ET April 24, 2020 news

ET April 24, 2020 news

50
0
SHARE

COVID-19 jeh a gamgi a ‘fencing’ semna natoh kikeh let be

Imphal, April 23(ET): Myanmar le Manipur gamgi ‘international border’ a coronavirus natna akisei jing laiya ‘fencing’ semna natoh akehlen uvin, chule gamdang a kon natna po a midang ahunglut louna dinga kholchilna sangtah anei uvin ahi.

Wednesday nikho a Chief Minister N Biren Singh in, gam kinaipi Myanmar a hi COVID-19 natna akisei khoh jeh a gamgi a fencing semna dinga manchah ho Pakmual le Behiang, Churachandpur district a kithot be ahi, ati. Fencing semna natoh hi Churachandpur District SP Amrita Sinha lamkaina a chelha ahi, ati.

Churachandpur SDPO Bijoy Singh command noiya gamgi phatah a ngah tup dinga IRB sepai ho le police 100 vel kisol be ahi, tin CM in aseiyin ahi. Moreh town, Tengnoupal district chule Namphalong bazar, Tamu Town, Myanmar a jong phat chomkhat manthei ding fencing kisa ahi, tia thulhut in asei ahi. Chule Phaikok le Skipe kho, Kamjong district a jong GI sheet kitungdoh ahi’in, ahivanga, thulhut dungjuiya, gamgi a fencing kibol hi Myanmar Army hon asuse uve, kiti ahi.

State sorkar in gamgi galkaiya kon che le vah le aumlou nadinga mi che le nathei gamgi ho akha diuva khosung mihon temna aneiyu ahi. Manipur le Myanmar gamgi hi km 510 vel hi ahi’in, ahivanga gamgi atamjo hi tho kigen lou chule Assam Rifles hon aphat tin a anga ahi. State sorkar in gamgi jui, international border (IB) kom a cheng ho angaicha khoh cho dinga gamgi khel a ache nauva nat ahin kilahson louna ding uva neh le chah kijohna (grocery kiosk) hondoh dinga jong tohgon um ahi.

Myanmar akon gamsung hunglut khat kiman doh

Ccpur, April 23(ET): Ccpur Behiang police akon thuso kimu dungjui in Myanmar akon mi khat Singat sung a Ngaljang kho a in jon in ahunglut in ahi akiti. Behiang police le medical team khat in hiche pa chu ana del lut uvin ana podoh uvin ahi.

Akiman dohpa chu Ccpur district hospital a isolation a akikoi in ahi. Akiman doh pa chung’a chun FIR khat jong file ana kibol in ahi.

Indo-Myanmar gamgi ngah dinga IRB company khat kisol be

Churachandpur, April 23(ET): Wednesday nikho a kon Singat sub-division, Churachandpur district a Indo-Myanmar gamgi ngah a police le AR ho kithopi dinga IRB company khat asolbe tauvin ahi.

Gamsunga Covid-19 natna vendoh nadinga sorkar in pan alahna ahi’in chule Indo-Myanmar gamgi khoutah a nga tup nading ahi. Churachandpur district police hon civiladministration, Assam Rifles chule security agency dang dang hotoh kitho uva natna doudalna dinga pan alahjom uva, gamgi galkaiya kon mi ava le louna dinga patrolling akehlet uva chule gamkai miho athu hilna (awareness) anei jingu ahi.

Behiang police station le Singngat Polcie station in Assam Rifles hotoh kitho a ‘patrolling’ abol jingu ahi. Khal lai ahijeh a vadung kang ahi’in, hiche hi galkaina a aman jing u ahi. Hiche jeh a Tuivai, Samtui le Tuivel vadung hojong exercise noiya ahop tha u ahi. SDPO Churachandpur, Bijoy Kumar, MPS jong Behiang police station a um a, gamgi juiya natoh chelha jouse Assam Rifles hotoh kihoutohna anei uva avetsui ahi.

Mi phabep Khaukual kho, Sangaikot sub-division a kon ahung galkai lut kigo uve, tia jong thulhut um ahi’in, hiche a dinga police team hon amun anga uva chule khosung miho jong hetsahna aneiyu ahi. Hetthei khat chu district administration in district police chule Assam Rifles hotoh kitho uva Myanmar gam gari a jot nathei lampi munthum- BP No 35/36, Suangdai kho, BP No 40/41, Behiang chule BP No 39, Suangphuh kho hi achesa April nisim 1 nikho a akha u ahitai.

