ET April 1, 2017 News (Local, Thusoh Lahchom, Editorial, Blankfire)

ET April 1, 2017 News (Local, Thusoh Lahchom, Editorial, Blankfire)

685
0
SHARE

Cabinet in twilet thu’a toukhomna nei; kiginna leh kithopina pe

Imphal, Mar. 31: Manipur Cabinet in Friday nikhon nikho phabep go juh kijom jeh’a twiletna dinmun vetsui ding thu aseikhom uvin, gamsung’a twilen toh kisaiya boina ho vesui ding’a action committee semdoh ding’in kihouna anei uvin ahi.

Toukhomna hi Chief Minister Nongthombam Biren Singh lamkaina’a Conference Hall mun’a chelha ahi’in, Committee chairman ding’a Irrigation and Flood Control Minister alheng uvin chule Chief Secretary in convenor panmun atuh ding ahi. Member’a hi IFCD, PHED, PWD, CAF & PD, Minor Irrigation, health, department luboh ho, Disaster Management secretary leh Deputy Commission jouse pang diu, chule Committee in twilen na ho avetsui uva, kithopina ding’a pan alah diu ahi.

Irrigation and Flood Control Minister Letpao Haokip in achesa nidan 24 sung’a go ju’a millimetre, vadung ho khan dan chule vadung pang kiting ho thu aseiyin ahi. Khoyathong mun’a mipi in hehna asem nathei ding telephone number 2451550 leh 2450195 hondohna kinei ahitai.

Deputy Commissioner in twilet namun jouse avil’a report apeh ding’in Chief Minister in thuhilna aneiyin chule relief camp sem nathei dinmun khohse pen ahol diuvin aseibe in ahi. Vangsetna toh ho don ding twitheng leh kithopina thil ho peh ding thu aseiyun chule kiginna neijing ding ‘in aseibe uvin ahi.

Govt. in KSO Gunpi Block President le akilhonpi pa thading guo ho tuchan’a amatdoh lou jeh’a KSO-CDL lungkimlou, Dateline ding’a April nisim 3 teppih’u

Chandel, Mar 31(ET): Achesa January nisim 1 ni’a Kuki Students’ Organisation Gunpi Block President Janglam Guite le akilhonpi Bolero driver Jamchinthang Manchong thadia ana guong (Life attempt) ho tuchan’a State government in amatdohlou lai jeh in Kuki Students’ Organisation, Chandel in tuni chun alungkimlounau ahin phongdoh uvin ahi.

Hetthei khatchu achesa January nisim 1 ni’a chu KSO Gunpi Block President Janglam Guite le akilhonpi Bolero driver Jamchinthang Manchong chu KNLF/KNO cadre hidia ginmo hon Kangvai mun’a thading anaguot’u ahi.

Hiche thilsoh toh kisaiya mona neiho akisaipi mopohna neihon amatdoh nadiuva KSO Chandel le District CSO hon vel ijat ham khat ngehna anei ahitan, hinlah state government in tuchan’a mona neiho matdoh nading in tohguon ima anei naipouvin ahi. Hiche thilsoh toh kisaiya state government in anahsah lou dan hi KSO Chandel le district CSO hon nasatah in akigelkhom in, hitoh kilhon’a achesa March nisim 29 ni’a KSO Chandel in ama block unit ho toh Kotlenphai mun’a General Assembly aneina’a chun ahunglhung ding April nisim 3 hi government heng’a dateline ding in ateppih uvin ahi.

Hiche thu toh kimat’a mona neiho April nisim 3 kah’a akimatdoh loule KSO Chandel in Block unit ho toh kitho’a kiphinna khoutah kinei ding ahi tin KSO Chandel General Secretary min’a kimu lekhathot chun atahlang in ahi.

Gah hetthei kahcthu achesa January nisim 1 ni’a chu KSO Gunpi Block le akilhonpi Bolero driver pa hi Kuki Society thu toh kisaiya kihoukhomna ding kin khohtah khat’a Churachandpur jon’a che hon ahin, KNLF/KNO cadre hidia ginmo hon nilhah lang nidan 3 vel’a Kangvai munna ana mat tan uva, ajep jou nung uva akeng le alu anakap pih’u ahi. KNLF/KNO cadre hidia ginmo hon ami mat teniu chu athi dan’a agel uva adalhah jou nung uva, akiman tenin kho ahin het hon ahin, hiche jouva chu Imphal lang’a jendia ana kipo phei hon ahi.

Guv. in phai sung’a CCTV ahiding bang a aum lou jeh’a Enquiry umsah dia phong

Imphal, Mar. 31(DIPR): Dr. J Suresh Babu, Addl. Chief Secretary (Home) Govt. of Manipur in tuni (March 31)  Governor Najma Haptulla min’a order aso dung jui in achesa  Plan  2009 – 2010 leh 2010 – 2011 a Home Department Manipur in Raj Bhavan, CM Bugalow leh Bazar mun phabep’a CCTV choh nading,install bol nading chuleh function nading in dangka core 8,01,54,775 sanction ana bol tan ahilah bazar mun phabeb a CCTV akimang cha theipon chuleh choh ding jong aning lhing joupoi.

