ENTERTAINMENT

ENTERTAINMENT

85
0
SHARE

Source pelouvin dopson bol hih in

Bollywood drugs case: NCB hon Karan Johar notice pe u

New Delhi: Bollywood a khamnathei (drugs) akibol thu toh kisaiya Narcotics Control Bureau hon thukholna aneiyu toh kilhon a filmmaker Karan Johar ‘notice’ athot tauvin ahi.

Phat phabep masanga social media a video viral ana che thu toh kisaiya NCB hon Karan Johar notice apeh u ahi. Thulhut dungjuiya, NCB hon Manjinder Singh Sirsa a kon hiche thu a hehna amu u ahi in, video hi atah himong nam ti kholna dinga notice athot u ahi.

NDPS Act 67(B) noiya hiche thu toh kisaiya amatah official ho henga ache ngailou ahivanga thukholna neiya agency ho seiya achon ngai ahi. Chule hiche noiya notice kipe hohi thukholna aum sunga thudohna kinei lou ahi. Tu masanga NCB in Karan Johar inmun a achesa 2019 kum a party kibolna video toh kisaiya forensic report amu ahi.

Forensic report chun video hi atah ahi in, edit kibol lou chule kitongkha lou ahi, tia asei ahi. Video hi achesa July 28, 2019 kum a Karan Johar in atahdoh ahi. Video a hi Deepika Padukone, Arjun Kapoor, Malaika Arora, Shahid Kapoor, Ranbir Kapoor, Vicky Kaushal, Varun Dhawan panna a Bollywood celebrity jong kimu ahi.

Achesa June 14 nikho a actor Sushant Singh Rajput (34) achenna inmun a athisa akimudoh jouva group chat a khamnathei thu kiseina akimudoh jouva kon Bollywood a drugs toh kisai thu ho NCB in kholna anei ahi.

XXXXXX

X-Men star Ian McKellen Covid-19 vaccine dose masa kikap ta

London: Veteran star Ian McKellen in Covid-19 vaccine dose masapen amu tan, chule lou akikap thu a alunggel aseiyin ahi.

UK in akum tam lang ho vaccine peh masat dinga khohsahna apeh toh kilhon a kum 81 a upa actor pa hi vaccine kikap ahi, tin dailymail.co.uk in aseiyin ahi. Prue Leith, Lionel Blair leh Michael Whitehall panna a akum tam lang star phabep covid 19 vaccine kikap ahitai.

“Ka lunggel anom e”, tin McKellen in aseiyin ahi. “Kei tobanga kum sottah dam hohi ahing ahiuve, ajeh chu vaccine ana kikap masa ahitai. Ateh lang hohi 100 per cent hiding ahi, ajeh chu eiding bou hilouva ikinaipi ho a ding ahi in, society a dinga lou ka kikap u ahi”, tin aseibe in ahi. “Ana poi, NHS staff ho kakimuto uvin, achung uva kipathu kaseiye. Lou kikap in tia midang henga seingam lel nading kaneipon, vaccine kakikap hi vangpha kakisa e”, ati.

UK gam a Pfizer-BioNTech vaccine kap dinga kilhengdoh ho lah a actor pa jong pang ahi. Actor pa hi kum 80 chunglam ahitah jeh a akilheng masa pen holah a pang thei ahi. Vaccine hi akum tam ho, frontline worker chule care home a natong ho peh masat dinga kisei ahi. London khopi a um Queen Marys’ University Hospital mun a actor pa vaccine kikap ahi.

XXXXXXXX

Amitabh leh Ajay Devgn panna MayDay a Youtuber Carry

Minati pang ding

Carry Minati tia ‘fans’ hon ahet YouTuber minthang tah Ajey Nagar in film a pan lah dinga kigotna anei tai, tin thulhut in aseiyin chule Ajay Devgn leh Amitabh Bachchan panna May Day film a pang dinga akou uve, ti thulhut um ahi.

Fans hon Carry tia akou YouTuber pa injong thusoh photchenna aneiyin ahi. “Kumar Mangat Pathak (Co-producer, Devgn’s production company) a kon ka business head Deepak Char in kouna amu in, amaho toh phat phabep na katoh khom ding ahi”, ati. Film tho dinga asei uva athanopna dan thu aseiyin, “Film a keima hina ‘Carry Minati’ role katho ding hi kei dinga thanop umcheh ahi”, ati.

Kum 21 a upa Carry in Bollywood hi kana lunglut na pen hilou ahi. Skit kana tho hi mi kipana ding ahi in, hijongleh tua film lampang a lut lou nading ajeh kamupoi. Ima jouse kahet nom in, ka hina tahbeh katho ding ahijeh a film a pan ding kanop ahi. Niseh a kahina a kahin ahi in, Amitabh leh Ajay Devgn a kon acting chungchang thu hetbe ding hi kakinepna ahi, tin jong aseiyin ahi.

MayDay hi ama a dinga ‘debut’ ahi tia seiding jong nomlou ahi. “Hiche hi ka thilbol kikehlet be na ahi. Content creation a niseh a nidan 10 vel kapeh ahi in, kathanop na tah ahi in, music a kalunglut kavetsah na ahi. Tua ka thilbol jouse hi ‘special appearance’ a kagel ahi. Tomngai tah a pang ho dinga lampi akihong e tihi keima lunggel ahi”, tin film a apan thei chungchang a aseiyin ahi.

XXXXXXX

Netflix film mantam pen Russo Brothers in direct abol ‘The Gray Man’ a Dhanush pang ding

Russo Brothers in aboipi ‘The Gray Man’ kiti spy film a Dhanush jong pang ding ahi. Film hi Netflix in produce abol holah a sum tamlut pen a kisem ahi.

Film a Chris Evans, Ryan Gosling leh Ana de Armas in lead role atho ding ahi. Dhanush tilouva Netflix in film a pang dinga Jessica Henwick, Wagner Moura leh Julia Butters min jong phondohna anei ahi. Actor pa Russo Brothers film a apan ding ama ‘fans’ hon nasatah in akipapi uvin ahi.

“Tamil, South chule Indian cinema fans ho dinga kithang at pi umtah ahi”, tin akipapi nau thu chom chom asei uvin ahi. The Extraordinary Journey of the Fakir hi Dhanush dinga international film a apanna masapen anahi ahi.

Film hi Mark Greaney in ajih novel a kon kiladoh ahi in, dangka $ million 200 (India sum a dangka crore 1500 nailam) lut a kisem ding ahi. “Captain America: Winter Soldier fans ana hi ho dinga kaseiyu ahi. Thusim hi ‘real-world setting’ a kabol u ahi”, tin Anthony Russo in aseiyin ahi. “Franchise sem a chule universe athah pohdoh ding, alaiya Ryan thusim aumding hi lunggel ahi. Film masa nasatah a kaboipi u ahi in, hiche jeh a ani channa kisem thei ahi”, tin aseibe in ahi.

Avengers: Endgame ban a Russo Brothers in direct abol Cherry film Apple TV+ a khovei teng release ding ahi. Film a Tom Holland in lead role atho ahi. Russo Brothers in tua hi Amazon series ‘Citadel’ kiti a Priyanka Chopra toh jong na atoh khom u ahi.

SHARE
Previous article19th December, 2020 News
Next articleENTERTAINMENT
Editor at Eimi Times.