ET April 18, 2017 News (Local, Regional, National, Thusoh Lahchom, Editorial, Blankfire)

ET April 18, 2017 News (Local, Regional, National, Thusoh Lahchom, Editorial, Blankfire)

421
0
SHARE

IFCD leh Social Welfare Minister in Kpi district’a vadung pam ho vetlhahna nei

Imphal, April 17: IFCD, Youth Affairs & Sports Minister Letpao Haokip leh Social Welfare & Cooperation Minister Nemcha Kipgen in Kangpokpi district hopsung mun chom chom’a um vadung pang ho vetlhahna anei lhon in ahi.

Pritam Singh leh SE (FMC) Md. Liaquat Ali in Keithelmanbi lhanmol kom’a um Twineh vadung pam, Kanggui vadung, Kangpokpi leh KBC Centre Church, Kangpokpi kom’a um Imphal vadung twi avetoh uvin ahi. Department in vadung pang ho leh akimvel dinmun semphat nading’a pan alah ding ahi, tin IFCD Minister Letpao Haokip in aseiyin chule vadung juiya kikoi ‘retaining wall’ hi akimvel’a cheng ho ding’a kichat umtah ahi’in, Chief Minister toh kihouna kineiya gangtah’a kisa vahding ahi, ati.

BJP lamkaina sorkar in gamsung miho boina hi avettoh peh ding Social Welfare & Cooperation Minister Nemcha Kipgen leh local MLA in atahsanna thu aseiyin ahi.

Revenue Minister le IFCD Minister in Chandranadi vadung pang vetchilna neilhon

Imphal, Apr. 17 (DIPR): Revenue  Minister le Consumer Affairs and Public Distribution panmun tuh Karam Shyam le IFCD Minister  Letpao Haokip in tuni chun Langthabal Assembly constituency sung’a um Chandranadi vadung pang vetlhahna aneilhon in ahi.

Minister Karam Shyam in thuso miho toh akihoulimna’a aseidan in Chandranadi vadung pang’a soil erosion le encroachment aha um jeh hin Langthabal, Chajing, Karam, Haoreibi le Naran Konjil’a kumseh le lou lentah tah twi in achup jing’e ati. Langthabal, Singjamei, Thongju le Keirao Assembly Constituency a kon hung luongdoh twi ho hi Lilakhong’a um Nambul vadung’a luonglut ahi. Ahinlah Lilakhong’a kisem culvert achim lhah jeh hin chuhlai le Lilakhong a chengho twi in achup jing in ahi. Karam Shyam in aseibena’a chun Chandranadi vadung pang’a dan dihlouva chengho kinodoh ding chuleh lei lah jong kikham ding ahi’n, hiche toh molsuona ding’a hi local MLA in jong pan alahding ahi tin aseiye.

IFCD Minister Letpao Haokip in thuso miho heng’a aseidan in, Chandranadi vadung pang’a hin mi phabep dandihlouvin acheng’uve. Department in dandihlouva chengho nodohna ding tohguon kinei ding ahi. Ajeh chu vadung pang’a chengho pomo jeh’a mi tampi in kumseh le genthei athohjing’u ahi tin aseiye.

Letpao in aebena’a chun, Chandranadi vadung chungthu kholchil ding hin Committee khat akisemdoh in, hiche committee hi IFCD  Minister in alamkai ding Revenue Minister le Deputy Commissioner giet (8) member hiding’u ahi.

Chandranadi vadung pang vilna aneilhon masang chun IFCD Minister Letpao Haokip le  Revenue Minister Karam Shyam in Lilong Chajing Kanjeibung avil lhon in ahi. Letpao Haokip in Lilong Chajing’a  thuso miho toh akihoulimna’a chun  Lilong Chajing Kanjeibung’a mini-stadium khat kisemdoh ding ahi tin aseiye.

Imphal West District pumpia Curfew kikoi

Imphal, Apr. 17: C. Arthur Worchuiyo, District Magistrate, Imphal West in thuphon ahin nei dungjui in Imphal West District sung thu-le-la boithei ding dinmun’a aumjeh in tunikho (Apr. 17) nilhah nidan 3:00 a kipat hetsahna aumkit kahse’a ding’in Imphal West District pumpi Section 144 CrPC 1973 (Curfew) umding’in aphongdoh tai. Ahin hiche order hi government panna agency ho, law enforcement chule angaicha sevices ho’a ding’a kisukang ding ahi.

Koitobang socio-political rally/kijotna, customary, religious, entertainment ahiloule mi 5 kalval kisuhkhomna thei kin bolnom aumle akisaipi authority henga kipat phalna akilah diu ahi. Chuti louva curfew kikoi sung’a koima’n hiem le thal, mol ahiloule kisuhkhahna thei thil achoi theilou diu chule lampia mi 5 val thakhat a kijot khom theilou diu ahi tin DC Imphal West District thuso chun aseiye.

Commerce & Industries department Jt Director promotion kipeh thu’a HC thupeh state sorkar in juilou

Imphal, April 17: Manipur High Court in Commerce and Industries Department Joint Director’a promotion kipe avohhai diuva thupeh anei state sorkar in tuchan’a ajui loulai ahi.

