ET April 13, 2017 News (Local, Regional, National, Thusoh Lahchom, Editorial, Blankfire)

ET April 13, 2017 News (Local, Regional, National, Thusoh Lahchom, Editorial, Blankfire)

318
0
SHARE

NEIDP in kijotna nei; CM, Governor leh CEO heng’a memorandum pelut-u

Imphal, Apr. 12: North East Development Party (NEIDP) in Tuesday nikhon party office, Tera Lourakpam Leikai, Imphal West’a konin DC, Lamphel, Imphal West chan kijotna anei uvin, 19-Patsoi Assembly constituency’a vote kipe athah sim diuvin thumna aneiyun chule election Returning Officer chung’a action alah diuva thumna aneiyu ahi.

NEIDP office’a Narengbam Bishorjit in thuso miho akimupi na’a chun, 19-Patsoi A/C’a Returning Officer (RO) in Election Commission of India (ECI) in thaneina apeh hi vote kisim na’a dihlou tah’a aman chah ahi, tin ngohna aneiye. RO in thuneina lamdih louva aman’a chule election dan apalkeh ahi’in, achesa March nisim 12 nikho’a Election Commission of India heng’a vote thah sim ding’a ngehna kinei ahitai, ati. Ngehna akipehlut jouva NEIDP in lhakhat lhing anga ahi’in, party in dan dihtah’a ajui van’a, election vote thah sim ahina ding’a DC, Imphal West chan kijotna aneiya, thumna apehlut ahi, tin aseiye.

RO, Bench clerk (of RO) Naorem Joy Singh in postal ballor lamdih louva aman’a, NEIDP vote pe ho postal ballot paper se se ajeh chom chom aseiya ‘reject’ abol peh ahi, tia aseiyu ahi. NEIDP election agent kihen na’a chule round 4 leh 5 kiphong louva round 1, 2 leh 3 result kiphong ahi’in, electronic media’a update kipeh chan’a NEIDP (Keba) hi INC sang’a vote 36’a hat nalai ahi’in, ahin, nidan khat-leh-keh jouva round 5 leh achaina result akiphon’a, R in INC goljona certificate apeh’a chu vote 114 bou um ahi. Thil umchan hohi ginmo na sangtah um ahi, tin Bishorjit in aseibe in ahi.

NEIDP in vote kisimna’a RO in thil abol hohi ‘evidence’ alahkhom ahi’in, aganna thei pen’a thudih’a thutanna aum’a chule hitobang umchan hi khonung’a aumkit louna ding’a ngehna kinei ahi, ati. DC in nithum phat apeh ahi, tin Bishorjit in aseibe’e. Party in Chief Minister, Governor chule Chief Electoral Officer, Manipur heng’a jong ‘proposal’ apehlut ahi.

7th Pay Commission: May 1 a kon central government natong ho allowance kalding

New Delhi, Apr. 12: Committee on Allowances in 7th Pay Commission chungchang’a kholchilna aneiho tukaal sung’a  Finance Minister Arun Jaitley heng’a apehlut ding ahitai tin finance ministry official khat in thuso miho heng’a aseiyin ahi.

“Committee in phat kitep sung’a  final report apehlut’a cabinet in jong phatsahna aneiya ahileh government employee hon May nisim 1 a pat lhaluo tamjep asanpan ding’u ahitai” tin official thulhut chun  aseiye.

Government hin June nisim 29 nikho’a chu AK Mathur lamkaina 7th Pay Commission recommendation ho ana phatsah ahi.  Ahinlah government employee hon recommendation ho adeilou na’u ana phondohjeh’uva Finance Secretary Ashok Lavasa lamkaina’a achesa July nisim 2016 nikho’a chu Committee on Allowances ana kiphutdoh ahi.

Hetthei khat chu 7th Pay Commission hin allowances 51 vel suhmang ding chuleh allowances jat chom chom umho (196) lah’a 37  vel gopkhom ding ti’a recommend anabol ahi. Ahinlah government natong hon kiphinna ana neijeh’uva Committee on Allowance ana kiphutdoh’a lha li sung’a Finance Minister Arun Jaitley heng’a report apehlut diuva ngansena ana kipe ahi.  Committee in aphatcha’a report apehlut joulou ding phat’a Finance Minister in February nisim 22, 2017 ana tep peh kit ahi. Central government natongho lhaluo lah’a atamjo hi house rent allowance (HRA) ahi. Tuchung Committee on Allowance in report ahin pehlut jou teng le HRA a hi kikhelna lentah khat hung um ding in akiseiye.

“Commission in recommendation abol dungjuiya house rent allowance (HRA) hi 24%, 16% le 8% of basic pay a kemsuh ding ahi. Sixth Pay Commission dungjuiya HRA hi 30%, 20% chuleh 10% anahi’e” tin Official thulhut khat in aseiye.

JAC-AATB makaina noiya Joint Meeting um

Ccpur, Apr. 12 (ET): Tuni suunlang chun YPA-GHQ Office, Hiangtam Lamka a Joint Action Committee Against Anti-Tribal (JAC-AATB) makaina a Tribe based organisation chuom chuom hon Joint Meeting ana nei uvin ahi.

