EIMI TIMES (November 24, 2018)

EIMI TIMES (November 24, 2018)

461
0
SHARE

LOCAL & REGIONAL

Wangjing a phailei a voh ding’a kisetup chang mel hetlou hon jankah a hal-lha

Imphal, Nov 23(ET): Thoubal Police Station hopsung Wangjing mun’a janlhah (Nov 22) jankhang kim velchun vohdia chaang kisetup mel hetlou mi phabep in mei in ana hallha uve tin thulhut chun aseiye.
Hiche akihal lhah peh chaang neipa hi Wangjing Keithel Mamang akon Laishram Mani ahi akiti. Thulhut kimu dungjui chun akihal lha chaang chu acre 1 a len phailei akon ahin vengsung mipiten hiche thilsoh umchan chung’a demna sangtah anei naoban’a Government in mona neiho aholdoh’a atatoh’a gotna apeh ding in ngehna jong anei uvin ahi.
Thilsoh hi Jingkah nidan 3.30 don ‘a exercise ‘a vah le hon phailei meiya akihal amudoh u ahi, tin Mani inneipi Ranjana in thuso miho heng’a aseiyin, chule kum lhung ‘a gentheipi tah’a phailei ki lhou hi koiyin meiya ahal ahidem ti alungdonna thu aseiyin ahi.
Laishram Mani in thuso miho akimupi na’a chun, tuchan ‘a melma kanei pon chule koi natoh ahidem tin aseiyin ahi. Firefighter chule khosung mihon mei phelmit ding ago uvin, ahivang’a chang atamjo hi meiyin akah man ahitai. Police team hon thilso namun adel lut uvin, phailei hi jan-kim don’a mel hetlou hon ahal hiding’a aginmo nau thu asei uvin chule thilso namun ‘a kon meter 50 vel’a gamla mun’a ju (local) kikoina plastic chule disposable khon hojong amudoh uvin, thilsoh toh kisaiya case ajihlut uvin, thukholna apan tauve.
Wangjing Tentha Assembly Constituency MLA Paonam Brojen in thilsoh umchan sangtah’a demna anei toh lhon’a alung noplouna thu asei in ahi. Chule hitia vohdia kisetup chaang kihallha hi achaang neipa seh hilouva gamsung pumpi adia manna khat jong ahi. Maban’a hitobang umchan phalou ho bolkit talou ding in mipite temna najong ananei in ahi. Vangsetna toh insung mite chaang bora 10 pehding in kitepna anei in ahi. Geldoh thei khat chu achesa kum sung in jong Bishnupur District hopsung mun chom chom’a hitobang thilsoh phabeb jong anaum jing tan ahi.

Thumna phabep neiya SSUM in gamsung mun chom chom’a ‘torch rally’ bol; Numei 500 lam in panla

Imphal, Nov 23(ET): Socialist Students’ Union of Manipur (SSUM) in gamsung mun chom chom ‘a phat khat in ‘torch rally’ abol uvin, thumna kibang anei uvin ahi.
Thulhut dungjuiya rally ‘a hi numei 500 nailam in pan alah ahi’in, gamsung ‘a khamnathei ju leh kingolsah nathei ho kha ding, Mapithel Dam ‘decommission’ bol ding, Myanmar gam in alo gam ho nunglah ding, gamsung mi dihtah ho venna ding policy frame bol ding, mineral resources kikhotna natoh ho ngah ding, Kangla muntheng ventup ding chule gamsung ‘a muntheng jouse ventup ding’a thumna anei uvin ahi.
Kijotna’a pang numei aja’a sim hon Lamyanba Hijam Irabot lim akidop uvin chule Singjamei, Keishampat, Sagolband, Thoubal leh mun dang dang’a kijotna anei uvin ahi. Rally hi phatah ‘a agontup masat u hiding’a tahsan ahi, ajeh chu hBishnupur district, Kakching district, Thoubal district, Imphal East leh Imphal West district mun chom chom ‘a jong hitobang kijotna anei uva, akisei thumna ho kibang tah’a thumna aneiyu ahi.
SSUM in thuso aneina’a chun, janhi jan ‘a kibol rally hi akipatna ahi, tin aseiyun chule thumna bulhit ahi kahse’a kiphinna dang dang jong bol ding’a aseiyin ahi. “Achesa December 12 niteng gamsung mun chom chom ‘a jan nidan 7.30 teng leh Nupi Lal nikho geldohna’a mipin kijotna aneiding ahi”, tin Bhusan Longjam in soi akaina SSUM thuso chun aseiyin ahi.
SSUM in twi hah jeh’a hahsatna toh’a loubol miho dangka 50,000, thinglhang district ‘a phailei (zhum cultivator) ho dangka 10,000 cheh peh ding’a jong thumna anei uvin ahi. December nisim 12 ni’a umding rally ‘a hi Manipur University Complex ‘a kon Assam Rifles ho kilahdoh na ding’a jong thumna kinei ding ahi, tin aseibe in ahi. Manipur University Branch kihong ahitan, MU sung’a um Assam Rifles ho kilahdoh nading’a simlai kiloikhomna in campaign apat ding ahi, tin thuso chun aseibe in ahi.