Document kimu dungjuiya Justice Kh Nobin Singh umna Manipur High Court bench in Sh Ibotombi Sharma Joint Director, Industries Court’a kaisangna kipe hi February nisim 14 nikho’a ACR sung’a deilhen leh langneina aum’e, tia asan pehlou ahi. Khumanthem Dilip Singh in Manipur Public Service Commission, Manipur sorkar chule Sh Ibotombi Sharma douna’a Sh Ibotombi kaisangna peh nading’a Manipur Public Service Commission (MPSC) in DPC alah hi chouna (challenge) aneiya writ Petition case No 328, 2014 apehlut ahi.

Khumanthem Dilip in writ petition apehna’a DPC kibol dan ginmona thu aseiya chule kei sang’a junior (neo) jo ‘a khat Joint Director Industries (G&M) panmun kipeh thu’a High Court in thudih’a thutanna neihen, tia ngehna anei ahi. Kh Dilip ACR hi Ibomtobi Sharma senior ahi’in, Dilip Singh hi ‘very good’ grade kipe’a chule Sharma hi ‘outstanding’ grade kipe ahi. Writ petition ngailhahna aum jouva Manipur High Court in achesa December nisim 28, 2013 kum’a Joint Director Industries (G&M) promotion DPC meeting umsa asuhmang’a, chule February nisim 1, 2014 kum’a Sh Ibomtombi Sharma kaisangna kipeh lahdoh ding’a thutanna anei ahi.

J&K Police in BSF battalion khat chung’a FIR jihlut; Mikhat jeep’a akikan beh hi kivenna ding ahi, tia Army hon sei; Centre in sepai ho tosot ding

Srinagar, Apr. 17: Saturday nikho Batamaloo a Border Security Force (BSF) hon khangdong kum 22 a upa khat ana kaplih jeh uvin Jammu and Kashmir Police in BSF battalion chungah FIR khat ana jihlut uvin ahi.

Akikaplih pa chu Sajjad Hussain Sheikh ahin Baramulla district a kon ahi. Amahin Batamaloo a sa ajoh ahi. Achalpang akap peh u ahin SMHS Hospital alhut uva chun doctor hon lamkah a thi ahitai tin anaphongdoh uve.

Batamaloo police station ah Indian Penal Code section 302 noiyin FIR (FIR number 53/2017) akijihlut tai. Amaho hi 38 Battalion BSF ahiuve tin senior police officer khat in aseiyin chule hiche chungchang kholgilna jong achelhah laitah ahi ati.

Hiche thilsoh chungchang ah hin BSF injong detail report anapelut uvin hiche a chun meithal eiki lahpeh kigot jeh’a kivenna a kikap ahi tin BSF spokesman khat in aseiye.

Chule hiche thilsoh a hi mittah a muho kidong ding thudih tah a thutanna umding ahi tin police source khat chun aseiye.

Hiche kithana hi vangset umtah ahi tin Jammu and Kashmir Chief Minister Mehbooba Mufti in aseiyin chule BSF hojong mipite lah’a kon’a kikangse ding’in aseiye. Hiche nikho chu Pulwama a civilian holeh Security forces hokah’a kinahna aum nikho chu ahi. Police hon FIR ajihlut nauva chun jammu and Kashmir a um Indian Army hon human shield dan a milham khat jeep maija khao a akanbeh’u jongchu aminphah uvin ahi.

Hetthei khat chu Jammu and Kashmir gam-mi pasal khat Army jeep’a khao’a akihen na video jeh’a kinelkalna thu sangtah aum laiyin, hiche hi kivenna (self defence)’a kibol ahi, tin sepai hon aseiyun chule Centre in sepai ho atosot ding tahsan ahi.

Army 53 Rashtriya Rifles chung’a jong hiche thu’a FIR kijihlut ahi’in, Kashmir Valley’a kal masa’a by-election’a duty po’a sepai hon song’a kise na thilsoh’a kon kivenna’a mipa aneiyu ahi, tia ngohna um ahi. Union sorkar in achesa April nisim 9 nikho’a election duty’a che convoy jeep’a mikhat khao’a akihenna hi convoy buluna thilsoh aumlou nading ahi, tia sepai ho tosot ding’a kigel lhahna anei ahi.

Centre in hiche thu sangtah’a alah’a chule Union Defence Minister Arun Jaitley in hiche chungchang’a thuso aneiding ahi. April nisim 9 nikho’a Kashmir Valley’a sepai holeh sepai ho song’a sep ho kiphinna bol ho sangtah’a kinoto-u ahi. Thilsoh’a Army official ho panna’a mi300 val kitongkha’a, chule boina’a mi 8 thi ahi. Kum 26’a upa Farooq Ahmed Dar jeep’a akikan beh hi mopohna nei army officer hon lampi dang anei lou phat’a, anop ada umlouva abol ahi, tihi sorkar ngaidan ahi.

