Dec. 31, 2015 – MANTHAHNA LE LAMVAINA HOIJA HUNG KIPAN HAM? By...

Dec. 31, 2015 – MANTHAHNA LE LAMVAINA HOIJA HUNG KIPAN HAM? By Dr. Sir H.H.Mate,Ph.D., D.Litt. DD&KC.

116
0
SHARE

Mihem kisemdohna/ kitundohna hi lampi chena ding dol leh tohding dol kitup tah’a akiche-a, na akitoh theileh kisem dohna le kitun dohna/kiledohna ahi. Amavang alam lou lampia mihem ache a, na atoh tengleh manthah na le lamvaina hijeng ahi bouvin ahi. Mihem khatchun henasa sa-a ama thepna le thil boltheina kalval la lam ajotna, na atoha, thu aseija, asempa Pathen um nalam hepha louva, ging louhel a mihem hina-a tohthei chan, bolthei chan, seithei chan, nehthei chan, guhthei/lahthei chan ho a akibuol a, hinkho aman tengleh amasang’a manthahna umsa chule alamvai ding musa ahijeng’e. Eimite ( Chin,Kuki, Mizo) kitiho hi iding’a tunia manthahna lam mi tamtah in jot uva chule iding’a mi tamtah lamvai ihiuvem tihi giltah in kikhuol leohen ihetdoh jengdiu katahsan nin ahi. Koiham Pathen chung’a leng ding? Koiham Pathen sang’a chingjo ding? Hinna eipeuvah koi ham? Manthahna kiti ipi hija chule Lamvaina kiti hi hoija hung kipanjui ham? Bible ah manthahna thu le lamvaina thu jong akisun’in ahi. Milung neoho, Pathen ginglou ho, ama chihna le thepn akisuong ho, amel hoi nale atahsa hoija kisuong ho hi manthahna lampia ache nom jui uvin, alamvai nom uve. Lamdih louva chon ho, lamdih louva neh le chah kihol ho, jou le nalla thuseija mi suboi ho, michom hojong phat chomkhat jouleh achonna ga dihlou jeh in manthah na hin ahin dellut in, lamvaina hinkho ahinman pan juijin ahi. Thil kiti hi ahiding dol khat ahilou lam ma iman na ahileh manthahna ahi. Manthahna in ichung’a vai ahinhop teng lamvaina in lamvaina ding lampi a eipui jui ahije. Chule summa lamvaija mangthah mi a-umme, sumle pai ngailut behseh jeh a lamvai ja, mangthah a-umme. Atahsa hoi na le amel hoina kisuonpi a mangkhella lamvaija mangthah jong a-umme. Jule sa a kibuolla dalha theilouva mangthah a lamvai mi atamme. Thaset jeh a natoh nomlou va, tonglou-thamlouva sum mu nading gella, duha a mi bolla nemang chule mi chanding dol le, neile gou lamang, gumang a manthahna neilo-a, lamvai jong a-umme. Thaset jeh a gucha t-lahchat na hinkho mang’a manthahna nei ja lamvai jong mi a-umme. Achihna, athepna, athil boltheina ho le athu seithei na ho kisonpia, mangkhel la manthahna leh lamvaina nei mi jong eimite laha a-umme. Hitiho jouse hi Pathen in eideipih u ahipon, amavang Satan/Lucifer tohgon ngen ahin, hijeh a chu manthahna le lamvaina hi Pathen melma pa lungput neihon akilamdoh jui ahibou vin ahi. Pathen mite, Pathen gingte chun chung’ a kisei hohi Pathen loupina ding’a aman jeh uvin vangphatna le khantounan anei jing uvin ahi. Aphalou Pathen thet ho boldoh ho, chepi ho vangchu manthahna toh kikhen theilou, lamvaina hin apuijing’u ahibouvin ahi. Mihem kiledoh na hi chom loukah ahin, khehsuh/manthah na jong chom loukah ahi bouve. Hiti ahijeh a mihemte hi akichih theiju ngai ahi. Veuvin sopiteho, khang jong kikhel ahi. Mihem hinkho jong kikhel ahi. Phat jong chejing ahi. Ana haosa ho jouse ahao jing pon ahi. Pathen lungdeija anahao ho ahao sot nan ahi, hinlah alamdih louva anahaosa ho ahaosat nao abei gam tan ahi. Masang’a ana genthei ho, ana vaicha ho ahung haodoh kit uvin ahi. Tua haosaho, neijou ho jong ahaosat nao hi Pathen mit mu a adih a Pathen phatthei boh jalla hao ahiu leh sot ding ahin, amavang adihlou, atheng