ET April 11, 2017 News (Local, Regional, National, Thusoh Lahchom, Editorial, Blankfire)

ET April 11, 2017 News (Local, Regional, National, Thusoh Lahchom, Editorial, Blankfire)

272
0
SHARE

MLA Ashab Uddin gamsung mi dihtah ahipoi:JCILPS

Imphal, Apr. 10: Joint Committee on Inner Line Permit System (JCILPS) convenor, Arjun Telheiba in Monday nikhon Jiribam Assembly constituency MLA Ashab Uddin hi gamsung’a cheng den ahi’in, ahin, gamsung mi dihtah ahipoi, tin aseiyin ahi.

Segao Road’a um office mun’a Telheiba in thuso miho akimupi na’a chun ILPS in Bill kitup tah akisemdoh masang’a gamdang mi in election atet theilou ding’a gahna asem ahi, ati. Ashab Uddin amatah hi gamsung mi dihtah ahilou jeh’a state Legislative Assembly MLA ahi, tihi kisang/kipom louding ahi, chule ama leh sorkar natoh hohi kivesui jing ding ahi, tin aseibe in ahi.

Drug mafia to kisaina neija ngohna eikineihi jouthu ahi: Ashab Uddin

Imphal, Apr. 10 : Jiribam Assembly constituency MLA Ashab Uddin in Silchar gam’a um ‘Bangali Newspaper’ in April nisim 04 nikho’a thuso aneina’a khamnatheiya kivei hotoh kisaina neiya ngohna anei thu donbutna ape in ahi. Bangali thuso hi gamsung’a April nisim 7 nikho thuso’a pao kiledoh’a kisodoh kit ahi. Ashab Uddin in telephone’a thuso miho akihoupi na’a chun, Zilla Parishad member leh Sadin bazaar Panchayat hi Sonai Assembly constituency, Assam gamsung Cachar district noiya um ahi’in, election’a goljona kanei kipapi na’a kin-gon agon uva kouna eipeh-u ahi, ati. Chule drug mafia toh kisaina neiya ngohna eikinei khum hi kei ma minset nading’a kibol tohgon ahi, tin adonbut in, ngohna hohi jouthu ahi, tin aseibe in ahi.

 

April nisim 12 le HAC Chairman lhenna umding

Imphal, Apr. 10 (ET): Ahunglhung ding April nisim 12 (Wednesday) le Hill Areas Committee (HAC) Chairman ding lhenna umding ahitai. Hitoh kilhon’a Manipur Governor in Agriculture Minister V. Hangkhanlian chu HAC Chairman lhenna a lamkai ding in jong ngansena aneitan chule Manipur Legislative Assembly a Hill Areas Committee member jouse April nisim 12 jinglam nidan 11 le Manipur Legislative Assembly Secretariat Secret Room a HAC Chiarman lhenna a hungpang cheh ding in jong Governor in hetsahna thuso aneiyin ahi.

HAC Chairman ding Propose bolna ding phat hi April nisim 11 sunkim chan hiding in jong Manipur Legislative Assembly Secretary M. Ramani Devi min’a kiso thuso chun atahlang in ahi.

Tibukimlou ho khantou nading ‘memorandum’ kipelut

Imphal, Apr.  10: Relief Centre for the Welfare of Differently Abled Persons, Manipur in Monday nikhon Governor leh Chief Minister heng’a memorandum apelut uvin ahi.

Memorandum’a chun thumna chom chom anei uvin, hiche lah’a hin State Disabilities Policy semding, State Commissioner of Disabilities office thahat sah ding, Right of PWDs Act, 2016 ‘a kisei bang’a Commissioner leh member 11 val hilou Advisory Committee in akithopi ding, India sorkar in sponsor abol scheme leh Grant-in-Aids jouse State Commissioner for Persons with Disabilities, Manipur in avetsui ding ahi, tin aseiyui.

State Commissioner hi regulatory body leh Grievance Redressal’a pang ding, Right of  PWDs Act,2016 kichepi avetsui ding, thukholna aneiyu kal khat sung’a Disabilities certificate apehdoh diuvin jong thumna anei uvin ahi. Chapter VI, Section 34(i) Right of Persons with Disabilities Act,2016 dungjuiya Government Department’a tohmun kiholna’a 4% reservation apehdiu, state sorkar in ‘public awareness campaign’ abol ding, tahsa ti bukimlou simlai jouse, adeh’a mitcho ho screen reader software umna Computer, digital books, chule lekhasim na’a ngaicha adang dang manchah (appliance) ho apeh diuvin asei uvin ahi. Hiche tilouva lamlen’a amit lhasam (Persons with Visually Impairment) ho ding’a red light signal’a hi auditory signal akoi diuvin jong thumna anei uvin ahi.

