ET April 2, 2017 News (Local, Regional, National, Thusoh Lahchom, Editorial, Et...

ET April 2, 2017 News (Local, Regional, National, Thusoh Lahchom, Editorial, Et Taona)

387
0
SHARE

Sorkar in khantouna tohgon ho kitup tah’a achelhah nading’a vetsuina nei

Imphal, April 1: State Plan/CSS, 2016-17 ‘a khantou machalna tohgon leh fund kitup tah’a akiman thei nading state sorkar in department jousen ‘instruction’ ajui uva chule aphatcha khantou na natoh ho achai diuvin thuhilna anei uvin ahi.

Hiche thu’a Principal Secretary (Planning) Vineet Joshi in Additional Chief Secretaries, Principal Secretary, Commissioner, Secretary chule department luboh jousen ajui ding’in March nisim 30 nikhon office memorandum asodoh in ahi. Office memorandum’a chun dangka lakh 50 leh achunglang lut’a 2016-17 kum’a kibol natoh jouse officer luboh hon amachal dan dinmun apeh diu chule progress report ‘a hi natoh na ho photo jong atosot na’a apeh diuvin aseibe in ahi.

IT Department/Consultant hotoh tohgon achelhah thu office memorandum’a akiseiyin chule department hon Planning Department website’a akithum information ho upload abol diu ahi. Website’a kitahdoh’a photo’a hi natoh kipat masang, natoh chelha sung (photo 4-5) chule natoh kichaina ho lim pang ding ahi’in, na kitoh na mun leh amachal dan muthei ahisoh tei nading’a lim alah diu ahi. State Plan/CSS (2016-17) ‘a khantou machalna tohgon chom chom ho kitup tah’a achelhah vetsui theina ding tohgon ahi, tin aseibe in ahi.

Mapithel dam kilahlut ding tohgon MDAVO in demna nei

Imphal, April 1: April nisim 1 nikho thuso’a IFCD Minister Letpao Haokip in nikho somni (20) sung’a Mapithel dam hondoh ding’a asei hi MDAVO in sangtah in demna anei uvin ahi.

Project 99% akichai tai, tia kisei hi MDAVO in demna aneiyin, thudih lou ahi, tin aseiyun chule athupi pen ‘power generation turbine’ kito (installed) loulai ahi’in, irrigation channel akisa naipon chule Imphal khopi twi pehna dng pipeline jong kisutup loulai ahi, ati. Hiche jeh’a dam akichai kon ahitai kiti hi mipi lhep nading thu bou ahi, tin demna leh ngohna anei uvin ahi.

Project inauguration plan jong hi UN Special Rapporteur Leilani Farha chule Victoria Tauli-Corpuz toh achesa March nisim 26, 2015 kum’a kihouna jana aumlou vetsahna ahi, tin aseiyui. State RR plan, Expert Review Committee ho final report, Hig Court thupeh ipijeh’a kijuilou ahidan, social environment atohkhah dan, chule gamsung miho ‘rights’ aven dan thuchen apeh diuva UN Special Rapporteur in thumna anei ahi. Prime Minister’s Office leh Union Power Ministry injong kum masa August nisim 28 leh 29 nikho’a Mapithel Dam hondoh nading tohgon khongai sah nading’a pan alah ahi, ati.

Mopohna nei Minister ahilouleh project authority hon amun joh vil uhen lang, Mapithel dam thu’a boina umho suhlhap ding joh gong uhen, tin MDAVO in aseibe in ahi.

Saikul gamkaija tehse ho asum sandiu Saikul mun’a hoppeh un tia CSOs Saikul in SWO heng’a ngehna nei

Kaybie Chongloi,

Kanggui, Apr. 1: Tulaitah’a chelha Old Age Pension sum kihom chungchanga CSOs Saikul in Social Welfare Officer, Saitu-Gamphazol henga tunin Saikul gamkai tehse khotona jallin ngehna aneijun ahi.

CSOs Saikul hon aseinauva, tumasang sungse chun hiche tehse sum san hi ama ama gamkaija ana kihom’in Saikul gamkaija tehse ho jong Saikul mun’a ana hoppeh jingun hilah tuchunga Phai (Imphal) a hoppeh dinga ahin gon’u hi aphamo lhehjeng’e atiuve.

