi.

Tuni hondohna kinguon’a chun ZEO/DPO-SSA,Kakching Y Shamu Singh Jin-gun in apang  in Deputy Inspector of School, ZEO Kakching Y Achouba Singh Kinneipa in apang in chuleh assistant inspector of School Laishram Sarat Singh le Wahengbam Laxmipyari Devi jin-ja’um in apang lhon in ahi. Kinguon’a chun  ZEO, Kakching noiya um government aided school jilkung 43 in pang ala’uvin ahi. Kinguon hi April nisim 28 nikho le khumkha hiding ahi.

Hind Jalpan helper khat athisa’a kimudoh

Imphal, Apr. 24:  Paona Bazar a um Hind JalpalHotel staff khat tuni jingkahlam nidan 11 vel chun hotel Ehbuh a ana kikhailih in ahi. Thulhut kimu in aseidan in akikhailih pa chu amin Ritu Kalita  ahi’n, Kamrup district, Assam a cheng (L) Hemchandra Kumar chapa ahi. Ritu Kalita hi achesa kum nga sung’a chu Halpal Hotel a helper a hung pang ahi. Atohkhompi ho’n Rity Kalita amu nukhah na pen’u chu jingkahlam nidan 8:30 vel ahi. Ahinlah nidan 9 geiya jong atohnamun alhun lou phat’a atohkhompi hon agahol na’uva ehbuh’a athisa’a aga mudoh’u ahi. Police in Ritu Kalita luongdamsa chu RIMS Mortuary a post mortem bolding in ana polut tan ahi.

Machi vangkho’a child trafficking le sexual abuse chungchang’a consultation programme kibol

Imphal, Apr. 24: Jaanhi (April 23) chun Tengnoupal District hopsunga um  Machi vangkho community hall’a child trafficking le child sexual abuse chungchang’a Block Level consultation programme ana chelha in ahi. Kinguon chu Child Welfare Committee, Chandel , Machi Village Authority, Child Rights and You le Action for Change-Manipur (Reach-M) in aguon’u ahi.

CWC Chandel Wanlalkhup Aimol in kinguon’a ahoulimna’a chun kinguon kibol luona jeh pipen ahilchen in ahi. Manipur Commission for Protection of Child Rights member Khundrakpam Rajlakshmi in Juvenile Justice Act chugnchang’a houlimna aneiyin ahi.

CWC Chairperson,Imphal West, Thiyam Rajkishwor Singh le Md Yakub Alim Machi Police Station 2nd Officer-in-charge in Protection of Children from Sexual Offences (POSCO) Act  le Role of Special Juvenile Police Unit chungchang’a houlimna aneilhon in ahi. Houlimna kichai chun CWC member, Chandel Roundar Paul in mipi  ho thudoh donbutna aneiyin ahi.  Kinguon a chunk ho hen ho, numei ho, khangdong ho , hou lamkai ho chuleh civil society organisation member aguom’a mi 70 vel in pan ala’uvin ahi.

Thusoh Lahchom

KWU

 Kuki Women Union (KWU) makaina a tuni chun Kuki Inn, Imphal a 14 April Rape Case chung changthu’a kihoukhomna ana um in ahi. Hiche kihoukhomna a chun phaicham a pansa numei kiloikhomna tamtah jong anajaovin chule hiche rape case chung chang toh kisaiya maban’a panlah ding dan ho ana seikhom uvin ahi. Ahung kikhom kiloikhomna hon hiche case toh kisaiya maphu ding in Core Committee jong semdohna anei uvin chule numei chung’a khansetna alhunjing deilou vetsahna a kijotna (Rally) neiding in jong akiphatsah uvin ahi. Hinlah Rally chena ding nikho vang seichet ahinaipon ahi.

 

Meilhei pao

Meilhei pao helou ho Chief Minister pa Advisor ahiloule Advocate General a kipansah theilou ding ahi tin Meelal Mayai Loishang in tuni (Apr. 24) chun aseiyuvin hichetoh kilhon’a government in appointment order ho akinthei lam’a anung khel loule action khoutah kilading ahi tinjong aseiyuvin ahi.

TYA in kipapi

Manipur University MANFETE 2017 a Runners-up hina hinla Thangminlun Singsit kipapina thuthot Thadou Youths’ Association, General Headquarters (TYA-GHQ) in ahin neiyuvin ahi. Thangminlun Singsit hi tu-le-tu’a TYA-CEC a jong Finance Department a Assistant Secretary ahinaban’a tuchung’a ahung lolhin hin maban’a khangthah hodia kitilkhouna theitah jong ahung hiding TYA-GHQ Secretary General Thangminlien S. Haokip min’a kimu kipapina thuphon chun atahlang in ahi. Manipur University Campus a ana kibol MANFETE a chu Thangminlun Singsit hin Thadou Tribe represent anabol ahi.

Jukha le IMFL kiman

Singjamei Police team khat in tuni nilhahlam nidan 7:30 vel chun  Singjamei Chingamakha Ningthoujam Leikai a kon Jukha le Indian Made Foreign Liquor (IMFL) phabep amandoh in ahi. Ju chu Khumbongmayum Sushil Singh Inn a kon kimandoh ahi. Singjamei Police in amatdoh ho chu Jukha litre 100 le IMFL Whisky bottle 42 ahi.