Congress in Sirarakhong kho vil, kithopi ding’a sei

Imphal, Apr. 10: MPCC president TN Haokip lamkaina in Manipur Pradesh Congress Committee (MPCC) team hon Monday nikhon go juh jeh’a mun chim na Sirarakhong kho avil uvin ahi.

Congress President in khosung miho akimupi in, amaho’a kon jo chan’a kithopi na peh ding’in jong aseiyui. TN Haokip in thuso miho akimupi na’a chun hitobang thilsoh (natural disaster) hohi kisei masa theilou ahi’in, hijong leh kivenna mijousen alah ding ahi, ati. Congress in avaihom sung’a Kabui Khulen’a abol tobang bol ding ahi, tin aseibe in ahi. Chule khosung miho mun chom’a akichon na uva compensation peh nading’a sorkar heng’a ngehna kineiding ahi, tin aseiyin chule sorkar in khosung miho ding inmun athah sem peh diuva jong kisei ding ahi, ati.

Dampi Haosa dihtah Lalboi Lhungdim ahi ti’a LIK in thutan lhah na neita

B.Lalboi Gangte

CCpur. April 10 (ET):      Dampi haosat naleh gam chung chang thu’a Lhungdim Innpi Kiloikhom (LIK) na President Tongjathang Lhungdim leh Secretary Joshua Lhungdim teni suikai na Press Release kimun asei na ah, achesa April nisim 8, 2017 nikho in Lhungdim Innpi Kiloikhom na Head Office, Family Lane, Bijang ah LIK Member jouse leh innsung’a Haosa upa lunggel thei jouse toh Dampi gam chung chang thu’a kihou na akineiyin, hiche ahin Dampi gamchung chang thu’a thutan lhah naleh thulhuh na akisem tai ati.

Chuleh  Lhungdim Innpi kiloikhom (LIK) in Dampi gam thu’a thutan lhah na kinei chu ahileh Jamkholal hi LIK in achung’a Case aumtoh kilhon in kouna vel ni akineijin akikou na bang’a ahung tah lou jeh in Dampi gamchung chang thu chai na sem ahi tai ati, Chuleh Jamkholal leh Lalboi Lhungdim Dampi gam chungchang a boina lhon hi phatah’a akikhol chilnung in Jamkholal in Jamkhotong Lhungdim in Gift Deed gam chung chang’a Lekha eipe e ati hi bul le-bal neilou kamcheng ahi dan aki kholdoh toh kilhon in Lalboi Lhungdim hi Dampi haosa dihtah ahi ti’a photchet leh phondoh ahi toh kilhon in tunung tuma leh Jamkholal leh Inn kote hin Dampi gam houp sung’a hung kikum talou ding in thutan na kila ahi ati.

Chuleh achesa August nisim 7, 2013 nikho’a Tungdim Phungpi Organisation (TPO) in hiche gam chung thu’a thulhuh ana sem chu akikhom mipin velvet na aki neijin, phungpi kilol na Jamkholal in jana neilou tah’a ajui lou akihet doh toh kilhon in LIK in demna sangtah akipe in ahi ati.

Chuleh achung’a hung kisei thucheng hojouse kholchil leh kholdoh ahitoh kilhon in Jamkholal leh a innsung miten Dampi gam houp sung  hi Chamna leh lungmonna aumthei nading’a agangthei pen’a adalhah diuva hetsah ahi, iham ti’a akisei bang’a thunit lou’a khonung’a boina aki to khah leh innsung mi in kihetpeh lou di ahi tin thuphon in aseijin ahi.

Minister Th Shyamkumar in Loktak Lake le akimvel lah vilna nei

Imphal, Apr. 10 (DIPR): Forest and Environment Minister Thounaojam Shyamkumar in tuni chun Bishnupur district a Loktak Lake le akimvel lah vilna aga neiyin ahi. Hiche a chun Principle Chief Conservator of Forest PN Prasad, Loktak Development Auhtority (LDA) Project Director L. Bhagaton Singh tenin ana kilhonpi lhon in ahi.

Minister Shyamkukar le akilhonpi Oinam MLA L. Radhakishwor Singh, LDA Official le Forest Department official hon Bishnupur district a Toubul village vilna anei masauvin, hiche a chun khosung mipi hotoh kihoulimna anei uvin chule khosung mipi hon jong ahahsatna ho’u Minister heng’a alhut uvin ahi. Hiche jou chun Minister Shymakumar le a team hon Keibul Lamjao National Park lang’a anajon uvin ahi. Keibul Lamjao mun’a chun Minister pa’n Forest Department official hotoh jong kihoukhomna ana neiyin ahi.

