Dk. crore 22 DPR kibol chaisa Behiang a Chandrakirti Memorial Park semdoh...

Dk. crore 22 DPR kibol chaisa Behiang a Chandrakirti Memorial Park semdoh ding koiman adoudal theilou ding ahi tia Chairman MANIREDA in sei

94
0
SHARE

Dk. crore 22 DPR kibol chaisa Behiang a Chandrakirti Memorial Park semdoh ding koiman adoudal theilou ding ahi tia Chairman MANIREDA in sei

B.Lalboi Gangte

CCpur. April 27 (ET): Tunin 60 Singngat A/C MLA leh Chairman MANIREDA Ginsuanhau in Behiang kho a Manipur Govt. in gangtah a hondoh ding’a akoi Maharaja Chandrakirti Memorial Park kisem na mun vetlhah na aneiyin Chandrakirti Memorial Park kisem ding koiman adoudal theilou ding in aseiyin ahi.

Hiche mun’a thuso miho kom’a aseina ah Chitwi khuh’a song kitun na a thuchang kijih kilangdoh leh Maharaja Chandrakirti kengkho nung aum jeh a hiche mun melchet a aum ahin chule Manipur Govt. in 1872 kum a hiche songpeh chung’a kengkhonung um leh thuchang kijih hin melchih na khat apodoh in, hitoh kilhon’a hiche munhi State Govt. in mun poimo tah a alah ahi. Hijeh a December 19, 2017 kum’a Manipur Chief Minister N. Biren Singh in Maharaja Chandrakirti Memorial Park mun ding a songphu na aneiya hiche munhi Manipur Ancient and Historical Monuments and Archaeological Sites and Remains Act, 1976 pansa a mun poimo hidinga melchih ahin, agam hi 607.50 Square Meter ahi ati.

Alangkhat’a thinglhang miho khangthu’a Chitwikhuh mun, Chibu hi  Raja Goukhothang Guite soh le kol dia akimat na mun in akisei in, thinglhang mite leng kilhenna mun pi injong akisei in ahi. Hiche Park kibol ding hi thinglhang mite ding’a kipana hibehseh lou in ahi. Chule hiche toh kisaiya Zomi Chief Association (ZCA) thuso bol chung chang’a Ginsuanhau in aseina ah hiche gam hi  government in protected land dia aphondoh dungjui’a tu le-tu’a  seithei ima kineilou ahin chule hiche gam toh kiseiya Haosa in jong  thunei na aneilou ahi ati.

Park hi akisemdoh jouteng vengbit apoimo dungjui’a 10th leh 11th IRB kila ding ho Behiang Area a koilut ding’a Chief Minister kom’a ngehna kinei ding ahi ati.  Tu’a natoh asaojo chelhah nung’a doudal ding kithi doudal thei thil jong hita lou meithei ahi tin jong aseiyin hitobang a doudal nom ihiuleh intellectual circle toh seikhom hi henlang, Chief Association in jong intellectual circle toh vel ijat vei ham seikhomna anei nao chung chon’a lampi dang umthei dia amudoh hou pohlut hileh phading ahi in seikhom na umlouva khatvei toukhom’a thulhuh na hi State Government kalna dia lhing joulou ding ahi jong ati. Aman aseibena ah mi 3 mi 4 lunggel ngaidan hilouvin keima jong mipi palai dia lhendoh kahi dungjui’a hitobang thil ho kihetsah to a seikhom thei hileh thilpha hiding ahi ati.

Park bolna dia Dk. Crore 22 DPR jong kibol chai ahi tan hiche Park kibol na chung a Singngat Behiang kikah lampi Four Lane a sem hiding chule Behiang hi Moreh toh kibanga Sumkol veina munpi dia kibol doh ding ahi dan aseiyin hiche nadinga haosa hon kithopina aneph ding in ngehna jong aneiyin ahi.