Song’a sepai ho sep’a mipi tamtah umna lamlen apel diu ahijeh’a hitobang thulhuhna anei ahi. Army hon asei dungjuiya, athu kisei jing unit hohi J&K’a tangden vengsung mi leh sepai phabep, 9-10 ITBP personnel, constable ni leh bus driver khat puidoh ding’a cheu ahi. Army hohi boina sem ding’a kigo’a kipinna bol aja’a sim in aum khum jeh’a hitobang pan alah ahi’in, hiche toh kilhon’a kiselna’a aman-u mipa hi vengsung miho khut’a apehdoh uva, athi umlou ahi. Thilsoh umchan kimuna video hi J&K chief minister anahi Omar Abdullah in asodoh ahi’in, human rights activist leh political party tamtah in demna anei ahi.

‘Class XII Physics question paper leak’ thu’a kiman mi 6 ho bail’a kilhadoh ta

Imphal, April 17: Achesa April nisim 5 nikho’a Class XII Physics exam kibol na’a question paper ‘leak’ ahi jeh’a kiman mi 6 ho Chief Judicial Magistrate, Imphal West in Monday nikhon bail in alhadoh tauvin ahi.

Ngohna kisemkhum hohi Md. Abdur Rahaman, Nongmaithem Mohen, Gurumayum Premchand Sharma , Nameirakpam Romesh Singh, Yumkhaibam Wakup leh Sultan Ahmed ahiuvin, CJM Imphal West, Lamkhanpau Tonsing  ang’a abon uva ding-u ahi’in, police hon ni 15 amaho khut’a koi ding’a ngehna aneiyu ahi. Amaho chung’a IPC section 420/380/34 chule IT Act section 72 dan noiya hehna kisemkhum ahi’in, CJM thutan dungjuiya themmona neiya ngohna kisem khum No.1-4 in question paper hi jingkah nidan 9.10 don’a invigilator ho hop ding’a ahondoh ahi. Mi 4 ho akisah lel kah’a No.6 (Sultan Ahmed) hi room sung’a lut’a, question ho lim alahdoh’a, hiche jouva No.5 (Yumkhaibam) in simlai ho akithopina’a athot ding’a asei ahi, ati.

Lim kila hohi ‘Galaxy exam Center’ kiti Whatsapp group’a athot uva, hiche jouva kithe jal ahi. Court in ngohna kisemkhum No 1-4 hohin lhahsamna leh mitmona aneiyui, tin aseiyin, ahin, achung’a ngohna kisem hi ahipoi, ati. No.6 hin lim alahdoh’a chule athot ahi’in, No.5 in thil dihlou kibol hi anop peh ahi’in, achung lhon’a ngohna hi adih’e, tin aseiyin ahi. Thil umchan vettohna kineiya court in No.1-4 hi PR bond 70,000 chule sorkar natong khat surety hina’a bail peh ding’in phatsahna aneiyin chule No.5 leh 6 hi PR bond lakh 2 cheh leh government natong surety khat cheh umna’a bail kipe ding ahi, ati.   Ngohna kisemkhum ho jousen court phalna umlouva Manipur gam adalhah lou diuvin court in thutanna aneiyin chule thukholna neiya police ho thusei angai jing diuvin aseibe in ahi.

State labour department in lakh 30 val aman didol’a mang lou

Imphal, April 17: 2016 kum’a awareness programme ading nga dangka 30,45,000/- sanction anakibol chu tuchan in Manipur Building and other construction workers welfare board, Manipur state labour department chuleh Government of Manipur  epi jeh’a abol lou uham ti tuchen aphong doh jou pouvin ahi.

Hiche sanctioned hi awareness programme state mun chom chom’a 29 vei bol nading’a kipe ahi.29 lah’a hi Imphal East 4, Imphal West 4 chuleh district 7 ah thum cheh umding’a anakisei ahi(district thah 7 hung umdoh masang).Akisei dungjui’a chu hiche awareness programme hi April leh May lha’a ana kibol ding dol ahitai tin Imphal time chun asei in ahi.

Thoubal District MP Demand Committe in PM kom’a memorandum pelut

Imphal, April 17: Outer Manipur Parliamentary Constituency hi ST reserved seat hijongle phaicham mihon jong atet theina diuvin Thoubal District MP candidature Demand Committee in Prime Minister kom’a memorandum apelut un ahi.

Thoubal sung (voter 2,35,182) in 8 Assembly constituencies : Sugnu, Hiyanglam, Wabagai, Kakching, Heirok, Wangjing Tentha, Khangabok chuleh Jiribam Assembly Constituencies hon Lok Sabha election ading in vote akilha in ahivang in akitet theipon ahi ajeh chu hiche seat hi ST candidate’a din ki reserved ahi.

Rajya Sabha MP Haji Abdul Salam in Rajya Sabha seat ahin dalhah toh kilhon in koi candidate hijongleh hiche 8 Assembly ahipou leh hiche mun on alo thei ding ahitin Thoubal District MP Candidate Demand Committee in Manipur Press Club ah chun asei in ahi.Ahung lhung ding Rajya Sabha bye election nah hin BJP led government in hiche constituency sung’a um candidate khat alhen ding in ngeh najong anei un ahi.