Amahon asei beuva, masangjep chun boina jeh in Saikul gamkaija dinga umsun Vijaya Bank chu phatchom khat set ana kikhahnai hijongle tuhin angai bangin bank natoh dingdol sum le pai lamtoh kisai jouse phatechan achelha pankit tan chule security jong ngaichat dungjuija eiki thopi diuvin Saikul police phatseh in kigosa demin aumjing nauve.

Tuchung dehdeh’a tehse ho asum san diu alhomna kah’a Phai langpeh’a sum sanga ahung diu le asandoh jat diu sanga ahin suhmang diu tamjo ding dinmun’a um tampi aumin, chule che le va na’a jong genthei hahsatna tampi atodiu ahi.

Hijehchun, Social Welfare Officer, Saitu-Gamphazol in agontupsa hijongle tehse tha lhasam tasa hoding gelkhohna jalla alung ahin gella phatmasa a banga Saikul gamkaija tehse hohi Saikul mun’a ahoppeh diuvin ngehna sangtah kaneijui atiuve.

Saikul AC hopsunga tua kihom IGNOAPS chanvou chanding hohi ahunglhung Lhatun nisim 10 apat nisim 13 sunga Bal Bhavan Complex, Khuman Lampak, Imphal mun’a asan diu sum hoppeh dia SWO Saitu Gamphazol in anagon ahitai.

Alangkhatna, CSOs Saikul Gamkai hon jong hiche tehse ho sum san ding Saikul mun’a akihop peh theina dia Department in CSO ho kithpina angaichat jongle kapan nathei chan’un kithopi nau vinge tinjong aseijun ahi.

India lailung nisa salheh jongle NE sung guo jujing

Imphal, Apr. 1: India state dang dang ho in nisa hasat lheh jongle Meteorological department, Guwahati report dungjui in North East India hin phat chomkhat gojuh athoh nalai ding’in aum’e akiti.

Ahunglhung ding April nisim 1-3 sung jong Arunachal Pradesh mun phabep a guo hatah a juding chule kolphe jong gingjing nalai ding ahi akiti. Chule Assam leh Meghalaya a April nisim 1-4 sung hatbeh louva guo jujing nalai ding chule kolphe jong hat behlouva gingjing ding ahi.

Alangkhat a April nisim 1-4 sung Nagaland-Manipur-Mizoram-Tripura (N.M.M.T) a gojuh hung hatcheh nalai maithei ahi akiti. Hiche keu hilouvin April nisim 3 nikho leh Assam leh Meghalaya um phabep a guo hatah a juding ahi tinjong akiseiye. Chule April nisim 3 nikho le Arunachal Pradesh mun phabep a go hatah jukit ding chule April nisim 2 le 3 nikho leh N.M.M.T a jong jujing ding ahi.

Tu kaal sung weather forcast venom hodia http/:www.imdguwahati.gov.in a vetthei ahi.

Edn. Minister Th.Radheshyam in Shishu Nistha Niketan Branch hondohna nei

Imphal, Apr. 1 (DIPR) : Education Minister Th.Radheshyam Singh in tuni chun Moirangkampu Sajeb, Imphal East a athahbeh’a kisemdoh Shishu Nistha Niketan hondohna aneiyin ahi. Th.Radheshyam in kinguon a ahoulimna’a chun tulaitah’a gamsung in angaichatpen hi society pha ahi’n, society  pha hi mihem aphat teng le semdoh hithei ding ahi ati.

Aphat toh kitoh’a chapang ho themjilnalam’a mapui ding hi thil poimo tah ahi’n, simlai ho themjilna phapen le hoipen akipeh tengle society jong achamlouva khantou jeng ding ahi tin Radheshyam in aseiye.

Chapang ho themjilna pe akiti tengle  Mark tamtah tah amuna ding’u le English naldeh’a athona ding’uva kichuhna pehding tina ahipoi. Themjilna kiti hi chapang ho’n ahung khanlet teng’u le akho aveng chuleh agamsung a ding’a sinthei umtah mikhat ahung hi ding’u kiseina joh ahi.  Itihna lam lam’a ponpan ding hi thil poimo tahkhat ahi’n, chapang kho khoukhah ding jong hi natoh giltah le lutah khat ahi. Private le government school kah’a kibahlouna lentah aum jong hi suhbei ngai ahin tin Radheshyam in aseiye.

