Directorpa atohmun akon lahdoh ding ngehna a JNIMS doctor hon ‘mass casual...

Directorpa atohmun akon lahdoh ding ngehna a JNIMS doctor hon ‘mass casual leave’ la, director office nokhum u; Kiphinna alahdoh diuva JNIMS Director in ngehna nei

385
0
SHARE

Directorpa atohmun akon lahdoh ding ngehna a JNIMS doctor hon ‘mass casual leave’ la, director office nokhum u; Kiphinna alahdoh diuva JNIMS Director in ngehna nei

Imphal, Jan 22(UNA): JNIMS a Assistant professor ho, senior Resident doctor holeh Associate professor hon Wednesday nikhon lunglhai lou vetsah na a ‘mass casual leave’ ala uvin, director office a akikhom uvin chule sorkar in tua director pa apanmun a kon alahdoh diuva thumna anei uvin ahi.

Assistant professor, Senior Resident doctors and Associate professor committee (APSRA) secretary Dr S Bikram Aditya in thuso miho akihoupi na a, committee in achesa 2018 kum a kon JNIMS authority ho henga non-PG senior resident/lady medical officer/ casualty medical officer panna a ‘tim scale promotion’ achepi ding, senior resident a post sanction kibol hop 50 promotion peh ding, non-PG senior resident ho dinga provisions teachers quota, leh adang dang thumna aneiyu ahi.

Committee in thumna ho bulhit ahi masanga athah a Assistant professor kilahna jong adoudal u ahi. Committee in hiche thu a Chief Minister, Medical Minister, Health Commissioner avel vel a akimupi a, chule thumna anei hou hetsahna aneiyu ahi’in, vangset umtah a thumna anei houhi tua JNIMS director Dr. Bhimo Singh in phatah a pan alah loujeh a abulhit peh loulaiyu ahi.

Doctor jousen hahsatna ato hi director pa jeh ahi, ajeh chu aman aphatna dinga pan alahlou ahi, ati. Tu le tua Assistant professor kilahna dinga notification no 1/514 kiso hi Chief Minister chule APSRA committee member hon kihouna chom chom anei nauva kinoptona asem utoh kitohlou ahi’in, tua Asst. Professor kilahna dinga interview chelha hi vohhai ding ahi, tin thumna aneibe in ahi.

Tua director pa hin JNIMS a phat sottah hahsatna toh a jilkung ho phatchomna ding sanga Asst. professor athah lahding joh hi agelkhoh ahi, tin ngohna aneiyin chule janni a thuso mangcha a Anesthesiology leh JNIMS Radiotherapy a Asst. Professor lahna dinga notification asodoh a, anikho ma ma a interview abol ahi, ati.

Thumna eibulhit peh nading uva ‘cease work strike’ bol ding kanom uvin, ahivang’a, strike jeh a mipin hahsatna sangtah ato ding jeh a hichan geiya panlah loudinga kilolna kineiya, hiche khel a ‘mass casual leave’ joh lah a director office a kikhom ding a kinoptona kinei ahi. Director pa apanmun a kon akilahdoh kahse a office a ki kikhom ding ahi, tin jong aseiyin ahi.

Alangkhat a, JNIMS Director Dr Th Bhimo in kiphinna bol doctor hon kiphinna abol u alahdoh diuvin temna aneiyin, Essential Service Maintenance Act hi JNIMS a kichepi nahlai ahi’in, hiche dungjuiya hitobang kiphinna akibol ding kiphal lou ahi, ati.

Director pa in office chamber mun a thuso miho akimupi na’a, APSRA committee, JNIMS in kilolna aneinau copy Chief Minister henga apehlut uva chule ‘mass casual leave’ lah a director office a kikhop dinga kilolna aneiyu hetsahna aneiyu ahi. Office nokhum ding hi ‘democracy’ toh kitohlou ahi’in, APSRA member hon A block a umkhum diu hi ginchat hilou ahi. Essential Service Maintenance Act noiya mass casual leave hi kiphal lou ahi, tin aseibe in ahi.