Gamsung chondan dopsang nading’a mipin panlah ngai ahi: Jayentakumar

Imphal, April 17: Art & Culture Minister L. Jayentakumar Singh in gamsung’a ‘art and culture’ dinmun agelkhoh dan thu aseiyin ahi.

Manipur Dramatic Union in MDU Hall, Yaiskul Police Line, Imphal khopi’a 5th All Manipur Folk Drama Festival-2017 kin-gon aman na’a Chief Guest’a pang Minister Jayentakumar in gamsung heritage dopsang ding adei dan thu aseiyin, hiche hi ihina uleh idinmun-u kivetna ahi, ati. State sorkar in ‘culture’ machal nading’a pan alah ho thu aseiyin, chule japi in atosot ding’in temna aneiye.

Jayentakumr in Souvenir hondohna jong aneiyin ahi. President MDU A. Ksheergopal Singh, Sangeet Natak Academi Awardee,  E. Joychandra Singh chule Director Manipuri Ensemble Kshetri Jugindro Singh jong jin-gun’a apang uvin ahi. Director, DIPR, Manipur Meghachandra Kongbam leh theatre’a pang hetthei ‘a um tamtah injong pan ala uvin, kin-gon hi Culture Ministry, India government in sum’a tosotna apeh ahi.

IGAR (SOUTH) in ‘media interaction program’ bol

Imphal, Apr. 17: Head Quarter (HQ) IGAR (South), Mantripukhri, Imphal West District’a KG Suresh, Director General, Indian Institute of Mass Communication (IIMC) leh Mayank Agarwal, Additional Director General, Indian Information Service (IIS) in thuso miho akimupi in ahi.

KG Suresh in ‘interaction programme’ kibol hi ‘mass communication’ thu lhangsap nading ahi’in, IIMC in akisemdoh 1965 kum’a kon mass communication’a pan lentah alah ahi’in chule information technology firm leh institute hohi tuni chan’a IIMC toh tekahna umjing ahi, tin aseiye. Achesa 1969 kum’a kon gam 126 ‘a kon gamdang mi (foreign) journalist 1500 val hi media person ding’a kichuhna kipe ahi’in, ama ama gam’a amaho hin panmun hoitah tah atuh uva chule India unofficial ambassador’a pang ahiuve, tin Suresh in aseibe in ahi.

Journalism chungchang’a India gam’a ama ama gam pao tho mi hi journalism leh mass communication’a ngaichat ahi’e, tihi study kibolna’a hetdoh ahi. IIMC in Delhi main campus leh English journalism bou khohsah’a campus tilouva mun dang dang’a ahung lhung ding session’a ‘regional language course’ apeh ding ahi, ati. Chule communicative radio station (CRS) athupi dan thu jong aseiyin ahi.

Achesa 2003 leh 2004 kum’a CSR akisemdoh’a kon radio station 206 bou gamsung’a um nalai ahi’in, CRS hi NGO leh education institute lhomcha inbou atun doh ahi. Information and Broadcasting Ministry in CSR ho lam chom chom’a kichuhna apeh’a, pan chom chom alah ahi, ati. India gamsung’a post graduate diploma course pe’a IMC center 19 aumin, journalism course chom chom 4 panna ahi’in chule apangnom ho Delhi’a interview leh group discussion’a pang uva, hiche’a kon kilheng ahi. IMC in gamsung’a campus 6 aneiyin, North Eastern Campus, Aizawl, Mizoram gam’a khat um’a kisa chai loulai ahi.

Two-day Buyer Seller Meet cum workshop kipanta

Imphal, Apr. 17 (DIPR): Tuni chun City Convention Centre, Palace Compound a nikho ni chelha ding ‘Buyer and Seller Meet cum Workshop for Agriculture and Horticulture Products with Special  Focus on Organic Products in Manipur’ ana kipan in ahi. Kinguon hi Manipur Organic Mission Agency (MOMA) le Department of Horticulture and Soil Conservation, Government of Manipur in aguon lhon ahi.  Chuleh kinguon  lolhingtah’a achelhah theina ding a Agricultural and Processed Food Product Export Development Authority le Ministry of Agriculture and Farmers’ Welfare, Government of India in sum le pai apohdoh lhon ahi.MOMA hin 2015-16 a pat a chu Manipur gamsung’a Mission Organic Value Chain Development for North Region (MOCDNER) ti’a kiminvo scheme khat Ministry of Agriculture and Farmers’ Welfare vetkolna noiya ahin chepipan ahi. Hiche scheme noiya hi har (chemical fertilizer) panlouva Tamenglong komla, Kachai Lemon, Lengthei, Malchaphoh, thing, ai’eng chuleh changman chuleh export oriented crop dang dang ho hectare 5,000 vel’a ana kitu ahi.