Aman aseibena’a chun chapang ho themjilna lam’a khoukhah  na ding’a hi lam jouse (Subject jouse) a kichuhna peh ngai ahi. Nule pa te’n a In cheh’uva achate’u phatah’a akihil ding’u jilkung hon themjilnamun’a ahilkit ding’u ahi. Simlai ho hin jalhang hinkho ahin man teng’u le ase apha ahetkhen theina ding’uva kichuhna lutah peh ngai ahi. Simlai hon themjilna bulhing set amuna ding’uva  jilkung hon akihoulimpi jing’u ngai ahi tin jong aseiye.

School Management Committee le akimvel’a cheng mihon school khantouna ding’a pan alahkhom ding’uvin Special Guest a pang Parliamentary Secretary (Home) L.Susindro Meitei (Yaima) in temna aneiyin ahi. Khurai A/C sung hi Below poverty Line a um Insung tampi um ahijeh’a Management Committee in BPL insung’a hung kon simlaiho sponsor abolding in Yaima in temna aneiyin hitolhon chun chapang khat chopna ding in Dk.10,000 jong ape in ahi.  Hiche chungchon’a MLA Local Area Development Fund a kon Dk.20,000 School authority ho  ape in ahi.

Tuni kinguon a chun Principal Secretary (Finance/Power/Higher Education) Vineet Joshi, IAS; P.K.Singh, IAS, Commissioner (Health/Information Technology)  chuleh Shishu Nistha Niketan, Chairman Suranjan Singh Lairenjam in jong pan ala’uvin ahi.

Tuni’a kihongdoh branch  a hin simlai hon Pre-nursery a pat Pol-7 gei asimthei ding’u ahi’n, aphatche dungjuiya upgrade kibol jing ding ahi. Shishu Nistha Niketan hi kum 17 masang’a chu Pre-school bang’a ana kibolpan ahi. Akipat til laiya chu  Kwakeithel Mayai Koibi a In dan (room) ni bouva ana kipan ahi. Chuleh hiche school’a lekhasim simlai hon extra curricular activity a ahin bolhoi jing jeh’uva tuni’a hi full fledged school  dinmun ahin phah ahi.

Tuni kinguon a chun lam chom chom’a boltheina nei simlai ho le school minphat na ding thil tampi hinboldoh simlai ho kipaman ahopppeh’uvin ahi.

NH-2’a gari tol hon convoy anga loudiuva CM in temna nei

Imphal, April 1: Chief Minister N Biren Singh in National Highway 2’a lhai transporter association hon ‘convoy’ anga lou diuvin temna aneiyin, blockade aum pon chule national highway lamlen juiya IRB/MR hon keng’a patrol abol ahi, tin aseipeh in ahi.

Manipur Truck owner Welfare Association leh United Bus Owners’ Welfare Association in Chief Minister’s Office’a Parliamentary Secretary (Transport) Khasim Vashum, Chief Secretary O Nabakishore Singh, Addl Chief Secretary (Home) Suresh Babu, Commissioner (Transport) M Lashkmikumar panna’a toukhomna anei na uva CM in temna anei ahi. Toukhomna’a chun Chief Minister in association heng’a Highway protection force ding’a centre in 4th IRB sol ding’a kigotna phatsahna anei thu aseiyin, chule Nagaland gam’a Manipur registration number hi’a gari ho kisuhboi thu jong aseiyin, Nagaland leh Assam CM kakimupi ding, Guwahati khopi’a Union Home Minister panna’a CM teni toh toukhomna’a Nagaland CM toh kinoptona soi kaina kaneidiu ahi, tin aseibe in ahi.

Tu naicha lamlen tosetna thilsoh hojong aseiyun, Chief Secretary in tosetna ho ipijeh ahi kholna kipan ahi, ati. Commissioner (Transport) in lamlen tosetna atam cheh cheh toh kilhon’a ‘zebra crossing, school maiya traffic sign, lamlen kikhenna leh adang dang ho jing nikho’a kon vettup ding’in aseiyin chule Imphal khopi leh akimvel’a ‘gas horns’ ‘ban’ bol ding’in aseibe in ahi. Hiche tilouva driving licence kipeh dan jong velvetna neiding’in aseibe in ahi. Manipur Truck Owners Welfare Association hi president H Ranjit lamkaina’a toukhomna’a pang uva chule United Bus Owners Welfare Association of Manipur jong kiloikhomna president in alamkaiyu ahi.