Mipa khat in kho mulou achanu suhset ding agot jeh’a ajinun volih

Imphal, Nov 23(ET): Mipa khat in achanu numei chapang mitcho khat suhset ding agot jeh in ajinu in atha lo in ahi.
Imphal East district noi Nilakuti Gram Panchayat mun ‘a Wednesday nikho thilsoh ahi. Mipa hin kum 6 bou hinalai chule amitcho hi’a achanu tah hi suhset ding agot na’a ajinu in avoh leh avoh lih ahi, tin police thulhut in aseiyin chule numeinu jong Heingang police hon amat ahitai.
Alangkhat’a, vengsung miho chule meira paibi hon numeinu leh achate hi athi ajipa in avoh lih ‘a chule asuhgim jing ahi, tin asei uvin ahi. Chule tu masang’a jong vengsung nuei ho chunga achonchan ahoilou jeh’a jong kiman ‘a gihna avel vel’a kinei mi ahi, tin aseibe uvin ahi.
Ajinu in kho muthei lou achanu huhdoh ding agot na’a thi ahi’in, ajinu hin achanu akithopi ahi, atiuvin chule sorkar in akiman numeinu dan sem louva alhadoh diuvin thumna anei uvin, achate nga hohi anu tailou ave ding umlou ahi, tin asei uvin ahi.

Kuki Inpi Oklahoma, USA in General meeting cum election nei

Tulsa, Nov 23(ET): Kuki Inpi Oklahoma in General Meeting cum election chu KWS Conference Hall Tulsa, Oklahoma USA a janhi chun ana nei uvin ahi. Hiche election a 2019-2020 a ding’a lamkai a kilhendoh hochu; President: Paolenthang, Vice President: Tongsei, Secretary: Seiboi, Jt. Secretary: Clay Haopu, Finance secretary: jamkhup, Information: Lhunminthang, Sports & culture: Letsei, Advisor: Rev Dr.Hesei Touthang pastor IMF, Auditor: Zamjang, Nehjagin, Seiminthang ho cheng ahiuve.
Hiche election kichai chun Letlam a in tilkhouna thu in houlimna aneiyin Pastor Hegin Pastor KWS in lamkai hotaopeh na ana neiyin ahi.

Ccpur a gancha chung’a sose dia ginmo ganhing khat kimu jing

Ccpur, Nov 23(ET): Churachandpur town sunga phat masa jep akon a in a kivul gancha ho chunga so se gam akon ganhing khat mi phabep in amu jing uvin ahi.
Hiche gancha hi het khah le mukhah ahi loudan jong mipi thuso miho hetsah na ananei uvin ahi. Jani jaan nidan 8 lam in Zenhang akon mi 2 in ganhing lamdang tah mukhah lou ana mu lhon toh lhon in dah ana kheh lhon toh lhon a khosung mipi in ana del lut uvin hinlah ana lhai mang tan ahi.
Hiche ganhing mu masa pen a kisei chu Ibemsana w/o Md Abas ahi in amanu in asei na a, a in uva pat feet 7 lam a gamlha khat amu dan ana sei in chuleh hiche ganhing chu atahsa sa atabang, aluchang sakol a tabang chuleh amit avah in ahi ati. Hiche ganhing chu Kubar kiti khat in jong amit bou ana mu dan ana sei in ahi. Hiche ganhing amu uva aloi ho toh dal ding agot u jong le aman jal dan thu jong Kubar in ana sei in ahi. Zenhang sunga hi tu channa ganhing 4 lam in thina ato ahi tan ahi.