Tuni Joint Meeting na a chun Mizo People Convention (MPC), Simte Tribe Council(STC), Tedim Chin Unin (TCU) le Young Paite Association (YPA) a kon thalheng ho anajao uvin ahi. Tu-le-tu’a chelhajing Tribal movement suhhatbe cheh nading le kehlen ahitheina ding’a Nam jouse a konna thalheng tamjo cheh JAC-AATB a sollut be ding thu meeting a chun seikhomna anei uvin ahi.

JAC-AATB in State government toh kihouna anapat jouva aniveina ding’a kihouna umtheilou dan thu jong seikhomna anei uvin chule government toh kihouna jong chomkhat’a dia khongai phot ahidan jong Joint Meeting a chun ana seikhom uvin ahi.

Tu-le-tu’a movement chelhajing toh kisaiya machalbe na cheh ahinading’a Delhi khopi a Delegation solding in jong Meeting a chun kiphatsahna anei uvin chule Tribal Movement ni 600 lhinni April 22, 2017 ni jong nitding in phatsahna anei uvin ahi.

HAC Chairman ding’a T.Thangzalam Haokip lhendoh hita

Imphal, Apr. 12: BJP MLA leh Hill Area Committee member T Thangzalam Haokip HAC, Manipur Legislative Assembly Chairman ding’a lung kitoh tah’a lhendoh ahitai.

Henglep constituency, Churachandpur district’a vote 8438 ‘a Manipur Legislative Assembly election kaidoh ahi’in, akitetpi sangpen T Manga Vaiphei (INC) vote 268’a ajo ahi.

Saiton kho’a 42 AR toh boina Kuki chondan dungjuiya seilhah ahitai: KIC

B.Lalboi Gangte

CCpur. Apr. 12(ET):  Achesa March nisim 4 jan’a Saiton (Seitoul) Khunou, Churachandpur’a kinahna jeh’a boina thilsoh umho hi Kuki chondan dungjuiya April nisim 10 nikho’a Kuki civil society organisation (CSO) ho panna’a Kuki Inpi Churachanpur in aseilhah ahitai.

Kuki chondan leh kivaipohna dungjuiya Kuki haosa 2, ADC member (CCpur) leh Defence secretary, KLA/KNO hi achesa March nisim 4 jan’a 42 Assam Rifles (Friends of the Hills people) post Commander, Saiton Khunou, Captain Gaurav COP 42/AR in avoh ahi. Hetthei khat chu KLA/KNO hi tripartite SoO’a signatory ahi’in, thilsoh jeh’a Saiton kho mihon kithopina athum uva, boina dinmun sangtah aphah ahi.

Kuki Inpi Churachandpur in chamna leh lungmonna, kija to na leh thohhatna aumding adei jing ahi’in, mihem chung’a khansetna thilsoh hi gamdang mi hihen lang gamsung mi hijong leh Churachandpur district’a avel’a alhun kit louna ding’a kouna anei ahi, tin Jampao Haokip, Secretary Information & Publicity, Kuki Inpi Churachanpur (KIC) in thuso aneiyin ahi.

HSA in Pherzawl district akisuhboi lou ding’a kouna nei

B.Lalboi Gangte

CCpur. Apr. 12(ET): Pherzawl district kisemdoh hi Manipur sahlam gamkai mun gamlha tah’a cheng ho ding’a vangphatna ahi, tihi mopohna neiho jouse heng’a State Coordinating Committee, Hmar Students’ Association, Manipur in aseidoh nom ahi, tin Hmar Students Association lamkai Lal Robul Pudaite, Coordinator leh Malsawmthang Ralsun, secretary in aseiyin ahi.

District thah kisemdoh hi ginchat bang’a phatchomna ahiding kinepna ahi’in district thah in ahop thinglhang gam ho khantou nading’a HSA in state sorkar atosot ding ahi, ati. Ama chang phatchomna ding gel phabep in Pherzawl leh Churachandpur district in ahop gam leiset’a kon district thah semdoh ding lungtup anei hi vangset umtah ahi, tinjong aseiyui. State sorkar chule mopohna nei hon athah’a kisem Pherzawl district dinmun hi itobang dinmun hijong leh akhel lou diuvin HSA in ngehna aneiyin ahi.

District kisemdoh hi nam kive’a kisem ahipon, kivaipoh dan akitup theina ding ahi tihi HSA tahsan ahi. Kikhelna semding kiti hi ngaicha lou ahi’in, lungmong tah leh chamna’a chen khom ding ahi, ati. State sorkar thah anatoh leh chamna, khantouna leh machalna pohlut ding’a pan alahna’a alolhin din’in HSA in thupha athot in chule district headquarter’a umding’a kilom administrative building, quarter leh adang dang ho Pherzawl, district headqaurter’a sah ding’in aseibe uvin ahi.

Opposition hon EVM dihlouna aseijing’u toh kilhon’a ECI in hack boldia “Open Challenge” bol

Delhi, Apr. 12: Opposition Party hon Lok Sabha toukhomna a Electronic Voting Machine (EVM) dihlouna aseijing’u toh kilhon’a Election Commission in EVM hack bolna din “Open Challenge” abol tauvin ahi.

