Eimi Times Jan 17 News

Eimi Times Jan 17 News

215
0
SHARE

Home Minister Shah in CAA thu’a tuni North East party hotoh kihouna neiding

New Delhi, Jan 16 (IANS): Home Minister Amit Shah in New Delhi khopi a Friday nikho teng North-east a tribal-based party lamkai ho chule BJP toh kiloikhom Indigenous Peoples Front of Tripura (IPFT) panna a Citizenship (Amendment) Act (CAA) thu a kihouna aneidiu ahi.

IPFT in lhakhat jouva CAA douna a kiphinna apat ahi’in, Khumulwng, Tripura Tribal Areas Autonomous District Council (TTAADC) headquarter a Thursday nikho a ni 11 channa dinga toumun kiphinna abol u ahi. Shillong, Meghalaya Chief Minister Conrad K Sangma in Shah toh kimuto dinga Meghalaya Democratic Alliance (MDA) delegate ho alamkai ding chule gamsunga Inner Line Permit (ILP) kichepi louna mun ho a chepi ahina dinga ngehna nei dinga aseiyin ahi.

Meghalaya Assembly in December nisim 19 nikho a ILP chepi nadinga Centre henga ngehna nei dinga kilungtoh tah a kilolna aneiyu ahi. Kilolna holeh state gazette notification hi Centre henga hetsahna aneiyu ahitai. “Delhi a ni phabep kaum u ahitan, ahivanga Home Minister in Delhi pam a tohgon akisem masat aumjeh a kakimupi thei loulaiyu ahi. Friday nikho teng meeting umding ahi”, tin JMACAB lamkai leh Indigenous Nationalist Party of Tripura (INPT) General Secretary Jagadhish Debbarma in thuso miho henga phone a aseiyin ahi.

IPFT member li panna delegate hohi party chief Narendra Chandra Debbarma leh general secretary Mevar Kumar Jamatia lamkaina a meeting a pang dinga Thursday nikho a Agartala a kon kipandoh u ahitai. Debbarma hi Revenue leh Fisheries Minister ahi’in chule Jamatia hi Tripura Tribal Welfare leh Forest Minister ahi.

IPFT leh JMACAB chule Tripura gam a um tribal hi a party hon gamsung hi CAA in ahop tha loudinga thumna aneiyu ahi. Tu masang December nisim 12 nikho a Tribal party atamjo in Union Home Minister toh kihouna aneiyu ahi. Achesa 2009 kum a kon IPFT in TTAADC upgrade bolding, tribal ho dinga gam tum semdoh ding chule 8th Schedule, Indian Constitution a tribal pao Kokborok pansah dinga IPFT in thumna apat ahitai.

TTAADC hin Tripura gamsung 10,491 sqkm area a hop thum a hop ni hi amaho gam ahi’in, mihem 12,16,000 chenna a 90 percent hi tribal hiu ahi. “December 12 nikho a meeting a Shah in Christmas jouteng athu vetlhah peh ding ahilouleh meeting bol ding kit a asei ahi’in, ahivanga ima umlou ahi”, tin IPFT chief in aseiyin ahi.

Delhi ajot masanga Debbarma in Bangladesh gam a kon gamdang mi hung chenglut atam jeh a gamsung mi dihtah leh sum dinmun a hahsatna sangtah aumin, CAA chule gamgi vettupna aum louleh tohmun neilou jeh a hahsatna hi sang cheh ding ahi”, ati. Tripura Rajya Upajati Ganamukti Parishad (TRUGP) kiti CPI-M tribal front in North East gam a CAA chepi lou dinga thumna anei ahi.

SDTOA, SDDU leh SDDWU in Jan 16 jan kim akon NH-2 a phat teplou economic blockade kou

Kangpokpi, Jan 16(UNA): Achesa January nisim 14 ni a Kangpokpi Bazar a themmona neilou truck driver chunga khanse a ASI Hitler sorkar in anatohna a kon ahaisah lou jeh a Senapati District Truck Drivers’ Association, Senapti District Drivers’ Union chule Senapati District Drivers’ Welfare Union in January nisim 16 jan kim a kon phat teplou economic blockade bol dinga thuphon anei uvin ahi.

