Dec. 24, 2015 – NUNGAH THENGA KHRISTA PEN LE BIOLOGICAL SCIENCE By:...

Dec. 24, 2015 – NUNGAH THENGA KHRISTA PEN LE BIOLOGICAL SCIENCE By: Helun Kipgen, Langol, Imphal

173
0
SHARE

Apeng lha loulai naosen thajunga um thisan chu anu akona akilah ahipoi hichu naocha (Foetus) tahsa mama akona hung umdoh ahiti tun hetchen ahitai. Pasal botui (sperm) chu numei naonei theina atui (ovum) a alut teng le bou naocha hung kijil panna chuleh thisan hung kilang dohji ahi. Atepi bailam penin ahcha tui khu veu hite. Achal botui lutlouna ahtui (unfertilized egg) khu numei nao neitheina atui (ovum) tobang ahi, chuto bang ahtui chu ahpin itihchan op (incubate) jong leh ahnou kigong lou ding, hung moh tah dena keulou hel ding ahi. Ahin ahpi tui-a chu ahchal botui akikap lutna hichu ahpin aop ahilouleh akisuhlum (artificial incubation) teng ahtuija chu ahnou (embryo) hung kijilla asunga hinna (life) hung umpan a pung phabep jou teng mitna mutheija hung kisemtoh jep jepma phat chom khat sunga thisan abeh beh a hung guijam pana thisan hung kilang dohji ahi. Chutia chu Bible in asei banga hinna (life) chu thisanna um ahi; ajeh chu Mosin hitin ana seije “Ijeh inem itileh tahsa hinna hi thisanna umah ahi….ganhing jouse hinna chu thisan hi ahiye” (Lev. 17:11,14). Apeng lha loulai naocha tahsa khantouna dinga thil kiphamo (nutritive elements) jouse chu anu in apeh ahi, hinlah atahsa-a um thisan vang chu naocha ama tahsa mama akonna umdoh ahi. Naobu sunga naocha ahung kijil apatna apen lhah chan anu le acha kikah a thisan vat khat jong longmat lou ahi. Naocha umna bom naolai (placenta) khu naocha le anu kiguijopna ahi. Kihinsona dinga kiphamo : Proteins, Fats, Carbohydrates, Salts, Minerals le natna daldoh Antibodies ho chu anu akonna acha a bailam tah a naolai mang cha-a long matna chuleh naocha tahsa akonna anen (waste products) ho jong chu alepoh kitna anu jun le eh-a potji ahi. Ahin naocha le anu kikah-a thisan vat khat jong along mat poi tihi Biological Scientists hon aphot chet-u ahitai. ( Ref.: 1. Howell’s text book of physiology, 2. William Practice of Obsterics and 3. Nurses Handbook of obstetrics by Louise Zabriskie). Pathen in achapa Khrista nungah thenga konna apena dinga atohgon chu iti kidan hitam ! Pathen in numei ana sem chun numei akonna thisan chu anaobu sunga um naocha-a alon mat louna din ana sem e. Mimasa Adam-a konna kilason tahsa phe po hiding amavang achonset thisan chan khompi lou chuto bang mihem khat umdoh theina ding lampi chu Pathen in agon anangai ahi. Ajeh chu Adam thisan vat khat in jong Jesu chu nang le kei tobang michonse (Psalms 51:5) aso-a huhhingpu anahi theilou ding ahi. Ajeh chu “ Thisan so louva ngaidamna umlou ahi” (Heb. 9:22). Hichu chonset beh lou thisan hiding ahi. Mihem chapa Jesu chonset neilou ahiti Bible in aseisa chu Science in jong aphot chen ahi. Chonset in mihem thisan chu monmang thei aso ahi. Ahin Jesu tahsa in mon mang theina atolou ding ahi tin David in anasei je. Mihem chonset thipi dinga nithum le janthum anathi tilou Jesu chu thinan ana henjou poi kitichun aphotchen ahitai. Chule Khrista chu bulhingset mihem hiding amavang mihem chonset thisan akikoppi lou ding chu Nungah Thenga apen chun ahithei sah ahiti imutaove. Mimasa Adam chonset thisanin thina thutan chu apoh jeh-a achilhah mihem jousen thina ipel theilouvu ahitai. Ajeh chu Pathen in “…hiche theiga khu naneh ninileh nathi teitei ding ahi” ati (Gen.2:17). Eve chu Adam sanga chonset bolmasa ahivangin, ama chonset chun eitongkha pouve. Ahin mihem jouse chunga thina hin po chu Adam thisan chu ahi. Chuti ahi jeh-a chu Bible in mihemte hi ADAM chilhah eitiuva, Jesu vang chu NUMEI chilhah ati ahi. Jesu thajunga chun Adam chonset thisan vat khat jong apang poi ajeh chu Anu “ Mariam chu Lhagao thenga konna gaija ahi” (Matt. 1:18-20). Courtesy : Hinkhothah Galsat ( Dec.2011) A New Life Crusaders’ Publication