Th.Shyamkumar, Minister of Horticulture and Soil Conservation, Forest and Environment le MAHUD in kinguon’a chun Jin-gun touna analuo in ahi. Aman ahoulimna’a aseidan in Government of India hin organic farming lolhingtah’a chepi ahitheina ding in pan lentah akila jing in chuleh tuni’a official le dignitary len tah tah hon pan ahunglah’u hin GoI lunglutdan aphondoh ahi ati. Aman aseidan in Manipur gamsung mipi atamjo hi agriculture le horticulture bol’a kivah ahi’n, ahinlah agam’u aneojeh le loulhodan ahoilou jeh in sum lepai hihen lousoh hijongle ninglhingtah in amutheijipo’uvin ahi.  Loubol atamjo hi’n har (fertilizer) amanlou’u ahijeh’a Organic Farming hi Manipur sung’a phatah’a chepi thei dinmun’a um ahi ati. Aman aseibena’a chun Buyer and Seller Meet kibol hin gamsung’a loubol ho le lougasoh’a kivei ho kah’a mun lentah ana ong chung’a lei (bridge) ahin duo ding ahi ati.

Kinneipa a pang Chief  Secretary O.Nabakishore Singh in ahoulimna’a chun Changman hi leiset chung gamchom chom’a jong amantam’a chuleh midang hon aha ngaichatpen’u khat ahi’n, loubol hon jong angaicha ho jouse peh sohtheina ding’a ana boldiuvin temna aneiyin ahi.

Tuni kinguon kibol luona jeh pipen chu ahileh neh le chah podoh ho, processor ho chuleh stakeholder  ho kah’a kiboina umho suhlhap ding tihi ahi. Chuleh entrepreneur ho jong processing le packaging unit lang’a thanopna ahin neitheina ding’uva jong kibolahi.

Tuni kinguon a chun Dr. M. Premjit Singh, Vice Chancellor, Central Agricultural University, Imphal; Smt. I. Rani Kumudini, IAS, Joint Secretary, INM Division, Ministry of Agriculture and Farmers’ Welfare, Government of India; Dr. N. Prakash, Joint Director, ICAR, Manipur Centre le AK Yadav, Advisor, National Accreditation Board, APEDA  Jin-ja’um in apang uvin ahi.

Kashmir phaicham sung a 3G le 4G kikhah ding

Srinagar, Apr. 17: Gamsung mipi ho mitmu’a security personnel ho suhminsetna ding tohguon ho suhtang ahitheina ding in Jammu and Kashmir Police in Kashmir phaicham sung’a 3G le 4G phat chomkhat kha ding in Telecom Company ho thupeh aneiyin ahi.

Tumasangjep’a chu parliamentary by-election duty bol’a um Army, Police, CRPF le Para-military forces hon milham ho asuhgentheinaho’u le thingnoi hon local politician ho gihna aneina’u video ho internet le social media dung’a hung kitahlang jing ahi. Official hon aseidan un hitobang video ho hi security personnel ho suhminsetna ding’a kitahlang ahi. Chuleh April nisim 9 nikho jong chun Srinagar Parliamentary bypoll achelhah pet’a  Army jeep maiya mikhat kikan na video khat ahung kitahlang in ahi.  Pulwama gamkai sung’a um sumkolveiho le political leader ho thingnoi hon lhangphongtah’a agihnau’u video phabep jong ahung kitahlang in ahi. Thilsoh ho toh kisai hin police in case khat asunlut in hitobang video hin tahlang ho matdohna ding in pan hatah in alajing in ahi.

Assam, Meghalaya leh Arunachal Pradesh a guojuh tang loulai ding

Guwahati, Apr. 17: North East tailouvin India sunglang state ho’in nisa hatah in asajing in nitin in temperature jong akaljing’e akiti. Adeh in West leh Central India lang ahasat e tin akiseiye.

Ahin Assam, Meghalaya leh Arunachal Pradesh state honvang March a kipat in April tunilhah chan in hat behlou guojuh amujing uvin ahi. Chule April nisim 19 a kipat North East state atamjo’a guojuh leh kolphe hatbehlou gingjing ding ahi. April nisim 21-23 a kipat Nagaland, Manipur, Mizoram leh Tripura gamho’a hatah a guo juding chule April nisim 26 chan jujom ding’in ginmona sangtah aumin ahi.

Skymet Weather report dungjui chun hatah a guojuh ding hi Bay of Bengal a huinun in ahinpoh lutding ahi akiti. West Bengal leh akimvel ho’a huipi kipei (Cyclonic Circulation) umding jong ginmo ahi tin report chun aseibei. Ahin NorthEast state lailung’a mei hatah a kaiding Bangladesh border langjong ahintoh khah ding’in aume akiti.

Tulai tah hinvang guojuh ahat ahatlou akitho jing’in Assam, Meghalaya leh Arunachal Pradesh state ho in akimu jing’in ahi.

Train in auto-rickshaw khat phut, ucha 2 thi

Agartala, Apr. 17: Ucha pasal 2 Tripura gam railway tract a anu auto-rickshaw sung’a ohden huhdoh ding angaito lhonna in hatah in akisukha lhon in chomkhat jouvin athi lhontai tin tuni (Apr. 17) chun police ho’a kon’a thulhut khat in aseiye.