Organization thum in phat teplou economic blockade bol dinga tuni a thulhuhna anei uva, Senapati DHQ a thuso miho henga aphondoh u ahi. Hiche masanga kiloikhomna thum in ASI Hitler anatohna a kon nidan 48 sunga state sorkar in ahaisah dinga thumna anei uva, akipe phat sunga ahaisah lou ule kiphinna sangtah bol dinga gihna aneiyu ahi.

Hetthei khat chu achesa January nisim 14 jingkah a Kangpokpi bazar a ASI Hitler, Kangpokpi Police Reserve Line hi truck driver khat chunga khansetah a chon a, thil umchan mikhat in video alahdoh a social media a atahdoh jouva athu kithang ahi.

Video a hi ASI Hitler in driver pa avoh a, chule Kangpokpi bazar a sun noi, mipi lah a driver pa hi meithal a kap ding chan agot ahi. Video akithan jou chule KSO Sadar Hills, SDSA leh CSO dang dang in hatah a asei jouva Kangpokpi SP in gangtah a themmona nei police pa suspend abol ahi. Thulhut dungjuiya ASI Th Hitler truck driver pa chunga akhanset na hi tuchung amasapen ahipon, tu masanga jong hitia hi avel vel a anachon jing ahi.

Hitler hi suspend mai mai hilouva anatohna a kon haisah dinga KSO Sadar Hills, SDSA chule CSO dang dang in thumna anei ahi. Thuso miho akimupi nauva President, Senapati District Truck Owners’ Association, John in SDTOA, SDDU leh SDDWU in ASI Hitler anatohna a kon haisah nadinga state sorkar nidan 48 phat apeh ahi, ati. Kapao kho, Kangpokpi bazar a cheng Dale abulu jeh ahi.

Ultimatum apeh u phat akichai chan a suspend abol uva, terminate abol loujeh uva organization thum lunghanna soh ahi’in, hiche jeh a kiloikhomna thum in January nisim 16 jan kim a kon National Highway 2 a phat teplou economic blockade bol dinga thulhuhna aneiyu ahi.

Sorkar in phat teplou economic blockade akibol nidan 48 sunga themmona nei police officer pa chunga action alah a terminate abol louva ahileh National Highway 2 a bandh kibol ding ahi, tin kiloikhomna thum in gihna aneibe uvin ahi.

Numei chapang suse khat hinkho lhung a jail a umding, adang khat kum 10 jail a umdinga court in thutanna nei

Imphal, Jan 16(ET): Noutuneshwari Devi, Special Judge POCSO Senapati in tunin Nungthek Karvanmuang kho, Noney Part II a cheng kum 52 a upa Ashin @ Kasinba in numei chapang khat hunam a asuhset jeh a hinkho lhung a jail a umding chule dangka lakh 2 leu dinga gotna thutanna aneiyin ahi.

Alangkhat a Rk Memcha, Session Judge Imphal West injong kum 32 a upa Meisnam Suresh Singh, Ghari Awang Leikai a cheng pa in achesa August 14, 2014 kum a hunam a mi asuhset jeh a section 136, IPC noiya kum som jail a umding chule dangka 15,000 leu dinga gotna thutanna aneiyin ahi. Vangsetna toh chapang nu Manipur Victim Compensation scheme noiya dangka lakh 6 compensation, sangtah a asuhkhah jeh a dangka lakh khat chule asuhset jeh a dangka lakh 5 anu a kon apeh diuvin jong court in recommendation ape in ahi.

Themmona neipa in lha ni sunga dangka lakh 2 apeh ding chule akisei sum hi vangsetna toh nu dinga anu henga apeh diuva jong thuhilna anei ahi. Hiche court ma ma a Wednesday nikho a themmo kichan Ashin @ Kashin @ Kasinba (52), in achesa August nisim 1, 2017 kum a numei chapang khat hunam a asuhset a chule kitohkhah nathei thil a asuhkhah jeh a gotna thutanna anei uvin ahi.