Hetthei khatchu Lok Sabha toukhomna ho’a Opposition Party hon tumasang’a chelha State Assembly election phabep a chu EVM hi kisemlam dang’a party khat hatna dia kibol ahi tia ngohna aneijing’u ahin, hitoh kilhon’a EVm tahsanlel na neihon “hack” abol thei nadiuvin ni 10 sung’a phat akipei tia EC in aphondoh ahi.

EVM hack bolnom hon May first week a konna “hack’ abolpan theidiu vin jong EC in phondohna aneiyin chule EVM thu’a tahsanlel na hi achesa 2009 kum’a jong chu anakitoh khasa ahitan, hinlah tuchan’a koiman EVM hi hack aboldoh theinailou ahidan EC thuso chun atahlang in ahi.

Congress Vice-President Rahul Gandhi le Senior Party leader Ghulam Nabi Azad le Mallikarjun Kharge, Communist Party of India-Marxist General Secretary Sitaram Yechury hon President Pranab Mukherjee anakimupiuva tumasang’a State Assembly election a EVM kiheilamdang ahidan President heng’a alungkimlounau ana phondoh uva chule EVM atahsanlel nau toh kisaiya Memorandum jong anapehlut’u ahi.

Opposition party lamkai chuom chuom hon EVM teamper kibol thu toh kisaiya Election commission a mopohna neiho ana kimupiu ahin chule hiche thu toh kisai mama a all-party meeting jong aneidiu ahidan Congress Senior leader Azad in Lok Sabha toukhomna a chun aseiyin ahi.

State Assembly phabep’a aguollel jeh uva opposition party hon government chung’a campaign phalou apat’u ahi tin Union minister M Venkaiah Naidu in opposition party hon donbutna in aseiyin ahi. Opposition party hon EVM tahsanlelna anei’u le ibol’a AAP in Delhi Assembly poll a guoljona aneiya chu thipchet hiuva ham chule JDU-Congress alliance hon Bihar a guoljona anei uva jong chu ibol’a ima aseilou’u ham tin jong Naidu in opposition ho dohna aneiyin ahi. NDA in guoljona aneiphat le EVM ngoh jingkei ding ahipoi, hiche thu toh kisaiya EC in hilchetna aneitai tin Naidu in opposition ho donbutna ana neiyin ahi.

Myanmar  a ‘Water Festival’ ve a cheho kichih thei ding’a Addl. SP Moreh in thuhil

Moreh, Apr. 12: Tulai Myanmar in ‘Water Festival’ abol laitah ahin koitobang ave a che hon kichih them ding’in M. Mubi Singh, Addl. SP Moreh in hetsahna ahin neiyin ahi. Chule Tamu town sung’a gari neo/len anakitol lut thei jongchu tuhin akhahtan tauve tinjong aseiye. Hiche hi Myanmar Army von a kivon hon Haolenphai kho’a kipat saw mill anadop dohna’u leh anung thilsoh ho jeh’a Myanmar government in India leh Myanmar jotmatna lampi akha ahi.

India kivaipohna toh Myanmar kivai pohna vettoh toh kop a ‘Water Festival’ ve a cheho jong dingchang tah a aum diuvin thuhil aneikit in ahi. Kichih them louva koitobang boina toh aumle Moreh police hihenlang Manipur police ho hijong kiboipi joulou ding ahi tinjong M. Mubi Singh in hetsahna aneikit in ahi. Masang jepchun Tamu town nilhah lang nidan 4:00 valjep a India chapang Delhi a lekhasim khat Myanmar police hon anaman uvin Myanmar jail ah phat sotpi anakoi uvin ahi. Hitobang hi Myanmar government kivaipoh dan ahi. Moreh police officer leh ADC Moreh injong hatah in temna aganei lhon in ahinlah ima aphachom pon ahi. Hijeh a chu Myanmar gamsung’a umding hijongle jingkah nidan 7:00 a kipat nilhah lang nidan 4:00 kah’a amun hin dalhah teiding ahi tinjong thuhil aneikit in ahi.

Pakistan Military Court in Indian national Kulbhushan Jadhav thichan gei gotna pehding’a thutanna neikhum ta

New Delhi, Apr. 12: Pakistani Military Court in Monday ni chun Indian National Kulbhushan Sudhir Jadhav chu thichan gei’a gotna pehding in thu tanna aneikhum tauvin ahi.

Pakistani Military Court in Kulbhushan hi Pakistan gam’a Indian government ding’a “subversive activity” ho bol’a ngohna anei’u ahin chule Pakistani authority hon Kulbhushan hi achesa 2016 March nisim 3 ni’a  Mashkal, Balochistan mun’a counter intelligence operation toh kisaiya amat’u ahidan ana tahlangsa’u ahitai.

India le Pakistan in lamchuom chuom’a kihouna aneijinglaitah’a Pakistani Military Court in Kulbhushan thina changei gotna pehding’a thutan lhahna ahin nei’u hin, gamsung’a mitamtah lungdong in ana alha’n ahi.

