ET April 12, 2017 News (Local, Regional,International, Thusoh Lahchom, Editorial, Blankfire)

ET April 12, 2017 News (Local, Regional,International, Thusoh Lahchom, Editorial, Blankfire)

519
0
SHARE

Ukhrul mipi hon loupitah a CM liemna nei’u

Imphal, Apr. 11 (DIPR): Chief Minister N Biren in tuni Ukhrul avilna’a chun Ukhrul mipi hon kipah le thanom in ana liem’uvin ahi. CM N Biren Ukhrul juon’a achelai chun Yaingangpokpi, Litan, Ramva (Lambui), Nungshangkhong leHamleikhong’a khomiho, Simlaiho chuleh numei kiloikhom hon ana liem’uvin ahi.Ukhrul mipi hon CM aliemna’u vetsahna in kotpi lentah khat ana sem’uvin achung’a chun mikangte pao vin”Welcome Shri Biren Singh, Hon’ble Chief Minister of Manipur” tin asun’uvin ahi.

Yaingangpokpi a CM liemna kinguon chu Wunghon Village Authority le Wonghon Shanao Long in aguon ahi.  Kiloikhom teni chun CM heng’a memoranda khat jong ana pelut lhon in ahi.  Litan khopi sung’a jong  Kuki Inpi Ukhrul le KSO Ukhrul in CM pa liemna vetsahna in kot lentah khat ana tungdoh lhon in  ahungkalsuong CM heng’a memorandum khat jong ana pelutlhon in ahi.

CM le akilhonpi hon Ukhrul aphahkoncha’u chun khosung miho le kho 14 a kon khangdong ho le simlai hon lamlen pang’a ana liem’uvin ahi. Ramva (Lambui) kho sung miho chun CM liemna in ‘Samkaphang Laa’ (liemna laa) asa’uvin ahi. Ramva Village Authority le Sapao Village Authority in jong CM heng’a memorandum  ana pelut lhon in ahi. Biren in aseidan in tuchung Ukhrul akholjin hi asopi ho kiholdoh ding’a che dan in akiseiyin ahi. CM in ahoulimna’a chun May nisim 5 nikho le kimangding Shirui Lily festival hi State Level festival a manna ding’a tohguon kineiding ahi ati. Ukhrul sung’a Ema Market semdohna ding’a Dk.10 crore kikaidoh ding chuleh jing nikho’a pat Ukhrul khopi sung lamlen thahsemna kipan ding ahi ati. Sorkar in Ukhrul sung’a hi divide and rule policy kimanglou ding chuleh gamkai miho venbitna ding le khantouna ding’a project tampi kisemdoh ding , hiche project ho’a manchah ding a Dk.201 crore sanction kibol ding ahi. Sorkar natong jouse jong jing nikho’a pat aposting mun cheh’u ajuot ding’uva thupeh kinei ding ahi. Gamsung’a keh Shiroy Lily dopsangna ding’a Shiroy Lily Cup avel’a kithahbol ding chule Ukhrul lamlen semhoina ding mopohna nei BRO in phat kitep sung’a progress report ahinpehlut lou’va ahileh midang joh kipeding ahitai tin CM in ahoulimna’a chun aseiye. Lhaseh nisim 10 nikho hi NGO ho le Kho haosa toh CM kimutuo nikho hiding ahi. Thinglhang miho adeh’a Tangkhul ho hi Upa hi’uva phaicham miho hi mi naopa ahi’uve tin jong CM in aseiyin ahi.

Ukhrul District Kuki Inpi le KSO in CM heng’a Memorandum pelut, TNL in point 3 lhing ngehna pelut

Ukhrul, Apr 11 (ET): Chief Minister Nongthombam Biren Singh in tuni’a Ukhrul district vilna aneitoh kilhon’a Ukhrul pansa CSO chuom chuom hon CM heng’a Memorandum anapelut uvin ahi.

Tuni’a CM N. Biren heng’a Memorandum anapelut kiloikhomna ho chu ahile Ukhrul District Kuki Inpi, Kuki Students’ Organisation le Tangkhul Naga Long (TNL) ho ahiuvin ahi.