Athi teni chu Sudip Sarkar (32) leh anaopa Samir Sarkar (27) ahi lhon’in anu chu Asharani Sarkar (65) ahi akiti. Railway track a anu touna auto-rickshaw kitangden chu luidoh ding agot lhonna a train hattah a hunglhai chun ata khah ahi tin police official thusoh chun seiyuve. Kintah a government in chalai abol Gobind Ballabh Pant Medical College and Hospital a alhut vang’u chun ucha teni anathi lhontan chule anu jong hatah in akitongkha in ahi.

Amani ucha hin anu damlou vetsah ding’a auto-rickshaw a hospital jon’a hunglhon ahin railway track a auto-rickshaw hung ohden kha ahi. Chuphat a kintah a auto-rickshaw sotdoh ding agot lhonna a train hattah a hunglhai chun aphutkhah ahi tin mit’a muhon aseiyuve tin police hon aseiyuve. Mekhlipara railway line a level-crossing aumlou jeh hin mi tampin toset atoh tauve tin police hon aseiyuve.

Assam’s NRL in Paradip Port Trust leh IOCL toh MoU signs nei tao

Guwahati, Apr. 17: Assam’a um Numaligarh in Paradip Port,Odisha crude oil akipoh lut ding’u toh kilhon in NRL’s phatsah nanoi in refinery suhlet na project anabol in ahi. Hiche chu 28 Inch diameter 1400 km asao Crude Oil Pipeline 1 MMTPA kikoi be ding ahi ati.

NRL’s ho sei dungjui in; MoU dungjui’a kinop tona chu IOCL’s spare capacity of existing SPMs (Single Point Mooring) chuleh Paradip Port Trust injong Crude storage tanks,pump house leh Paradip Township ading nga mun/gam asuh leh be ding.

Hiche MoU kinop nahi Chairman Paradip Port Trust, Rinkesh Roy, Director (Technical) NRL.,B.J Phukan leh ED (Pipelines) ahiuve.

IOCL a kon in A.K Tiwari in Union Minister for Road Transport, Highways and Shipping ,Nitin Gadkari; Minister of State for Petroleum and Natural Gas, Dharmendra Pradhan; Assam’s Finance minister, Himanta Biswa Sarma; Assam’s Industry Minister, Chandra Mohan Patowary chuleh NRL MD P.Padmanabhan ho masang ah soikai najong anei in ahi.

Abuja,Nigerian mi khat Delhi a kiman

Shillong, Apr. 17: Thulhut kimu dungjui in Saturday nichun South Delhi ah Abuja,Nigerian mi khat electroni gadgets guh jeh in police hon anaman taovin ahi.Ama min hi Mohammad Ali Awal (27) ahin chuleh amahin Mahatma Gandhi University,Meghalaya’a BBA simlai ahi  police hon Safdarjang Enclave leh Mehrauli vel lah’a thilguh jeh’a anamat’u ahi.

Laptop thum leh electronic gadgets jong akimu doh in ahi tin Chinmoy Biswal additional DCP (South) chun aseiye.Hauz Khas kho’a kon in jong April 9 chun high-end workstation,laptop chuleh hard disk ho aman thu jong report ahung kibol’e tin officer hon aseiuve.Hiche thu toh kisei in CCTV toh kitho in kholchil na anei nung uvin Awal ahi ahetdoh phat uva amat u ahidan jong aseibei.

Thingphung kitu hibou climate change douna ding lampi ahi: Mohendra

lmphal,  Apr. 17: Vanmahotsabha toh kisaiyin Saheed Madhumangal Foundation (SMF), Tera Bazar in Sunday nikhon Gwarok Mahadeva Temple, Yairipok mun’a Chief Conservator, State Forest Department, Th Mohendra Pratap Singh umna in thingphung aphut uvin, ‘cleanliness drive’ abol uvin ahi.

S Premananda, Executive member, foundation lamkaina in SMF volunteer 30 vel in thingnou 100 val jingkah’a konin atu uvin ahi. Chief Conservator Mohendra in thuso miho akimupi na’a chun, “Thingnoi kiphut/kitu hi insurance kisem tobang ahi. Climate change douna ding leh mihem manthah na’a kon huhdoh nading’a thingphung kiphut hi bou alampi ahi”, ati. “Thingphung hohin mihem jat-leh-nam akhen pon, leiset ahuhdoh ahi”, tin aseiyin chule thingnou tu ding hi Constitution ‘a kisei imopohna nau ahi, ati.

Thoubal’a ni 2 umding ‘Food Mela’ kipan ta

Thoubal,Apr. 17: RUSA Manipur sponsor na noiyin RUSA-Thoubal College in ‘Learn & Earn’ ti thupi in College Campus, Thoubal’a ni-2 Food Mela abol uvin, simlai hon traditional dish (neh) chom chom vetsahna anei uvin ahi.