Kulbhushan Jadhav hi akimatjou kal kum khat hambep achenah laivang’a ama case hin khatvei le phatlam amanojin hinlah khatveile phatlam sang in setlam amanojo ji in ahi. Hiche ho kahlah’a Pakistani authority hon aseijing’u khat chu ahile; Jadhav hi Pakistan gam’a India Spy agency Research and Analysis Wing (RAW) ‘spy’ ahi tia ngohna aneijing’u ahin hinlah Pakistan ngohna hi India in jong anelkaljing ahi.

Firstreport thulhut dungjuiya; Jadhav hin Mubarak Patel minpu a Mumbai a inn 3 anei ahin, Kulbhushan Jadhav hi Delisle Road a chomkhat anacheng a chule Powai a jong inn mun anei ahidan thulhut chun atahlang in ahi. Hinlah hiche inn chu Kulbhushan Pakistan jail a aum konnin akikhah jingtan ahi.

Alangkhat’a Kulbhushan case toh kisaiya India panna chu ahile; Kulbhushan Jadhav hi Iran le India kikah’a business bolmi ahin, hitoh kilhon’a Pakistan gam jong chu aloutheilouva phahna ding kin khoh aumjeh’a hungvahlut kha hiding ahi.

Kulbhushan kimat jouva ama case thu kiseiya kipatna India in Kulbhushan Jadhav hi India mi ahin chule retired naval officer ahi tia anaseijing ahi. India mi ahitia akiphondoh jou nung jeng in jong Pakistani authority hon Kulbhushan hi spy ahi tin ngohna aneijing uvin chule asugim jing uve tia India in ngohna aneikit ahi.

 Hinlah Pakistani security force media wing Inter Services Public Relation (ISPR) in atahlang na ah; Jadhav hin Pakistan chung’a gaal bolnom ho aguh’a kithopina apehjing naban’a Pakistan dinmun suhlhasam nading le Pakistan douna a kisajing mikhat ahi tia Pakistani news Website The Nation a chun akitahlang in ahi.

Kulbhushan Case chung chang’a thil kidangtah kit khat chu ahile; Pakistani media hon ahinsuodoh’u “Jadhav Confession” video chu ahi. Hiche video a chu Kulbhushan Jadhav in Pakistan gam’a thil aguh’a abolho aphondoh naban’a India Spy agency RAW toh kijopna anei ahidan jong ana phongdoh in ahi. Hiche video a Kulbhushan in kiphonna aneiya konna thina changei gotna kipe ahidan Pakistani authority hon thutan lhahna aneijou uva chun thuso ana anei uvin ahi.

KSO Moreh in Moreh Hospital vil; thilkeu avat ho akinthei pen’a ahinkoi ding’a government heng’a ngehna nei

Moreh, Apr. 12: Tuni (Apr. 12) chun Kuki Students’ Organisation Moreh lamkai holeh member phabep in Moreh Hospital vilna aneiyuvin 2016 laiya hiche hospital lupna 100 dotheina ding’a kisulen ding ahi tia anakisei chu tuni geihin lupna 50 ding tahbah jong adinmun hin apha naipoi.

Hiche hospital operation theatre sung’a manchah hovang aumnan ahin specialist doctor aumlou jeh in town sung’a cheng mipiten phatchomna ima aneithei pouve tin avil a che simlai kiloikhom chun aseiye.

Naovop nupi hojong Imphal langpeh (110 km val) ahung sang uvin atamjo Myanmar a Tamu Hospital joh ajonji tauve. Town sung’a cheng mipite ding gelkhohna jal’a government in Moreh hospital ahiding bangtah a function aboltheina ding lampi akinthei pen’a ahin gon ding’in KSO Moreh President Thangboi Haokip in temna aneiye. Hiche hospital sung’a um blood bank, X-Ray machine, Ultrasound machine leh adang dang hojong mohseh a aumna asot tahjeh in asegam tai.

Medical Minister, Medical Director holeh milen milal hon hiche hospital ahungvil teng’ule mipiten temna leh ngehna tampi anei jiuvin chule ahungvil honjong kitepna tampi aseilha jiuvin ahin tuni geihin koima’n mipi ngaichat asubulhit poi tinjong aseiye. Hospital sung’in Dental machine aumna’n doctor aumpoi, nurse hojong alhingji pouve.

Alangkhat ah tulai Moreh Town sung’in natgol aleng’in numei chapang phabep panna’n adammo tampi Moreh hospital ah akipolut uvin ahi. Ahin vangset umtah in hospital sungah manchah ding leh donding twi alhasam lheh in ahi. Chule doctor, nurse holeh hospital staff ho umna ding quarter jong aninglhing joupon alang alang’in gentheina tampi akitoh e tinjong aseikit’e.

Quarter vel’a thopal (fencing) akituplou jeh’in doctor leh nurse ho room a kon’in thil mantamtah hojong anakigumang ji’in hijeh chun amopo authority in akinthei lam’a ahung vetsui ding’in jong temna aneikit’e. Kam a seitho hilouva anatoh a pohding hi mipite deilhen pen ahin hijeh chun government injong akinthei lam’a thilkeu vat holeh anatongho phate’a ahinsol ding’in temna aneiyin chule ijem tia temna kinei ho nahsah louva aumle kiphinna jatchom chom hung kibolding ahi tin Kuki Students’ Organisation Moreh President Thangboi Haokip in hetsahna jong anei ngal in ahi.