JNIMS a mopohna nei authority hon akisaipi state sorkar department hotoh ‘tie scale promotion’ hi nasatah a angaito ahi, tin aseibe in ahi. Akilheng ding dol senior resident/tutot/demonstrator/Lady Medical officer/ Casualty Medical officer 50 percent promotion hi JNIMS a achesa February 2019 kum a kon kichepi Senior residents/tutors/Demonstrators/ lady Medical officers/ Casualty Medical Officers sanction kibol regular post toh kitohlou ahi’in, kum seh February nisim 1 a kon kichepi ahi, ati.

Kiphinna bol doctor hon dan dihlouva kiphinna abol loudiu diuvin ngehna aneiyin, tua hi MBBS Manipur University exam achelha laitah chule damlou ho khohsahna jal a ‘mass casual leave’ alah lou diuvin temna aneibe in ahi.

CorCom leh ULFA in Republic Day ‘boycott’ bol dinga kouna nei

Imphal, Jan 22(ET): Co-Ordination Committee (CorCom) Manipur (Kangleipak) leh United Liberation Front of Assam (ULFA) thingnoi kiloikhom hon January nisim 26 nikho a India in Republic Day aman nading nikho Western South East Asia (WESEA) gamkai mihon boycott abol diuvin thakhat a thuso anei nauva kouna anei uvin ahi.

Thal choi thingnoi kiloikhom hon January nisim 25 jan kim a kon nisim 26 nilhah nidan 6 chan chedoh louva inmun a mipi aum’a, boycott atosot diuva aseiyu ahi. Akisei phat sunga ‘emergency service’ ho ki khamgah louding, angaiya banga kimangcha diu ahi, ati. Indian Constitution hi WESEA gamkai miho joulhep na ding manchah a pang ahitai, tin thuso chun asei uvin ahi.

Citizenship Amendment Act (CAA) douna a kiphinna chelha hohi WESEA miho, adeh a khangthah ho khahdohna hiding ahi. Ipijeh a CAA idoudal uham, ipijeh a gamdang mi (foreigner hihen lang India gamdang mi hijongleh) ikichat uham? India gam mi ihiuleh India gam mi adang ho tobang hiding ibol a ikichat uham, ti thudoh chom chom ging ahi. Ihinau mansah louding ideiyu ahi tihi donbutna bailam pen ahi”, tin thuso chun aseiyin ahi.

India sorkar in ipi tohgon anei ham ti kholdoh nadinga kum 70 hi WESEA mite dinga phat sottah ahi. Scheduled Areas, Scheduled Tribe status, ILP leh adang dang hon eiveng nauvin te ti itahsan uva ahile eiho leh eiho kijoulhep ihidiu ahi. Indian Constitution hi sorkar deibanga avel vel a semphatna kinei thei ahi. Kashmir gam a tobang a hitia hi moh lahdoh jeng thei hi ahi”, ati.

India in WESEA mihon chamlhatna ding athum suhthip nading tohgon anei ahi’in, AFSPA hi gamsung miho kichat sah a kipehlut sah nadinga ana kichepi ahi’in, ihat uva ihansan louvu leh ipao jeng ujong ikitho ngamlou diu ahi. Ikiven nadiu alampi hi ‘sovereignty’ bou ahi. Kum 70 bou hinalai Indian Constitution in kum asang a lui Manipur (Kangleipak) leh Assam chon leh khan chule thusim adeiya akhel theilou ding ahi, tin thuso chun aseiyin chule gamsung mihon eidinpi u ahijeh a WESEA in chamlhatna dinga pan alahna a lolhinna umding ahi, tin thuso chun aseibe in ahi.

UPRFM in Jan 26 nikho leh pungkah 12 sung total shutdown umding a phongdoh

Imphal. Jan 22: United People’s Revolutionary Front of Manipur (UPRFM) hon a 71 veina Republic Day akiman ding toh lhon in Manipur gamsung ah pung kah 12 sung Jan 26 nikho ading in aphongdoh uvin ahi.

Hiche total shutdown hin tarik 12 jingkah nidan 6 apat zan nidan 6 chan hiding ahi. Chule gamsung mipi hon hiche Republic day a pan lalou ding in jong temna anei uvin India in Manipur mite ho abol dan hou lunglhailouna ho geldohna leh Manipur gamsung in ama cham a kivaipohna anei sasa a India bahkai a kikoilut deilou vetsah a a hiche nikho a hi nitin kimanchah choldo hiding a thuphon anei uh ahi.