Gari chule mi ache le ding hi kiphal lou ahi’in, ahivanga, mi va le na thilsoh ni kisei ahi. Hiche a themmona neiya kingoh jouse police le AR team hon amat uva IDSP team ho henga apehdoh u ahi. Chomkhat jouva amaho hi Government Quarantine Centre, Bijang a dan kisem dungjuiya asol u ahi.

Minister Nemcha Kipgen in Mao vil; Mao hi Manipur gam a dinga ‘Corona Gateway’ ahijeh a khohsahna sangpen peh dinga sei

Kangpokpi, Apr. 23(UNA): Social Welfare and Cooperation Minister le Kangpokpi/Senapati in-charge hi a Nemcha Kipgen in Thursday nikhon Mao avil in, COVID-19 pandemic toh kisaiya dinmun chule natoh chelha ho vetlhahna aneiyin ahi.

Minister nu hi M Harekrishna, IAS, Nodal Officer, Kangpokpi le Senapati, Dr L Arke, Additional Director Public Health, Dr Y Premchandra Singh, Deputy Director Public Health, Dr L Somorendro, DD chule Dr O Romesh, SMO (in charge quarantine) chule Senapati DC, SP le CMO toh kilhon ahi. Mao Screening centre mun a Outer Manipur MP Dr. S Lorho jong aumin ahi.

Minister in-charge nu henga Mao screening centre mun a thukhoh achom chom thumna ho anei uvin, Minister nu injong athu vetlhah a chule thumna ho bulhit dinga aseiyin, mopohna nei authority hon angaicha ho avetsui diuvin jong thuhilna aneiyin ahi. Border gate a um highway kom a military ponbuh kisonna a ‘screening centre’ kisem, dinmun ahoi loud an amu Minister in nommo asahna thu aseiyin ahi.

Go ajuh teng ponbuh sunga go va a chule ‘frontline worker’ hon hahsatna tamtah ato u ahi. Health Department le Senapati DC in screening centre kituptah a asah ding chule ‘waiting area’ jong asem diuvin in-charge Minister Nemcha in thuhilna aneiyin, PHE Department in numei a ding thum panna a toilet 6 asah dinga jong thupeh aneiyin ahi. Natoh hohi kal khat sunga ajo diuva asei ahi.

Minister nu in ‘thermal scanner, mask le adang dang panna a medical manchah phabep screening centre a um doctor le nurse chule police ho pehdohna aneiyin ahi. Screening centre a natong ding mi alhahsam thu jong Minister nu henga hetsahna anei uvin, ambulance service le medical kit chule PPE ho alhahsam thu asei uvin ahi. Screening centre a natong health worker ho 13 month pay tobang a ‘incentive’ akipeh nadinga Minister nu in pan alah dinga MP Dr Korho in temna aneiyin chule COVID 19 sunga frontline worker ho kithopina pe a, tomngai tah a pan lajing a khosung mi volunteer hojong ‘incentive’ agon peh diuvin aseibe in ahi.

 Minsiter nu in Maopolice check post le JNV Mao a ‘quarantine centre’ jong avil in, JNV Mao Quarantine Centre a um ho akimupi in, thungaina anei jeh uvin pachatna thu aseiyin chule tilkhouna jong aneiyin ahi. Minister Nemcha Kipgen in Mao hi Manipur gam a Corona nat pohlut nading ‘Gateway’ ahijeh a sorkar in gelkhohna sangtah apeh dinga aseiyin ahi.

Mao a suhkhel neocha hin gamsung mun dang dang a Covid-19 venna dinga kigotna umho asuhset soh thei ahi, tin aseiyin chule Mao Screening centre a angaicha thu ho Chief Minister henga pohdoh a, apet pet a vettup a chule ao screening centre le check point khohsahna sangpen peh dinga kasei dinga hi, ati. Manipur gamsung hi ikipunkhom uva, kithuto na le kitosotna inei uva, COVID-19 a kon ihuhdoh diu ahi, tin Minister nu in aseibe in ahi.

 

Kochi, Kerala a tangden gamsung mihon state sorkar kithopina thum; sum neilou jeh a hahsatna sangtah toh u

Imphal, April 23(ET): Kakkanad area, Kochi, Kerala gam a tangden a Manipur gam mi natong mi 100 vel in COVID-19 pandemic lockdown jeh a angaicha khoh thil ho kilahna ding kanei pouve, tin asei uvin chule state sorkar in akithopi diuvin ngehna anei uvin ahi.