Kuki Inpi le KSO Ukhrul district in CM heng’a Memorandum anapehlut nauva chun; 16-Zalenbung DCC sung’a Administrative Unit dia SDO office 1 Mongkot Chepu, Litan a honding, Mongkot Chepu PHSC a konna PHC Status a upgrade bolding, Mongkot Chepu High School a konna Higher Secondary School a upgrade bolding chule Litan Saraikhong mun’a Fire Brigade koiding ti ahi. Memorandum kipehlut toh kisaiyin KSO Ukhrul Advisor Helun in aseina ah;  “Memorandum a kipe ngehna ho chu CM Pa’n kabolpih diu nahe tin “assurance” hoitah eipeuve atin ahi.

Alangkhat’a Tangkhul Naga Long (TNL) in jong CM N. Biren heng’a point 3 lhing ngehna Memorandum anapelut uvin ahi. TNL Memorandum a chun; State government in Naga Framework aggrement ahetpih ding, achesa 2016 kum’a State government in anasemdoh district thah 7 ho roll-back bolding chule Cabinet in Naga area a National Highway Protection Force koidia thulhuhna anei’u government in avel’a athahvet ding ho anajaovin ahi.

 

Chief Minister in Tourist Resort hondohna nei

Imphal, April 11, 2017 (DIPR): Chief Minister N.Biren Singh in tuni Ukhrul avil na’a chun Nungshangkhong Hungpung a Tourist Resort khat hondohna aneiyin ahi. Tourist lodge hi Nungsangkhon lei toh kinaicha’a um ahi.

Tourist lodge hi Imphal Mahadev-Lambui-Finch Corner-Hundung-Jessami, Manipur Integrated Tourist Circuit bahkai khat ahi. Tourist lodge hi Manipur Tourism in  Ministry of Tourism, Government of India chopna noiya asemdoh ahi.  Tourist lodge hi Ukhrul khopi sung’a kon km 15 vel gamla’a um ahi.

Tourism Department hin Ukhrul sung’a tourist ho mitla thei ding tohguon tampi abol in ahi.  Shirui gamsung hi eco-tourism project khantouna thei lampi lentah um ahijeh’a Tourism department hin eco-tourism machalna ding lampi phatah’a asem ahi.

Mizoram sorkar leh HPC(D) in livei channa toukhomna neiding

Aizawl, April 11: Mizoram sorkar leh Hmar People’s Convention (Democratic) thingnoimi hon alivei channa toukhomna April nisim 21 nikho leh aneidiu ahi, tin senior state Home Department official in Tuesday nikhon thuso aneiyin ahi.

Sinlung Hill Development Council ‘autonomy’ peh nading’a kihouna amachal ding tahsan ahi’in, chule HPC(D) thingnoimi kinoptona kisem jouva gal manchah pelut ho umna ding (rehabilitation/resettlemen) chungchang’a sum-leh-pai dinmun jong asei diu tahsan ahi, tin official pa in aseibe in ahi. State sorkar hi Additional secretary, Home Department, Lalbiakzama lamkaina hiding chule HPC(D) working president, LT Hmar lamkaina delegates hotoh toukhomna anei diu ahi’in, Manipur leh Mizoram gam’a Hmar overground lamkai hon pan alahdiu ahi.

HPC(D) hi achesa 1994 kum’a HPC thingnoimi ho sorkar khut’a amaho-leh-amaho akipeh doh jouva kisemdoh ahi’in, Manipur gam toh kimat gam leiset’a kon amaho ding’a autonomous district council apeh diuva thhumna aneiyu ahi.

US toh North Korea boina hi China jaolou’a kisulham dingahi : Donald Trump

Washington, Apr. 10 : North-Korea toh US kiboi jing lai ahi tohlhon in US President Donald Trump in Tuesday nichun Twitter a asei na’a chun China President Xi Jinping in North Korea toh US kiboi nathu’a eihung kithopi uva ahileh Beijing leh Washington trade deal hi tu’a sang nga kasem hoi ding ahi ati.