Tu leh tu jong bazaar mun phabeb ma CCTV kikoi ho pan nabei tobang in aum gam taove ti hi Home Department heng ah thulhut akimui. Hiche dungjui’a hi Govt. in hiche chunchang a enquiry umsah ding in phondohna aneitai tin Addl. Chief Secretary (Home) order chun aseiye.

Hiche toh  kilhon in Govt. in enquiry committee umsah ding in asei in hiche dungjui’a Enquiry Committee ding ho chu Promod Ashthana, IPS, ADGP (Chairman), Sumant Singh, IAS, Secy.(RD & PR) (Member) chuleh Clay Khongsai, IPS,IGP (Member) ahiuve.

Amaho hin hiche project a dia tender  ipiti anabol u ham,CCTV jong iti achoh u ham,iti install ana bol u ham chuleh commissioning  jong  iti lam dol’a anabol u ham tiho ahin kholchil diu chuleh hiche natoh’a hi koipen amopo ham tijong ahi holdoh diu ahi.

Hiche order kiso ni’a kipat nikho 15 sung’a hiche chung chang report ahipeh diuvin Govt. in Enquiry Committee heng ah hetsah najong anei in ahi.

TKSU Manipur in Education Cell hongdoh

B.Lalboi Gangte

CCpur.  Mar. 31 (ET):    Thadou- Kuki Students’ Union, Manipur kiloikhom na President Lalkhohao Chongloi soikai na Press Statement kimun asei na ah; 3 March 2017 nikho’a TKSU G Hq, General Assembly toukhom nikho’a kithulhuh na dungjui in Prov. 4:13 “Education is Life Guard it Well” ti kipansa ah  Education Cell semdoh ahi ati.

Hiche hin Manipur gamsung’a themjill na inn ho’a Free Education leh Education quality apohlut nading’a Education Cell kipodoh ahi toh kilhon’a TKSU’s Branches jouse’a President leh Secretary ho Members hiding ahi ati. Chuleh hiche TKSU Manipur ah Education Cell ah mopoh na chang lamkai kilhengdoh ho chu, Samuel Thongminlun, John Baite, Lenboi Haokip, Lamjaneng Haokip, Boishi, Esther,  Lelien Haokip, Grace,  John Lucas Baite,  Khakhai Haokip chuleh Convenor  Kakai Doungel Secretary Education, Co-Convenor Thangcha Haokip Secretary External, Convenor Secretary Lenboi Haokip Secretary Development ho cheng ahi.

Nemcha kipgen in social welfare minister panmun ahinmu loppeh na kingon kibol

Kaybie Chongloi,

Kanggui, Mar. 31: 50-Kangpokpi A/C  MLA Nemcha Kipgen in Social Welfare and Co-operaton Minister ahin mu kipapi vetsahna’n tuni chun achenna mun Ngahmun, Kangpokpi district’a Central Electoin Committee in kipapina le patheng heng’a kipathuseina kinguon ana bol in ahi.

Kinguon a chun Rev.Y.Haokip  Blessing and Thanksgiving Minister in apang in ahi.  ADC Sadar Hills Chairman Haokholal Hangshing, MDCS ho, Social worker ho, CSO  ho , Kangpokpi Town Committee chuleh local body hon kipah thanom tah in kinguon a chun pan ala’uvin ahi.

Tuni kinguon a chun kipa vetsahna’n Central Election Committee BJP 50-Kangpokpi AC in akimvel’a um kho jouse Ponsil San khat cheh ape in chuleh Central Election Committee member ho, Sub Committee ho chuleh Polling Agent ho jouse jatpon’a kisem ngong-aw khat cheh a awpeh in ahi.

Social Welfare Minister, Nemcha Kipgen in ahoulimna’a chun pathen hatah in athangvah in ahi. Aman aseidan in Pathen hi ima jouse bolthei ahi’n, thangvah jing ding’a lomtah ahi ati. Chuleh Kangpokpi AC mite in jong achung’a tahsanna lentah aneina’u chung’a akipana aphongdoh in ahi. PM Narendra Modi, State BJP  chuleh Centre in Social Welfare Minister  panmun ahin peh jeh in jong akipana aphongdoh’e.

“Tuni  nikho hi Kangpokpi AC mipi te ding’a kipana nikho loupitah khat ahi. Ajeh chu achesa kum 55 sung’a chun Government ministry a Kangpokpi AC hi thalheng ana neilou ahi. Chuleh kum 40 val districthood ding’a ngehna hung kineiho jong pathen mapuina jal in alolhing tai” tin Rev.Y.Haokip in ahoulimna’a chun aseiye. Pathen vangbohna ho le phatthei naho hi ahina ding bangtah a imanchahlou’a ahileh pathen lunghan na jong sohthei ahi tin Y.Haokip in Minister nu le akikhom lamkai cheng agihsal in ahi.