Hiche jou chun Minister pa le a team hon Sendra Park and Resort le ana jonphei kit uvin, hiche a chun Minister Shyamkumar  in ahoulimna ah; Loktak Lake le akimvel lah khantouna ding’a natoh na aumtheina ding’a  Chief Minister N. Biren Singh heng’a kalhut ding chule local MLA le subject expert ho consult kibol’a natohna hi chelha ding ahi tin aseiyin ahi.

Tuni’a Loktak Lake le akimvel lah hung kivil lo napen chu ahile, local miho le expert ho toh kihoutoh a chule concerned department ho toh khantouna natoh achelhah thei ding deisah najal a hung kivil ahin, chule dandih lou tah’a Loktak Lake panglah’a cheng ho suhbei ahina ding’a amaho kivah na ding ngaituo peh ding, hiche na ding’a chu local tourism khantousah angaiye tin jong Minister pa’n Sendra mun’a thuso miho toh akihoulimna a chun aseiyin ahi.

Minister Shyamkumar in Bishnupur a Loktak Lake vilna aga nei masang chun jingkal lang in Alu Gali, Thangal Bazar lah’a drainage system ho vetlhahna jong aga neiyin ahi.

New Delhi’a um Manipur Panthoibi Emporium a dan kijuilou; Manipur minset sah

Imphal, Apr. 10: New Delhi khopi’a um Manipur Panthoibi Emporium hi gamsung ‘tradition’ loupina vetsah nading’a kisemdoh ahi’in, ahin, hiche hi avetup’a abulhing jou aumpon ahi.

Kum phabep masang’a IT thuso in emporium semphat nading’a sum lakh 25 hi government officer hon alam louva amang’e, tia anasei ahi’in, hiche jouva sorkar in sum hi aladoh pa’a konin nung lah kit nading’a thupeh anei ahi. Ahin, tuchan’a sum hi kiladoh kit ham, ahilouleh kiladoh talou ham, ti thuphon umlou ahi. Imphal Times thuson achesa 2013 kum’a dangka lakh 25 hi deputy director (Food Processing Industries) S Joykumar in Panthoibi Emporium, New Delhi semphat nading’a April nisim 23 nikho’a alah ahi, tia asei ahi.

April nisim 24 nikho’a Deputy director in suhthengna aneiya, Emporium semphat nading sum hi Th Iton leh E Gopendro Singh in Punjab National Bank, Irilbung Branch’a cheque chom  chom thum aman’a alahdoh ahi, tia asei kit ahi. Imphal Times thuson aseina’a chu November 19, 2011 ‘a cheque number 770402 ‘a dangka 5,00,000 kiladoh’a, December 1, 2011 nikho’a 10,00,000 kiladoh’a chule cheque athum channa 770409’a hiche nikho ma ma’a dangka 10,00,000 kiladoh kit ahi’in, cheque teni’a hi E Gopendra Singh in soi akai ahi, ati.

Thuso mihon tu naicha Panthoibi Emporium vilna aneiyu chun hiche mun hi Manipur gam-mi hilou midang khat inn-bahara’a kipe ahi ahedoh uvin, gamsung’a kisem thil jong jong hilou ahi. Manipur gam’a kisem thil ho promote bolna ding’a kikoi in-ka (room) 4 jong man louva um ahi. Panthoibi Emporium 80% hi Manipuri mi hilouvin alo ahi, tin thulhut in aseiye. Emporium hi Manipur Handloom and Handicrafts Development Corporation (MHHDC) khut’a kipelut ahi’in, ahin, Managing Director, Superintendent leh General Manager panmun hi a-ong’a um nalai ahi. Lamkai kitup aumlou jeh’a staff neo neo hon dan ajuilou ahi.

Edn. Minister Radheshyam in Kumbi Area a School ho vilna nei

Imphal, Apr. 10 (DIPR): Education Minister Radheshyam in tuni chun Bishnupur district sung Kumbi area a government school ho vetlhahna aga neiyin ahi.

Minister Radheshyam in Kumbi area a school ho vetlhahna aga neina’a chun RMSA le SSA ho jaona in School education department official ho nana kilhonpiuvin ahi.

Kumbi Assembly Constituency sung’a government school 4 vetlhahna aga nei ahin, hiche a chun simlai ho le jilkung ho toh jong kihoukhomna aneiyin ahi. Minister Radhesyam in tuni’a aga vetlhah school ho chu ahile Wangoo High School, Ethai Khunou Government High School, Kumbi Sandhong Primary government Primary School, Kumbi College le Saiton Government High School ahi.