Hetthei khat chu themmo kichan Ashin @ Kashin (52), s/o (L) Mangainanba @ Adaitba, Nungtek Karvanmuang kho, Noney part II a cheng pa hi hiche case toh kisaiya achesa lha 23 vel kiholmo ahitan, mopohna nei police station hon kum masa July nisim 12 ni a court anga apui uva PR bond a alhadoh jou uva kon kiholmo ahi.

POCSO court in gotna apeh Ashin hin Senapati district a kum 15 a upa numei khat hunam na asuhset a tha ding anagot ahi. Judge in gotna thutanna aneina a compensation dangka lakh 5 chunga akijenna ding dangka lakh 1 apehbe diuva thutanna anei ahi. Case dossier dungjuiya Senapati district a um vengsung khat kom a vadung a aching a von asop pet a Ashin in numeinu hi aluchang song a ata peh a, khohelouva aum jouva aluppi ahi.

Thilsoh jouva Ashin jam ahitan, ahivanga police hon July 11, 2019 kum a amat u ahi. Court a apui jou uva kon Manipur Central Jail, Sajiwa a um ahitai. August 21, 2017 kum a vangsetna toh nu in kho ahet jouva thilsoh umchan aseiya, Ashin in anung lang a kon song a aluchang ata peh a, kho helouva aum thu asei ahi’in, kho helouva kaum nunga ipi eilo ham kahe tapoi, tia asei ahi.

Achesa January nisim 6 nikho a hiche court ma ma in themmo achan Meisnam Suresh (32), s/o Loken, Ghari Awang a cheng jong court in kum 10 jail a umdinga gotna ape tauvin ahi. Themmona neipa Manipur Central Jail, Sajiwa a kon court a apuiyu ahi’in, state AAP leh Defence counsel in athu asei jouva kum 10 jail a umding chule dangka lakh 15 leu dinga thutanna anei uvin ahi.

Court in Manipur Victim Compensation scheme noiya vangsetna toh nu compensation peh dinga jong thuhilna anei ahi. Hetthei khat chu achesa August, 2014 kum sun nidan 1.30 don a vangsetna toh nu ama room a a imut pet, chule a insung mite umlou kah a numeinu kap lukhop a asip peh a hunam a asuhset ahi.

BJP Govt. in akitepna abolpoi; NPF MLA

Imphal, Jan 16 (ET): Government in tuni chan in consultative meeting ahilou leh khat le khat machal na tohgon ho agong hih lai in ahi tin NPF MLA Leishiyo Leishing in tunin Sambu Raiping Katamnao Long inGeneral Conference cum Sports, cultural & literary meet aman ana’a chun anaseiyin ahi. Chuleh BJP lamkaina Government hin kum 2 masang’a NPF toh coalition government anasem masang’a NPF heng’a anakitep naho tuni chan in asubulhit hihlai in hiche nachung chon’a alliance hohi amin mei mei’a moh um tobang akihi ati. Aman aseibe na’a Government sem lah’a akipan vang in NPF MLA hon ama Constituency cheh’a khantou machal natoh ho abolthei pon chuleh Minister hohin Government hi amaho changseh a dan in akigel gam tauvin ahi tinjong aseibei. Kingon achun Ukhrul ADC Executive Member Ramshang Khapudang leh ADC member dang dang hon jong pan anala uvin ahi.

Lilong a pasal khat kikaplih

Imphal, Jan 16(ET): Tuni khojin jou nilhah nidan 6:00 vel chun Lilong Usoipokpi mairel kho a police le Anti drug association  Lilong in khamnathei a kivei mi mat ding a kal son na ana neinauva meipum hung kikap khat akon in khangthah khat ana mollem in ahi akiti.  Thina tohpa chu Md Sajid (22) S/o Md Ajad Pusam ahi akiti.

Nilhah lam nidan 6 vel a Lilong PS inspector Oinam Ajit makai na a Commando team  hon Lilong anti drug association hotoh kitho a Lilong Usoipokpi mairel khul a Md. Thembung (30) S/o Md. Rokshan Ali kiti khat inna khamnathei man ding a akalson na uva insung mihon mipi ana kou khom uva, hiche pet a meipum hung kikap khat akon a hiche khangthah pa chun thina anato ahi.