EVM le VVPAT

Ccpur, Nov 23(ET): Churachandpur Assembly Constituency sung a Electronic Voting Machine(EVM) le Verifiable Paper Audit Trial(VVPAT) jah ding dang toh kisai in Awareness Campaign ana kibol in ahi.Hiche campaign chu YPA Hall Bungmul mun a ana kibol ahi. Hiche kin achun Bungmual khosung a polling station 4,A,B,C leh D akon voter ho in panlah na ahung nei uvin ahi. Hiche kingon achun Thangboi Gangte, MCS,SDO Churachandpur in hiche campain toh kisai in hou limna ananei in ahi. Hiche campaign achun voter ho mock voting jong ana bol sah uvin ahi. VVPAT hi ahunglhungding MP election a jah ding ahi toh lhon a Chief Electoral Officer, Manipur thupeh na noi a awareness capign ana kibol ahi. VVPAT hi EVM toh kijom a um ahi in EVM a vote ta jou teng VVPAT Status Display Unit a vet thei ahi ding toh lhon a VVPAT printer a a vote ki tat pen print doh thei hiding ahi. SDO Thangboi in ahou limna a mun tin a hiche awareness campaign ana kibol jongle Bungmual te kal val a phate a pan la aum loudan phondoh na ananei in ahi.

Moreh a World Heritage week anakimang

Tengnoupal, Nov 23 : Tengnoupal district sunga Moreh khopi a World Heritage week ana kimang in ahi. Hiche kingon chu Moreh Museum munna Manipur State Archaelogical Department of Art & Culture government of Manipur makei na noi a ana kiman ahi. Kingon achun Tengnouapl SP Dr. S Ibomcha jin gun in ana pang in, Jangthang Mate Molhoi haosa pu kinnei pa in ana pang in chuleh Moreh government Higher Secondary School a jilkung Gokul Thapaa jin ja um in ana pang in ahi. Jin gun a pang Dr. Ibomcha in asei na a Moreh aum museum khantou na ding dan thu ho ana sei in ahi.
Moreh museum khantou na dinga mipi in phate cha a pan alah uva government lam akon ajon kithopina thei chom chom ngehna nei thei ahi dan jong Ibomcha in ana phondoh in chuleh hiche museum khantou na dinga khopi sunga cheng nam chom chom jouse in pan alah diu vin jong temna ana nei in ahi. Hichekingon toh kisai in aitning competition jong ana um in ahi. Kingon achun nam chom chom akon lamkai ho le kho le veng chom chom a mipi ho in jong pan lah na ahung nei uvin ahi. Museum secretary Thonggin Haokip in thuso miho ang a ahou limna India sung bou hilou a Myanmar lam akon a jong hiche Museum ve a mi ahung ji dan thu asei in chuleh tu chan gei a Government lam akon a kithopina khat cha akimu loud an jong ana tahlang in ahi.

Government akon a hiding dol a vetlhahna aumlou jeh a Songpijang khosunga houbung tin in lampi sem

Songpijang, 23(ET): Tuni Friday nisim 23 Phallha 2018 nikho chun Songpijang Church Fellowship (SCF) tohgounna noi-in Songbung Presbyterian Songpijang houbung miten khosung lampi semphatna naa ana tong uvin ahi. Hiche natoh hi kum 4 masang a kona Songpijang Church Fellowship (SCF)tohgounna noi-a ana kichepi ahin, Songpijang Houbung jouse’n hiche natoh hi kumseh le khatvei ana kinei ji ahi. Hiche natohna- a ngaikhoh ding sum le pai jouse jong houbung in ana kipohdoh ji ahi. Chule hiche a natong khosunga houbung miten ama kipedohna a pan ana lahkhom jiu ahi.
Songpijang Church Fellowship(SCF) noi-a houbung umho chu ahile Songbung Presbyterian, Songpijang Christian Church, Ngalsong Presbyterian, Christa Houbung Theng le Thadou Baptist Church (TBA) cheng ahiuve. Hiche houbung ho hin kumseh le khatvei khosung lampi semphatna thakon hi Chrismas kah-a ana bol ji u ahi.
Hettha dingin, Government akon lampi phatea vetsuina a umlou jeh a, Songpijang sunga houbung kiloikhomna(SCF) in hitia hi pan alah ahi.

