Dec. 8, 2015 – HISTORY KISEMTOH THEITE CHU LOUPI DING MONG...

Dec. 8, 2015 – HISTORY KISEMTOH THEITE CHU LOUPI DING MONG AHIUVE Jangmang Haokip, Freelance journalist & former Gen. Secy. KIM

134
0
SHARE

History kiti hi jouthubuh keoseh mohsem sem thei ahipon hinlah anasoh sa or ana umsa thil khat chu kisemhoi ding kisemtoh ding kiheitoh ding ahoijepna ding le aloupi jepna ding chu historian ho khut a um ahi. Hichelaitah hi ahi history loupina chu. Manipur sunga thinglhang milah a lekha them masapen te IAS um masapen te jong eiho ihiuve. Govt officer lentah tah tam neipente jong eiho ihiuve. Tunichanna All India Services (IAS, IPS, IFS) tam neipente jong eiho ihijinguve. Tribal society khat hi na in education hung lhun kal sot hih lai jongleh chen khompi midang ho sanga Kukite hi education langa sang tah ihiuve. Ahile ipi jeh a tunia freedom fighter tam tah ineihou hetphah hijou lou hitam? Koi kingoh ding ham? Meilhei ho Kol ho or Naga ho ingoh thei diu ham? Nangma history chu nangin nahet gil pen ding ahin ahegil pen nangin bon imacha kiseidoh theilou midangin ipia agel khoh ding ham? Tulah Rani Gaidinliu thu ahung loupicheh cheh jengin alim (staue) chan gei semdoh ding mijouse muthei laitah khat a loupitah a alim tun sang dingin tohgon aumtai. Lang khat a tribal mikhat hichan gei ja dopsanga aum chu kipa pi umtah ahi. Hinlah ipi i-atileh Kukite gal hang gal hat tia iseichim theilou hel u khatcha beh hitabang din mun lhung theilou ham? Lainat umtah chule khangthah lekha them hodinga jachat umtah ahi. Rani Gaidinliu ojapu Haipou Jadonang chu ipu ipate seidanin mithat (tol that) gul pi vah chuleh doichoi ahi atiuve. Amitha jeh a Sapkangten ana mat uva akingohna chu thudih ahikhah jeh a ana khailih u ahi. Hiche hi chulai khanga thu kitan na court order jong kitup tah a mutheija original copy um ahi. Ama thi chu lainatpi jeh a Rani Gaidinliu chun aphulah na dinga sapkangte ahindou khah ahi. Hichelai phat chu India sung langa sapkangte douna a freedom movement nasatah a achelhah lai ahi. Rani Gaidin liu chun British te douna natoh anachepi jeh chun soungkul anatang kha ahi. Khonunga India in independence ahin muphat a political prisoner jouse lhadoh ding ti tohgon ahung um phat na ama nu chu Britishte douna jeh a ana kiman ahijeh chun freedom fighter a kisim ahitai. Tunia ama nu hi freedom fighter ahipoi tiding koima ki umlou ahitai. Ahin atahbeh a seiding ahile vang freedom struggle thutoh kimat behseh chu ahipoi. Keima Kuki Inpi Manipur General secretary kahi laichun Haipou Jadonang hi freedom fighter khat a simding athi nikho jong state holiday a nit dingin sopi milong hon move ahinbol uve. KIM leh UCM in recommend bol ngai ahijeh chun athu akikhollin amachu tol tha jeh (gal sat jeh a mithat hilou) a sapkangten anakhailih u ahijeh chun recommend anakibol theitapoi. Ahin khonung chun Meilhei ten jong Manipur gam huh tup ding deina jeh in sopi milong ho lung ahol u jong hintin tunin chunga kiseipa jong minthangtah le loupitah in athinikho akinit in ama het jingna park khat jong phaitol sunga akisem doh tai. Lang khat a Meilheiten jong anchang (rice) hahsat jeh a numei ho kiphinna jong asemtoh uva thupitah aso sah thei u leh sopi milong ho thil bol jong chu kipa piding joh ahi. Tunia Jadonang ahin Rani Gaidinliu ahin dopsang thei ahipoi tia thutampi seichu phachom talou ding mi muda kichang bep ding ahitai. Koiman nang seichu thudih ahi jong atideh lou ding ahitai. Midinga engset thangset (thangthip) bol bep dan a ki umdoh ding ahitai. Hijehchun ahi hihen ahilou hijongleh hichan gei din mun ahin lhut theiju leh tampi seiding aumtapoi. Ahinai tiding chu bol thei sun ahitai. Midangin jong hitia chu akibol theileh eihon jong ikibol diu ahi. Midang ho chu thilsoh neocha khat pou sangtah a aseidoh u ahin eiho a chu tilsoh neocha hilou ahi. Eihoa hi toumun houlimna a tampi isei sei vanguva mihet theija ikiseidoh joulou jeh u ahi. 1917-1919 Kuki Rebellion tia kisei jing chu British te douna chamlhatna galsat na dihtah ahi. Tunin hiche thilsoh hi history book ho a neokhat khat ajaovin aphadom nalaije. INA a pan inalah ho vang jaodoh joulou ahitai. Kuki Rebellion jong chu pu Dr. TS Gangte in nasatah a research ahinbol jeh a neokhat seidoh kham a hung umdoh bep ahi. Chutilou hile potpoh nomlou jeh mai maija gal sat te dana ei kiseiju ahibouve. INA a pan inalah u chu naicha thilsoh ahi vangin koima akhol gil jong aumpon tunung in akiseileh eiho lah jenga jong INA pension mu ho chu INA dih tah bon umlou itiuvin pha maicha mi-ngol te ihipouve. Mi-ngol te chu ipiba kisei beding ham ahitichu ahitai. Govt in kum som sung khol gilna nasatah anei nunga ahi mong nai tia INA pension tehse them khat apehchu ahipoi alhem ahiuve tiloi iumkit nah lai u ahi. Midang in ahiloubeh khat bon ahidana akiseidoh theija thil neocha khat a kon thil lentah asemdoh theileh eiho chu aumsa khat jong suh mang ding seineo thei chana seineo ding ti ihiuvin ihitijeh uva hiti ihiuve tihi sei bailam pen ahi. Tunia Jadonang ahin Rani Gaidinliu ahin amani hi natah behchu thilchom hijongleh seitah louding ahi. Ipi ibol u leh eiho a gal hang gal hat iti houchu idopsang theidiu ham tibou chu eiho kin thupipen ahitai. Ipu ipate gam le go huh tupna dinga thi ding gel phalou khop a gal anasat hon van na konin eihin veu leh tulai khang mite hi oimona sangtah eipeh teidiu ahi