ET April 10, 2017 News ( Local, Regional, Thusoh Lahchom, Editorial, Blankfire)

ET April 10, 2017 News ( Local, Regional, Thusoh Lahchom, Editorial, Blankfire)

493
0
SHARE

JAC-AATB le State government in kihoulimna nei

 Imphal, April 9: Chief Minister Nongthombam Biren Singh in Joint Action Committee (JAC) Against Anti-Tribal Bills toh kihoulimna aneijou nikhat jouvin State Governor Najma Heptulla in JAC heng’a martyr mi ko (9) ho luongdamsa vuiliem ahina ding in ngehna ana neiyin ahi.  Geldoh thei khat chu August nisim 31, 2015 nikho a chu Manipur assembly in ILPS bill thum passed ahinbol ahin, hiche bill thum ho chu muntin’a um thinglhangmi jouse’n hatah in ana doudal’uvin ahi. Churchandpur a Bill thum ho doudalna’a kiphinna bol mi 9 in jong Police ho khut’a thina anatuoh’uvin ahi. Martyr mi ko ho hi tunigeiya aluongdamsa’u vuilou’a morgue a umnalai ahi.  Guv in aseidan in mihem khat luongdamsa vuidohlouva phatsotpi kikoi hi hou le bih thuhil tojong kitohlou ahi ati.

“Phat kikhel jing in 11th Manipur Legislative Assembly election jong lolhingtah in akichaiyin BJP in sorkar ahinsemtai.  Sorkar thah in JAC-AATB toh kihoulimna umtheina ding in aboipi jing’e. Lungkhing tah’a itoukhom’a ikihoulim teng le hin suhlhap joulou boina umlou ahi” tin Najma in aseiye.

Hitolhon chun tuni chun JAC-AATB le State sorkar in kihoulimna aneilhon in , hiche a chun JAC in chief minister heng’a charter of demands apelut in ahi. JAC-AATB Chief Convenor  H Mangchinkhup in aseidan in sorkar in ngehna kineiho lunglut tah in ngailhahna aneiyin chule kihoulimna jong boina umlouhel in achelha’e tin aseiyn ahi.  Ahunglhung ding nikho ho’a jong kihoulimna chejom ding ahi tin jong aseiyin ahi.

State Govt. in lhaseh nisim 15 nikho le “Meeyamgi Numit” anit ding ahi: CM

Imphal, Apr. 9 (DIPR):Gamsung mipi ho’n elected leader ho le bureaucrats ho akimupi theina ding’uvin BJP-lamkaina coalition State Government in Chief Minister N.Biren Singh lamkaina noiyin lhaseh nisim 15 nikho hi “Meeyamgi Numit” ti’a nit ding in phondohna aneiyin ahi.

Hiche thu hi CM in tuni Khwairamband Keithel a mejoh nupi ho’n aguon’u kingon khat’a Jin-gun a apan nah’a aphondoh ahi. CM in aseidan in hiche nikho le hin mipi in Chief Minister, Minister ho, Commissioner ho, Secretary ho, Deputy Commissioner ho chuleh SP ho akimupi’uva aboina ho jouse’u aseithei ding’u ahi.

“CM panmun tuhding’a kihahselna kaneijouva kalungthim’a pohgih kanei thum ho chu UNC in abol economic blockade lahdoh ding, Churachandpur boina suhlhap dijng chuleh NH-37 semhoi ding ahi’uve” tin CM in ahoulimna’a chun aseiye. Churachandpur JAC toh kihoulimna jong aphalam in achelha in , boina ho nikho phabep sung’a suhlhap ahiding tahsanna lentah aum’e. Imphal-Jiribam lamlen semhoina natoh jong amachal jing in chuleh tu’a hi MAHUD Minister hon Imphal khopi sung a pollution le traffic congestion suhbeina ding’a long-term plan khat semdoh ding aboipi laitah’u ahi. Hill district jouse’a jong numei ho kailhang khat kisemdoh ding ahi tin Biren in aseiye.

Pol-XII themvetna thudoh leak kholchil ding independent body khat kisemdoh ding, muona neiho akimatdoh tengle atotohchet’uva guotna kipe ding’u ahi tin jong aseiyin ahi.

Tuni kinguon a chun Works, RD&PR, Commerce and Industries, Power and IPR Minister Th.Biswajit ; MAHUD, forest and Environment and Horticulture and Soil Conservation Minister Th.Shyamkumar; Imphal Municipal Corporation (IMC) Mayor Soram Sunil chuleh Senior women vendor Ch.Ibemnungshi in pan ala’uvin ahi.