KNF-N in Kuki te umna mun ho’a  Republic Day boycott bolding a phondoh na nei

Kangpokpi, Jan 22(UNA):  Kuki galguh bol SoO a jao lou KNF-N in Kuki ho umna lhang a Republic Day boycott bol ding in phondoh na ahin nei uvin ahi.

Hiche boycott chu January nisim 26 jingkah nidan 1 akon nilhah lam nidan 5:30 chan hidng ahi akiti. Kuki National Front-Nehlun in Republic Day le Independence Day hi kumseh a  ahin boycott jing u ahi. Hitabang boycott kikou nahi India te chamlhat na mu na ding a Kuki pu le pa te natoh na le panlah na kihet peh lou jeh ahi tin kiloikhomna in hetsah na ahin nei uvin ahi.

Hetthei khat chu achesa achesa 2016 kum a Church campus khat sung a Addl. DC Kpi in boycott kikou ana nahsah lou jeh a KNF-N in grenade khat ana koi u ahi.

Kuki te in tu le tua angai chat pen hi ka chan ding uva lom gamn le go ahin, hitabang gam dal na ding a achesa 1960 kum a gal deilou na jeh a Kuki National Assembly (KNA) ana kip hut doh ahi dan jong tahlang na kiloikhomna in ahin nei uvin ahi. Kiloikhomna tup le doi he jouse in India doudal na anei a, gamsung akon anodoh nom ding u ahi ati. Hiche boycott sung a govt office,  themjil namun le kailhang mun jouse akikha na ding in jong kiloikhomna in hetsah na ahin nei uvin ahi. Kiloikhomna in KLO/KLA  in Hengjjang haosa kitha na chung a suhtheng na ahin nei uchu  hilchetna ahin nei uvin ahi.

Kiloikhomna in asei na a KLO/KLA 4 leh B. Gamnom haosa pa chapa Paotinthang alias Paotin Kipgen chu sepai hotoh kitho a kiloikhomna intelligence member ni that a apan dan u tahlang na ahin nei uvin ahi.

Kiloikhomna in Paotin Kipgen le KLO/KLA Alvinash Khongsai kimat na chung a kipa thu phon na ahin nei uvin ahi. Kiloikhomna in Haogoulen alias Jalen Khongsai,  Chalwa kho akon tu le tua KLO/KLA Kangpokpi Town Commander jong mi kitha na chung a ajao dan tahlang na ahin nei utoh lhon in KLO/KLA in Alvinash Khongsai ex-cadre ahe tia phondoh na ahin nein a uchung a  jou thu ahi dan hetsah na ahin nei uvin ahi.

KNO/KLA in SOO ground rule palkeh a Hengjang kho a toltha na anei uhi amasapen ahi lou danjong hetsah na ahin nei uvin ahi. Achesa 2016 kum a JCB driver 4 ana kidnapped dan ule, KNO/KNA cadre Sinai camp a um ho in Molsohoi a JCB driver thum ana tha dan ho u jong tahlang na ahin nei uvin ahi. KNF-N in hitabang natoh na SOO ho in anei na chung a central govt thudoh ahin nei uvin, gamsung chamna suhkeh ho kivetsui nalou chung a Home department in  vetsui na anei ding uvin temna ahin nei uvin ahi.

MU a dan dihlouva na kitohna tam cheh cheh

Imphal, Jan 22(ET): Imphal Times thuso mihon Manipur University a VC anahi AP Pandey suspend akibol jouva I ti em, ti kholna anei nauva University kivaipohna (administrative affair) a adih louva sum kimanna tam cheh amudoh uvin ahi.

AP Pandey in Bullet proof gari ana kichoh dan chule hiche gari tua hi hoiya um em, ti aseidoh uvin ahi. Suspend kibol Vice Chancellor anahi AP Pandey in bullet proof car hi dangka lakh 59 a achoh ahi, tia University authority hon aseiyu ahi’in, hiche tobang gari chohna dinga akisei sum jat sanction akibol na umlou ahi, tia aseiyu ahi. Hiche hi IT thuso mihon jou ahi, tin asei uvin ahi.

