District thah ho power kipe leh kipelou um

District thah ho power kipe leh kipelou um

607
0
SHARE

District thah ho power kipe leh kipelou um

                            Kangpokpi district a Civil mipi kiloikhomna hon ahung lhung ding August 9 kah a Kangpokpi district a thaneina ahidi bang’a kipeloulai ho akipehlouva office leh Office/Staff angaicha ho alhing’a akipehlouleh Independence Day boycott boldi ti keu hilou, nikhat le akeh (36 hrs) National Highway 2 a ‘total shutdown (bandh) boldin jong gihna ahinneije. District thah 7 kisem kal kum 2 le akeh lang valta a amin maimaja District leh aminmai maija DC le SP touna district hi atamjo tithei ahi. Thinglhang district thah Kangpokpi, Pherzawl, Kamjong, Tengnoupal leh Noney hi abon tabang uva amin maimaija district hina anei u tobang hinalai ahi. Ahin phaicham district thah – Kakching le Jiribam hin tugeijin district thah hina’a thaneina leh angaicha ho eikipepouve tia phunna leh kiphin gotna ima umkhaloulai ahi. Jiribam leh Kangpokpi hi district thah holah a Mini Secretariat leh department office dang dang atamjo neisa ahilhon’in chutitah a sembe sahbe dileh power alhing’a pehdi hi hahsalou didol tah ahi. Jiribam hi power eikipepoi ti malah alhingset tobang’a kipe’a district boundary (gamgi) kisan aguh guh a themkhat khatna kehletbe di ti natoh chelha jing tithein ahi. Tamenglong district Tousem Police Station hopsung’a Tatbung kho kom’a Leinganpokpi Police Station ti kitungdoh a hichu Jiribam Police in atoupha nahlai ahi. Hiche hi Tamenglong district a Naga leh Kuki hon Tamenglong district gam kinehna/chuna ahi tia lunglhailou jeh a Imphal-Jiri lampi’a ni 2 bandh kou dia thuphon anei nahlai ahi. District thah 7 ho kisemdoh jouva General Election thupidom um masatna chu 2017 State Assembly Election tilou tukum April lha a MP (Lok Sabha) election ana kibol chu ahin, hichea chu Jiribam leh Kangpokpi hin district thah hina tah a Election ho anabol/a EVM kikoina leh vote simna hoa jong district HQ teni ana kimang ahin district thah dangse hovang akisemdohna district HQ hoa anabeh nalai u ahi. District thah ho ‘boundary’ (gamgi) kaina umhih lai jongleh District khat chu athah hihen alui hileh district ahithou thou jeh in thaneina leh office le staff ahididol’a peh di mong ahi.

                      UNC (Naga) hon district thah 7 hohi apomlou (recognize) abollou vang uva Naga mipi jousen atosot hidehlou, Noney leh Kamjong district mipi hon kipah tah a alem u ahi. Kangpokpi district hi UNC leh asunglang’a atoson Naga thingnoi seilouva het hon athangthip jeh uva district 7 jouse kinunglahdoh hen ti aseijing u ahi. Hiche thua kihouna jong avel vel’a aumvang’a asuh asah umdehlou, kon ipi seileh govt nin hitobang thil thupi aboldohsa nunglahdoh di kiti chu ahiloudi beh ahijong ahet thou diu ahi. District gamgi hi akiboina dipen ahijeh in hiche thua ima akichehpoi tia district bangkhat thaneina kipelou kiti hi adon achang hilou ahi. Chomkhah louva district thah hoa office leh department ho koisoh keidi chu hahsa jongleh power alhing’a kipelou kiti vang hi govt nin khohsahna aneilou jeh hijengdi ahi. District thah delna’a kiphinna anahabol jing hi Kangpokpi leh Jiribam ahin tua hi Jiribam in gamgi kehbe di bou aboipi ahitan Kangpokpi hi power akipepoi tia kiphinna umjing nalai ahi. Bandh hi koi dia phachom louhel ahi. Aneopen’a seidia Kangpokpi district a bandh aumleh Mao lang’a hon thil le lo Kohima langa ajohtheilou jeh uva Imphal a ajohna diu boidi ahi. Akihoutoh theithei kihoutoh hi phapendi ahi.