Th.Shyamkumar in kinguon a ahoulimna’a chun Imphal khopi sung jep hoi nading le Ima Keithel thengsel’a koina ding’a mejoh nupi hon sorkar kithopina apeh ding’uvin temna aneiyin ahi.Th.Biswajit in ahoulimna a chun Ima Keithel No.2 le 3 hi  tukum September lha masang’a kisemchai ding ahitai tin aseiyin ahi. Chuleh Tombisana High School complex sung’a market shed kisathah jong agangtheipen’a kisachai ding ahi tin aseiyin ahi.

Bandh leh blockade jeh’a niseh leh dangka 2,616.23 crore mang ahi: Serto

Imphal, Apr. 9: Social researcher Serto Tondana Kom in asei dungjuiya economic blockade, bandh leh strike aum chan’a state hi nikhat’a dangka 1672.9 crore mang ahi, tin aseiye.

Serto Tondana Kom in thuso miho akimupi na’a chun survey hi expert tamtah toh vetkhomna um ahi, ati. Census report 1991, 2001 leh 2011 dungjuiya Manipur population hi agom’a lakh 18, 22 lakh chule 28 lakh ahi. Decadal population growth rate hi 4.56 lakh-5.61 lakh’a um ahi’in, annual average growth rate hi kum khat’a  61,475  ahi. 2016 kum’a Manipur’a mihem cheng jat 31lakh val ding’a tahsan ahi.

Labour Ministry in nikho tha asem anempen hi dangka 280 ahi’in, Manipur Police Intelligence Wing’a kon kim data dungjuiya 2016 kum’a ni 116 bandh, strike aumin chule tukum March lha chan geiya bandh leh strike hi ni 11 um ahi. 2016 kum’a economic blockade nikho 103 um’a chule tukum March lha chan’a ni 76 um ahi. 2016-17 Manipur prohected per capita income hi agom’a 67,207 ahi’in, bandh jeh’a mang’a (loss) niseh nikho tha 280’a isim leh agom’a 13.18 crore lhing ahi.

2016 kum’a bandh leh general strike jeh’a dangka 1,528 crore  mang’a chule tukum March ha chan hi 144.9 crore mang ahi, tin Serto in hilchenna aneiyin ahi. All Manipur Road Transport Drivers and Motor Workers Union general secretary M Anil Meitei in asei dungjuiya nikhat’a thil kipohna truck 360 hi gamsung’a kitol lut ahi. Economic blockade jeh’a state sum mu nading hi tukum 2016-17 March lha chan’a 943.33 crore mang ahi, ati. Bandh leh general strike chule blockade jeh’a gamsung aman jat hi agom’a 2,616 crore ahi, tin Serto in aseibe’e.

2010 kum’a kumkhat’a ni 365 um ahi’in, nikho 224 hi bandh leh blockade um ahi’in, gamsung’a bandh leh blockade hi umjing ahi, tin Serto in aseiyin, chule survey kibol jeh’a mi phabep in khahdohna anei thei leh survey kibol hi aga um’a kila ding ahi, tin Hermongtlang kho, Samulamlan Block, Churachandpur’a cheng Serto in aseibe in ahi.

State Labour and Employment department’a dan kijui lou

Imphal, Apr. 9: Manipur sorkar thah in nehguh suhmang nading leh kivaihomna akitup nading’a pan chom chom ala in, ahin, sorkar in pan sangtah alah vang’a department phabep’a thengtah’a na kitong kiti hi totna tobang in aumin ahi.

Achesa 2016 kum’a kon Labour and Employment department’a Principal Secretary koiham ti kicheh loulai ahi’in, Manipur Building and Other Construction Welfare Board’a chairman kilheng thu’a jong tuso umlou ahi. State government notification No. 5/254/97- Lab (Pt), dated November 16, 2015 hi kisempha em ahilouleh angai ham, tijong tamtah in thudoh anei ahi. Thulhut dungjuiya Suhel Aktar hi Additional Chief Secretary’a akaisang jouva fund lahna ding’a Principal Chief Secretary hilouva akaisang na hi aman ahi’in, government guidelines toh kitohlou ahi.