Thuso a natong special investigation team hon akhol dungjuiya Bullet proof gari hi University Grant Commission in General Development Assistance Scheme noiya (GDA) XII plan sunga sum sanction abolna a kon achoh u ahi. Sum hi University a angaicha facility leh infrastructure ho semphat nadinga kipe ahi.

Scheme guidelines dungjuiya akipe sum hi Infrastructure, simlai ho ding, health centre, Central library, campus semhoina, manchah (equipment), Innovative Research Activities, non-teaching leh teaching staff chule New Extension Activities leh Outreach programme a dinga bou kimangthei ahi. Thukholna anei nauva Toyota Fortuner gari (bullet proof) chohna dinga aman dangka 23,18,400 lah a hop 90 (20,86,560) hi University in apeh ahi’in, expenditure hi General Development Assistance Scheme noiya ‘financial assistance’ kipe a kon alah u ahi, ati.

Bullet proof gari hi Prof AP Pandey umna quarter, Officer Colony, Sanjenthong, Imphal East a tuchan a man louva um ahi. Prof AP Pandey in University fund lamdih louva amanjeh a suspend akibolna kum khat leh lhathum val ahitan, tuchan a Manipur University a regular Vice Chancellor um loulai ahi. Gamsung kivaipohna a hetna neiya Jarnail Singh, IAS hi MU Administrator dinga alhendoh uva, in-charge Vice Chancellor panmun kum khat leh lha thum vala tuh ahitai.

Achesa October 11, 2018 a Jarnail Singh in Administrator panmun atuh pan a, Ministry of Human Resource Department in Prof AP Pandey atohmun apehkit kah ahilouleh VC thah alhenkit kah a dinga University Vice Chancellor mopohna leh Administrator panmun atuh dinga alhendoh u ahi. Meghalaya High Court a acting Chief Justice anahi T Nandakumar (Chairman) leh MK Choudhury, Tezpur University ex-vice chancellor (Member) hina a kisemdoh independent enquiry committee in athu akholna a amudoh ho MHRD henga apeh ahi’in, report hi ipijeh ham akihepon, ahivanga mipi het dinga kiseidoh lou chule NHRD in thukholna a akimudoh ho dungjuiya action alahna jong umlou ahi.

AP Pandey suspend akibol nunga jong MU VC hina hi anei nahlai chule sorkar dan dungjuiya tuni chan a phatchomna ‘benefit’ jouse amu nahlai ahi. AP Pandey in pan alah kit dinga thulamleng kisei ahi. Hiche teng chule suspend ahi sunga amuding jouse akilah kit ding ahi, tia kisei ahi. Manipur High Court in Vice Chancellor mopohna la dinga Administrator alhen hi tamtah in apachat ahi’in, ahivanga VC panmun tuh dinga kilomlou, phat chomcha mopo dinga kilheng khat in Vice Chancellor lhingset tobang a athaneina amanchah thei ding ham tihi thudoh um ahi. Ajeh chu MU a ama phat sunga post tamtah kila ahi.

 

Veterinary Department a panmun kalsang ho dihlou le deisah tum ho bou chang dan a kisei

Imphal, Jan 22(ET): Veterinary department a panmun kalsang ho dihlou le deisah tum hobou chang dan a Chief Minister, Veterinary Minister, Chief Secretary, Commissioner le MPSC Secretary ho kom a hehna lekha pehlut ahitolhon in Veterinary Department hi boina’n alodim ding in aumtan ahi.

Veterinary department noi a tong ho panmun kalsang ding dan 2012 a kithahsem chu 18/11/2013 nia gazette a kisodoh bep ahi. Hinla danthah kisemdoh chung chang a chu department officer ho dohna umlou hel a Deputy Director lahna dia angaicha lhinna chu government in acham a akhel a, February 2014 nia chu DPC akoupai ahi.

Tohmun 41 a dia DPC achejing lai a tohmun 40 kalsang na lekha no. 4/4/99-VETY(Pt.1) chu 18/02/2014 nia chu sodoh hi a DPC kichailou a panmun kalsangna chu chelha pai a, adihlou akijeplut jong hetdoh hipai ahitai.

Amasapen a DPC selection committee in Specialist Medicine panmun lothei dia Dr. W Tomba Singh min apehlut vang a Dr Rosoraj joh chu Specialist Medicine panmun lo dia dopsang a um ahi.