Natong mi 60 le 70 vel hi CSEZ company kiti ‘fish processing and packing’ a natong ahiuvin, adang hohi hotel chom chom a service boy a pang chule phabep hin Parlour ho a na atoh u ahi. Nabachandra kiti Kakching district a kon hi a mikhat in thuso miho telephone a akihoupi na’a, COVID 19 lockdown jeh a na katong ta pouvin, chule niseh a sum kahol u kamu tahlouvu ahi, tin aseiyin ahi.

“Hiche mun a natong atamjo hin sum kanei tapouvin chule gamdang mi kahi jeh uva sorkar a kon angaicha khoh akihom hojong kamu pouve”, ati. Ahin, local club khat in akihonmin sa neh le chah eipe uvin, nikhat a khatvei anneh mu nadinga niseh le ‘queue’ a kakigol u ahi’in, insung mi jousen hiche hi anga theilou jeh a hahsatna sangtah katoh uve, tin aseibe in ahi.

Natong adang khat in www.tengbang.in a register kabol uva Manipursorkar kithopina kilah ding kago uvin, ahivanga tuchan geiya Manipur sorkar a kon kithopina ima kamu nai pouve, ati. State sorkar in kithopina eipeh u ahiloule Kochi authority hon angaicha khoh ho eipeh nading uva pan alah a eikithopi diu kadei uve, tin Nachandra in aseiyin, tu dinmun a gamsunga kile nathei lampi aumlou jeh a state sorkar in akithopi diuvin thumna aneibe uvin ahi.

“Sum kakikhol jouseu kichai ding ahitan, kivahna ding ima kanei tapouvin chule lockdown jeh a gamsunga jong kakile theilou u ahi”, tin CSEZ Company a natong gamsung mi khat in aseiyin ahi. Hetthei khat chu Kerala gamsung hi COVID-19 pandemic jeh a vangsetna toh sang a gam khat ahi. Tuni chan geiya Kerala gam a Covid-19 positive hi 423 lhing a chule athah a case 11 kiseibe ahi. Tuchan geiya agamsung uva natna jeh a mithum thi ahitai, tia Ministry of Health and Family Welfare, India government in asei ahi.

Dan dihlouva LPG cylinder joh ho kiman

Imphal, April 23: Imphal West Police Commando hon gangtah a meiya kong thei LPG cylinder dan dihlouva joh a mikhat Wednesday jan nidan 7.30 don a Majorkhul a konin aman uvin ahi.

Mipa hi amin Hidayananda Sah (24), s/o Dharabharan Sah ahi’in, Gopalganj, Bihar gam mi hiya chule tu le tua Majorkhul, Imphal a cheng ahi. Police team hon mipaa kon LPG cylinder adim khat le cylinder akeu thum jong aman uvin ahi. Hiche thu toh kisaiya FIR ajihlut tauvin chule Duty Magistrate Imphal West in jail a umdinga thupeh aneiya, achungthu kholna aneidiu ahi.

Alangkhat a, Imphal West Commando hon jong nikho ma ma a Ragailong a dan dihlouva LPG cylinder joh a mikhat aman kit uvin ahi. Akiman mipa hi Naga Shah (42), s/o Ganesh Sahu, Ragailong a cheng ahi. Cylinder adim thum le akeo 9 chule gas lekha 27 toh amat tha uvin, Ragailong a achenna in bahara a kon commando team hon amat ahi.

Hiche toh kisaiya Imphal police station a case ajihlut tauvin chule akiman mipa le gas cylinder lekha ho Duty Magistrate anga Thursday nikhon adinsah uvin, jail a umdinga thulhuhna anei tauvin ahi.

 

Republic TV Chief Arnab Goswami kibulu thu’a mi 3 kiman

Mumbai, April 23: Mumbai police  in Indian Youth Congress member ni Republic TV chief Arnab Goswami bulu na toh kisai in ana man uvin ahi. AKiman doh teni chu Prateek Mishra le Arun Borade ahi lhon in Youth Congress, Sion-Koliwada Assembly constituency a mopohna nei cheh ahi lhon in ahi akiti.

Mishra hi Sion-KoliwadaYouth Congress a general secretary ahi akiti in chuleh Borade hi president ahi akiti. Goswami  in asei na ama le a inneipi chu jaanlhah a Congress natong ho in ana bulu a ana sei ahi. NM Joshi Marg police station a FIR ana kibol dungjui in  Mishra le Borade chun Goswami gari chu ana tin tan lhon a gari window ana suh honna ink ana the lhon ahi akiti.