Naga Students’ Union, Delhi (NSUD) in suhthengna thuso nei

Imphal, Nov 23: Imphal Times thuso ‘a nisim 20 ni’a 55th Nagas Meet Delhi kiti Naga Students Union Delhi (NSUD) in agon chungchang ‘a thuso Luikang Bruce, Speaker NSUD leh Hinoto P Aomi, President, NSUD in suhthengna thuso aneiyin ahi.
Kin-gon ‘a Fashion Show thu kiseiya, show hi Delhi Fashion Club ‘a um Harshit Dhingaun in choreograph leh direct abol ahi, tia kisei hi thudih ahipoi, tin NSUD in thuso aneiyin ahi. Union in Harshit Dhingaun, Delhi Fashion Club toh kisaina anei pon, chule Harshit hin Naga’s Meet Fashion show ‘a invest abolna jong umlou chule jin-gun jong hilou, solicitor jong ahipoi, ati.
Union in kikhopna hi kum seh leh abol ahi’in, Naga Community ‘a kon khangthah thepna neiya designer/artist ho thepna vetsahna thei ding’a abol ahi, tihi Union in avel ‘a aseikit ahi’in, tukum ‘aplatform hi 7Line Creation & Mai Collection kipe ahi, ati. Dhingaun in kin-gon ‘a pan phatah ‘a alah’a asei thu jeh’a 7 Line Creation and Mai Collection in NSUD heng’a Harshit in pan alahlou thu asuhchen diuva ngehna aneiyu ahi.
Organisation min phalna beiya kimang a chule group khat suhmitna ‘a, khat minphatna kilahpeh hi Union in demna sangtah aneiyin, action lah ding’a kouna anei ahi, tin aseibe uvin ahi.

PTC GHQ term thah’a ex-officio kilahlut lou thu’a Lankhanpau in hilchetna nei

Ccpur, Nov 23(ET): Nitin thuso phabep a PTC GHQ President K. Suanthang leh Thangzamuan Tombing Generaly secretary in tu term thah a PTC ex-officio member lahlut in aum nai poi tia thuso ana nei lhon chu ahet themlou hon jeh ahi tin Lankhaanpau Guite in hilchetna ahin nei in ahi. Lankhanpau in thuso miho ang a hiche thu a houlimna anei na a ADC election kum 20 lam ana umlou nung a election 2010-15 term a Paite paao jang mi 8 akei toh lhon a PTC EX-officio member dinga June 2010 a ADC term khat adinga lah lut na ana um toh lhon a ADC term khat sunga PTC GHQ president 4 lam ana kikhel man dan le PTC term kikhel manna ADC thah lah lut tei tei angai loudan hilchet na ana nei in ahi.
ADC term a 2015-20 kilhen chai a PTC member dinga ana kilah lut toh lhon a akum vat ahi nalai dan le PTC termna kikhel manna avel vel a lah lut na kin umsah angai loud an jong Lankhanpau in tahlang na ana nei in ahi. Lankhanpau in asei be na a tu le tua ZRO ho kikah a boina thu a nitin thuso jat chom chom a kidemna to na ho chunga alung nopmodan asei toh lhon in thuso ho a kigot to sanga a table chunga phate a kihou khom ding adei dan jong phondoh na ahin nei in ahi.

HSA election ana kibol

Ccpur, Nov 23(ET): Hmar Students’ Association Churachandpur Joint Headquarter in tuni in LJ Memorial Hall Rengkai Road munna 2018-20 sunga dingin lamkai thah lhenna ana nei uvin ahi. Hiche elction umding toh hon in HSA Information and publicity secretary Joshua Amo in hou limna ana nei in chuleh Paastor Lalsiemthar Joute, Ebangelsit at large RPC, NEI in Pathen kom a kingon kipatna dingin taona ana nei in chujou in Election Commission ho in kingon ana pan uvin ahi.
Hiche election chu Pastor Lalsiemthar Joute, Evangelist at Large, RPC NEI Presiding Officer hina le Nathan Sanate, CEC Member, HSA GHQ le LRS Puruolte, Joint Secretary, Information & Media in-charge, Hmar Inpui, GHQ makei na a ana kibol ahi. Hiche election achun HSA president dingin Jeffrey L Joute, vice president dinga Lalruotsang, general secretary dinga Eric L Fimate, asst. general secretary dinga Khuplal Songate, treasurer Ruth Lalthazo le Fianance secretary dingin Sarah Lungtau lhendoh in ana um uvin ahi. Kilhenna kichai in lamkai masa hotoh kikhut lhehna jong ana um in ahi.

