Education(S) Dept. in Class 1 a kon 8 chan simlai ho dinga...

Education(S) Dept. in Class 1 a kon 8 chan simlai ho dinga Saturday ‘No School Bag Day’ dia podoh

253
0
SHARE

Education(S) Dept. in Class 1 a kon 8 chan simlai ho dinga Saturday ‘No School Bag Day’ dia podoh

Imphal, Sept 4(ET): Department of Education (Schools) Manipur government in Class I a kon class VIII simlai ho dinga ‘No School Bag’ apodoh uvin, hiche thu a State Education (S) Department in ‘office memorandum asodoh ahitai.

Class 1 leh class 8 kikah simlai hon school sakhao gih tah tah niseh a apoh uhi amaho dinga hahsatna, dammo na chule nopmo na ahijeh a hitobang thulhuhna aneiyu ahi. T Ranjit Singh Commissioner, Education (S) Department in soi akaina office memorandum a class I a kon class 8 simlai hohin school curriculum syllabi toh kisai routine work, chule home work aneijing jeh uva games and sports, extra-curricular activities kiti amaho khantouna ding adang dang ho bol nading phat anei joulouvu ahi, tin aseiyin ahi.

“Department of Education (Schools) in simlai ho dinga themjilna mun hi thil hetbe nadinga thanopna mun ahiding adei ahi’in, hiche jeh a simlai ho hahsatna olsah nading chule school hi simlai ho dinga kipana mun ahithei nadinga hitobang agon ahi’in, chule Saturday nikho seh hi sorkar in ‘No School Bag Day’ tia phondohna neidinga kilolna anei ahi”, ati.

‘No School Bag Day’ hi government school, government aided school leh Unaided/private school jousen class 1 a kon class 8 simlai ho dinga achepi ding ahi. Saturday nikho jouse a simlai hon school a sakhao akipoh loudiu, school in ‘extra curricular activity, games and sports, recreational activity leh adang dang agon peh ding ahi”, tin office memorandum chun aseibe in ahi.

CM in Kakching a project chom chom hondohna nei

Imphal, Sept 4(ET): Chief Minister N. Biren Singh in Kakching district a project chom chom Wednesday nikhon hondohna aneiyin ahi.

SDC Office, leh Sub Registrar Office, Kakching, Pallel PHC a Type 3 Staff quarter, Integrated Tourist Destination, Kakching Garden hondohna aneiyin, Kakching Garden, Kakching a kin gon amang uvin ahi. Chief Guest a pang Chief Minister in ahoulimna a Manipur gamsung in khantouna lampi ajot ahi’in, ahivanga bandh, blockade, strike leh adang dang in natoh asuhboi a chule gamdang hetdinga gamsung asuhminset ahi, ati.

Gamsunga gamdang mi tourist hunga hi kum ni sunga kal ahi’in, kum seh a foreign tourist 8000-1000 kikah in igam u avil ahi, ati. Achesa kum ni sunga sorkar in welfare programme hi anempen a akhantou nadinga pan alah a, GTC, GTH, CMST, CMHT kiti project dang dang apat ahi’in, sorkar in gamsung miho deibanga na atoh ding ahi, ati.

State sorkar in twihahna gam a phondohna anei thu a CM in Centre henga compensation thum nadinga data thot ding asem ahi, tin aseiyin chule chang khel a kolbu lei, gehu chule adang dang bol ding ho loubol miho apeh ding ahi, ati. Agriculture department in dangka crore 13 lhing proposal Planning Department henga athot ahitan, ni ni, nithum sunga crore 6 vel asodoh diu ahi, tin jong aseiyin ahi. Chule twihah jeh a boina suhlhap nadinga sorkar in loubol miho twi chopna Irrigation pump set 257 ahop doh ahitai, ati.

Jal Shakti Ministry noiya um Jal Jeevan Mission noiya 2024 kum kah a gamsung miho don ding twi kipe ding, New Development Bank in BRICS noiya hiche mission a lut ding dangka crore 3000 phatsahna aneiya sanction abol ahi, ati. Swachh Bharat Mission (Urban) noiya Ministry of Housing and Urban Affairs (MoHUA) a kon Kakching Municipal Corporation in Cleanest City in North East Zone award amu nauva official holeh Kakching mipi ho akipapina thu jong aseiyin ahi.

CM in Kakching district a um Treasury Office hi kisajou kon ahitan, hondohna kinei vahding ahi, tin phondohna aneiyin ahi. Kin gon a Health and Family Welfare Minister L. Jayantakumar, CAF&PD Minister Karam Shyam, Kakching AC MLA Y. Surchandra, Wabagai AC MLA Fajur Rahim, Wangjing Tentha AC MLA Paonam Brojen, Addl. Chief Secretary Dr. Suhel Akhtar, Director (Health) Dr. K. Rajo, DC leh Kakching SP, Chairperson chule Kakching Municipal Council member holeh adang dang jong apang uvin ahi.