PM in National Sports University songphuna ahung bol ding ahi: CM

Imphal, Apr. 12 (DIPR): Parliament session kichai teng Prime Minister Narendra Modi in National Sports University sahpan na ding’a songphuna ahung neiding ahi tin CM N.Biren in tuni New Delhi’a thuso miho toh akihoulimna’a aseiye.

Biren in thuso miho heng’a chun hiche thu hi Prime Minister’s Office a kon thihkhagui’a hetsahna eihung kinei ahi tin aseiyin ahi.

Thuso miho’n Churachandpur boina chungthu toh kisaiya thudoh aneina’u adonbutna’a chun , CCpur chungthu hi seichet na ding in state sorkar in pan nasatah akila in JAC-AATB toh jong kihoulimna nivei akineitan, boina ho agangtheipen’a suhlhap hiding ahitai tin CM in aseiye.

CM in thuso miho to akihoulimna’a chun Manipur gamsung hi mini-India ahi’n, jat khat ahiloule namkhat bouva ding’a na kitong theilou ahi ati. Sorkar lui in recruitment drive lentah ana bolho kholchil ding’a jong Independent body khat kisemdoh ahitan, hiche body hin recruitment process ho kichehtah’a kholchilna aneiding  hiche dungjuiya dandihlouva analut akimandoh aum’a ahileh State government recruitment rule dungjuiya anatohna’uva kon amin’u kiladoh ding ahi tin CM in aseiye.

Thuso mihon Manipur gamsung’a bandh/blockade umlouna ding’a state sorkar in ichangei pan alahding ham tia thudoh aneiyu adonbutna’a chun, mipi in kiphinna ahin neiji’u hi ngehna aneiho’u sorkar in nahsahlouva akoiji jeh ahi’n, tuchung sorkar hin ngehna neiho dokhang chung’a lunggil tah’a kikihoulimpi ding bandh/blockade umlouna ding’a dingchang tah’a pan kilading ahi tin CM in  aseiye. Chuleh  Union Home Minister Rajnath Singh in jong Highway Protection Force semdoh ding phatsahna jong aneita’n hitolhon’a IRB battalion li kisemdoh be ding ahi tin CM in aseiyin ahi.

DIGI-DHAN MELA  kibol

Thoubal, Apr. 12 (DIPR): Tuni chun Department of Information Technogloy, GoM le Thouba District Administration tohguon noiyin Kangbaok a um Basu lentuol’a Digi-Dhan Mela ana kibol in ahi.  Digi-Dhan mela chu mipi hon cashless transaction ahetthem theina ding’uva kibol ahi.

Kinguon a chun Education Minister Th Radheshyam jin-gun in apang in, Chief Secretary O.nabakishore  Kin neipa in apang in chule Commissioner (IT) P.K.Singh le Deputy Commissioner Thoubal, Shyam Lal Poonia Jin-ja’um in apang lhon in ahi.

Jin-gun Th Radheshyam inahoulimna’a chun gamsung sumle pai dinmun semhoi ahitheina ding’a mipi hon gamsung’a kisem thil keu ho bou amanchah diuvin temna aneiyin ahi. Chuleh Cashless transaction hin black money suhbeina ding lampi ahinsem ding ahi tin jong aseiyin ahi.

Mela a chun stall 42 vel in pan ala’uvin ahi. State Bank of India le HDFC Bank in jong akilhengdoh customer phabep point of Sales (PoS) machine ape lhon in ahi. Achesa March nisim 31, 2017 nikho a Counting Hall, DC Offfice Complex, Thoubal a ana chelha Digi-Dhan poster contest, jingle le slogan sut kitetna’a pachan na neiho kipaman hop pehna jong abo’uvin ahi.

Manipuri Sahitya Parishad, Assam in CM N.Biren kimupi

Imphal, Apr. 12: Assam a pansa Manipuri Sahitya Parishad member phabep in tuni chun CM N.Biren Singh  ahung kimupi’uvin ahi. Manipuri Sahitya Parishad member ho chu kiloikhom president Dr.karam Ibungohal Singh in ahin lamkai’u ahi. Ahung kalsuong ho chu kipapi vetsahna in CM N.Biren chu kipa thilpeh phabep jong ape’uvin ahi. Ahung kalsuong ho chun CM heng’a kipathu asei’u tolhon in Manipuri pao, jem chuleh chondan leiset chung’a cheng mijouse’n ahet them theina ding’a CM in Parishad kithopina apeh jing ding akinepna’u jong  aphongdoh’uvin ahi.

Khamnathei a kivei hon School Headmaster khat vo’u

Imphal, Apr. 12: Tuni jingkahlam nidan 10 vel chun khamnathei’a kivei mi phabep in Khergao Primary School , Headmaster Muhammad Safar Ahamad chu melsetah le lungsetna beihel in anavo’uvin ahi.