North Korea hi boina hol gam ahin.China in hiche chung chang thu’a kithopi ding’a agel lhah thei’a ahileh hiche chu thil phatah hiding ahi ati.Epi ham tia China in agel lhah theilou leh keima hon hiche boina hi ama(China) jaolou va kaki suhlhap diu ahi tin twitter achun aseiye.

Assam Court’a akai lou jeh’a Kejriwal chung’a court in Warrant suo

 Guwahati, Apr. 11: Achesa 2016 kum’a Prime Minister Narendra Modi  degree chungchang’a tweet aboljeh’a defamation case nei  Delhi CM Arvind Kejriwal in jaanhi Assam court a amai alahlou jeh in court in achung’a warrant khat asuo in ahi.

Bailable warrant chu Kejriwal le Aam Aadmi Party (AAP)  in April nisim 23 Municipal Corporation, Delhi/MCD election a campaign abol toh kisai ahi.

Kejriwal  hin  civic polls chelhah laitah ahijeh’a Delhi ahindalhah theilou ahijeh’a Court heng’a phat ana thumbe ahi. Kejriwal hi January nisim 30 ni’a jong chu court kai ding’a um ahi’n, amavang hiche nikho jong chu court a amai analah po’n ahi. Hiche jeh’a hi Judge pa in tuchung ngehna aneihi asanpehlou ahi.

Criminal defamation case chu Assam BJP luboh Surya Rongphar in abol ahi.  Kejriwal hin December lha ‘a chu Prime Minister pa hin Pol-XII gei asim’a aban ana simtalou ahi’n, tu’a college degree aneijong hi semthu ahibouve ti’a tweet ana bola hi.

TSA in COHSEM thulhuh pachatna pe; Grace-Mark ngeh

Imphal, Apr. 11(ET): Tuchung Council of Higher Secondary Education Manipur (COHSEM) vaisaina noiya chelha class XII themvetna “Higher Secondary Examination (HSE)”, 2017 a Physics paper kibol chu, vangset umtah in 9:15 a.m. vel in centre munkhat akon in marks li (4) umna question chu photo aki kapdoh in WhatsApp leh Facebook mangcha in ana kithe thang in ahi.

Hitoh kilhon in Chairman, COHSEM vaisaina noiya kihoulimna (Meeting) chu achesa nisim 9th April nikho chun Council Hall, Babupara mun a Manipur pumpi a um simlai kiloikhomna jat chom chom AMSU, DESAM, ANSAM, KSO, TSA, etc. jaona in ana um in ahi. Hiche kihouna a chun simlai ho khankho ding thuseina, maban a panlah ding dan, question hin su leak ho matdoh a dan dungjuiya gotna peh loi ding dan ho ana sei khom uve. Chuleh, simlai kiloikhomna achekhom ho jouse toh pan lahkhom ding dan seikhomna chu akihoulim nao anahi.

Hiche kihouna a chun Physic paper leaked leh leaked lou thu seikhomna thupipen ananei uvin ahi. COHSEM akon in thu jouse suhchetna ahina ding a nikho 2/3 vel lut ding ahi dan kihouna a jao TSA lamkai ho akon in thulhut akimun ahi. Chuleh, simlai kiloikhomna atamjon thengthou themvet ahina ding a themvetna velbol kitna ding a ngehna leh tepna anei soh kei un, hinlah achaina thulhuh semding COHSEM ahijeh a COHSEM in aphajo lampi ahin gon ding a kihoulhahna ana kinei e tin TSA lamkaiho akon thulhut chun aseibe e.

 Hetthei khat chu COHSEM in April 10 nikho a thuso miho akimupi naova chun Physics paper nikho a question hi themvetna bolna ahijing laiya leaked doh ahi na ban a Police thulhut na akon in akiven ahileh simlai themkhat bouvin amu man ahina ban kit a ijakai jouse apha leh thengthou pen ahina ding gelna in themvetna hi velbol lou ding ahi tin ana phong doh uvin ahi.