Minister in School ho vetlhahna aga neipet chun simlai ho le jilkung ho school infrastructure hoilou dan le Teaching Staff lhahsam dan ho Minister pa hetsahna ana neiyun chule Minister pa heng’a Memorandum jong anapelut uvin ahi.

Education Minister Radheshyam in simlai le jilkung ho toh akihoulimna ah; Edcuation Minister ahung hijouva kipat jilkung hon ahahsatnau ho ahung lhutjing’u ahidan aseiyin chule amaho kithopina ding’a nasatah’a pan alahding ahidan aseiyin ahi.

Polo khantouna ding’a hin Manipur mipi te’n mopohna lentah inei’uve: Guv

Imphal, Apr. 10 (DIPR): Polo hi Manipur gamsung’a hung kipan ahi’n, gamsung a (Manipur) cheng mipi ho jouse in Polo hi leiset chung’a suhminthang na ding mopohna lentah inei’uve tin Guv. Dr.Najma Heptulla in tuni Veteran Polo Player Yumnam Jila Singh le Kshetrimayum Joykumar Singh  vailhah na kinguon kibolna’a aseiye.

Manipur sung’a hi Polo kichem hon Manipuri Pony bou amanchah’u ahi’n, gamdang a kichem hon vang Sakol lenjep amanchah’u ahi. Hitobang dinmun ahijeh’a hi Manipuri Player ho gamdang a kichemding’a ache teng’u le sakol len ho amanchah thei jilou’u ahi. Guv. in aseidan in Manipuri Polo player hon hitobang hahsatna atojing’u suhbeina ding’a hi player ho gamdang a kichuhna neiding’a kisol jing ding ahi ati. Sports Minister le Union Minister of Sports toh kihoutoh’a grassland le Pony Farm phabep hondoh’a Manipuri Pony amanthai louna ding’a pan lahding lunggel aneidan jong Guv in aphongdoh in ahi.

Polo manthailouna ding’a hi Gamsung a (India) um Polo Association jouse koukhom’a lunggiltah’a kihouna neiding apoimo’e tin Guv in aseibe in ahi. Corporate lentah tah neihon Cricket atosot bang’uva Polo jong atosot na ding’uva jol ngaiding ahi tin jong aseiye. Tuni  Kinguon’a chun Guv. in Veteran player teni Dk.10,000 cheh ahoppeh in ahi.

Nagaland Police personnel khat in ‘Shaurya Chakra Award’ sang

Kohima, Apr. 10: Thursday ni chun Nagaland Police kiloikhomna sung’a Sub-Divisional Police Officer panmuntuh Atu Zumvu in Rahstrapati Bhavan a kinguon kiman na khat’a Shaurya Chakra akisan in ahi. Amahi Nagaland in  1963 kum’a Statehood ahin mu’a pat Shaurya Chakra kisan masapen ahi nalaiye.

Zumvu  hin 1997 kum’a chu Nagaland Police a natoh anamu ahi.  Aman aseidan in Nagaland gamsung hi law & Order kituplou jeh’a mi seiset/vetset tah gamsung khat anahi in, dandihlouva kai kidong chuleh lam chom chom’a boina tampi asohjing in ahi. Amavang dowry le domestic violence lampang’a vang gamdang sang in haphat in aphajo’e tin Zumvu in aseiye.

“Commercial Capital, Dimapur jong akikehletbe jing in hitolhon hin crime rate jong akalbe jing in ahi. Nagaland gamsung a crime rate akal jing hi ajeh tampi umjong le apipen chu Myanmar to kinaicha’a aumjeh ahi. Myanmar toh akinai jeh’a hi khamnathei’a kivei ho le thingnoi ho ding’a lamlhahna munpi khat  hung kisoh ahitai” tin Zumvu in thuso miho toh akihoulimna’a aseiye.

Atu Zumvu hin 2005 kum’a chu Governance Commendation Certifate jong ana kisan in 2007 kum chun Delhi’a INR eight crore rupees vel recover aboljeh in promotion ana mu in ahi.  2011 kum jong chun Cybercrime khat ana sulham in ahi. Hitolhon chun Nagaland police lah’a Cybercrime sulham masapen in ahung kihe in ahi.

PM Modi in Mahatma Gandhi exhibition hongdoh ding

New Delhi, Apr. 10: Prime Minister Narendra Modi in ‘Champaran Satyagraha’ hi Mahatma Gandhi in alamkai ‘movement’ ahi’in, New Delhi khopi’a Champaran Satyagraha kum 100 lhinna geldoh na’a ‘Swachhagraha- Bapu ko Karyanjali’ kiti exhibition hondohna kanei ding ahi, tin aseiyin ahi.