Thilsoh toh kisai in Manipur Students Federation (MSF) vice president Oinam Premsagar in tuni chunKeishampat’a um MSF office a thuso miho ana kimupi in ahi.  Oinam Premsagar in aseidan in hiche thilsoh hi tun ijingkahlam nidan 10 vel’a ana soh ahi.  Thilsoh umdan chu ahileh Hero kiti mipa khat le achapa Akash hin amihem chankhompi mi somni vel apui’uva Khergao Primary School, Imphal east ana bulu’uva  headmaster pa jong lungsetna beihel’a avoh’u ahi tin Premsagar in thuso miho heng’a aseiye. Headmaster Safar Ahamad  hin Keikhu Maning Leikai a khamanthei joh ho suhbeina ding’a na atoh jeh’a kibulu ahi tin Premsagar in aseiye. MSF in kholchilna akinei dungjuiyin Keikhu maning leikai a hin Amina, Sahida, Marem chuleh Ibecha kiti mithum hin khamnathei jatchom chom Wyoming (WY), heroin no.4, Spasmo Proxyvon  kitiho hi lhangphong tah le ninglhing tah in ajoh’uve tihi akimudoh in Hero le Akash jong hi amaho toh kikhutjop ahidan’u akimudoh’e tin Premsagar in aseiye.

Thilsoh’a muona neiho tuni’a kipat nikho ni sung’a MSF head office a ahung kipehlutlo’uva ahileh MSF in boltheichan kibol ding ahi tin Premsagar in gihna anei in ahi. Chuleh State government in jong dandihlouva khamna thei  bolho chung’a dandungjuiya thu atan ding in Premsagar in ngehna aneiyin ahi.

16th Shumang Leela Day nit’u

Imphal, Apr. 12 (DIPR): Manipur State Shumaang Leela Council (MSSLC) guona noiyin tuni chun Palace Compound’a um Iboyaima Shumang Leela Shanglen’a 16th Shumang Leela Day kinguon ana chelha in ahi. Kinguon’a chun Hon’ble Education Minister  Th.Radheshyam  in Jin-gun touna aluo in ahi.

Th.Radheshyam in kinguon a ahoulimna’a chun , Shumang Leela hi Manipuri society sung’a ana um jing ahinaban’a society semtoh/semhoina ding’a ana kimangcha jing ahi ati. Tukhang hi electronic media in muntin aluo ahitah jeh’a Shumang leela hin masang’a apoimona ho le masangbang’a mipi ahuoi joulou ahitai. Society semhoi ding ahilou le semtup ding iti’a ahileh amasapen’a Shumang Leela hi avel’a suhthou kit ngai ahi tin Radheshyam in aseiye.

Tuni kinguon a chun Iboyaima Award hopdohna leh Padmashree Award hin sang Wareppa Naba vailhun na jong ana kibol in ahi. Shumang Leela khantouna ding’a natoh phatah tah hinboldoh journalist ho ding’a kisem Iboyaima Shumang Leela Fellowship kipman chu Sanaleipak Daily a natong Surjit Maibam in akisan in chuleh Iboyaima Shumang Leela Fellowship  to newly appointed Journalist, 2017-18 chu Thoudang Daily’a kon Herojit Nongmaithem in akisan in ahi.

Dr.M.Nara Singh in ahoulimna’a chun Shumang Leela hi kisuhalna le art form minthangtah khat ahikeu hilouva gamsung mipi ho kipunkhomna thei dokhang khatjong ahi tin aseiye.  Tuni kinguon a chun (L) Thokchom Iboyaima le Manipur State Shumang Leela Council (MSSLC) member hon pan ala’uvin ahi.

 Good Friday ni “Digital India Day’ a manding Meghalaya government in doudal

Shillong, Apr. 12: Narendra Modi makaina NDA government in Christian te ding’a nikho poimo Good Friday” ni “Digital India Day” a manding tohguon anei Meghalaya government in nasatah in doudalna aneiyin ahi.

Tukum “Good Friday” ni hi April nisim 14 ni hiding ahin, hiche nikho gamsung pumpi in Digital India Day a manding’a government in thuso ana nei ahin, hitoh kilhon’a Meghalaya Chief Minister Mukul Sangma in government tohguon hi nasatah in doudalna akineiyin chule Meghalaya state government in hitobang kin ho’a hi pan kilalouding ahi tin jong Meghalaya CM Mukul Sangma in anaphongdoh in ahi.

Good Friday ni hi Christian te ding’a nikho poimo khat ahitoh kilhon’a mipi lunglhailouna adeh’a Noertheast a Christian mipi lunglhailouna hi Prime Minister Narendra Modi heng’a jihtho a hetsahna kaneiding ahi tin jong Sangma in ana phongdoh in ahi.

Digital India hin Technology lam’a India nasatah’a akhantousah na dia kibol ahin, hitoh kilhon’a US a Massachusetts Institute Technology jeng’a in jong ngaikhohna nasatah ahin nei ahitan, hiche nikho ding toh kisaiya MIT simlai hon Senior Minister Ravi Shankar Prasad chu India Digital Day toh kisaiya kihoulimpi dia tepna/kouna ana nei’u ahi.