Edn. Minister in ni 3 chelha ding National Cultural Conference hondohna nei

Imphal, April 1 (DIPR): Education Minister Th.Radheshyam Singh in tuni chun Centenary Hall, Manipur University a  nikho thum chelha ding National Cultural Conference on Tribal Literature and Performance kinguon hondohna aneiyin ahi.

Kinguon’a jin-gun a pang Th.Radheshyam Singh in ahoulimna’a  aseidan in mihil kiti hi noble profession khat ahi’n, jilkung phatah tah ho jeh’a eiho jong mipha kisoh ahi tin aseiye. Chule tuni nikho’a vetjui thei tah tah jilkung ho le scholar ho toh katou khom thei hi keiding’a hamphatna lentah ahi tin  aseiye.

Kinguon’a Kinneipa a pang Prof. Adya Prasad Pande, Vice-Chancellor, Manipur University in ahoulimna’a chun, jilkung ho hi khat beiya khat kihing theilou ahi ati. Chuleh  khat beiya khat akihin theilou jeh’a hi kingailutah le kilungkhat tah’a pan lah jing ding ngai ahi ati.

Tuni kinguon a chun Prof. Agnihotri, VC, Central University, Himachal Pradesh ; Prof. N.Rajmuhon, Dean, School of Mathematics and Physical Sciences; Prof. Donur, CoE, IGNTU , Amarkantak, Madha Pradesh le Dr. Ng. Ngalengnam, Director in-charge, IGNTU in jong pan ala’uvin ahi.

Tuni kinguon chu Department of Kannada & Culture,  Bengaluru, Karnataka; Indira Gandhi National Tribal University, Amarkantak, Madhya Pradesh; Manipur University, Manipur chuleh South Central Zone Cultural Centre, Nagpur, Maharashtra in kiguom’a aguon’u ahi.

UPF/KRA-U in lunghempi

Kaybie Chongloi,

Kanggui, Apr.1: UPF noija um KRA-U in tunin a JMG masapen St. George Thangcha Chongloi in mollemna chunga alunghempi nau le ahomtho nau aphongun ahi.

UPF/KRA-U Publicity & Information Secretary, Ch. Albert akona thuphon lunghempina thuthot kimun aseina’a, jaumtah St. George Thangcha Chongloi in hetman louva kiloikhomna le anam mite dalha’a thokitni ngah a choldo dia eina mollem san nau chunga atohkhompi chengin lunghempina chungchon a kahom thonau aphongun ahi ati.

Aman aseibena’a, St. George Thangcha Chongloi hi kiloikhomna a JMG masapen ahina chunga amopohna a pachat umtah le vetjuithei tah in na atongin, kithang-atpi umtah le sinthei umtah hitobang lamkai khat in eidalhah u hi gam le nam chule atohkhompi chengdin man na lentah ahi ati.

“Pelthei louvin tahsan kikhen ta jongleu hen nam le gam a dinga kiphaltah a nanatoh cheng ahom in kileponte”,  tia vailhahna aneiju tolhonin adalhah insungmite cheng lhamon nale agim gentheinau athoh hu nau jong aphongun ahi.

Jana sangpen pen kahin lhauve nomin choltan tin UPF/KRA-U in atohkhompiu St. George Thangcha Chongloi lhahna aneijun ahi.