Ks.khaie leo, National Secretary, in-charge NE States (Nagaland & Tripura) le Co-in charge Manipur, Assam, Mizoram Schedule Tribe Morcha in ahoulimna’a chun   Nemcha Kipgen in Social Welfare Minister panmun amu thei hi pathen agin jeh ahi tin aseiye. Kinguon kichailam chun akikhom mipi ho le lamkai cheng in an-kuong asoh khom’uvin ahi.

Lamlen tuosetna umkit, nupi 2 jaona a mi 5 hatah’a kitongkha

Chandel, Mar. 31(ET):  Manipur gamsung’a lamlen tuoset na aumjing toh kilhon in tuni jong chun Tengnoupal district a lamlen tuoset na jeh in nupi 2 jaona in mi 5 hatah’a in ana kitongkha in ahi.

Tuni tuoset na thilsoh chu Tengnoupal Police Station huopsung Tengnoupal le New Samtal Road kikah Chahmol kho kom’a anasoh ahin, hiche a chun nupi 2 jaona in mi 5 hatah in ana kitongkha uvin ahi.

Amun’a um ho a konna thulhut kimu dungjuiyin; Phoilen juonding passenger agri Tata-Sumo (Gari No. 05K 0329) khat in tuni nilhah lang nidan 2:30 vel’a chu Chahmol le Angbrasu kikah’a tuosetna anatuo ahin, hiche tuosetna a chun Jangminthang Khongsai (24) (Driver) s/o (L) Thangkhanlal Khongsai,  Seiboi(20) s/o Houkam, Hoikhoneng w/o Haokholet , Phaibungkot near Sehlon village, Phaneng, Sehlon village le T. Haokip s/o (L) Letkholun , Tuinom Ccpur ho cheng chu hatah’a in ana kitong khauvin ahi. Kuki Students’ Organisation Tengnoupal hon thilsuo namun anadel lut uvin, akitongkha ho chu Tengnoupal Dist. Hospital a ana pohlut uvin ahi. Hiche thu kisut chan hin akisukha ho dinmun akhohset cheh cheh toh kilhon’a tunilhah lang chun Imphal lang’a din ahin po phei uvin ahi.

HSLC Exam bol simlai 17 kinodoh

Imphal, Mar. 31: Board of Secondary Education Manipur noiya HSCL Examination, 2017 kibol na ah Centre mun 11 akon Simlai 17 ana kinodoh in ahi.

Hiche simlai kinodoh ho Roll No le Centre hou chu, 24142  Heingang Centre, 24503 Sawombung Centre, 31268 Khongjom Centre, 32195 Khangabok Centre,  22170, 22051 Saparmeina Centre, 211, 22754 Kangpokpi Centre, 160, 16226 Chandel Centre, 281 Nambol-B Centre, 64 Chandel Centre, 14871,14872, 14873,14514, Noney Centre leh 36599 Wangoi Centre ahiuve.

NH-2 lamlhuong Keithelmanbi area lah’a Gari mangcha’a lamlha ho kilamtin, driver pa ki gimbol, numei ho kigih, CSO hon demna nei

Kangpokpi, Mar 31 (ET):  National Highway-2 lamlhuong Keithelmanbi area lahvel’a lamlha ho ana kilamtin’a kibuluna thilsoh ana umjing chu tuni jong chun avel’a anasoh kit in ahi.  NH-2 lamlhuong a Keithelmanbi area hi mi kichom, gari tol ho’a heng’a sum demand, gari tol ho gimbol na le thilphalou dang dang ho jeh’a achesa kum 2 masang’a konna chu thusoh ho’a Keithelmanbi area hi ana minchuong jing ahi.

Hitobang thilsoh ho aumjing toh kilhon in Senapati District Women Association in demna thuphon sangtah ahin nei naban uva akisaipi mopohna neihon hiche area a gari mangcha’a lamlha hon boina atuojing’u suhbeina dia pan alahdiuvin jong ngehna aneiyun ahi.

NH-2 lamlhuong Keithelmanbi area bolgimna anatoh kha khat in aseina ah; achesa march nisim 27 ni’a chu melhetlou mi 3 in atounau Tata-Sumo chu anakham uvin, mi 2 in gari driver pa chu lampi side langkhat’a apuidoh uvin chule hatah in anavo uvin ahi. Chule midang khat in Gari sung’a tou numei ho chu ahung kumlhah lou nadiuvin anagih in ahi. Numei ho chu abon uva mi 15 ahiuvin hinlah vangphat umtah khatchu numei dang 5 ho chu gari dang’a tou’u ahi. “ akom’a um inn naivel ho heng’a panpina kathum uvin, Pastor, Village authority ho le nupi hon eihung kithopi uvin, hiche a konna chun hatah’a kitongkha driver pa jong huhdoh theiyin aumbep’e” tin hiche thilsuo ni a jao numei khat in tunilhah lang chun Senapati district headquarter a thuso miho maiya aphongdoh in ahi.