Nat umlouna ho a ‘relaxation’ koiya ‘Lockdown’ chepi jom dinga Meghalaya leh Mizoram CM panna a state phabep in thumna nei

New Delhi, April 27: Maharashtra, Odisha, Meghalaya le Mizoram Chief Minister hon Monday nikho a Prime Minister Narendra Modi toh video-conference’ a kon meeting anei nauva India gam pumpi a coronavirus nat vettup nadinga lockdown phat suhsaobe ding atosot uvin ahi.

Ahin, Chief Minister hon ‘economic activity’ ho a relaxation’ koi ding adei nau thu asei uvin, Covid-19 nat kisei louna chule natna nei atamjo adamdoh na mun ho a olsah dinga asei uvin ahi. Monday nikho a video conference a houlimna neiya Chief Minister koh (9) holah a Meghalaya Chief Minister Conrad Sangma le Mizoram CM Zoramthanga jong pang ahi.

“Lockdown hi May nisim 3 jouva jong chepi ding kadei uvin, Meghalaya gam a Green zone (Covid case umlouna) district ho a ‘relaxation’ koi ding kadeiyu ahi”, tin Sangma in aseiyin ahi. Meghalaya gam a tuchan geiya Covid 19 positive case 12 lhing ahitan, natna nei khat thi a chule mi 11 kijen am ahitai. Case kisei hohi abon a Shillong khopi a hi ahi.

“Mizoram gam a Covid 19 case khat bou um ahi’in, atahsa ol jep jep ahitai. Ahivanga Myanmar, Bangladesh le Covid 19 natna aumna state toh gamgi kikop kahijeh uva khoutah a kivenna kaneiyu ngai ahi”, tin Mizoram Chief Minister Zoramthanga in Aizawl khopi a kon thuso miho henga phone a aseiyin ahi. “May nisim 3 jouteng lockdown olsah ding kagot diu chule economic activity ol ol a kiphal ding ahi. Keiho mu dan a, mun phabep a dinmun aboijeh a lockdown umsah jom ding ahi. Ahivanga Green zone ho a natoh phabep phalthei ahi”, tin aseibe in ahi. Mizoram gam a Covid-19 case khat bou um nalai ahi.

Odisha Chief Minister Naveen Patnaik in natna vetkol jou nadinga gamsung pumpi a lockdown hi lhakhat chejom pi kit dinga adeisah na thu aseiyin chule testing centre sem be dinga jong thumna aneiyin ahi. Video conference a pang CM phabep ho banga Patnaik in May nisim 3 nikho a kichai ding ‘lockdown’ phat suhsaobe dinga thumna anei ahi, tin Odisha Health Minister Naba Das in aseiyin ahi.

“Odisha gam a coronavirus jeh a boina hi state adang dang a mihem jat chule test kibol jat toh tekah dinga kivetup jou ahi”, tin Das in aseiyin ahi. Lhakhat le keh sunga agamsung in test 25,103 abol a, Covid-19 case 110 photchen ahi thu asei ahi. Odisha gam a positive hi a case 110 lah a 37 hi damdoh a chule mikhat thi ahi.

Odisha gam hi India gam a state holah a lockdown phong doh masapen gam ahi’in, gamsung miho in a aumtup louva ahile May lha kichai lang teng coronavirus case 36,000 val umdinga ginmona aneijeh uva March 24 nikho a lockdown aphondoh ahi.

Delhi Chief Minister Arvind Kejriwal in Lockdown lahdoh ding bailam louding ahi, tin aseiyin ahi. Delhi a Sunday nikho a coronavirus case hatah a kal ahi’in, covid 19 case 293 kiseibe a, agom a natna nei 2,918 lhing ahi. Delhi khopi a hospital chom chom a natong doctor le nurse panna a healthcare worker phabep injong natna akilah ahitai.

Gujarat Chief Minister Vijay Rupani in India pumpi a lockdown phat suhsaobe ding thu hi Centre in gamsung ding agel a thulhuhna aneiding ahi, ati. Centre in hiche chungchang a thulhuhna anei state in ajuiding ahi, tin aseiyin ahi. Bihar Chief Minister Nitish Kumar in, tuchan geiya mihem crore 4 ‘screened’ kibol ahitai, tin aseiyin ahi.

