Dec. 24, 2015 – HUHHINGPU MIT’A MU KELNGOI CHINGHO AKON KIHILNA ...

Dec. 24, 2015 – HUHHINGPU MIT’A MU KELNGOI CHINGHO AKON KIHILNA By: Jangminlal Touthang Text: Luke 2: 8-18 (Dated; 10/10/2015)

159
0
SHARE

THUMAKAI: Kelngoi ching ho akon ki hil ding ihi jeh uvin I Pakai Jesu lei mihem a ahung pen phat lai ja kel ngoi ching ho um dan them khat sei masau hite. Kelngoi ching aki ti teng tulai ja kelngoi ching ho toh kikheh na um ahi ti hi het masat angai jin ahi, chu chi phat lai ja kelngoi ching hoi chu aki cho doh sa ahiuvin apu te thu thu ahi tauvin soh tabang hingkho nemnung chu ana man jiu ahi. Amaho din jui ding dan tampi tah aum in hijong le them khat seiju hite. 1. Kelngoi ching mipa khat chun Hamhing dum lah lah ahol ding twi veina mun hoi tah tah umna mun a akelngoite apui jing ding chu akin ahi (Ps. 23:2) 2. Kelngoi ching khat dia chu a kelngoi ho gamsa hanglai akon aven doh ding leh kum kihei chin ho (Weathers) akon aven bit ding chu ama kin ahi. (Amos 3:12) 3. Kelngoi khat tou ava mang khah tah jong leh amudoh tokah se’a ahol ding chu amo pohna ahi. (Ezk. 34:11,12). 4. A tohmun in mihem ho len naphah hitalou mun a apui lut angai kom jong leh, pon vai aki poh loi jeng’a hichi kelngoi lhatle na mun ho a chu Pon in (Tents) a cheng jeng ding ahiuve. (Isai. 17:40-49) 5. Kelngoi ching khat dia aloi kiphal peh chu uicha khat bou ahi (Job. 30:1). 6. MIhem khat dia mu phah jou hilou leh ven doh jou thei hilou mun ho tailouva Kelngoi ching ho chun Kelngoi mansah aum leh amahon amang jat chu asah kit diu ahi (Gen. 31:39; Ex. 22:10-13). Hitobang nemnung leh genthei hiu hi jong leh Pathen in Huhhingpu ki maitopi ding in ana dei jin Huhhingpu mit’a mu masa pen ana hi tauvin ahi. Amaho akon ijil doh thei u thil thum i ladoh nom u chu     1. Seingaina 2. Kiphal thengna 3. Tompan na kiti ho ahi. 1. Sei ngai na (V.15): Kelngoi ching ho chu Pakai Vantil in Huhhingpu apeng tai ti asei peh goh hilou vin amel chihna apen ahi. Hichu ipi ham iti leh;  ache uva aga vet uleh naosen (huhhingpu) chu pon a kijel a gan ankong sung’a lumding ahi tia athu lhah u ahi. Hinlah Amaho hi thu patna lam a isei bang uva chu gam la tah’a in/kho dalha a gam thip noija loujao a chu ponbuh kison a dap sa tah a um ahiuve. Amaho dia khopi sung’a ga che a naosen peng khat ga vet ding chu ngap lel umtah leh thada um mama jeng din mun chu ahi. Hitobang mi genthei nemnung ho chun touna ding sangan leh sakol kangtalai kiti ho lah nei pouvin tin, phalbi dap lai tah’a dai twi vot jin jen chu noh jeng a Bethlehem khopi ahin jot diu chu lung lal umtah ahi. Hina ma jong leh amahon hichi Daitwi dap pal a phalbi jan dap noija Huhhingpu melhoi tah ga mu ding chu a tha’u anop joh jeh chun sei ngai tah in khopi chu ahin jon uvin, Huhhingpu chu amit tah uvin aga mu uvin  ahi. Hi tobang ma chun  sopi nang leh kei in jong tu nia Huhhingpu kimu to pi ding itup ahi leh seingaina hinkho iman ding hi ahi pen e. Ajehchu seingaina kiti hi ki huhhingna leh, ase lam peldoh theina pen chu ahi ti suhmil lou aphai. Mihem khat a ihung pen ahi tah a ahi leh nikho khat leh thikit ding ihiuve, tunin na hinkho hi bei taleh tonsot Hinkho mun ni aum in khat chu tonsot meidil ahi khat chu tonsot vangam ahi. Hichi hi mihem khat dia pel thei lou mun chu ahi lhon e. Tonsot van gam chu na che nading ahi khah leh aphai ahin lah Tonsot meldil chu jon ding hikha tale chun iti ding nahim??? hichi thina mun akon naki huhhing na dia Huhhingpu lei mihem a hung pen ahi. Tunia einin ibol ding pen chu sei ngai tah a huhhingpu umna mun eihin holdoh ding bou hi ikin thupi pen chu ahi tai. Genesis 6-7 lang a Ipu Noah khang thusim chu ve tem in chu bang nichang sat ham vevu lai tah in aman Pathen thupeh chu sei ngai tah in ajui jin kong phatah aki sujin ama leh a insung mite chu leh leiset chung a ahing thei gancha hijat pi hi ana huhhing e. Hichu sei ngai jeh hilou ham??? Jonah bung 3 sung’a Nineveh khopi thu sim chu ven, sei ngai jeh in suhmang thah ding khopi chu huhhing in aum tai, Lengte nina 5:14 ven  Naman kitipa Syria Sepai jalam kai pa chu seingai