Hitoh kilhon a tuni nikho a TSA Imphal Branch akon thulhut kimu dung juiya COHSEM in themvetna velbol lou ding a phajo a agel a adih ahi tai tia phondohna anei hi igel leh hitobang thuhlhuh hahtah dinmun lah a thulhuhna aphatcha ahinsem thei uhi pachatna kapiuve ati. Hitia thulhuhna ahin bol dung jui uva TSA in ahithei ding leh grace marks jong simlai jouse ding a ana kikapdoh marks li (4) hi pecheh ding a COHSEM henga ngehna akinei nalai in ahi, ati.

Hetthei kit khat chu tuchung hi Manipur election jeh a HSE hi lhakhat val in kumdang a sang a angongkai tan, ahunglhung ding May 31 kah a hi result phondoh ahilou leh student tamtah hinkho hi mangthai thei ahi jieh a COHSEM in jong hahsatna tamtah atoh in ahi.

2017-2019 sung’a KIC  lamkai ding lhen na um

Lien S. Gangte

Ccpur. Apr. 11: Kuki Inpi Ccpur (KIC) term thah tichu kum 2017-2019 sung’a lamkai ding lhen na 11th April, 2017 nikho chun KIC Office, Tuibong ah aum in ahi. term thah a vaipo ding lhenna ana um in ahi. Lamkai thah lhendoh a um ho, President (Haosa) ding Daniel Gangte, Vice-president, Admn. (Semang) ding Letpu Haokip, Vice-president, Home (Pachong) ding Thangboi Baite, General Secretary (Thuching) ding Lalkhohao Chongloi, Information secretary (Lhamgsam) ding Jampao Haokip.

KIC term thah kum 2017-2019 sung’a lamkai ding ho kihahsel na Lunpi S. Thangjom in aneipeh in chuleh, Rev. Nguljathang Khongsai in lamkai thah ho Pathien heng’a lhandoh na leh vangthum pehna aneiyin ahi.

PRJA in Assam a Branch hongdoh

Assam,  April 11: Rights activist Irom Sharmila in aphudoh People’s Resurgence and Justice Alliance (PRJA) in Assam a abah (wing) ahongdoh tai tin thulhut kimu khat in aseiye. Hetthei khat chu tunaicha’a chelha Manipur Assembly Poll a chu PRJA  kinepna hatah’a ana thon ahi. Party in Assam sung’a hi khangdong ho gentheina suhlhapna ding’a pan hatah’a alahding ahi tin thulhut chun aseiye.

“Sah-solam gamkai state ho’a boina umho hi kibang ahi. Boina ho suhlhapna ding’a hi kilungkhat ngai ahi. Boinaho suhlhap na ding’a hin mipi hon thanopna lentah anei’uve. Ahinlah aha thanop deh ho hi atamjo khangdong ho ahi’uve. Tuchung Manipur Assembly election chu party ding’a amasapen jong ahi”n,hiche jeh’a abol hoi joulou ahi. Kikhelna pohlutna ding’a hi mitampi hi hihjong le mi 10 bouvin kilungtoh tah’a na atohkhom’a ahileh lungtup molso jengthei ahi. Thoubal a vote 90 bou kimu hi midang in seisetna in einei’u jongle mikitah 90 vang aumnai tihi kichehtah in akimudoh theiye. Aguom in mikitah 700 vel in eitosot’u ahi.  ” tin PRJA Secretary James Mayengbam in thuso miho heng’a aseiye.

Party in Assam sung’a atup pipen chu illegal immigration, gampam miho kitollut jing chuleh local stake holder hon natural resources ho chung’a tha aneilou’u chungthu suhlhap ding tihi ahi.

Tripura a Bangladesh mi nga kiman

Tripura, Apr 11, 2017 : Mobile Task Force (MTF) personnel , Tripura Police in tuni chun Jogendranagar railway station , Agartala’a Bangladesh a kon hunglut khangdong nga amandoh in ahi. Khangdong nga ho chu valid document panlouva Uttar Pradesh juon train’a atouna’uva MTF personnel hon amat’u ahi.