Board in 14/4.2016 nikho’a toukhomna 9 channa aneina’a kilolna number 6 (ii) asem dungjuiya Skill Development Training, Registered Building and other Construction worker leh ajite chule  achate kilhenna (selection) hi Welfare Board in abol masat ding, hiche jouteng training pe hon abol ding ahi. Thulhut dungjuiya Additional Chief Secretary Dr Suhel Aktar hin Principal Secretary, Labour atuh nahlaiya chule E Tomba Singh in acting Secretary, Manipur Building and Other Construction Welfare Board atuh ahi. Skill Development Training’a ding’a applicant khat bou aum’e, tihi member hon ahet vang’a sum tamtah sanction kibol ahi, ati. Mi ijat in apply abol ham, tihi tu’a thudoh um ahi.

Inspector, Labour Department, I Subashchandra, Additional Chief Secretary Dr Suhel Aktar chule Secretary E Tomba chung’a case thukholna anei uva hi dangka 1,75,000 kiman ahi. Sum hi receipt lhem’a kila ahi. Labour Department Inspector in dan jui louva applicant ho card ahom’e, ti thulhut jong um ahi. Aktar leh E Tomba in sum thu’a soi kaina aneijing nahlai ahi. Amahi financial transaction ho’a soi kai ding’a alhing poi, ti ahet nung uva jong bureaucrat hon dan apalkeh hi thudoh lentah ahi.

Cha ni val neiho sorkar natoh kipelou ding; numei ho university level gei manbeiya themjilna kipeding

 Guwahati, Apr 9: Assam government in tuni chun chani val nei ho sorkar natoh pehlou ding chuleh gamsung a um numei chapang jouse university level geiya manbeiya themjilna pehna ding’a kisem draft population policy phondohna aneiyin ahi.

“Draft population policy  dungjuiya  hi cha ni val neiho sorkar natoh kipelou ding ahi. Employment generation scheme  beneficiary dingho jong cha ni val neiho hithei talou ding chuleh state election commission noiya kibol panchayats election, municipal body election chuleh autonomous council le election dang dang ho’a candidate ding ho jong cha ni val neiho hitheilou ding’u ahi” tin Assam Health Minister Himanta Biswa Sarma in tuni thuso miho toh akihoulimna’a aseiye. Chuleh Cha ni a pat anoilam nei hon sorkar natoh amuteng’u le anatoh’uva kon akichol gei’uva cha aneibe theilou ding’u ahi. Ihamti’a sorkar natong khat touvin cha ni val ahin neiya ahile anatoh’a kon kihaisah ding ahi tin Health Minister in aseiyin ahi.

Numei ho themjilnalam’a tilkhouna ding’a university level gei manbeiya themjilna kipe ding’u ahi. Hiche keu hilouva achele avalena ding’u, lekha , hostel a umho mess fee chuleh aschool fee’u jong sorkar in apohdoh ding ahi.

Sarma in aseidan in population policy hin numei chapang ho le pasal chapang ho matah’a jineina’a kon apuidoh ding chuleh drop out rate jong hatah’a akhehsuh sahding ahi ati.  Hiche scheme dungjuiya hi akum lhinglou’a jinei hon jong sorkar natoh amulou ding’u ahi.

Himanta Biswa Sarma in aseidan in hiche scheme noiya hi  numei ho government natoh le election a 50% seat reservation kipeding’u ahi ati. Hiche policy chepi ahitheina ding’a hi department 48  service rules thahsem ngaiding ahi.

“Hiche scheme hung kipohdoh hi medical-led policy a kon socially responsible policy a kikhelna aumthei ding kideisah jeh ahi. Behavourial change akideijeh’a polic incentives  semdohna ding na hung kitong ahi. 2011 census dungjuiya Assam population hi 3.12 crore ahi. 2001 kum’a chu Assam population  2.12 crore bou anahi ahi” tin Sarma in aseiyin ahi.

‘Compilation of Six Days War in Gangte’ Lekhabu hondohna um

Imphal, Apr.  9: Tuni chun Gangte pao a Mangkhuo Gangte lekhabu sut ‘Ni Gup Gal’ (compilation of Six Days War in Gangte) chu Ng. Joseph Gangte, IRS, Joint Commissioner (Income Tax), Imphal Region in The Excel Foundation Academy, Hq Belam Veng, Churachandpur mun ah thensona anei tai. Rev. Mangkhokam Gangte in lehkhabu Pathen koma lhandohna a na nei pai e.