louva konna haodoh ahiuleh sot deh kit lou ding ahi. Hiti ahijeh a mihem in Pathen deija hao ding angaito ngai ahi. Inamsung’ uva mi atamjo ho haosatna hohi kavetna /kakhuol leh 70% hi atheng louva konna haona ahi kamun, 30% hi Pathen deija konna hao ahi kamudoh in ahi. Guh chat- lah chatna haoloi a-um me. Hiche hochu Sorkar sum alam louva mang’a amading’a kiman na hao doh a-umme. Hichu Pathen kipana ahipoi. Hitobang haosatna ho chu phat chomkhatna ding ahin, manthahna in anung ahin del pai ding, lamvaina lampi achena ding nikho hung lhung ding ahije. Sorkar in ajahda chu Pathen in ajahda ahin, ganja, kani, No.4 kiti le khamna thei damdoija sum kimu ho chu asum atam in, chom khat kah a ding’a haosatna ahin, hinlah hitobang hohi agu (poison) a-um jeh in asotpon, hitiho a haodoh ho jong chomkhat jouleh manthahna lampi ah ache pan jui taovin ahi. Tunia kathusei hi adihlou, athenglou a konna haodoh hon ajahnomlou heldiu ahi, hinlah Pathen lunglhaina jalla haodoh ho vang kipah diu ahi. Pathen in Manipur a cheng eimite ho (Chin-Kuki, Mizo/Zomi) eilungset lheh uvin, hinlah Ama lunglhaina hinkho mang, sum le pai holla neile gou lam doh hi 30% bou ihiuvin, 70% vang ihaosatnao atheng pon ahi. Atheng louva sum ihollu, inchen isemmu, Pathen ihou jeh uva tunia hi inamsung’u hi lamvai ahin, manthahna toh kikhen lou ihiuve. Keima mudan le geldan na hi Christian kahi itiuleh sumthoi lhasih a jong umda theileh phante, nithoi jong umda lehphante, Bible in sumthoi neh/lahajah nompon, henasa sansumthoiineuvin ahi. Chule, Christian ten Pathen dihtah houkahi itiuleh kingailutna jal la sum kipeh to ding, kisahto ding doltah ahije. Ikitah lou jeh uva sumthoi ineh u hitei ding dan in kamu in ahi. Bolhih in, ne hih in kiti thucheng Eve le Adam in abollhon, aneh lhon jeh a genthei ahi lhon ahin, eiho Christian honjong Bible/ Pathen in bolhih in, ne hih in ati ho jouse ibol jing’u, ineh jing jeh uva hiti ihiuve. Pathen thu ngai loute ihijeh uva lamvai ihiuve. Sei ngailou kiti hi manthahna lien tah ahi. Lot in neipi jong Pathen vantil in Sodom le Gomorrah khopi a aga puidoh nia naki nunghei louhel ding ahi ati peh vang’a akinung heijeh a chisuong soh ahitai, hichu manthahna ahi. Akinung hei na ajeh chu Chritian kahi ti jousen ihetsohkeiju ahi. Eimite jong Lot inneipi tobang hi 50% um ihijeh uva inamsung’u hi dam theilou, manthah na le lamvainan ijuiju ahi. Lamka khopi hi eimite khopi lenpen ahin, kuki society kaven kalung adong’e. Zomi society sung kaven kalung adong’e, Hmar society sung kaven kalung adong’e. Chule Mizo society sung jong kaven kalung adong’e. Ipijeh a lungdong kahim ? koima chan iman gel ponte. Ken vang kapohnat na khat um ahije. Kapoh natna hi bei theile vang Unity / Integration umtante, Insung khat kihi tante. Van Pathen jong eimite chung’a lunglhai jintin, kipah tante. Inamsung’u va hin ikam uva iseidoh louvang’ uvin communalism, hatred, jealously a-um kamu in, phamo kasalheh jeng in ahi. Apolang, ikamsung’a apha pha seiding hijolou vin, anatoh a apha/ahoi/kitona ding/kilungsetna ding/kipumkhatna ding ho bou pohdoh ding ahi. Eimite society sung’a napha tong ho, mikhoto ho, kipum khatna ding ngaito hohi mi mu da kichang ahin, thudih/thutah seiho le lamdih a jang petna cheho koiman amu nompon, apah cha ngaipoi. Hinlah eimite hi hitia hi ichon jing’u leh manthahna le lamvaina toh ikikhen theilou heldiu, ithipiteitei diu ahi nalaijin ahi.