West Bengal Chief Minister Mamata Banerjee in Rajasthan (Kota) a tang den a West Bengal simlai ho gamsunga akile nading uva kithopi dinga aseiyin ahi. Uttarakhand CM in Uttarakhand a tourism sangtah a atohkhah ahi, tin aseiyin chule PM panlahna a tourism industry hindoh kit nadinga pan kila ding ahi, ati.

Video conference a Prime Minister Narendra Modi in Chief Minister ho henga ‘lockdown’ hi sangtah a phachom ahi, tin aseiyin, achesa lhakhat le keh sunga lockdown jeh a gamsung mi asanga sim hinkho kihuhdoh ahi, ati. March nisim 24 nikho a kipan Lockdown hi April nisim 14 chan umding ahi’in, ahivanga Chief Minister chom chom in hatah a aseijeh a May nisim 3 chan kisuhsaobe kit ahi.

Lockdown jeh a munchom chom a hahsatna toh ho kithopi na nei ho chunga KSO in kipathu sei

Imphal, April 27(ET): Coronavirus natna jeh a India pumpi lockdown akikoi jeh a gamsung pumpi in hahsatna ato ahi’in, Kuki Students Organisation (KSO) in khopi le state dang dang a um branch hotoh simlai ho hahsatna olsah nadinga pan alah jing ahi.

KSO in NGO, district administration le government agency chule adang dang toh kitho a gamdang a tangden simlai ho kithopina thil apeh ahi’in, Manipur gam a jong district KSO branch in nat douna dinga sorkar akithopi jing ahi. KSO General Headquarter in gamsung chom chom a tangden tribal simlai ho kithopina a panla a changval chule organization chunga kipathu aseiyin ahi.

United Theological College, Bangalore a theology course bol a Manipur, Mizoram le Nagaland gam mi tribal simlai atangden ho kithopina pe a Udupi Chimagalur (Karnataka) MP Shobha Karandlaje chunga kipathu aseiyin, ABVP NE region, Manipuri Diaspora Bangalore (MDB), Manipuri Meetei Association Bangalore (MMAB) in Bangalore a cheng Manipuri ho ration ahop jeh a kipathu asei uvin, Oasis India, Sunflower Foundation le Sunbird Trust panlahna jong akipapina thu asei uvin ahi.

RSS le My Home India, SPUNNER chunga kipathu aseiyun, chule Darjeeling MP Raju Bista amatah in hill station a tangden ho avil a akithopi jeh a jong kipathu asei uvin ahi. Coimbatore le adang dang a Kuki ho kithopina neiya Social Welfare Minister Nemcha Kipgen, Benjamin Mate, Vice President le Kikonbou Newmai, ex-MLA lamkaina a state BJP panlahna chunga jong kipathu asei uvin ahi.

Chule COVID-19 nat douna dinga mopohna neitah a panla ho, frontline healthcare worker, state natong chule adang dang ho chunga jong kipathu aseibe uvin ahi.

Tengnoupal gamgi mun ho a police station 3 le Outpost 2 hon dinga MDA in thumna nei

Imphal, April 27: Tengnoupal district gamgi a police station thum le police outpost ni hondoh be angaiye, tin Manipur Democratic Alliance of Manipur in aseiyin, district sunga state police personnel alhahsam thu aseiyin ahi.

MDA state secretary Lein Gangte in party head office, Babupara, Imphal a press conference abolna a gamdang mi hunglut atamjeh a district sunga khamnathei kiman tam ahi, tin aseiyin ahi. Kwatha Khunou, Tengnoupal district a thusoh chungchang a asei ahi. India le Myanmar hi gamgi 398 km lhing kikop ahi’in, Tengnoupal district a gamgi 44 km lhing ahi, ati.