Ccpur kiloikhom hon khamna thei’a kon kiven na ding tohgon nei

Ccpur. Apr.1: Tuni (Apr.1) chun Kuki Students’ Organisation(KSO) Churachanpur,Kuki Khanglai Lawmpi(KKL) GHQ, Kuki Women Organisation for Human Rights(KWOHR) leh Thadou Kuki Students Union (TKSU) GHQ in KIC office ah kihoukhom na khat ana nei uve. Hiche a chun district sung’a  chapang/simlai khamna thei a kipol ho vettup’a aum thei na diu vin kihou lhah na phabeb ana nei u ve.Che ho chu khosung veng sung’a Youth Club,Women Welfare Association leh Village Authority hon ama ma kho leh veng’a khamna thei’a kivei holeh ane ho phatah a avet sui diu vin kilol lhahna anei taove.Hiche chung chang’a civil societies hon jong mun tinna volunteer akoi diu khamna thei’a kivei ho leh ane ho akiman doh aum leh dan toh kitohlou va chon na kila diu ahi tin Kamthang Haokip,President KKL GHQ,TL. Haopu Haokip, President KSO Ccpur, Lalkhohao Chongloi, President TKSU GHQ leh Kimneihoi Lhungdim, KWOHR Gen. Secy. hon joint press release abol nao vah chun akisei’e.

ASEAN gam hotoh kijopmatna dia Assam hi kelkot hoitah hithei ahi: Pranab Mukherjee

Guwahati, Apr. 1: Assam state hi India state lah’a dia economic lampang’a ahung khantou toh kilhon’a India ASEAN gam hotoh kijot matna kelkot hoitah hung hithei ding dinmun in aumtai tin President Pranab Mukherjee in tuni (Apr. 1) chun aseiye.

Hiche thu hi ‘Namami Brahmaputra festival’ hondohna ahung neina a asei ahi. ‘Act East’ chungchang jong hatah a akiboipi laitah ahitoh kilhon’a Association of Southeast Asian Nations (ASEAN) toh kijopmatna kal kum 25 lhinna jong kilop vahding ahitai ati.

South East Asia hi India a ding’a sumkol veina leh gamsung’a dia phatchomna tampi kondohna ahi ati. Hitia aseitoh kilhon’a Assam hin khantouna tampi ahin neithei ding dinmun anei nalaiyin chule chele vale nadia lamlen seh hilouva twilam a lamlhahna ding jong ahingondoh vahding ahitan hiche hin economic lampang’a hatah a khantouna ahin neisah ding ahi tinjong President pa chun aseikit’e.

Aman aseibena a Assam a hiche waterway hin international port tichu Bangladesh a Chittagong kiti hotoh jong hung kikhutjop thei nalai ahi ati. Hiche’a kon’a Assam hin international level a sumkol veina ahin neithei ding ahitai tinjong aseikit e. Hiche jeh ho’a hi Assam hi ASEAN gam hotoh kijopmatna dia kelkol hoitah sohthei ahi ati.

Assam ah hin natural resource atam in, agam mite jong natoh apon uvin hichena ding’a hi tohgon hoitah leh thengtah a natoh angaiye ati.

Assam a dia Chief Minister masapen chule Bharat Ratna award jong anasang Gopinath Bordoloi in ahin laija anatup molso teina dia khat le khat ikihuto diu chule thakhat a pan ilahkhom diu ahi tin Pranab Mukherjee chun aseikit’e.

Assam gam ahi tu le tua thingnoi umlou tobang ahitan central government injong hiche state semphatna ding leh khantousahna dia hatah a akithopi state khat ahi ati. Hichetoh kilhon’a Assam hin socio-economic lampang’a hatah a machalna ahin neija India a dia jong kineppi umtah state khat ahung hidoh theina ding’a centre government injong topthei chan abolding ahi ati. Hijeh a hi Assam hin tua kipat international economic domain khat hitheina dia pan ahalah angaiyin chule North Eastern India leh ASEAN gam hotoh jong kihoumatna aneipan thei ahitai ahi.

Assam cultural vetsahna dia kumkhat a ‘Namami Brahmaputra’ festival ahinbol doh chungah President pa’n state government phatseina aneiyin ahi.

SC in Meghalaya le Sikkim sung a um Liquor vend ho chung’a khamgahna kikoi ho suhjaang peh

Gangtok, Apr. 1: Supreme court in tuni chun National le State Highway pang’a Ju joh ho chung’a khamgahna kikoi ho asuh jaang jep peh in ahi. Liquor licence April nisim 1 gei valid neiho’n September nisim 30,2017 gei ju ajoh thei ding’u amavang lamlen (National le State Highway)  a kon metre 220 gamla’a ajoh ding’u ahi tin Chief Justice JS Khehar lamkaina Division Bench chun aseiye.  Chuleh hiche thupeh ni liquor vend ho keu hilouva bar le pub ho’n jong ajui ding’u ahi tin SC thupeh chun aseiye.