Irang area a hui le guo jeh a gentheina toh ho Ex-Member ADC Sadar Hills in kithopina pe

Imphal, Apr.12: Tunaicha a hui le guo kitho in Kangpokpi district, T. Waichong Sub-Division sung’a um Irang vel a chenna inn phabep anasuhset ho Vikas Basnet, ADC Sadar Hills in kithopina’n tinpeh (Galvanized Iron sheet) bundle 50 anahoppeh in ahi. Vikas Basnet hi ADC Sadar Hills Ex-Member chule Irang Part-II MDC jong ahi. Hiche kithopina hohi government lang’a kon hilouva ama changvel nei le gou apohdoh’a abol ahi. ADC Sadar Hills a kon’a kithopina muho chu Bajagara a inn 2, Naga namson a inn 3, Rijalthar a inn 2, Haspukhri a inn 1, Harup Naga a inn 1 chule Maohing Nepali a inn 1 ahiuve. Tinpeh keu hilouvin Vikas Basnet in IT Road jui Upper Maohing Nepali a um Buddhist Sangdungba Guma jong cement bag 50 apen ahi.

‘National Calamity’ ahung um tengle hiche area a cheng mipite hi avangse dehset jiuvin hiche hi agam umdan, chenna inn phatea kisah loujeh chule vaichat jeh ahi tin ADC Ex-Member Vikas Basnet in thuso miho hengah aseiyin chule government injong agelkhoh peh ding’in temna aneiye.

Tuchung’a kithopina hohi keiman changvel a kabolthei sun ahin chule hiche area a cheng mipite alencheh a kithopina thei ding’in local administration leh state government in khohsahna hin neihen tin mipite thakhel in Vikas in temna aneikit in ahi.

Ningkum lang January a lingpi kiho in chenna inn leh gancha kul tampi hatah a anasuhset chuleh hiche’a kon’a kiledoh theilouva aumnao chungchon a tumasang jep’a hui le guo kitho in avel hiche area a cheng mipite dia athah beh’a gentheina ahin pohlut kit dan hojong aseiyin ahi.

ADC Ex-Member pa a kon’a kithopina amunau chungah gentheina toh hon kipathu jong anaseiyuve.

Dimapur police hon ‘human trafficking racket’ man doh

Dimapur, Apr. 12: Dimapur police hon Nagaland gam’a mihem kijoh na (human trafficking racket) lentah aman doh uvin ahi.

PRO Dimapur office in Monday nikho’a thuso aneina’a chun, District Anti-Human Trafficking Unit, DAHTU in Dimapur Police lamkaina ‘a Pune khopi’a shelter home’a kikoi Nagaland gamsung mi numei nni ahuhdoh jouva kihedoh ahi, tin aseiye. Akihuhdoh numei tenin asei dungjuiya anti-traffiking unit hon mi 4 aman uvin chule akiman hohi Assam gam-mi jong pang ahi.

Miphalou hohin tohmun peh ding’a mi ajol uva alheplhah-u ahilouleh akaimang tho uva, aban ban’a midang apeh son-jiu ahi. DAHTU in hitobang vangsetna toh midang jong ahol jing nahlai ahi.

Gates Cambridge Scholar ding’a kilheng holah’a Manipuri simlai 1 pang

 Imphal, Apr. 12:  March lha kichaiya Cambridge mun’a interview akibol jouvin Gates Cambridge Scholar ding’a vannoi mun chom chom’a konin thepna sangtah neiya mi 55 lhendoh ahitai.

Scholars hohi 2017 class’a ding’a US Scholar 35 toh kipunkhom diu ahi’in, abon uva tukum October lha leh University of Cambridge’a postgraduate scholarship abol diu ahi. Akilhengdoh holah’a Yaikhomba Mutum, PhD scholar (Biological Science), MRC Mitochondrial Biology Unit, St Johns’ College jong apang in ahi.

Thusoh Lahchom

Transfer and Posting

Subhash Singh, Deputy Secretary Government of Manipur a konna thuso kimu dungjuiyin tuni chun IAS Officer 2 le MCS Officer khat ding in transfer order anasoh in ahi. Athem Muivah, Special Secy. (Pension Cell/Edn. S) chu Senapati DC hitading, M. Yaiskul Meetei, IAS, Special Secy. (Home/CAF&PD/Eco & Stats./ and Director CAF&PD) in Special Secretary (Home/Eco & Stats) panmun aluo tahding chule Ranjam Yumnam, MCS in ADC Jiribam a konna i/c Director (CAF&PD in his grade pay) le Deputy Secretary (CAF&PD) panmun atuhding ahi.

 Y. Khemchand

Ahunglhung ding April nisim 14, 2017 nikho loupi khat ahitoh kilhon in Assembly Speaker Y. Khemchan in gamsung mipi te Good Friday leh Cheiraoba kipa thuthotna aneiyin ahi.

Old Aged Pension

Okram Henry Singh, Wangkhei AC MLA in tuni (Apr. 12)ama constituency sung’a um tehse kum 60 chunglam ho Old Aged Pension sum hopdohna kingon anabol in ahi.

IRB 1 thi

Tousem Sub-division noiya um Oinamlong mun’a gari in accident atoh in, thilsoh’a Indian Reserved Battalion (7th IRB) sepai khat athi in ahi.Tuesday jan-kim don thilsoh ahi’in, Oinamlong, 7th IRB post’a kile ding’a ache nau ahi. Mini truck (407) tol’a driver pa sangtah in akitongkha in ahi. Athi IRB pa hi Subedar Paul ahi’in chule akitongkha driver pa hi Ranbir Meetei ahi.