District a gamgi atamjo  hi gamlah ahijeh a dan dihlouva hunglut gamdang miho le khamnathei po hon gamsung lut nadinga phatchomna aneiyu ahi, tin Gangte in aseiyin ahi. Gamgi a dinmun velha dinga MDA convenor M Tombi lamkaina a team hon Kwatha Khunou ana vil u ahi. Kwatha Khunou, border pillar 81 kom, Yangoupokpi, border pillar 73 chule Lamlongei kom a police station phatah a kivaipo thum hondoh dinga MDA in thumna anei ahi.

Tuningphai, border pillar number 87 kom chule Bongbal Khullen, border pillar number 79 kom a Police outpost ni hondoh angaiye, tin jong aseibe in ahi. Gamkaiya police station thum le police outpost ni akihondoh be a ahile khamnathei chule dan dihlouva hunglut ho kivetup jouding ahi, tin MDA lamkai pa in aseiyin chule adang dang a jong police station le outpost aganna thei pen a hondoh angaiye, ati.

Chief Minister, Union Home Minister chule External Affairs Minister in International border pillar number 73 a kon 82 chan gamgi thu a boina asuhlhap nadinga ‘proposal’ peh dinga aseiyin ahi. Khudengthabi post a um Assam Rifles hon mihem tahsa sunga kipo sana biscuit amatdoh theiyu ahi ahivanga gamgi a sumkol veina akikha vanga Myanmar a kisem Win dum packet 45,000 Pallel a kiman ahi, tin MDA convenor Tombi in aseiyin, Assam Rifles, state police ho kitho a gamgi avettup ngai ahi, ati.

Gamkaiya um kho phabep a muchi panna a neh le chah phabep jong team hon ahop peh uvin ahi.

Northeast gam 8 lah a gam 5 a coronavirus nat umtalou ahi: Jitendra Singh

New Delhi, April 27: Ministry of Development of Northeastern Region (DoNER) Minister Jitendra Singh in Monday nikhon North East gam a state 8 lah a state 5 hi corona natna aumlouna gam ahitai, tin aseiyin ahi.

State nga hohi Sikkim, Nagaland, Arunachal Pradesh, Manipur le Tripura gam ahi, tin aseiyin ahi. “Gamkaiya state thum- Assam, Meghalaya le Mizoram gamsung hi corona nat umlouna gam ahipon, ahivanga state thum a hi achesa ni phabep sunga positive case thah kisei lou ahi”, ati.

Northeast gam a coronavirus case alhom jeh hi Prime Minister Narendra Modi lamkaina noiya India sorkar in achesa kum gup sung gamkai khantouna ding agelkhoh jeh ahi, tin Singh in aseiyin ahi. “Emergency phat jenga jong gamkaiya ngaichat ho lenna a kipo jing a chule angaicha khoh thil ho alhahsamna umlou ahi. March nisim 30 a kon Air India chule Indian Air Force lenna a Northeast gamkaiya supply kipolut jing ahi. Hiche hi Prime Minister Modi thupeh ahi’in, Northeast le Jammu and Kashmir chule Ladakh ho khohsah dinga thuhilna anei ahi”, ati.

“North East gam 8 a sorkar hon pontho tah a pan alah a chule phat boipet a Centre toh pan alahkhom ahi. Shillong kho a headquarter um a North-East Development Council in hiche phat sunga hi kihoutoh na a seiphat umtah a pan alah ahi”, tin aseibe in ahi. Lockdown akichepi masanga kon gamkaiya state sorkar ho a dinga DoNER in dangka crore 25 lhing fund agon peh ahi, tin MoS Singh in aseibe in ahi.