Anichanna in panmun kalsangna danthah dungjui in Dr. O Debola chu 2012 kum chun Deputy Director Statistics in panmun akaltou in, athumna in DPC selection committee in aminphah lou hel officer mi 4 jong panmun doptou pih ahikit e.

Hitia dihlou tah a natoh thilbol ana chelha chu case number 5/SP-V/2014 min pan a vigilance department in ana kholpan ahi.

Hiche chung chang vigilance department in akholjing lai kisen in 28/02/2015 nichun Veterinary department in DPC ana kou kit in, Dr. M Dilip Kumar chu MPSC lekha panglou in Deputy Director panmun in ana domtou in hinla panmun akal ni ma chun pension ahi pai e.

Chule Dr. T Indumati Devi jong December, 2017 nichun Veterinary Council Assistant Livestock Development Officer (ALDO) panmun a pat Deputy Director panmun a doptou ana hikit e. Hetkhen ding chu Veterinary Department hi centre le state thaneina ahitolhon a state government in achang kei a tha aneikit lou ahi.

Hitia department a adihlou ho suhtoh nading in vigilance department in anivei channa a case  number 4/PE/SP-V&AC/2018 noi a kholchilna achelhahpi laitah ahi.

Republic Day toh kisai a Search Operation muntin a kibol jing

Imphal,  Jan 22(ET): Republic day hung lhun ding toh kisai in Manipur police in  in gamsung mun chom chom a search operation ana bol jing uvin ahi. Thoubal District Police, Kakching District Police le numei police ho in tuni in Sora Mayai Laikei, Thoubal District ah in tin in kholchilna an anei uvin ahi. Tuni operation achun inn 70 lam kholchilna ana kinei in ahi. Operation kibol na a koima vang mat in an aumpon ahi. Imphal East district Police in jong Th KT Singh, ASP (OPs)/IE, Thangkhochon Haokip, ASP/IE, Kh. Herojit, DSP (CDO)/IE, OC CDO/IE, 2ic CDO/IE, Narcotic Cell team, SI Nula of RL, HNG PS le WPC toh kitho in search operation Mantripukhri bazaar ah an abol uvin, mi 162 lam thudoh ana nei uvin ahi. Thudoh kinei na achun mi 22 lam lekha neilou jeh in Heingang police station ah an apolut uvin ahi.  Ccpur police in Khumujamba, Zoveng-Khuga Tampak le Old Bazar lhang a search operation ana bol uvin ahi. Alangkhat a NAB, NCB le Chandel District Police in jong Lhangpikot mol lhang a tuni in  kanai lei an asuse uvin ahi. Tuni a kani lei kisuse chu acre 46 lam ahi akiti.

Alangkhat ah 43 Assam Rifles honjong Republic Day ahung naitoh kilhon in Indo-Myanmar border geiho leh Indo-Myanmar Friendship Gate Number 1 leh 2 kimvel leh mundang dang ho’ah security khoutah in akoiuvin ahi. Indo-Myanmar Friendship Gate Number 1 le 2 a lamlha ho identification lekha ho phate in vetchilna aneiyuvin ahi.

Centre in donbutna apeh nadinga SC in kal li phat apeh sunga Citizenship Law leh NPR ‘stay’ bol loudinga SC in sei; Assam leh Tripura akon petition ho achombeh a kiseiding ahi tia jong sei

New Delhi, Jan 22: Citizenship Amendment Act douna a petition akipeh thu a sorkar in kal li sunga donbutna apeh dinga Supreme Court in Wednesday nikhon thuso aneiyin, chule kinel baotamna CAA ahilouleh national Population Register (NPR) hi Centre langa kon thu kisei ngai louva ‘stay’ kibol louding ahi, ati.

Chief Justice SA Bobde lamkaina bench in petition 140 val ngailhahna aneiya, Centre notice apeh ahi’in, petition chungchang a thulhuhna aum kahse a high court jousen CAA chungchang a ngehna umho ‘hearing’ abol loudiuva jong aseiyin ahi. Bench a hi Justice S Abdul Nazeer leh Sanjiv Khanna jong pang ahi’in, CAA thu a Assam leh Tripura gam a boina hi gamdang a boina toh akibah loujeh a akisei gam teni a petition ho ngailhah dinga bench in aseiyin ahi.