Houlimna anei na ah, Ng Joseph Gangte, IRS in hiche lekhabu hi Gangte literature khantouna dinga manchah ahi keo hilouva hiche lekhabu min asim a kona khantouna leh kipumkhatna lam a masonna anei ding a tahsandan ana phongdoh e.

Upa (Dr) LS Gangte, Dr LS Gangte, Director, Outreach Centre, Sangai International University, in welcome address a sei jouvin, Soizalal Thongjom, Retd ZEO in keynote address giltah in ana seiye.

Lekha sunpa, Mangkhuo Gangte in a houlim naah, hiche lekhabu hi Pathen in israelte ana puidan leh Pathen a thutem ah a tahsan um e ti phondohna ahi. Koi nam/gam hijong leh Pathen nei ho chu leichunga mi ja leh gin achanna ban a phatthei boh a um ding ahi dan u a muchet thei e, ati.

Lamkai dang houlimna neiho chu T Dongzakai Gangte, social worker Mangcha Gangte, S Lalpu Gangte, chief of Bunglon ho ahiuve. Chuleh, lamkai tamtah in jong hiche kin hi ana uop uve.

Hiche lekhabu hi Upa Letkam Gangte & Family in publish a bol ahin, manlhomcha (Rs 80/-) a choh jing thei ahi. Gah hetthei chu, Mangkhuo Gangte hi monthly magazine ‘Huihchim’ a regular contributor ahi.

Keisham Babita Devi in “Vasundhara NE Woman Entrepreneur of the Year” award sang

 Guwahati, Apr. 9 : Pragjyoti ITA Centre for Performing Arts, Machkhowa mun’a April nisim 8 nikho’a kibol kin-gon’a Nagamapal Paonam Leikai, Imphal West’a cheng Keisham Babita Devi in ‘Vasundhara NE Woman Entrepreneur of the Year”, (for Manipur, 2014-15) asang in, Ram Muivah, NEC Secretary jong apang in ahi.

Sreemanta Sankar Mission, Guwahati in abol kin-gon hi NE’a entrepreneur numei ho thepna hetpeh nading ahi. Keisham Babita Devi hi entrepreneur ahi’in, amanu hin kauna hampa leh natural fibre dan dang amankhom’a, gamsung’a kon apohdoh’a ajoh ahi. Kauna grass le palm, jute, shital leh adang dang ho ahal khom ahi. M/s Natural Textile and Collection hi ama unit ahi’in, 2005 kum’a kisemdoh ahi.

Vasundhara NE Woman Entrepreneur of the Year Award hi NE India’a kon numei entrepreneur 8 nominate kibol ji ahi’in, amaho lah’a kilheng lha kit ahi’in, award dangka 25,000 leh trophu, eri del chule plague pang ahi. Tukum ‘a jury in nominate abol awardee hohi Radha Devi Gurung  (Sikkim), Taba Yall Nabam  (Arunachal Pradesh), Kevisedenuo Margaret Zinyu (Nagaland), Keisham Babita Devi (Manipur), Zoramchhani Ralte (Mizoram), Sumitra Debbarma (Tripura), Janessaline Mary Pyngrope (Meghalaya) chule Najitara Bori (Assam) ahiuve. Sreemanta Sankar Mission of Guwahati hi 1986 kum’a kisemdoh ahi.

Arunachal Pradesh: CM bungalow Guest House ding’a kithensuo

 Itanagar, Apr 8: Thilha chenna In dan’a anakisei  Arunachal Pradesh Chief Minister’s Bungalow  chu Friday ni chun State Guest House ding in semdoh ahitai.  State Guest House hondohna kinguon kibolna’a chun hou le bih lamkai  phabep in lhagao phalou umho nodohna ding in taona anei’uvin , Guest house chu achohlha jeng in ahi.

Kinguon a chun Minister for Urban development and Town Planning,  nabam Rebia le Chief Secretary Shakuntala D Gamlin  in jong pan ala lhon in ahi. Rebia in kinguon a ahoulimna’a chun , houlamkai hon taona anei’u hi pathen heng’a vang thumna ahi’n lhagao phalou nodohna ding ahipoi tin aseiye.