Exhibition’a Champaran Satyagraha vetsahna umding chule Satyagraha leh Swachhagraha principal thupi ho kinaina kisem ding ahi, ati. Swachh Bharat Mission in India suhtheng na ding’a ichan pan alah ‘em ti vetsahna umding ahi, tin PM Modi in aseiyin ahi. Tukum April lha hi Champaran Satyagraha- Mahatma Gandhi’s First Satyagraha in India’ centenary ‘a lhinna ahi.

Lotha Hoho leh Rengma Hoho in NH2 kehlet na ding’a ‘ultimatum’ pelut

Kohima, Apr. 10: Lotha Hoho leh Rengma Hoho in National Highway 2, Tseminyu leh Wokha sector lamlen kehlet nading’a National Highway Authority, Nagaland, NHAN heng’a ultimatum apelut uvin ahi.

Kiloikhomna teni in thuso anei nauva chun, hiche thu hi seilhah tho thei hita louding ahi, ajeh chu avel vel’a ngehna umho state sorkar in donbutna apehlou ahi, tin aseiyui.Minister-in-charge, chief engineer (NH) leh commissioner chule secretary in kitepna anei kum 2 jouva jong kitepna bulhit louva um ahi. India sorkar in DPR phatsahna apeh’a chule achesa October 31, 2016 kum’a dangka 340.2687 crore sanction abol ahi, tin aseibe uve.

Natoh hi December 2016’a kipan’a 2016-17 kum’a sanction kibol jat hop 20 man doh tei ding’a Ministry in asei ahi, tin Hoho in aseibe in ahi. Lampi dang aumlou leh kiloikhomna teni in phat telou bandh sector teni’a abol ding ahi’in, NHAN themmo kichan ding ahi, ati. NHAN in lamlen kehlet na natoh apat kahse chule work order asodoh masang se’a bandh kibol ding ahi, tin aseibe uvin ahi.

Nagaland  India sung’a dumchep tamna pen ani channa’a um

Kohima, Apr. 10: GATS 2010 survey dungjuiya Nagaland  India state ho lah’a dum chep le dum’mom tamna pen gamlah’a ani chan na ahi hi tijat umtah ahi tin District Nodal Officer (NTCP), Wokha district Dr Meribeni Odyuo in aseiye. Nagaland gamsung’a cheng miho lah’a 57% vel hi dumchep ahiloule dum’mom ahi’uve. Dr.Meribeni in hiche thu hi Department of Health & Family Welfare in aguon COPTA Act 2003 le Numei ho hinkho’a dum (tobacco) in natna tampi ahinpohlut thei danho chungchang’a Seminar abolna’a asei ahi. Kinguon chu LTC Hall, Wokha district a ana chelha ahi. Dr.Meribeni in aseidan in Nagaland gamsung’a Dum chep akemsuh theina ding in COPTA 2003 chepi dingin sorkar in thulhuhna aneitai ati.

Dr Meribeni in aseidan in NTCP , Wokha team hin milham ho ngailutna jal in dumchep aphatloudan akihil lhang jing in hitolhon chun themjilnamun 26, Hou-In, khopi sung chuleh kho phabep a awareness programme akibol tai ati. Tuni kinguon a chun Wokha, MO,Dr.Pithungo Kikon in tobacco & women’s health thupi’a houlimna aneiyin  Wokha District Legal Service Authority a kon Kimiri Tungoe le Abeni Kikon in COPTA Act 2003 le society sung’a numeiho mopohna chungchang’a houlimna aneilhon in ahi.

Bongsa poh jeh’a kiman ho atosot jeh’a Bajrang Dal member hon Activist khat gihna nei’u

Assam, Apr. 10: Jorhat, Assam a pansa human rights activist khat in bongsa poh jeh’a mithum kimatna chungthu demna aneijouvin  Bajrang Dal member hon social media mangcha in thading, suhset ding chuleh acid thekhum ding tin gihna anei’uvin ahi.

Hetthei khat chu April nisim 4 nikho’a chu BJP lamkai Mridupawan Bora in hehna anei dungjuiya  Jorhat Police in chapang khat pan nah’a mithum bongsa 500 gms toh ana mat tha ahi. Chapangnu chu Police in April nisim 5 nikho chun observation home’a ana pelut in Abdul Rahman le Shah Jamal Haque chu IPC Sectoin 95(a) le Assam Cattle Preservation Act, 1950 dungjuiyin case khat asemkhum in ahi.