MPCC in 57-Henglep AC sung’a Booth Level Congress Workers hotoh interaction bol

B.Lalboi Gangte

CCpur. Sept. 4(ET): 57-Henglep Assembly Constituency hopsung’a Booth Level Congress Workers holeh Manipur Pradesh Congress Committee in Lower Komkeirap Community hall mun’a tunin interaction kingon ananei uvin ahi. Kingon achun Thangting Area leh Leimatak Area sung’a Booth Level Congress Worker hon pan anala uvin chuleh Gaikhanngam President, MPCC, T.Manga Vaiphei, EX-Minister, PCC Members Hengep, M.Okendro Vice Presidet, MPCC, Lalnget Hmar President, DCC-CCpur, Sate President SCC hon jong pan anala uvin ahi.

Kingon phatsung’a T.Manga Vaiphei, EX-Minister, PCC Member Henglep AC in houlimna aneina’a Henglep AC sung’a Booth Level Congress Committee hohi det tah’a Party ding’a pan lajing ahi. Chuleh election chung’a losam na kinei jong leh tuni chan’a mopoh naho party ading in sumil louhel in pan ala jing uvin ahi. Tuni interaction kingon hi public meeting ahipon Henglep AC sung’a Booth Level ah lamkai ho jouse toh giltah’a kihouna ding’a kingon hi kinei ahi. Hiche kihou na’a kon Congress workers ho tha-le jung pehbe na khat ahi ding kakinem in ahi ati. Henglep AC sung’a Pradesh Congress Committee members ho jouse toh Booth level meeting hi Manipur Pradesh Congress Committee toh asung thu machal nading leh maban’a panlah nading chuleh Booth level a workers ho ding’a tohgon ahi. Booth Level, Block Level, District level, AICC level, MPCC level ho’a ngaichat leh natoh ding dan ho ngaidan seikhom’a nading’a hiche tohgon hi hung kichelha ahi tinjong aseibei.

Lalnget Hmar, President CCpur Congress Committee in houlimna aneina’a CCpur District sung’a Congress MLA 2 bou akinei tan ajeh chu adang Congress anakinei ho chu hina kicheh neilou’a suhchop, touchup tho ngen ahi. Hiche ho jeh’a party in lungneo na anei khah ding kanom pon chuleh politics ahi jeh in party hi khatvei hat intin khatvei party dang hat ding mong ahi. Chuleh Party lamkai hohin Unite, Block ho ah party hat thei nading’a eima sakhao kisoh’a kikal song ahi in hiche hohi Party in ipi lampang’a party lam akon kibul phu na um thei ding ham ti hohi Party lamkai hon agel khoh uva Block level, Booth level, District level ho’a lamkai hotoh pan lahkhom’a party ading’a muchi pha tuphat ahi tai ati. M.Okendro Vice President MPCC in aseina’a 2022 a Congress in Manipur ah Govt. sem’a Manipur gamsung kikhel nakhat pohdoh ding’a kigot na nei ding chuleh Party hin term 5 sung Govt. apoh sung in achennao gam India setna ding natoh akinei pon, Party dang natoh khat jong lethuh na akinei pon ahi ati.

Gaikhanngam President MPCC in houlimna aneina’a Booth level congress workers Interaction kigon hi thinglhang gam’a ding’a anivei channa ahi toh lhon in Booth level Interaction hi worker hotoh Party lamkai ho giltah’a kihoukhom na ding’a kibol ahi. India in chamlhah amu’a kipat Congress Party hin India sung vaihop na ahin nei ahi tan ahin tua Govt. po vaihom hi lha-khat sung Govt. apoh nalai bang bep ahi in ngah lel lou ding ahi.  Tuchung State sung vaipoh nathu hi Centre in jui ding’a daan kisem ho ajuilou jeh leh deilhen chom anei jeh’a State Govt. vaihop na hiti bep’a chelha ahi. Hetthei khat chu Henglep AC sung’a Congress in anapoh lai leh tu’a BJP in apoh ahi ipi ki khel na mipi ding’a apohlut tah em chuleh Congress phatlai’a natoh bangkhai’a um ho jouse jong tuni chan in atong un ahi. Chuleh kum 3 sung’a ipi schemes thah apoh lut tauvem tihi gamsung mipi te kigel ngai khat ahi ati. Aman aseibe na’a Booth level interaction kingon hi India sung’a ding’a Manipur ah kinei masapen ahi in chuleh Booth level Congress workers ho atha ahat uleh party ding’a lungmon um ahi ati.