Gari akon kitanglha hopding’a kipo anchang  Auto driver khat in nungthah

Kpi, April 27(UNA):  Tulai gamsung a lockdown aum jeh in mipi hon nehding alhasam louna ding uvin godown ho akon anchang akipodoh jing in hiche tobang chun Twilang area a hopding anchang chu FCS godown kangpokpi DHQ akon aki pohdoh na ah lampi ah gari chung akon bag 5 Imphal-Tamenglong lampi a Kpi Dhq leh Toribari kikah a mun chom chom ah aki tanglha in ahi. Kum 23 a upa Auto tol Ch. James Singh April 24 ni chun a Auto tolna a anchang bag aho chu amu in gonoi hijong leh abon a gari sungah aheng in inmun ajotpi in ahi. In alhung phat chun amihet ho jouse ahoupi in gari akon anchang kitanglha thu akhol vel in ahi. Nilhah in local youth KYU ho ahetsah toh lhon in hiche anchang chu PMGKAY leh OMSS noiya Lamchok leh Tahar Basti mipi ho heng a hopding ahithu aja in chule ama chenna Kpi Ward No. 2 akon aga podoh uvin FCS godown a authority ho heng ah apelut uvin ahi.

Athil bolphat thu thuso mihon ahet utoh lhon in achenna inmun ah anailut uvin a houlimpi uvin ahi. James in aseina achun insung hahsaleh a cheng hijong leh kitahna hi keima akon kamansah nompon kapi leh kanu in ka senneu apat natohna a kitahtah a hinkho manding a ei khoukhah jing uh ahi in amanna dingdol tah a kaman jeh in kakipah leh jeng e tin aseiyin ahi. A lhangsung MLA nu Minister Nemcha kipgen leh OC Kpi in jong akipapi leh uvin James le a insungmi ho kithopina peh tei hiding in jong asei uvin ahi.

 

CAF&PD official ni meithal a kigih a akivoh nau thilsoh Union in demna nei

Imphal, April 27(ET): Chandranadi Toupokpi (Narankonjin), Imphal West a ‘inspection duty’ a che CAF & PD official ni petrol pump neipa le ama mi (gang) hon lungsetna beihel a ana voh nau thilsoh CAF & PD Department Union in demna sangtah anei uvin ahi.

CAF & PD official Haobam Bobby (Civil Supply Inspector) le L Ibotombi Singh (Area Officer) in achesa Friday nilhah a M/S Heibok Filing Oil Pump inspection abol lhon na a oil pump counter jan nidan 9 jouva jong akihong nalaiye, ti ahetdoh lhon jou ahi’in, thilsoh toh kisaiya Police department a hehna asem uvin, Wangoi Police station a IPC Section 353/326/307/34 chule Arms Act 25(1-C) noiya FIR ajihlut tauvin ahi.

Thulhut dungjuiya, counter a kon mikhat hungdoh a meithal akichoiya, CAF & PD official tenin jan gei nunga counter ibol a nahon uham tia thudoh aneiya, dan dungjuiya kiphal lou ahi, tia aseijeh a avoh pan ahi. “Lekha kavetsah lhon a, pump khol le ding duty a hung kahi tia kasei lhon vanga eingai peh lhonlou, eivoh tei tei lhon ahi”, tin Haobam Bobby in thuso miho henga aseiyin ahi.

M/S Heibok Filing Oil Pump neipa jong ahungdoh in, mi vo pa kham louva amajong amaho lah a pang a, ka nunglanga kon ka von a eikai nauva kalhuh a kakeng veiling kakisuhkhah (fracture) ahi, tin aseibe in ahi. Police ho hetsahna kanei uvin, ahivanga police ho ahunglhun masang thilsoh ahi”, tin Bobby in aseiyin ahi. M/S Heibok Filing Oil Pump neipa le a mihon avoh nauva amai, anah le adang dang akisuhkhah ahi.

 

PM Modi in Chief Minister hotoh kihouna asem na a ‘economic activity’ aban ban a hon ding adei thu sei

New Delhi, April 27: Prime Minister Narendra Modi in Monday nikho a coronavirus toh kisaiya state chom chom a Chief Minister hotoh video conferencing a kihouna anei nauva May nisim 3 a kon ‘national lockdown’ olsah nading thu chule Covid-19 case umlouna Green zone ho a ‘economic activity’ pat nadinga aban ban a tohgon sem ding thu aseikhoh uvin ahi.