Cattle Preservation Act dungjuiya hi Bongsa pohle hi criminal act hilou ahi. Amavang hiche Act  hin bong kitha dingdan bou asei ahi. Bongsa pohjeh a mithum kimat thu hi gamsung mipi ho le Bondita Acharya in social media’a hatah in demna ana nei’uvin ahi.

Acharya hi Human Rights Defenders Alert (HRDA) a northeast coordinator panmun tuh ahi. Amahin Facebook post a Hindu higher caste hon jong bongsa ane’uve ti’a asut jeh’a melhetlou phabep in gihna ahin nei’u ahi. Acharya gihna neiho chun Assamese pao amang’uvin ahi.

Hiche thu toh kisai hin Acharya in April nisim 10 nikho chun Superintendent of Police, CID (Guwahati)  heng’a hehna lekha khat asunlut in ahi.

RSS Chief Mohan Bhagawat in bong (Cow) tha tahlou ding’a kholhang sam

Bihar,Apr. 10 : Sunday nin chun Rashtriya Swayamsevah Sangh (RSS) Chief Mohan Bhagawat in Lord Mahavir pen nikho kiman na kin’a  mipi ho kom’a tu’a pat bong(cow) kitha hi ngah ding ahitai tin aseiye.

Aman aseibe na’a chun hiche hi government in law khat asem di dol tah ahin,ahin government in ema akhoh sah lou jeh’a State government ho kom’a  “Swayamsevaks” hi chepi ding nga anakisei naban’a state government mun dang dang in laws in asem doh taovin ahin akidei pen chu India pumpi in chepi hen tin aseiye.

India sung’a state dang dang in bong(cow) kitha hi banned abol utoh kilhon in laws in jong asem doh taovin ahi,ahin north-eastern states West Bengal,Kerala chuleh BJP letna Goa ho lah’a ema kham gah na aum naipoi tinjong aseibei..

Assam, Dhemaji assembly by-poll ah vote 68% kilha doh

Assam,Apr. 10 : Assam assembly by-election Sunday ni’a Dhemaji constituency a ankibol chu mipi 66.97%  in jingkah nidan 7:00am apat in nilhah nidan 4:00 chan vote kilhah na’a  boina ema umlou vin ana kichai tai tin Dhemaji Returning Officer Roshni Aparanji Korati akon thulhut kimu chun aseiye.

Assam sung ading’a Voter Verifiable Paper Audit Trail (VVPT) hi akiman kum masat pen ahi. Korati in aseibe na’a chun polling station 273 lah in polling stations 20 chu “very sensitive” chuleh polling 141 chu “sensitive” ahi ati.

Hiche by-election ah hin Bharatiya Janata Party (BJP) akon in lawmaker Pradan Baruah in ana tet toh kilhon in Lakhimpur constituency ah Lok Sabha member ading in anakai doh tan ahi.Sarbananda Sonowal in Majuli assembly constituency mun na ahung kai doh phat na Lakhimpur constituency ahin dalhah ahi.Sonowal in May 24 nia kihahsel na ananei tohlhon in BJP ading in Assam Chief Minister masapen ahitai.

Hiche by-elcetion ah hin candidates 5 umjong leh athupi pen na kihe hi tu tu’a ruling party BJP candidate Ranoj Pegu leh Congress party akon nominee Babul Sonowal hilhon in ahi.Adang thum ho chu Communist Party of India -Marxist’s akon Jadu Hazarika,Socialist Unity Centre of India-Communist’s akon Hem Kanta Miri chuleh Independent akon Rajkumar Doley ahiuve.

Assam Legislative Assembly hin 126 members anei na’a  BJP – 60, the Asom Gana Parishad (AGP)-14 chuleh the Bodoland People’s Front (BPF)- 12 members cheh aneiuve chuleh Opposition na um Congress hon members – 26,All India United Democratic Front-13 chuleh Independent-1 members aneiun ahi.

Hiche by-election hi April 13 nileh vote kisim pan ding ahi.

Pasal ni in numei khat luongdamsa alhankhuh’a kon’a laidoh’a luppi lhon

Ghaziabad, April 10: Mihem chihna asancheh cheh tolhon in tukhang a hin nopsahna jat chom chom ahung kisemdoh in , sum choijep miho ding’a hi hinkho nomtah man’a idei dei neh’a inop nop bolnakhang  chu ahitai. Ahinlah hiche khantouna hi chonsetna jat chom chom in jong ahin jui in ahi. Tukhang a chonsetna kibolho hi ivet’a ahileh ipu ipa’n jong ana hetphahlou chuleh lekhabu luiho’a jong kisimdoh khalou chonsetna  jat chom chom ani ani in apungjing in ahi.  Hitobang chonset kibolna thilsoh khat ichenna’u gamsung mama’a ana soh in ahi. Jachat umtah le mihem khat lunggel’a jong gelphah huoi hilou thilsoh  khat’a chun melhetlou pasal phabep in nikho ni masang’a ana kivui numei khat chu alhankhuh’a kon ana laidoh’uvin melsetah in ana luppi’uvin ahi.  Thilsoh hi Lucifer in jong hinve le jahcha in tin amai kisip leule akilom in ahi.