Meghalaya le Sikkim hi mol chung a um khopi ahi lhon jeh le agamsung lhon 82% vel gamgil ahijeh’a  lamlen a kon 500/220 m gamla’a liquor vend ho koiding  kiti thupeh a kon kilha’ong lhon ahi tin Bench chun aseiye.

Meghalaya a kolphemeivah lhahsam hi Corporation kitup lou jeh ahi:CAG tohphon

Shillong, Apr. 1: Meghalaya gamsung’a hi 3000 MW hydro potential um ahi’n, ahinlah tunigei hin 10.49 % bou aki ladoh nalaiye tin thulhut kimu khat in aseiye. Hiche  hi Meghalaya Power Generation Corporation Limited in long-term plans asemlou jeh  le Meghalaya Power Policy, 2007 ajuilou jeh ahi tithei ahi. Comptroller and Auditor-General (CAG) in March nisim 31, 2016 nikho’a tohphon anei dungjuiyin  corporation hin project  survey le investigation ho hi adei phat phat le abol’a selection jong amin mai maiya abol ahi.

Meghalaya hin  3000 MW pohdoh nathei potential anei ahi. March 2016 gei chun Meghalaya hin hydroelectric power station sagi aneiyin ahi. Ahinlah tunigei hin hydro potential jakhat lah’a 10.49 bou  harness akibol nalaiyin hi jeh chun  gamsung’a cheng mipi hon kolphemeivah ninglhingtah in amuthei naipo’uve tin CAG tohphon chun aseiye.

2011-12 a pat 2015-16 sung chun Meghalaya hin kolphemeivah amandoh lah’a 38.23 % vel  hi ama le aman  harness ana kibol ahi’n, 2.78 % vel hi Central government’s power generation utility share a kon amu ahi’n  chuleh 58.99% vel hi gamdang’a kon aki choh ahi. Meghalaya Power Policy, 2007 dungjuiya  Eleventh Plan  sung’a hi project 24 commission bolding chuleh twelfth plan noiya project 14 commission bolding tohgon um ahi.

New-Delhi a Northeast numei ni drug overdose jeh a thi hidia ginmo

New Delhi, Apr. 1: North East gamkai a um Mizoram a kon numei ni Friday ni chun New – Delhi Munirka village ah athi san akimun, police ho sei dan in ama ni hi drug overdose a thi hi ding in aging mo nao thu jong aphong doh un ahi.

Additional Deputy Commissioner of Police Chinmoy Biswal in thuso miho kom ma asei nah’a chun Clara leh Rakil kum 22 cheh aloi Jenny chen na inn (rent) Munirka villag ah Thurday jan in party abol un ahi.Clara hi Delhi a asopi nu Liankhanmay toh um lhon ahin aloinu Rakil hi Lucknow a kon na Delhi vil’a  Thurday nilha lam hung lhun  ahi dan jong aphong doh in ahi.

Jenny hi Gurugram-based call centre a natong mi ahi. Biwal sei dan in; Clara leh Rakil teni hin Jenny room ma party bol a che lhon ahi tinjong aseije.Jenny hi Jingkah(Friday) lam anatoh ahung kile nung  in aloi tenin kot ahon peh lou phat a window a pat aven ahileh Clara leh Rakil chu kho helou va alup lhon chu amu doh phat in akom vel la um ho toh kitho in kot chu ahong doh un aloi teni chu Safdarjung Hospital ah apui pai taovin ahi. Doctor ho sei dan in amani hi drug leh ju overdose a thi hi ding in ginmo na anei in  police ho 9:20 am vel ah hetsah na anei in ahi.Hiche toh kimat chun Jenny um na mun chu police hon sealed abol u toh kilhon in forensic expert hon khol chil na jong anei taovin ahi.