Sangai International Angling Competition 2018 hondoh hita

Imphal, Nov 23(ET): Tunin Art and Culture Minister L Jayentakumar in Kangla kom’a amasapen’a din Sangai International Angling Competition 2018 hondohna aneitan ahi.
Chule kum kit’a kon hiche kingon hi thupi tah’a kibol pan ding ahitai tinjong thuso mihotoh akihoulim na’a chun anaseiyin ahi. Hiche hondoh na kingon achun MLA phabep, Tourism Department Director leh All Manipur Angling Association President ho pan anala cheh uvin ahi.
Hiche toh kilhon’a Manipur “Sangai Festival” kibol nalah’a ding’a athupi pen na mun Hapta Kangjeibung mun’a stall ho ahiding bang’a aumlou akimudoh in chule janhi (Nov 22) Sangai Festival anikho 2 channi jeng in jong stall tampi ahom keu in aum nalai in ahi tin Minister chun aseiye. Geldoh thei khat chu ningkum achun stall ana lhahsam jeh in anakiboi in ahin tukum in vang stall a-ong atamval kit jeh in akibojo kit tan ahi ati.
Thulhut kimu dungjui’a hiche stall arrangement kibol na’a mi khat le ni phatchomna kihol aum’e tin akiseiye. Chule Stall tender kihop petchun mi phabep stall hong dan in aum un ahin midang kom in aman tamjep in akijoh doh jeh uva stall atam jo hi a-ong a um hinte tinjong ginchat nathu anakiseiyin ahi.

PM Modi lamkai na NDA kidin tepi ding’a Dr. M Nara in mipite temna nei

Imphal, Nov 23(ET): Trade Union in Charter of demand 12 anasem tosot nan Centre Trade Union in ahung lhung January nisim 8 le 9 nikho leh General Strike bol dia thuphon anei utoh lhon in tunin Trade Union Manipur a Coordinating body in Manipur Press Club mun’a Union ho kisuhkhomna khat anagong in ahi. Hiche achun AITUC President Dr. M Nara, Trade Union Coordinating Body Chairman L Sotinkumar, Convener kshetrimayum Santa, INTU General Secretary Y Ranapratap, TUCC Secretary Khomdram Janeshore leh UTUC Secretary K Manoranjan hochu sahlut tah in anakou uvin ahi.
Hiche toh kilhon’a BJP natoh deilou vetsah na’a Central Trade Union in General Strike bol ding ati hi mipiten atosot cheh ding in Dr. M Nara chun temna aneiyin ahi. Chule Prime Minister Narendra Modi in vai ahinhop akon natong ho kithopi ding tah sang in labour law chom chom apodoh in worker ho chanvou jouse anung lah gam tan ahi ati. Worker ho ding gelkhohna jal’a Narendra Modi lamkai na NDA Government kidin tepi ding in mipite temna anei anei naban’a Charter of demand in worker holeh mipite phatchom na ding tampi apang in ahi tinjong aseibei.

Shine Zomi 2018 ana kimang

Guwahati, Nov 23: Zomi Welfare Association Guwahati in tuni in Sipagram, Panzabari, Guahati munna Shine ZOmi 2018 anamang uvin ahi. Hiche kingon achun L. Sweety Changsan, IAS, Principal Secretary (Home& Pol), Government of Assam jin gun in ana pang in chuleh T. Luanzamang, President in ZWA in freshers ho phondoh na le mipi het dinga dindoh sah na ana nei in ahi.
Kingon achun ZWA member lah a akum tam pen Nemhuai w/o (L) Khupthang chu pondum silpeh na ana nei uvin ahi. Kiloikhomna vice president Liankjankhup makei na in pachan na nei ho kipa thilpeh hopdoh na ana kinei in, kiloikhomna secretary Lamneimang Vaiphei akon in report peh lhah na ana um in ahi.
Kingon achun la sa them jat chom chom in lasah na ana nei uvin chuleh Vaiphei, Simte,Zou le Paite ho akon in nam lam jat chom chom vetsah na jong ana um in ahi.