Hiche thilsoh hi Ghaziabad sung’a um Talheta kho’a ana soh ahi. Tuni jingkah lam’a chu kholai vahle hon numeinu luongdamsa chu alhankhuh’a kon Feet 20 vel gamla’a agamudoh’u ahi. Hiche phat chun numeinu insungmite ana  hetsah’uvin, numeinu insungmite’n jong kidang asahval jeh’u chun police ana hetsahpai’uvin ahi.

Thulhut khat in aseidan in numeinu luongdamsa chu Thursday ni jaan a chu pasal ni in alhankhuh’a kon alaidoh lhon’a aluppi lhon ahi.  Numeinu insungmite’n aseidan un numei nu hi anao neinah’a thi ahi.

Numeinu chu athijouva asangkhol atoka toh kivuitha ahi. Ahinlah sahem lungput nei pasal teni chun avonjouse asutlhah lhon’a aluppi lhon jouva numei nu  luongdamsa chu atuom beiya adalhah lhon ahi.

Numei nu kivuina lhankhuh chu 4.5feet thuh’a kilai ahi. Khansetna aneiho chun dahkal khat sung’a alaidoh’u ahi. Hiche hin avetsah chu ahileh thilsoh’a muona nei hi mithum beh hiding ahi. Hiche thilsoh chungchang’a kholchilna kichehtah aum’a  khansetna neiho atotohchet’a guotna peh ahina ding inkhosung miho’n ngehna anei’uvin ahi.

Thusoh Lahchom

School inspection

Education Minister Th. Radheshyam in Monday nikhon Bishnupur district’a um government school vetlhahna (inspection) aneiyin ahi. Minister pa in achena’a ‘stakeholder’ chom chom hojong akimupi in ahi.

IED

CM N Biren singh in Tuesday ni’a Ukhrul agavil  nadi masang in  Assam Rifles hon search operation abol nao ah chun Tangkhul Naga tamna kho khom mah IED khat ana mu doh un ahi. Assam Rifles hon Saturday nisim 8 jingkah nidan 10:20 vel lah in NH-202 19 km Ukhrul apat Imphal,culvert noiya IED  bomb ana mu doh uvin ahi. Bomb chu Assam Rifles bomb squad in lolhing tah in an ladoh’ uvin ahi.

JAC-AATB

Tuni chun CM Secretariat a State Govt,. le JAC  Against Anti-Tribal Bills (JAC-AATB) in kohoulimna anivei channa aneilhon in ahi. Kihoulimna’a chun Govt. thalheng in CM N.Biren Singh, Council of Minister ho, Chief Secretary O.Nabakishore, DGP LM Khaute le CCPur DC R Sudhan in pan ala’uve. Member 14 pan na JAC chu Chief Convenor Mangchinkhup in amakai in ahi. Tuni kihoulimna’a chu ipi thu asei’u ahivang kichehtah in het ahinaipoi.

Shad Suk Mynsiem

Thulhut kimu dungjui in Tuni Monday nichun Meghalaya, Lympung Weiking lentol’a tribal khasi numei leh pasal asang aja in “Shad Suk Mynsiem”(dance of peaceful hearts) kin chu thupi tah in anamang un ahi.Hiche kin hi amahon harvest season chuleh Pathen heng’a phatthei thum na’a aman jiu ahi. Kum 1910, masang nga chu hiche kin hi Mawkhar kho mun’a anakibol ji ahin Seng Khasi lamkai hon munlen jep’a bol ding pha asah utoh kilhon na 1910 kum jou apat Lympung Weiking ahung kibol pan ahitai. April 14 leh 15,1911 kum chun amasapen’a ding in “Shad Suk Mynsiem” chu Lympung weiking ah anamang un ahi.

Bank natong khat kikhailih

Saturday nichun Jamu & Kashmir sung’a numei kum 30 a upa khat ana ki khailih in ahi tin police ho’a kon kimu thulhut chun aseiye.Hiche thilsoh hi police station na kon 50km a gamlha Sopore kho’a thilsoh ahi.Ama nu hi bank’a natong mi ahi. Police hon room kholchil na anei nao vin akikhailih nakom mah lekha khat  amu un hiche a chun bank’a atoh khompi lamkai ho in asuh genthei jeh’a kikhailih ahidan amudoh un ahi. Hiche toh kilhon in FIR registered abol un ,post-mortem dung  jui’a  FSL report kingah ahin report ahung doh doh leh kholchil nahi kinei be ding ahi tin police official hon aseibe’e.

