Ei le ei kiven jouna (Mabana kivenna di gelna a jong...

Ei le ei kiven jouna (Mabana kivenna di gelna a jong sahnit ni nitdi ahi)

547
0
SHARE

Ei le ei kiven jouna

(Mabana kivenna di gelna a jong sahnit ni nitdi ahi)

                1995 a pat Sahnit ni ihin nit kal u tunin kum 25 ahitai. Amasa lang chun Naga thingnoi lah a NSCN-IM hon mi jako (900) val eina that uve inatiuvin tulang’in mi sangkhat (1000) val ihinti kit taove. Athijat tam jeh a India govt nin agelkhoh di hileh sotna ageldi ahitai. Ahileh mi sangkhat eiki that, kho hijat kisumang ti ho geldohna leh govt kom’a kiphinna bouva Sahnit ni hi iman jing diu ham ti hi sotna pat hilai mun’a ana kiseijing khat ahi. Nit pou hite tina ahipoi. Ahin init ujongleh maban’a dia kigotna leh hitobang thu asokitleh hinjouna di gelnan jong mang uhite ti ahi. Hiche thina leh gam le kho kisuhmangna thu ah Govt kom’a ija vei lekha (memorandum) kipe jongleh aphachom loudi ahijong sotna hetsa ana hitai. Naga ho kom’a ipi jeh a hitia neina tha uham ti jong amaho ile thagam diu ahilouleh ijavei kidong jongleh asei lou diu ahi. Ipi kisei jongleh gal le thina hichan inato u chu gam jeh ahi. Ichen nao gam melma ten aduchat jeh u hipen ahi. Achengkhom ho bou gam kichua kinaji ahi. 1992 – 97 sung chu NSCN-IM hon Naga Limguard min’a kisel uva Manipur, Nagaland le Assam (NC Hills) a Kuki te gal’a inabol uva inatha u chu igam u aduchat jeh sehseh u ahipoi. Igam u ducha jongleh kivengjou di hileu hen koiman gal ibolkhum loudiu ahi. Hiche jeh a kumsehleh Sahnit ni init uva joupi le kho phabep mi ho hiche nikhoa kitha thusim isei jing uhi ahelou umtalou ahi. Nam khat achi anam’a vetda a thagam di kiti “genocide” leh gam khatna kon nam khat nodoh/suhmang di ti “ethnic cleansing” hi Naga thingnoi lah a Tangkhul te lamkaina NSCN-IM hon Kuki te chunga anachepiu ahi. 1990s kum lang chu Europe a Serbs, Bosnians, Croats ho chi le nam’a kitha tona leh ‘ethnic cleansing’ hi ana kibolto u ahi. Kashmir gam’a jong Muslim thingnoi hon Hindu ho atha le adeldoh ana kop u ahi. Hiche hi NSCN-IM hon Kuki te chung’a ahinpohdoh u anahi.

                Europe hihen Africa hileh hitobang chi le nam’a kidouna hoa UNO le America te gei kikumji vanga akiveng joulou ho thi thou thou ahi. India a jong chi le nam kitha tona aumteng govt ninjong mijouse ahuhjou dehlou, amale ama kiveng joulou chu athia pangjeng ahi. Sahnit ni sehleh gal umkit taponte tina aumpoi jong ana kiti jing ahi. Ningkum langa gal thu hung kisei kit chun Kuki kho venna di govt sepai ngaicha nam lamkai hon ahin hol uleh kho 100 val langjen’in “kei jong, kei jong” anati, tukum Chasat kho hung kihal kit. Nam sunga Defence Secretary ijat a um, kumsehleh Sahnit ni init u maban’a dia kigotna joh a ineilou u ipi aphatchomna um ahitadem! Naga te jong amahole amaho ana kidou uva lu ana kilato te ahijeh uva kivenna phapen chu kho khatna inn tam, mi tam tah chen anabol uleh tunia akigalpi kho neo chacha cheng te hi malchame kham jong hijilou ahi. Gal ana umlai chun akho kihal nunga ‘Grouping Centre’ kiti ana um’in gal athiple cheh kit jeng gam’u ahi. 1990s gal jou chun khochen vengchen leh kho/haosa kivaipohna langa kisemphatna ana kipanleh tua hi kivenna di ajeje umdi ahitai. Cheh le song’a kisa inn ngen hijongleh kho len ahilou laisea kivenjouna umloudi ahi. Mun jouse hihih jongleh gamgi langa ho semtup di phat kileloulai ahi. Hichena dia nam lamkai hon ‘Map’ avet uva hoilai lai lhang ipi lothei ham ti gel phaat ahi. Gal kiti hi leiset kichai kah a beilou di ahijeh in amale ama kiveng joulou chu athi thidi himai ahi. Govt kom’a mi heh a kiphin phin kiti jong aphachomlou tamji ahi.