Deputy CM le CM kikah a boina um; NPP ho akingapchat ule...

Deputy CM le CM kikah a boina um; NPP ho akingapchat ule sorkar a kon haina nei uhen, tia BJP MLA Rajen in sei

96
0
SHARE

Deputy CM le CM kikah a boina um; NPP ho akingapchat ule sorkar a kon haina nei uhen, tia BJP MLA Rajen in sei

Imphal, April 9(ET):  COVID-19 gamsunga achal louna dinga kigotna sangtah aum laiya Deputy Chief Minister Yumnam Joykumar chule Chief Minister N Biren Singh kikah a boina aumin ahi.

Deputy CM Y Joykumar hi NPP thalheng ahi’in, BJP lamkaina coalition government a ‘partner’ ahi. NPP member Deputy Chief Minister in video footage a NFSA anchang thu a Chief Minister ademna thu asei jouva sorkar sunga boina um ahi. Deputy CM thusei jeh a lunghang a BJP MLA Sorokhaibam Rajen in Thursday nikhon NPP minister pa hi Chief Minister Biren lamkaina a Minister ahi nom louva ahile apanmun a kon haina anei dinga thumna aneiyin ahi.

National Congress Party (NCP) wing leader jong hi a Deputy CM Yumnam Joykumar in April lha a NFSA anchang quota a kon anchang kg 4 cheh man beiya hop dinga CM thusei totna a anei BJP MLA S Rajen in demna aneiyin ahi. Deputy CM Y Joykumar chapa Yumnam Devjit Singh in India Prime Minister ademna thu aseina social media a kithang ahi’in, hiche jeh a amat jou uva Chief Minister le Deputy CM kikah a boina aumhi mipi hetdoh theiya um ahi.

Deputy CM in janni a mijouse anchang kg 4 cheh peh dinga kitepna kisem hi mingol kitepna ahi, tia asei jouva achapa kimat thu phat phabep anasel uhi kihedoh pan ahi. Anchang alhin loujeh a mijouse anchang hijat hop ding hi ahitheilou ahi, tia Deputy CM in asei ahi.

Y Joykumar thusei hi ‘kipui dihlou na’ ahi, tin S Rajen in aseiyin chule Uripok Assembly constituency a NFSA noiya anchang quota hi lhaseh a 1269.60 quintal ahi, ati. Tua boina aumpet a Uripok assembly constituency mi tamna ahijeh a Chief Minister in bazar a kijoh jat man a anchang quintal 200 alahbe ahi’in, mijousen anchang kg 4 cheh amu thei tei nading ahi, ati. “Anchang kipe hi agom a 1469.60 quintal ahi’in, Deputy CM in Monday nikho a godown a kon alahdoh ahitai”, tin Rajen in aseiyin, anchang mijouse kg 4 cheh akipeh a ahile 36,740 in aphatchompi ding ahi, ati. CM Biren lamkaina sorkar in COVID-19 a kon kivenna dinga pan sangtah alah ahi’in, India pumpi a kichepi banga Manipur gam a jong state sorkar in March 24 ni a kon curfe le lockdown achepi ahi. Hiche jeh a mipin hahsatna ato ahi’in, lockdown jeh a mipi gimna olsah nadinga MLA hon anchang ho dihtah a ahop diuva CM in MLA jouse henga temna anei ahi, ati.

PM Gharib Kalyan Anna Yojana noiya Centre in card neiho anchang kg 5 cheh man beiya hop dinga anchang apehdoh ahitan, anchang hi card neiho a dinga bou kigong ahivanga MLA hon card nei le neilou hijong le inson a anchang ahop peh diuva CM in temna anei ahi. MLA phabep in hehna asem jeh a Assembly constituency phabep a sorkar in anchang quota apehbe ahi.