“Athu hi mijouse lungthim a um ahi. Judge nga panna bench kisemdoh ding chule case list kibol ding ahi”, tin court in aseiyin ahi. Hiche chungchang a Centre thusei ngailhahna umlouva CAA ‘stay’ bol lou dinga aseiyin chule ‘ex-parte order’ kipe louding ahi, ati.

Assam gam a citizenship pehna dinga tu masang a phat ana kikah (cut off date) hi March 24, 1971 ahi’in, CAA noiya December 31, 2014 a kikah nai ahi court in ahetpehna aseiyin ahi. Tripura leh Assam gam a petition ho achombeh a kisei ding ahi, tin bench in aseiyin ahi.

Citizenship Act chouna a hehna kisem hi hop ni a khending- khat hi Tripura leh Assam chule khat hi CAA alhangpi a khend inga CJI SA Bobde in anop pehna thu aseiyin ahi. North east state teni hin gamsung mi dihtah ho huhna dinga Centre toh achom a kinoptona anei ahijeh a hiche gam teni thu a ngehna jouse punkhom dinga court sangpen in aseibe in ahi.

Kal li jouteng ani ni a hearing phat sem dinga asei uvin ahi. Centre thalheng a ding Attorney General KK Venugopal in bench henga, sorkar in ngehna 60 vel a copy kipe ahi, ati. Hiche ngehna ho donbutna dinga phat athumbe in ahi. Senior advocate Kapil SIbal in CAA operation khongai a chule tu dinmun a NPR exercise vohhai dinga ngehna aneiyin ahi.

CAA hi Pakistan, Bangladesh  leh Afghanistan gam a kon December nisim 31, 2014 masanga India gam a hung chenglut Hindu, Sikh, Buddhist, Christian, Jain leh Parsi ho Indian citizenship peh nading ahi. President Ram Nath Kovind in December nisim 12, 2019 nikho a Citizenship (Amendment) Bill, 2019 phatsahna anei toh kilhon a Act a kimang ahitai.

CAA douna a petition tamtah court a kipelut ahi’in, ngehna sem holah a Indian Union Muslim League (IUML), Congress lamkai Jairam Ramesh, RJD lamkai Manoj Jha, Trinamool Congress MP Mahua Moitra leh AIMIM leader Asaduddin Owaisi jong pang ahi. CAA hi Right to Equality palkehna ahi, tia IUML in ngehna anei nauva asei ahi.

Sorkar in Muslim abungkhenna ahi, tia asei uva, hiche hi Constitution kipalkehna ahi, atiu ahi. Ramesh in petition apehna a ‘Act hi ‘fundamental rights’ kibuluna ahi tia asei ahi. Petition pe adang holah a Jamiat Ulama-i-Hind, the All Assam Students Union (AASU), Peace Party, CPI, NGOs Rihai Manch leh Citizens Against Hate, advocate M L Sharma, leh law simlai hojong pang ahi.

Petition pe a pang Tripura leng insung Pradyot Manikya Debbarman in SC order aliemna thu aseiyin, India gamdang hotoh Tripura leh Assam gam akhen jeh a alunglhaina thu aseiyin ahi. “SC in gamgi galkaiya kon dan phalna beiya hunglut ho chule gamkaiya um TMV leh ATTF kiti accord umho chule Kanchan Prabha Devi in soi akai ho hetpehna aneiyin, bench in keiho boina lhakhat sunga eisuhlhap peh diu kinepna ahi”, tin Manikya in aseibe in ahi.

District Hospital, CCpur a amasapen ding’a National Viral Hepatitis Treatment Centre hondoh hita

B.Lalboi Gangte

CCpur. Jan 22 (ET) : District Health Society (DHS), National Health Mission (NHM), Churachandpur in tunin District Hospital, Churachadpur mun’a National Viral Hepatitis Treatment Centre hondoh na ananei uvin ahi.