Police in aseidan in khangdong nga ho hin Saturday ni jaan’a chu Sonamura border ahin palgalkai’uva jaan muthim noiya  Uttar Pradesh, Saharanpur  hunglut’u ahi ati. Akimandoh ho chu Ratupalang a kon Md Hossain (18), Gouripur a kon Shariful Islam (19), Coxbazar a kon Jahar Ahmed (21), Athajhari a kon Abdul Oadur (23)  chuleh Baidykona Coxbazar a kon Md Osman Gani (21) ahiuve.

Akimandoh ho chun Madrassa a higher education  simding’a Saharanpur ajuot kiguot’u ahidan MTF Police heng’a aphongdoh’un ahi. Achesa phat phabep sung’a hin State Police in Bangladesh a kon dan dihlouva hunglut miho amandoh jing in ahi. India le Bangladesh kikah gamgi pal kigetlou jeh in thingnoi ho adei phat phat le gamsung teni kikah’a hin avahle thei nalai’uvin ahi.

Pasal khat in apa atha jouva mihetlou kah’a vuimang

Arunachal Pradesh, April 11: Dumporijo Police Station hopsung’a um Pomte Bage kho sung’a mikhat in apa atha jouvin a’In kom’uva aluongdamsa ana vuimang in ahi.  Thupole ho’a kon thuguh ajah tolhon in Arunachal Pradesh Police, Dumporijo unit in Superintendent of Police Taru Gusar vetkolna noiyin Tajab Bage (30) chu Sunday ni jaan nidan 10:30 vel chun ana man in ahi.

Ginchat umtah thulhut khat in aseidan in Tajab Bage hin March kaal masa’a chu apa Tair Bage ana tha’a police a kon sochatna ding’a a In ninglang’u munkhat’a mihetlouva ana vuimang ahi. Hiche chungthu toh kisaiya koiman police heng’a hehna lekha jong anaselut lou ahi. Ahinlah Dumporijo unit police heng’a mi phabep in agonmo thu’u ahin phondoh dungjui’uva ASI B Tadu in kholchilna ana neinah’a thil umdan ho ahin mudoh ahi.

Thilsoh toh kisai in Dumporijo Police Station a  section 302/201 IPC noiyin suo moto case khat akisunlut in , achungthu kholchil ding in SI W Kamhua nganse na akipetai tin SP in aseiye.

Police in Tajab Bage thudoh aneina’a chun thilsoh umdanho kichehtah in ahin phongdoh in ahi. Aman aseidan in , hiche ni jaan’a chu apa toh ana kilungnopmo tuo lhon’a hatah a ana kinilsang lhon’a chomkhat jouva khut jong ana kilhatuo lhon ahi. Akinotuo lhon nah’a chu apa chu ana kisukha’a  hiche ni jaan mama’a chu damdohjou talouva ahinkho anabei ahi. Police in Tajab Bage thusei jouse chu ana sunlut in ahi. Tajab sei dungjuiya Police team khat in Tair Bage luongdamsa laidoh na ding  tohguon anei laitah ahi.

  Tripura gam’a BJP numei 1 CPI(M) toson hon mai, ajipa vo-u

Agartala, April 11: East Agartala hopsung Pratapgarh constituency noiya um Aralia ‘a BJP lamkai numei khat in ajipa avenna in CPI(M) hon dihlou tah in amai uvin ahi.

Vangsetna toh nu hin Agartala Municipal Corporation (AMC) election nukhah pen’a vote tampen amu ahi. BJP hon asei dungjuiya, AMC councillor masa leh CPI(M) lamkai Bipadbondhu Rishidas hi party natong midang 30 vel toh numeinu inmun’a Sunday jan nidan 8 don’a cheuva, ajipa avoh uva, BJP adalhah ding’a gihna aneiyu ahi. Numeinu hin husan ajah phat’a, insung’a kon chedoh’a ajipa avoh-u ahuhdoh got na’a party natong hon dihlou tah’a amaiyu ahi.

