Education Dept a Oja ho lhalo kikumsah

Education Dept a Oja ho lhalo kikumsah

162
0
SHARE

Education Dept a Oja ho lhalo kikumsah
Education department nuoija oja/jilkung (teacher) hon tolop (salary) kisuhlhom jeh a kiphinna anei u hi govt nin ipi tohgon aneijeh ham kichehsel’a akihetlou vang’in kiphinna thei khat chu hithou di ahi. Ajeh chu govt natong ho dia lhalo kiti hi aphat che dungjuija kal di (tamjepjep di) mong ahin ipi atileh Education department a oja ho lhalo hi kalsah malah kisulhomgo ham ti hi datmo thei tah ahi. Hiche jeh a Primary School Teacher ho a pat Graduate Teacher ho gei kiloikhomna hon kiphinna a Imphal a Education Director office anokhum utoh Mass Casual Leave lahdi atiu toh hibang soh u ahi. Govt sum alhahsam jeh a oja ho lhalo lhomsah di ti jong hilou di, natoh bon phate tonglou ti jeh jong hikitlou di ahi. Ijat chetna Education department a Teacher ho ‘Grade pay’ kilhomsah ham ti akihetlou vang’in chutilom’a alhom chom dijong tahsan umdehlou ahi. Ahin seikhamlouvin kisulhom jongleh alhomchom chu alhomchom ahijeh a kiphinna umdoh ahi. Education department hi department thupi loi khat ahito lhon’a kiphinna tamna department khat jong ahi. Abangleh Contract Teacher ho Regular kilhahsah lou jeh a kiphinna loi, thinglhang district ho ah Science leh Maths Teacher alhing’in aumpoi tia kiphinna loi umjing ahi. State govt nin School ho semhoina di tohgon – “School Phahatganse” ti chepidi atin alangkhat ah Teacher ho lhalo akikumsah hi ipi kibolna ham ti hi Teacher association ho lunghanna ahi. Tunaicha jong chun State Education department nin govt school ho semphatna din School chapang lhomna School kinai hosese gopkhom di ti thuphon ahinneije. Hiche hi phatah a akichepileh thinglhang phaicham kitilou govt school tamtah suhbeija umdi tina ahi. Ajeh chu govt school hoa school chapang umlouna (lhomna) hi thinglhang le phaicham kibang  ahi.
Tulai inchen genthei hogeijin ajokham kham’a hahsasa a Tution Fee pehna Private School hoa achete akaisahgam ahijong seilouva het ahi. Ipi jeh a hitobang dinmun lhung ham ti hi mipi’n jong anagito a semphat theithei semphat thei hidi ahi. Govt school hoa Teacher hohi athemlou ujong hidehlou u ahi. Ahin govt school a natong (teacher) chu phatah in school kaihih henlang phatah in mi hil hih jongleh anikhotha kikah dehlou ahijeh a koiman khohsahna aneilou ahi. Govt school, govt Secondary School, govt college akitivang’a Imphal khopia hohi akaidi mi kichu kit thou ahi. Hiche hi ivetleh lekhasim, school kai akiti vang’a amun nin apoh jep ham ti thei ahi. Ahin hiche jong hi amun jeh ahileh thinglhang lang’a kho ning khatna Private school phatah Hostel toh kibolkhom school hoa akai di chapang tamtah tah umkit, phaicham leh Town/khopi jep hogeija  kon chapang thinglhang mun gamla lang’a school kai dia kikoidoh loi jong umkit ahi. Thinglhang district hoa hi Private school kiti umlouhel hileh govt school hojong hitilom’a chavai lou maithei ahi. Tulai muntin’a Private school aumtah jeh a govt school hi koiman jong deitalou, govt School hoa Teacher honjong koima bon kaiduhdahlou tidan’a anatohnau khohsahna aneibehlou ahi hi govt themmo chan di ham, school chapang holeh anu apa te themmo chan diham, oja ho joh themmo chan diham ti ngaito thei hidi ahi.