Chief secretary, Shakuntala Gamlin in  kinguon a ahoulimna’a chun , tunia kithenso State Guest House hi gampam’a kon kholjin’a hungho kicholdo namun ‘a kimang ding ahi ati. Chuleh civil service officer ho training bolna’a jong kimang ding ahi tin aseiye. State Guest House hi Niti vihar molvum ‘a um ahi.  Bungalow hi Chief minister umna ding’a 2007-08 kum’a chu ana kisapan’a 2009-10 a chu Dk.59.55 crore lut’a ana kisemchai ahi. Bungalow sung hi lhani sung’a mi ni ama le ama thakitha jouva akimvel’a chenghon thilha chenna hiding’a ahin ginmo pan’u ahi. Geldoh thei khat chu august nisim 9, 2016 nikho a chu Chief Minister lui Kalikho Pul in bungalow sung’a hi  amale ama hinkho ana kilah ahi. Chuleh October nisim 8 , 2016 nikho a chu bungalow staff khat  in ama le ama hinkho ana kilah kit ahi.

Thilsoh teni hi gamsung miho’n Chief Minister Dorjee Khandu le Jarbom Gamlin  thina toh akimatna aum’e ti’a ahinsei’uva , phat che dungjuiya amaho thina hi bungalow sung’a lhagao phalou khat in aboldan’a thulamleng hung gingdoh ahi. Ahinlah  Khandu hi atouna helicopter in toset atuojeh’a anathi’a Gamlin hi ahile natna khat jeh’a ana thi ahi.

Bungalow sung’a natong hon aseidan’un bungalow sung a hin lhagao phalou khat achatloh jing in ahi. Amahon aseidan un jaankim don le michagin, kagin chuleh hamgin ho akijaja in abang kom kom le alarm ho acham in ahung gingji’uvin ahi. Chief Minister Pema Khandu in Chief Minister Bungalow luo louva munchom a aum hi hiche thilsoh ho jeh jong ahiding mitampi in ginchatna anei’uvin ahi.

Dibrugarh University simlai khat in UNESCO a kon’a kouna mu

Dibrugarh, Apr. 9: Dibrugarh University a Electronics and communication engineering department a 3rd Year simlai Amlan Jyoti Kalita in World Federation of UNESCO leh Zervas Art a kon’in ‘4th Athina Art Fair’ kiti International Painting Symposium a ding’in kouna amu’n ahi. Hiche kingon hi April nisim 22-28 sung Athens, Greece a Hotel Bomo Club a umding ahi. Amla hi India a kon’a kouna mu mi 2 lah’a khatna ahi.

Amahi Goalpara a cheng ahin Art lampang’a alunglutna ahin neihi kum 15 alhingtan ahi. Amahin Art lampang ah formal degree neihih jongle award phabep anakisan tan anatoh lampang’a gunchu tah’a pan alahjing jeh’in mi tampi seiphat jong achang’in ahi. University sung seh’a bou hilouvin Amla hin State leh Northeast level ah jong award tampi asangtan ahi. Dibrugarh University campus leh Guwahati a Rabindranath Bhawan a exhibition kibolna ho ah Amla in ama natoh (painting) phabep jong vetsahna aneiyin ahi. ‘The heart of art’ kiti USA in agon Leiset chung a online art contest ah jong Amla hi 218 channa in apang’in ahi.

Athens, Greece seh hilouvin Amlan Jyoti Kalita hin Russia leh Spain a International Symposium kibolna ding ho’in jong kouna anamu’n ahin boina phabep ananei jeh in pan anala thei tapon ahi. Ahin tuchung Athens, Greece a umding symposium a hin sum dinmun hahsatna neijongle pan latei ding’in kigotna sangtah aneiyin ahi.

Chapang thum twikul a khelut

Itanagar, Apr. 9: Sunday  nichun Tripura sung  kho khat nah kum 10 – 17 kikah hiding  ginmo chapang  thum twikul  ah ana khelut un anathi den uve tin police ho’a kon kimu thulhut chun  aseiye.  Hiche chapang thum hohi ball(peh lum) holla ache nao’a hiche twikul’a hi khelut kha uva thiden ahidan jong aphong doh uve.Doctor hon kholchil na anei naovah chun hiche chapang thum hohin poisonous gas hiche twikul sung kon’a akihop lut jeh’a thi ahi ati.

Hiche thilsoh hi northern Tripura, Agartala sate capital’a kon na 120 km a gamlha Chawmanu kho mun’a thilsoh ahi.Police hon hiche thu’a kholchil na anei nao’a chun  hiche chapang thum ho hi school ground’a football kichem ahi uvin a ball uchu alen doh phat ‘a  aholla  ache nao’a hung khelut kha ahiuve ati.