Dr Rk Yaiskul Singh, Additional Director University & Higher Education, Manipur government, Okram Chaoba Devi, Principal, Thoubal College leh Ng Maimu Singh, President, Association of Food Scientist leh Technologists, Manipur Chapter kin-gon’a chief guest, president leh guest of honour’a apang uvin ahi. Okram Chaoba Devi in simlai hon gamsung’a kisem neh chom chom ho dopsang nading’a pan alah dan pachatna thu aseiyin ahi.

Kin-gon’a cultural programme, interactive session, Meet the Artist of Manipur leh Entrepreneur hotoh kimuto na phat jong akoi uvin ahi. Mela ‘a dukan 34 akihong in, Singju thongba, Singju chule Kanghou dukan ni jong akihong in ahi. Simlai leh japi tamtah in neh chom chom kisem ho ne ding’in mela kibolna mun avil uvin ahi.

Dy. CM in National Mathematics Day hondohna nei

Imphal, Apr. 17 (DIPR): Gamsung’a quality education pohlutna ding’a hin  lekha kihildan le themjilna lam’a hi systematic approach aum angai’e tin Deputy Chief Minister Y.Joykumar Singh in  tuni Indoor Stadium, Oriental College, Takyelpat a nikho li chelha ding National Mathematics Day kinguon hondohna’a chun aseiye. Aman aseidan in themjilna dihtah aumtheina ding’a hi Learning, Understanding chuleh Application apoimo’e.  Hiche thum ho hi themjilna homsung’a ahung kipohlut thei tengle khangdong ho/themjilho machal ding’u leiset chung’a mihetthei hung hidiu ahi tin Joykumar in aseiye. Joykumar in ahoulimna’a chun National Mathematics Day kinguon kibollou apoimo dan ho le hitobang kinguon kibol ho’n khangdong ho lungsung’a thanopna lentah akhumlut peh ding ahidan aphongdoh in ahi. Chuleh kinguon kinitna ding’a hi Sorkar in jochan’a kithopina kipeding ahi tin jong aseiye.

Parliamentary Secretary (Science & Technology) Th.Satyabarta Singh in ahoulimna’a chun khangdong ho’n Mathematics lam’a lunglutna aneilou’u apoimo dan aphongdoh in ahi. Aman aseidan in Mathematics hi subject khat mai mai ahipo’n, mihem khat in ahinkho sung’a aniseh’a amanchah ding thilkhat ahi ati.

Deputy CM le diginitary ho chun Mathematics Models kitahdoh ho vetlhahna jong anei’uvin ahi. Hetthei khat chu hiche kinguon hi MASTEC le Department of Mathematics, Oriental College (Autonomous), Imphal in aguon lhon ahi. Kinguon’a hi themjilnamun chom chom’a kon simlai 400 vel in pan alah ding’u ahi.Tuni kinguon a chun Secretary (Science & technology) H.Gyanprakash Singh; director, Manipur Science and Technology Council (MASTEC) Th.Surendranath le Dean, School of Science, Oriental College Th.Devendra in jong pan ala’uvin ahi.

Thusoh Lahchom

RIMS

Janhi (April 16) jingkah lam chun Prof. Ch. Arunkumar Singh,Medical Superintendent RIMS makai nanoi in Staffs of RIMS, Manipur Security Services leh Volunteers of CRED in social service camp RIMS complex mun’a ana nei uvin ahi. Hiche service camp hi hospital mun velho thengtah koi nading’a kibol ahi tin RIMS staffs hon media miho kom’a chun aseijuin ahi.

Khongjom lampi’a thilong kimu

Janhi (April 16) jingkah chun Khongjom lampi ning’a mi thilong anakimu doh in ahi.Jingkah walking chehon pung 4:30 vel chun ana mudoh un ahi.Identity card dungjui in amapa hi Saikhom Hemchandra,Khongjom Mamang Leikai mi ahi.Epi jeh’a thi ahi hiche kisut chan hin hetdoh ahi naipoi.

Guwahati

Thulhut kimu dungjin Hatigarh Chariali mun’a  Sunday ni janchun kum 80 aupa khat  inn nah michom hon anei agou achom peh’e akiti.Ama nu min hi Ranjana Sharma ahi. Aman asei na’h chun kachapa in Tinsukia’a “Bihu” golnop mang ding’a ache doh jou in michom ho hi Rodali Apartment nah jan 10 vel in ahung lut uvin eisuh genthei naban in kanei kagou ho eichom peh’e tin aseiye.Hiche thu toh kisai in police hon jong kholchil na apan taovin ahi.

MUTSU

Manipur University Tribal Students’ Union (MUTSU) in tuni chun ahunglhung ding 2017-2018 academic session a mopo ding lamkai lhenna University Campus sung’a ana nei uvin, hiche a chun anoiya ho cheng hi lamkai thah ding’a lhendoh anahiuve; President- Duigaipou, Vice-President T. Thangboi, General Secretary T. Kailen Haokip, Joint Secretary- Mayasang Rungsung, Finance Secreatry ding in Hriiziine Kh., Education Secretary- Damrobin Gangte, Social and Culture Secretary- Dm Iris Tenai, Games & Sports Secretary- Lamsei Lhoujem, Information & Publication Secy. Daikho Rakuiyo le Treaurer – Neihlianching ahi. Akilhengdoh cheng in tuni mama chun Oath-Taking na jong ana nein gal uvin ahi.