Editorial

Dangka Crore a sim kimansahna gam?

                          Nikhatna dangka Crore sangkhat lang akimansah-e tia Serto Tondana Kom in hisap aboldoh chu ato alu geiya adih ding tahsan aumpoi. Bandh/Blockade hojeh a sum tamtah kimansah (sum mudidol kimulou), mipi hahsatna lentah aum hi kinelna bei ahi. Ahin nikhatna dangka hijat jat kimansah (kimuda) kiti hi alhangpi’a kisei hijongleh dihlou nalaidi ahi. Manipur gam neocha leh mijat (population) Lakh somthum lhinglou gam’a nikhatna dangka Crore sangkhat lang lodoh dia angka kikhotdoh hi seipap seival umteidi ahi. Bandh, General Strike aumleh Dukan ho kikhah, sumkol veina’a lhai Gari ho alhaida jeh in sum lo ho ijat hamkhat asum mudiu kisuhai maithei nante. Ahin bandh/strike jeh-a loubol, leh nikhotha’a natong dang dang injong atohdiu atohda dehlou jeh uva amudi dol u (income) amu thou thou u ahi. Bandh/Bloakde jeh-a thilman kaljeh-a mipi dia sum suhmangbe vang kinelna bei ahinai. Ahin Tondana Kom angka khot hi Company ho, Private Sector Industry hobou umna (tamna) gam hileh hadihdi ahin tua akhotdan jong hi State sung’a natong thei mi Lakh 15 hi mi khat nikhotha Rs 280/- chieh-a hisap abol ahi. Bandh/Strike jeh-a mi Lakh 15 hi moh umthim jeng dan’a kisei (kikhot) tina ahi. Industry/Factory tamna gam hoa vang nikhat titahlouva nikeh khat (12 hrs) Strike/bandh aumjongleh dangka Crore’a sim mangjeng, hichu natong’a sumlo ho, Company/Industry neiho, Manager ho kitilouva abon uva mang (sum mudi mulou) hijeng u ahi. Industry/Factory hoa hi nidan/pungkal khat sung’a jeng’a jong thil kisemdoh a kijuohdoh atam jeh-a nikhat nini bandh/Strike kiti chu manna lentah ahi. Ahin Manipur bang hi kum khat sung’a akehkhat val (ni jani lang) bandh le blockade hoa kichaiji hi agam mipite sum muna, kivahna le natoh, inchen louchen chutitah-a aha suhkhahlou ti thei ahi. Bandh aumleh kin le dong hoa chele vale aboinai, chuleh Blockade aumleh thilman kal, gari thao Black a bou mantamjepma kicho, apum apeh-a mipi inchen le sum muna gungun atohkhah vang hidehlou tithei ahi.

                   Bandh/Blockade jeh-a sum ijat jat kimansah (kimuda) am ti hi Govt nin department ho khatbeh jong akhuolsah lou hi angaikhona umlou jeh jong hidi ahi. Chule hitobang hisap bolhi ahahsa tahjong hidehlou ahi. Amale ama kipedoh-a hiche hinbol aumjong hi ipi doina ham tijong kihelou ahi. Serto Tondana Kom in hitobang abolna hi anivei channa ahitan (amasa’a Sanjenthong lei kisah jeh-a sum manna thu) athil mudoh thu thuso miho kom’a aphondoh ban’a govt kom’a ‘report’ pehdi ati hi bandh/blockade umlouna din govt nin panla hen tina jong himaithei, minthanna leh govt hetpehna (recognition) khat mu’a ahitheileh natoh/panmun khat ham, kipaman ham delna jong hithei ahijeh in pachatna jong um, kon asolbon hilou tinathei jong um ahi. Ipi hileh koiman agel’a abollou khat bol aumjong hi pachatna khat vang aum’e. Serto Kom hisap danhi bandh/blockade kiti umlou hileh Manipur hi haolih thei tina ahi. Hichu hisap dih ahidehpoi tina jong ahi.

Blankfire

Tohdi helou leh tohdi mulou jeh a boina (unemployment problem) hi ichana sang hitam ti hi employment exchange a gavet ngailouva het theina mun aume. Tulai computer khang ahijeh hin Internet to kijop manchah hoa aphachomloudi natong atamdan muthei ahi.