STDCM in Railway Line kisa ‘boycott’ bol dinga gihna nei

Imphal, Sept 4(ET): Centre sorkar henga ST list a Meetei/Meitei ho pansah nading recommendation akithot lou Coordinating Body of Scheduled Tribe Demand Committee in demna aneiyin, kiphinna vetsahna a railway line kisahna natoh ho boycott bol dinga gihna anei uvin ahi.

STDCM office mun a Coordinating Body Convenor L Romesh in thuso miho akimupi na’a, phat sottah kithot ahitan tua hi kiphinna kikehlen ding ahi, tin aseiyin ahi. Chule September nisim 5 kah a sorkar in ST list a Meetei/Meitei ho pansah nadinga recommendation athot louva ahileh railway line kisahna natoh kikhah (Ban) ding ahi, tin aseibe in ahi.

Sorkar chule STDCM in kihoutohna neilouva natoh achepi a ahileh thil lhung ho sorkar mopohna hiding ahi, tin Romesh in gihna thu aseibe in ahi.

Teachers’ Day kiman ding thu a JSCC in hilchetna nei

Imphal, Sept 4(ET): Manipur simlai kiloikhomna phabep kigop khomna Joint Students’ Co-Ordination Committee in Teachers’ Day kiman ding dan thu toh kisai a thuso ana nein a uva mipi phabep le government in hetkhel na ana nei utoh lhonin hilchetna ahin nei uvin ahi.

Kiloikhomna in thuso ahin neina uva Teachers’ Day in achesa kum phabep sunga jilkung le simlai kikah a  phatna ahin poh tah sangin, simlai aneijou phabep in jilkung ho thilpeh jat chom chom ahin peh jing utoh lhon in simlai lekha simna a bol dinga lom angai na khat dan in ahung umdoh in hiche hin ape jou lou ho lungthim ahin suh nat jing toh lhon a aman dan thepdi ti a thuso ana kinei ahi akiti.

Hitabang thilsoh hochunga Education department in vetsui nahin nei dinga hetsah na ana kinei ahin, hinlah government le mipi in ahi lou lam a analah khah utoh lhon in simlai kiloikhomna in nopmo sah na akinei in, simlai ho pui se thei ding ahi jeh a government ang a vetlhah na nei dinga ngehna ana kinei ahin, mipi ang a kiloikhomna in teachers day kiman kikhah dan  a kisam phongle a anti national tia ki sam le hin simlai ho hihen mipia ding hijongle thilpha ahin pohlut lou ding ahi tin kiloikhomna in hetsah na ahin nei uvin ahi.

JSCC in Teachers Day man ding akha loudan le simlai ho in kibang chat a aman khom ding u adei joh dan u ahi joh dan jong hetsah na ahin nei uvin ahi.

Twi hah thu a policy sem dinga Irabot Foundation in ‘Farmers Meet’ bol

Imphal, Sept. 4(ET): Manipur Press Club mun a Irabot Foundation in Farmers Meet abol uvin, gamsunga twi ahah thu aseikhom uvin ahi.

Gamsung a twi hah jeh a boina toh a loubol miho ‘rehabilitation’ peh dinga thumna phabep neidinga kihouna a kilolna anei uvin chule kilolna ho apanna memorandum Governor henga apehlut diu ahi. 2019 kum a gamsunga twi hah phondohna dinga kilolna a hi thinglhang leh phaicham mi loubol ho akidalha aumlou nadinga jong asei uvin ahi. Twi hah in atohkhah loubol miho angaicha compensation chule phailei asuhset ho khel a akihinso nadiu apeh diuvin jong thumna anei uvin chule sorkar in don ding twi manbeiya apeh diuvin aseibe uvin ahi.

School, college leh university mun a loubol miho chate themjilna manbeiya apeh diu, meivah leh twi manbeiya apeh diuvin thumna anei uvin chule langneina beiya ‘compensation leh rehabilitation’ apeh diuva thumna jong anei uvin ahi. Crop compensation leh rehabilitation kipehna a nehguh, deilhen chom chule khat in phatchomna a aman lou nadinga asei uvin, loubol mihon hahsatna ato kibe cheh ding ahi, tin asei uvin ahi.

Sorkar in twihah jeh a boina toh a loubol miho dinga ‘grievance cell’ asem peh diuva kihouna a ngehna anei uvin, hahsatna toh loubol mihon aboinau asei nadiu, hehna asem thei nadiu chule compensation amu nauve ti photchenna dinga asem diuva ngehna anei uvin ahi. Civil society hon district jouse a twihah thu kikholna a pan alah diuvin jong ngehna anei uvin ahi.

Irrigation project chom chom ho thu a sorkar in pan alah a chule twi lahna ding Canal semna a pan gangtah a alah diuvin asei uvin ahi. Gamsunga ‘water and farmers policy’ sem dinga jong thumna anei uvin chule achaina a ‘shifting cultivation’ khel a adang agonpeh diuvin thumna aneibe uvin ahi.