EDITORIAL

Social Media jeh a Lock-up lutloi le chabel domloi

Tulai khantouna dungjuiya mi tamtah in Social Media aman chu ahidimong ahivang’a amanje helou le henasa’a mi chouna (phinna) a neihon jong aduchabep anehjing kit thou u hi kihilna’a neiphat hitadi ahi. Wangkhem Kishorchand kiti meilhei khangthah akham chabepma lekha he (them) khat nin BJP govt dem ata ademna a-Mobile Phone a video record abol Social media a athethang leh police in amat akitoh jeng’e. Ahin, hichepa hi midang, social media manje helou ho jong hidehlou, hitin kiseihenlang kibolleh police in eimat di ahi ti henasa’a abol ahi. Manipur a BJP govt kidem chu Chief minister N Biren in amatah kijumsona’a alah kit jeng jeh a police amatsah paikit ahi. Kishorchand hi ISTV a natong (staff) khat ahin BJP hon India ten British khang’a jalen gal anasat lai uva numei leng gal lamkai ‘Rani of Jhansi’ toh Manipur thusim amehbeh got uve ti alunghanna thu asei ahi. BJP ho adem ahitah jongleh phaten seile khohlou ahin tua chu ham ngeilou aman/ajah a nasatah a BJP govt atamset ahi. “govt nin nanop uleh eihung man uvin” tito akop nahlai chu hitia lhangphong’a mi, govt leh party jumsona leh chouna kaneileh kadu kaneh thei ahi tijong ahetsa ahi. Hitobang’a hangsan tah a thusei, govt dem ngapcha ahi tia minthanna jat khat hol jong hithei ahi. Ipi hileh tua chu adu aneh a police lock-up a umlo ahi. Kishorchand kitipa hin henasa’a abol mong ahin, midang tamtah invang Social media hi iti mandi ham ti helou, min lhem’a kichem’a Whatsapp le Facebbok ho ah ipi inopnop kiseijongleh kon eimandoh jouponte tiloi jong lock-up le Jail lutlo umjing ahi. Tua Chief minister Biren dehdeh hi Social media haman khat ahitolhon’a amale a govt ham, a-party ham demna thusei ho abolchah chah jengpaiji ahi. Manipur’a tugeiya Social media mankhel jeh a police in amat hi tamthou tadi ahi.
Eiho society a-jong Social media mankhel jeh tidi ham’a kon leuna panna toh a vohcha that loi, ngamdam thumna’a atu abetoh chabel domloi umjing ahi. Mi choudi (phin di) suhminset di ti lungput umdehlouva kidaina ham, totna ham tobang’a Social media a thu seiloi jong mi ngaimah khat ahikhahleh chabel adoploji ahi. Social media a thu kisei hohi tapkong kihoulim tobang akitivang’a japi lah a thu kisei ahitah jeh a mi ngaimah, mi suhminsetna hijeng thei ahi. Tuchung Chandel district Kut thua kidemtona leh kinahna ho Social media ah anathanglha jengtan ahileh aki ngohto, akina, themmo kichanto ho haosa Court geiya kihehto din kigih tona gei ana lhung’in hiche Kut organising Commiitee hon tua pat koiman Social media hoa hiche thua kinelna le lunghanna ho aseitahlou din temna leh gihna thu gei ahinseilo uve. Thu dang dang hoa jong kinelna, propaganda kithe tona leh kidemtona’a Social media kimang gam ahitah jeh in govt nin jong Social media hi iti vetkolna khat nuoiya umthei ham ti ahaboipi khat ahitai. Thilpha khat ahung lhungleh aching hon aphalam leh phatchomna lang’a aman/ajah jeng thei chu angol (amanje helou) hon kinahna, kinelna, kitomona cheh a aneilo ahijeh in chingthei tah leh aphalam’a thil manje hetdi hi kihabol jep ngai tadi ahi.