Athi chapang thum ho chu Bratajoy Ashlong (16), Dhahari Tripura (10) chuleh Harendra Tripura (17) ahiuve.Amaho lah’a Bratajoy kiti pa hi Tripura team member ahi naban’a ahung lhung ding national atheletic meet a pan lading chapang ahi ati.

Hapta khat sung’a nat na kihelou dammo na’a chapang thum thi

 Kohima, Apr. 9 : Tu hapta sung in Chessore , Tuensang district noiya um kho khat’a nat na kihelou dammo najeh in chapang  thum ana thi tan chu naban in chapang  tam tah injong hiche tobang nat na anei jeh in kho mipite kicha tah in aum gam taove.

Chessore kho hi family 580 chen na mun ahin weather hung kikhel jeh in chapang tamtah anat na kihelou vin aum gam taove ati.Hiche nat na symptoms hi losoh,tisat leh eh kho ahi naban in chapang thum injong thi nachan atoh tan ahi.Athi lah’a khat chu kum 4 pasal chapang mission school-St Christopher School a kai simlai ahin, khat teni hi kum 2 noi numei chapang ahilhon’e.

Chessore kho to kimat kho kom’a chun Primary Health Centre (PHC),staff nurses ni aum in ahin doctor lhing jou aum lou jeh in anat na chu apet pet in amandoh jou pouve tin kho mipi hon aseiye.

Chessore town PHC, aum vang in kum ni tobang doctor um lou va ana um ahitai,hiche mun’a  doctor hung posting pa jong study leave akilah naban in  ama khel ding koima jong ahung poi tin  Allen,Chessore  Baptist church Pastor pan aseiye.

2011 census dung jui in Chessore kho’a chapang kum 0-6 hi 680 aum in ahi,hiche kho sung’a hi chapang 23.60% aum’e tin jong aseibei.

Thusoh Lahchom

Parking Lot

Imphal, Apr. 9: Government of Manipur, Directorate of Transport a kon thuso kimu dungjuiya; Khuyathong le Maharani Bridge kikah’a Nagamapal mun’a Naga Nallah area lah’a mun-ong jouse tunia kipat LMVs, Two Wheelers le three wheelers hodia “Parking Lot” a phondoh ahitan chule hiche thupeh hi thuso thah aumkit tokah’a kijuiding ahidan H. Rosita, Director of Transport, Govt. of Manipur a kon thuso akimun ahi.

CM Ukhrul’a kholjin ding

Chief Minister Nongthombam Biren Monday nikho leh Ukhrul district’a kholjin ding ahi. Ukhrul’a um civil society organisation hon tu masang’a CM loppeh na kin-gon man ding’a phondohna aneiyu ahi. Ahin, TNL kiloikhomna in ‘reception programme’ kibol louding ahi, hijong leh khat in abol nom leh ki doudal louding ahi, tin asei uvin ahi. Hetthei khat chu kum 15 sung’a Manipur Chief Minister Ukhrul district’a hitobang kin-gon akigon peh na masapen ahi’in, tu masang’a government minister leh CM ho cso chom chom in boycott abol jing ahi.

Pukhri’a thi-long kimu

Keishamthong Elangbam Leikai, Imphal West hopsung’a um Khabam Lakpam Mandop ‘a temple ni kikah’a um pukhri khat’a Saturday jan nidan 10 don in twiya thi mikhat akimudoh in ahi. Pukhri’a mi lhahlut gin vengsung mihon ajah’a adel lut-u ahi’in, pukhri’a koima amudoh louvu ahi. Naicha avet uleh pukhri’a sandal ni twiya kiletdoh amu uva chule mi phabep in pukhri pam’a nidan phabep masang’a upa khat atou amu ahi. Pukhri’a thi-long khat amu jou uva vengsung mihon police ho hetsahna anei uva, police hon thi-long alahdoh ahi. Aadhaar card kimu dungjuiya athi pa hi Takhellambam Joykumar, Sega Road, Takhel Leikai’a cheng ahi’in, thi-long police hon RIMS’a akoi tauve.