Chief Minister in Covid-19 jeh a gamsung hahsatna olsah nadinga pan alahjing laiya CM demna thu Deputy CM in asei hi mopohna neilou chule lamkai hina a mopohna neilou thusei ahi. Sorkar in apeh anchang alhin louna ho a MLA phabep in amaho sum a anchang achoh nau jong um ahi. Deputy CM in amite angailut a ahile Chief Minister toh athu aseikhom ding, ahilouleh MLA dang hon abol banga ama sum a kon achoh be thei ahi, ati.

NPP Minister L Jayentakumar injong tu naicha 2017 assembly a election tet a BJP candidate khat in Keishamthong AC a anchang ahop hi Chief Minister themmo achan ahi. NPP ho lungput hi BJP hon kidang asah a, athoh jou tahlou ahi. Kiloikhomna kinei ahi’in, CM lamkaina noiya panlah khom ding ahi. Khat in adei banga thu asei hi coalition protocol kipalkeh na ahi, tin aseibe in ahi.

NPP minister ho akingap chat ule sorkar a kon haina neiyu hen, ati. Deputy CM thusei hi mopohna neilou thusei ahi, tin aseiyin chule BJP in hiche chungchang suhthengna anei nauva MLA Suchindro (Yai) jong apang in ahi.

Deputy CM Joykumar portfolio ho kilahpeh a CM kipe ta

Imphal, April 19(ET): Deputy Chief Minister Y Joykumar in atuh Forest, Environment & Climate Change, MAHUD, Science and Technology, Economics & Statistics portfolio ho akilah peh’a, Chief Minister N Biren in atuh dinga Thursday nikho a pehdohna aum jouva BJP lamkaina coalition government sunga boina aume ti thu akicheh tan ahi.

Chief Secretary Dr J Sureshbabu in hiche chungchang a Thursday ni a notification asodoh ahitai. Rule 6(1), Rules of Business of Government of Manipur  toh kitoh a Chief Minister thuhilna banga Manipur Governor in tu masanga Y Joykumar, Deputy Chief Minister in atuh Forest, Environment & Climate Change, MAHUD, Science and Technology, Economics & Statistics portfolio ho Chief Minister N Biren Singh kipe ahitai, ati.

Finance portfolio hi tu masanga Deputy CM in atuh ahi’in, transaction a adihlou aume tia thulhut aumjeh a hiche portfolio CM in atuh nahlai ahi. Tua hi Deputy Chief Minister Y JOykumar in portfolio neo neo- Taxation, Civil aviation ho bou atuh ahitai.

Chief Minister in tu masanga anatuh sa Home, Personnel, Planning, GAD, Vigilance, Transport, MI, Sericulture, Tourism, Minority Affairs, OBC & SC, Information Technology, Finance chule adang kipe lou department ho atuh chungchon a tua akisei hohi atuh be ding ahi.

Hetthei khat chu Minister Th Shyamkumar in Tenth Schedule, Indian Constitution apalkeh jeh a Speaker’s Tribunal in portfolio atuh ho alahpeh a, Chief Minister N Biren le Deputy Chief Minister Y Joykumar achesa April nisim 4 nikho a ahop peh ahi. Th Shyamkumar hi minister ahina a kon disqualify akibol jeh a portfolio ho khel ngai dinmun a anaum a,  portfolio hohi CM le Deputy CM apeh ahi.

Deputy CM in Uripok assembly constituency a anchang kihop lhing lou thu a Chief Minister demna le seisetna thu aseina video footage akithan jouva Deputy CM pa portfolio ho kilahpeh ahi.

 

Covid-19 case neinu jen a pang JNIMS team ho Govt. in Dk. lakh 35 kipaman pe ding

COVID-19 douna a pan lakhom uhitin, galjou uhite: CM Biren

Imphal, April 9(ET): Chief Minister N. Biren in coronavirus nat douna dinga gamsung mihon pan alahkhom a ajo dinga video message a temna aneiyin ahi.

Mipi tosotna le thungai dinga Chief Minister in kouna aneiyin, sorkar in tu dinmun a hi mihem hinkho huhdoh ding agel sangpen ahi, ati. Sorkar in coronavirus nat douna dinga kigotna lhingset anei ahi, tin aseiyin chule sorkar in PPE, 3-layer mask, N-95 masks, hand sanitizer, hand glove, non-contact thermometer, sodium hypochlorite chule adang dang ho alhinga anei ahi, ati.