Irabot Foundation General Secretary Kh Gopen Luwang in vangsetna toh a loubol miho dinga kigong compensation leh rehabilitation hi vangsetna toh hon amudiu hinam ti atahsan lelna thu aseiyin ahi. Loubol mihon phailei aphatchompi loujeh uva ajoh uvin, mi haosa ho akichoh uvin, phailei laiya factory thah thah semna a aneiyu ahi, tin President, IFM Thongam Ajit in aseiyin chule gamsunga phailei ga alhom cheh cheh hi hiche jeh jong ahi, ati.

Farmers Meet a Vice President, AMUCO K. Helen, President, AMWOVA Y. Kunjarani, President, AMESCO BK Moirangcha, President, NRC S.Susilkanta, President, COHR Phulindro Konsam, President, Poirei Leimarol Apunba Meira Paibi Lup L. Memchoubi jong apang uvin ahi.

Babysana case CBI in lah dinga kigotna neita

Imphal, Sept 4(ET): Central Bureau of Investigation in Standard Robarth Higher Secondary School boarding a thi Ningthoujam Babysana thi thu lah dinga nopna anei uve, tin tahsan umtah thulhut in aseiyin chule case hi CBI Kolkata in atuh ding ahi, tin thulhut chun aseibe in ahi.

Singjamei Police station in FIR number 138 CBI khut a pehdoh dinga ngehna anei CBI in aphatcha asan peh a chule thukholna dinga official order jong Special Crime Branch (SCB), CBI Kolkata henga athot u ahitai, ati. Case hi Deputy Inspector General of Police, Abhay Singha in atuh maithei ahi. Hetthei khat chu Lungnila Elizabeth case jong CBI Kolkata in anatuh ahi.

Thulhut dungjuiya Special Crime Branch, CBI Kolkata henga case apehnau hi kal khat val ahitai. Manipur Police hon asem FIR chule post-mortem report jong kholna aneiyu ahitai. Dan dungjuiya case hi Special Crime Branch in atuhding ahi tia official notice sodoh ding ngai ahi. Hiche thu a hi Manipur DGP leh Chief Secretary in pan alah a ahileh thukholna hi ni-ni nithum sunga kipan thei maithei ahi. Mipi ding gelna a case hi CBI khut a kipelut ahi, tin thulhut chun aseibe in ahi.

Hetthei khat chu Babysana thi thu CBI hon akhol diu thumna a JAC chule gamsung mihon kiphinna abol jing ahi’in chule Babysana apa injong CBI ho henga statement peh ding anopna thu aseiahi. Babysana thi thu a gamsung a phat phabep boina um a, themjilna mun ho chan geiya boi ahi. CBI hon case alahdiu ahitai tia thulhut umhi gamsunga boina umjing suhlhapna ahiding tahsan ahi.

Hengbung a KVK in ‘Awareness cum Mela’ bol

Kangpokpi, Sept 4(UNA): Jal Shakti Abhiyan noiya Community Hall, Hengbung mun a Tuesday nikhon KVK Hengbung, Kangpokpi district in ‘One day awareness cum Mela’ abol uvin ahi.

Dr. H.C. Bhattacharya, FGI, Hengbung (ex- Director Extension, AAU Jorhat), Dr. Harshajyoti Barooah, Dean, College of Horticulture, FGI Hengbung (former Director, Horticulture, Govt. of Assam), Dr. A.K.S. Raw Rawat,  Executive Director,  EMRC/ORDC, Hengbung leh Dr. N. Jyotsna, Senior Scientist leh Head, KVK Hengbung kin gon a Chief guest, guest of honour leh functional president a apang uvin ahi.

Loubolmi, simlai, khangthah, nam lamkai 213 vel in Awareness cum Mela kin a pan ala uvin, Jal Shakti Abhiyan nikho toh kitoh a thingnou atu uvin chule twi kholthem ding thu a poster exhibition, agro forestry model leh phailei ventup ding jong KVK scientist leh official hon vetsahna anei uvin ahi. Jal Shakti Abhiyan noiya natoh chom chom umho thu hilna anei uvin, Dr Jyotsna in kikhopna a leiset chule twi athupi dan aseiyin ahi.

Dr Bhattacharya, Dr harshajyoti leh Dr AKS Rawat injong ‘natural environment, climate change leh adou ding dan chule natural resource athupi dan ho’ thupi a houlimna anei uvin ahi. Kin gon a loubol miho thingnou, theiphung  muchi, anchi mu, muchi chom chom ahom uvin chule twi kholthem ding dan, natral resource management leh tukhang toh kitoh a phailei bol ding dan ho thu kipehna lekha jong ahom uvin ahi.