Numei ho hi ahin achesa march 27-29 kikah sung’a Ministry of Culture, Govt. of India gonna noiya chelha “ Rashtriya Sanskriti Mahotsav (Showcasing the culture heritage of India)” kin-guon a pan agalah’u ahin chule amaho hin “Lotamei dance” kiti nam laam vetsahna aga nei’u ahi.  Hitobang tuoset anatoh numei ho hi Mao Tribe a kon Pudunamei Women Society ho ahiuvin ahi.

Hiche thilsoh toh kisaiyin mao Women Union, Senapati le Taphou Pudunamei Women kiloikhomna hon jong demna sangtah ahin nei uvin ahi.

Alangkhat’a numei hon boina atuopet uva ana kithopi le ana huhdoh a anapang khonai vel’a pastor, village authorit y le numei ho chung’a jong kipathuphon ahin nei uvin ahi. Hiche thu kisut chan hin melhetlou hon ipijeh’a numei ho chu ana gimbol’u ham ti vang het ahinaipoi.

Lamphel Sub-Divison noiya twilet in innkuo 1599 val sukha, Relief Camp kihongdoh

Imphal, Mar.  31 (DIPR): Chief Minister N. Biren Singh makaina noiya Cabinet meeting anei nauva kithulhuh na dungjuiyin, tujingkal lang chun Imphal West Deputy Commissioner C Arthur in Imphal West district sung’a twilet  in atohkhah household list pehlutna ana neiyin ahi. Hiche household list ki submit hi preliminary assessment ahinalaiyin chule DC in twilet in atohkhah innkuo jat le thil-le-lo asuhset jat report hinpe ding in Sub-Divisional Officer le Sub-Deputy Collector ngansena anape’n, hitoh kilhon’a Lamphel SDO Ramananda Nongmeirakpam in report ahinpeh dungjuiyin; Lamphel Sub-Division sung’a twilet in innkuo 1599 lang ana tongkha in chule twilet in area 13 lang ana sukha in ahi.

Twilet in atohkhah innkuo ho chu Kwakeithel Thokchom Leikai le Kwakeithel Nganapithong area toh kinai lah ahin, Kwakeithel Nganpithong area a innkuo 200, Thouda Bhabok Leikai South  a innkuo 65, Thouda Bhabok Leikai South a innkuo  40, Keishamthong Irom Pukhri le Keishamthong Maning Longjam Leikai a innkuo 200, Kwakeithel Moirang Purel a innkuo 350, Khagempalli le Nganapithong kimvel lah’a innkuo 100, SIngjamei Waikhom Leikai a innkuo 350, Singjamei Okram Leikai le Oinam Thingel a innkuo 80, Sagolband Thangjam Leirak a innkuo 4, Sagolband Maisnam Nongthombam Leirak a innkuo 70 le Sagolband Meino Leirak a innkuo 10 ahi.

 Thilsoh toh kisaiyin tuni chun Social Welfare Club Community Hall, Kwakeithel Nganapithong mun’a Relief Camp hondoh ahin chule Kwakeithel Moirang purel a jong Relief Camp khat hondohbe ngaiding ahidan  thulhut aum in, Relief Camp hon le honlou ding toh kisaiya SDO Wangoi Report kingajing laitah jong ahi. Imphal West DC a konna thulhut kimu dungjuiya jing nikho le Relief Material ho SDO/SDC concerned ho vetsuina noiya local club member ho toh kitho’a hopdoh hiding ahin chule item dang ho hi local market a wholesale rate a kicho ding ahi. SDO Lamphel thupeh dungjuiya Relief Camp hi locality 2 a jong kihonbe nalai ding ahi.

Fishery Based Integrated Farming system toh kisai’a Training um

Lien S. Gangte

Ccpur, Mar. 31: Central Agriculture University (CAU), Imphal gonna noiyah 31st March, 2017 nikho chun Bethel Upper Primary School, ST. Chullouphai ah “Fishery Based Integrated Farming System” training aum in ahi.

Hiche training ahin, Resource persons in Professor Ph. Ranjit Sharma, Head, Dept. of Genetics & Plant Breeding, CAU, Imphal; Dr. Kh. Ibohal Singh, Associate Professor Dept. of Entomology, CAU, Imphal; Dr. Jamkhogin Lhungdim, Asst. Professor, Dept. of Agronomy, CAU, Imphal; Dr. M. Norjit Singh, Assnt. Professor, Dept. Animal Science CAU, Imphal leh Dr. Y. Bedajit Singh ho apang uvin ahi.  Govt. of India in loubol mi ho chuleh thinglhang mi ho dopkang na ding in “Enhancing Socio Economic Status and Livelihood of Neh States through Agricultural Intervention” ti thupi ah Tribal Sub-Plan (TSP) Project agong in ahi. Hiche TSP Project noi a hi India Govt. in beneficiary ho panpi na jat chom chom tichu Poultry, Fishery, Horticulture, Mushroom, Field Crops, Animal leh Post Harvest Technology ho kithopi na apeh ahi. Amasapen’a ding in Ccpur District sung ah TSP Project hamphat na muding kho 5 lhen doh in aum in, S. Khonomphai, Janglenphai, Tuijang, Chullouphai leh Ujungmakhong ho ahi. CAU in achesa 29th March, 2017 nikho chun S. Khonomphai ah training ana bol uvin, 30th March, 2017 nikho chun Janglenphai kho’ah Training ana nei uvin ahi.