KWS/KSO Pune

KWS/KSO Pune noiya khangdong simlai Pune a lekhasim nom hon man lhom cha a lekhasim nale lhagaova akipuihuoi thei nadiuva Som In Ministry in hostel ahong’in simlai koitobang lunglutna nei aumle anoiya kipe lamkaiho khatpen pen toh kijahmat thei ahi. Jangminlal Mate, Chaplain KWSP (8329550467), Demkhoon Haokip, Chairman (8446494377) leh Hekhup Hangsing, Secretary (9762453763)

Medical camp kivochon

Sadar Hills Autonomous District Coucil gonna noiya Island Sub-Division Kangpokpi District a Free medical Camp umding kiti chu aphat teplouvin vohchon ahitai. DK. Thangboi, Chief Executive Officer, SHADC Kangpokpi in aseina achun Laikoiching, Island Sub-Division Kangpokpi District a free medical camp umdinga kisei chu aphat kitep louva vohchon ahin chule Sadar Hills Autonomous District Council in aphat le nikho ho gontup ahiteng le Avella hetsah na hin kinei kit ding ahi ati.

Editorial

CM Biren in Ukhrul Akhoh sahna

                             Thinglhang district lah-a Ukhrul hi akhangtouloi tah ahivang’a BJP lamkaina govt hin akhohsah dehsetna hi ajeh um ahidan seilouva het thei ahijeng’e. Manipur’a kon Naga ho potdohdi ti lungthim hi hiche district akon ahijeh-a khohsahna kihapeh ahidi mijouse mudan hidi ahi. Ukhrul district bang’a Manipur govt masa deimo umlou ahi. Ukhrul district le mipi hon Manipur CM masa O Ibobi avetdadan u chu vanleng’a ache’a Ukhrul khopi sung’a aki-ngah vang’a phate jong tol chonkha manlouva analha uva khatpa jong gangtah a Imphal hung kilelo anahi-e. Ahileh tua CM thah N Biren hi vanleng’a che malah lamlen nommo tah leh saotah a Imphal apat Ukhrul khopi gei Gari (car) a che ahi. Hichenakah-a CM pa chu lampi lhung’a ‘welcome’ boldi kichutho jeng ahi. Ukhrul khopi’a jong loupitah leh ngailutna neitah-a liemna (welcome) kipe ahi. Hiche hi Ukhrul district mipi hon chi le nam’a koima thetna anei u hilouva ami joh a vetdana anei u tidi ham, political party jeh-a CM khat ‘welcome’ kibol’a khat kibollou ham, politics huinun kikhel jeh-a hitobang lungput kikhelna jeh ham sei hahsa ahi. Ipi hileh Ukhrul miten CM N Biren ‘welcome’ abol jeh un khatpa (CM) injong Ukhrul district mi te phatchomnadi ajatjat abuhlhah tho jeng kitne. Imphal-Ukhrul lamlen (Km 80 vel) gangtah-a semphatdi ti ahimasapen’e. CM pa chu vanleng’a Ukhrul anache hileh lampi noploudan aha hetloudi ahin tua chu asatah-a amu’a ahet jeh-a khohsahna jatchom beh apehpai jong hidi ahi. Ukhrul khopi sung’a lamlen ho apet petna semphatna patdi; nupi ho bazaar tounadi “Ema Market” khat dangka Crore 10 lutna’a sahdi; Ukhrul district a khantou machalna natoh jatchomchom’a dia dangka Crore 201 pehdi chuleh Ukhrul khopi sung lamlen ho janle vahsel’a koidi ti ho hi CM kitepna ahi. Golnop leh Sports lang’a jong Ukhrul district mipi te deilam tah ajatjat patdi ati-e.

                            Hiche ho ban’a CM in Tangkhul holeh Meilhei ho ucha ahidan aseijong chu ki-ngailutna’a kon politics a-jong kitona aumdohleh Manipur kelouna (gamgi bitna) dijong hinte ti hi CM Biren geldan hidi ahi. Ahin Tangkhul Inpi in ‘Naga te chenna ho kigopkhomdi’ (Naga integration) thu CM in atosot dia asei chu koi ki-ngailut malah CM pa ahachang thah jodi ahi. CM in Ukhrul avil masatpen ahin itihleh aban huoilai district chedi ahintidem ti ahitai. Chuleh district dang avilna’a agam mi dei khantou machalnadi ipipi ahinphongdoh diham tijong mipi hon ahinvetdi ahinalaiye. Thinglhang le phaicham’a khantou machalna kibang pohdohdi ti hi CM Biren hasei khat ahijeh in thinglhang district holah-a jong khentum le deibol tum ahung umkhah leh N Biren govt bolkhiel hung hidi ahi.

Blankfire

Mi bangkhat ho hi amin u ahoija hoi, akam jong damheu, ahekhalou hon gel leh ahoija hoi aphatna pha a agel jengdi ahin atah tah a ahinmu phatleh geltobang hijilou tamdi ahi. Kamdam hiuheuva asunglanga thilha lungthim keng ho hi thil suboi ahijiuve.