Thina tohpa chu alhang sung mi ahi akiti in ahi. Police in thilse sobe nalou ding in phaten vetsuina ana nei uvin ahi.

K Salbung-Peace Ground lamlen kisem natoh Forest department jeh a chelha theilou ahi, tia JAC-ONDWC in thuso nei

Imphal, Jan 16(ET): K Salbung leh Peace Ground kikah NH-150 kehletna natoh hi Churachandpur Division Forest Department in akalval a thu achoiya kiletsahna aneijeh a lha ni val natoh chelha theilou ahitai, tin JAC-ONDWC in mipi chule mopohna nei authority ho hetsahna thuso anei uvin ahi.

JAC-ONDWC in District sunga um Department chom chom toh meeting abol a, highway extension a dinga natoh hi district dinga thupi tah ahijeh a kithuto nading leh tosot nadinga meeting akou ahi’in, kihouna a Forest Department jong kouna kipe holah a pang ahi, tin D Mynna Haokip, Secretary, Information and Publicity Department, JAC-ONDWC thuso chun aseiyin ahi.

K Salbung leh Peace Ground kikah a extension work a mopohna kipe sub-contractor in lamlen pam a thingphung kitu ho phuh louva natoh achelhah pi theilou ahi’in, hiche jeh a achesa December nisim 9 nikho a JAC-ONDWC in DFO, Churachandpur henga lekhathot apeh uva, boina beiya natoh achelhah thei nadinga pan alah diuva ngehna anei ahi, ati.

Lamlen pam a kitu thingphung hi PWD Highway reserve gam hopsung ahi’in, ipijeh a natoh suboi leuva Forest Department in thingphung phuh ding atin ham? Highway a hiche kahlah lamlen hi asepen ahi’in, hiche jeh a che le vah le hon hahsatna tamtah ato ahi. Lamlen pam a cheng hon vut khu hi jingkah a kon nilhum chan athoh lel uva, tahsa dinga aphatlou jeh a hehna anei jing ahi.

Natoh achelhah theilou jeh a sub-Contractor in machine leh tha kilahna sum angaichat louna a akisumang e, tia hehna anei ahi’in, hiche jouse chunga Forest Department in phat atep hi tuni a kichai ahitan, ahivanga aphatna dinga thulhuhna ima umlou lai ahi. Hiche jeh a thilse soh a aumleh JAC-ONDWC themmo kichan theilou ding ahi, tin thuso chun aseibe in ahi.

Security force hon mun chom chom akon Dk. Crore 10 vel man khamnathei  mandoh

Imphal, Jan 16 (ET): Assam Rifles in tuni sunkim vel in bron sugar kg 4 lam bag thum lam a kichun Dk. Crore 8 ana mudoh uvin ahi.  Hiche brown sugar chu Indo-Myanmar gamgi pillar 78 channa  a TCS Scooter khat sung a ana kikoi na a ana mudoh u ahi.  Thuso kimu dungjui in gari nei pa chu ajaam doh man in ahi akiti.

Chukit leh Khudengthabi check post mun a jong Assam Rifles in heroin gm 400 lam a gih ana mandoh kit uvin ahi. Manipur sung a khamnathei kimat na jat chom chom lah a Imphal East le women Police Imphal East  in khamnathei po le a pang khat akon in WY tablet chang 1500 lam le heroin gm 22 lam a gih ana mandoh uvin ahi. Hiche khamnathei hin po nu chu Sabita alias Ibem,akum 30 a upa, apa min Md. Jabar, Khergao akon ahi akiti.