Twilen in atohkhah hon vaipo hon pan alah ding’a thumna neiyu

Imphal, Mar. 31: Ni-ni kijom’a go ajuh jouvin Imphal khopi leh akimvel mun phabep’a janhi’a konin twi akiting den in ahi.

Vengsung phabep’a twi alet jeh in mipi ding’a hahsatna dinmun asoh in, adeh’a simlai board leh council exam pe hon hahsatna lentah atoh uvin ahi. Keishampat, Uripok, Singjamei, Keishamthong, Sagolband, Nganappithong, Kakwa, Canchipur, Porompat leh Lamphel chule mun dang dang’a gojuh jeh’a twi len ahi. IFCD Minister Letpao Haokip in thilso namun ho vetlhahna anei jouvin state sorkar in pan alah ding chule IFCD flood control team in mun phabep’a suhthengna natoh apat’a, JCB leh tipper aman ahi, tin thuso miho heng’a aseiye.

Mipi amoh tijat louding’in Letpao Haokip in temna aneiyin, chule kithopina ngaicha hon 94-02-88-14-82’a phone abol diuvin aseibe in ahi. Porompat, Bazar lah leh Lamphelpat mun’a Flood Control Team thum aum’e, ati. Mipi in nullah’a nen apai lou diuvin temna aneiyin, hiche hin nullah ‘a twilong alamtin thei ahi’in, twilen vendoh ding hi mijouse mopohna ahi, ati. Imphal Municipal Corporation (IMC) in chuh sung leh akipat masang’a twilen thilsoh aumlou nading’a nullah ho avettup’a, chule mun kiliemchang louva nen kipai ho aganna thei pen’a asuhtheng-u angaidan thu aseibe in ahi.

Mun phabep’a twilet hi nullah kisuhlou jeh ahi, tin mi phabep in thuso miho heng’a aseiyun, nullah kitup lou, nen kipai jeh’a twi alon ding bang’a long theilou ahi, tin aseiyui. Deputy Chief Minister Yumnam Joykumar leh minister adang phabep injong Imphal khopi leh akimvel’a twilet namun ho vetlhahna anei uvin ahi.

CM in office kitup tah’a achelhah nading’a thupeh nei

Imphal, Mar. 31: Chief Secretary O Nabakishore in thuso (order) aneina’a chun Officer koima in ama table’a file khat nikhat kalval akoi theilou ding ahi, tin aseiyin ahi.

Administrative Secretary jousen ama ama table’a tohlouva file akoi loudiu ahi, tin aseiyin chule Officer leh staff ho office aphatcha ache diuvin aseibe in ahi. Hiche vetsui theina ding’a department jouse’a Biometric attendance kikoi ding ahi, ati. Kivaihomna akitup theina ding chule nehguh umlouva thengtah’a na kitoh theina ding Chief Minister N Biren Singh in tupna anei bulhit theina ding tohgon ahi.

Assistant professor result kiphonna ding’a thumna um

Imphal, Mar. 31: MPSC Assistant Professor Interviewed-Candidates Forum 2014 in Assistant Professor direct recruitment 2014 result gangtah’a aphondoh diuvin thumna aneiyun, exam hi MPSC in alah ahi.

Government College 28’a Assistant Professor 280 lahna ding’a themvetna hi MPSC in achesa November 2014 kum’a apat’a, January 2016 kum’a kichai ahi. Dr Mayengbam Lalit, spokesperson, Forum in asei dungjuiya, hiche recruitment thu High Court’a um ahi’in, Manipur High Court in sorkar leh MPSC in ni 30 sung’a result aphondoh ding’a thupehna anei ahi, ati.

Court thupeh nung’a jong result kiphong lou ahi’in, hiche jeh’a Government college tamtah’a jilkung lhasam’a chule hiche hi Manipur Higher Education atohkhah ahi, tin aseiyin chule vaigei tah’a na kitong hin sorkar in gamsung’a themjilna amachal ding agelkhoh loudan avetsah ahi, ati.