Thulhut amu jou jouvun senior BJP lamkai leh Pratapgarh Mandal committee member ho thilso namun’a che uva CPI(M) ex-councillor pa apet pet’a amat ding uva thumna aneiyu ahi. Police hon thilso namun adel lut uvin, ahin, koima amat loulaiyu ahi. “Police hon tuni kah’a themmona nei ho amat ding uva kaseiyu ahi’in, pan alah louleh East Agartala women police station ka nokhum diu ahi”, tin BJP state general secretary, Pratima Bhowmik in aseiyin ahi. Thilsoh’a chun CPI(M) hon BJP numei lamkai dang khat jong amaiyu ahi, ati.

Hiche nikho ma ma’a CPI(M) hon BJP worker khat in party adalhah loujeh’a avoh uva, vangsetna toh pa hi GBP hospital’a tu-leh-tu’a kijen ahi. Nikho ni masang’a BJP Mahila Morcha in Left sorkar vaihomna noiya numei chung’a khangsetna thilsoh apun be jing douna’a toumun kiphinna abol ahi. Alangkhat’a, BJP OBC Morcha in Monday nikhon OBC ho reservation alhing’a apeh nading uva gamsung pumpi’a kiphinna abol ahi.

GPRN in  NSCN lamkai Mhonsao Kikon thi lunghempi na thuso nei

Dimapur, April 11: Government of the People’s Republic of Nagalim (GPRN) in senior lamkai (L) Mhonsao Kikon, Steering Executive member thi lunghemna thuso anei uvin, Ekhyo Yan kho, Dimapur’a thi opna kin-gon abol uvin ahi.

Phat sottah damlou jeh’a thi ahi, tin thuso aneiyui. 1942 kum’a peng chule akhangdon laitah’a Naga national movement’a pan la’a NNC’a anapang Kikon hi Shillong Accord soi akikai jouva NNC (N/A) president thum channa’a pang ahi. 2002 kum’a NSCN’a lut’a panmun lentah tah atuh’a chule 2008 kum’a convener (Chief justice), National Judiciary Board (NJB)’a pang’a chule 2012-17 kum’a Steering Committee Member ‘a pang ahi.

Thi-opna kin-gon’a Qhevihe Chishi Swu, collective leadership member; Rh Raising, Kilo Kilonser and Zarshie Nyuthe, co-convener, steering committee le NSCN lamkai chom chom jong apang uvin ahi. Thi-long hi akho Baghty, Wokha district’a lhahna kinei ahi’in, ama thi hi insung mi seh hilouva nam pumpi’a ding’a mun-ong lentah ahi, tin GPRN in thuso aneiyin ahi.

NE simlai kiloikhomna 23 in Africa gam-mi kibulu thu’a Africa gam-mi ho tosotna nei

Dimapur, April 11: India gamsung’a tu naicha Africa gam-mi phabep buluna thilsoh akal be cheh cheh jeh in India khopi’a cheng mi phabep lungput hi gamsung mi’n demna aneiyin ahi.

Greater Noida’a tu naicha buluna thilsoh jouva Northeast simlai kiloikhom 23 val in India gam’a um Africa gam-mi ho tosotna anei uvin, adeh’a akibulu ho adinpi uvin ahi. Buluna hi jat-leh-nam kibungkhenna leh kivetda na jeh ahi, tin aseiyun chule vangsetna thilsoh hi Northeast’a kon simlai honjong atojing ahi, tin aseiyui. “India gam’a Africa gam-mi ho kigimbol na leh kijumso na thilsoh chung’a kapohnat hu uve. Thil umchan hi lungnat umtah ahi’in, India sorkar in thilsoh ho hi nam kivetda na jeh ahi, ti apomlou hi lunggim umtah ahi. Hiche hi India gam-mi atamjo lungthim’a kivetda na aumjeh’a kon kipan ahi”, tin simlai kiloikhomna chom chom in thuso anei uvin ahi.