Kombirei

 North East Institute of Science and Technology a Principal Scientist Dr. H. Birkumar in Kombirei kiti Manipur a kimu (Iris Gallery) pahcha min hi adihpoi tin aphongdoh in ahi. Hiche min hi Botanical Survey of India injong apang poi ati. Hiche thu hi Lamphel a ama institute a conference kibolna a thuso miho henga asei ahi. Kombirei kiti pahcha min hi iris Laevigata Fisch joh kiti ding ahi ati.

Editorial

14 April Rape Case a mi 5 Juvenile dan a kisei

Achesa april nisim 14 nihah’a pasal 7 in numei chapang 2 hunam’a ana suhset’u toh kisaiya kiloikhomna jatchuom chuom ho ‘n demna thuphon ahin neijing’u toh kilhon’a hiche case a mona neiho mi 7 lah’a mi 5 hi Juvenile (akum lhinglou lai) ahi tia khonung a ahung kiphondoh kit hin case chelhah dan chung’a mitamtah in concerned authority ho chung’a tahsan lelna aneisahlo in ahi.Thilsoh jouva mona neiho akimat tupjou chun mi 7 lah’a mi 6 hi mipilhing (kum 18 chunglam dan’a kisei) ahin hinlah april nisim 24 ni jingkah’a nitin thusobu ho’a hung kisodan chu ivetle hiche mi 6 lah’a mi 5 hi Juvenile dan in ahung kisei kit tan, hitoh kilhon’a akum lhinglou lai chapang ho chu ahiding bang’a gotna khoutah kipethei talou ding tina ahitai. Hiche case a mona nei ho chun ipi certificate/document mangcha’a akum’u proof abol’u ham ti vang akihepon hinlah Manipur gamsung’a hi alhangpia Matriculation Certificate ahiloule Birth Certificate ho kimangcha ji ahi. Matriculation Certificate mangcha’a Juvenile ahinau proof abol’u ahile vang amaho chungthu hi Juvenile Justice Board khut’a kingam tading chule gotna jong mipilhing dang ho sang’a nemjep ding tina ahitai. Birth Certificate mangcha’a proof abol’u ahile vang CSO inei houvin phatea akholchil jep’u ngaiding ahi; ajeh chu Birth certificate a hi idei jat jat kum ki kijih thei ahin, birth certificate hi age proof bolna dia mantah tah thei hilou ahi. Academic Certficate ho jeng jong manipulation kibol thei ahijeh chun tu’a mona neiho anakainau School ho’a  ga kholchil ding hi hungpha pen ding ham ahiloule Juvenile a kisei ho hi Ossification Test bolding ham hung ngaiding ahi. Hinlah hiche Test jeng jong hi age proof nadia man tah tah theilou dan a jong ana kiseikit ahi.

Juvenile Justice Act, 2000 dungjuiya kum 18 lhing mikhat chu mipilhing dan’a ana kisim ahin hijongle 2012 Gang Rape case jouva Juvenile pa ana kilhadoh’a kiphinna ana sousang toh kilhon’a hiche Act hi Parliament a thahvet na ana um a, hiche dungjuiya chu achesa 2015 kum ma chu Juvenile Justice (care and protection of children) Act, 2015 hi Parliament in Juvenile Justice Act, 2000 khelding’a phatsahna ana nei’u ahin chule January 15, 2016 a konna hung kichepi pan ahitai. Hiche act dungjuiya age group 16-18 kikah ho hi mipilhing a kisim tadiu,  mipilhing  khat bang’a thu tanna kineikhum thei tading tina ahin chule  kum 7 sung suongkul jong tang thei’u ahi. Tuchung thilsoh’a mona neiho chu Class-XI/XII simlai bep ngen ahiuvin, hitoh kilhon’a academic certificate vet’a chu Juvenile ahidiu chu hetsa ahin, hinlah thil phalou khat bolthei kiti chu chapang talou tina jong ahikit in, hiche Juvenile Act hin chapang kumlhinglou hodia thilse bolna dia ahin tilkhoukhah joh diuhi tijat umtah ahi.  2012 kum’a Medical student khat Gang Rape anakibol jouva Juvenile pa Court in analhadoh chun gamsung a kiphinna sangtah anasoh in, hiche dungjui chun Juvenile ho kum jong 18 a konnin 16 a khehnem anahin, hinlah hiche thu’a tuchan hin kinel baotam abeithei naipon ahi. Tuchung thilsoh’a jong mona neiho atamjo hi Juvenile ahi tia akiphondoh kit toh kilhon’a mona neiho ding’a athilbol’u hi kisihna lungthim umthei behlou ding chule khangthah kumlhing nailou hodia thilbol khel ding kichatna lungthim jong aumchom sahdeh lou din akilang in ahi.

Blankfire

Numei ho midang in ipipi alo e kiti tengleh  Koi ngoh diham, ei le ei ki ngoh diham, midang ngoh diham kinelna thei mong ahiji hi akinel hojoh ngohdin aum dehdeh ji bouve, ipi kisei ham