Assam hung khantou  hin Bhutan toh phat na lam ama no ding ahi; Tshering Tobgay

Guwahati, Apr. 1: Bhutan Prime Minister Tshering Tobgay sei dan in Assam leh Indai’s northeast region hung khantou machal jing nahin akom vel la um Bhutan leh Bangladesh gam ahin  hoisah  cheh thei ding dan thu asei in ahi.Hiche thu hi  Tshering in ni 5 chelha ding  Namami Brahmaputra river golnop ma jingun ahitoh lhon na japi kikhop na’a asei ahi. Tshering in aseibe nah’a chun tu’a aki von hi Assam a pat na kitu cotton chule Bhutan numei hon asem akivon ahi dan jong aphong doh toh lhon in hiche hin Bhutan leh Assam kikah’a a kingailut na avet sah ahi tin jong asei bei.Bhutan leh Assam hi 266km kikah’a um  hijong leh  asung ‘a cheng hon kipah tah leh thanom tah’a hinkho ama khom u toh kilhon in India Govt. kom mah Guwahati ah consultant akoi  peh ding in jong ngeh na anei in ahi.

Bhutan’s Prime Minister Tshering Tobgay hi Paris a kon na Namami Brahmaputra golnop jaova hung ahi naban ah amaho gam ma kon alhom  pen na vadung 10  tobang Brahmaputra a alon lut’e dan jong  asei in ahi,aman asei be nah a chun hiche kin kichai leh Kamakhya kaga vil kit ding ahi in Assam mite dia  katao na chu ahileh hiche Namami Brahmaputra golnop hi leiset chung nga golnop thupi pen hita hen tinjong aseibe in ahi.

Nagaland Police constable khat in town sung thenna ding’a ama gari mangcha a nen ana bodoh

Kohima, Apr. 1: Gamsung thending deina jallin Nagaland a khangdong Neingupe Maru kiti mikhat thilnen chomdin ana kipeh doh in ahi. Khangdong kum 28 a upa Maru hi Nagaland police constable ahin achesa ni 6 sung akon Block Headquarter, Pfutsero munna amale ama kipedoh a nenho anaboh doh ji ahi. Pfutsero hi Phek District, State Capital Kohima akon 70 km vella um ahi. Naga tribe opposition ho akon numei ho reservation thu a boina jeh a municipal election kibol theilou ahijeh a Pfutsero town committee jong January lha a chu suhbei ja um ana hitai. Chule mi 10,371 (2011 census) chenna town sunga nenbohna gari hon na atoh nalou jong lha 2 lhing ahi tai.  Pfutsero hi sea level akon 2,133 a sangdoh Nagaland sunga town lah a asangpen ahin muntin na thilnen hochu vetset ahung um tahjeh a Maru hin thilnen hohi akhut tah a suhtheng ding ana ngaito ahi.  Chule a gari lui Maruti chu thilnen boh na dinga asemdoh a town sunga thilnen hochu achomdoh a town pamlam nenbohna a agaboh ji ahi. Thilnen hung kikhol khom hohin natna ahin pohlut ding hi kalung kham ahi tin Maru in phone a Hindustan Times  hotoh akihoulim na a anaseiye.  Nikho masapen nichun thilnen bohnan 21 vei kanalhung in, adang chu jingkah ahi lou le nilhah duty ka on kahkah le nikhat na 3/4 kalhung ji e tin Maru in aseibe in ahi. Maru hin nen bohna a gari thao chule thildang hojong ama sum ato ahin, Pathen in tohphatman apeh ding kinepna anei ahi. Hitobang natoh koiman abol nomlou Maru in abol hi pachat umtah ahi tin Kalos Society a local NGO President  Kupelhi Losou in apachatna thu aseiyin ahi.

Thusoh Lahchom

LICI

Life Insurance Corporation of India (LICI) kum 60 alhin toh kilhon in LICI Kakching Branch in Golden Jubilee amang uvin, Martin Grammar School Kakching computer set ni ape uvin ahi. Thilpeh hi gamsung mi chule khonung khankho semphat ding mopohna aneiyu vetsahna’a abol-u ahi’in, Martin Grammar School, Kakching mun’a kibol kin-gon’a Life Insurance Corporation of India (LICI) Kakching Branch Manager L Leisan in computer set teni Pukhrambam Somarendra Singh, Secretary, School Managing Committee, M Manihar Singh, Headmaster khut’a pehdohna aneiyin ahi. P Ranakumar Singh, President leh L Maheshkumar Singh, Secretary, Life Insurance Agents’ Association Kakching Branch chule simlai hojong kin-gon’a apang uvin ahi.