Koi chung hijong leh (adeh’a Africa gam-mi ho) kivetda na leh kithetna demna akineiyin, chule mi phabep in mihem sa ne’a leh khamnathei bol’a joh tia jouthu asei uhin alungput-u avetsah ahi’in, Northeast India mi keihon hiche hi avel vel’a kato-u ahi, ati. Northeast gam-mi ho akibulu teng leh gam ngailutna thu akiseiyin, India gam-mi cheh ihiuvin, kithetna aumpoi, akiti. Hiche hi athu kisuhmang na ahi, tin kiloikhomna in thakhat’a thuso aneina’a aseiyin chule ‘racism’ hi gamsung mi hihen lang hihih jong leh nam-dang leh jat-dang douna’a kibol na kitong ho kiseina ahi, ati. Centre in hiche thu suhlhap nading’a pan alah ding’in union in ngehna aneibe uvin ahi.

Thusoh Lahchom

AR

Khopi sung’a cheng hon meivah nom tah in mang jong leu hen khopi pam lam’a cheng hon meivah lhun lou jeh in hahsat na tamtah atoh un ahi.Hiche toh kilhon chun Chandel ah HQ IGAR (South) makai nanoi in 18 Assam Rifles,26 Sector Assam Rifles hon kithopi ding’a lom holeh kithopi ngaicha ho ana kitho peh kit un ahi.Amaho keu hilou vin Commandant 18 Assam Rifles hon jong 09 April nikho in Ralringkhu,Lamkang khunou,Mantripantha leh Kuthar kho ho’a Solar lamps 71 anahom un ahi. Hiche holah’a chun Chandel district akon in meithai 25 jong apang in ahi. Kho haosa holeh kho mipi ten Assam Rifles ho thipha bol nachung’a sei joulou akipa nao thu jong aphongdoh un ahi.

MyGov website

Assam  Chief Minister Sarbananda Sonowal in tuni chun sorkar le milham ho kijahmat tuona ding’a kisem MyGov Assam website hondohna aneiyin ahi. CM Sonowal in aseidan in MyGov hi milham ho le sorkar kah’a lunggel kiseipehtuona , kihoulimna le ngaichat ho kihettuosahna ding’a kimangcha ding ahi ati. Sonowal in aseidan in kivaihomna sung hi elected representative ho le mipi ho mopohna alenjo ahilou le aneojo umlou ahi ati. Mipi ho hin elected representative ho heng’a adei le angaichatho’u chuleh kivaihom dingdan chungchang’a alunggel neiho’u aseinom ji’u ahi’n, ahinlah kihoulimna ding lampi ana umloujeh’a alunggel neiho’u ana phondoh theijilou’u ahi. MyGov website hin mipi ho le elected representative ho kah’a mun’ong lentah ana um chung’a lei ahinduo ding ahi tin Sonowal in aseiye.

Nikita Boro

Indian TV channel ‘Rising stars’ kiti kitetna’a Assam gam-mi khangthah Nikita Boro top 6 channa’a apang in ahi. Reality show hi milham (audience) ho fourth judge panna’a kibol ahi’in, amahon jong vote aneiyu ahi. Judge adang thum hohi Shankar mahadevan, Monali Thakur chule Diljit Dosanjh ahi. Nikita Boro aw ngainom umtah hi judge ho panna’a mi tamtah in angainom in adeilhen in ahi. Episode nukhah pen hi April nisim 9 nikho’a kipe ahi’in, Nikita in ‘Nisha’ kiti la ngaitah’a asah’a chule voter 85% amu jou ahi. North East gam-mi hon Colors TV official application download abol’a Nikita vote apeh uva akithopi thei ahi.

KSO-Moreh

Achesa 2016 kum’a Tengnoupal district akithenso toh kilhon’a Kuki Students’ Organisation, Moreh in ahunglhung ding April nisim 25 le Moreh le akimvel sung’a um Hospital, Government le Private Office, dukan, institution le adang dang ho vilna aneidiu ahin, hitoh kilhon’a Chandel kijihna signboard jouse Tengnoupal a akikhel diuvin KSO Moreh Info. & Pub. Secy. Mangminhao Mate min’a thuso chun hetsahna ahin neiyin ahi.

Editorial

JAC-AATB leh Govt kihoulha theilou!