Kingon achun V. Hangkhanlian, Minister, Agriculture, Veterinary & Animal Husbandry, Government of Manipur, Pawan Yadav, IAS, Deputy Commissioner, Churachandpur, Dr. Neeraj Raizada, Assistant Professor, Institute of Liver & Biliary Sciences, New Delhi leh Dr. Vumchinpau Tonsing, Chief Medical Officer (CMO) Churachandpur ho hetpeh nan Treatment Centre V.Hangkhanlian in hondoh na ananei in ahi. Chuleh V.Hangkhanlian in National Viral Hepatitis Treatment Centre Churachadpur hi mipin amanchah thei nading’a hondohna anei toh lhon in Imphal leh mun dang dang che ngai talouva District Hospital, Churachandpur a Hepatitis toh kisai ki-vetkol thei ding ahitai ati.

Hetthei khat chu hiche Centre kihondoh masang chun CCpur mipi ten JNIMS leh RIMS ho anajon ji uvin ahi. Treatment Centre hondoh ahi jou in V.Hangkhanlian Minister in Dialysis Centre jaonan hospital mun chom chom vetlhah na anei in chuleh GNM School of Nursing Auditorium a Healthcare Provider ho ding in Viral Hepatitis toh kisai in Awareness leh Screening Camp ban’a Kayakalp Award 2019 sang ho kipapina phat jong amang uvin ahi.

Kingon phatsung in Pawan Yadav, IAS, Deputy Commissioner, Churachandpur chu Kin-neipa in apang in chuleh Dr. Jamthianlal, District Family Welfare Officer (DFWO) Churachandpur lamkai nan Awareness leh Screening Camp hondoh nan meisel detna ananei uvin ahi. Dr. Rosy, State Nodal Officer, Natoinal Viral Hepatitis Control Program (NVHCP) in Hepatitis natna toh kisai tahlang na anei in chuleh Institute of Liver & Biliary Sciences (ILBS) leh Airport Authority of India (AAI) panlah na jong atahlang in ahi. Dr. Neeraj Raizada, Assistant Professor, Institute of Liver & Biliary Sciences, New Delhi in kichuh na ape in ahi. Screening Camp chu CMO Conference Hall mun’a anei uvin hiche achun Hepatitis A, B leh C ho manbei in test anabol uvin ahi. Kimanchah naphat sung in District Hospital, Churachandpur, PHC Behiang leh Health & Wellness Centre (HWC) Suangdoh hon 2019 ading in ki-vetkolna mun theng pen Commendation Certificate anasan’u kipapi naleh CCpur District sung’a Health & Wellness Centre hoipen’a hetpeh HWC Pearsonmun in award anasang ho kipapi nan memento anape uvin ahi. GNM School of Nursing a first year student position thum na chang ho jong  kipa thilpeh anape uvin ahi.

Hiche toh lhon’a Pawan Yadav IAS in houlimna aneina’a CCpur District sung’a damthei na lang toh kisai’a natong ho hapan najal’a District in Hepatitis natna apat kiven thei nading leh ki-vetkol nathei ahin nei thei ahi. Chuleh pankhom naho jeh’a District in national level chan’a commendation asan thei ahi dan jong aphongdoh in ahi. Maban jong leh District mipi gelkhoh na’a pan lakhom jing ding in temna anei in ahi. District sung’a HIV/AIDS natna san in Hepatitis a damlou percent asang jo in chuleh Hepatitis hi ki-vetkol nung’a jong damtheng lou kiti umthei ahi jeh’a hitobang screening neithei na ding’a District in anei hi vangphat umtah ahi ati.

Alangkhat’a Minister V. Hangkhanlian in houlimna aneina’a Hepatitis ki-vetkol na’a sum tamtah suhlut ahi jeh in District sung’a mi tamtah ki-vekol jou louva aum jing lai’a District sung’a ding’a amasapen ding’a tunin treatment centre hondoh akinei thei tan ahi. Medical lang toh kisai thepna nei hih jong leng  HIV/AIDS natna vei sang’a Hepatitis natna vei tamjo ahi jeh’a hiche treatment Centre hi mi tamtah in ahamphat pi ding ahidan aginchat najong atahlang in ahi. CCpur District sung’a ding’a dialysis Centre a von manchah ding jong tunung sotlou’a hung lhun be ding chuleh damlou natoh kisai’a ki-vetkolna mun ijat ham khat in award asang thei hi natong ho kipehdoh najeh ahi ati.