Gamsunga natna jeh a dinmun kive a, tua kichepi lockdown hi nikho phabep suhsaobe ding ahi, tin jong aseiyin ahi. Natna hi gangtah a kila son thei ahijeh a aban achal louna dinga kiginna sangtah nei ding ahi. Tuchan geiya gamsung in Ministry of Health and Family Welfare, India government a kon angaicha lou chule manchah khoh ho Prime Minister Narendra Modi le Home Minister Amit Shah thuhilna noiya livei kimu ahitai, ati.

Gamsunga doctor, nurse le paramedical staff ho thepna le boltheina hetpehna aneiyin chule COVID-19 case masapen lolhingtah a jen dam a JNIMS, Imphal team ho apachatna thu jong aseiyin ahi. Team in choltih neilouva na atoh u ahi’in, team ho sorkar in dangka lakh 35 kipaman apeh ding ahi, tin thuphon aneiyin ahi. JNIMS a covid 19 positive jen dinga ama le ama kipedoh a chule team lamkaiya Dr. Uthan, Dr. Manojkumar chunga kipathu jong aseiyin ahi.

Sorkar in ‘frontline’ a natong ho cash incentive ahiloule award peh ding sangtah a angaito ahi, tin CM in aseibe in ahi. Langthabal a quarantine center sah dinga kisei thu suhthengna aneiyin, club chule changval mi tamtah in center kisah nading mun chungchang a lunglhaina aneilou jeh a center sah nading natoh kivohai ahitai, ati.

Sorkar in kinel kalna aumlou mun a quarantine center asah ding ahi, ati. Sorkar in tohgon anei ho thu aseiyin, State Assembly in MPLAD Fund noiya assembly constituency ho a dangka lakh 25 cheh man dinga phatsahna anei ahi’in, sum hi angaicha thil,  kivenna dinga manchah- mask, sanitizer, don ding twi le adang dang supply bol na a kimang ding ahi’in, chule hiche hi khatvei bol kibol ding tohgon ahi, ati.

Fair price shop system noiya, district jouse a dukan 2-3 hi PDS anchang district level a supply bolna a kilheng ding ahi, ati. Indira Gandhi National Old Age Pension Scheme, Indira Gandhi National Widow Pension Scheme chule Indira Gandhi National Disability Pension Scheme noiya beneficiary 62,000 vel ex-gratia peh dinga dangka lakh 310 vel kisodoh ahitai, tin CM in hetsahna aneiyin ahi.

Lha 12 a dinga Manipur Old Age Pension Scheme dangka crore 11 vel chule Manipur Old Age Pension a ‘Go to Village’ a dangka crore 2.5 kisodoh vahding ahitai. Simlai tibukimlou 110 kum khat a dinga CMST scholarship kipe ding ahi’in chule sorkar in PwD 4,879 ho caretaker allowance dangka crore 5.85 peh dinga asodoh ahitai, tin CM in aseibe in ahi.

Gamsung mihon social media a tu boipet a hi nam kikah a boina asodoh nathei video ahilouleh message ima atahdoh lou diuvin CM in temna aneiyin chule Centre in Churachandpur a State Medical College semdoh dinga phatsahna jong anei ahitai, tin aseibe in ahi.

Manipur a Covid-19 dammo na nei ani channa pa jong damdoh dinga umta

Imphal, Apr 9(ET): Manipur sung a covdi-19 natna nei ani channa kum 65 a upa chu damdoh kit ding in aum tan ahi akiti. Hiche mipa pa chu ahung lhungding ni 2 ni 3 sung a test kithah bol kit ding ahi ati.