Covid-19 thu a Video-conference abol alivei channa lhing ahitan, PM Modi in May nisim 3 khel langa gamsung khonung ding gel ngai ahi, tin aseiyin ahi. May nisim 3 teng le lockdown anivei channa phat lhing ding ahitai. Hotspot mun ahiloule ‘Red zone area’ ho a lockdown guidelines khoutah a jui ding chule Covid-19 case alhomna ‘Orange zone’ a akikhel tei ding hi khohsahna peh a, aban a ‘Green zone’ hisah dinga tupna neikit ding ahi, ati.

Lockdown suhnem jep ding (grade) thu a PM Modi in sorkar in economy chohing kit ding, gamdang dang a tangden gamsung miho puidoh ding, migrant worker ho chule Covid-19 nat douna a galsat ding hi mijouse mopohna ahi, tin aseiyin ahi. Achesa March nisim 25 nikho a coronavirus nat achal louna dinga India gam pumpi a lockdown kichepi pan ahitai.

Lockdown jeh a sumkol veina ho tang soh ahitai. PM Modi in avel a April nisim 14 nikho a lockdown phat asuhsaobe kit ahi’in, ahivanga tua hi economy activity chohing thei nadinga dan a olsah jep ahi. Lockdown hin mihem hinkho ahuhdoh ahi, tin PM Modi in Chief Minister ho henga aseiyin, India gam sanga neojo a gam tamtah a pandemic jeh a mi tam thi jo ahi, tin aseiyin chule virus jeh a India boina hi kichai naisai loulai ahi, ati.

State hon phatchomna asuhdet a chule economy jong asuhhing diuvin Prime Minister in aseiyin, ahivanga virus jeh a vangsetna toh aumlou nadinga pan nalah teidiu ahi, ati. Meghalaya Chief Minister Conrad Sangma in PM Modi thuthot aseiyin, May nisim 3 a kon lockdown ki olsah (relaxed) jong le lockdown lunggel hi umjom nalai ding ahi, ati.

“Milham ho hinkho tongkha thei kikhelna pohlut nadinga hangsanna ineiyu ngai ahi”, tin PM Modi in aseiyin, ahin, alungthim a itobang kikhelna ding lunggel anei ham ti aseichen pon ahi. PM Modi in gamdang a natong ding ache ho hahsatna ahetpehna thu aseiyin, state chom chom a natong a che ho aumnau state a chief minister hon akhohsah uva, agenthei nau asuh ol peh dinga temna aneibe in ahi.

Sorkar in gamdang a natong (migrant worker) million a sim kile nadinga panlah ding hi lung opkaina anei ahi, ajeh chu tamtah akitol uva ahile nat umlouna gam a jong natna lhung thei ahi. Maharashtra Chief Minister Uddhav Thackeray in agam mi gamdang a natong ho kile nadinga ‘special train’ ngehna avel vel a aneiya chule state dang dang injong bus sol dinga aseiyu ahi.

Centre in aphatsah poi, tin PM Modi in aseipon, ahivanga state hon migrant worker beiya factory le industrial unit ho iti ahon diuham ti avet diuva aseiyin ahi. India gam pam a tangden gamsung miho puidohna dinga Centre tohgon thu jong aseiyin ahi. Gamdang a tangden India gam mi akinungpui ho ahung lhun lhun ule ‘quarantine centre’ a koi pai ding ahi, tin aseiyin chule state in ‘quarantine centre le hospital’ amaho umna ding agon peh dungjuiya hiche tohgon kingam ahi, ati.

Gamsung miho ahung kile teng ule boina ato louna diu chule a insungmite ho natna thei dinmun a akoi lou nadiu ahi, tin Modi in aseibe in ahi. Covid nat douna a state sorkar panlahna athupi dan thu avel vel a PM Modi in asei ahitan, natna vettup nading hi Centre le state chule mipi mopohna ahi, ati. State khat adammo a ahile gamsung pumpi apuisuh/asuhlhuh thei ahi, ati. Hiche thu asei hi West Bengal chief minister Mamata Banerjee in central team ho state a acheu chungchang a Union Home Ministry akimaitopi jou ahi.