Youth Empowerment  thu’a seminar kibol

Imphal, Mar. 31: National Service Scheme Cell, Manipur University in Manipur University Centenary Hall mun’a Friday nikhon ‘One day National Seminar on Youth Empowerment and Nation Building’ agong uvin, kin-gon’a Prof. Adya Prasad Pandey, VC Manipur University, Prof. Amar Yumnam, HOD Economics Department Manipur University, Prof. Sh. Dorendrajit Singh, Director IQAC Manipur University, Prof. Kh. Tomba Singh, DEAN, Students Welfare Manipur University leh Dr. K.Shitaljit Singh, Coordinator NSS Cell Manipur University Chief Guest, Guest of Honour leh President in apang uvin ahi.

Prof. N. Lokendra Singh, Dean, School of Social Science, Manipur University vaihopna in kin-gon jong akimang in, . N Rajmuhon Singh, Prof.MC Arun, Prof. Ch.Ibohal Meitei leh Dr. K. Romeo Singh in ‘Youth Empowerment’ thupi in houlimna anei uvin ahi.

Maoist hon school ‘ban’ abol-u ladoh tau

Imphal Mar. 31: Thal-choi kiloikhomna Maoist Communist Party Manipur in thuso anei uvin, tu masang’a Hijam Irabot Memorial Public School ‘ban’ bol ding’a thuso aneiyu aladoh tauvin ahi.

School mun hi sum holna’a neilou ding’in authority hon March nisim 26 nikho’a niseh thuso amanchah uva aseiyu ahi, tin kiloikhomna in aseiyin ahi. Khonung’a hitobang thil akimudoh kit’a ahileh thipbeh’a kivet tho louding ahi, tin aseiyun chule mipi in themjilna mun’a thil dihlouva na kitong ahet leh aseidoh diuvin temna aneibe uvin ahi.

Tamenglong leh Noney’a meivah vah lou

Imphal, Mar. 31: Tamenglong leh Noney district head quarter’a meivah loujeh in class X leh XII exam pe’a simlai hon hahsatna lentah atoh uvin ahi.

Thulhut dungjuiya, achesa ni-ni sung’a district head quarter teni’a main power supply tan’a ahi’in, go juh jeh’a se’a ahi. Manipur State Power Company Ltd in meivah lhun kit nading’a natoh apat lou ahi. Tamenglong district hi sorkar in anahsah loujeh’a achesa kum somthum somli val hahsatna ato ahitan, district ni’a kikhen’a hiche district hint u channa gelkhohna amu lou ahi, tin Noney khosung mikhat in aseiyin ahi.

Imphal khopi’a um ‘job fair’a ginchat sang’a tamjo in ‘register’ bol

Imphal , Mar. 31 : Northeast gamkai hi sector phabep’a thepna nei tamna ahi’in, lekhasim tamna mun (high literacy rate) ahivang’a tohmun lhahsam jeh’a gamkaiyin boina lentah ato ahi.

Centre in hiche thu’a boina suhlhap nadin’in National Institute of Electronics And Information Technology (NIELIT), Imphal toh pan alahkhom’a ‘job fair’ agon ahi’in, gamsung’a tohmun hol tamtah in lunglutna anei uvin ahi. NIELET Model Career Centre leh National career Service Ministry, Ministry of Labour and Employment in agon ‘joh fair’ a natoh hol’a mi 600 val in registered abol ahitai.

“Information Technology kimangcha’a natoh hol holeh tohmun neiho kitup ahi. Amaho hi electronic platform’a kikoi ahi’in, natoh hol holeh natong ding hol hon electronically’a natoh amuthei nadiu ahi. Mi hijat apanding ginchatna umlou ahi’in, 300 vel ding’a kigingcha ahi’in, tu’a hi 600 val ahitai”, tin Haobam Rajendra Singh, manager, Model career Centre, NIELIT in aseiyin ahi. Manipur leh khopi dang dang’a kon automobile, healthcare, development, banking, hospitability, IT sector chan’a company 16 val in fair’a pan alah ahi’in, fair abolna uva company in tohmun ong anei ho’a natong ding’a mi alah-u ahi. Lekha helou thepna neiya, class X leh XII pass, graduate ‘a kon post graduate chule MBA ho jong natong ding’a tohmun ong dungjuiya kila ahi.

Sithlhou Council India le Singsit Organisation Apex Body ding’a Elmun Council kichoh hing kit

Kaybie Chongloi,

Kangpokpi, Mar.31: Kum sot tah athi sa a ana um Elmun Council 1960 kum a ana kiphut doh  chu Sitlhou Council India leh Singsit Organization India in kihou lim na anei lhon na’a thulhuh na anei hon dung jui in  athah beh in suh hing na ana neikit lhon in ahi.

Hiche kihou lim na a chun Elmun Council hi tuni a kipat na Sitlhou Council  India leh Singsit Organisation India apex body ahi ding dan asei lhah utoh kilhon in  Interim office bearer di jong Jampi Pa (Chief of Jampi) leh Bombalpa (Chief of Bombal) jao nan ana lheng doh uvin ahi.