Skill Upgradation

Kairembikhok Students Union & Club (KSUC) in Kairembikhok kho, Thoubal district’a Nehru Yuva Kendra (NYK), Thoubal lamkaina in numei ho ding’a ‘Skill Upgradation Training Programmes (SUTP)’ abol uvin ahi. Ni-nga SUTPs hi pon sopna detergent, kong notna twi leh savon sem kihilna ahi’in, Saturday nikho’a kipan kin-gon hi Kairembikhoh Awang Leikai Bamon Mandop mun’a kibol ahi. Y Laksman Singh, DYC in training programme kibol na ajeh aseiyin chule kichuhna’a numei kum 18-30 kikah mi 30 val in pan ala uvin ahi.

Go hatah’a ju

India gamsung mun chom chom ma go ajuh lou vang in Northeast gamsung go aha juhtoh kilhon in dahkal 24 hours sung in Northeast gamsung  a deh in Manipur,Silchar(Assam) chuleh Cherrapunji(Meghalay) ah go aha juh lheh in ahi.Cherrapunji ah go 164.8mm ajuh toh kilhon in tu tu din mun chan gei in 228 mm amu ding sang’a tamjo 595.7 mm tu lha sung in amu in ahi. Hiche go hi Bangladesh leh West Bengal a kon cyclonic circulation jeh a  ahidan jong aphongdoh u kilhon chun east-west trough jong Bihar a pat Nagaland,Bangladesh chule Assam mah jong ahung chal jing in ahi.

Editorial

 

Minister Letpao Haokip’s First challenging task

                            Incessant downpour for days together in the state even before the onset of monsoon has given the fresh IFCD minister Mr Letpao Haokip a challenging task. Spring (March) is not the time of the year to experience flood situation in this part of the world. Yet the heavy torrential rain here for the past few days is nothing different from the monsoon rains and with it the floods in some parts of the valley. The worst hit in such situations always are the low lying localities having poor drainage or even no drainage system at all. To make matter worse the unrestricted and unregulated dumping of garbage has contributed to the flooding in certain. The IFCD Minister has rightly taken note of this reality and hence urged the municipal bodies to cooperate in the government’s efforts to mitigate the citizens’ plight due to the “man-made flood”. It is also a matter of shame and disappointment that people have to be reminded of the cause of water-logging whenever there is heavy rainfall. Many localities have not cared a bit to have proper drainage system and simply allow their by-lane roads turning into pools of water and canal itself whenever there is rainfall even for few hours continuously. The government should take steps to ensure that each locality maintain minimum level of drainage system. Garbage dumping and piling of waste materials in the roadside should be discontinued by all. For this the municipal council may resort to collecting more tax, if necessary, to collect and clear the garbage with increasing frequency and dump it at proper place. The IFCD Minister could be focusing the immediate relief part at the moment but to work on the long term effective method to tackle the flood menace would be his challenging task.

                    If we can experience floods at this time of the year what could happen during the height of the coming monsoon could be worrisome. The global climatic changes could be a factor for unusual heavy rainfall in spring. Yet it is up to the people and the government to be either under the mercy of change or to be prepared to cope up with the changing situations. It does not require much knowledge to understand that proper drainage system can certainly prevent minor floods in the localities. No engineering know-how too is required to understand that the drain-less blacktopped streets/roads would be washed away by the monsoon rains. Hence the IFCD Minister would need to work in complete synergy not only with the Municipal council but also with the Works department to make the roads, street roads or by-lane roads free from floods. The roads should first be leveled and made pothole-free so that water is not stored in it. Waste materials should not be thrown into the drains so that they do not obstruct water flow. It may be impossible to prevent floods altogether but it can certainly be minimized with proper drainage system.

Et taona

Vanchung sangpena um kapau pathen, mipi joh kadihlou uham lamkai joh kadihlou uham kahe thei tapouvin hijeh chun lamkai thu kanun thei photna diu leh lamkai hojong mipi jui theia ka um thei photna diuvin lungthim le tha neihinpe tauvin tin kahung tao uve, amen.