Memorandum 

2013 batch Manipur Police Constable candidate hon Sunday nikhon Keishampat’a kon Chief Minister Bungalow chan kijotna anei uvin, recruitment test kichai sa result hi apet pet’a aphon diu thumna memorandum apelut uvin ahi. All manipur DPC Completed Candidate of Police Constable hon kijotna anei ahi’in, Nityapat Chuthek kom’a police hon alamtin uvin, mi phabep bou Chief Minister heng’a memorandum pelut ding’in aphal peh uvin ahi.

Editorial

Thinglhangmi ho Mejoh nadi mun

                                   Imphal khopi lailung tah a mejohna  mun (bazaar) – Khwairamband bazaar jong hi anoh tah jeh-a Imphal Municipal Council (IMC) in tounadi mun ‘license’ neiloi hose nodoh di ati hi koima vetdana tum chuom jong hiloudi ahi. Hiche Khwairamband  bazaar (Ima keithei) a tounadi mun kichuna hi athahbeh hilou, khatvei veileh kiboina umjingpeh anahi-e. Kum che dungjuiya thiljoh jong tambe, achodi jong chutima ahi. Chubang’a Gari jong tambe jing ahijeh a khopi sung hi noh cheh cheh jeng ahi. Tua kiboina pen hi khopi sung’a lamlen laitah ham, lamlen pang’a mi chenadi (footpath) hoa anche louhing leh von dang dang joh ho hin khopi sung asuhnoh cheh ahi. Khopi sung ahia, khopi pam ahia lampi hola kikehlen lou ahijeh-a khopi sung, bazaar ho dehdeh lampi hoa Gari ho aki-ngahdimsetji kitleh chele bazaar kai ho keng’a valenadi jong ongthei jilou ahitai. Hitobang hahsatna hi khopi dang dang’a jong umsohkei ahin Imphal khopi sung boina bou jong ahidehpoi. Ahin hitobang dinmun lhung ahitah leh govt injong mejoh ho ham bou suhno touno athole sang’a bolthei dang ipi um’am ti agel’a natohna anei ngaai ahi. Khopi sung le vengsung lamlen ho anohna hi Gari Parking mun umlou jeh ahipen jeh-a Gari Parking hi khopi sung’a bazaar thupi umna lah-a leinuoi a-pat achunglang indan 4 changei beh gari ki-ngahnadi mong-mong inn khat sahthei ahi. Chuban’a lamlen nohna (traffic congestion) mun hoa ‘Fly-over’ sahbe tilou lampi dang umtheilou ahitai. ‘Fly-over’ mun 3 beh leh Parking di inn thupi mun 2 beh a kisaleh tua mipi hahsatna ho ichan ham’a beidi ahi. Govt dia hitobang sah hi hahsa dehloudi khat ahi. Market (thiljohna di inn) vang khopi lailungtah a kisa ahitan tu tua kimanglou, ningkum kumbul ling kiho in anasuhset indan ni’a kisasa hi sahphat (repair) ahilaitah ahijeh a jong chomkhat tadi a dia lamlen lampang ti umlou, anomchan’in mun ong-ong aluo’a joh thei thei ajoh jeng dan’a umdoh ahi.

                       Bazar a tounadi (thiljoh nadi) ‘license’ hi IMC in koi koi, koi tabang bang apeh ham ti jong kichiehlou hiteidi ahi.  Thinglang district (Imphal pam) hoa kon’a anche louhing leh thil dang dang niseh-a Imphal a hung kipo hohi apo, acho, alason umlouva ahitheilou jeh-a hitobang mun kisuh ngaai ahi. Imphal Checkon a Tribal Market hi anche louhing po’a kivei thinglhangmi jousen ahinjuot uva hilaiya kon akilahson dihon akichoh uva phadi ham ti jong gelthei ahi. Thinglhangmi mejoh ho mun akipepoi akitileh govt in “tribal market kisa a khula em” atithei ahi. Chuleh govt nin thinglhang district hoa Market sahnadi dangka Crore khat leh akeh (1.5 crore) akikoitai ati hi thinglhangmi hodin Imphal joh ah kisa henlang thinglhang district ho ah thil koikholnadi “Cold Storage” joh kisaleh kijenjo maitheidi ahi. Thinglhang’a mejoh nadi mun haboilou maithei ahi.

Blankfire

Thuso a minchon jong hi adeia dei athanopma thanom tam ahi. Bong gu jong sai kap jong news a minchong thei ahi. Bong guh thua news a iminchon sanga saikap jeh a imin kitahlangdi thanop umdi ahin saikap sanga bong guh thu atamjohji hi aboina ahi.