Thoubal police commando hon  khamnathei a kivei mi 2 gari guh na thu toh kisai in ana mandoh uvin ahi. Police in gari manna toh kisai kholchil na anei nauva Mohammad Rashid Ali, akum 32 a upa, apa min Md. Kheiruddin,  Moijing Awang Leikai akon chu Alto car khat toh Tangjeng mun a ana matdoh u ahi. Rashid chu thudoh kinei na a  upa Mohamad Abbas Ahamad, alias Masatana le  akithopi lhon na pang Mohammad Imran, Lilong Leihaokhong Leinung Hotel bolpa toh Md. Firoj Khan, Yairipok Kekru Makha Leikai akon toh kitho a gari aguh ji dan ule brown sugar semna ho  a pan alah dan u tahlang na ananei in ahi. Kholchil na kineibe na a   brown sugar kisem na ding a chemical kijang ho Abbas Ahamad  in asel ho chu Arapti Komla Ingkhol a mudoh in ana um in ahi. Phat chom khat jou in police in Yairipok Lamkhai akon in Firoz Khan  chu ana mandoh uvin ahi.

Alangkhat ah jani nikho a jong Assam Rifles in Khudengthabi Check post mun a crore 1.97 lam man khamnathei an amatdoh u ahi.  Khamnathei chu Maruti Suzuki Gypsy (Regn No. MN-05A- 7530), Suantak Letminlen Vaiphei, akum 28 a upa in ahin matdoh ahin, ahung toupa chu M. Thenmang Haokip, akum 23 a upa, Moreh akon ahi akiti.

 

Naga thu seilhah nahin, machal na ima ahin polut poi: Naga Hoho

Dimapur, January 16: Naga thu seilhap na kinei hin machal na ima ahin polut poi tin Naga Hoho in alungkim lou nao chung a phondoh na ahin nei uvin ahi. Naga thu seilhah in ana um vang in kumthah ahung lhung kit tan ima seipoh in aum hih lai in ahi tin Naga Hoho president H.K Zhimomi le general secretary K. Elu Ndang in thuso ahin nei lhon na a ana sei lhon in ahi.

Naga miten khovah thah anga jing u ahi toh lhon a kum somni lam kihou na hung kinei hi ngah phah le chai phat vang ahitai tin Naga hoho akon thuso kimu chun asei in ahi. Hiche kihou lhah na a kilolna kinei ho chung a gamsung boina ima le noh phah na um lou ding ahi toh lhon a Indian government in kinoptona bang a natoh na anei ding uvin jong kiloikhomna in temna ahin nei uvin ahi. Kihou lhah na a natoh na kinei ding jouse Framework agreement dungjui a akibol na ding in jong Naga Hoho in Indian government ang a temna ana nei uvin ahi.

Indian government in Naga ho suh khen ding tohgon na noi a Indian daanpi noi a kihou na chai ding atiu hi demna akinei in Naga sung a kiloikhomna phabep in hitabang Indian government natoh na chung a anopdan u phondoh na anei u jong hi vangset umtah ahi tin kiloikhomna lamkai teni chu tahlang na ana nei lhon in ahi.

 

Government in aventup gamsung a dihloutah a insahtheina permit kipe ho HC in akintheipen a alahdoh ding a Minister Shyamkumar in asei

Imphal, Jan 16(ET): Forest and Environment Minister Thounaojam Shyamkumar in tuni a ama office New secretariat a tukum Environment Directorate wall calender hondohna kin a aseina achun Forest dept. hon gammang ahiloule wetland hon ventup na natoh chom chom ah pan ala uvin chule masang a government in reserved area tia aphon khum hopsung a chenna in sahtheina ding a phalna kipekit ho akintheipen a High Court ahung kikum ding in asei in chule heche tobang inmun a cheng ho jong aki lakhom soh tan department in hiche tobang patta ho chu cancel ding a thumna kinei ahi ati.

Chule tuni a ahondoh Environmental Directorate office ho siem wall calendar ajong department in anatohdoh hon muthei ding in akitahlang in chule Environment directorate a officer holeh staff hon jong environment venttup nading in pan nasatah in lajing uvin thingnou keh phabep jong ahomdoh tauvin chule thingkeh phutheina ding mun ho ajong aphut jing uvin chule hiche department natoh bou nganse louva mipi hon jong ichennau gamleiset hih huh cheh ding in jong temna anei in ahi.

Tuni a calendar kihondohna achun ED a Director Dr. Y. Nabachandra Singh makaina in officer leh staff hon jong pan ala uvin ahi.