Paokhosei,Presiden.Sithou Council India in thuso miho kom ma asei na a chun; hiche aki suh hing na ajeh hi Sithou leh Singsit te ni ucha kikah a kito naleh kihetthem tona ahung um doh thei na ding ahi dan aphong doh in, Elmun Society hi 1960 a ana kiphut doh ahin  phat chom khat jouva Elmun Advisory Council tia kikhel ahi.

Elmun Advisory Council hi boi na jat chom chom jeh’a phat sot tah ana defunct jong leh January 8,2011 ni in min thah leh lungel thah pu pum in Elmun Coucil tin Henkholal Lhouvum President leh TK. Sema General Secretary hi nan suhhing in aum kit tan ahi.

.

Aman asei be na ah;  1960 kum a pat 2006 sung chan hin Sitlhou leh Singsit teni ucha kikah a  kihetthem tolou na ana um ho suhlhap ma aumthei nading’a Sitlhou Council India leh Singsit Organization India in pan hatah a hung kila’a  Elmun Council hi apex body a dia hung kisem ahi.

Elmun Council hi Sitlhou Council India leh Singsit Organization India apex body ahi tia aphon doh u toh kilhon in Rev. Seikholet Singson in  Pathen heng ah lhandoh na anei in ahi.

Elmun Council India lamkai thah kilhen doh ho chu Jangseh Singsit (President),SL.Paokhosei, Lenlal Singson leh Sehthang (Vice President), SL.Lunmithang (Gen. Secy.), LT. Dalla Singsit (Jt/Secy.), Dr. Paolen Sitlho (Fin. Secy.), Letmang Sinsgsit (Jt./Fin.Secy.), Seilam Singsit (Secy. Custom & Culture), Kailal Sitlhou (Jt./Secy. Custom & Culture), chuleh Haochon Singsit (Inf. & Pub.)  ahiuve.

Elmun Council India Interim body executive member a ding in Soikhogin Singson , Ginneo Singson, Letkholen Sitlhou, Dehlam Sitlhou, Tonglun Sitlhou, Pahen Sitlhou chuleh Mangsat Sitlhou hocheng chu lhendoh ahiuve.

Thusoh Lahchom

BJP meeting

Ahunglhung ding April nisim 3 jingkah nidan 11:00 am tengle State Party Head Office, Imphal a emergency meeting umding ahi tin Thangjamang Kipgen, President, BJP Sadar Hills District in hetsahna ahin neiye. Hiche nikho teng chule Sadar Hills, Kangpokpi district sung’a BJP ADC Members, BJP Mandal Exe. Committee & District Exe. Committee ho pangchieh ding’in hetsahna aneikit’e. Seikhom ding thu poimo hochu Party Organisation suh hatding, Sadar Hills District & Mandals a post ong ho suhdim ding chule lamkai ho phatsah dungjui a khantou machalna ding’a tohgon ho seikhom ding ti hohi ahi.

DSWO

District Social Welfare Office, Chiengkawnpang ah Indira Gandhi National Old Age Pension Scheme noi’a Red Card holder, Blue Card holder leh Blue Card holder ho’a ding in pension sum aki hom jing in ahi. Hiche Pension sum hi April 2015 apat August 2015 sung a ding ahi in, lha khat ah dangka 200/- ahi in, agom’a dangka 1,000/- ahi.

Old Age Pension sum hi Block leh Assembly Constituency dung jui a kihom ahi. Hiche toh kilhon in amasapen a ding in Ccur A/C ah aki pan in ahi. Pension sum hi 4th April, 2017 chan Churachandpur A/C ho’a ding’a kihom ding, 5th, 2017 leh Samulamlan Block, 6th April, 2017 leh Singngat A/C, 7th April, 2017 leh Henglep A/C, 11th April, 2017 leh Thanlon A/C ho’a kihom ding chuleh,12tg April, 2017 nikho leh Tipaimukh A/C ho’a ding’a kihom ding ahi. Sum la ding ho’n Old Age Card Receipt ki choi a, eima sum ding kilah cheh ding ahi. Phattep nikho’a sum laman lou ho’n ajing nikho a lah thei hiding ahi.

Transfer

SDPO Yairipok Sarangthem Hemanta Singh AC/1-MR’a transfer ahitan, anti-corruption cell, Chief Minister Office toh ‘attached’ ahi’in chule Pramesh Arambam AC/1-MR hi SDPO, Yairipok’a transfer kibol ahitai.

KWU(M)

Kuki Women Union, Manipur in tuchung 11th Manipur Legislative Assembly election a lolhinna hin nei Thadou-Kuki chapa chanu jouse kipapina thuphon ahin nei uvin ahi. KWU(M) adviser Rose Mangshi Haokip min’a kimu thuphon in atahlangna ah;  tuchung election hi Kuki te ding’a “Landslide Victory” ti theileu ahin, hitoh kilhon’a akilhengdoh MLA hon jong mipi (voter) ho ahinkipa sah diuvin tiemna aneiyin chule achesa term masa lang’a anakaidoh ho sang’a phajo’a thinglhang gam khantouna dia pan nasatah ahin lahdiuvin jong tiemna aneibe in ahi.