                                Kum masa (2015 August) a Anti-Tribal Bill jeh-a thina toh ho thua kisem JAC-AATB leh govt kikah-a kihouna hi abula pat kisimleh avel vel ahitan tuchung’a athahbeh-a kihouna umkit jong hin kihoulhahna aumtheidehpoi. Mi tamjon athu hi gel jong agelphah tahloudi ahi. Hiche Tribal pumpi thu (issue) hi Churachanpur ‘Assembly Constituency’ (AC) politics a analutkha dan’a aumjeh a-jong midang, Tribal dang hon athu hi thuboi til’a bang’a agelkhoh tahloudi jong ginchat um ahi. Churachanpur AC akon tuchung MLA Election anatet Candidate tamjon “kahung kaidohleh Martyr ho vuidohdi hi kaboipi masatpendi loi ahi” anatiuve. Hitia anasei ho khat ahung kaidoh keu hilouva Cabinet Minister jong ahung hitai. Achutileh hiche thua govt toh avel vel’a kihouna umlouva khatvei kihouva seilhah jengthei hile kilomtah ahi. Hiche thu jeh-a Churachanpur AC a Congress party hi kipum vetda tobang ahi. Manipur Tribal pumpi tongkha thei thu le la (issue) hi itidan’a munkhatna mi hon khat (‘Tribe’ khat) ham, AC khat ham bouvin ahiti thipi guot jeng’a mundang’a Tribal hon kiphinpi jingdi tijong umlouva, gel jong gelpha talouva umdoh ham ti jong hi Tribal kipunkhomna, pankhomna, ipipi akiti vang’a ahomkeu ahidan mutheina ahi. Tua JAC-AATB hon State govt kom’a athum u (charter of demands) hi thuso bangkhatna ipi-pi ahi akitivang’a achen achai leh adihtah kihelou ahi. Ahin Bill 3 ho itih hijongleh govt nin achesahloudi, Martyr ho insungmite natoh (service) leh sum hija-ja kipehen, athiho hetjingnadi’a govt nin ipiham khatbeh bolhen tiho ajaodi ginchat umtah ahi. Hiche hohi govt dia jong sanpeh thei tah hidi ahi. Ahin Anti Tribal Bill to kimatna neilou gamtin akiseileh govt injong anoppehdi tahsan umlou ahi.

                   “Tribal Martyr” holah-a khat akivuidoh tah vang’a Governor-nu injong “vuilouva um mi 9” atinahlai chun koiman athu hi thupi behseh-a ageltahlou mutheina khat ahi. Thiluong 9 lah-a khat ana kivuidoh jong chu “tribal” ho kikah-a kihoutohna beiya anakibol ahiban’a govt akon kithopina mudi ipipiham jong kinoptona ana um’a akiseijeh hin adang vuilouva umnalai hose dia jong akivuidoh masapa’a sang’a phachomjo mudi, akivuidoh masapa kivui sang’a thupi joa vuina kin boldi tijong umnalai theidi ahi. Akivui masa-pa ahia, akivuiloulai ho ahia, govt kom’a luongman lahloudi ti jeh-a muntin’a “Tribal” mipi hon luongman’a dia sum le thil atuotheichan u anatuo u ahidan jong geldohna umleh govt kom’a phatchomna mudi thu seidi jong jachat umtah hidi ahi. Govt kom’a luongman akilah leh athiho “Martyr” ti jingdi jong dihlou nalaidi ahi. Thu le la jouse’a kitona aumtahlou jongleh Tribal jouse tongkha thei thu (issue) beh ah Tribal jouse kituona umleh govt injong Tribal pumpi tongkhathei thua gelkhohna khat aneidi ahi. Bill 3 toh thildang dang aki kaimat laisea mithi ho vuidoh sohna di nikho gamla jingdi ahi.

Blankfire

Mi bangkhat chu alet teng kiletsah cheh, abangkhat chu aletbe chana kineosah, abang khat chu ima jong hilouva kiletsah loi um ahi. Hiche hi mi kikimna leh ajatjat um tina ahijeh in koima oimo dileh demdi jong umdehlou didol ahi.