Monanei teni chu Sections 341, 504  le Indian Penal Code dang dang noi in mo ana kichan sah lhon in ahi. Abhinash Kumar, deputy commissioner of police, Zone 3  in thuso kinei chu suh chenna an anei in ahi. Mumbai Police akon thuso kimu dungjui in Goswami in hiche kibulu natoh kisai a complaint file ana bola hi akiti.

Thuso kimu dungjui in Borade le Mishra chu Mumbai Youth Congress Ganesh Yadav toh kigop jing mi ahi lhon in ahi akiti. Suraj Singh Thakur,  vice-president, Mumbai Youth Congress in thuso ahin nein a a tu chan in akiman ho hi koi ahi akihepon, Arnab Goswami thusei vang hi dih lou hel ahin, jou le naal kisem thu ahi tin hetsah na ahin nei in ahi. Mumbai akon Congress party thuso chun asei na a hiche chapang ho tohgon chu Goswami chu ink thekhum ding ti ain hinlah Goswami in thuso hi hoilang ham doi in apui le jing in ahi ati. Hetthei khat chu Goswami in Palghar mun a Sadhu ni kithana chung a Sonia Gandhi angoh toh lhon a Sonia in Hindu ho abolna ho Italy lam a asopi ho hetsah na anei ji a asopi ho in achung a kipa thu ahin sei ji dan a ana sei ahi.

Minister Letpao Haokip in Indo-Myanmar gamgi juiya um khosung ho angaicha thil ho hop peh dinga kitepna nei

Chandel, April 23(ET): YAS le Water Resources Minister Letpao Haokip in Wednesday nikhon COVID-19 lockdown aum sunga hahsatna aumjeh a ama constituency a naosen tilou kum 2 chunglang jouse amicheh a anchang kg 5 cheh peh dinga kitepna aneiyin ahi.

Tua akichepi ‘quarantine centre’ ho tilouva Chandel le Tengnoupal district a ‘quarantine facility’ sah be dinga sorkar henga sei dinga aseibe in ahi, ajeh chu gamkai hi international-border toh akinai jeh a boina thei dinmun a um ahi, ati. Hetthei khat chu Indo-Myanmar gamgi juiya um Chandel le Tengnoupal khosung hohin lockdown sunga neh leh chah lahna dinga hahsatna sangtah ato u ahi.

PMGKAY le OMSS scheme noiya anchang akihop tilouva ama MLA Fund a kon chule ama sum a kon dangka lakh 9 lhing anchang hi 41- Chandel AC a imi 50 val peh dinga agon ahi. Wednesday nikho a Minister pa amatah Chandel district a um thinglhang gamlha tah a um Khambarol, Khengjoi, Sajik Tampak Kana Area le Sugnu Hill Area a amatah che a anchang chule ngaichat khoh khoh thil dang ahop peh ahi.

Minister Letpao Haokip in thuso miho akimupi na’a, constituency a cheng jat dihtah le voter jat hi akibang poi, tin aseiyin, hiche jeh a constituency sunga um jousen anchang man beiya amutei nadiu kigong ding ahi, ati. Lockdown hi May nisim 3 kalval a aphat akisuhsaobe a ahile amit dinga anchang manbeiya peh jom dinga jong aseibe in ahi.

Mipi anchang akihop na a koitobang sum thum a auma ahile ama ahilouleh district administration henga hehna asem diuvin temna aneiyin ahi. Khambarol kho a Letpao in MDC member holeh akimvel a um kho haosa upa ho akimupi in, COVID-19 nat douna dinga akichepi ho thu asei khom uvin chule ‘quarantine centre’ semdoh be dinga jong kitepna aneiyin ahi.

Gamkaiya medical department office hon lou le ai chule testing facility a lhahsamna ato hojong lamkai sang ho henga kipodoh ding, kisulham vahding ahi, tin Minister pa in aseiyin ahi. Wednesday nikho a lhang avilna a, khosung mihon ‘social distancing’ ajuiya chule guidelines dang dang ajui uva, district administration, police chule medical department official ho tosotna lhingset apeh diuvin temna aneibe in ahi.

Minister Letpao Haokip in COVID-19 chungchanga review meeting abolna a Chandel le Tengnoupal district teni a kigotna aumdan ho seikhomna aneiyu ahi. Achesa April nisim 21 nikho a Chandel DC Complex mun a meeting abol nauva DC, SP le DLO hojong pang ahi.