HSU GHQ in kipathu sei

Angam Leivon Hangmi kilhadohna ding’a panla jouse chung’a Hangmi Students’ Union GHQ in kipathu lentah akiseiye tin kiloikhom’a kon kimu thulhut in aseiye. Hetthei khat chu Angam Leivon Hangmi hi achesa April nisim 13 jaan a chu achen namun Kangpokpi a kon melhetlou phabep in ana kaimang’u ahi. Ahinlah CSO ho, thuso miho le mimal phabep pan halahna jal’a April nisim 16 nilhahlam nidan 8 vel’a chu akaimang hon ahin lhadoh’u ahi.

Editorial

Good Friday leh Bong politics

                            Tuchung Good Friday ni tah-a Centre govt nin ‘digital day’ nitdi ahinti chun North East a Christian State ho ana aojah jeng’un ahileh govt injong koima anitlou umthei loudi atidehpoi. BJP govt akitileh anti-Christian moh hi jeng dan’a gel atam jong hi gam sung’a BJP lamkai hon Centre BJP lamkai ho kom’a seithei thei asei uva phadi ahi. Good Friday nikho khel khel a Centre kin khat mandi/nitdi kiti hi govt in lungthim phalou aken hideh hih jongleh alhangpi’a Christian hon ‘kibolgimna’ a agel u ahi. NDA govt nin Centre anapoh masatlai (1999-2004) jong chun kum khat chu Good Friday ni tah in Union Cabinet Minister khat nin ama department a officer le Staff jouse office kai chiehdi tin thupeh (order) anaso’n, kinielna sangtah ana umdoh phat chun Minister injong department natoh khat chaidoh vahna di ahi tin hilchetna anape-e. Tuchung Good Friday nia ‘Digital Day’ mandia thupeh chu North East a Christian tamna State – Mizoram, Nagaland leh Meghalaya hon anoplounau anaseiyun ahileh Centre injong “tei-tei” atidehpoi. Abollou umtheiloudi ti anahile vang Christian ho kibolgimna leh ahou u japeh louna ahi ti thei ahi. Hitobang hung umji hi BJP tosot RSS leh Hindu kiloikhomna jatjat ho lungthim dihlou lut maithei, lutlou maithei ahi. Govt nin hilchetna apeh chu ahileh Dr. Ambedkar pen ni to akitokhah jeh-a hiche kin boldi ti ahi. Manipur ah tuchung Good Friday ni chu Meilhei Cheiraoba (kum thah) nikho to akitohkha kit nin ahileh govt holiday ahiban’a Digital Day kiman le kimanlou thu koiman aboipi tapon, Christian ho tupna ahi tia seiho chun Meilhei ho (Hindu) ho tupna ahi atithei dehlou ahi.

                            Tukahlah a BJP hatna State hoa State govt ho umchan hi Non-Hindu ho dia BJP hi anti-Muslim, Anti-Christian party ahi tinathei tamkit ahi. Bongpi (cow) thaloudi, bongsa neh khadi (ban) thua jong hi mi ijat ham boilona State um ahitai. Gujarat Chief Minister (CM) in bong that that ahinkho’a Jail a kikoidi ahi atin, Chattisgarh CM in bong that ho khailih di ahi ati-e. UP leh Maharastra a jong bong tha’a, asa joh leh neh kikhaam ahi. Bongpi hi Hindu te dia gancha theng ahi. India Constitution a ‘Directive Principles of State Policy’ (DPSP) in bongpi thaloudi ati hi bongnoi konna gancha leh loubolna’a kimang bong penna bongpi huhbitdi (thaloudi) ti ahi. Hiche hi Hindu ‘Fanatic’ (mi ngol) hon Hindu hou le tahsan toh aha mehbeh got uva bongpi huhbitdi atiu ahi. 1999 kum’a Orissa a Australia akon Missionary Graham Steins leh achapa teni (chapang) meiya anahallih a pang mipi lamkai Dara Singh jong chun bong kitha ho apohnatdan aseiya mihem hina beiya Missionary pa leh acha teni athana kisihna thu aneiloudan asei ahi. DPSP hi State govt nin ajuilou jongleh “tei-tei” tina umdehlou ahi. Hijeh a North East a Christian ho tamna gam’a bong thaloudi kiti jong BJP ahia Centre govt ahia akhaam dehlou ahi. Bong thaloudi thu sei, Good Friday jalouna nei lungthim keng ho hi Hindu pathen le hou ngailu vehvuh jong hilou u, Vote munadi gel ngen bou hiu ahi.

Blankfire

Ihetchetlou thu khat tapkong kihoulimna a kisei hijongle thu khat, igeldan lekha a kijih a social media a tahlang jeng hojong pachat aum ngap jiuve.  Lekha a kijih hohi record a umjing thei ahijeh a nikho kum le lha ho jong ihet chet lou leh moh jih jihloudi ahibouve.