Hetthei kaht chu state sunga hichae natna nei masapen chu kum 23 a upa numei khat ahin tua damdoh ahi tan ahi. Adammo masapen nu chu Jawaharlal Nehru Institute of Medical Science (JNIMS)  hospital authority hon test ana bol jing uva anajen utoh lhon a ana damdoh ahitan ahi. Hiche natna nei ani channa pa chu Regional Institute of Medical Science (RIMS) hospital a kijan ahi. Hiche dammo na neipa chu diabetes natna nei a hung kijan ahin hinlah hiche virus natna nei hotoh ahung kilo toh lhon a ana kijen ahi.

RIMS medical superintendent, Prof Dr Ch Arunkumar in asei na a adammo pa chu adamo dom ta in a sugar level ho jong ahung normal tan, tu le tu dinmun in aphadom tan jing lang le test kibol kit ding chuleh hetsahna hung kinei ding ahi ati. Dammo na neipan covid-19 natna a lou le ai nehna course masapen aneh chai tah danjong hetsah na jong anei in ahi.

RIMS le JNIMS hi govt in covid-19 kijanna ding a akoi state sung a hospital teni ahi. RIMS mun ahi mi 50 kijen na thei ding a kisem ahi akiti. Prof Arunkumar in asei na a mi 19 sample akithot kit in hiche ho hi jing nikho le hung lhung ding ahi ati.

 

COVID-19 jeh a Manipur khangthah ni in kibungkhenna toh kit; Hyderabad dukan khat a thil achoh ding phalpeh louvu

Guwahati, April 9: Coronavirus pandemic kisei khoh hin vannoi muntin a boina asosah ahi’in, Northeast gam mihon gamsung mun chom chom a hiche jeh a kithet na chule kipam paina thilsoh ato jing u ahi.

Nagaland a kon khangthah ni Mysuru, Karnataka a um supermarket a staff hon alut ding aphal peh lou jouva Hyderabad a jong hitobang thilsoh alhung kit in, Manipur a kon khangthah ni dukan a alut ding apha peh pouvin ahi.

Twitter a kithang video a Manipuri khangthah ni in security guard khat akihoupi a, alutsah diuva asei lhon thu akimu in, ahivanga guard pa hin amel ‘mongoloid’ toh akilo jeh a ‘India gammi’ nahipoi, tia agel a alut ding aphal peh lhonlou ahi. Wednesday nikho thilsoh ahi’in, khangthah teni hin St Mary’s Group of Institution, Hyderabad a civil engineering asim lhon ahi.

Khangthah teni hi Star Market shopping mart, Vanastalipuram a ‘lockdown’ sunga insung manchah ding thil kichoh dinga che lhon ahi. Ache til lhon a security guard pa in customer dang ho alutsah vanga amani supermarket sunga alut ding aphal pehlou ahi. Alut kigot lhon le guard pa in ID athum a, Aadhaar card avetsah lhon le ‘manager’ in an ane in, khongai lhonin lang kihoupi masat in tia alamtin kit a, alutsah lou ahi.

Akimvel a ding hon khangthah teni ajeh adoh ule security pa in Telegu pao atho kit a, Hindi pao atho thei lhon ahet vanga Telegu pao atho lhon dinga aseikit lhon ahi. Khangthah teni jong ima cho thei louva inlang a kile lhon ahitai. “In a neh ding ima aumlou jeh a vengsunga um grocery mart a kache lhon ahi”, tin khangthah khat pa in thuso miho telephone a akihoupi na a aseiyin ahi.

“Natna jeh a mi athi jing jeh a dinmun boi ahi’in, tua hi ka melput jeh uva eichomkhen kit u ahi”, ati. Thilsoh chunga lunglhai loujeh a khangthah tenin Hyderabad a Pouma community ho WhatsApp group a video athot lhon a, hiche a kon Jonah Trichao, channel head, OLX India, Hyderabad in video hi simlai kiloikhomna chom chom holah a athot son ahi.

Social media post dungjuiya Hyderabad police hon Star Market manager le security guard ni aman in, akiman hohi Section 341 le 154-A, Indian Penal Code noiya booked abol khum u ahitai. Hetthei khat chu tu naicha a jong Mysuru, Karnataka a Naga khangthah ni jong gamsung mi nahipoi, tia amelput achom jeh a kibungkhenna ato lhon a, dukan a alut ding ana phalpeh louvu ahi.