Athisa kimu

Churachandpur district hopsung Ngaithel waiting shed mun’a numei khat athisa in akimudoh in ahi. Akikhai lih numeinu hi Ngaizasiam, d/o Khupkhansuan, Zion Veng, New Lamka’a cheng ahi’in, ama-leh-ama kikhailih ham, ahilouleh midang in atha ham hetchen hilou lai ahi. Police hon thi-long ala uvin, thukholna apan tauve.

Editorial

North East a Bongsa joh kikhaam loudi

                           Thuthang jatjat umji lah-a BJP ten North East a vai ahinpoh uleh bong tha, bongsa joh leh neh hogei hung kikhaamdi ahi kiti jong khat anahipeh-e. Ahin hiche thu hi jou thu, moh thuthang ahidan ahethem hon ichan’a hilchetna anapeh vang’in politics a party khat suhboina dia ‘propaganda’ tobang’a athu ana seiloi um ahi. Uttar Pradesh (UP) a sakithana leh kijohna mun ho State govt nin ahinban khagam’a pat chun BJP hon bongsa thadi le nehdi ahinphal loudiu ahi tia anaseiho ahung dih gotai timanloi aumkitne. Hiche pet tah hin BJP hon North East a bong tha, bongsa joh leh neh itih in akijahdago khapon, bol jong kibolponte tin suhthengna ahinnei tauve. UP a sa thana leh sajohna mun kikhah ho chu ‘license’ neilou hoa bou ahin sathana le sajohna mun jouse ahidehpoi. Khopi sung mun tehlah leh mi tamna  bazaar mun hoa sa kithatna kijoh ho chu anen aboh dimna jong ahijeh a damthaina jong ahilou jeh-a UP govt nin anaban kha, hijong chu bongsa that le asa joh ho bou hilou, kol le vai hon ahaneh kelsa, bangkol sa thana mun hojong ahi. Sathatna kivah ho mihem a lakh a sim in kiphinna (strike) jong anabolman u ahi. Govt nin sathat leh sajoh ‘license’ apeh ho chun thenna leh damtheina lampang’a ajui diu daan um ahi. Eiho gam’a hi inchen louchen nin atalou jeh-a niseh a sa kichoh a ne jong tamlou, hiche to lhon’a sa kithana mun len ikho iveng len jep hojeng’a jong umlou, a-umnasun ho jong anet, anamset jeh-a koima valutna ngam hilou ahi. Chuban’a sajoh hon jong lamlen’a chele hon baitah-a amutheina dia Moreh thil dukan maiya kikhai ho bang’a sa kisemsa (ki atsa) a Kg a kikan ho nisalah huilah a akhai tho jeng’u ahi. Hiche sa ho lah a hi nen le bohse, thousi thouvai tamtah chu (beh) thei, kit, hichu ane ho dia damtheina jong hiloudi ahi. Gam khangtou jep hoa sa kisemsa ho hi nen le boh toh akihal louna dia Glass (Almirah) sung’a kikoi, Electric tha hatna adapna theiya jong kikoi ahi. India gam mun phabep’a sa kisemsa kijoh ho Plastic beh akhukhum uve. Damtheina di vetna’a UP a License neilou sajoh ho kisuh hai jeh-a BJP ho akitileh mun tin’a bongsa kikhah jengdia seiloi umpai ahi.

                            BJP hohi Hindu hou le tahsan kukal tah a chepi (fanatic, Fundamentalist) RSS le abahkai ho tosotna jal’a hung hatdoh u ahinachan jong aumnai. Chuleh bongsa kikhana hi ningkum kum masa lang jong chun Maharastra State ah ana um’in kiniel kiboina jong ana umdoh e. Tuchung UP a BJP hon govt ahinpoh pat jeh un bongtha khadi ti hin haseiloi jong aumnai. Ahin hitobang lunggel natoh hohi hou le tahsan thu, lhagao thu khohsah vehvuhna jong hilou, ‘politics’ lutna joh ahi. North East a thinglhangmi hohi bongsa ne ngen ti thei ahijeh in North East a jong bong tha, bongsa neh kiphal loudi kiti chu ahiloubehdi khat ahi. Politics bol party khat koi angol hija hitobang ageldi ham! Het chetlou thu ho moh seinle tahsan sang’a sajoh hon thenna le damtheina lampang gelna pum’a iti abol uvam tiho joh kihaseileh phatchomna hijodi ahi.

Blankfire

Gampama uma inlang agam akho lang thu le la hetnomna neilou, inlang ngaina neilou ho hi datmo umtah ahiuve. Inlang a umho ahia mundanga um ho ahia a society ngailutna siki cha neilou hojong mi vangpha ahidiuvem, mi bulhinglou ahidiuvem datmo umcheh ahi.