jeh’a ati phah chu dam theng sel hilou ham??? Tunia Pathen thu ijat kisei ijah u hitam? Neh phalou ne lou ding, thil phalou bol lou ding, toh phalou tong lou ding tia ijat vei iki sei peh u hitam? Hichi ho ngaisah lou mi chun Huhhingpu itih in kimu doh deh pon te. Hijehchun Sopi ngaicheng in tuni hin seingai ja Pathen thu peh nit tading in Huhhingpu henglam jon in kalsong pan tau hite. 2. Kiphal Thengna (V.15c): Kelngoi ching ho chu akelngoi chin u khoh lheh jeng ding ahi, Gam lah  ahi lou leh lou jao dung’a kelngoi hon khat aching beija hin moh dalhah jeng ding kiti chu thil bai ahi pon ahi. Amang aum khah kit leh amahon asah kit diu ahi nalai je. Hinama jong leh Huhhingpu mit a mu tei ding chu alung thim pum piuva anop tah jeh un achung uva itobang gotna len lhung ding ho leh man na lhung dingho hi jong leh gel khoh na nei talou in ki phal theng tah in Huhhingpu pen na lam joh ahin jon tauvin ahi. (Kelngoi aman leh mang kei ka leu jong leh leu jeng, tia punishment ijat um jong leh ging talou ahiuve). Hiti a chu khapet cheng a Huhhingpu penna lam ahin jot uva amit tah a ahung mu u ahi. Tunin nang leh kei jong Huhhingpu toh kimu to ing e iti leh eija kon a i phal theng ding thil angai cha aum tan ahi. Pathen in tunia iki phal nau sum le pai thil le lo ho hi akipapi ahi pon ahi, hinlah ilungthim giltah ama dia iphal diu chu adei jin ahi, tunin Pakai dia lung thim phal nom lou atam tah jeh in ihoubung sung aboi tan ahi, Pathen adia lungthim phal theng leu hen Neh phalou don phalou, umchan phalou ingah thei diu ahi, loulhona sum holna phalou ida lhah ngam diu ahi ti ka tahsan e. Hiteng chu leh Huhhingpu chu iki muto pi thei ding ahi bouve. Pathen a dia a lungthim phal theng hon ama lenggam adin sum le pai nei le gou jong a it ji tapoi, mi peh man mi bol man in abol ji tapon, miho jousen pe tahih jong leh anei sun atoh doh ngap cha jiuvin ahi. Genesis 22:18 sunga Ipu Abraham hinkho chu ven ateh jou nung sang a ahin achapa chang khat seh Issac chu Pakai ja din pumgo thilto in atoh doh jeng in ama din Phat theina chamkim ahitai. Daniel 3:18 vekit in Sadrach, Meshack, Abednigo thusim chu Pathen a dia ahin kho’u thi ding geija ana phal tah jeh un agaso chu mihon Pathen amu doh nau leh Pathen leng gam keh letna ahung hitai. Hichi ho jouse hi kimoh phal theng na hi deh lou ahi, ahin lah amasa tadia alung thim pum piu Huhhing pu Pathen adia ana phal tah jeh u ahi. Sopite Ilungthim pumpiu Huhhingpu muna din peu hite, chu teng leiset a chonsetna jouse toh iki khen thei diu ahi. 3. Tom Pan Na: Kelngoiching ho chu mi nemnung pen soh a kivul ho ahiuve ituve, Hiti ahi jeh chun amaho hin Huhhingpu penna mun Bethlehem khopi hung lhun thei na ding in sangan ho leh tou na thei sakol kangtalai ima jong nei pouvinte ti chu mu chen ahi. Chuban a jong von hoi vonpha tua eihon Hunghingpu pen ilem nadiuva iki choh tobang houhi nei pouvin tin dap thoh na thei nei pouvinte. Chu ban ah jong khopi sung lut ding ahi tah jeh uva kisem hoina thei von ima jong anei kit lou diu ahi. Hitobang a dinmun hahsa hiu hita jong leh lung lhadai deh lou vin Tompan tah in alung gil sung’a agel jing u Huhhingpu chu mukal ngah lal in tong lamsao son in Bethlehem kho lam chu ahin jon tauvin phalbi huilhi dap jin jen thoh pum pum in kal ahin song un, ajo jo nan adei pen u Huhhingpu chu ahung kimu tauve. Tunin i Christian hinkho hi ve le chun tompan na avat lheh lheh jeng tan ahi, ami takip hi chim loi loi jeng, thada loi jeng, ngah doh loi jeng nom ngen ihi gam tauve. Ahin lah sopi tompan na tailou va Huhhingpu imu na ding lampi aum pon ahi. Huhhing pu kimu doh thei na din agomlam kiti aum thei pon, aman adei lam a um chu agom lam ahi pen e. Thuchaina: Tunia avel a igel phat diu chu Huhhingpu mu thei na ding ahi phot leh kelngoi ching ho hinkho man bang a Seingai hinkho man a Pathen in bol lou ding ati jouse bolda jeng hi ahi, aban in Huhhing pu kimu to pi thei na dia ilung thim pumpi ama dia peh doh theng sel angai je, athum na in Huhhingpu adia tompan tah a pan ding amel imu kahsea hol jing ding ahi ti hi iki tep na’u ahi.