Hiche tilouva Delhi le Mumbai khopi a Northeast gamkai numei khat cheh jong pasal khat in achil ana set khum ahi.

 

Northeast mi hon kibuluna ato jing douna a PM, Home Minister in thu aseiphat ahitai: Bezbaruah

Guwahati, April 9: Union Tourism Secretary M.P.Bezbaruah in Thursday nikhon Home Minister Amit Shah tobang lamkai vaipo hon Northeast gam miho kithetna natna (virus) hi asuhtang ding ahi, tin thuso aneiyin ahi.

India gamsung mun chom chom a Northeast gamkai mihon kithet na chule nam thetna a kibuluna ato jing ho thu a asei ahi. Manipur gam  mi simlai ni tu thah a Andhra Pradesh gamsung Hyderabad khopi a Wednesday ni a grocery store a alut ding ana phalpeh louvu ahi. “Hiche hohi he na sa sa a kibol ahijeh a ‘criminal action’ a lah ding ahi.

Themmona neiho gangtah a mat a chule gangtah a gotna peh ding ngai ahi’in, sorkar in hiche thu a thuhilna khoutah anei ngai ahi”, tin The North East Today a aseiyin ahi. Sorkar in asemdoh committee lamkaiya pang Bezbaruah inachesa 2015 kum a ‘racial profiling le abuse’ ho thu a sorkar in dan bulhing set a achepi dinga anasei ahi.

Home Minister tobang thunei vaipo hon media amanchah a, awareness abol ding hi kadei ahi. Kibungkhenna virus hi gu aso masanga vettup ding ahi. Hiche hi nahsah louva kihetmosah a koithei ahipoi”, ati. Bezbaruah commission member a ana pang a Maivio J Woba in nam kibungkhenna a kibuluna chule kipampai na thilsoh Northeast gamkai mihon ato adeilou na a thua sei dinga temna aneiyin ahi.

“Prime Minister in hiche thu aseiphat ahitan, asuhtang phat ahitai. Hiche hi jat le nam kithet na, kichombol na ahi’in, moh thoh thoh jeng thei ahi tapoi”, tin Woba in aseiyin chule Northeast gam a Chief Minister, parliamentarian le lamkai hon agammi ho dinga pan alah dinga temna jong aneiyin ahi. Tu masanga Ministry of Home Affairs in State chule Union Territory jouse henga COVID-19 natna toh Northeast gam miho seikop a chule sugenthei/bolgim ho chunga action khoutah alah diuva anasei ahi.

Gamsung’a Quarantine kibol jat lhom cheh cheh

Imphal, April 9(UNA): Thulhut khat in aseina achun Manipur gamsung a gampam akon hunglut Covid-19 avei leh veilou uh hetdoh theina ding a Home quarantine le government quarantine kibol mi 797 lah ah mi 602 hon aphat achai tauvin tuhin mi 195 bou avat tauvin ahi ati. State Surveillance Officer, IDSP Manipur in thuso abolna achun Home quarantine kibol mi 486 lah ah mi 414 hon aphat achai tauvin chule government quarantine kibol mi 311 lah a mi 188 hon aphat achai tauvin chule Government quarantine centre ah mi 16 aki koilut be e ati.

Aseibena achun Imphal airport jaona a Manipur gamsung luttheina jouse a mi 188891 screemed akibol tan, Tuni chun Mao gate akon Manipur gamsung hunglut mi 220 hochu ascreened abol uvin Jiribam akon mi 141 hunglut ho jong abolkit uvin hinlah koima Moreh, Behiang, Sinzawl, Tusom leh Kamjong akon ahung lutbe pouvin ahi.

 

Truck kihalna thilsoh to kisaiya tuchan a police hon Shangching kho pasal koima mu joulou

Imphal,  Apr 9(UNA): Shangshak Police team hon Shangshak Police station noi, Ukhrul district a um Shangching kho a 1st MR thih (iron bar) pohna truck meiya ahal lhah utoh kisaiya witness statement’ la dinga ache uvin, ahin, police hon Shangching kho a khosung mi pasal khatcha amujou pouvin ahi.

Police thulhut dungjuiya, Shangshak police team ho Thursday sun nidan 12 don a anivei channa dinga ‘witness statement’ la ding ache kit u ahi’in, ahivanga Shangching kho a khosung mi numei lhomcha tilou pasal khatcha amu louvu ahi. Khosung mi pasal ho hoiya um ham tia sepai hon adoh ule numei honjong ima thu kahe pouve, tia adonbut u ahi.

Achesa Wednesday nikho a police team ho Shangching kho a ache nauva khosung mi pasal ahilouleh numei khatcha amu louvu ahi, tin thulhut in aseibe in ahi. Shangshak police station in mi alhahsam jeh a hahsatna lentah ato ahi, ati. 24 AR campus sunga um Shangshak police station a um sepai hi 20 bou hi ahi. Inspector 1, SI 3, ASI 1, Constable 7 chule VDF personnel 8 bou um ahi’in chule gari amu lou jeh uva, che le nadinga private gari akilah thu (hire) jiu ahi.

ASI lamkaina a police personnel 12 le DI Tata 407 khat Wednesday ni a Ukhrul Reserve Line a kon truck meiya kihal thu a amaho kithopi dinga asol vang uva, case akikha jouteng akisol hohi anung lahdoh kit diu ahi. Shangshak police station a sepai alhomjeh a miphalou tamtah in phat gomkom a alah ahi, tin thulhut in aseiyin ahi.

Truck meiya akihal thu toh kisaiya khosung miho akiholmo vanga Shangching kho haosapu kounakipe vah maithei ahi, tin thulhut in aseibe in ahi. Hetthei khat chu achesa Tuesday nikho a mel hetlou hon Shangching kho a 1st MR ho thih kipohna truck khat meiya ahal lhah u ahi.

 Covid-19 nei athah beh a mi  809 mudoh be hi; mi 46 in thina toh be

New Delhi, Apr 9: India sunga ni khat sung in covid-19 natnanei mi 809 apun be in athi mi 46 alhin be in chule mi 55 adamdoh in ahi. Hiche toh lhon in Covid-19 case nei agom in tu chan in mi 6725 chule mi 5897 hi active ahiuve jong akiti.

Tuni damdoh mi 55 aumbe toh lhon in adamdoh mi 620 ahitan natna akon thina toh hi India sung a mi 226 aphatan ahi.

India sung a hiche natna punbe jing toh lhon in train 5000 lam jong akikhah tan ahi. Lav Aggarwal, Joint Secretary, Health Ministry in asei na a lou le ai chuleh medical staff ho ding PPE neng jal in akikoi in hiche toh lhona mipi in tijat na anei na louding in temna ahin nei in ahi.  Adamo ho kijan na ding train ho a jong isolation bed 80,000 lam akisem be in ahi tin Aggarwal chun ana sei in ahi. Health ministry akon thuso kimu dungjui in ventilator 49,000 lam jong order akibol tan ahi akiti. Tu le tu dinmun bou hilou a khonung chan gei ding akigot na kinei ahi tin jong Aggarwal chun asei in ahi. Lou le ai hoc hung a houlimna ana nein a a Aggarwal in tu dinmun bou a ah ding hilou a khonung chan ei a jah ding lou le ai jong kining lhin tah  a aum dan jong hetsah na ana nei in ahi. Hiche natna a kijang HCQ (Hydroxychloroquine) lou jong kining lhingtah a aum dan le khonung chan gei a avat lou ding dan jong Aggarwal in hetsah na ana nei in ahi. Thu le la vetle na ding a mip iin health ministry website  a thuso kinei bou avet uva thildang dang ho atahsan lou ding uvin jong temna ahin nei in ahi.